ක්‍රියා

20 කෝලහලයට සම්බන්ධ සියලුදෙනා විසිර ගිය පසු පාවුල් ගෝලයන්ව කැඳවා ඔවුන්ව දිරිගැන්වීය. ඉන්පසු ඔහු ඔවුන්ගෙන් සමුගෙන+ මැසිඩෝනියාව බලා පිටත්ව ගියේය.+ 2 ඔහු ඒ පළාතට ගොස් එහි සිටි අය සමඟ බොහෝ දේවල් කතා කර ඔවුන්වත් දිරිගැන්වීය.+ ඉන්පසු ඔහු ගියේ ග්‍රීසියටය. 3 ඔහු එහි මාස තුනක් ගත කළේය. නමුත් ඔහු සිරියාව බලා නැවෙන් ගමන් කිරීමට සැලසුම් යොදමින් සිටියදී, යුදෙව්වරුන් තමාට විරුද්ධව කුමන්ත්‍රණය කරමින්+ සිටින බව ඔහුට ආරංචි විය. එහෙයින් ඔහු නැවතත් මැසිඩෝනියාව මැදින් යෑමට තීරණය කළේය. 4 බෙරීය නුවරේ වැසියෙක් වූ පිරස්ගේ පුත් සෝපතර්ද+ තෙසලෝනිකයෙන් පැමිණි අරිස්තාකස්+ සහ සෙකන්දස්ද දර්බයේ ජීවත් වූ ගායස්ද තිමෝතිද+ ආසියා පළාතෙන් පැමිණි තිකිකස්+ සහ ත්‍රොෆිමස්ද+ ඔහු සමඟ ගියෝය. 5 ඔවුහු අපට කලින් ගොස් අප එන තුරු ත්‍රෝවස්හි+ බලා සිටියෝය. 6 මුහුන් නොදැමූ රොටි උත්සවයේ+ දවස් නිම වූ පසු අපි ෆිලිප්පියේ සිට මුහුදෙන් ගමන් කර දවස් පහකින් ත්‍රෝවස්හි+ සිටි ඔවුන්ව හමු වූයෙමු. අපි එහි දවස් හතක් ගත කළෙමු.

7 සතියේ පළමුවෙනි දවසේදී+ සියලුදෙනාම කෑම ගැනීම සඳහා එකට රැස් වූහ. පාවුල් ඊළඟ දිනේදී පිටත් වීමට සිටි නිසා රැස්ව සිටි සියලුදෙනාට කතාවක් ඉදිරිපත් කළේය. එම කතාව මධ්‍යම රාත්‍රිය දක්වාම පැවතිණ. 8 අප සියලුදෙනාම රැස්ව සිටියේ උඩුමහල් කාමරයකය.+ ආලෝකය ලබා දීම සඳහා එහි පහන් කිහිපයක්ම දල්වා තිබිණ. 9 පාවුල් තම කතාව ඉදිරිපත් කරද්දී ජනේලය මත යුතිකස් නම් තරුණයෙක් ඉඳගෙන සිටියේය. තද නින්දකට වැටුණු ඔහු, එම දෙවෙනි මහලේ ජනේලයෙන් පහතට වැටුණේය. පිරිසක් ගොස් ඔහුව ඔසවා බලද්දී ඔහු මිය ගොස් සිටියේය. 10 නමුත් පාවුල් පහළට ගොස් බිමට වැටී සිටි ඔහුව වැලඳගෙන+ මෙසේ කීවේය. “දැන් කලබල වෙන්න එපා. ඔහු ජීවත් වෙනවා.”+ 11 ඉන්පසු පාවුල් උඩුමහලට ගොස් කෑම කා, අලුයම වන තුරුම කතා කර, පසුව පිටත්ව ගියේය. 12 ඔවුහු ඒ තරුණයාව ඔහුගේ නිවසට ඇරලුවෝය. ඔහු මෙසේ ජීවතුන් අතර සිටීම සියලුදෙනාටම මහත් සැනසීමක් විය.

