¿Mañakusqanchiktapunichu Diosqa quwasun?

1, 2. ¿Imanasqataq wakinpiqa piensayta qallaykuchwan Jehova Diosqa mañakusqanchikta mana uyarisqanta?

BIBLIAPIM niwanchik: “Jehova Diosraykuyá kusikuy. Payqa sunquykipa munasqantam qusunki”, nispa (Sal. 37:4). ¡Chayna niwasqanchikqa ancha kusikunapaqmi! Ichaqa, ¿chayraykuchu piensachwan Jehova Diosqa lliw mañakusqanchikta chaylla quwananchikmanta? Chayna tapukuyninchikqa allinmi. ¿Imanasqa? Kaykunapi piensarisun. Soltera iñiqmasinchikmi Jehova Diosta mañakun Diospa munaychakuyninmanta willakuqkunapaq escuelaman rinanpaq, hinaspam solicitudtapas huntachin. Ichaqa unay watakuna pasaptinpas manam qayamunkuchu. Musullaraq iñiqmasinchikñataqmi Diosta mañakullan unquyninmanta sanoyaykachinanpaq, chaynapi astawan iñiqmasinchikkunata yanapananpaq. Ichaqa manam allinyanchu, unqusqallam tarikun. Huk tayta-mamañataqmi Diosta mañakurqaku warmanku Diospa llaqtanpi hinalla kananpaq, ichaqa warmankuqa Diospa llaqtanmantam karunchakururqa.

² Qampas Jehova Diostaqa imatapas mañakurqankichá, ichaqa manapaschá mañakusqaykitaqa qusurqankichu. Chaywanqa yaqapaschá piensayta qallaykurqanki qampa mañakusqaykitaqa Diosqa mana uyarisusqaykita, huk iñiqmasinchikpatañataq uyarisqanta. Ichapas piensanki mana allinta ruwarusqaykirayku mana uyarisusqaykita. Yaqa chaynam tarikurqa iñiqmasinchik Yanetpasb. Paymi qusanpiwan Jehova Diosta mañakurqaku betelpi yanapakuy munasqankumanta. Yanetmi nirqa: “‘Manapas unaymantam qayaramuwanqaku llamkanaykupaq’ nispam piensarqani”. Ichaqa achka watakuna pasaytapas manam qayamurqakuchu. Yanetmi nin: “Llumpay llakisqa hinaspa hukmanyasqam tarikurqani hinaspam nikuq kani: ‘¿Imapitaq Jehova Diosta pantaruni? ¿Chaychu mañakusqayman hina mana yanapawan?’”, nispa.

 3. ¿Imakunamantam kay yachachikuypi yachasun?

³ Wakinpiqa ñuqanchikpas tapukunchikchá: “¿Diosqa uyarichkanchu imaynaya kay mañakusqayta?”, nispa. Ñawpaq tiempopipas Diosta serviqkunam chaynata tapukurqaku (Job 30:20; Sal. 22:2; Hab. 1:2). Chaynaqa, ¿imamanta yachayninchiktaq yanapawasun mañakusqanchikta Jehova Dios uyariwasqanchikmanta manapuni iskayrayanapaq? (Sal. 65:2). Chaymanta yachanapaqmi kaykunamanta yachasun: 1) Mañakusqanchikta uyarispanqa ¿imatam Jehova Diosqa ruwan?, 2) mañakuspanchikqa ¿ima ruwananchiktam Diosqa munan? hinaspa 3) ¿imanasqataq wakinpiqa mañakusqanchikta cambiananchik kanqa?

 4. Jeremias 29:12 nisqanman hinaqa, ¿imatam Jehova Diosqa niwanchik?

⁴ Jehova Diosqa niwanchikmi mañakusqanchikta uyarinanmanta (leey Jeremias 29:12). Diosqa serviqninkunataqa anchatam kuyan, chaymi mañakusqankutaqa uyariykunpuni (Sal. 10:17; 37:28). Chaywanqa manam nichkanchik lliw mañakusqanchikta Dios quwananchikmantachu. Ichapas wakin mañakusqanchikta Dios quwananchikpaqqa suyananchik kanqa kay allpa pachanchik sumaq huerta kanankamaraq.

 5. ¿Imatam Diosqa yuyarin mañakusqanchikta quwananchikpaq?

