යොහන්
5 ඉන්පසු යුදෙව්වරුන්ගේ උත්සවයක්+ සඳහා යේසුස් යෙරුසලම බලා ගමන් කළේය. 2 යෙරුසලමේ බැටළු දොරටුව+ අසල හෙබ්‍රෙව් බසින් බෙත්සාතා නමින් හැඳින්වූ පොකුණක් තිබිණ. එම පොකුණ වටා කුලුනු සහිත සක්මන් මළු පහක්* ඉදි කර තිබිණ. 3 ඔත්පළව සිටි විශාල පිරිසක් මේ මළුවලට වී සිටියෝය. ඔවුන් අතර විවිධ අසනීපවලින් පෙළුණු අයද අන්ධ අයද අත පය පණ නැති අයද සිටියෝය. 4 —— 5 ඔවුන් අතර අවුරුදු තිස්අටක් පුරා රෝගීව සිටි එක්තරා මිනිසෙක් සිටියේය. 6 ඒ මිනිසා ඔත්පළව සිටින ආකාරය යේසුස් දුටුවේය. ඔහු බොහෝ කාලයක් පුරා අසනීපව සිටි බව+ දැන සිටි යේසුස්, “ඔබ කැමතිද සුව වෙන්න”+ කියා ඔහුගෙන් ඇසුවේය. 7 අසනීපව සිටි ඒ මිනිසා මෙසේ පිළිතුරු දුන්නේය. “මහත්මයාණෙනි, වතුර කැලඹෙන විට පොකුණට බහින්න මට උදව් කරන්න කවුරුත් නැහැ. මම යන්න උත්සාහ කරන විට මට කලින් තවත් කෙනෙක් වතුරට බහිනවා.” 8 එවිට යේසුස්, “නැඟිට, ඔබේ යහනත් රැගෙන ඇවිදින්න”+ කියා ඔහුට කීවේය. 9 ඒ මොහොතේදීම ඒ මිනිසා සුව වී, තම යහනත් රැගෙන ඇවිදින්න පටන්ගත්තේය.
මේ සියල්ල සිදු වූයේ සබත් දවසකය.+ 10 එහෙයින් යුදෙව්වරු සුවය ලැබූ ඒ මිනිසාට මෙසේ කීවෝය. “අද සබත් දවස කියා ඔබ දන්නේ නැද්ද? මේ විදිහට ඔබේ යහන උසුලාගෙන යෑම නීති විරෝධීයි.”+ 11 නමුත් ඔහු, “‘ඔබේ යහන රැගෙන ඇවිදින්න’ කියා මට කිව්වේ මාව සනීප කළ තැනැත්තායි” කියා ඔවුන්ට පිළිතුරු දුන්නේය. 12 “ඔබට, ‘එය රැගෙන ඇවිදින්න’ කියා පැවසුවේ කවුද” කියා ඔවුහු ඔහුගෙන් ඇසුවෝය. 13 නමුත් ඒ මිනිසා තමාව සුව කළේ කවුද කියා දැන සිටියේ නැත. එමෙන්ම ඒ ස්ථානයේ විශාල සෙනඟක් සිටි නිසා යේසුස් එතැනින් ඉවත්ව ගොස් තිබිණ.
14 ටික වේලාවකට පසු යේසුස් ඔහුව දේවමාලිගාවේදී මුණගැසුණු අතර, “දැන් ඔබට සුවය ලැබිලා. පව් කිරීමෙන් වැළකී සිටින්න. ඔබ එසේ කළේ නැත්නම් වඩා දරුණු දෙයක් ඔබට සිදු විය හැකියි” කියා ඔහුට කීවේය. 15 එවිට ඒ මිනිසා ගොස් තමාව සනීප කළේ යේසුස් බව යුදෙව්වරුන්ට කීවේය. 16 යේසුස් මේ දේවල් සබත් දවසේදී කළ නිසා යුදෙව්වරු යේසුස්ට චෝදනා එල්ල කළෝය.+ 17 නමුත් යේසුස් ඔවුන්ට පිළිතුරු දුන්නේ මෙසේයි. “මගේ පියාණන් මේ දක්වා වැඩ කරමින් සිටිනවා. මමත් දිගටම වැඩ කරනවා.”+ 18 යුදෙව්වන්ට ඒ වචන ඇසුණු විට ඔවුහු යේසුස්ව මරා දැමීමට තව තවත් මං සෙව්වෝය.+ එසේ වූයේ ඔහු සබත් දවසේ නීතිය කඩ කරනවා කියා ඔවුන් සිතූ නිසා පමණක් නොව දෙවි තමාගේම පියාණන් බව පවසමින්+ ඔහු දෙවිට සමාන වීමට උත්සාහ කරන බවත්+ ඔවුන් සිතූ නිසාය.
