Capítulo 27

E Reino di Dios ta nace!

Vision 7—Revelacion 12:1-17

Tema: E muher celestial ta duna luz, Miguel ta combati cu Satanás i ta tiré riba tera

E tempo di cumplimento: Desde entronizacion di Cristo Jesús den 1914 te ne tribulacion grandi

 1. Con un comprendimento di siñal detayá den Revelacion capítulo 12 te 14 por yúdanos?

E SECRETO sagrado di Dios a ser revelá. (Revelacion 10:7) E Reino di Jehova mediante su Mesías awor ta un realidad dinámico. E ta reina! Su presencia ta nifica e destruccion di Satanás i su simía i un glorioso victoria pe Simía dje organizacion celestial di Dios. Sin embargo, angel di siete no a caba tocamento di su trompet, pasobra e tin hopi mas pa revela na nos tocante e tercera calamidad. (Revelacion 11:14) Siñal detayá den Revelacion capítulo 12 te 14 por yúdanos comprende mihor tur loke ta enbolbí den e calamidad i den hibamento dje secreto sagrado di Dios na un terminacion.

 2. (a) Cua siñal grandi Juan a mira? (b) Na ki tempo e nificacion dje siñal grandi tabata revela?

² Awor Juan a mira un siñal grandi—un siñal di interés sobresaliente pe pueblo di Dios. Esei ta introduci un vision profético emocionante, e nificacion di locual tabata pública pe promé bez den e número di The Watch Tower di 1 di Mart di 1925, den un artículo titulá “Nacimento di un nacion” anto atrobé na 1926 den e buki Liberacion. Tal rayo briyante di comprendimento bíblico a bira un marca histórico den e progreso dje trabao di Jehova. Pues, laga Juan detayá e drama mientras cu e ta cuminza desaroyá: “I un siñal grandi a wordu mirá den cielo, un muher bistí cu solo, i luna bao di su pia, i riba su cabez tabatin un corona di diezdos strea, i e tabata den estado. I el a sclama den su dolor i den su agonía pa duna luz.”—Revelacion 12:1, 2.

 3. Ken ta e muher mirá den cielo?

³ Pe promé bez, Juan a mira un hende muher den cielo. Naturalmente, e no ta un muher mes. Mas bien, e ta un siñal, of símbolo. (Revelacion 1:1) Kico e ta simboliza? Den profecía inspirá, tin bez cu hende muher ta representa organizacion “casá” cu persona sobresaliente. Den e Scritura Hebreo, Israel ta ser mencioná como esposa di Jehova Dios. (Jeremías 3:14) Den e Scritura Griego, e congregacion di cristian ungí ta ser mencioná como e bruid di Cristo. (Revelacion 21:9-14) E hende muher cu Juan a mira ei també ta ser casá cu un persona, i e ta cla pa duna luz. Ken ta su casá? Wel, despues su yiu “a wordu rancá i hibá cerca Dios i cerca su trono.” (Revelacion 12:5) Asina Jehova ta mustra cu e yiu ta di dje. P’sei, e hende muher cu Juan a mira tin cu ser esposa simbólico di Jehova.

 4. Ken ta yiu dje esposa simbólico, i kico apóstol Pablo a yama e muher cu Juan a mira?

⁴ Rond di ocho siglo promé, Jehova a dirigié na su esposa simbólico, bisando: “Tur bo yiunan lo ta persona siñá pa Jehova.” (Isaías 54:5, 13) Jesús a cita e profecía i a mustra cu tal yiunan tabata fiel sigidor di dje, cu despues a forma e congregacion di cristian ungí. (Juan 6:44, 45) Pues, miembro dje congregacion, mencioná como yiu di Dios, també ta yiu dje esposa simbólico di Dios. (Romano 8:14) Apóstol Pablo a agrega e pida di informacion final ora el a bisa: “Jerusalem djariba ta liber, i ta nos mama.” (Galatio 4:26) E “muher” cu Juan a mira, anto, ta “Jerusalem djariba.”