⁵ Mañakusqanchikta quwananchikpaqqa Diosqa yuyarinmi ñuqanchikpaq ima munasqanta (Is. 55:​8, 9). Diosqariki munachkan enteron kay allpa pachata payña kamachimuptin qaripas, warmipas huk sunqulla payta servinanchiktam. Ichaqa satanasmi nirqa runapuralla kamachinakuspa aswan allinqa kawsakunamanta (Gen. 3:​1-5). Satanaspa nisqan llulla kasqanta yachanapaqmi Diosqa saqichkan runakunalla kamachiwananchikta. Chayqa qawasqanchikman hinam ñakariyllata apamuwachkanchik (Ecl. 8:9). Chayraykum wakin ñakariykuna chinkananpaq mañakuptinchikqa Diosqa kay tiempopiqa manaraq chinkachinqachu. ¿Imanasqa? Wakin ñakariyninchikkunata utaq sasachakuyninchikkunata chinkarachiptinqa wakin runakunach piensanman runapa gobiernon chay ruwayta atirusqanta chaynataq ima sasachakuytapas runalla chinkachiy atisqanta.

 6. Mañakusqanchikman hinapuni Diosninchik mana ruwapuwaptinchikqa, ¿imatam mana ruwanachu, aswanqa imatam yuyarinanchik?

⁶ Chaynallata mañakuptinchikpas Diosqa manam llapallanchiktachu chaynallata yanapawasun. Chayta yachanapaq kaypi piensarisun. Kamachiq Ezequiasmi llumpayta unqurullarqa, chaymi Diosta mañakurqa allinyaykachinanpaq hinaptinmi Diosqa allinyaykachirqa (2 Rey. 20:​1-6). Chaynallataqmi apostol Pablopas ñakarillarqa ‘tipaqnin kichka hina’ cuerponpi kasqanrayku. Chayqa yaqapaschá ima unquypas karqa. Chaymi Diosta mañakullarqa sanoyaykachinanpaq, ichaqa manam sanoyaykachirqachu (2 Cor. 12:​7-9). Yuyariykusuntaq Santiagota hinaspa Pedrota ima pasarusqantapas. Kamachiq Herodesmi iskayninkuta wañuchiyta munarqa. Chaymi iñiqmasinkuna Pedropaq Diosta mañakurqaku, yaqapaschá Santiagopaqpas mañakurqaku. Ichaqa Santiagotaqa wañurachirqakum, Pedrotam ichaqa Jehova Dios angelninwan wañuymanta salvaykurqa (Hech. 12:​1-11). Yaqapaschá ninchik: “¿Imanasqataq Diosqa Pedrollata salvaykurqa?”, nispa. Bibliapiqa manamá chaymantaqa willawanchikchu. Chaywanpas manam iskayrayanchikchu Diospa tukuy ima ruwasqan allin kasqanmantaqa. Chaymi nichwan Diosqa Santiagotapas Pedrota hina anchata kuyasqanta (Deut. 32:4; Apoc. 21:14).c Wakinpiqa manapaschá Diosqa mañakusqanchikman hinapunichu ruwaykapuwasun. Chayna kaptinqa manam Diosninchikpaqqa piñakunanchikchu. Aswanqa yuyarinanchikmi payqa haykapipas allin ruwaq kasqanta hinaspa anchata kuyawasqanchikta (Job 33:13).

 7. ¿Imanasqam hukkunapa imayna kawsakusqanwan mana tupachikunachu?

