එස්රා
4 වහල්භාවයෙන් නිදහස ලැබූ ඊශ්‍රායෙල්වරුන්+ තමන්ගේ දෙවි වන යෙහෝවාට ගෘහයක් ගොඩනඟන බව යුදෙව්වරුන්ගේ හා බෙන්ජමින්වරුන්ගේ සතුරන්ට+ ආරංචි විය. 2 එය දැනගත් විගස ඔවුහු සෙරුබාබෙල්+ හා පෙළපත්වල ප්‍රධානීන්+ වෙතට ගොස් මෙසේ කීවෝය. “ඇසිරියාවේ රජු වූ ඒසර්-හද්දොන්+ අපිව මේ දේශයට ගෙනා කාලය පටන්+ මේ දක්වාම අපි කන්නලව් කරන්නේ ඔබේ දෙවිටයි.+ අපි පුදපූජා ඔප්පු කරන්නෙත් ඔහුටයි. මේ ගෘහය ගොඩනඟන කාර්යයට ඔබ සමඟ හවුල් වෙන්න අපිත් කැමතියි.+ ඉතින් ඔබට උදව් කරන්න අපිට ඉඩ දෙන්න.” 3 නමුත් සෙරුබාබෙල්ද යේෂුවාද+ ඊශ්‍රායෙල්හි පෙළපත්වල අනිකුත් ප්‍රධානීහුද+ ඔවුන්ට මෙසේ කීවෝය. “අපිත් එක්ක එකතු වී අපේ දෙවිට ගෘහයක් ගොඩනඟන්න ඔබට කිසිම අයිතියක් නැහැ.+ ඊශ්‍රායෙල්හි දෙවි වන යෙහෝවාට ගෘහයක් ගොඩනඟන්න කියා පර්සියාවේ රජු වන සයිරස්+ අපිට නියෝග කළා. ඒ කාර්යය ඉටු කිරීමට අපි වෙන කිසිම කෙනෙකුව හවුල් කරගන්නේ නැහැ.”
4 එදා පටන් යූදා දේශය අවට ජීවත් වූ ජාතීහු ගොඩනැඟීමේ කටයුතු අඩාළ කිරීමට මං සෙවූහ.+ යූදාහි වැසියන්ව බියගැන්වීමටත් අධෛර්යයට පත් කිරීමටත් ඔවුහු නිතරම වෑයම් කළෝය.+ 5 ඔවුහු යූදාහි වැසියන්ගේ සැලසුම් කඩාකප්පල් කිරීම සඳහා උපදේශකයන් ලෙස කටයුතු කළ අයට මුදල් පවා ගෙවූහ.+ පර්සියාවේ රජු වූ සයිරස් පාලනය කළ කාලයේ සිට දාරියුස්ගේ පාලන සමය+ දක්වාම මේ තත්වය පැවතිණ. 6 අහෂ්වේරොෂ් රජුගේ පාලන සමයේ මුල් අවදියේදී යූදාහි සහ යෙරුසලමෙහි සියලු වැසියන්ට විරුද්ධව ඔවුහු චෝදනා පත්‍රයක්ද+ ලියා යැවූහ. 7 එමෙන්ම අර්තක්ෂස්තා රජුගේ පාලන සමයේදී බිෂ්ලාම්ද මිත්රෙදාත්ද ටාබෙයෙල්ද ඔවුන්ගේ සගයෝද එකතු වී අර්තක්ෂස්තා රජුට ලිපියක් ලිව්වෝය. එම ලිපිය ඇරමයික භාෂාවට+ පරිවර්තනය කළ පසු ඔවුහු ඇරමයික අක්ෂරවලින් එය රජුට ලියා යැව්වෝය.
8* එම පළාතේ ප්‍රධාන රාජ්‍ය නිලධාරියා වූ රෙහුම්ද ඔහුගේ ලේකම් වූ ෂිම්ෂයිද යෙරුසලමට විරුද්ධව චෝදනා කරමින් අර්තක්ෂස්තා රජුට යැවූ ලිපියෙහි මෙසේ සඳහන් විය. 9 “ප්‍රධාන රාජ්‍ය නිලධාරියා වූ රෙහුම්ද+ ලේකම් වූ ෂිම්ෂයිද ඔවුන්ගේ මිත්‍රයන්ද විනිශ්චයකරුවන්ද මහ ගඟෙන් එගොඩ+ ප්‍රදේශවල* සිටින නියෝජ්‍ය ආණ්ඩුකාරයන්ද ලේකම්වරුන්ද+ බැබිලෝනියට+ අයත් ඒරෙක්හි වැසියන්ද+ සූසාහි වැසියන්+ වන ඒලාම්වරුන්ද+ 10 ගරු අසනපර්+ උතුමාණන් විසින් රැගෙන ගොස් සමාරියේ+ නගරවල පදිංචි කළ ජාතීන්ද+ මහ ගඟෙන් එගොඩ ප්‍රදේශවල සිටින සෙසු ජාතීන්ද යන අය විසින් මෙම ලිපිය ලියන ලදි.” 11 පහත දැක්වෙන්නේ ඔවුන් යැවූ ලිපියේ සඳහන් දෙයයි.
