Imamantapas sumaqtam yachana

REY SALOMONMI ‘yuyaymanaspan estudiarqa achkallaña rikchanachiykunata hinaspam chaykunata qatinasninpi qellqarqa’. ¿Imanasqa? ‘Cheqap kasqanman hina sumaqllataña allinta qellqananpaqmi’ (Ecl. 12:9, 10). Lucaspas Jesuspa vidanmantam ‘qallariyninmanta sumaqta yachaspan qellqarqa’ (Luc. 1:3). Salomonpas Lucaspas allinta yachaykuspankuñam qellqarqaku.

¿Ima ninantaq imamantapas sumaqta yachayqa? Imamantapas yachay munasqanchikta astawan yachaymi. Chaypaqqa leenam, imayna estudiaytam yachana otaq hukkunatapas tapukunam.

¿Imanasqataq imamantapas sumaqta yachanayki? Biblia leesqaykita otaq estudiasqaykita entiendenaykipaqmi, pipas predicacionpi imamantapas tapusuptiki Bibliapa nisqanman hina yachachinaykipaqmi otaq discursota qonaykipaqpas.

Discurso qonapaq piensasun. Servichikunaykipaq kaq qellqanchikkunaqa yaqapaschá huk asuntokunamantapas rimanman. Ichaqa, ¿imaynatam chaykunata servichikuwaq huñunakuypi kaqkunapaq hina? Imamantapas allintaraq yachaspaykim. Chaynata preparakuspaykiqa willakuykunata otaq ejemplokunata servichikuspam yachachinki hinaptinmi uyarisuqnikikunaqa atencionwan uyarispanku kallpanchasqa tarikunqaku. Servichikunaykipaq kaq qellqanchikkunaqa yaqapaschá rurasqa kachkan lliw runakunapaq hina. Chaymi huñunakuypi kaqkunata otaq pitapas yanapanaykipaqqa astawan preparakunayki rikchanachiykunatawan servichikuspa. ¿Imaynatataq chayta rurawaq?

Manaraq preparakuyta qallarichkaspa uyarisuqnikikunapi reparay. ¿Imamantataq yachankuña? ¿Imamantataq manaraq yachankuchu? Hinaspa chayman hina tanteaspa tapukuy. ¿Explicanaychu, convencechinaychu, correginaychu icha kallpanchanaychu?, nispa. Explicayqa ima asuntomantapas astawan yachachiymi, yachasqankuta entiendeptinkupas willanam haykapi otaq imayna kasqanmanta. Convencechinapaqqa imanasqa pasasqanmantam yachachina hinaspam pruebakunawan qawachina. Correginapaq kaqkunamanta allinta estudiaruspapas sumaqtam yachananchik imaynanpi cheqap kasqanmanta otaq mana chayna kasqanmantapas. Ichaqa cheqap kasqanmanta allinta yachachispapas sumaqllatam yachachina pitapas mana sienterachinapaq. Kallpanchayqa uyariqninchikkunapa sonqonman chayaymi hinaspa yachasqankuman hina kawsanankupaq yanapaymi. Chaypaqmi servichikuwaq iñiqmasinchikkunapa ejemplonkuta, ima sasachakuypiña kaspankupas ima rurasqankumanta.

¿Listoñachu kachkanki preparakunaykipaq? Chaypaqqa hayka minutopi rimanaykipaq reparay. Chayman hina tanteay imakunamanta yachachinaykipaq. Hayka minutopitaq yachachinayki kanqa, ¿5 minutopi, 30 minutopichu? ¿Huñunakuykunapi yachachinaykipaq hinachu tiempoykiqa tanteasqaña kachkan, icha Bibliamanta estudiachinaykipaq otaq iñiqmasikita watukuspa kallpanchanaykipaq hinachu tanteawaq?

¿Ima qellqakunawantaq preparakuwaq? Wasikipi kaq qellqakunamantaqa, ¿kanchu Salonpi waqaychasqanku huk qellqakunapas? ¿Prestasunkimanchu waqaychasqan qellqakunata Jehova Diosta unayña serviq iñiqmasinchik? ¿Kanchu yachasqayki lawpi biblioteca huk qellqakunawanpas preparakunaykipaq?

Ima textotapas mana entiendespaykiqa ima nisqanmanta Bibliapiraq maskay.

Hanayninpi otaq qatiqninpi kaqkunata leey. Tapukuy: “¿Pikunapaqtaq kay textoqa qellqakurqa? Leesqay versiculokunapa nisqanman hina, ¿imanasqataq qellqakurqa? ¿Imanirqakutaq chayta uyariqkuna?”, nispa. Kaykunamanta yachasqaykim yanapasunki astawan entiendenaykipaq hinaspa discursoykipi allinta yachachinaykipaq.