 5. Siendo cu e esposa simbólico di Jehova tin un corona di 12 strea, kico realmente ta Jerusalem djariba?

⁵ Pero, exactamente kico ta Jerusalem djariba? Siendo cu Pablo a bisa cu e tabata “djariba,” i Juan a miré den cielo, claramente e no ta un stad terrenal; ni no ta mescos cu “Jerusalem Nobo,” siendo cu tal organizacion ta e bruid di Cristo, i no ta esposa di Jehova Dios. (Revelacion 21:2) Ripara cu e tin un corona di diesdos strea. E cifra 12 ta ser asociá cu loke ta completo dentro di un organizacion.a P’sei, ta parce cu e 12 strea ta indica cu e muher ta un arreglo di organizacion den cielo, mescos cu Jerusalem di antigua tabata asina riba tera. Jerusalem djariba ta e organizacion universal di Jehova di persona spiritual cu ta hunga papel di esposa, tanto den e sirbishi di Dios como den dunamento di yiu na dje.

 6. (a) Kico ta ser indicá pe echo cu e muher cu Juan a mira ta bistí cu solo, tin e luna bao di su pia, i tin un corona di strea? (b) Kico dolor di parto dje muher den estado ta simboliza?

⁶ Juan a mira e muher bistí cu solo i cu luna bao di su pia. Ora e ta bisti su corona di strea, e ta completamente rondoná pa luz celestial. E fabor di Dios ta briya riba dje dia i anochi. Ki un símbolo apropiado dje magnífica organizacion celestial di Jehova! També, e ta den estado, sintiendo dolor di parto. Su sclamacion pa yudanza divino ta mustra cu su tempo a yega pa duna luz. Den e Bijbel, hopi bez dolor di parto ta simboliza e trabao duro necesario pa produci resultado importante. (Compara cu Salmo 90:2; Proverbio 25:23; Isaías 66:7, 8.) Sin duda e organizacion celestial di Jehova a experimenta dolor di parto dje clase ei ora el a prepara pa tal nacimento importante.

E dragón grandi di color di candela

 7. Cua ta un otro siñal cu Juan a mira den cielo?

⁷ Kico Juan a mira despues? “I un otro siñal a wordu mirá den cielo, i, mira! un dragón grandi di color di candela, cu siete cabez i diez cachu i riba su cabez siete diadema; i den su rabu el a lastra un tercera parti di strea di cielo, i el a tíranan abao ne tera. I e dragón a sigi para dilanti dje muher cu tabata ne punto di duna luz, pa, ora e duna luz, e por devora su yiu.”—Revelacion 12:3, 4.

 8. (a) Identifica e dragón grandi di color di candela. (b) E siete cabez, diez cachu, i diadema riba cada cabez dje dragón ta indica kico?

⁸ E dragón ta Satanás, e “colebra original.” (Revelacion 12:9; Génesis 3:15) E ta un destructor feroz—un dragón of devorador cu siete cabez, cu por traga completamente su víctima. Ki un aparencia straño e tin! Su siete cabez i diez cachu ta indica cu e ta arquitecto dje bestia salbahe político cu lo ser detayá pronto den Revelacion capítulo 13. E bestia també tin siete cabez i diez cachu. Siendo cu Satanás tin un diadema pa cada cabez—un total di siete—nos por keda sigur cu poder mundial representá den e bestia salbahe tabata bao di su gobernacion. (Juan 16:11) E diez cachu ta un símbolo apropiado dje poder completo cu el a eherce den mundo.

 9. E echo cu e rabu dje dragón ta “lastra un tercera parti di strea di cielo” abao ne tera ta indica kico?

⁹ E dragón tin autoridad també den region spiritual. Cu su rabu, e ta “lastra un tercera parti di strea di cielo.” Strea por representa angel. (Job 38:7) Mencion di un “tercera parti” ta duna énfasis ne echo cu Satanás a desviá basta hopi di tal angel. Una bez cu eseinan a cai bao di su control, no tabatin escape pa nan. Nan no por a bolbe ne organizacion santo di Dios. Nan a bira demoño, lastrá, den un sentido, tras di Satanás nan rey, of gobernante. (Mateo 12:24) Satanás també a tíranan abao ne tera. Sin duda esei ta referi ne dia di Noé promé cu e diluvio, ora Satanás a tenta yiu desobediente di Dios pa baha riba tera i biba compañá cu yiu muher di hende. Como castigo, tal “angel cu a peca” Dios a tira den un estado parecido di prisón yamá Tártaro.—Génesis 6:4; 2 Pedro 2:4; Hudas 6.

