ගීතාවලිය

96 යෙහෝවා දෙවිට අලුත් ගීයක් ගයන්න.+

පොළොවේ සියලු ජනයෙනි, යෙහෝවා දෙවිට ගී ගයන්න.+

 2 යෙහෝවා දෙවිට ගී ගයන්න. ඔහුගේ නාමයට ප්‍රශංසා කරන්න.+

ඔහු ලබා දෙන ගැලවීම පිළිබඳ ශුභාරංචිය සෑම දිනකම කතා කරන්න.+

 3 ඔහුගේ තේජස ගැන ජාතීන් අතරේද+

ඔහු කළ පුදුමාකාර ක්‍රියා ගැන සියලු ජනයා අතරේද ප්‍රකාශ කරන්න.+

 4 මන්ද යෙහෝවා දෙවි ශ්‍රේෂ්ඨය.+ ඔහු බොහෝ සෙයින් ප්‍රශංසාව ලැබීමට වටින්නේය.

අන් සියලු දෙවිවරුන්ට වඩා ඔහු කෙරෙහි ගරුබියක් ඇති වන්නේය.+

 5 මිනිසුන් නමස්කාර කරන අන් සියලු දෙවිවරුන්ට කිසිවක් කළ නොහැකිය.+

නමුත් යෙහෝවා දෙවි මුළු අහස්තලයම නිර්මාණය කළේය.+

 6 ගෞරවයත් තේජශ්‍රීයත් ඔහු ඉදිරියෙහිය.+

ශක්තියත් අලංකාරයත් ඔහුගේ ශුද්ධස්ථානයෙහි ඇත.+

 7 පොළොවේ සියලු ගෝත්‍රයෙනි, යෙහෝවා දෙවිට ප්‍රශංසා කරන්න.+

යෙහෝවා දෙවිගේ තේජස හා බලය ගැන පසසන්න.+

 8 යෙහෝවා දෙවිගේ නාමයට දිය යුතු ගෞරවය දෙන්න.+

සතුටු සිතින් යමක් රැගෙන ඔහුගේ ගෘහයේ මළුවට පැමිණෙන්න.+

 9 ශුද්ධ වස්ත්‍රවලින් සැරසී යෙහෝවා දෙවි ඉදිරියේ වැඳ වැටෙන්න.+

පොළොවේ සියලු ජනයෙනි, ඔහු කෙරෙහි ගරුබිය ඇතුව* සිටින්න.+

10 “යෙහෝවා දෙවි රජ වී ඇත.+

පොළොවද නොසෙල්වෙන ලෙස ස්ථිරව පිහිටුවා ඇත.+

ඔහු ජනයා වෙනුවෙන් යුක්තිය ඉටු කරනු ඇත”+ කියා ජාතීන් අතරේ ප්‍රකාශ කරන්න.

11 ස්වර්ගය ප්‍රීති වේවා! පොළොව ප්‍රීති ඝෝෂා නඟාවා!+

මුහුදත් එහි ඇති සියල්ලත් ඝෝෂා නඟත්වා!+

12 කෙත්වතුත් එහි ඇති සියල්ලත් සතුටු වේවා!+

වනයේ සියලු ගස්ද යෙහෝවා දෙවි ඉදිරියේ ප්‍රීති ඝෝෂා නඟාවා!+

13 මන්ද ඔහු පැමිණියේය.+

එසේය, ඔහු පොළොව විනිශ්චය කිරීම සඳහා පැමිණියේය.+

ඔහු ධර්මිෂ්ඨකමින් ලෝකයද+

අවංකකමින් ජනයාවද විනිශ්චය කරන්නේය.+