Jehova, E Husto “Huez di Tur e Tera”
“E Tata . . . ta huzga sin distincion segun e trabao di cada un.”—1 PEDRO 1:17.
1, 2. (a) Pakico e idea di cu Jehova Dios ta e Huez grandi mester hácinos temoroso i també dúnanos consuelo? (b) Den e caso legal di Jehova contra e nacionan, sirbidor terrenal di dje ta hunga cua papel?
JEHOVA ta e gran “Huez di tur e tera.” (Génesis 18:25) Como Dios Supremo di universo, e tin derecho absoluto pa huzga su creacion. Esei ta un declaracion inspirador di temor i també consolador. Moisés conmovedoramente a expresa loke ta parce un contradiccion, bisando: “Jehova boso Dios ta e Dios di diosnan i Señor di señornan, e Dios grandi, poderoso i inspirador di temor, cu no ta trata ningun cu favoritismo ni no ta acepta soborno, ta ehecuta huicio pe huérfano sin tata i e biuda i ta stima e residente stranhero pa duné pan i mantel.”—Deuteronomio 10:17, 18.
2 Ki un balanza notable! Un Dios grandi, poderoso, i inspirador di temor, pero cu no ta haci distincion i ta defende amorosamente e interés di huérfano, biuda, i residente stranhero. Ken por deseá un Huez mas amoroso cu Jehova Dios? Pintando su mes como un Persona cu tin un caso legal contra e nacionan dje mundo di Satanás, Jehova Dios ta yama sirbidor di dje riba tera pa ser su testigonan. (Isaías 34:8; 43:9-12) E no ta depende di nan testimonio pa establece su divinidad i soberanía legítimo. Pero e ta duna su testigonan e privilegio grandi di duna testimonio dilanti tur humanidad di cu nan ta reconoce su supremacía. Testigo di dje ta someténan na su husto soberanía, i cu nan sirbishi público, nan ta conmove otronan pa pone nan mes bao di autoridad dje Huez Supremo.
E Manera di Jehova di Huzga
3. Cua resumen por ta duná dje manera di Jehova di huzga, i con esei tabata ilustrá den e caso di Adam i Eva?
3 Durante e principio dje existencia di humanidad, Jehova Dios a huzga personalmente cierto violador. Ehempel di su manera di trata cu asunto hudicial a pone ehempel pa cierto sirbidor di dje cu despues tabata responsabel pa conduci procedimento hudicial den su pueblo. (Salmo 77:11, 12) Un resumen di su manera di huzga por bisa: firmeza unda ta necesario, misericordia unda ta posibel. Den e caso di Adam i Eva, creacion humano perfecto cu a rebela boluntariamente, nan no a merece misericordia. P’sei, Jehova Dios a sentenciánan na morto. Pero su misericordia a drenta den e wega den e caso di nan yiunan. Jehova a tarda ehecucion di sentencia di morto, i asina a permiti Adam i Eva haya yiu. El a percura amorosamente desendiente di nan cu un speranza di liberacion for di esclabitud na picá i morto.—Génesis 3:15; Romano 8:20, 21.
4. Con Jehova a trata cu Caín, i pakico e caso ta di interés special?
4 E manera cu Jehova a trata cu Caín ta di interés special aki pasobra esei ta e promé caso skirbí tocante desendiente imperfecto di Adam i Eva, “bendí bao di picá.” (Romano 7:14) Jehova a tuma esei na cuenta i a trata cu Caín distinto dje manera cu el a trata cu su mayornan? I e caso ei por percura un les pa superintendente cristian djawe? Láganos mira. Mirando e reaccion incorrecto di Caín ora su sacrificio no tabata aceptá favorablemente, Jehova amorosamente a advertié cu e tabata den peliger. Un proverbio bieu ta bisa: ‘Prevencion ta mihor cu curacion.’ Jehova a bai tanto leu posibel advertiendo Caín di cu e tabata permiti su inclinacion pecaminoso dominé. Dios a haci esfuerzo pa yudé “bolbe na hacimento di loke ta bon.” (Génesis 4:5-7) Esei tabata e promé bez cu Dios a pidi hende pecaminoso arrepenti. Despues cu Caín a manifesta un actitud no arrepentido i a comete su crimen, Jehova a sentencié na destierro, i a suaviza esei cu un decreto prohibiendo pa otro hende maté.—Génesis 4:8-15.