10. Cua organizacion opositor ta ser mirá, i pakico e dragón ta purba di devora e yiu ora e muher ta duna luz?

¹⁰ Asina, e dos organizacion opositor ta yega claramente na bista—e organizacion celestial di Jehova simbolizá pa un hende muher i e organizacion di demoño di Satanás cu ta desafiá e soberanía di Dios. E cuestion grandi di soberanía tin cu ser decidí. Pero, di ki manera? Satanás, lastrando e demoñonan tras di dje ainda, ta manera un bestia salbahe cruel buscando posible víctima. E tabata spera pe muher duna luz. E tabata kier devora e yiu cu lo nace pasobra e tabata sa cu e ta representa un peliger grandi pa su existencia di futuro i pe mundo cu e ta domina.—Juan 14:30.

Un yiu, un homber

11. Ki detaye Juan a duna di yiu dje muher, i pakico e yiu ta ser yamá “un yiu, un homber”?

¹¹ E tempo siñalá cu Dios a permiti pe nacionan manda sin interrupcion a yega su fin na 1914. (Lucas 21:24) Anto, net na ora, e muher a duna luz na su yiu: “I el a duna luz na un yiu, un homber, cu tin cu pastorea tur nacion cu un bara di heru. I su yiu a wordu rancá hibá cerca Dios i cerca su trono. I e muher a hui na desierto, unda Dios a prepara un lugar pe, i pa nan alimenté ei pa mil doscient’i sesenta dia.” (Revelacion 12:5, 6) E criatura cu a nace ta “un yiu, un homber.” Pakico Juan a usa un expresion dobel? El a haci esei pa mustra e aptitud dje criatura, su competencia pa goberna e nacionan cu poder adecuado. Esei també ta enfatiza ki importante i ki un ocasion gozoso ta su nacimento! E ta hunga un papel clave hibando e secreto sagrado di Dios na su terminacion. Sí, e yiu homber tin cu asta “pastorea tur nacion cu un bara di heru”!

12. (a) Den Salmo, kico Jehova a priminti proféticamente tocante Jesús? (b) E dunamento di luz dje muher na un yiu homber “cu tin cu pastorea tur nacion cu un bara di heru” ta simboliza kico?

¹² Anto, esei ta parce un expresion conocí? Sí, Jehova a priminti den un profecía tocante Jesús: “Lo bo kíbranan cu un bara di heru, lo bo kíbranan na pida pida mescos cu wea di clei.” (Salmo 2:9) Tabata profetizá tocante dje també: “Jehova lo manda foi Sion e bara di bo forza, bisando: ‘Bai dominando meimei di bo enemigonan.’” (Salmo 110:2) P’sei, e nacimento cu Juan a mira ta relacioná estrechamento cu Jesucristo. No, esei no ta e nacimento di Jesús di un birgen ayá promé cu e promé siglo di nos era común; ni tampoco esei no por referi ne resureccion di Jesús na un bida spiritual atrobé na aña 33 EC. Además, esei no ta transmigracion. Mas bien, esei ta e nacimento dje Reino di Dios na 1914 como un realidad, cu Jesús—awor den cielo pa casi 20 siglo—entronizá como Rey.—Revelacion 12:10.