13 මේ අතර අපි නැව නවතා තිබුණු තැනට ගොස් නැවට නැඟ අසොස් බලා පිටත් වූයෙමු. නමුත් පාවුල් අප සමඟ පැමිණියේ නැත. ඔහුගේ උපදෙස් පරිදි අප බලාපොරොත්තු වූයේ ඔහුව අසොස්හිදී හමු වී ඔහුවත් නැවට නංවාගැනීමටයි. ඔහු එතැනට යන්න අදහස් කළේ පයින්ය. 14 අසොස්හිදී අපට ඔහුව මුණගැසුණු අතර අපි ඔහුව නැවට නංවාගෙන මිතුලේන නම් නුවරට ගියෙමු. 15 පසුවදා නැවතත් නැවට නැඟගත් අපි, එතැනින් පිටත් වී කියොස් දූපත අසලට පැමිණ, ඊට පසුවදා සාමොස් දූපතට ළඟා වූයෙමු. ඊළඟ දවසේ අප ගියේ මිලේටස් නුවරටය. 16 පාවුල් අදහස් කරමින් සිටියේ පෙන්තකොස්ත උත්සවය පවත්වන දවසේදී කෙසේ හෝ යෙරුසලමෙහි සිටීමටය.+ එහෙයින් ඔහු ආසියා පළාතෙහි රැඳී සිටින්නේ නැතුව එෆීසය පසු කරගෙන+ යෑමට තීරණය කළේය.

17 නමුත් ඔහු මිලේටස් නුවරට පැමිණි විට එෆීසයට පණිවිඩයක් යවා එහි සිටි සභාවේ වැඩිමහල්ලන්ට+ තමාව හමු වීමට පැමිණෙන්න කියා ආරාධනා කළේය. 18 ඔවුන් පැමිණ ඔහුව හමු වූ විට ඔහු ඔවුන්ට මෙසේ කීවේය. “ආසියා පළාතට+ පය තැබූ මුල් දවස පටන් මම සිටියේ ඔබ සමඟයි+ කියා ඔබ හොඳින්ම දන්නවා. 19 මම ස්වාමීන් වෙනුවෙන් ඉතා නිහතමානීව+ දාසයෙක් මෙන්+ කඳුළු සලමින් සේවය කළා. යුදෙව්වන් මට විරුද්ධව මොන තරම් පීඩා හා ප්‍රශ්න ඇති කළාද!+ 20 නමුත් ඔබට ප්‍රයෝජනවත් වන හැම දෙයක්ම මම නොසඟවා කියා දුන්නා. මම ප්‍රසිද්ධියේ සහ ගෙයින් ගෙට ගොස්+ ඔබට දිගටම ඉගැන්නුවා.+ 21 මම යුදෙව්වරුන්ට හා ග්‍රීකවරුන්ට සම්පූර්ණ සාක්ෂියක් දැරුවා.+ පසුතැවිලි වී+ දෙවි වෙතට හැරෙන්නත් අපේ ස්වාමීන් වන යේසුස් කෙරෙහි විශ්වාසය ඇති කරගන්නත් අවශ්‍ය බව මම ඔවුන්ට කිව්වා. 22 දෙවිගේ බලයෙන් මට ලැබුණු මඟ පෙන්වීම්වලට එකඟව+ මම දැන් ගමන් කරන්නේ යෙරුසලමටයි. එහිදී මට මොනව වෙයිද කියා මම දන්නේ නැහැ. 23 නමුත් මම නුවරක් නුවරක් පාසා ගමන් කරන විට මට ඉදිරියේදී සිරදඬුවම් සහ නොයෙකුත් පීඩා විඳින්න සිදු වන බව+ දෙවි තම බලයෙන් නිතරම මට දැනුම් දෙයි.+ 24 කොහොමවුණත් මට වැදගත් වන්නේ මගේ ජීවිතය නොවෙයි.+ මගේ එකම ආශාව නම් අවසානය දක්වා මා යා යුතු ගමනත් ස්වාමීන් වන යේසුස්ගෙන් මට ලැබුණු+ පැවරුමත්+ සාර්ථකව නිම කිරීමයි.+ ඒ පැවරුම නම් දෙවිගේ මහත් කරුණාව පිළිබඳ ශුභාරංචිය ගැන සම්පූර්ණ සාක්ෂියක් දීමයි.+

