Bo Ta Mira e Nesesidat pa Entrená Otro Hende?

1, 2. Dikon nos mester entrená esnan nobo pa aseptá asignashonnan teokrátiko?

HESUS su mishon prinsipal tabata pa prediká e bon notisia di e Reino. Pero el a tuma tempu tambe pa entrená otro hende pa bira maestro i wardadó di e tou di Dios. (Mat. 10:5-7) Maske Felipe tabata drùk ku su trabou di prediká, sin duda el a yuda su kuater yu muhénan bira efikas den kompartí bèrdatnan bíbliko ku otro hende. (Echo. 21:8, 9) Kon importante entrenamentu di otro hende ta awe?

² Rònt mundu, mas i mas hende ta aseptá e mensahe di e bon notisia. Studiantenan di Beibel mester komprondé kon importante estudio personal ta. Ademas, mester siña nan kon pa prediká e bon notisia i kon pa siña otro hende e bèrdat. Den nos kongregashonnan, mester animá ruman hòmbernan pa traha duru pa nan por kualifiká pa ser nombrá komo sirbidó ministerial i ansiano. Ku “bon instrukshon,” kristiannan maduro por yuda esnan nobo hasi progreso spiritual.—Pro. 4:2, NW.

3, 4. (a) Kon Pablo a mustra ku estudio di e Skritura por yuda hasi bo sirbishi produktivo? (b) Promé ku nos animá nos studiantenan pa nan tin un estudio personal di Beibel, kiko nos mes mester ta hasiendo?

³ Kon importante estudio personal di e Skritura ta? Nos ta haña e kontesta den loke apòstel Pablo a bisa e kristiannan na Kolósas. El a skirbi: “Nos no a stòp di hasi orashon pa boso i pidi Dios pa yena boso ku e konosementu eksakto di su boluntat den tur sabiduria i komprondementu ku su spiritu ta duna, pa asina boso por kana na un manera digno di Yehova a fin di agrad’é plenamente segun ku boso ta sigui duna fruta den tur bon obra i krese den boso konosementu eksakto di Dios.” (Kol. 1:9, 10) Ku e konosementu eksakto ei, e kristiannan na Kolósas lo por a “kana na un manera digno di Yehova a fin di agrad’é plenamente.” Esaki lo a yuda nan pa sigui “duna fruta den tur bon obra,” spesialmente ora nan tabata prediká e bon notisia. Pa nos por sirbi Yehova bon, nos mester tin un estudio personal di Beibel riba un base regular. I ta bon pa nos siña nos studiantenan di Beibel esei.

⁴ Promé ku nos yuda otro hende benefisiá di un estudio personal di Beibel, nos mes mester mira su balor. De echo, nos mes mester tin e bon kustumber di studia Beibel riba un base regular. Pues, puntra bo mes: ‘Ora un doño di kas bisa algu ku ta bai kontra siñansanan di Beibel òf si nan hasi un pregunta difísil, mi por duna kontesta basá riba Beibel? Ora mi lesa kon Hesus, Pablo i otronan a perseverá den sirbishi, mi ta meditá riba ki efekto nan perseveransia mester tin riba mi sirbishi na Yehova?’ Nos tur tin mester di konosementu i konseho for di e Palabra di Dios. Anto si nos konta otro hende kuantu nos a benefisiá di nos estudio personal, nos por animá nan pa nan tambe bira studiantenan diligente di e Skritura i haña e mesun benefisionan ei.

 5. Duna un sugerensia kon nos por yuda studiantenan di Beibel kuminsá hasi estudio personal riba un base regular.

⁵ Kisas bo ta puntra bo mes: ‘Kon mi por entrená mi studiante pa e studia Beibel regularmente?’ Un bon manera pa kuminsá ta di mustr’é kon e por prepará e informashon den e publikashon ku abo ta studiando kuné. Bo por sugerié pa e lesa e porshonnan di e apèndiks di e buki Kiko Beibel Ta Siña Realmente? i buska e tekstonan menshoná. Yud’é prepará pa e reunionnan pa e por duna komentario. Anim’é pa e lesa tur edishon di E Toren di Vigilansia i ¡Despertad! Si e Watchtower Library òf e BIBLIOTEKA ONLINE Watchtower ta disponibel den su idioma, bo por mustr’é kon e por usa nan pa haña kontesta riba preguntanan di Beibel. Komo resultado, muy probablemente lo no tarda mashá ku bo studiante di Beibel tambe lo bin gusta hasi estudio personal di e Palabra di Dios.

 6. (a) Kon bo por yuda bo studiante kultivá amor pa Beibel? (b) Kiko un studiante di Beibel lo hasi si e desaroyá un amor di kurason pa e Skritura?

⁶ Klaru ku nos no ta fòrsa niun hende pa lesa i studia Beibel. En bes di esei, laga nos usa e hèrmèntnan ku e organisashon di Yehova ta proveé pa yuda nos studiante haña un amor mas profundo pa Beibel. Ku tempu, e studiante lo por tin e mesun sintimentu ku e salmista, kende a kanta: “Ta bon pa mi hala serka Dios. Mi a hasi Señor Soberano Yehova mi refugio.” (Sal. 73:28, NW) E spiritu di Yehova sigur lo yuda un studiante di Beibel diligente i gradisidu ku ke hala serka dje.

