එසකියෙල්

6 “‘එහෙත් ප්‍රහාරයක් එල්ල වන බව දැක දැකත් මුරකරු හොරණෑව පිඹින්නේ නැත්නම්,+ ජනතාවට ඒ අනතුර ගැන කිසිම හෝඩුවාවක් ලැබෙන්නේ නැත. එවිට තමා කළ වැරදි නිසා දුෂ්ටයා මැරුම් කන්නේය.+ නමුත් ඔහුගේ ජීවිත වෙනුවෙන් ඒ මුරකරු මට වන්දි ගෙවිය යුතුය.’+

7 “මනුෂ්‍ය පුත්‍රය, මේ දේ අසන්න. මම ඔබව ඊශ්‍රායෙල් සෙනඟ වෙනුවෙන් මුරකරුවෙකු ලෙස පත් කළෙමි.+ ඔබ මා කියන දේ අසා මා දෙන අනතුරු ඇඟවීම ඔවුන්ට දැන්විය යුතුයි.+ 8 ‘ඔබ අනිවාර්යයෙන්ම මිය යනවා’ කියා මා දුෂ්ටයන්ට පවසන විට+ ඔබ ඔවුන් කරන දුෂ්ට ක්‍රියා ගැන අනතුරු ඇඟවිය යුතුයි.+ ඔබ එසේ නොකළොත් ඔවුන් කරන දුෂ්ටකම් නිසා ඔවුහු මිය යන්නෝය.+ නමුත් ඔවුන්ගේ ජීවිත වෙනුවෙන් ඔබ මට වන්දි ගෙවිය යුතුයි. 9 තමන් කරන දුෂ්ටකම් අත්හැර දමන්න කියා ඔබ දුෂ්ටයන්ට අනතුරු ඇඟෙවූ පසුත් ඔවුන් තමන් කරන වැරදි දේවලින් ඉවත් වූයේ නැත්නම් ඔවුන් කළ දුෂ්ටකම් නිසා ඔවුහු මිය යන්නෝය.+ නමුත් ඔබ එයට වග කිව යුතු නැත. ඔබේ ජීවිතය ඔබ බේරාගන්නවා ඇත.+

10 “මනුෂ්‍ය පුත්‍රය, මේ දේ අසන්න. ඔබ ගොස් ඊශ්‍රායෙල් සෙනඟට මේ දේ කියන්න. ‘ජනයෙනි, ඔබ මෙසේ පවසා ඇත. “අපි කැරලිගැසුවෙමු. පව් කළෙමු. අප කළ වැරදි අපේ සිතට බොහෝ සෙයින් වද දෙයි. ඒ නිසා දිනෙන් දින අපි වැහැරී යන්නෙමු.+ අප දිගටම ජීවත් වෙයි කියා කෙසේ නම් සිතන්නද?”’+ 11 ඔවුන්ට මෙසේ පවසන්න. ‘විශ්වයේ පාලකයාණන් වන යෙහෝවා දෙවි මෙසේ කියයි. “ජීවමාන දෙවි වන මම සහතිකවම මෙසේ පවසන්නෙමි. දුෂ්ටයෙකු වැරදි මාර්ගයෙන් හැරී+ දිගටම ජීවත් වෙනවාට මිස+ ඔහු මිය යනවාට මම කිසිසේත් කැමති නැත.+ අනේ ඊශ්‍රායෙල් ජනයෙනි, ඔබ කරන නපුරු දේවල් අත්හැර දමන්න.+ ඔබ නිකරුණේ මිය යා යුත්තේ මන්ද?”’+

12 “මනුෂ්‍ය පුත්‍රය, ඔබේ ජනතාවට මෙසේ පවසන්න. ‘ධර්මිෂ්ඨයෙක් තම ධර්මිෂ්ඨ ප්‍රමිති අත්හැර කැරලිගසනවා නම් අතීතයේ ධර්මිෂ්ඨ ජීවිතයක් ගත කළ පමණින් ඔහුට තම ජීවිතය ගලවාගත නොහැක.+ අනික් අතට දුෂ්ටයෙක් තම දුෂ්ට ක්‍රියා අත්හැර යහමඟට එනවා නම් අතීතයේ කළ දුෂ්ටකම් නිසා ඔහුට මරණය අත් වන්නේ නැත.+ ධර්මිෂ්ඨයෙකු වුවත් පව් කරනවා නම් ජීවත් වීමේ ප්‍රස්තාව ඔහුටද අහිමි වෙයි.+ 13 “ඔබ සැබවින්ම ජීවත් වන්නෙහිය” කියා මම ධර්මිෂ්ඨ කෙනෙකුට පැවසූ පසු ඔහු තම ධර්මිෂ්ඨකම ගැන ආඩම්බර වෙමින් අයුක්තිසහගත ලෙස ක්‍රියා කරන්න පටන්ගන්නවා නම්+ ඔහු අතීතයේ කළ එක ධර්මිෂ්ඨ ක්‍රියාවක්වත් සිහි කරනු ලබන්නේ නැත. ඔහු අයුක්තිසහගත ලෙස ක්‍රියා කළ නිසා මිය යනු ඇත.+