“අර්තක්ෂස්තා+ රජ්ජුරුවන් වෙතටයි. මහ ගඟෙන් එගොඩ ජීවත් වන ඔබේ සේවකයන් වන අපි රජ්ජුරුවන්ට මෙසේ ලියා එවන්නෙමු. 12 රජතුමනි, ඔබ වෙතින් ආ යුදෙව්වරුන් දැන් යෙරුසලමට පැමිණ ඒ කැරලිකාර දුෂ්ට නුවර නැවත ගොඩනඟන බව ඔබට දන්වා එවීම සුදුසුයයි අපි සිතුවෙමු. ඔවුහු මේ වන විටත් එහි අත්තිවාරම් අලුත්වැඩියා කර, පවුරු+ නැවත ගොඩනඟමින් සිටිති. 13 එම නුවර ගොඩනඟා එහි පවුරුද සම්පූර්ණයෙන් සාදා නිම කළ පසු බදු,+ වරිපණම්+ හා රේන්ද බද්ද යන කිසිවක් ඔවුන්ගෙන් නොලැබෙනු ඇත. එසේ සිදු වුවහොත් රාජකීය භාණ්ඩාගාරයට+ මහත් අලාභයක් සිදු වන බවද අපි රජ්ජුරුවන්ට දන්වන්න කැමැත්තෙමු. 14 රජුගෙන් යැපෙන* අප සියලුදෙනාම රජ්ජුරුවන්ට සදා ණයගැතිය. එහෙයින් එවැනි දෙයක් සිදු වුවහොත් රජ්ජුරුවන්ට සිදු වන අලාභය දෙස අපට කිසිසේත් බලා සිටිය නොහැක. එම හේතුව නිසා අපි මෙම ලිපිය මාර්ගයෙන් රජ්ජුරුවන්ට ඒ ගැන දන්වන්න අදහස් කළෙමු. 15 මීට අමතරව ඔබතුමාගේ මුතුන්මිත්තන් ගැන සඳහන්ව ඇති ලියවිලි+ පරීක්ෂා කර බලන මෙන්ද අපි රජ්ජුරුවන්ගෙන් බැගෑපත්ව ඉල්ලා සිටින්නෙමු. එවිට ඒ නුවර කොතරම් කැරලිකාර නුවරක්ද කියාත් රජවරුන්ට හා ඔවුන් යටතේ පැවති පළාත්වලට එම නුවරේ වැසියන් කොතරම් අලාභ සිදු කළාද කියාත් අතීතයේ සිටම එහි සිදු වූ කුමන්ත්‍රණ ගැනත් ඔබතුමන්ට එම ලියවිලිවලින් දැනගත හැකිය. එම නුවර විනාශ කර දමනු ලැබුවේද ඒ හේතුව නිසාමය.+ 16 එම නුවර නැවත ගොඩනඟා එහි පවුරුද සම්පූර්ණයෙන් සාදා නිම කළහොත් මහ ගඟෙන් එගොඩ+ තිබෙන මුළු ප්‍රදේශයම රජ්ජුරුවන්ට අහිමි වන බව අපි සහතිකවම දන්වන්නෙමු.”
17 රජ එම ලිපිය කියවූ පසු ප්‍රධාන රාජ්‍ය නිලධාරියා වූ රෙහුම්ටද+ ලේකම් වූ ෂිම්ෂයිටද සමාරියේ ජීවත් වූ ඔවුන්ගේ සගයන්ටද+ මහ ගඟෙන් එගොඩ ප්‍රදේශවල වෙසෙන අන් සියලුදෙනාටද මෙසේ දන්වා යැවීය.
“ඔබ සැමට සුබ පැතුම්!+ 18 ඔබ විසින් එවන ලද ලිපිය මා ඉදිරියේ පැහැදිලිව කියවනු ලැබීය. 19 එහෙයින් ඔබ සඳහන් කළ කාරණය ගැන සොයා බැලීමට+ මම මාගේ සේවකයන්ට නියෝග කළෙමි. ඒ නුවරෙහි වැසියන් අතීතයේ සිටම රජවරුන්ට විරුද්ධව කැරලිගසමින් ද්‍රෝහිව කටයුතු කරන ජාතියක් බව මට දැනගන්න ලැබිණ.+ 20 මහ ගඟෙන්+ එගොඩ ඇති සියලු ප්‍රදේශ පාලනය කළ බලවත් රජවරුන්+ යෙරුසලමෙහි පාලනය කළ බවත් එම රජවරුන් බදු, වරිපණම් හා රේන්ද බද්ද ජනයාගෙන් අය කළ බවත් දැනගන්න ලැබිණ.+ 21 එහෙයින් මා විසින් ආඥාවක් නිකුත් කරන තෙක් ඒ නුවර ගොඩනැඟීමේ කටයුතු සම්පූර්ණයෙන්ම නතර කරන ලෙස ඔවුන්ට අණ කරන්න. 22 රජ්ජුරුවන් වන මට සිදු විය හැකි පාඩුව තවත් වැඩි නොවන පිණිස මේ කාරණය නොපමාව ඉටු කළ යුතුය.”+
23 අර්තක්ෂස්තා රජු විසින් එවන ලද රාජකීය ලියවිල්ලේ පිටපතක් ප්‍රධාන රාජ්‍ය නිලධාරියා වූ රෙහුම්ටද+ ඔහුගේ ලේකම් වූ ෂිම්ෂයිටද+ ඔවුන්ගේ සගයන්ටද+ ඇසෙන සේ කියවන ලදි. එවිට ඔවුහු අවිවලින් සන්නද්ධ පිරිසක් රැගෙන විගස යෙරුසලමේ සිටි යුදෙව්වරුන් වෙතට ගොස් ඔවුන් කරමින් සිටි ගොඩනැඟීමේ කාර්යය බලහත්කාරයෙන් නවතා දැමූහ.+ 24 යෙරුසලමේ තිබූ දෙවිගේ ගෘහය නැවත ගොඩනැඟීමේ වැඩකටයුතු නතර වූයේ එයාකාරයෙනි. පර්සියාවේ රජු වන දාරියුස්+ පාලනය කළ දෙවන අවුරුද්ද දක්වාම එහි වැඩකටයුතු නවතා දමා තිබිණ.