1 පේතෘස්
1 යේසුස් ක්‍රිස්තුස්ගේ නියෝජිතයෙකු*+ වන පේතෘස් විසින් මේ ලිපිය ලියන්නේ පොන්තසය, ගලාතිය, කපදෝසිය,+ ආසියාව සහ බිතිනිය යන පළාත්වල විසිර සිටින+ තාවකාලික පදිංචිකරුවන්+ වන තෝරාගනු ලැබූ අය+ වෙතටය. 2 පියාණන් වන දෙවි කල්තියාම අරමුණු කළ ලෙස+ ඔබව ඔහුගේ බලයෙන් ශුද්ධ කර* ඇති අතර+ ඔබව තෝරාගෙන තිබෙන්නේ කීකරු අය වීමටය. ඒ සඳහා යේසුස් ක්‍රිස්තුස්ගේ රුධිරයද+ ඔබ මත ඉස ඇත.+
ඔබට දෙවිගේ මහත් කරුණාවත් සමාදානයත් වැඩි වැඩියෙන් ලැබේවා!+
3 අපගේ ස්වාමීන් වන යේසුස් ක්‍රිස්තුස්ගේ දෙවිද පියාණන්ද වන තැනැත්තාණන්ට ප්‍රශංසා වේවා!+ මන්ද යේසුස් ක්‍රිස්තුස්ව මරණයෙන් නැවත නැඟිටුවීම මගින්+ ඔහු තම මහත් දයාවට එකඟව අපට අලුත් උපතක්+ දෙමින් අපට ස්ථිර බලාපොරොත්තුවක් දී ඇත.+ 4 එම බලාපොරොත්තුවට අනුව අපට කිසිදා දිරා නොයන, කැළැල් රහිත, කිසිදා පරවී නොයන ජීවිතයකට උරුමකම් කීමට පුළුවන.+ ඒ උරුමය ඔබ වෙනුවෙන්ද ස්වර්ගයෙහි වෙන් කර තිබේ.+ 5 දෙවි තම බලයෙන් ඔබව ආරක්ෂා කරන්නේ ඔබ තුළ විශ්වාසයක් තිබෙන නිසාය.+ ඔහු එසේ කරන්නේ අවසාන කාල පරිච්ඡේදයේදී+ හෙළි කිරීමට නියමිත+ ගැලවීම ඔබට ලබා දීම සඳහාය.+ 6 ඒ ගැන ඔබ බොහෝ සෙයින් ප්‍රීති වෙනවාට සැකයක් නැත. නමුත් කෙටි කලකට විවිධ පීඩා හා දුෂ්කරතාවලට මුහුණ දෙමින් යම් ශෝකයක් අද්දැකීමට ඔබට සිදු වී ඇත.+ 7 එයින් ඔබේ විශ්වාසය කොතරම් අව්‍යාජ එකක්ද කියා සෝදිසියට ලක් වෙයි.+ එසේ සෝදිසියට ලක් වීමෙන් ඔබේ විශ්වාසය රන්වලටත් වඩා බොහෝ සෙයින් වටිනා දෙයක් බවට තහවුරු විය හැක.+ මන්ද රන් ගින්නෙන් පවිත්‍ර කළත් යම් දිනක එය නැති වී යයි. නමුත් ඔබේ විශ්වාසය එසේ නොවේ. ඒ විශ්වාසය නිසා යේසුස් ක්‍රිස්තුස් එළිදරව් වන අවස්ථාවේදී+ ඔබට ප්‍රශංසාවත් ගෞරවයත් තේජසත් හිමි වනු ඇත. 8 ඔබ ක්‍රිස්තුස්ව කිසිදාක දුටුවේ නැතත් ඔබට ඔහු කෙරෙහි ප්‍රේමයක් ඇත.+ දැන් ඔබට ඔහුව නොපෙනුණත් ඔබට ඔහු කෙරෙහි විශ්වාසයක් ඇති අතර වචනවලින් විස්තර කළ නොහැකි තරම් මහත් ප්‍රීතියක්ද ඔබ අද්දකින්නහුය. 9 මන්ද ඔබේ විශ්වාසය නිසා ඔබේ ජීවිතවලට අනිවාර්යයෙන්ම ගැලවීම ලැබෙන බව ඔබට නිසැකය.+
10 ඔබට ලැබෙන්න නියමිත මහත් කරුණාව ගැන+ අනාවැකි පැවසූ අනාගතවක්තෘවරු+ දැඩි උත්සාහයක් දරමින් ඔබට ලැබෙන ගැලවීම ගැන ඉතා උනන්දුවෙන් සෝදිසි කර බැලුවෝය.+ 11 දෙවිගේ බලය ඔවුන් තුළ ක්‍රියාත්මක වී+ ක්‍රිස්තුස් විඳින වධ හිංසාද+ ඉන් අනතුරුව සිදු වන තේජාන්විත දේවල් ගැනද+ ඔවුන්ට සාක්ෂි ලැබුණු විට ඒවා ක්‍රිස්තුස් තුළින්+ හෙළි වන්නේ කවදාද යන්න ගැන+ ඔවුහු දිගටම සොයා බැලුවෝය. 12 ඒ දේවල් ඔවුන්ට අදාළ වන දේවල් නොවන බව ඔවුන්ට හෙළි කරන ලදි.+ ඇත්තෙන්ම ඔවුන් ඒ දේවල් ගැන දැනුම් දෙමින්+ සේවය කළේ ඔබ වෙනුවෙනි. ඒ දේවල් දැන් ඔබට දැනුම් දී ඇත. එසේ කර තිබෙන්නේ ස්වර්ගයෙන් එවූ දෙවිගේ බලය ඇතුව+ ඔබට ශුභාරංචිය ප්‍රකාශ කළ අය මාර්ගයෙනි. ඒ දේවල් ගැන අවබෝධයක් ලබාගැනීමට දේවදූතයෝ පවා බොහෝ සෙයින් උනන්දු වෙති.+