 7. Kon Hesus a entrená predikadónan di e bon notisia? (Wak e promé plachi.)

⁷ Na Mateo kapítulo 10, nos ta haña instrukshonnan ku Hesus a duna su 12 apòstelnan. En bes di papia den términonan general, el a papia tokante kosnan spesífiko.^[1] E apòstelnan a skucha Hesus miéntras e tabata siña nan kon pa prediká na un manera efikas. Despues, e grupo a sali bai prediká. Komo ku nan a mira e métodonan ku Hesus a usa, no a dura muchu ku nan a bira maestronan kapas di e bèrdatnan di e Skritura. (Mat. 11:1) Nos tambe por entrená nos studiantenan di Beibel pa bira publikadónan efikas di e bon notisia. Ban wak den ki dos manera nos por yuda nan.

8, 9. (a) Kon Hesus a papia ku hende ku el a topa? (b) Kon nos por yuda publikadónan nobo imitá Hesus su manera di kòmbersá ku hende?

⁸ Siña nan kòmbersá ku hende. Hesus a papia hopi biaha ku hende tokante e Reino. Por ehèmpel, e tabatin un kòmbersashon ameno ku un muhé na e pos di Yakòb, ku a keda banda di e stat di Sikar. E kòmbersashon ei a duna bon resultado. (Huan 4:5-30) El a papia tambe ku Mateo Levi, un kobradó di belasting. E Evangelionan no ta bisa mashá tokante e kòmbersashon ei, pero Mateo a aseptá Hesus su invitashon pa bira su siguidó. Mateo i otro hende a skucha Hesus papia na un bankete ku Mateo a tene na su kas.—Mat. 9:9; Luk. 5:27-39.

⁹ Na un otro okashon, Hesus a papia na un manera amabel ku Natanael, kende tabatin un pensamentu negativo tokante hende di Názarèt. Ma Natanael a sintié konmoví pa kambia su pensamentu. El a disidí di siña mas tokante loke Hesus, un hòmber di Názarèt, tabata siña hende. (Huan 1:46-51) Pues, nos tin bon motibu pa entrená publikadónan nobo pa nan papia ku hende na un manera amigabel i trankil.^[2] E publikadónan akí lo keda masha kontentu di mira kon hende di bon kurason ta reakshoná faborablemente na nan interes i palabranan bondadoso.

10-12. (a) Kon Hesus a kultivá interes di hende ku a skucha e bon notisia? (b) Kon nos por yuda publikadónan nobo bira mihó maestro di e bèrdat?

¹⁰ Siña nan kultivá interes. Hesus su tempu pa prediká tabata limitá. Sinembargo, el a tuma tempu pa kultivá interes di hende ku a skucha e bon notisia. Por ehèmpel, un biaha Hesus a siña un multitut di hende for di un boto. Na e okashon ei, el a hasi un milager ku a laga Pedro kue masha hopi piská i a bis’é: “Di awor padilanti lo bo piska hende.” Kon Pedro i su kompañeronan a reakshoná despues ku nan a skucha Hesus i mira loke el a hasi? Nan “a trese nan botonan bèk na tera, i nan a laga tur kos i sigui [Hesus].”—Luk. 5:1-11.

¹¹ Nikodemo, un miembro di e Sanedrin, a mustra interes den e siñansanan di Hesus. E kier a siña mas, pero e tabatin miedu di loke otro hende lo a bisa si el a papia ku Hesus den públiko. Hesus tabata fleksibel i a duna di su tempu; el a topa Nikodemo anochi, leu for di bista di hende. (Huan 3:1, 2) Ki lès nos por saka for di e relatonan akí? Dios su Yu a apartá tempu pa fortalesé e fe di hende. Nos tambe mester ta diligente den hasi rebishita i dirigí estudio di Beibel ku hende ku ta mustra interes den e bèrdat.

¹² Ora nos ta traha den sirbishi ku publikadónan nobo, nos lo por yuda nan bira mihó maestro di e bèrdat. Nos por yuda nan pa kòrda rebishitá asta e hendenan ku a mustra djis un tiki interes. Nos por invitá publikadónan nobo pa kompañá nos ora nos ta hasi rebishita i dirigí estudio di Beibel. Ku animashon i entrenamentu, sin duda publikadónan ku tin ménos eksperensia lo haña e gana di kultivá interes di hende i dirigí nan mes estudionan di Beibel. Nan lo siña tambe pa no entregá muchu lihé, ma pa perseverá i tene pasenshi den sirbishi.—Gal. 5:22; wak e kuadro “Perseveransia Ta Esensial.”

13, 14. (a) Kiko bo ta pensa di e sirbidónan di Dios den Beibel ku a hasi hopi sakrifisio pa yuda otro hende? (b) Den ki maneranan práktiko bo por entrená hóbennan i publikadónan nobo pa mustra amor na nan rumannan?