⁷ Hukkunapa imayna kawsakusqanwanqa manamá tupachikuytaqa munanchikchu. ¿Imanasqa? Wakinpiqa imapas munasqanchiktachá Diosta mañakurqanchik, ichaqa manachá quwarqanchikchu. Chaymanta qipatam yacharuchwan huk iñiqmasinchikpas ñuqanchik hina Diosta mañakusqanta. Hinaptinñataq mañakusqanman hina Dios payta yanapaykusqanta. Chaymi pasarurqa iñiqmasinchik Anata. Qusan Mateom cancer unquywan unqullarqa, hinaptinmi Anaqa Diosta mañakullarqa qusanta allinyaykachinanpaq. Hina chay tiempotaqmi iskay yuyaq iñiqmasinchikkunapas cancerwantaq unqullachkarqaku. Hinaptinmi Anaqa kimsankupaqña Diosta mañakullaq. Yuyaq iñiqmasinchikkunaqa allinyarurqakum, qusan Mateom ichaqa wañukullarqa. Chay pasaruptinmi iñiqmasinchik Anaqa piensarqa: “¿Dioschu kay yuyaq iñiqmasinchikkunata sanoyarachin? Chayna kaptinqa, ¿imanasqataq qusaytaqa mana sanoyaykachirqachu?”, nispa. Manamá sumaqtaqa yachanchikchu imanasqa chay yuyaq iñiqmasinchikkuna allinyarusqankumantaqa. Ichaqa, yachanchikmi hamuq tiempopiña Diosqa lliw ñakarichiwaqninchik kaqkunata chinkachinanmanta chaynataq serviqninkunatapas kawsarichinanmanta, paykunataqariki kuyasqanraykum rikuykuytaña munachkan (Job 14:15).

 8. (1) Isaias 43:2 nisqanman hinaqa, ¿imatam Jehova Diosqa niwanchik? (2) ¿Imaynatam Diosqa yanapawanchik sasachakuykunata aguantanapaq? (Chaypaq qaway Diosta mañakuyqa yanapawanchikmi niq videonchikta).

⁸ Jehova Diosqa tukuy tiempom yanapawasun. Taytanchik Diosqa anchatam kuyawanchik, chaymi payqa imawanpas ñakarisqanchikta qawamuspanqa llakikuwanchik (Is. 63:9). Chaywanpas manamá wakin sasachakuykunamantaqa librawanchikchu. Chayna sasachakuykunatam bibliapi tupachin mayu hina utaq nina hina kasqanta (leey Isaias 43:2). Ichaqa niwanchikmi ima sasachakuypiña tarikuptinchikpas yanapaykuwananchikmanta. Manamá saqinqachu imapas wiñaypaq ñakarichiwananchiktaqa. Chaymantapas, Diosqa atiyninwanmi yanapawanchik ima sasachakuytapas aguantanapaq (Luc. 11:13; Filip. 4:13). Chaymi mana iskayrayanchikchu ima sasachakuypipas tarikuptinchikqa Diosninchikqa yanapawananchikmanta, chaynapi payman sunqu hinalla kanapaq.d

 9. Santiago 1:​6, 7 nisqanqa, ¿imaynata Diosta mañakunapaqmi kallpanchawanchik?

⁹ Jehova Diosqa munan tukuy sunqunchikwan paypi hapipakunanchiktam (Heb. 11:6). Wakinpiqa llumpay sasachakuypi tarikusqanchikraykum piensayta qallaykuchwan: “Manachusmi kay sasachakuyniypiqa Diosqa yanapawanmanchu”, nispa. Ichaqa bibliapim niwanchik sasachakuyninchik ‘hatun pirqa’ hinaña kaptinpas Diosqa yanapawananchikmanta (Sal. 18:29). Chaymi manapuni imaniraqllatapas iskayrayananchikchu ima sasachakuyninchikpipas Dios yanapawananchikmantaqa. Chaynaqa tukuy sunquwanyá mañakusun. Chayna kaptinqa Diosqa uyariwasunmi hinaspam yanapawasun (leey Santiago 1:​6, 7).

10. Diosta mañakuruspapas, ¿imatam mañakusqanchikman hina ruwananchik? Rimarimuy hatun huñunakuyninchikman riyta munaq iñiqmasinchikmanta.

¹⁰ Jehova Diosqa munantaqmi mañakusqanchikman hina kallpanchakunanchikta. Kaypi piensarisun. Huk iñiqmasinchikmi kimsa punchaw hatun huñunakuyninchikman riyta munachkan. Chaypaqmi Diosta mañakullan patronnin permisaykunanpaq. ¿Imaynatataq Diosqa chay mañakusqanpi yanapaykunqa? Ichapas kallpata qunqa patronninwan rimananpaq. Chaypaqqa patronninwanchá parlanan kanqa, wakinpiqa achka kutitachá ninan kanqa. Ninmanmi huk llamkaqmasinña paypa rantinpi chay punchaw llamkananpaq. Wakinpiqa patronnintachá ninan kanqa chay mana llamkasqan punchawkunamantaqa mana pagananpaq.