14 “‘මා දුෂ්ටයෙකුට, “ඔබ සැබවින්ම මිය යන්නෙහිය” කියා පැවසූ පසු+ ඔහු තමාගේ පව්කාර ක්‍රියා අත්හැර+ යුක්තිගරුක, ධර්මිෂ්ඨ ජීවිතයක් ගත කරන්න පටන්ගන්නවා නම්+ 15 ඔහු මිය යන්නේ නැත. ඔහු ණයකට ඇපයක් ලෙස ගත් දේ ආපසු භාර දෙන නිසාත්+ සොරකම් කළ දේ වෙනුවෙන් වන්දි ගෙවන නිසාත්+ කිසිවෙකුට අසාධාරණයක් නොකර ප්‍රතිපත්තිගරුක ජීවිතයක් ගත කරන නිසාත්+ ඔහු විනාශ නොවී දිගටම ජීවත් වනු ඇත.+ 16 මම අතීතයේ ඔහු අතින් සිදු වූ වැරදි දේවල් නැවත මතක් කර ඔහුට විරුද්ධව පියවර ගන්නේ නැත.+ ඔහු දැන් යුක්තිගරුක, ධර්මිෂ්ඨ ජීවිතයක් ගත කරන නිසා ඔහු සැබවින්ම ජීවත් වනු ඇත.’+

17 “‘යෙහෝවා දෙවි ක්‍රියා කරන ආකාරය සාධාරණ නැහැ’ කියා ඔබේ ජනතාව පවසා ඇත.+ එහෙත් අසාධාරණ ලෙස ක්‍රියා කරන්නේ ඔවුන්ය.

18 “ධර්මිෂ්ඨ කෙනෙක් තමන් ගත කරන ධර්මිෂ්ඨ ජීවිතය අත්හැර අයුක්තිසහගත දේවල් කරන්න පටන්ගන්නවා නම් ඔහු කරන ඒ අයුක්තිසහගත දේවල් නිසා ඔහු මිය යා යුතුය.+ 19 අනික් අතට දුෂ්ටයෙක් තමාගේ දුෂ්ට ක්‍රියාවලින් ඉවත් වී යුක්තිගරුක, ධර්මිෂ්ඨ ජීවිතයක් ගත කරන්න පටන්ගන්නවා නම් එතැන් සිට ගත කරන ධර්මිෂ්ඨ ජීවිතය නිසා ඔහු දිගටම ජීවත් වන්නේය.+

20 “ජනයෙනි, ‘යෙහෝවා දෙවි ක්‍රියා කරන ආකාරය සාධාරණ නැහැ’ කියා ඔබ පවසා ඇත.+ එහෙත් ඊශ්‍රායෙල් ජනයෙනි, මේ දේ අසන්න. මා ඔබව විනිශ්චය කරන්නේ ඔබ එක් එක් කෙනා ගත කරන ජීවිතයට අනුවයි.”+

21 යම් කලක් ගත වූ පසු එනම්, අප වහල්භාවයේ සිටි දොළොස්වන වසරේ දහවන මාසයේ පස්වන දිනයේදී, යෙරුසලමෙන් පලා ආ කෙනෙක් මා ළඟට ඇවිත් මෙසේ පැවසීය.+ “සතුරන් ඇවිත් අපේ නුවර අල්ලාගෙන!”+

22 ඒ තැනැත්තා මා ළඟට පැමිණියේ උදෑසනින්මය. ඊට කලින් දවසේ සවස් වරුවේ යෙහෝවා දෙවිගේ බලය මා තුළ ක්‍රියාත්මක විය.+ එහෙයින් එතෙක් කතා කිරීමට නොහැකිව සිටි මට කතා කිරීමේ හැකියාව ලැබිණ.+

23 යෙහෝවා දෙවි මට මෙසේ පැවසීය. 24 “මනුෂ්‍ය පුත්‍රය, ඊශ්‍රායෙල් දේශයේ පාළුවට ගිය තැන්වල වෙසෙන අය+ ඊශ්‍රායෙල් දේශය ගැන මෙලෙස කතා වෙති. ‘ආබ්‍රහම් මේ දේශය යටත් කරගත්තේ තනිවමයි.+ එහෙත් අපට විශාල පිරිසක් ඉන්නවා. ඉතින් අපට උරුම වූ මේ දේශය අපට අහිමි වෙන්නේ කොහොමද?’+

