Estudiayqa allinpaqmi

¿RIKURQANKICHU pitapas frutata imayna akllasqanta? Yaqa lliwmi poqosqa kasqanta yachanankupaq qawanku colorninta, sayayninta, hukkunañataq muskinku otaq llachpanku. Wakinñataqmi iskay law makinpi hapispa llasayninpi tanteanku mayqennin aswan allin kasqanta. ¿Imapitaq kay runakuna reparanku? Qawankum imayna kasqanta, mayqen aswan allin kasqanta, yuyarinkutaqmi wakin kutipi akllasqankuta hinaspam chaywan tupachispa chayman hina akllanku. Allinta akllasqankuraykum miski frutata mikunku.

Fruta akllaymantapas aswan allinninchikpaqraqmi Diospa Palabranta estudiayqa. Chaypaq tiempochakuyqa kuyakuyninchiktawan iñiyninchiktam kallpanchan, predicasqanchikpipas aswan allintam yachachisun hinaspa imapaq tanteakuspapas Diospa nisqanman hinam rurasun. Proverbios 3:15 nin: ‘Kuyayllapaq kaq tukuy imaykipas manam igualanchu [tukuy chaykunamanqa]’, nispa. ¿Qampas chaynatachu piensanki? Chaytaqa yachanki imayna estudiasqaykiman hinam (Col. 1:9, 10).

¿Imataq estudiayqa? Estudiayqa manam leeyllachu, tukuy yuyayninchikwan imamantapas leesqanchikta entiendenapaq astawan kallpanchakuymi, yachasqanchikkunawan chayraq yachasqanchikta tupachiymi hinaspa chaykuna imayna tupasqanmanta anotaymi. Bibliata estudiaspaykiqa yuyaymanay chayraq yachasqaykikunapi chaynataq chaykunawan imayna yanapachikunaykipaqpas. Chaymantapas piensanaykim yachasqaykita servichikuspa runakunata imayna yanapaypi. Chaypaqqa yuyaymananaykim.

Estudianayki kaptinqa alistankichá Bibliata, qellqanchikkunata, lapicerota hinaspa cuadernotapas. Ichaqa, ¿preparankichu sonqoykita? Esdrasmantam Biblia willawanchik: ‘Sinchillatañam [sonqonta] prepararqa Tayta Diospa yachachikuyninta estudiananpaq, cumplinanpaq hinaspa reglamentokunatapas Israel castakunaman yachachinanpaq’, nispa (Esd. 7:10). ¿Imaynatataq sonqonchikta preparachwan?

Orakusqanchikmi yanapawasun Diospa Palabranta estudiaspa sonqonchikta imayna preparanapaq. Munanchikmi Jehova Diospa yachachikuyninta tukuy sonqonchikwan chaskiyta. Diosta mañakuy chuya espiritunta qosunaykipaq sapa estudiaspayki (Luc. 11:13). Mañakuytaq estudiasqaykita hinaspa Diospa munayninwan estudiasqayki imayna tupasqanta entiendenaykipaq chaynataq imam allin kaqta otaq imam mana allin kaqta entiendenaykipaq, kamachikuyninkunata imayna kasukunaykipaq hinaspa Dioswan amistadnikipi imayna yanapasunaykipaqpas (Prov. 9:10). Estudiaspaykiqa ‘Diosta mañakuy’ yachayta qosunaykipaq (Sant. 1:5). Yachasqaykiman hina imayna kasqaykita qawarikuy hinaspa Diospa yanapayninta mañakuy umaykimanta mana allin pensamientokunata horqonaykipaq. Amapuni qonqaychu tukuy ima yachachisusqaykimanta ‘Diosman gracias qoyta’ (Sal. 147:7). Orakuspa estudiaptinchikqa Jehova Dioswan amistadninchikmi aswan allin kanqa, chaymi kallpanchawasunchik Palabranpi nisqanta kasukunanchikpaq (Sal. 145:18).

Huk runakunamantaqa Jehova Diosta serviqkunaqa astawanmi yachayta munanchik. Diosta mana serviqkunaqa Bibliapa nisqanpa contranpim rimanku, ñoqanchikmi ichaqa mana chaynachu kanchik aswanqa Diospim confiakunchik (Prov. 3:5-7). Imamantapas mana entiendespaqa manam chayllachu piensananchik pantasqa kasqanpiqa, aswanqa tiempopa risqanman hinam Diospi suyaspa chaymanta yachanapaq kallpanchakunanchik (Miq. 7:7). Esdras hinam munanchik yachasqanchikkuna kasukuyta hinaspa hukkunaman yachachiyta, estudiananchikpaq sonqonchikta preparaspaqa bendicionkunatam tarisun.

