ලෙවී කතාව

10 දිනක්, ආරොන්ගේ පුත්‍රයන් වන නාදාබ් සහ අබිහු+ තම තමන්ගේ සුවඳ දුම් ඔප්පු කරන භාජන+ ගෙන ඒවායෙහි සුවඳ ද්‍රව්‍ය දවා,+ යෙහෝවා දෙවි ඔවුන්ට නියම නොකළ ආකාරයකට දෙවි ඉදිරියේ ගින්නක් ඔප්පු කළෝය. ඔවුන් එම ගින්න ඔප්පු කළේ දෙවිගේ නීතියට පටහැනිවයි.+ 2 ඒ අවස්ථාවේදී යෙහෝවා දෙවිගෙන් ගින්නක් නික්ම ඇවිත් ඔවුන් දෙදෙනාව පුලුස්සා දැමුවේය.+ ඔවුහු යෙහෝවා දෙවි ඉදිරියේ මිය ගියෝය.+ 3 එවිට මෝසෙස් ආරොන්ට මෙසේ කීවේය. “දෙවි මෙසේ පැවසුවා. ‘යෙහෝවා දෙවි වන මා ඉදිරියට පැමිණෙන සියලුදෙනා+ මාව සැලකිය යුත්තේ ඉතා ශුද්ධ කෙනෙකු ලෙසයි.+ එමෙන්ම මුළු සෙනඟ මාව ගෞරවයට+ පත් කළ යුතුයි.’” ඒ අවස්ථාවේදී ආරොන් නිහඬව සිටියේය.

4 ඉන් අනතුරුව, මෝසෙස් ආරොන්ගේ මාමා වූ උස්සියෙල්ගේ+ පුත්‍රයන් වන මිෂායෙල් සහ එල්ෂාෆාන්ට මෙසේ කීවේය. “ඇවිත් ශුද්ධස්ථානය ඉදිරිපිට තිබෙන ඔබේ සහෝදරයන්ගේ මළ කඳන් ඉවතට ගෙන යන්න. ඔවුන්ව කඳවුරෙන් පිටතට රැගෙන යන්න.”+ 5 එවිට ඔවුහු මෝසෙස් අණ කළ ලෙස නාදාබ්ව සහ අබිහුව ඇඳුම් පිටින්ම කඳවුරෙන් පිටතට රැගෙන ගියෝය.

6 ඉන්පසු මෝසෙස් ආරොන්ටද ඔහුගේ ඉතුරු පුත්‍රයන් වන එලියාසර් සහ ඉතමාර්ටද මෙසේ කීවේය. “ඔබේ හිසකෙස් අවුල්+ කරගන්නවත් ඔබේ ඇඳුම් ඉරාගන්නවත් එපා. ඔබ එසේ කළොත් ඔබේ ජීවිතය ඔබට අහිමි වෙයි. දෙවි මුළු සෙනඟ සමඟද කෝප වෙයි.+ යෙහෝවා දෙවිගෙන් නික්ම ආ ගින්න නිසා සිදු වූ විනාශය ගැන ඔබ වෙනුවට ඔබේ සහෝදරයන් වන මුළු ඊශ්‍රායෙල් සෙනඟ වැලපෙයි. 7 යෙහෝවා දෙවිගේ ශුද්ධ තෛලයෙන් ඔබව අභිෂේක කර තිබෙන නිසා+ සම්මුඛ වීමේ කූඩාරමට ඇතුල් වන ස්ථානයෙන් පිටතට නොයන්න. එතැනින් පිටතට ගියොත් නිසැකවම ඔබ මිය යයි.”+ ඔවුහු මෝසෙස් කී දේට සවන් දුන්නෝය.

8 යෙහෝවා දෙවි ආරොන්ට මෙසේ කීවේය. 9 “ඔබත් ඔබේ පුත්‍රයනුත් සම්මුඛ වීමේ කූඩාරමට ඇතුල් වන විට වයින්වත් වෙන ඕනෑම මත්පැන්+ වර්ගයක්වත් පානය නොකළ යුතුයි. ඒවා පානය කළොත් නිසැකවම ඔබ මිය යනු ඇත. එය ඔබත් ඔබෙන් පැවත එන අයත් හැමදාටම පිළිපැදිය යුතු නියෝගයකි. 10 එම නියෝගය දී තිබෙන්නේ ශුද්ධ දේ සහ පිළිකුල් දේ අතරද පවිත්‍ර දේ හා අපවිත්‍ර දේ අතරද තිබෙන වෙනස පැහැදිලිව දකින පිණිසය.+ 11 එමෙන්ම යෙහෝවා දෙවි වන මා මෝසෙස් මාර්ගයෙන් ඊශ්‍රායෙල් සෙනඟට දුන් සියලු අණපනත් ඔවුන්ට උගන්වන පිණිසය.”+