13. Kico ta ser indicá ora e yiu homber tabata “rancá hibá cerca Dios i cerca su trono”?

¹³ Jehova nunca por permiti Satanás devora Su esposa i Yiu recién nací! Ora el a nace, e yiu homber tabata “rancá hibá cerca Dios i cerca su trono.” Asina el a drenta completamente bao di proteccion di Jehova, cu a duna atencion di mas cuidadoso ne Reino recién nací, e instrumento cu e lo usa pa santifica su santo nomber. Ne mesun tempo, e muher a hui na un lugar cu Dios a prepara pé den desierto. Mas detaye tocante esei despues! En cuanto Satanás, e situacion tabata prepará awor pa un sosodimento sumamente importante pa haci absolutamente imposibel pa Satanás nunca mas amenaza e Reino den cielo. Ki sosodimento esei tabata?

Gera den cielo!

14. (a) Segun Juan, kico a pasa cu a haci imposibel pa Satanás hamás amenaza e Reino atrobé? (b) Satanás i su demoñonan ta ser frená na cua lugar?

¹⁴ Juan a bísanos: “I gera a cuminza den cielo: Miguel i su angelnan a combati cu e dragón, i e dragón i su angelnan a combati pero no a triunfa, ni un lugar no a wordu hayá mas pa nan den cielo. Pues, e dragón grandi a wordu tirá abao, e colebra original, esun yamá Diabel i Satanás, cu ta gaña tur e tera habitá; el a wordu tirá abao ne tera, i su angelnan tabata tirá abao hunto cuné.” (Revelacion 12:7-9) Pues, como un sosodimento dramático pa hiba na terminacion e secreto sagrado di Dios, Satanás tabata sacá, tirá for di cielo, i su demoñonan tabata tirá riba tera hunto cuné. Esun cu a gaña tur e tera habitá te ne grado di bira dios di dje, finalmente tabata frená den becindario dje planeta aki, unda su rebelion a cuminza na principio.—2 Corintio 4:3, 4.

15, 16. (a) Ken ta Miguel, i con nos sa esei? (b) Pakico ta apropiado pe mesun Miguel saca Satanás foi cielo?

¹⁵ Ken a alcanza tal victoria grandi den e nomber di Jehova? E Bijbel ta bisa cu esei tabata Miguel i su angelnan. Pero, ken ta Miguel? E nomber “Miguel” kier men “Ken ta manera Dios?” Pues Miguel mester ta interesá den e vindicacion dje soberanía di Jehova, dunando prueba cu no tin otro pa ser compará cuné. Den Hudas, versículo 9, e ta ser yamá “Miguel e arcangel.” Interesantemente, e título “arcangel” ta ser usá den otro parti di Bijbel en relacion cu un solo persona: Jesucristo.b Pablo a bisa di dje: “Señor mes lo baha foi cielo cu un yamada exigente, cu boz di arcangel i cu e trompet di Dios.” (1 Tesalonicense 4:16) E título “arcangel” kier men “hefe dje angelnan.” Pero no ta un sorpresa cu Revelacion ta menciona “Miguel i su angelnan.” Den otro texto unda e Bijbel ta menciona angel sumiso na husto sirbidor di Dios, e ta referi na Jesús. P’sei, Pablo a menciona “e revelacion di Señor Jesús foi cielo cu su angelnan poderoso.”—2 Tesalonicense 1:7; mira també Mateo 24:30, 31; 25:31.

¹⁶ Eseinan i otro texto ta híbanos ne conclusion inevitable di cu Miguel no ta nada menos cu Señor Jesucristo den su puesto celestial. Awor, den e dia di Señor, e no ta bisa simplemente na Satanás: “Jehova censurábo.” Siendo cu awor ta un tempo di huzgamento, Jesús, como Miguel, a tira e malbado Satanás i su angelnan demoño abao foi cielo. (Hudas 9; Revelacion 1:10) Ta sumamente apropiado pa Miguel ser e Persona pa haci esei, siendo cu e ta Rey recién instalá. Jesús també ta e Simía, primintí ayá den Eden, cu finalmente lo machica e cabez dje Colebra, asina e ta kité foi existencia pa semper. (Génesis 3:15) Cu e sacamento di Satanás foi cielo, Jesús a move den direccion dje aplastamento final.

“Alegra, cielo”

17, 18. (a) Segun Juan, cua reaccion celestial tabatin riba e caimento di Satanás foi cielo? (b) E boz fuerte cu Juan a tende probablemente a bini di cua fuente?