11. ¿Imanasqataq imapas llakinchikmantaqa mana amispa Diosta mañakunanchik?

¹¹ Diosqa munanmi imapas llakichiwasqanchikmanta mana amispa hinalla mañakunanchikta (1 Tes. 5:17). Jesusmi niwarqanchik wakinpiqa mañakusqanchikta mana chaylla Dios quwananchikmanta (Luc. 11:9). Chaymi mañakusqanchikta Dios mana quwaptinchikqa mana hukmanyananchikchu. Aswanqa tukuy sunqumantam hinalla mañakuna (Luc. 18:​1-7). Chaynaqa, imapas llakinchikmanta tukuy tiempo mañakuspaqa Jehova Diostam nichkanchik paypi tukuy sunqunchikwan iñisqanchikta chaynapi yanapaykuwananchikpaq.

12. (1) ¿Imatam tapukunanchik? ¿Imanasqa? (2) ¿Imatam yuyarinanchik Jehova Diosta respetowan mañakunapaqqa? (Chaypaq qaway “¿Respetowanchu Diosta mañakuni?” niq yachachikuyta).

¹² Mañakusqanchikman hina Diosninchik mana yanapawaptinchikqa kay tapukuypim piensarichwan: “¿Kay mañakusqayqa Diospa qawasqanman hinaqa allinchu?”, nispa. ¿Imanasqam chaynata tapukuna? Yaqa llapanpim piensanchik imapas mañakusqanchikqa allinninchikpaq kasqanta. Ichaqa, yaqapaschá chay mañakusqanchikqa tiempopa risqanman hina sasachakuyta apamuwachwan. Wakinpiqa sasachakuyninchikta imaynata allichananpaqchá Diosta mañakunchik, chaywanpas Diosllam yachan imaynata aswan allin arreglayta. Chaymantapas, wakinpiqa mañakusqanchikqa manapaschá Diospa munasqanman hinachu (1 Juan 5:14). Chaypaq rimarisunchik qallariypi rimamusqanchik tayta-mamamanta. Paykunam Diosta mañakurqaku warmanku Diospa llaqtallanpi kananpaq. Runapa piensasqanman hinaqa chay mañakusqanqa allinmi rikchakapuwachwan. Ichaqa kaytam yuyarinanchik: Jehova Diosqa manam pitapas obliganchu servinanpaqqa, aswanqa munan llapallanchik, warmachanchikkunapas sunqumanta servinanchiktam (Deut. 10:​12, 13; 30:​19, 20). Chaynaqa, ¿imatam chay tayta-mamaqa Jehova Diosta mañakunanku? Mañakunmankum warmanku tukuy sunqunwan Diosta servinanpaq imaynata yanapanankupaq (Prov. 22:6; Efes. 6:4).

13. Hebreos 4:16 nisqanman hinaqa, ¿haykapim Diosninchikqa yanapawanchik?

¹³ Chaymantapas kay tapukuypim piensarinanchik: “¿Imataya Diosqa kay mañakusqaymanta piensachkan? ¿Kamasllachu quwanqa icha suyanayraqchu kanqa?”, nispa. Ichapas ñuqanchikqa munanchik mañakusqanchikman hina chaylla Dios yanapaykuwananchikta. Ichaqa kaytam yuyarinanchik, Jehova Diosmi allinta yachan haykapi hinaspa necesitasqanchik tiempopi yanapawayninchikta (leey Hebreos 4:16). Sichu mañakusqanchikman hina Dios kamaslla mana yanapawaptinchikqa, ichapas piensayta qallaykuchwan mañakusqanchikta mana quwananchikmanta. Ichapas Diosqa piensachkan qipachataña mañakusqanchikta quwayninchikta. Yuyarisunchik qallariypi rimamusqanchik musumanta. Payqa Diostam mañakurqa unquyninmanta sanoyarunanpaq. Sichus kay musuta Dios sanoyarachinman karqa, hinaptinqa satanaschá ninman karqa: “Kay musuqa sanoyarusqanraykullam Diosta servin”, nispa (Job 1:​9-11; 2:4). Ichaqa, yachasqanchikman hinam Diosqa tantiarunña haykapi unquykunata chinkachinanpaq (Is. 33:24; Apoc. 21:​3, 4). Chayraykum mana suyanchikchu kunan tiempopi Jehova Dios kamaslla sanoyachiwananchiktaqa. Chaynaqa, ¿imatataq chay musu iñiqmasinchikqa Jehova Diosta mañakunman? Mañakunmanqa kallpata qunanpaqmi chaynataq hawkayaykachinanpaqmi, chaynapi unquyninwan ñakarillaspanpas hinalla Diosta servinanpaq (Sal. 29:11).

