Novembro

Nkristu cipo asafunika kulonga mafala akuipa. Mbwenye pana njira inango yakuphatisira mafala akudzidzida yakuti tisafunika kucita nayo mphole-mphole. Mwacitsandzo, ife tisafunika kucita mphole-mphole toera tikhonde kulonga mwakuipa anthu a makhaliro anango, a madzindza anango peno a madziko anango. Kusiyapo pyenepi, ife nee tisafunika kutsukwalisa anango na mafala akutikana. Longani mafala akuwangisa anango. Simbani anango m’mbuto mwakuasumula peno kudungunya. Aizraeli akhali na mathangwi mazinji toera kupereka takhuta, mbwenye kazinji kene iwo akhadungunya. Ife tingadungunya kazinji kene, tinacitisambo anango kutoma kudungunya. Kumbukani kuti mphangwa zakuipa zidalonga amuna khumi adaenda kaona dziko, zacitisa ‘Aizraeli onsene kutoma kudungunyira Mose.’ (Num. 13:31–14:4) Mbwenye tingasimba anango, pinakwanisa kuphedza tonsene toera kukhala akutsandzaya. Natenepa, ndzidzi onsene sakani njira toera kusimba abale na alongo. w22.04 tsa. 8-9 ¶16-17

Kutomera ndzidzi wakale, Yahova asaphedza ana azinji toera akhale axamwali ace. Ananu angafuna, iye anaaphedzambo toera akhale axamwali ace. (1 Akor. 3:6, 7) Ngakhale kuti ananu nee asatumikira Yahova na ntima wawo onsene, iye anapitiriza kuafuna. (Mas. 11:4) Iwo angapangiza kuti ‘asafuna kutawira undimomwene,’ Yahova ali dzololo toera kuaphedza. (Mabasa 13:48; 2 Kro. 16:9) Yahova anakuphedzani toera mulonge pinthu pyakuthema pa ndzidzi wakuti ananu asafuna kakamwe kupibvesera. (Mis. 15:23) Peno iye anaphatisira m’bale peno mulongo mu mpingo toera kuphedza ananu. Maseze ananu akule, Yahova anaaphedza toera akumbuke pinthu pidaapfundzisa imwe. (Juw. 14:26) Mungapitiriza kupfundzisa ananu kubulukira m’mafala anu na pinthu pinacita imwe, Yahova anakupasani nkhombo. w22.04 tsa. 21 ¶18

Sathani nkhabe kwanisabve kubwerera kudzulu, natenepa asatcinga Akristu akudzodzwa a Mulungu, akuti ndi aimiriri a Umambo wa Mulungu pa dziko yapantsi, pontho “akuti ali na basa yakupereka umboni wa Yezu.” (2 Akor. 5:20; Aef. 6:19, 20) Mu caka 1918, abale asere akhatsogolera gulu apambizirwa mbaikhwa nkaidi mu pyaka pizinji. Basa ya Akristu anewa akudzodzwa ikhaoneka ninga ikhadalimira. (Apok. 11:3, 7-11) Mbwenye mu caka 1919, abale anewa akudzodzwa abuluswa nkaidi, pontho mukupita kwa ndzidzi miseru yawo yafudzwa. Mwakukhonda dembuka, abale anewa atoma pontho kutsogolera basa yakumwaza mphangwa na kupfundzisa. Mbwenye pyenepi nee pyacitisa Sathani kusiya kupomokera atumiki a Mulungu. Kutomera mu ndzidzi unoyu, Sathani asacitisa “nyandza” ya mitcingo kuna atumiki onsene a Mulungu. (Apok. 12:15) Mwandimomwene, “pyenepi pisaphemba kupirira na cikhulupiro” kuna m’bodzi na m’bodzi wa ife.—Apok. 13:10. w22.05 tsa. 5-6 ¶14-16

M’masomphenya, mpostolo Juwau aona misoka miwiri yakuti isaphedzera utongi wa Yahova mbitambira umaso wakukhonda mala. Nsoka wakutoma uli na anthu akukwana 144.000. Iwo asakwatwa pa dziko yapantsi, mbaenda kakhala amambo pabodzi na Yezu kudzulu. Iwo anadzatonga dziko yapantsi pabodzi na iye. (Apok. 5:9, 10; 14:3, 4) M’masomphenya anewa, Juwau aaona kudzulu pabodzi na Yezu Paphiri ya Sioni. (Apok. 14:1) Kutomera mu ndzidzi wa apostolo mpaka lero, pikwi pizinji pya anthu asasankhulwa toera kucita khundu ya nsoka wa 144.000. (Luka 12:32; Aroma 8:17) Mbwenye mpostolo Juwau apangwa kuti mwa anthu anewa, ndi akucepa anafuna kusalikira pa dziko yapantsi mu ntsiku zakumalisa. (Apok. 12:17) Buluka penepo, mu ndzidzi wa nyatwa ikulu, anthu anewa anafuna kusalikira anadzakwatwa mbaenda kudzulu toera akakhale pabodzi na anango adaenda kale a mu nsoka wa 144.000. Kudzulu, iwo anadzatonga pabodzi na Yezu mu Umambo wa Mulungu.—Mat. 24:31; Apok. 5:9, 10. w22.05 tsa. 16 ¶4-5