¹⁷ Juan a informa di un reaccion celestial gozoso ne caimento grandi di Satanás: “I mi a tende un boz fuerte den cielo bisa: ‘Awor a sosode salbacion i poder i e reino di nos Dios i autoridad di su Cristo, pasobra e acusador di nos rumanan a ser tirá abao, cu ta acusánan dia i anochi dilanti nos Dios! I nan a vencé debí ne sanger dje Lamchi i debí ne palabra di nan testimonio, i nan no a stima nan alma ni sikiera den e peliger di morto. P’sei mes, alegra cielo i boso cu ta biba den dje!’”—Revelacion 12:10-12.

¹⁸ E boz fuerte di ken Juan a tende? E Bijbel no ta bisa. Pero un grito similar mencioná den Revelacion 11:17 a bini dje 24 anciano resusitá den nan puesto celestial, unda nan por representa awor e 144.000 santonan. (Revelacion 11:18) I siendo cu sirbidor ungí di Dios riba tera ainda i bao di persecucion ta ser mencioná ei como “nos rumanan,” e declaracion por wel bini dje mesun fuente. Sin duda e fielnan ei por uni nan boz cu tal expresion, siendo cu nan tabata resusitá pronto despues cu Satanás i su ehército di demoño tabata sacá for di cielo.

19. (a) E terminacion dje secreto sagrado di Dios a habri camina pa Jesús haci kico? (b) Kico ta ser indicá ora Satanás ta ser yamá “acusador di nos rumanan”?

¹⁹ Cu e terminacion dje secreto sagrado di Dios, Jesús a tuma autoridad den e Reino di Jehova. Asina e camina a habri pa Dios cumpli cu su gran propósito di libera humanidad fiel. Jesús ta trece salbacion no solamente pa su disípelnan temeroso di Dios riba tera awor sino també pe miyones incontable di hende morto cu ta den e memoria di Dios. (Lucas 21:27, 28) E yamamento di Satanás “acusador di nos rumanan” ta mustra cu, aunque prueba tabata duná cu acusacion di dje contra Job tabata falso, Satanás a sigi numa desafiando e integridad di sirbidor terrenal di Dios. Ta parce cu el a repiti na hopi ocasion e acusacion di cu hende lo duna tur loke nan tin en cambio pa nan alma. Satanás ta ki un fracaso total!—Job 1:9-11; 2:4, 5.

20. Con fiel cristianan a vence Satanás?

²⁰ Cristian ungí, cu ta ser considerá husto “debí ne sanger dje Lamchi,” ta sigi duna testimonio di Dios i di Jesucristo apesar di persecucion. Pa mas cu 120 aña, e grupo cu Juan a simboliza a siñala na cuestion grandi enbolbí den e terminacion di tempo gentil na 1914. (Lucas 21:24, Version Moderna) I e multitud grandi awor ta sirbi lealmente hunto cu nan. Ningun di eseinan ta “tene miedu di esnan cu ta mata curpa pero cu no por mata alma,” manera experencia di bida real di Testigo di Jehova a demonstrá bez tras bez durante nos tempo. Cu palabra di boca i cu nan conducta cristian apropiado, nan a vence Satanás, dunando prueba cada bez cu e ta mentiroso. (Mateo 10:28; Proverbio 27:11; Revelacion 7:9) Ora nan ta haya nan resureccion celestial, ki feliz cristian ungí mester keda, siendo cu Satanás no tei mas pa acusa nan rumanan! En berdad, ta tempo pa tur e ehército di angel responde cu gozo ne yamada: “Alegra, cielo, i boso cu ta biba den dje!”

Un calamidad rival!