Ejemplopaq, Hebreos 4:12 nisqantam yaqa sapa kuti servichikunchik Diospa Palabran atiyniyoq hinaspa runakunapa sonqon cambiachiq kasqanta yachachinapaq. Kay textopa hanayninpi otaq qatiqninpi nisqanta leeymi yanapawanchik astawan entiendenapaq, kaypiqa nichkan Jehova Diospa prometesqan allpaman israelitakuna manaraq yaykuchkaptinku chunniqpi 40 wata imayna kasqankumantam (Heb. 3:7–4:13). ‘Diospa Palabranqa’ manam yanqapaqchu karqa, prometesqan allpaman yaykunankupaq Abrahanwan contrato rurasqanqa cumplikunanpunim karqa. Israelitakunaqa achka milagrokunatam rikurqaku, chayqa confianankupaqmi karqa. Ichaqa mana confiasqankutam sapa kuti qawachirqaku Egiptomanta Sinai orqoman Dios pusaptin, chaynallataqmi Prometesqan Allpaman pusaptinpas. Prometesqankunata Dios imayna cumplisqanmanta rimasqankum imayna sonqoyoq kasqankuta qawachirqa. Chaynallataqmi kay tiempopipas, Diospa promesankunaqa sutillatam qawachin runakuna imayna sonqoyoq kasqankuta.

Leesqaykiwan tupaq textokunata maskay. Wakin Bibliapiqa kanmi chawpinpi otaq uray patanpi huk textokuna. ¿Kanchu Bibliaykipi? Chayna kaptinqa yanapasunkim. Qaway Traducción del Nuevo Mundo de las Santas Escrituras sutiyoq Bibliapi huk ejemplota. Cristianakunapaq Sara allin ejemplo kasqantam 1 Pedro 3:6 qawachin. Chaymanta astawan entiendenapaqmi chawpinpi otaq uray patanpi qawawaq Genesis 18:12 nisqanta, chaypim qawachin Abrahanpa señoran Sara ‘sonqonmanta’ señorniy nispan respetasqanta. Bibliapa paginankunapa chawpinpi otaq uray patanpi kaq textokunaqa, leesqayki textota, profeciakuna imayna cumplikusqanta hinaspa contratokunata Dios rurasqanmanta entiendenaykipaqmi yanapasunki. Ichaqa manam chay lliw textokunachu chaynata yanapasunki, wakinqa hina kaqllatam leesqaykimanta willasunki, runakunamanta otaq ima sitiokunamantapas.

Bibliapi palabrakunamanta lista. Kay listaqa Bibliapim ordenninpi kachkan “a” letramanta “z” letrakama; estudiasqaykimanta astawan yachanaykipaqmi chaypi kaq textokuna yanapasunki, chaynapim cheqap yachachikuymanta ejemplokunata Diospa Palabranpi tarinki (2 Tim. 1:13). Traducción del Nuevo Mundo Bibliapim “Índice de palabras bíblicas” nisqan lista kachkan. Gran Concordancia nisqan qellqapipas tarinkim Bibliamanta yachay munasqayki palabrakunata astawanraq yachanaykipaq.

Kay libropa 33 paginanpim lista kachkan ‘allin yuyayniyoq confianza sirvientepa’ qowasqanchik qellqakunamanta (Mat. 24:45-47). Yaqa llapan chay qellqakunapim tukupaynin paginanpi lista kachkan imapas yachay munasqanchikmanta estudianapaq palabrakuna. Willakuq hinaspa ¡Rikchariy! revistakunapipas sapa wata tukuytam lloqsimun huk lista chay watapi yachachikuykunamanta.