Yezu apfundzisa atowereri ace toera akhale na maonero adidi thangwi ya iwo ene. Yezu aapanga: ‘Tsisi yonsene ya munsolo mwanu yalengeswa.’ (Mat. 10:30) Mafala anewa ndi akuwangisa kakamwe kuna ife, makamaka khala tiri na maonero akuphonyeka thangwi ya ife ene. Pyenepi pisapangiza kuti Babathu wakudzulu asatitsalakana kakamwe, pontho ife ndife akufunika kuna iye. Natenepa ife nee tisafunika kunyerezera kuti nee tathema kukhala alambiri a Yahova na kukhala m’maso kwenda na kwenda mu dziko ipswa. Mu pyaka 15 nduli, revista ya Ncenjezi yalonga tenepa thangwi ya kukhala na maonero adidi thangwi ya ife ene: “Ife nee tisafunika kunyerezera kakamwe thangwi ya ife ene, thangwi pyenepi pinaticitisa kukhala akudzikuza. Pontho ife nee tisafunika kunyerezera kuti nee ndife akufunika kakamwe, thangwi pyenepi pinaticitisa kukhala akutsukwala. M’mbuto mwace, tisafunika kuwangisira toera kukhala na maonero adidi thangwi ya ife ene, mbatidzindikira mphambvu zathu na pinacimwana ife kucita.” w22.05 tsa. 24-25 ¶14-16

M’bodzi na m’bodzi wa ife asafunika kucitanji toera abale na alongo apitirize kukhala akuphatana? Tisafunika kukhala anthu akukhazikisa ntendere. (Mat. 5:9; Aroma 12:18) Ndzidzi onsene unawangisira ife toera kukhala muntendere na abale na alongo athu mu mpingo, ife tisaphedzera kubalika kwa paraizu yauzimu. Ife tisafunika kukumbuka kuti ndi Yahova adabweresa m’bodzi na m’bodzi wa ife m’paraizu yauzimu, yakuti ndi ulambiri wandimomwene. (Juw. 6:44) Yahova asatsandzaya kakamwe angaona kuwangisira kunacita ife toera kukhala muntendere na akuphatana na atumiki ace akuti ndi akufunika kakamwe kuna iye. (Iza. 26:3; Ajeu 2:7) Tinaphedzeka tani mwakukwana na nkhombo zinatipasa Yahova ninga atumiki ace? Ife tisafunika kunyerezera mwadidi pinapfundza ife m’Mafala a Mulungu. Kucita pyenepi kunatiphedza toera kukulisa makhaliro Acikristu akuti anatiphedza toera kupangiza ‘ufuni’ na “cilemedzo kuna unango na ndzace” mu mpingo.—Aroma 12:10. w22.11 tsa. 12-13 ¶16-18

Ife tingakhulupira kuti Yahova atilekerera tisakhala ‘akubalangazwa,’ tisakhala na ntendere wa m’manyerezero na cikumbuntima cakucena. Ife tinakwanisa kukhala na mabvero anewa basi ene khala ‘talekererwa na Yahova.’ (Mabasa 3:19) Yahova angatilekerera, iye asatitawirisa toera tikhale pontho axamwali ace mbaduwala madawo athu. Yahova angatilekerera, iye nee asatipasabve mulando peno kutitcunyusa thangwi ya madawo anewa. (Iza. 43:25) “Ninga kumabulukiro a dzuwa ndi kutali kakamwe na kumadokero a dzuwa,” munjira ibodzi ene, Yahova angatilekerera asaikha kutali kakamwe madawo athu. (Mas. 103:12) Ife tinganyerezera kulekerera kwa Yahova, tinapereka takhuta kakamwe, pontho tinamulemedza. (Mas. 130:4) Yahova nee asalekerera munthu thangwi madawo adacita iye ndi mang’ono peno makulu. Yahova asaphatisira maluso ace ninga Nciti, Nyakukhazikisa Mitemo na Ntongi pakucita pisankhulo toera kulekerera munthu. w22.06 tsa. 5 ¶12-14

Yahova asapereka cidikhiro cakutsandzayisa kakamwe kuna onsene anafuna iye. Mwakukhonda dembuka, iye anadzamalisa kutsukwala, kuduwala na kufa. (Apok. 21:3, 4) Kusiyapo pyenepi, iye anadzaphedza “anthu akukhurudzika” ananyindira kuti Yahova anadzacinja dziko yapantsi kudza paraizu. (Mas. 37:9-11) Iye anadzacita pyenepi toera m’bodzi na m’bodzi wa ife akwanise kukhala na uxamwali wakuwanga kakamwe na iye kupiringana uli na ife lero. Mwandimomwene ceneci ndi cidikhiro cakutsandzayisa kakamwe. Mphapo ninji cinatipasa cinyindiro cakuti mapikiro a Mulungu anadzakwanirisika? Ndi thangwi yakuti ndzidzi onsene Yahova asacita pinalonga iye. Natenepa, ife tiri na mathangwi adidi toera ‘kudikhira Yahova.’ (Mas. 27:14) Ife tinapangiza kuti tisadikhira Yahova tingadikhira mwakupirira na mwakutsandzaya kuti Mulungu anadzakwanirisa mapikiro ace. (Iza. 55:10, 11) Tingapitiriza kukhala akukhulupirika kuna Yahova, mwakukhonda penula tinapaswa nkhombo zinafuna kupaswa “ale anansaka na ntima onsene.” w22.06 tsa. 20 ¶1; tsa. 25 ¶18