13 එහෙයින් වෙහෙස මහන්සි වී සේවය කිරීම සඳහා ඔබේ මනස සූදානම් කරගන්න.+ ඔබ හොඳ සිහිකල්පනාවෙන් සිටිය යුතුයි.+ එලෙසම යේසුස් ක්‍රිස්තුස් එළිදරව් වන අවස්ථාවේදී+ ඔබට පෙන්වීමට නියමිත මහත් කරුණාව කෙරෙහි බලාපොරොත්තුවෙන් සිටින්න.+ 14 කීකරු දරුවන් වන්න. ඔබ මීට පෙර නොදැනුවත්කමින් තෘප්තිමත් කරගත් ආශාවලට අනුව තවදුරටත් ක්‍රියා නොකරන්න.+ 15 ඔබව කැඳවූ ශුද්ධ තැනැත්තාණන් මෙන් ඔබත් ශුද්ධව සිටින්න. එය ඔබේ මුළු ජීවිතය තුළින්ම පිළිබිඹු විය යුතුයි.+ 16 මන්ද, “මා ශුද්ධව සිටින නිසා ඔබද ශුද්ධව සිටිය යුතුයි”+ කියා ලියා ඇත.
17 මීට අමතරව සෑම කෙනෙකුටම තමන් කරන දේට අනුව සාධාරණ විනිශ්චයක් ලබා දෙන පියාණන්ට+ ඔබ කන්නලව් කරනවා නම් ඔබ මිහිපිට තාවකාලික පදිංචිකරුවන් ලෙස සිටින මේ කාලයේදී+ දේවගරුබියෙන් යුතුව ක්‍රියා කරන්න.+ 18 මන්ද ඔබේ මුතුන්මිත්තන්ගෙන් ඔබට ලැබුණු සම්ප්‍රදායට අනුව ඔබ කළ නිෂ්ඵල ක්‍රියාවලින් ඔබව නිදහස් කරනු ලැබුවේ+ රන් රිදී වැනි වූ දිරා යනසුලු දේවලින් නොවන බව+ ඔබ හොඳින් දන්නා කාරණයකි. 19 ඔබව නිදහස් කරනු ලැබුවේ කිසි කැළැලක් හෝ අපවිත්‍රකමක් නැති බැටළු පැටවෙකුගේ+ ලේ හා සමාන වූ ක්‍රිස්තුස්ගේ+ අනර්ඝ ලේවලිනි.+ 20 ඒ සඳහා පොළොවේ දරුවන් බිහි වීමට කලින්ම*+ දෙවි ක්‍රිස්තුස්ව තෝරාගෙන තිබුණත් මෙම අවසාන කාලයේදී ඔහු පෙනී සිටියේ ඔබ වෙනුවෙන්ය.+ 21 ඔබ තුළ දෙවි කෙරෙහි විශ්වාසයක් ඇති වූයේ ඔහු මාර්ගයෙනි.+ ඔහුව මරණයෙන් නැඟිටුවා+ තේජසට පත් කළ දෙවි+ එසේ කළේ දෙවි කෙරෙහි විශ්වාසයක් හා බලාපොරොත්තුවක් ඔබ තුළ ඇති කිරීමටය.+
22 දැන් ඔබ සත්‍ය ඉගැන්වීම්වලට කීකරු වීමෙන් ඔබේ ජීවිත පවිත්‍ර කරගෙන ඇති නිසා+ ඔබ තුළ අවංක මෙන්ම අව්‍යාජ සහෝදර ස්නේහයක් දක්නට තිබිය යුතු අතර+ ඔබ හද පත්ලෙන්ම එකිනෙකාට ප්‍රේම කළ යුතුයි.+ 23 මන්ද ඔබ අලුත් උපතක්+ ලැබුවේ ක්ෂය වී යන දෙයක්*+ මගින් නොව කිසිදා ක්ෂය වී නොයන+ ජීවනදායක දෙයක්+ මාර්ගයෙනි. එය ඔබට ලැබුණේ ජීවමාන වූ සදහටම පවතින+ දෙවි පවසන දේ තුළින්ය.+ 24 මන්ද, “මිනිසා තණකොළ මෙනි. ඔහු සතු ගෞරවය තණ මලක් මෙනි.+ තණකොළ වියළී යයි. මලද පරවී වැටෙයි.+ 25 නමුත් යෙහෝවා දෙවි පවසන දේ සදහටම පවතියි.”+ ඔබට ශුභාරංචියක් ලෙස ප්‍රකාශ කර තිබෙන්නේ+ එසේ, ‘පවසන ලද දේවල්ය.’+