5, 6. (a) Con Jehova a trata cu e generacion promé cu e diluvio? (b) Kico Jehova a haci promé cu el a ehecuta huicio contra habitante di Sodoma i Gomorra?
5 Promé cu e diluvio, ora ‘Jehova a mira cu e maldad di hende tabata abundante den e tera, el a sinti duele den su curazón.’ (Génesis 6:5, 6) El a “sinti duele” pasobra a duelé cu e mayoría dje generacion promé cu e diluvio a haci mal uso di nan boluntad liber i cu e tabatin cu ehecuta huicio riba nan. Sin embargo, el a dúnanan un debido spiertamento, usando Noé pa hopi aña como “un predicador di husticia.” Dje ora ei padilanti, Jehova no tabatin motibo pa ‘nenga di castiga e mundo di hende malbado.’—2 Pedro 2:5.
6 Di igual manera, Jehova a keda obligá di trata cu un caso legal contra habitante corrupto di Sodoma i Gomorra. Pero ripara con el a sigi. El a tende un “sclamacion di kehamento” tocante e conducta escandaloso dje pueblo, aunque den e oracion di husto Lot so. (Génesis 18:20; 2 Pedro 2:7, 8) Pero, promé cu el a dal paso, Dios ‘a baha’ pa comproba e echonan usando su angelnan. (Génesis 18:21, 22; 19:1) També el a aparta tempo pa duna siguranza na Abraham di cu lo e no haci nada inhusto.—Génesis 18:23-32.
7. Cua les anciano cu ta sirbi den comité hudicial por siña for di ehempel dje manera di huzga di Jehova?
7 Kico anciano djawe por siña for di tal ehempel? Den e caso di Adam i Eva, Jehova a demonstra amor i consideracion pa esnan cu, aunque nan tabata famía di esnan culpable, nan tabata sin culpa den e caso. El a mustra misericordia pa desendiente di Adam i Eva. Den e caso di Caín, Jehova a mira di antemano cu Caín tabata den peliger i a razona bondadosamente cuné, haciendo esfuerzo pa strobé di comete picá. Asta despues di a mandé for di su tera, Jehova a mustra consideracion pa Caín. Además, Jehova a ehecuta huicio riba e generacion promé cu e diluvio solamente despues di a demonstra hopi pacenshi cu awante. Enfrentá cu maldad obstiná, Jehova “a sinti duele di curazón.” A duelé cu hende a rebela contra su gobernacion husto i cu el a keda obligá di húzganan desfavorablemente. (Génesis 6:6; compara cu Ezekiel 18:31; 2 Pedro 3:9.) Den e caso di Sodoma i Gomorra, Jehova a actua solamente despues di a comproba e echonan. Ki ehempel excelente pa esnan djawe cu tin cu huzga caso legal!
Huez Humano den e Tempo di Patriarca
8. Cua ley básico di Jehova tabata conocí den tempo di patriarca?
8 Aunque aparentemente no tabatin ley skirbí den e tempo ei, e arreglo social di patriarca a conoce ley fundamental di Jehova, i sirbidor di dje tabata bao di obligacion di observánan. (Compara cu Génesis 26:5.) E drama den Eden a mustra e necesidad di obedencia i sumision ne soberanía di Jehova. E caso di Caín a revela cu Jehova no ta aproba di asesinato. Un bez despues dje diluvio, Dios a duna humanidad ley tocante e santidad di bida, asesinato, castigo di morto, i comimento di sanger. (Génesis 9:3-6) Jehova a condená fuertemente adulterio durante e incidente enbolbiendo Abraham, Sara, i Abimelec, rey di Guerar, cerca Gaza.—Génesis 20:1-7.