Ninga Akristu ife ndife ana a Mulungu, pontho tinakwanisa kukhala na cinyindiro cakuti ninga nsolo wa banja, Yahova anacita pinthu mwakubverana na pidalonga iye kuna misolo yonsene ya mabanja pa 1 Timoti 5:8. Ife tingakhala na cinyindiro cakuti Yahova asatifuna, pontho asafuna banja yathu, ife nee tinapenula kuti tinakhala na pinthu pinafuna ife. (Mat. 6:31-33) Yahova asafuna kutitsalakana, pontho iye ndi waufuni na Wakupasa mwakudzala manja. Mwacitsandzo, pidacita iye dziko yapantsi, iye acita pinthu pizinji kupiringana basi ene pinthu pyakufunika kuna ife toera tikhale m’maso. Mwaufuni, iye adzadza dziko yapantsi na pinthu pyakuti mbapidaticitisa kukhala akutsandzaya kakamwe. (Gen. 2:9) Maseze midzidzi inango ife tinakhala na pinthu pyakucepa, tisafunika kukumbuka kuti ndi Yahova adatipasa pinthu pyenepi. (Mat. 6:11) Ife tisafunikambo kukumbuka kuti pinthu pinatipasa Yahova ndi pyakufunika kakamwe kuna ife kupiringana pinthu pidasiya ife nduli. Pontho ntsogolo, iye anadzatipasa umaso wakukhonda mala.—Iza. 65:21, 22. w22.06 tsa. 15-16 ¶7-8

Nee ndi ale basi adatoma kwene kupfundza Bhibhlya anafunika kudziwa mwadidi Yahova na Bhibhlya. Ife tonsene tisafuna cakudya cakuuma cauzimu. Mpostolo Paulu alemba kuti tingaphatisira pinapfundza ife m’Bhibhlya, pinatiphedza toera “kusiyanisa cinthu cadidi na cakuipa.” Ntsiku zino mphyakunentsa kubvera mitemo ya Yahova, thangwi anthu azinji ali na makhaliro aulukwali. Mbwenye Yezu asacita pyonsene toera tipfundze mphangwa zinafuna ife zakuti zinawangisa cikhulupiro cathu. Mphangwa zenezi zisabuluswa m’Bhibhlya. Ninga Yezu, ife tisalemedza kakamwe dzina ya Yahova. (Juw. 17:6, 26) Mwacitsandzo, mu caka 1931 ife tasankhula kudziwika na dzina idabuluswa m’Bhibhlya yakuti Mboni za Yahova. Natenepa, ife tapangiza kuti dzina ya Mulungu ndi yakufunika kakamwe kuna ife, pontho tisafuna kudziwika na dzina ya Babathu wakudzulu. (Iza. 43:10-12) Kusiyapo pyenepi, m’Bhibhlya ya Dziko Ipswa, dzina ya Mulungu yaikhwa m’mbuto zikhafunika iyo kugumanika. w22.07 tsa. 11-12 ¶11-12

Undimomwene wa Bhibhlya usaphatanizambo mphangwa zadidi za Umambo wa Mulungu. Yezu alandanisa undimomwene unalonga pya Umambo unoyu na mpfuma yakubisika. Pa Mateu 13:44, Yezu alonga: “Umambo wakudzulu walandana na mpfuma idabiswa m’munda, munthu unango aigumana mbaibisambo; thangwi yakukomerwa, iye aenda kagulisa pinthu pyonsene pikhali na iye mbagula munda unoyu.” Onani kuti munthu unoyu nee akhasaka mpfuma. Mbwenye pidaigumana iye, awangisira toera kukhala nayo. Natenepa iye agulisa pinthu pyonsene pikhali na iye. Thangwi yanji? Thangwi iye akhadziwa kuti mpfuma ineyi ikhali ya ntengo ukulu kakamwe. Kodi imwe musaona undimomwene ninga mpfuma ya ntengo ukulu kakamwe? Tiri na cinyindiro cakuti musauona tenepo. Ife tisadziwa kuti nkhabe cinthu cakuti dziko ino inakwanisa kutipasa cakulandana na kutsandzaya kuli na ife thangwi yakutumikira Yahova cincino na cidikhiro cakukhala na umaso wakukhonda mala mu Umambo wa Mulungu. Mwai uli na ife wakukhala na uxamwali wakuwanga na Yahova ndi wadidi kakamwe kupiringana kuwangisira kunacita ife toera kuntumikira. Ife tisatsandzaya kakamwe ‘tingakomeresa’ Yahova mu pinthu pyonsene pinacita ife.—Akol. 1:10. w22.08 tsa. 15 ¶8; tsa. 17 ¶9, 12