19 යේසුස් ඔවුන්ට මෙසේද කීවේය. “ඇත්තෙන්ම මම ඔබට කියන්නේ, පුත්‍රයාට තනි කැමැත්තෙන් කිසිම දෙයක් කළ නොහැකි බවයි. ඔහු තම පියාණන් කරන දේවල් බලාගෙන+ ඒ දේවල් එලෙසම ඉටු කරයි. ඒ නිසා පියාණන් යම් දෙයක් කළොත් පුත්‍රයාත් ඒ දේම කරයි. 20 පියාණන්ට තම පුත්‍රයා සඳහා ඇත්තේ ඉමහත් ආදරයක්.+ ඒ නිසා තමන් කරන සෑම දෙයක්ම පුත්‍රයාට පෙන්වා දෙනවා. ඒ විතරක් නොවෙයි, ඔබ දුටු දේවලට වඩා ශ්‍රේෂ්ඨ දේවලුත් කරන්න පියාණන් පුත්‍රයාට කියා දෙනවා. ඒවා දැක ඔබ පුදුමයට පත් වෙයි.+ 21 පියාණන් මිය ගිය අයට ජීවනය දී නැවත නැඟිටුවනවා+ වගේම පුත්‍රයාත් තමන් කැමති අයට ජීවනය ලබා දෙනවා.+ 22 මීට අමතරව පියාණන් කිසිවෙකුව විනිශ්චය කරන්නේ නැහැ. ඔහු එම විනිශ්චය කිරීමේ වගකීම පවරා තිබෙන්නේ තම පුත්‍රයාටයි.+ 23 පියාණන් එසේ කළේ සියලුදෙනා තමාට ගෞරව කරනවා වගේම තම පුත්‍රයාටත් ගෞරව කරනවා දැකීමටයි.+ ඒ නිසා කෙනෙක් පුත්‍රයාට ගෞරව කරන්නේ නැත්නම් ඒ තැනැත්තා පුත්‍රයාව එවූ පියාණන්ටත් ගෞරව කරන්නේ නැහැ.+ 24 ඇත්තෙන්ම මම ඔබට කියන්නේ, මා පවසන දේවලට සවන් දී මා එවූ තැනැත්තාව විශ්වාස කරන පුද්ගලයාට සදාකාල ජීවනය හිමි වන බවයි.+ ඔහුට විනිශ්චයක් ලැබෙන්නේ නැති අතර ඔහු මරණයෙන් මිදී අලුත් ජීවිතයක් ලබයි.+
25 “ඇත්තෙන්ම මම ඔබට කියන්නේ, දෙවිගේ පුත්‍රයාගේ හඬ+ මිය ගිය අයට+ ඇසෙන කාලය පැමිණෙන බවයි. එය දැනටමත් පැමිණ තිබෙනවා. ඔහු පවසන දේ සිතට ගන්නා අය ජීවත් වෙයි.+ 26 මන්ද ජීවනය ලබා දීමේ බලය පියාණන්ට තිබෙනවා.+ ඒ වගේම ඔහු ජීවනය ලබා දීමේ බලය පුත්‍රයාටත් දී තිබෙනවා.+ 27 පියාණන් ඔහුට විනිශ්චය කිරීමේ බලයත් දී තිබෙන්නේ+ ඔහු මනුෂ්‍ය පුත්‍රයා+ වන නිසයි. 28 මේ ගැන පුදුම වෙන්න එපා. මන්ද සොහොන් ගෙවල්වල*+ සිටින සියලුදෙනාටම ඔහුගේ හඬ ඇසෙන කාලය පැමිණෙනවා. 29 ඒ කාලයේදී යහපත් දේ කරන අය ජීවනය සඳහා නැවත නැඟිටීමක්+ ලබන අතර පිළිකුල් දේවල් කරන අය විනිශ්චයක් සඳහා නැවත නැඟිටීමක්+ ලබනවා. 30 මම මගේම කැමැත්තට අනුව කිසිම දෙයක් කරන්නේ නැහැ. මම විනිශ්චය කරන්නේ මගේ පියාණන් කියන ආකාරයටමයි. ඒ නිසා මගේ විනිශ්චය සාධාරණයි.+ මන්ද මම උත්සාහ කරන්නේ මගේම කැමැත්ත කරන්න නොව මා එවූ තැනැත්තාගේ කැමැත්ත කිරීමටයි.+