Huk parrafomanta qallaykuspa tukunaykikama leenaykimantaqa puntata qawariy imakunamanta yachachisqanta. Hinaspa titulonta qawariy yachachikuywan imayna tupasqanta. Chaymantapas allinta reparay subtitulonkunawan yachachikuynin imayna tupasqanpi. Qawaytaq chay yachachikuypi fotokunata, recuadrokunata otaq tapukuykunatapas. Hinaspa kaynata tapukuy: “Qawasqayman hina, ¿imatataq yachasaq otaq imapitaq yanapawanqa?”, nispa. Chaynata ruraspaykim allinta estudianki.

Hinaspapas piensay imakunamanta yachachisqanpi. Estudianapaq Willakuq revistapi hinaspa wakin librokunapipas tapukuykunam uray patanpi rikurin. Leesqanchikman hina tapukuykunapa kutichiyninta señalayqa allinpunim. Chayna tapukuykuna mana kaptinpas allinmi yuyananchikpaq kaqkunata señalayqa. Wakin yachachikuymanta manaraq entiendespaykiqa allinta entiendenaykipaqyá kallpanchakuy. Reparaytaq rikchanachiykunapi chaynataq imayna yachachisqanpipas predicacionpi otaq discurso tupasuptiki servichikunaykipaq. Piensaytaq yachasqaykiwan iñiyninpi pitapas kallpanchanaykipaq. Servichikunaykipaq kaqkunata señalay hinaspa estudiayta tukuruspa kaqmanta qaway.

Leesqaykiman hina Bibliapa textonkunata maskay hinaspa leesqayki parrafopa yachachisqanwan tupachiy.

Kanqapaschá sasa entiendey yachachikuykuna otaq astawan yachay munasqaykipas. Ichaqa chaypi afanakunaykimantaqa yapamanta tiempochakuspa estudianaykipaq anotaykuy. Yaqa llapanpim qatiqnin parrafokunallapi ima niy munasqanmanta yachachin, mana chayna kaptinqa ichapas yapapiña chaymanta astawan yachayta munawaq. ¿Imatataq anotawaq? Bibliapi huk textopa ima ninanta mana entiendesqaykitam otaq leesqaykipa yachachikuyninwan imayna tupasqantam. Wakin yachachikuytaqa yaqapaschá entiendenki ichaqa manapaschá hukkunaman yachachinaykipaq hinachu. Mana entiendesqaykita saqerunaykimantaqa allinmi kanman estudiasqaykita tukuruspaña chayta estudiaynikiqa.

Iñiqmasinkunaman qellqachkaspanmi apostol Pablo yuyaymanaspan nirqa: “Nisqaykunapa yachachikuyninqa kaymi”, nispan (Heb. 8:1). ¿Qampas yuyaymanankichu estudiasqaykiman hina? Pablopa imanasqa yuyaymanasqanpi reparay. Payqa qawachirqañam Cristoqa Sacerdotekunapa Jefen hina hanaq pachaman yaykusqanta (Heb. 4:14–5:10; 6:20). Ichaqa Hebreos libropa pusaq capitulonpa qallariyninpi nisqanwanmi Pabloqa iñiqmasinkunata piensarichirqa imaynata yanapachikunankumanta. Qawachirqam Cristoqa Diospa qayllanman yaykuspan paykunata ‘chuyay-chuyay sutiyoq cuartoman yaykunankupaq’ favorecesqanmanta (Heb. 9:24; 10:19-22). Chayna suyakuyninkum kallpanchanan karqa allinta iñinankupaq, tukuyta aguantanankupaq hinaspa imayna kawsanankupaqpas. Ñoqanchikpas estudiaspa allinnin kaq yachachikuykunapi reparaspaqa entiendesunmi imamanta yachachisqanta hinaspam umanchikpi takyachisun yachasqanchikta servichikunapaq.

¿Kallpanchakunkichu estudiasqaykita kasukunaykipaq? Chayqa allinpunim. Imamantapas yachaspaykiqa tapukuy: “¿Imaynatam kay yachachikuy vidaypi yanapawan otaq imapaqpas tanteasqaypi? ¿Imaynatam kasukuyman sasachakuypi kaspay otaq imapaq tanteasqaytapas ruraspay? ¿Imaynatam servichikuyman familiaypi, predicacionpi otaq huñunakuypipas?”, nispa. Orakuspa kay tapukuykunapi yuyaymanay hinaspa piensay yachasqaykita imayna servichikunaykipaq.

Mayqen yachachikuytapas leeyta tukuruspaqa kaqmanta qawariy allinniq kaq yachachikuyninkunata yuyarinaykipaq chaynataq wakin yachachikuyninkunawan imayna tupasqanmantapas, chaymi yanapasunki mana qonqarunaykipaq hinaspa imaynata servichikunaykipaqpas.