Zuze adziwa tani kuti kucita upombo ndi ‘cinthu cakuipa kakamwe’? Aizraeli atambira Mwambo wa Mose ukhalonga kuti “leka kucita upombo” basi ene pidapita pyaka 200. (Eks. 20:14) Ngakhale tenepo, Zuze akhadziwa kuti Yahova nee asakomerwa na makhaliro aulukwali. Mwacitsandzo, Zuze akhadziwa kuti Yahova atomesa banja na mamuna m’bodzi na nkazi m’bodzi. Pontho iye abva kuti Yahova atsidzikiza tani yavu wace, Sara mu ndzidzi udakwatwa iye na Farau toera akhale nkazace. (Gen. 2:24; 12:14-20; 20:2-7) Mu ndzidzi udanyerezera Zuze pyenepi, iye adzindikira kuti ndi pinthu pipi pyadidi na pyakuipa pamaso pa Mulungu. Nakuti Zuze akhafuna Mulungu wace, iye akhafunambo mitemo yakulungama ya Yahova, pontho akhali dzololo toera kuibvera. w22.08 tsa. 26 ¶1-2

Profesiya ineyi nee isalonga pya kulamuswa muli akufa kwakuphipirisa peno kulamuswa muli akufa kwauzimu kwa atumiki a Mulungu kunacitika mu ntsiku zakumalisa, ninga njira ikhabvesesa ife kalene. Mbwenye isalonga pya kulamuswa kwa anthu muli akufa kunafuna kucitika n’dziko ipswa. Thangwi yanji tisalonga tenepo? Fala yakuti “pfumbi” yaphatisirwambo pa Yobe 17:16, pontho iri na mabvekero mabodzi ene na fala yakuti “Nthumbi.” Pyenepi pisapangiza kuti lemba ya Dhanyeli 12:2 isalonga pya kulamuswa muli akufa kwandimomwene kunafuna kucitika kunkhomo kwa ntsiku zakumalisa na pakumala kwa nkhondo ya Armajedhoni. Kodi lemba ya Dhanyeli 12:2 isabvekanji ingalonga kuti anthu anango anadzalamuswa muli akufa toera “akhale m’maso kwenda na kwenda”? Pyenepi pisabveka kuti nkati mwa pyaka 1.000, ale anafuna kulamuswa muli akufa angapitiriza kupfundza thangwi ya Yahova na Yezu mbaabvera, anadzatambira umaso wakukhonda mala.—Juw. 17:3. w22.09 tsa. 21-22 ¶6-7

Mafala anewa nee asabveka kuti Yahova asafuna kuti ife tinyindire anango mwakusowa mathangwi adidi, mbwenye asafuna kuti tinyindire anango thangwi iwo apangiza kuti athema kunyindirwa. Cinyindiro ndi ninga cilemedzo. Thangwi pisaphemba kuwangisira, pontho pisakwata ndzidzi toera kunyindira anango. Mphapo musafunika kucitanji toera kunyindira abale na alongo anu? Adziweni mwadidi. Cedzani nawo pa misonkhano ya mpingo. Citani masasanyiro toera kumwaza mphangwa pabodzi na iwo. Khalani akupirira, mbamudikhira toera kuona khala iwo athema kunyindirwa. Pakutoma, panango pinakhala mwadidi kukhonda kulonga pinthu pyanu pyonsene kuna munthu adadziwana na imwe cincino. Mungadziwana mwadidi, panango imwe munakhala wakusudzuka toera kumpanga pinthu pyanu pyonsene. (Luka 16:10) Mphapo munacitanji khala m’bale peno mulongo akutsukwalisani? Lekani kuipirwa naye mwakucimbiza. Pontho lekani tawirisa kuti pinthu pidacita iye pikutsukwaliseni mbamusiya kunyindira abale anu. w22.09 tsa. 4 ¶7-8

M’bale Miqueas anatumikira ninga nkulu wa mpingo ku América do Sul mu ndzidzi unango iye aona kuti akhatsalakanwa mwakuipa na abale ali na miyai yakutumikira mu gulu ya Yahova. Mbwenye apitiriza kukhala na maonero adidi, pontho akhawangisira toera akhonde kuipirwa kakamwe. Iye akhacita phembero kuna Yahova kazinji kene toera ampase nzimu wakucena na mphambvu kuti akwanise kupirira. Kusiyapo pyenepi, iye akhasakambo mphangwa m’mabukhu athu toera kum’phedza. Pyenepi pisatipfundzisanji? Mungaona kuti mwatsalakanwa mwakuipa na m’bale peno mulongo, khalani wakukhurudzika, pontho wangisirani toera mukhale na maonero adidi. Panango nee musadziwa mathangwi adacitisa munthu kulonga tenepo peno kucita pinthu munjira ineyi. Natenepa longani na Yahova, pontho m’phembeni toera akuphedzeni kuona pinthu munjira inango. M’bale peno mulongo unoyu nee akhafuna kukucitirani pinthu pyakuipa, pontho pyenepi pinakuphedzani toera kumulekerera. (Mis. 19:11) Dziwani kuti Yahova asaona pinthu pinakucitikirani, pontho iye anakupasani mphambvu inafuna imwe toera kupirira.—Ekle. 5:8. w22.11 tsa. 21 ¶5