21. Con Satanás ta causa calamidad pe tera i lamá?

²¹ Shagriná bao dje tercera calamidad, awor Satanás cu empeño ta afligi humanidad cu su propio calamidad particular. Esei tá: “Ai di tera i di lamá, pasobra e Diabel a baha cerca boso, mashá rabiá, sabiendo cu ta kedé poco tempo mas.” (Revelacion 12:12b) E sacamento di Satanás for di cielo en berdad ta nifica calamidad pe tera mes, cu hende egoísta bao di su control ta ruiná. (Deuteronomio 32:5) Mas ainda, e norma di Satanás di ‘reina of ruina’ ta causa calamidad pe tera simbólico, esta, e estructura dje arreglo social humano, i també pa lamá simbólico, esta, e multitud turbulento di humanidad mes. Durante e dos gera mundial, e rabia di Satanás tabata reflehá den e rabia dje nacionan bao di su mando, i explosion similar di rabia demoniaco ta sigi te ne dia djawe—pero no pa mucho tempo mas! (Marco 13:7, 8) Pero aunque invento di Satanás ta terribel, nan nunca por ta igual cu efecto calamitoso cu e tercera calamidad, esta, e accion dje Reino di Dios, lo produci riba e organizacion visibel di Satanás!

22, 23. (a) Segun Juan, kico a pasa despues cu e dragón tabata tirá abao ne tera? (b) Con ta posibel pe dragón persigi e “muher cu a duna luz ne yiu homber”?

²² Desde e sacamento catastrófico di Satanás, e rumanan di Cristo riba tera ainda a wanta e atake di su rabia. Juan a informa: “Awor ora e dragón a mira cu e tabata tirá abao ne tera, el a persigi e muher cu a duna luz ne yiu homber. Pero dos hala di un águila grandi tabata duná ne muher, pe bula bai ne desierto na su lugar; esei ta unda e ta ser alimentá pa un tempo i temponan i mitá tempo, leu for di cara dje colebra.”—Revelacion 12:13, 14.

²³ Aki e vision ta enlaza cu e idea introducí den versículo 6, cu ta bísanos cu despues di nacimento di su yiu, e muher a hui na desierto, leu for dje dragón. Kizás nos ta puntra con e dragón por persigi e muher, siendo cu e ta den cielo i awor e dragón a ser tirá abao ne tera. Wel, no lubida cu e muher tin yiu aki riba tera, su simía. Mas tardi den e vision nos ta ser informá di Satanás expresando su rabia contra e muher, persigiendo su simía. (Revelacion 12:17) Loke ta pasa e simía dje muher aki riba tera por ta considerá como sosodiendo e muher mes. (Compara cu Mateo 25:40.) I e cantidad aumentante di compañé dje simía aki riba tera també ta experimenta tal persecucion.

Un nacion nobo

24. Cua experencia Studiante di Bijbel tabatin cu ta similar cu e liberacion di israelita for di Egipto?

²⁴ Mientras cu nan a bringa e promé gera mundial, e rumanan di Jesús a sigi fielmente dunando testimonio te ne grado posibel. Nan a haci esei apesar di oposicion intensificá di Satanás i di cruel compinche di dje. Finalmente, e testimonio público di Studiante di Bijbel casi a para. (Revelacion 11:7-10) Esei tabata ora nan tabatin un experencia casi mescos cu esun di israelita den Egipto cu també a wanta gran opresion. Anto Jehova a sácanan lihé como si fuera cu hala di águila, te na siguridad den desierto di Sinaí. (Exodo 19:1-4) Di igual manera, despues dje persecucion cruel di 1918 i 1919, Jehova a libra su testigonan, cu a representa su muher, i a híbanan na un situacion spiritual cu tabata tanto sigur pa nan como e desierto tabata pa israelita. Esei a bini como contesta pa nan oracion.—Compara cu Salmo 55:6-9.

25. (a) Kico Jehova a produci na 1919, similar cu su produccion di israelita como un nacion den e desierto? (b) Ken ta compone e nacion, i nan a ser introducí den kico?