Kay qellqakunapa yachachisqankunata yachaspaykiqa mana sasachakuspam imamantapas yachay munasqaykita tarinki. Estudiaytapaschá munawaq profeciakunamanta, creenciakunamanta, cristianokuna imayna portakunanmanta otaq Bibliapa yachachisqanman hina imayna kawsakuymantapas. Chayna kaptinqa yaqapaschá Willakuq revistapi chaykunamanta tarinki. ¡Rikchariy! revistañataqmi willakun tukuy ima pasasqanmanta, tiemponchikpi sasachakuykunamanta, religionkunamanta, yachaysapa runakunapa yachachisqanmanta hinaspa huklaw nacionpi llaqtakunamantapas. El hombre más grande de todos los tiempos nisqa libroñataqmi Jesuspa vidanmanta imayna pasasqanman hina willachkan. Apocalipsis... ¡se acerca su magnífica culminación!, Prestemos atención a las profecías de Daniel hinaspa Las profecías de Isaías, una luz para toda la humanidad (vol. 1, 2) nisqa librokunañataqmi Bibliapi chayna sutiyoq librokunapa sapa textonkunamanta yachachichkan. Razonamiento a partir de las Escrituras libroñataqmi predicacionpi tapukuykunata imayna kutichinapaq yanapawanchik. Sichum sapaq religionkunamanta, imakuna yachachisqankunamanta, imayna qallarisqanmanta hinaspa imayna mirasqanmanta yachayta munaspaykiqa estudiawaqmi El hombre en busca de Dios nisqa librota. Los testigos de Jehová, proclamadores del Reino de Dios nisqa libroñataqmi kay tiempopi Testigonkunamanta willawanchik. Chayraq chaskisqayki Anuario de los testigos de Jehová libropiñataqmi yachanki Diospa Gobiernonmanta willakusqanchik enteron pachapi imayna kasqanmanta. Perspicacia para comprender las Escrituras (vol. 1, 2) nisqa libroñataqmi allintapuni yachachin Bibliapa willasqanman hina runakunamanta, may sitiokunamanta, idiomakunamanta otaq ñawpa tiempopi imakuna pasasqanmantapas.

“Índice de las publicaciones Watch Tower” nisqa qellqa. Kay qellqaqa 20 masnin rimaykunapim kachkan. Entiendesqayki idiomapi kaptinqa yachay munasqaykita qellqanchikkunapi tarinaykipaqmi yanapasunki. Iskayman rakinasqa listakunam kachkan, hukninmi yachachikuykunamanta, hukninñataqmi Bibliapa textonkunamanta. Yachay munasqaykita maskay huk palabrallawan punta kaq listapi. Bibliapa mayqen textontapas astawan entiendeyta munaspaykiñataq maskay iskay kaq listapi. Yachay munasqaykimanta otaq Bibliapa textonkunamanta qellqakuna kaptinqa Índice nisqa qellqapim tarinki. Qallariq paginankunapim kachkan sapa qellqakunapa sutin iskay-kimsa letrallawan, chayta qawaspam yachanki mayqan qellqa kasqanta. Ejemplopaq: w99-S 1/3 15; kayqa nichkanmi 1999 watapi 1 marzo La Atalaya revistapa 15 paginan kasqanmanta. Chaymantapas huñunakuypi kaqkunata kallpanchanaykipaqmi servichikuwaq “Biografías de testigos de Jehova” nisqanta otaq “Ministerio del campo” nisqa yanapakuykunatapas.

Imamantapas astawan yachayqa tiempopaqmi, chaymi yachachinaykipaq kaq yachay munasqallaykita maskanayki huk yachachikuykunamantaqa. Índice qellqapi yachay munasqaykita tariruspaqa, chay tarisqayki qellqapa paginanpi nisusqaykiman hina maskay imamanta yachay munasqaykita, subtitulonwan hinaspa parrafonwan yanapachikuspa. Mayqen textomantapas astawan yachayta munaspaqa mayqen paginanpi nisusqaykiman hina maskay hinaspa estudiay hanayninpi otaq qatiqninpi yachachikuykunata.

“Watchtower Library” en CD-ROM nisqa. Computadorayki kaptinqa Watchtower Library nisqa discotam servichikuwaq qellqanchikkunapi yachachikuykunata tarinaykipaq. Chaypim maskawaq yachay munasqayki palabrakunata otaq Bibliamanta textokunata. Kay yanapakuy quechuapi mana kaptinqa servichikuwaqmi castellanopi kaqta.

Timoteoman iskay kaq cartasqanpim apostol Pablo nirqa ‘qalaspi qellqasqa libronkunata’ Roma llaqtaman apananpaq (2 Tim. 4:13). Pabloqa Bibliamanta qellqakunata chaninchaspanmi waqaycharqa, qampas chaynatam rurawaq. Estudiayta tukuruspapas, ¿waqaychankichu Willakuq, ¡Rikchariy! hinaspa Diospaq Llamkayninchik qellqakunata? Chayna kaptinqa servichikuwaqmi wakin qellqanchikkunata hina. Yaqa lliw congregacionpim Bibliamanta waqaychasqanku qellqakuna kan, chaytaqa servichikunmankum huñunakuyman riq iñiqmasinchikkuna.