12 ඉන්පසු මෝසෙස්, ආරොන්ටද ජීවතුන් අතරේ සිටි ඔහුගේ පුත්‍රයන් වන එලියාසර් සහ ඉතමාර්ටද මෙසේ කීවේය. “යෙහෝවා දෙවිට ගින්නෙන් දවා ඔප්පු කළ පූජාවෙන් ඉතුරු වී තිබෙන ධාන්‍ය පූජාව+ රැගෙන පූජාසනය අසලදී කන්න. එයට මුහුන් එකතු කරන්න එපා. මන්ද එය ඉතා ශුද්ධයි.+ 13 ඔබ එය ශුද්ධ තැනකදී කෑ යුතුයි.+ යෙහෝවා දෙවිට ගින්නෙන් ඔප්පු කරන ලද පූජාවලින් ඔබටත් ඔබේ පුත්‍රයන්ටත් ලැබෙන කොටස එයයි. මේ දේවල් ඔබට පවසන්න කියා දෙවි මට අණ කළා. 14 සෙලවීමේ පූජාවේ පපු කොටස+ සහ ශුද්ධ කොටස ලෙස වෙන් කරගත් ගාත් කොටස+ ගෙන පවිත්‍ර තැනකදී කෑ යුතුයි. ඔබේ පුත්‍රයන් හා දූවරුන් සමඟ ඔබ එය කෑ යුතුයි.+ මන්ද ඊශ්‍රායෙල් සෙනඟ ඔප්පු කරන හවුල් පූජාවලින් ඔබටත් ඔබේ පුත්‍රයන්ටත් ලැබෙන කොටස එයයි. 15 ඊශ්‍රායෙල් සෙනඟ ගින්නෙන් ඔප්පු කරන ලද පූජාවල තෙල් කොටස් සමඟ ශුද්ධ කොටස ලෙස වෙන් කරගත් ගාත් කොටස සහ සෙලවීමේ පූජාව+ සඳහා ගත් පපු කොටස රැගෙන ආ යුතුයි. යෙහෝවා දෙවි ඉදිරියේ සෙලවීමේ පූජාවක් වශයෙන් ඒ මේ අත සොලවන පිණිස ඔවුන් ඒවා රැගෙන ආ යුතුයි. යෙහෝවා දෙවි අණ කළ ලෙස එම කොටස ඔබටත් ඔබේ පුත්‍රයන්ටත් ලැබෙනවා.+ එය බොහෝ කාලයකට වලංගු නියෝගයක්.”

16 මෝසෙස් පාප පූජාව සඳහා ඔප්පු කළ එළුවා+ ගැන විමසා බැලූ විට ඌව සම්පූර්ණයෙන් දවා ඇති බව ඔහුට දැනගන්න ලැබිණ. එවිට ඔහු ආරොන්ගේ පුත්‍රයන් වන එලියාසර් සහ ඉතමාර් සමඟ අතිශයින් කෝප වී ඔවුන්ට මෙසේ කීවේය. 17 “ඔබ පාප පූජාවේ මස් ශුද්ධ තැනකදී+ නොකෑවේ ඇයි? සෙනඟගේ පව් දරමින් දෙවිගෙන් ඔවුන්ගේ පව්වලට සමාව ලබාගන්න පිණිසයි යෙහෝවා දෙවි ඔබට එය දුන්නේ.+ එය ඉතා ශුද්ධ දෙයක්. 18 ඔබ දෙවි අණ කළ ලෙස+ පූජාවේ මස් ශුද්ධ තැනකට ගෙන ගොස් කෑවේ නැහැ. ඔබ සතාගේ ලේ ශුද්ධස්ථානයට ගෙනාවෙත් නැහැ.”+ 19 එවිට ආරොන් මෝසෙස්ට මෙසේ කීවේය. “මම යෙහෝවා දෙවි ඉදිරියේ පාප පූජාව සහ දවන පූජාව ඔප්පු කළේ+ මහත් විපතකට මුහුණ දුන් වෙලාවකදී. මේ වගේ වේදනාකාරී අවස්ථාවකදී මම පාප පූජාවේ මස් අනුභව කළා නම් යෙහෝවා දෙවි ඒ ගැන සතුටු වෙයිද?”+ 20 එවිට මෝසෙස්ගේ කෝපය පහව ගියේය.