Sankhulani axamwali anafuna Yahova. Imwe mungasankhula axamwali adidi anakuphedzani toera mukhale na uxamwali wakuwanga na Mulungu. (Mis. 13:20) Julien, wakuti cincino asatumikira ninga nkulu wa mpingo alonga: “Pikhali ine m’phale, ndacita uxamwali na abale mu ndzidzi ukhamwaza ine mphangwa na iwo. Axamwali anewa akhali aphinga m’basa yakumwaza mphangwa, pontho iwo andiphedza kuona kuti kumwaza mphangwa kusatsandzayisa kakamwe. . . . Ine ndadzindikirambo kuti nee ndikhali na axamwali azinji adidi, basi ene ndikhacita uxamwali na anthu a thunga yanga.” Ndiye tani mungadzindikira kuti mu mpingo mwanu muli na m’bale peno mulongo wakuti nee ali na makhaliro adidi toera kucita naye uxamwali? Paulu akhadziwa kuti anthu anango a mu mpingo nee akhacita pinthu ninga Akristu, na thangwi ineyi iye apanga Timoti toera akhale kutali na anthu anewa. (2 Tim. 2:20-22) Uxamwali wathu na Yahova ndi wakufunika kakamwe. Ife tisawangisira kakamwe toera kukhala na uxamwali wakuwanga na Yahova, na thangwi ineyi nee tisafunika kukhala na axamwali akuti anafudza uxamwali unoyu. w22.08 tsa. 5-6 ¶13-15

Mwakusiyana na ale anaida uphungu wa Mulungu, ife tisafuna kakamwe matongero a Yahova na mitemo yace. Ufuni wathu usathimizirika kakamwe tingaona pinacitika kuna ale anabvera Yahova na kuna ale anakhonda kumbvera. Cincino tendeni tione nyatwa zinakhala na ale anakhonda kubvera uphungu wa Yahova. Buluka penepo, onani nkhombo zinakhala na imwe thangwi yakubvera Mulungu. (Mas. 32:8, 10) Yahova asapasa udziwisi wace onsene anaufuna, mbwenye iye nkhabe kukakamiza munthu toera kuutawira. Basi ene iye asalonga nyatwa zinafuna kugwera ale anakhonda udziwisi wace. (Mis. 1:29-32) Iwo “anathabuka thangwi ya pidacita iwo.” Makhaliro awo akuipa anaacitisa kutsukwala, kuthabuka na pakumalisira kuphiwa. Mbwenye Bhibhlya isalonga tenepa kuna ale anabvera uphungu wa Yahova mbauphatisira: “Munthu anandibvesera anadzakhala mwakutsidzikizika, iye anapfulika mbakhonda kugopa nyatwa.”—Mis. 1:33. w22.10 tsa. 21 ¶11-13

Kugopa Yahova ndi kumulemedza kakamwe na kucalira kucita pinthu pyakuti nee pisankomeresa. (Mis. 16:6) Natenepa, ife tisapitiriza kucita pyonsene pinakwanisa ife toera kubvera mitemo ya Mulungu inalonga thangwi ya pinthu pyadidi na pyakuipa, mwakubverana na Bhibhlya. (2 Akor. 7:1) Ife tinakhala akutsandzaya kakamwe tingacita pinthu pinakomerwa na Yahova mbaticalira pinthu pinaipirwa na iye. (Mas. 37:27; 97:10; Aroma 12:9) Munthu panango anadziwa kuti Yahova ndi adathema kulonga kuti ndi pinthu pipi pyadidi na pyakuipa, mbwenye panango nee anatawira kubvera mitemo ya Mulungu. (Aroma 12:2) Ife tisafunika kupangiza na pinthu pinacita ife kuti mwandimomwene kubvera mitemo ya Yahova ndi cinthu cadidi kakamwe toera kucicita. (Mis. 12:28) Dhavidhi akhacita pyenepi, thangwi iye apanga Yahova: “Imwe musandidziwisa njira inatsogolera ku umaso. Ule anakhala pamaso panu, asakhala wakutsandzaya kakamwe; ule ali kunkono wanu wamadyo asakhala wakutsandzaya kwenda na kwenda.”—Mas. 16:11. w22.10 tsa. 8-9 ¶9-10

Yezu apitiriza kukhala wakucepeseka, pontho akhali na maonero adidi thangwi ya iye ene. Mbadzati kubwera pa dziko yapantsi, Yezu acita pinthu pizinji pyadidi mu ndzidzi ukhaphata iye basa pabodzi na Yahova. Kubulukira mwa Yezu “pyacitwa pinthu pyonsene kudzulu na pa dziko yapantsi.” (Akol. 1:16) Pisaoneka kuti mu ndzidzi udabatizwa iye, Yezu akumbuka pinthu pidacita iye pabodzi na Babace. (Mat. 3:16; Juw. 17:5) Mbwenye pinthu pyenepi nee pyacitisa Yezu kukhala wakudzikuza. M’mbuto mwace, Yezu cipo anyerezera kuti akhali wakufunika kakamwe kupiringana anango. Iye apanga anyakupfundzace kuti nee abwera pa dziko yapantsi “toera kutumikirwa, mbwenye toera kutumikira na kupereka umaso wace ninga ciomboli toera kuombola anthu azinji.” (Mat. 20:28) Kusiyapo pyenepi, iye alongambo kuti nee asacita pinthu ninga munafunira iye. Iye akhali wakucepeseka kakamwe. Natenepa, Yezu akhazikisa citsandzo cadidi kakamwe kuna ife toera kuntowezera. w22.05 tsa. 24 ¶13