Runakunapa yachay munasqan kaq qellqakunata sapaqchay yachachispayki servichikunaykipaq. Periodicopi, revistapi noticiata otaq ima willakuytapas tarispaykiqa kaptaspa otaq copiaspa waqaychay predicaspayki servichikunaykipaq. Qellqaytaq imay punchawpi lloqsimusqanta, pi qellqasqanta hinaspa chay qellqapa sutintapas. Huñunakuypi yachachisqankuta hinaspa rikchanachiykunatapas qellqay predicaspayki servichikunaykipaq. ¿Haykapipas piensarqankichu huk rikchanachiypi? ¿Atirqankichu servichikuyta piensasqaykiman hina? Chaykunataqa qellqaspayki waqaychay. Diosmanta Yachachinapaq Escuelapi unayña kaspaykiqa yaqapaschá achka kutitaña leerunki, discursota qorunki otaq demostraciontapas rurarunki. Chayna kaptinqa preparakusqaykikunata waqaychay wakin kutipipas servichikunaykipaq.

Runakunapa imapas yachasqanmanta uyariyqa yanapawanchikmi. Jesuspa vidanmanta Lucas qellqananpaqqa yaqapaschá tapukurqa Jesus reqsiqkunata (Luc. 1:1-4). Qamtapas iñiqmasinchikkunam yanapasunkiman yachay munasqaykita entiendenaykipaq. Efesios 4:8, 11-16 nisqanman hinam Cristoqa ancianokunata valekuchkan payta allinta reqsichiwananchikpaq. Jehova Diosta achka wataña serviqkunaqa ichapas allinta entiendenaykipaq yanapasunkiman. Hukkunawan rimaspaykiqa cuentatam qokunki imam piensasqankumanta, chayna piensasqantam servichikuwaq yanapanaykipaq hina preparakuspa.

Trigota ruturuspaqa qaranmantawan pusinmantam chuyanchana. Chaymanmi rikchakun imam kaqmanta yachanapaq estudiaypas. Manaraq servichikuchkaspam akllananchik yanapawaqninchik kaqkunallata.

Chay akllasqayki yachachikuykunata huñunakuypi yachachinaykipaq servichikuspaqa tapukuy: “¿Yanapanmanchu kay yachachikuy uyariwaqniykunata? Allin kaspanpas, ¿yanapanqachu yachachisqayta entiendenankupaq?”, nispa. Yachaysapa runakunapa nisqanta servichikuspaykiqa segurom kanayki kay tiempopi yachachisqankuwan tupasqanmanta. Chaymantapas ñawpaq qellqanchikkunapi yachachikuykunaqa ichapas qepa lloqsimuq qellqanchikkunapi revisasqaña kachkan, chayna kaptinqa chaytaña servichikuy.

Qellqanchikmanta sapaq qellqakunata servichikuyta munaspaykiqa allinta tanteaspam akllanayki. Ama qonqaychu, Diospa Palabranqa cheqapmi (Juan 17:17). Diospa munaynin cumplikunanpaq Jesuspa rurasqan ancha allin kasqanmantam Colosenses 2:3 nin: “Payllapim pakasqa kachkan qori-qollqe hina tukuy yachayniyoq kaypas chaynataq entiendeypas”, nispa. Chayman hinam estudiaspa yachasqaykikunamanta akllanayki. Yachachikuyta huk qellqakunamanta akllaspaykiqa, tapukuy: “¿Masyarichispankuchu otaq piensasqankuman hinallachu willakunku? ¿Qollqeraykuchu icha kikillankupaq munaspankuchu qellqanku? ¿Chay nisqankuqa respetasqa qellqaqkunapa nisqanman hinachu? Chaymantapas, ¿tupanchu Bibliapa yachachisqankunawan?”, nispa.

Proverbios 2:1-5 nisqanmi kallpanchawanchik cuentata qokuq kanapaq, Diospa yachayninta maskanapaq hinaspa ‘qollqeta’ otaq ‘pakata’ hina entiendeq kayta maskanapaq. Chaypaqqa anchatam kallpanchakuna hinaspapas bendicionkunatam chaskisun. Estudianaykipaq kallpanchakusqaykiqa yanapasunkim Jehova Diospa piensasqanta yachanaykipaq, mana allin piensasqaykita correginaykipaq hinaspa cheqap yachasqaykita astawan chaninchanaykipaq. Chaynapim discurso qosqaykiqa ancha allin kanqa, chaymi qampas chaynataq huñunakuypi kaqkunapas kusisqa tarikunqa.