¹³ Relatonan di Beibel ta resaltá e privilegio ku nos tin di mustra ‘amor pa e rumannan’ i sirbi otro. (Lesa 1 Pedro 1:22; Lukas 22:24-27.) E Yu di Dios a duna tur loke e tabatin, asta su bida, pa sirbi otro hende. (Mat. 20:28) Dorkas “tabata hasi masha hopi bon obra i yuda hende pober.” (Echo. 9:36, 39) Maria, un ruman na Roma, “a traha hopi duru” pa e rumannan den kongregashon. (Rom. 16:6) Kon nos por yuda publikadónan nobo mira e importansia di yuda nan rumannan?

¹⁴ Rumannan maduro por invitá publikadónan nobo pa kompañá nan ora di bishitá rumannan ku ta malu òf di edat. Si ta apropiá, mayornan por bai ku nan yunan ora nan bishitá e rumannan ei. Ansianonan por pidi e kooperashon di otro ruman pa hasi sigur ku nos rumannan stimá di edat tin sufisiente kuminda i ku nan kas ta bon mantené. Asina, hóbennan i publikadónan nobo por siña kon pa hasi bon obra na otro hende. Por ehèmpel, miéntras un ansiano tabata prediká, e tabata bishitá e rumannan ku ta biba den e teritorio pa wak kon ta ku nan. Un ruman hòmber yòn ku hopi biaha tabata kompañ’é a siña asina ku henter e kongregashon mester sinti ku e rumannan ta stima nan.—Rom. 12:10.

15. Dikon ta importante pa ansianonan mustra interes den e progreso di e ruman hòmbernan den kongregashon?

¹⁵ Ta importante pa ruman hòmbernan desaroyá abilidat di papia ya ku ta nan Yehova ta usa pa siña e kongregashon. Si bo ta un ansiano, bo por tuma tempu pa skucha un sirbidó ministerial train su diskurso? Ku bo yudansa, e por bira un mihó maestro di e Palabra di Dios.—Neh. 8:8.^[3]

16, 17. (a) Ki interes Pablo a mustra den e progreso di Timoteo? (b) Kon ansianonan por entrená futuro wardadónan di e kongregashon?

¹⁶ Tin un gran nesesidat pa mas ansiano den e kongregashonnan kristian, i e ruman hòmbernan ku lo hasi e trabou ei den futuro mester di entrenamentu kontinuo. Pablo a duna un idea general kon pa entrená otronan ora el a bisa Timoteo: “Abo, mi yu, laga e bondat inmeresí ku Dios ta mustra na esnan ku ta den union ku Kristu Hesus sigui duna bo mas fortalesa. I e kosnan ku bo a tende serka mi, i ku a keda konfirmá pa hopi testigu, konfia nan na hòmbernan fiel, kendenan na nan turno lo ta adekuadamente kapasitá pa siña nan na otro hende.” (2 Tim. 2:1, 2) Timoteo a siña hopi trahando huntu ku Pablo, un hòmber di mas edat. Anto Timoteo a apliká e métodonan ku el a siña di Pablo den su sirbishi i den otro aspekto di sirbishi sagrado.—2 Tim. 3:10-12.

¹⁷ Pablo a hasi sigur ku Timoteo a haña entrenamentu. I p’esei el a pidi e yònkuman kompañ’é. (Echo. 16:1-5) Ansianonan por imitá Pablo su ehèmpel ora nan laga sirbidónan ministerial kualifiká, ora ta apropiá, kompañá nan den nan bishitanan di pastoreo. Asina sirbidónan ministerial lo haña chèns di mira ku nan mes wowo e fe, arte di siña, amor i pasenshi ku ansianonan mester tin. Esei ta un forma di entrená futuro wardadónan di “e tou di Dios.”—1 Ped. 5:2.

18. Dikon ta importante pa nos entrená otro rumannan?

¹⁸ Komo ku tin mas nesesidat den e kongregashonnan i mas oportunidat pa sirbi Yehova, ta importante pa entrená otro rumannan. E manera ku Hesus i Pablo a entrená otronan ta un bon ehèmpel pa nos awe. Yehova ke pa su sirbidónan djawe ta bon entrená pa nan por kumpli ku nan asignashonnan teokrátiko. Dios ta duna nos e privilegio di yuda rumannan ku ménos eksperensia mehorá nan abilidatnan pa hasi e trabounan nesesario den e kongregashon. Komo ku e situashon rònt mundu ta birando pió i mas oportunidat pa prediká ta sigui habri, ta importante i urgente pa entrená otronan.

19. Dikon bo por tin sigur ku bo esfuersonan diligente pa entrená otronan lo duna bon resultado?

¹⁹ Klaru ku ta tuma tempu i esfuerso pa entrená hende. Pero Yehova i su Yu stimá lo sostené nos i duna nos sabiduria pa duna tal entrenamentu. Nos lo keda masha kontentu di mira esnan ku nos ta yuda sigui ‘traha duru i hasi esfuerso’ den kongregashon òf den sirbishi. (1 Tim. 4:10) I laga nos mes tambe sigui hasi progreso spiritual den nos sirbishi sagrado na Yehova.