9, 10. Cua ehempel ta mustra cu un sistema hudicial a existi den e arreglo social di patriarca?
9 Den e tempo ei cabez di famía a actua como huez i a trata cu problema legal. Jehova a bisa tocante Abraham: “Mi a yega di conocé, pe manda riba su yiunan i su cas despues di dje, pa nan berdaderamente warda e camina di Jehova pa haci husticia i huicio.” (Génesis 18:19) Abraham a demonstra inegoísmo i comprendimento decidiendo un pleitu entre wardador di carné di dje i esnan di Lot. (Génesis 13:7-11) Actuando como patriarca i cabez i huez, Hudá a condená Tamar, su nuera, pa ser piedrá i kimá, pasobra el a kere cu e tabata adúltera. (Génesis 38:11, 24; compara cu Hosué 7:25.) Sin embargo, ora el a tende e berdad, Hudá a declara cu Tamar tabata mas husto cuné mes. (Génesis 38:25, 26) Ta ki importante pa conoce tur e berdad promé cu un decision hudicial ta wordu tumá!
10 E buki di Job ta indica un sistema hudicial i ta mustra cu huicio sin distincion ta deseabel. (Job 13:8, 10; 31:11; 32:21) Job mes a corda e tempo ora e tabata un huez respetá cu a sinta na porta dje stad i a administra husticia i a defende derecho di biuda i huérfano. (Job 29:7-16) Asina, tin evidencia di cu den e arreglo social di patriarca, “homber di mayor edad” a actua como huez den desendiente di Abraham asta promé cu salimento for di Egipto i estatuut legal cu Dios a duna e nacion di Israel. (Éxodo 3:16, 18) Realmente, estipulacion dje pacto di Ley tabata presentá pa Moisés na “homber di mayor edad,” of anciano, di Israel, cu a representa e pueblo.—Éxodo 19:3-7.
E Sistema Hudicial di Israel
11, 12. Segun dos escolástico bíblico, kico a distingi e sistema hudicial di Israel for di esun di otro nacion?
11 Administracion di husticia den Israel tabata basta distinto di procedimento legal cu nacion alrededor a sigi. Ningun distincion tabata hací entre ley civil i ley criminal. Nan dos tabata enlazá cu ley moral i religioso. Un ofensa contra nan próhimo tabata un ofensa contra Jehova Dios. Den su buki na inglés E pueblo i fe den e Bijbel, autor André Chouraqui a skirbi: “E tradicion huridical dje hebreonan ta distinto di esun di nan beciña, no solamente den e nificacion cu el a duna delito i castigo sino també den e spiritu mes dje ley. . . . E Tora [Ley] no ta distinto di bida diario; e ta manda riba e naturaleza i contenido di bida diario, dunando bendicion of maldicion. . . . Den Israel . . .ta casi imposibel pa haci un distincion claro den actividad hurídico dje stad. Nan tabata scondí den e unidad di un bida completamente orientá rond di cumplimento dje boluntad di e Dios bibo.”
12 Tal situacion singular a pone e administracion di husticia den Israel riba un nivel hopi mas halto cu esun di nacion contemporáneo. Escolástico bíblico Roland de Vaux a skirbi: “Ley israelita, apesar dje semehanza di forma i contenido, ta radicalmente distinto di cláusula di ‘tratado’ oriental i artículo di nan ‘código’. Esei ta un ley religioso. . . . Ningun código oriental por ta compará cu ley israelita, cu ta ser atribuí henteramente na Dios como su autor. Si e ta contene, i hopi bez ta mezcla, mandamento moral i ceremonial, esei ta pa motibo cu e ta cubri tur e campo dje Pacto divino, i pa motibo cu e Pacto a goberna relacion di hende un cu otro i també nan relacion cu Dios.” Tin poco di straña cu Moisés a puntra: “Ta existi cua nacion grandi cu tin reglamento husto i decision hudicial manera tur e ley aki cu mi ta pone dilanti boso awe?”—Deuteronomio 4:8.