14. ¿Imatam yachanchik iñiqmasinchik Yanetmanta?

¹⁴ ¿Yuyachkankichu Yanetmanta rimamusqanchikta? Paymi qusanpiwan Diosta mañakurqaku betelpi servinankupaq. Pichqa wata pasaruptinñam chayraq cuentata qukururqa huklawkunapi yanapakunankuta Diosqa munasqanta. Paymi nin: “Chay tiempopiqa Jehova Diosmi yanapawarqa astawanraq allin testigo kaspay payta servinaypaq. Yachanaymi karqa Diospi tukuy sunquywan hapipakuyta, qillqanchikkunata hinaspa biblianchikta allinta estudiayta, chaynataq sasachakuypipas kusisqa kayta”, nispa. Chaymanta watakuna pasaytam Yanettawan qusantaqa betelmanta nimurqaku llaqtan-llaqtan watukuq kanankupaq. Paymi nin: “Jehova Diosqa mañakusqaytaqa uyariwarqamá, ichaqa manam munasqayman hinachu quwarqa. Watakuna pasaptinñam cuentata qukururqani, llaqtan-llaqtan watukuq kanaykuta Diospa munasqanqa ñuqaykupaq ancha allin kasqanta. Ancha-anchatam Jehova Diosta agradecekullani kaypi yanapakunaypaq churaykuwasqanmanta, kaynatam kuyawasqanta qawachillawan”, nispa.

15. ¿Imanasqataq wakinpiqa huk ruwaypi yanapakunapaqpas Jehova Diosta mañakunanchik? (Qawaytaq fotokunatapas).

¹⁵ Kay tapukuypipas piensarinataqmi: “¿Ima munasqaytapuni quwananpaqchu Diosta mañakuni?”, nispa. Wakinpiqa allinmi kanman ima ruway munasqanchikmanta Diosta mañakuyqa. Wakinpiñataqmi mañakuchwan huk ruwaykunapiña yanapakunapaq, chaynapi ñuqanchikpaq Jehova Dios ima munasqanta yachanapaq. Chaypaq kaqmanta rimaykusunchik qallariyninpi rimamusqanchik soltera iñiqmasinchikmanta. Payqa Diospa munaychakuyninmanta willakuqkunapaq escuelamanmi riyta munarqa. Chay escuelamanqa riyta munarqa Diospa llaqtanpi astawan yanapakuyta munaspam. Chaypaq mañakuyninqa allinmi karqa. Ichaqa, ¿chayllapaqchu Diosta mañakunman? Mañakunmantaqmi huk ruwaykunapipas Diospa llaqtanpi astawan yanapakunanpaq (Hech. 16:​9, 10). Chaykunapaq Diosta mañakuruspanmi llaqtan-llaqtan watukuq iñiqmasinchikta tapukunman sichus maypipas precursorkunata necesitasqankuta. Chaymantapas, betelpi kaqkunatam tapukunman may llaqtakunapi aslla testigo kasqanta, chaynapi chaypi astawan willakunanpaq.e

16. ¿Imamantam mana iskayrayanchikchu?

¹⁶ Kay yachachikuypim yacharamunchik Diosqa mañakuptinchikqa yanapawananchikmantapuni. Chaytaqa ruwan haykapipas allin ruwaq kasqanraykum chaynataq anchata kuyawasqanchikraykum, chaymantaqa manapunim iskayrayananchikchu (Sal. 4:3; Is. 30:18). Wakinpiqa manapaschá Diosqa imam mañakusqanchiktapunichu quwasun. Chaywanpas uyariwaspanchikmi yanapawasunpuni. Payqariki anchatam kuyawanchik, chaymi mana haykaqpas saqiwasunchu (Sal. 9:10). Chaynaqa, haykapipas Jehova Diosllapiyá hapipakusun, hinaspayá sunqunchikta kicharispa imapas llakinchikta payman willakusun (Sal. 62:8).