Jehova Diosta serviqpaqqa achkam estudiananchikpaq kachkan, wakinpiqa manam yachanchikchu mayqen qellqamanta qallariytapas. Allinmi kanman Diospa Palabranta sapa punchaw estudianapaq folletopa textonta hinaspa yachachikuyninta leeyqa. Huñunakuyninchikkunapaq preparakuyqa allintam yanapawasun. Wakin iñiqmasinchikqa manaraq testigo kachkaptinku lloqsimuq qellqanchikkunata estudianankupaqmi tiempochakunku, wakinñataqmi huñunakuypi tupasqanman hina sapa semanapaq Biblia leesqanchikmanta wakin textokunata astawanraq estudianku.

Sapa huñunakuypaq lliw yachachikuykunata estudiayta mana atispaykiqa ama preparakuychu yanqa-yanqallataqa, amataq tanteaychu mayqentapas manaña preparakunaykipaqqa. Aswanqa kallpanchakuy atisqaykiman hina allinta estudianaykipaq. Chayta sapa semana ruray, tiempopa risqanman hina kallpanchakuy wakin huñunakuykunapaqpas preparakunaykipaq.

Proverbios 24:27 nisqanman hinam Jehova Diosqa qarikunata kamachin llamkaspanku familiankuta mantienenankupaq kaynata nispan: “Wasikimanta hawapi arreglay ruranaykikunata. Tukupay chakraykipi llamkaynikikunata”, nispa. Ichaqa manam qonqanankuchu familianman Diosmanta yachachiytaqa. Hina chay versiculollapim nin: “Chaymantañam rurakunki wasikita”, nispa. ¿Imaynatam kasukuwaq kay nisqanta? Proverbios 24:3 nin: “Yuyaywanmi wasitaqa cimientana”, nispa.

Chaynaqa, ¿imaynatam cuentata qokuq kayniki familiaykita yanapanman? Yuyayniyoq runaqa imamantapas sutillam cuentata qokun. Familianchikwan estudiayninchik aswan allin kananpaqqa sapakama imayna tarikusqankumantam cuentata qokunanchik. ¿Imaynataq Dios serviyninkupi familiayki kachkan? Paykunawan rimaspaykiqa atencionwan uyariy. ¿Musyankichu imayna sientekusqankuta otaq hukmanyasqa kasqankuta? ¿Imamantapas puntataqa kapuqniyoq kaytachu munanku? Warmaykikunawan predicaq lloqsiptiki, ¿mana penqakuspachu estudiaqmasinkunaman reqsichikun Jehova Diospa testigon kasqanta? ¿Kusikunkuchu Bibliata leespa estudiaptikichik? ¿Jehova Diospa kamachisqanman hinachu kawsanku? Familiayki imayna tarikusqanmanta cuentata qokuspaykiqa atinkim yanapayta Diospa yachachisqanman hina kawsanankupaq.

Familiaykipa necesitasqanman hina maskay Willakuq otaq ¡Rikchariy! revistakunapi yachachikuykunata hinaspa tiempowan willay imamanta estudianaykichikpaq kaqkunapi piensanankupaq. Estudiasqaykichikpiqa kuyakuywan yachachiy, amataq qaqchakachaychu nitaq penqachiychu, aswanqa entiendechiy estudiasqaykichik imayna yanapasusqaykichikta. Yanapay rimarinankupaq hinaspa qawachiy Jehova Diospa Palabran imayna kawsananchikpaq ancha allin kasqanta (Sal. 19:7).

Diosta mana serviqkunaqa ichapas estudianku cielopi imakuna kasqanmanta, kikinku imayna kasqankumanta hinaspa allpantinpi tukuy ima pasasqanmanta, ichaqa manamá entiendenkuchu chaykunamantaqa. Biblia estudiaqkunam ichaqa Diospa chuya espiritunpa yanapayninwan cuentata qokunku imapas paypa unanchasqan kasqanmanta, profeciakuna imayna cumplikusqanmanta hinaspa kasukuq runakunapaq Diospa ima munasqanmantapas (Mar. 13:4-29; Rom. 1:20; Apoc. 12:12).

Kaykunamanta yachasqanchikqa manam hatunchakunapaqchu. Diospa Palabranta sapa punchaw leeyqa humilde kanapaqmi yanapawanchik (Deut. 17:18-20). Chaymantapas Diospa Palabranta tukuy sonqonchikwan kuyaspanchikqa kallpanchasqam kasunchik ‘huchaman’ mana urmaykunapaq (Heb. 2:1; 3:13; Col. 3:5-10). Chaywanmi Jehova Diospa munasqanman hina ‘allinta kawsaspa hinaspa paypa munasqanta ruraspa allin ruruchkaq sacha hina tukuy allin kaqkunata rurasunchik’ (Col. 1:10). Chaypaqmi Bibliata estudiana, chaywanmi ancha kusikuyta tarisun.