Huez den Israel
13. Di ki manera Moisés tabata un ehempel excelente pa anciano djawe?
13 Cu un sistema hudicial halto asina, ki clase di hende tabata necesario pa actua como huez? E Bijbel ta bisa tocante net e promé huez nombrá den Israel: “E homber Moisés tabata hopi mas manso cu tur hende cu tabata riba e superficie dje tera.” (Número 12:3) Siguramente e no tabatin demasiado confianza den su mes. (Éxodo 4:10) Aunque e tabata mandá pa huzga e pueblo, tabatin bez cu el a bira nan defensor dilanti Jehova, rogando Jehova pa pordonánan i asta a ofrece di sacrifica su mes pa nan. (Éxodo 32:11, 30-32) El a bisa poéticamente: “Mi palabra lo gotea manera serena, mescos cu yobida suave riba yerba i mescos cu awaceru abundante riba e matanan.” (Deuteronomio 32:2) Leu di huzga e pueblo dependiendo di su mes sabiduría, el a declara: “En caso cu ta presenta un caso di nan, e mester bini cerca mi i mi mester huzga entre un parti i e otro, i mi mester duna di conoce e decision di e Dios berdadero i su ley.” (Éxodo 18:16) Ora e tabatin duda, el a presenta e asunto na Jehova. (Número 9:6-8; 15:32-36; 27:1-11) Moisés tabata un ehempel excelente pa anciano cu awe ‘ta pastoreá e tao di Dios’ i ta tuma decision hudicial. (Echo 20:28) Laga nan relacion cu nan rumanan també resulta di ser “mescos cu yobida suave riba yerba.”
14. Menciona calificacion spiritual di homber cu Moisés a nombra como huez den Israel.
14 Despues, Moisés no por a wanta e carga su so di tratamento cu caso hudicial pe pueblo. (Éxodo 18:13, 18) El a acepta sugerencia di su suegro di busca yudanza. Atrobé, cua clase di homber tabata escogí? Nos ta leza: “‘Scoge for di tur e pueblo homber capaz, temeroso di Dios, homber digno di confianza, odiando ganashi inhusto.’ . . . I Moisés a procede di scoge homber capaz for di tur Israel i dúnanan puesto como cabez riba e pueblo, como hefe di miles, hefe di cientos, hefe di cincuenta i hefe di diez. I nan a huzga e pueblo na tur ocasion apropiado. Un caso duro nan a hiba pa Moisés, pero tur caso chikito nan mes a huzga como huez.”—Éxodo 18:21-26.
15. Menciona calificacion di homber cu a sirbi como huez den Israel.
15 Nos por mira cu edad no tabata e único criterio pa scogimento di homber pa actua como huez. Moisés a bisa: “Haya homber sabí i prudente i cu experencia di boso tribu, pa mi pónenan como cabez riba boso.” (Deuteronomio 1:13) Moisés a conoce perfectamente loke e hoven Eliú a bisa hopi aña promé: “No ta solamente esnan simplemente abundante den dianan cu ta resulta di ser sabí, ni esnan cu ta simplemente bieu cu ta comprende huicio.” (Job 32:9) Siguramente, esnan nombrá tabatin cu ser “homber cu experencia.” Pero, sobre todo, nan tabatin cu ser capaz, temeroso di Dios, homber digno di confianza, cu a odia ganashi mal ganá i cu tabata sabí i prudente. P’sei, ta parce bisto cu “cabez” i “huez” mencioná den Hosué 23:2 i 24:1 no tabata distinto di “homber di mayor edad” mencioná den e mesun texto pero tabata escogí for di den nan.—Mira Insight on the Scriptures, Volumen 2, bladji 549.