25 “මට තවමත් මතකයි ඔබ අතරේ මම රාජ්‍යය ගැන දේශනා කළ ආකාරය. මම හොඳින්ම දන්නවා ඔබෙන් කිසිවෙකුටවත් මාව ආයෙත් දකින්න ලැබෙන්නේ නැති බව. 26 මම සියලුදෙනාගේ ලෙයින් නිදහස්.+ ඔබ සියලුදෙනාම එයට සාක්ෂි දරයි. 27 දෙවිගේ කැමැත්ත ගැන මම ඔබට කිසිම දෙයක් නොසඟවා හැම දෙයක්ම හොඳින් අවබෝධ කර දුන්නා.+ 28 දැන් දෙවි තම බලයෙන් ඔබව පත් කර තිබෙන්නේ ඔහුගේ සභාව+ රැකබලා ගැනීමටයි.+ ඒ සභාව ඔහු මිල දී ගත්තේ තමාගේ පුත්‍රයාගේ රුධිරයෙන්+ කියා අමතක කරන්න එපා. ඒ නිසා ඔබ ගැනත්+ මුළු රැළ ගැනත්+ හොඳ අවධානයකින් සිටින්න.+ 29 මම ඔබෙන් සමුගත් පසු රැළට කිසිම ආදරයක් නොදක්වන රෞද්‍ර වෘකයන්+ හා සමාන පිරිසක් ඔබ අතරට එන බව මම දන්නවා. 30 ඔබට උගන්වා ඇති හැම දෙයක්ම ඔබ අතරම සිටින සමහරුන් විකෘති කර පෙන්වයි.+ ඔවුන්ගේ ඉලක්කය වන්නේ ගෝලයන්ව ඔවුන්ගේ පසුපස රැගෙන යෑමයි.+

31 “ඒ නිසා හොඳ සිහිකල්පනාවෙන් සිටින්න. මම අවුරුදු තුනක් තිස්සේ+ දිවා රෑ කඳුළු සලමින් ඔබට කොතරම් උපදෙස් හා අවවාද ලබා දුන්නාද!+ ඒවා කවදාවත් අමතක කරන්න එපා. 32 ඔබට දෙවිගෙනුත් ඔහුගේ මහත් කරුණාව ගැන උගන්වා ඇති දේවලිනුත් ආරක්ෂාවක් ලැබේවා කියා මම දැන් ප්‍රාර්ථනා කරනවා.+ ඒ දේවල් ඔබට මහත් ශක්තියක් වෙයි.+ එවිට දෙවි ශුද්ධ තැනැත්තන්* ලෙස තෝරාගෙන ඇති අයට උරුම කර දෙන දේ ඔබටත් උරුම වෙයි.+ 33 මම කිසි මිනිසෙකුගේ රන් රිදීවලට හෝ ඇඳුම් පැළඳුම්වලට ආශා කළේ නැහැ.+ 34 මම මගේ අවශ්‍යතා ඉටු කරගන්න+ මගේම අත් දෙකෙන් වෙහෙස මහන්සි වී වැඩ කළා. ඒ වගේම මා සමඟ සිටි අයගේ අවශ්‍යතා සපුරන්නත් මට හැකි වුණා. ඒ බව ඔබ හොඳින්ම දන්නවා. 35 මම ඒ හැම දෙයක්ම කළේ යම් උපකාර අවශ්‍ය අයට+ වෙහෙස මහන්සිය නොබලා උපකාර කිරීමේ අවශ්‍යතාව+ ඔබට පෙන්වා දීමටයි. ස්වාමීන් වන යේසුස් පැවසූ දේ නිතරම මතක තබාගන්න. ඔහු පැවසුවේ, ‘ලැබීමට වඩා දීමෙන් වැඩි සන්තෝෂයක් ලැබෙනවා’+ කියායි.”

36 ඔහු ඒ දේවල් පවසා ඔවුන් සියලුදෙනා සමඟ දණ ගසා+ යාච්ඤා කළේය. 37 ඉන්පසු සියලුදෙනා හඬා වැලපෙමින් පාවුල්ව ආදරයෙන් සිඹ+ වැලඳගත්තෝය.+ 38 ඔවුන්ට මෙතරම් දුකක් හා වේදනාවක් දැනුණේ තමාව නැවතත් දකින්න නොලැබෙන බව+ ඔහු ඔවුන්ට පැවසූ නිසාය. ඉන්පසු ඔවුහු ඔහුව ඇරලවීමට නැව නවතා තිබූ තැනට ගියෝය.+