²⁵ Den e desierto, Jehova a produci israelita como un nacion, percurando pa nan spiritual i fisicalmente. Di igual manera, cuminzando na 1919, Jehova a produci e simía dje muher como un nacion spiritual. Nos no mag bruha esei cu e Reino Mesiánico cu a reina den cielo desde 1914. Mas bien e nacion nobo ta componí dje resto di testigo ungí riba tera, cu a wordu introducí den un estado spiritual glorioso na 1919. Ya cu el a percura awor “nan midí di comestible ne debido tempo,” nan a haya e fortaleza pe trabao cu nan tabatin cu haci.—Lucas 12:42; Isaías 66:8.

26. (a) Ki largu ta e periodo di tempo mencioná den Revelacion 12:6, 14? (b) Ki propósito e periodo di tres tempo i mei tini, na ki tempo el a cuminza, i na ki tempo el a termina?

²⁶ Pa cuanto tempo tal descanso pe simía dje muher di Dios a sigi? Revelacion 12:6 ta bisa 1.260 dia. Revelacion 12:14 ta yama tal periodo un tempo, temponan, i mitá tempo; es decir, tres tempo i mei. Realmente, e dos expresion ta representa tres aña i mei, extendiendo den e parti di nort dje tera for di primavera di 1919 te na otoño di 1922. Esei tabata un periodo di recuperacion i reorganizacion refrescante pe grupo restorá cu Juan a simbolizá.

27. (a) Segun e informe di Juan, kico e dragón a haci despues di 1922? (b) Ki propósito Satanás tabatin sacando un diluvio di persecucion contra Testigo di Jehova?

²⁷ E dragón no a sintié vencí! “I e colebra a saca awa manera rio for di su boca tras dje muher, pa hacié hoga den e rio.” (Revelacion 12:15) Kico kier men “awa manera rio,” of “corriente” di awa? (Testament Nobo) Rey David di antigua a menciona hende malbado cu a oponele como “bashamento di hende cu no ta sirbi pa nada.” (Salmo 18:4, 5, 16, 17) Loke Satanás a los awor també tabata persecucion biniendo di “hende cu no ta sirbi pa nada.” Despues di 1922 Satanás a saca un diluvio di persecucion contra Testigo di Jehova. (Mateo 24:9-13) Esei a yega di inclui violencia fisical, ‘produciendo penoso afán mediante decreto,’ encarcelacion, i asta matamento via horcamento, tiramento, i capmento di cabez. (Salmo 94:20) Satanás degradá i sin contacto directo cu esposa celestial di Dios, a sali rabiá pa ataca e resto di su simía riba tera, pa destruínan, sea directamente of hácinan perde e fabor di Dios door di kibra nan integridad. Pero nan tabatin un determinacion mescos cu esun di Job: “Lo mi no kita mi integridad foi mi te cu mi muri!”—Job 27:5.

28. Con e diluvio di persecucion a culmina durante Gera Mundial II?

²⁸ E diluvio cruel di persecucion a culmina durante Gera Mundial II. Den Europa un 12.000 Testigo di Jehova tabata encarcelá den concentrasicamp i prisón nazista, i rond di 2.000 a muri. Bao di homber militar cu a manda den Italia, Hapón, Corea, i Taiwan, fiel Testigo di Jehova a sufri di tratamento cruel similar. Asta den país yamá democrático e testigonan tabata bao di atake di grupo di Accion Católica, tabatin breo i pluma bashá riba nan, i tabata sacá for di pueblo. Nan asamblea cristian tabata interrumpí i yiu di Testigo di Jehova tabata expulsá for di scol.

29. (a) Ki detaye Juan a duna dje alivio cu a yega for di un fuente inesperá? (b) Di ki manera e “tera a bini pa yuda e muher”? (c) Kico e dragón a sigi haci?