Administracion di husticia
16. Nos mester ripara kico awe tocante instruccion cu Moisés a duna huez recién nombrá?
16 Moisés a bisa tocante instruccion duná na huez nombrá: “Mi a sigi pa manda boso huez ne tempo ei en particular, bisando, ‘Ora boso ta tene un verhoring entre boso rumanan, boso mester huzga cu husticia entre un homber i su ruman of su residente stranhero. Boso no mag haci distincion den huzgamento. Boso mester scucha e chikito mescos cu e grandi. Boso no mag temoriza pa causa di hende, pasobra e huicio ta pertenece na Dios; i e caso cu ta mucho duro pa boso, boso mester presenté na mi [Moisés], i mi mester scuché.’”—Deuteronomio 1:16, 17.
17. Ken tabata nombrá como huez, i cua spiertamento rey Jehosafat a dúnanan?
17 Naturalmente, nan por a hiba caso dilanti Moisés solamente durante su bida. Pues, otro arreglo a wordu hací pa caso dificultoso ser hibá dilanti sacerdote, levita, i huez specialmente nombrá. (Deuteronomio 17:8-12; 1 Crónica 23:1-4; 2 Crónica 19:5, 8) Rey Jehosafat a bisa huez cu el a nombra den stad di Hudá: “Mira loke boso ta haci, pasobra boso no ta huzga pa hende sino ta pa Jehova . . . Asina boso mester haci den temor di Jehova cu fieldad i cu curazón completo. En cuanto tur caso legal cu lo bini dilanti boso di boso rumanan cu ta biba den nan stad, . . . boso mester advertínan pa nan no haci malu contra Jehova i indignacion no por tin cu tuma lugar contra boso i contra boso rumanan. Asina boso mester haci pa boso no bira culpable.”—2 Crónica 19:6-10.
18. (a) Menciona algun principio cu huez di Israel tabatin cu aplica. (b) Huez tabatin cu tene kico presente, i cua texto bíblico ta mustra e consecuencia di lubidamento di nan?
18 Hunto cu principio cu huez di Israel tabatin cu aplica tabata lo sigiente: husticia igualito pa hende ricu i pober (Éxodo 23:3, 6; Levítico 19:15); estrictamente ningun distincion (Deuteronomio 1:17); ningun aceptacion di soborno. (Deuteronomio 16:18-20) Huez tabatin cu corda constantemente cu hende cu nan a huzga tabata e carnénan di Jehova. (Salmo 100:3) Realmente, un motibo pakico Jehova a rechaza Israel carnal tabata cu nan sacerdote i wardador no a huzga cu husticia i a trata e pueblo cu severidad.—Jeremías 22:3, 5, 25; 23:1, 2; Ezekiel 34:1-4; Malaquías 2:8, 9.
19. Examinacion aki di norma di husticia di Jehova promé cu e era común ta di ki balor pa nos, i kico lo ser considerá den e sigiente artículo?
19 Jehova Dios no ta cambia. (Malaquías 3:6) E repaso breve aki dje manera cu huicio tabatin cu ser administrá den Israel i e manera cu Jehova Dios a considera cualkier nengamento di husticia mester detene anciano ken awe ta responsabel pa tumamento di decision hudicial. Ehempel di Jehova Dios como Huez, i e sistema hudicial cu el a institui den Israel, a establece principio cu a pone modelo pe administracion di husticia den e congregacion cristian. Nos lo mira esei den e sigiente artículo.
Pregunta di repaso
◻ Ki resumen nos por duna dje manera di huzga di Jehova?
◻ Ki ehempel dje manera di Jehova tabata demonstrá den su tratamento cu Caín i e generacion promé cu e diluvio?
◻ Ken a sirbi como huez den tempo di patriarca, i di ki manera?
◻ Kico a distingi e sistema hudicial di Israel for di esun di otro nacion?
◻ Cua clase di homber tabata nombrá como huez den Israel, i cua principio nan mester a sigi?
[Plachi na página 10]
Den tempo di patriarca i den Israel, homber di mayor edad nombrá a administra husticia na porta di stad