Yahova mbadzati kucita cisankhulo cakulekerera munthu iye asatoma kuona khala munthu unoyu adacita madawo akhadziwa kuti pikhacita iye ndi pyakuipa peno nkhabe. Yezu afokotoza mwadidi pyenepi pa Luka 12:47, 48. Munthu ananyerezera kucita pinthu pyakuipa mbadziwa kuti pinthu pyenepi pinatsukwalisa Yahova buluka penepo mbapicita, anewa ndi madawo makulu. Panango Yahova nee analekerera munthu unoyu. (Marko 3:29; Juw. 9:41) Mphapo pyenepi pingacitika, pana cidikhiro cakuti Yahova analekerera munthu unoyu? Inde! Thangwi Yahova asaonambo khala munthu adacita madawo atcunyuka na ntima onsene. Pyenepi pisabveka ‘kucinja manyerezero, makhaliro peno cifuniro.’ Kusiyapo pyenepi, kutcunyuka kusaphataniza kusandikika kunacita munthu, mbakhala wakutsukwala kakamwe thangwi ya pinthu pyakuipa pidacita iye, peno thangwi yakukhonda kucita pinthu pyadidi pyakuti iye akhafunika kupicita. Ngakhale tenepo, munthu wakutcunyuka nee asatsukwala basi ene thangwi ya pyakuipa pidacita iye, mbwenye asatsukwalambo thangwi yakuluza uxamwali wace na Yahova. w22.06 tsa. 5-7 ¶15-17

Anyamalwa athu asaphatisira maradhyo, matelevizau na majornali kuphatanizambo interneti toera kulonga uthambi peno kuticitisa kupenula abale anatitsogolera mu gulu ya Yahova. (Mas. 31:13) Abale anango aikhwa nkaidi mbatsalakanwa ninga mapanga. Pyenepi pyacitikambo kuna Akristu a mu ndzidzi wa apostolo pidapambizirwa mpostolo Paulu kuti ali na nseru mbaikhwa nkaidi. Anango asiya kuphedzera Paulu pidaikhwa iye nkaidi ku Roma. (2 Tim. 1:8, 15; 2:8, 9) Panango Paulu atsukwala kakamwe. Iye akhadapirira nyatwa zizinji ngakhale kuikha umaso wace pangozwi thangwi ya iwo. (Mabasa 20:18-21; 2 Akor. 1:8) Ife nee tisafunika kukhala ninga Akristu adasiya Paulu mu ndzidzi ukhafuna iye ciphedzo. Natenepa ife nee tisafunika kudzudzumika tingaona Sathani mbatcinga kakamwe abale anatitsogolera. Iye asaatcinga thangwi asafuna kuti abale anewa asiye kukhulupira Yahova, pontho asafuna kutigopesa. (1 Ped. 5:8) Pitirizani kuphedzera abale anu mbamukhala akukhulupirika kuna iwo.—2 Tim. 1:16-18. w22.11 tsa. 16-17 ¶8-11

Pisaoneka kuti phanga akhadamanikwa pamuti dhuzi na Yezu akhali Muyuda. Ayuda akhalambira Mulungu m’bodzi basi, mbwenye madzindza anango akhakhulupira alungu azinji. (Eks. 20:2, 3; 1 Akor. 8:5, 6) Natenepa, mbapidakhala kuti phanga unoyu akhali wa dzindza inango, panango mbvundzo udacitwa pa lemba ya ntsiku ya lero mbudakhala tenepa: “Kodi iwe nkhabe kugopa alungu?” Kusiyapo pyenepi, Yezu nee akhadatumwa kuna anthu onsene, mbwenye basi ene “kuna mabira akutayika a dzindza ya Izraeli.” (Mat. 15:24) Mulungu akhadadziwisa Aizraeli kuti mbadalamusa anthu muli akufa. Panango phanga unoyu wakutcunyuka akhadziwa pyenepi, pontho mafalace asapangiza kuti akhakhulupira kuti Yahova mbadalamusa Yezu muli akufa toera kutonga mu Umambo wa Mulungu. Pisaoneka kuti mamuna unoyu akhali na cidikhiro cakuti Mulungu mbadamulamusambo muli akufa. Nakuti phanga unoyu wakutcunyuka akhali Muyuda, iye akhadziwa thangwi ya Adhamu na Eva na Paraizu ikhadaapasa Yahova. Natenepa, panango phanga unoyu anyerezera kuti Paraizu idalonga Yezu mbidakhala mbuto yakubalika kakamwe pa dziko yapantsi.—Gen. 2:15. w22.12 tsa. 8-9 ¶2-3

Ife tinakwanisa kucita basa yathu yakumwaza mphangwa basi ene na ciphedzo ca nzimu wa Mulungu. Thangwi yanji? Thangwi Sathani asamenyana na ife toera tisiye kuphata basa yathu yakumwaza mphangwa. (Apok. 12:17) Kuna anthu pisaoneka kuti Sathani ali kutikunda. Mbwenye thangwi ya basa yathu yakumwaza mphangwa anankunda ndife. (Apok. 12:9-11) Munjira ipi? Mu ndzidzi unamwaza ife mphangwa tisapangiza kuti nee tiri kugopa Sathani. Thangwi ndzidzi onsene unamwaza ife mphangwa tisakunda Sathani. Ife tisadzindikira kuti tisapaswa mphambvu na nzimu wakucena, pontho ndife akutawirika kuna Yahova. (Mat. 5:10-12; 1 Ped. 4:14) Nzimu wa Mulungu unakwanisa kutiphedza toera kukunda pinentso pyonsene pinathimbana na ife mu utumiki wathu. (2 Akor. 4:7-9) Mphapo tisafunika kucitanji toera tipitirize kutambira nzimu wa Mulungu? Tisafunika kupitiriza kucita phembero na cinyindiro cakuti Yahova anabvesera maphembero athu. w22.11 tsa. 5-6 ¶10-11