25 “එබැවින් ඔවුන්ට මෙසේ පවසන්න. ‘විශ්වයේ පාලකයාණන් වන යෙහෝවා දෙවි පවසන්නේ මෙයයි. “ඔබ ලේ සමඟ මස් කන්නහුය.+ ඔබ පිහිට පතන්නේ ඔබේ පිළිකුල්සහගත රූපවලිනි.+ ඔබ මිනී මරන්නහුය.+ එබැවින් මා ඔබට මේ දේශයේ දිගටම ජීවත් වෙන්න ඉඩ දෙන්නේ කොහොමද?+ 26 ඔබ විශ්වාසය තැබුවේ ඔබේම යුධ ශක්තිය කෙරෙහිය.+ ඔබ කළේම පිළිකුල්සහගත දේවල්ය.+ ඔබේ මිතුරාගේ බිරිඳ සමඟ ඔබ අනාචාරයේ යෙදී ඇත.+ එබැවින් ඔබට මේ දේශයේ දිගටම ජීවත් වෙන්න ඉඩහරින්නේ කෙසේද?”’+

27 “ඔබ ඔවුන්ට මෙසේ කිව යුතුයි. ‘විශ්වයේ පාලකයාණන් වන යෙහෝවා දෙවි මෙසේ පවසයි. “ජීවමාන දෙවි වන මා පවසන මේ දේ අනිවාර්යයෙන්ම සිදු වන්නේය. පාළුවට ගිය තැන්වල ජීවත් වන ඔවුහු අනිවාර්යයෙන්ම කඩුවෙන් මැරුම් කන්නෝය.+ කෙත්වතුවල සිටින අයව මම වනමෘගයන්ට ආහාර පිණිස දෙන්නෙමි.+ ආරක්ෂිත තැන්වලත් ගුහාවලත් සැඟවී සිටින අය+ වසංගතයෙන් මිය යන්නෝය. 28 මම මේ දේශය නැති නාස්ති කර පාළු ඉඩමක් බවට පත් කරන්නෙමි.+ ඔබේ මහත් ආඩම්බරයට හේතු වූ ඔබේ බලමහිමයද නැති වී යන්නේය.+ ඊශ්‍රායෙල් දේශයට අයත් මුළු කඳුකරයම කිසිවෙකු පය නොතබන පාළු ප්‍රදේශයක් බවට පත් කරන්නෙමි.+ 29 ඔවුන් කර ඇති පිළිකුල්සහගත දේවල් නිසා+ මම මේ දේශය පාළු ස්ථානයක් බවට පත් කරන්නෙමි.+ එවිට මා යෙහෝවා දෙවි බව පිළිගන්න ඔවුන්ට සිදු වනු ඇත.”’

30 “මනුෂ්‍ය පුත්‍රය, ඔබ සමඟ සිටින ජනතාව පවුරු අසලත් තමන්ගේ නිවෙස්වල දොරකඩ අසලත් එකිනෙකා සමඟ ඔබ ගැන කතා කරමින් සිටිති.+ ඔවුහු එකිනෙකාට කතා කරමින්, ‘එන්න, යෙහෝවා දෙවිගේ පණිවිඩයට සවන් දෙමු’ කියා පවසති.+ 31 ඔවුහු මගේ වචනවලට ඇහුම්කන් දෙන සෙනඟක් මෙන්, සුපුරුදු පරිදි ඔබ ළඟට ඇවිත් ඔබ ඉදිරියේ හිඳගෙන+ ඔබ පවසන දේට සවන් දෙනු ඇත. එහෙත් ඔවුහු කිසිසේත් ඒවා පිළිපදින්නේ නැත.+ මන්ද ඔවුහු අයුතු ලෙස ලාභ ලැබීමට වෙහෙසෙති. ඔවුන්ගේ මුවින් පිට වන්නේ අශික්ෂිත දේවල්ය.+ 32 බලන්න, ඔවුන් ඔබව සලකන්නේ බොළඳ පෙම් ගී ගයන ගායකයෙකු ලෙසය. මියුරු කටහඬකින් ගී ගයන දක්ෂ වීණා වාදකයෙකු ලෙසය.+ ඔවුහු අනිවාර්යයෙන්ම ඔබට සවන් දෙනු ඇත. එහෙත් ඔබ කියන දේට එකඟව ක්‍රියා කරන්නේ නැත.+ 33 මේ සියල්ල නිසැකවම ඉටු වන්නේය.+ ඒවා ඉටු වන විට ඔවුන් අතර අනාගතවක්තෘ කෙනෙකු සිටින බව පිළිගන්න ඔවුන්ට සිදු වනු ඇත.”+