31 “මා ගැන සාක්ෂි දරන්න සිටින්නේ මා පමණක් නම්+ මගේ සාක්ෂිය සැබෑ වන්නේ නැහැ.+ 32 ඒ නිසා මා ගැන සාක්ෂි දරන්න තව කෙනෙක් සිටිනවා. ඔහු මා ගැන ලබා දෙන සාක්ෂිය+ සැබෑ බව මම හොඳටම දන්නවා. 33 ඔබ මිනිසුන්ව යොහන් ළඟට යැව්වා නේද? ඔහු මා ගැන සැබෑ සාක්ෂියක් දැරුවා.+ 34 මා මේ දේ කියන්නේ මට මිනිසෙකුගේ සාක්ෂිය අවශ්‍ය නිසා නොවෙයි. මා එසේ කියන්නේ ඔබේම ගැලවීම සඳහායි.+ 35 කොහොමනමුත් ඒ මිනිසා දැල්වෙන, බැබළෙන පහනක් හා සමාන වුණා. කෙටි කලකට ඔබත් ඔහුගෙන් විහිදුණු ආලෝකය ලබා බොහෝ සෙයින් ප්‍රීති වෙන්න කැමැත්තක් දැක්වූවා.+ 36 නමුත් යොහන් මා ගැන දැරූ සාක්ෂියට වඩා ප්‍රබල සාක්ෂියක් මා ළඟ තිබෙනවා. ඒ මගේ පියාණන් මට ඉටු කරන්න කියා පවරා දුන් වැඩකටයුතුයි. මා දැන් කරමින් සිටින්නේ මට පැවරූ ඒ දේවලුයි.+ පියාණන් මාව එවූ බවට මා ළඟ තිබෙන සාක්ෂිය එයයි. 37 මීට අමතරව මාව එවූ පියාණන්ම මා ගැන සාක්ෂි දරා තිබෙනවා.+ ඔබ කවදාවත් ඔහුගේ හඬ ඇසුවේවත් ඔහුගේ රූපය දුටුවේවත් නැහැ.+ 38 ඒ වගේම ඔහු පැවසූ දේවල් ඔබේ සිතේ රැඳුණේවත් නැහැ. එයට හේතුව ඔහු විසින් එවූ තැනැත්තාව ඔබ විශ්වාස නොකළ නිසයි.
39 “ඔබ ශුද්ධ ලියවිල්ල සොයා බලන්නේ+ එමගින් ඔබට සදාකාල ජීවනය ලබාගන්න පුළුවන් කියා සිතාගෙනයි. ඒ ලියවිලිවල මා පිළිබඳවත් සාක්ෂි තිබෙනවා.+ 40 ජීවනය ලබාගන්න මාව පිළිගන්න අවශ්‍ය වුණත් මාව පිළිගන්න ඔබ තුළ කැමැත්තක් නැහැ.+ 41 මිනිසුන්ගේ ගෞරවය ලබන්න මා තුළ ආශාවක් නැහැ.+ 42 නමුත් ඔබ තුළ දෙවි සඳහා ප්‍රේමයක් නැති බව මට හොඳටම පැහැදිලියි.+ 43 මා මගේ පියාණන්ගේ නාමයෙන් පැමිණ සිටියත්+ ඔබ මාව පිළිගන්නේ නැහැ. නමුත් වෙන කෙනෙක් තමාගේම බලයෙන් තම ගෞරවය උදෙසා පැමිණියා නම් ඔබ ඔහුව පිළිගන්නවා. 44 එකම දෙවිගෙන් ලැබෙන ගෞරවය සොයන්නේ නැතුව+ එකිනෙකාගෙන් ගෞරවය ලබන්නයි+ ඔබ උත්සාහ කරන්නේ. ඒ නිසා ඔබට මා ගැන විශ්වාසයක් ඇති වන්නේ කොහොමද? 45 මා පියාණන්ට ඔබ ගැන චෝදනාවක් එල්ල කරනවා කියා සිතන්න එපා. දැනටමත් ඔබට විරුද්ධව චෝදනා එල්ල කරන කෙනෙක් සිටිනවා. ඒ ඔබ මහත් සේ විශ්වාස කරන මෝසෙස්.+ 46 ඇත්තෙන්ම ඔබ මෝසෙස්ව විශ්වාස කළා නම් ඔබ මාවත් විශ්වාස කරනවා. මන්ද මෝසෙස් මා ගැනත් ලියා තිබෙනවා.+ 47 ඔහු ලියූ දේවල් ඔබ විශ්වාස කරන්නේ නැත්නම්+ මා පවසන දේවල් ඔබ විශ්වාස කරන්නේ කොහොමද?”