Ife tinapangizambo ufuni kuna abale na alongo athu tingacita pyonsene pinakwanisa ife toera kukhala muntendere na iwo. Ife tisawangisira toera kulekerera anango ninga pinacita Yahova. Nakuti Yahova apereka Mwanace toera afe thangwi ya madawo athu, ife tisafunikambo kulekerera abale na alongo athu angatidawira. Ife nee tisafunika kukhala ninga nyabasa wakuipa adalonga Yezu mu nsangani wace. Maseze mbuyace amulekerera mangawa mazinji kakamwe, nyabasa unoyu nee alekererambo nyabasa ndzace wakuti akhadanfiyari kobiri yakucepa. (Mat. 18:23-35) Khala imwe mwatsukwalisana na m’bale peno mulongo mu mpingo, munakwanisa kukhazikisa ntendere mbidzati kufika ntsiku ya Cikumbuso? (Mat. 5:23, 24) Mungacita pyenepi munapangiza kuti musafuna kakamwe Yahova na Yezu. w23.01 tsa. 29 ¶8-9

Njira ibodzi yakuti inakuphedzani toera kudziwa nyatwa zinathimbana na abale na alongo anu ndi kuacita mibvundzo mwacilemedzo. (Mis. 20:5) Kodi iwo ali na cakudya cakukwana, mitombwe, peno pinthu pinango? Kodi pisaoneka kuti iwo analuza basa yawo peno nee anakhala na kobiri yakukwana toera kulipa nyumba inakhala iwo? Khala mucisa cinakhala imwe mautongi asaphedza anthu, kodi iwo asafuna ciphedzo toera alonge na mautongi anewa? Yahova asafuna kuti ife tonsene tiwangisane unango na ndzace. (Agal. 6:10) Ngakhale ticite pinthu pyakucepa toera kuphedza ale anabva kupha, pyenepi pinaawangisa kakamwe. Mwanang’ono anakwanisa kutumiza tsamba peno cithundzithundzi toera kuwangisa m’bale. M’phale peno ntsikana anakwanisa kugula pinthu peno kucita pinthu pinango toera kuphedza mulongo. Anango anakwanisa kukhunganyira cakudya munthu anabva kupha. Abale na alongo anango asatumiza mphangwa zakupereka takhuta kuna akulu a mpingo akuti kazinji kene asakhala na mabasa mazinji mu ndzidzi wa utenda unathapulisa anthu azinji. Mwandimomwene ndi pyadidi kakamwe tingacita pyonsene pinakwanisa ife toera ‘kupitiriza kubalangazana na kuwangisana.’—1 Ates. 5:11. w22.12 tsa. 22 ¶2; tsa. 23-24 ¶5-6

Asadhuki akhadziwa mabukhu maxanu akutoma a Malemba Acihebheri, mbwenye iwo nee akhatawira undimomwene ukhagumanika m’mabukhu anewa. Mwacitsandzo, onani kuti Yezu atawira tani Asadhuki mu ndzidzi udambvundza iwo thangwi yakulamuswa muli akufa. Iye aatawira: “Kodi imwe nee mwaleri pidalemba Mose thangwi ya thendere ya minga, pidampanga Mulungu kuti: ‘Ine ndine Mulungu wa Abhrahamu, Mulungu wa Izaki na Mulungu wa Yakobe’?” (Marko 12:18, 26) Maseze Asadhuki akhaleri mafala anewa kazinji kene, mbvundzo udacita Yezu wapangiza kuti iwo nee akhatawira undimomwene wakufunika kakamwe wa Mafala a Mulungu wakuti ndi cipfundziso ca kulamuswa muli akufa. (Luka 20:38) Tisapfundzanji? Tingaleri, tisafunika kuonesesa mwadidi pinthu pyonsene pyakuti tinakwanisa kupipfundza na vesi peno na mphangwa zidaleri ife. Nee tisafunika kubvesesa basi ene pinthu pyakukhonda nentsa, mbwenye tisafunikambo kubvesesa undimomwene na midida inango yakufunika. Pinthu pyenepi pyakhala ninga mpfuma yakubisika thangwi ndi pyakunentsa kupigumana. w23.02 tsa. 11 ¶9-10