²⁹ Alivio a yega di un fuente inesperá: “Pero e tera a bini pa yuda e muher, i e tera a habri su boca i a traga e rio cu e dragón a saca for di su boca. I e dragón a rabia cu e muher, i a bai pa haci gera contra e resto di su simía, cu ta warda e mandamentonan di Dios i tin e trabao di duna testimonio di Jesús.” (Revelacion 12:16, 17) “E tera”—elemento den e sistema di cosnan di Satanás mes—a cuminza traga e “rio,” of “diluvio.” Despues di 1940 Testigo di Jehova a gana un serie di victoria dilanti dje Corte Supremo di Estados Unidos, i di poder gobernamental di algun otro país cu a defende e libertad di adoracion. Finalmente, nacion aliado a destrui e mashín militar di nazista i fascista, dunando alivio na Testigo di Jehova cu a sufri bao di dictadura cruel. Persecucion no a para henteramente, pasobra e rabia dje dragón ta sigi te ne dia djawe, i e ta sigi haci gera contra esnan cu “tin e trabao di duna testimonio di Jesús.” Den hopi país, testigonan leal ta den prisón ainda, algun ta muri ainda pa causa di nan integridad. Pero den algun país asina, autoridad de bez en cuando ta floha nan presion, i Testigo di Jehova ta disfruta di un aumento di libertad.c Asina, den cumplimento dje profecía, e tera ta sigi traga e rio di persecucion.

30. (a) E tera a duna suficiente alivio pa kico sosode? (b) E integridad dje pueblo di Dios ta resulta den kico?

³⁰ Dje manera ei, e tera ta duna suficiente alivio pa permiti e trabao di Dios di plama na rond di 235 país i produci mas cu seis miyón fiel predicador dje bon nobo. Hunto cu e resto dje simía dje muher, un multitud grandi internacional di creyente nobo ta warda e mandamentonan di Dios en cuanto separacion for di mundo, moralidad limpi, amor pe rumanan, i nan ta duna testimonio dje Reino Mesiánico. Nan integridad ta contesta e desafío i desprecio di Satanás, ta anuncia e morto di Satanás i di su sistema di cosnan.—Proverbio 27:11.

[Nota]

[Kuadro na página 185]

“E tera a habri su boca”

Den hopi país Satanás a basha un diluvio di persecucion contra cristian ungí i nan compañénan. Pero, hopi bez loke a sosode den e sistema di cosnan di Satanás mes a resulta den e tragamento dje diluvio.

Decision favorable dje Corte Supremo despues di 1940 a traga e mayor parti di atake di multitud desordená i encarcelacion.

1945: Victoria di nacion aliado durante Gera Mundial II a pone fin na persecucion cruel den país bao di mando di Alemania i Hapón.

Durante un prohibicion di Testigo di Jehova den e República Dominicana, nan tabata encarcelá, zutá, i golpeá cu cabo di rifle. Na 1960 un desacuerdo entre Rafael Trujillo i e Iglesia católico romano a resulta den e kitamento dje prohibicion di Testigo di Jehova.

Den Nigeria, e tiramento, kimamento, violacion, golpeamento, tortura, i matamento di Testigo di Jehova durante un gera civil a termina na 1970 ora ehército di gobierno a vence un provincia rebelde unda tal cosnan tabata sosode.

Den Spaña nan a invadi cas i hende cristian tabata multá i encarcelá pe “crimen” di papia tocante Dios i tene reunion cristian. E persecucion a termina finalmente na 1970, ora, como resultado di cambio di política di gobierno tocante religion no católico, Testigo di Jehova tabata permití di haya registracion legal.

Den Portugal cientos di cas tabata invadí sin autorizacion legal. Testigo di Jehova tabata abusá físicamente i encarcelá, i nan Bijbel tabata confiscá. Tal terrorismo tabata “tragá” ora, na 1974, un revolucion militar a resulta den un cambio di gobierno i nan a adopta un ley cu a duna libertad di reunimento.

Den Argentina, bao di gobierno militar, yiu di Testigo di Jehova tabata expulsá for di scol, i Testigo di Jehova den tur e país tabata arrestá pa nan predicacion dje bon nobo. Tal persecucion a termina por fin na 1984 ora e gobierno na mando a reconoce legalmente e Asociacion di Testigo di Jehova.

[Tabèl na pagina 183]

(Pa e teksto den su formato kompleto, wak e publikashon)

1914 Nacimento dje Reino

1919 Nacimento dje nacion nobo

1919-1922 Periodo di recuperacion

1922- Diluvio di persecucion

[Plachi na página 182]

Ai di tera