Maseze amboni onsene analongwa mu lemba ya ntsiku ya lero athimbana na mayesero, iwo apitiriza kukhala akukhulupirika kuna Yahova. (Aheb. 11:36-40) Kodi kupirira kwawo na mabasa awo akhali apezi? Nkhabe. Maseze mu umaso wawo iwo nee aona kukwanirisika kwa mapikiro onsene a Mulungu, iwo apitiriza kudikhira Yahova. Nakuti iwo akhadziwa kuti akhali akutawirika kuna Yahova, iwo akhanyindira kuti mbadaona kukwanirisika kwa mapikiro ace. (Aheb. 11:4, 5) Citsandzo cawo cinakwanisambo kutiphedza toera tipitirize kudikhira Yahova. Lero, ife tiri kukhala mu dziko yakuti makhaliro akuipa ali kutekera kakamwe. (2 Tim. 3:13) Pontho Sathani nee anasiya kuyesera atumiki a Mulungu. Ife tisadziwa kuti tinapitiriza kuthimbana na pinentso pizinji, natenepa tisafunika kuwangisira toera kukhala aphinga m’basa ya Yahova mbatikhala na cinyindiro cakuti “tisaikha cidikhiro cathu kuna Mulungu wa m’maso.”—1 Tim. 4:10. w22.06 tsa. 25 ¶17-18

Thangwi ibodzi inaticitisa kuwangisira toera kutsalakana ungumi wathu ndi toera tikwanise kutumikira Yahova. (Marko 12:30) Na thangwi ineyi, tisacalira kucita pinthu pyakuti pinaphekesa ungumi wathu. (Aroma 12:1) Ndimomwene kuti mwakukhonda tsalakana pyonsene pinacita ife, nee tinakwanisa kukhonda kuduwala. Mbwenye tinakwanisa kuwangisira toera kupangiza Babathu wakudzulu kuti tisapereka takhuta thangwi ya muoni wa umaso. Kuduwala na kukalamba panango kunaticitisa kucimwana kucita pinthu pikhacita ife kale. Na thangwi ineyi, panango tinakhala akutsukwala. Mbwenye cipo tisafunika kubwerera nduli mbatisiya kutsalakana ungumi wathu. Thangwi yanji? Thangwi mwakukhonda tsalakana tiduwale kakamwe peno tikalambe, ife tinakwanisa kupitiriza kutumikira Yahova, ninga pidacita Mambo Dhavidhi. Ndi pyakuwangisa kakamwe kudziwa kuti ife ndife akufunika kuna Mulungu wathu, maseze tiduwale peno tikalambe. (Mat. 10:29-31) Ngakhale tife, iye anadzatilamusa muli akufa. (Yobe 14:14, 15) Mbwenye cincino, ife tisafunika kucita pyonsene pinakwanisa ife toera kutsalakana ungumi wathu na kutsidzikiza umaso wathu. w23.02 tsa. 20-21 ¶3-5

Madzina a mwinji ukulu wa mabira anango, anapitiriza m’bukhu ineyi angapulumuka pa Armajedhoni? Inde. (Apok. 7:14) Yezu alonga kuti anthu anacita khundu ya mabira anango anadzatambira “umaso wakukhonda mala.” (Mat. 25:46) Mbwenye anthu anewa anafuna kupulumuswa pa Armajedhoni nee anatambira umaso wakukhonda mala mu ndzidzi ubodzi ene. Mu ndzidzi wa Utongi wa Pyaka Cikwi, Yezu “anadzaakumbiza, mbaatsogolera ku mphuno za madzi akupasa umaso.” Ale anafuna kubvera citsogolero ca Kristu mbakhala akukhulupirika kuna Yahova, anadzalembwa madzina awo m’bukhu ya umaso mbakhonda kufudzwabve. (Apok. 7:16, 17) Mbwenye ale anacita khundu ya nsoka wa mbuzi, anadzafudzwa pa Armajedhoni. Yezu alonga kuti iwo “anadzaona nyatwa yakufa kwa kwenda na kwenda.” (Mat. 25:46) Pontho mpostolo Paulu alonga: “Anthu anewa anadzaona nyatwa yakufudzwa kwa kwenda na kwenda.”—2 Ates. 1:9; 2 Ped. 2:9. w22.09 tsa. 16 ¶7-8

Banja ingaphatisira pinthu pidacita Yahova toera kucedza pabodzi isakhala yakusudzuka na yakutsandzaya, pontho pyenepi pisaaphedza toera kufunana kakamwe unango na ndzace. Yahova acita mbuto zakubalika kakamwe pa dziko yapantsi zakuti ife tinakwanisa kucita pinthu pinakomerwa na ife. Mabanja mazinji a mu nzinda asakomerwa kuenda kunja kwa nzinda, ku mapiri peno ku praya. Mu dziko ipswa, anyakubala pabodzi na anawo anadzatsandzaya kakamwe na pinthu pidacita Yahova. Mu ndzidzi unoyu, ife nee tinadzafunikabve kugopa pinyama, pontho ipyo nee pinadzatigopambo. (Iza. 11:6-9) Ife tinadzatsandzaya na pinthu pidacita Yahova kwenda na kwenda. (Mas. 22:26) Mbwenye anyakubala, lekani kudikhira ndzidzi unoyu toera kuphedza ananu kuti akomerwe na pinthu pidacita Yahova. Mungaphatisira pinthu pidacita Yahova toera kupfundzisa ananu thangwi ya iye, iwo anakhala na mabvero mabodzi ene ninga a Mambo Dhavidhi adalonga: “Imwe Yahova, nkhabepo unango adacita pinthu ninga pidacita imwe.”—Mas. 86:8. w23.03 tsa. 25 ¶16-17