ගලාති
4 මෙයාකාරයට සිතන්න. එනම් උරුමය ලබන තැනැත්තා සියල්ල කෙරෙහි ස්වාමියා වුවත් බාල වියේදී ඔහු දාසයෙකු හා සමානය.+ 2 මන්ද ඔහු තම පියා නියම කර ඇති දවස දක්වා වැඩෙන තුරු වැඩ බලන තැනැත්තන් හා නිවස භාර වී සිටින අය යටතේ සිටියි.+ 3 එලෙසම අපි කුඩා දරුවන් හා සමානව සිටියදී මේ ලෝකයට සම්බන්ධ බොළඳ දේවලට+ වහල් වී සිටියෙමු. 4 නමුත් නියමිත කාලය පැමිණි විට+ දෙවි තම පුත්‍රයාව එව්වේය.+ ස්ත්‍රියකගෙන් උපන් ඔහු+ නීතියට යටත් වී සිටියේ,+ 5 නීතිය යටතේ සිටින අයව+ මිල දී ගෙන ඔවුන්ව නිදහස් කිරීම සඳහාය.+ එමගින් අපව පුත්‍රයන් ලෙස භාරගැනීමට පදනමක් සපයන ලදි.+
6 එසේනම් ඔබ පුත්‍රයන් වන නිසා දෙවි තම පුත්‍රයාට දී ඇති බලය+ ඔබේ* හදවත් තුළත් ක්‍රියාත්මක වීමට සලස්වා ඇත. ඒ බලය ඔබ තුළ ක්‍රියාත්මක වන නිසා ඔබට, “අබ්බා, පියාණෙනි”+ කියා දෙවිට හඬගැසීමට හැකි වී තිබේ. 7 ඒ අනුව ඔබ තවදුරටත් දාසයන් නොව පුත්‍රයන්ය. ඔබ පුත්‍රයන් නම් දෙවි ඔබව උරුමක්කරුවන්ද කර ඇත.+
8 නමුත් ඔබ දෙවිව නොදැන සිටි කාලයේදී+ ඔබ සිටියේ සැබවින්ම දෙවිවරුන් නොවන අයට වහල්වය.+ 9 දැන් ඔබ දෙවිව හඳුනාගෙන ඇත. ඇත්තටම කිව යුත්තේ දෙවි ඔබව පිළිගෙන ඇති බවයි.+ එසේනම් දුර්වල,+ කිසි වටිනාකමක් නැති බොළඳ දේවලට+ ඔබ නැවත හැරෙන්නේ මන්ද? නැවතත් ඒ දේවලට වහල් වී සිටීමට ඔබ කැමති වන්නේ කුමන පදනමක් මතද?+ 10 මා එසේ පවසන්නේ ඔබ දවස්ද+ මාසද+ විශේෂ කාලවල්ද අවුරුදුද මහත් ඕනෑකමකින් සමරන නිසාය. 11 සමහරවිට මා ඔබ වෙනුවෙන් දැරූ වෙහෙසින් කිසි ප්‍රයෝජනවත් දෙයක් ඉටු වී නැද්ද කියා මම බිය වෙමි.+
12 සහෝදරයෙනි, මා ඔබෙන් ඉල්ලා සිටින්නේ මා මෙන් කටයුතු කරන්න කියාය.+ මන්ද මමත් කලක් ඔබ හා සමානව සිටියෙමි.+ මා ඔබට මේ දේවල් පවසන්නේ ඔබ මට විරුද්ධව වරදක් කර ඇති නිසා නොවේ.+ 13 මා පළමු වරට ඔබට ශුභාරංචිය ප්‍රකාශ කළ අවස්ථාව ඔබට මතක ඇති. ඒ මා අසනීප වී සිටි අවස්ථාවකදීය.+ 14 එදා ඔබට යම් අසීරුතාවකට පත් වෙන්න සිදු වුවත් මගේ අසනීපය නිසා ඔබ මාව පිළිකුල් කළේ නැත. ඔබ පිළිකුලින් කෙළ ගැසුවේවත් නැත. ඒ වෙනුවට ඔබ මාව පිළිගත්තේ දෙවිගෙන් පැමිණි දූතයෙකු පිළිගන්නා ආකාරයටය.+ එනම් ක්‍රිස්තුස් යේසුස්ව පිළිගන්නා ආකාරයටය.+ 15 ඔබට එදා තිබුණු ඒ සතුට අද කොහේද?+ මන්ද එදා ඔබ මා වෙනුවෙන් ඔබේ ඇස් පවා උගුලා දීමට සූදානමින් සිටි බව කිසි සැකයක් නැතුව පවසමි.+ 16 එසේනම් අද මා ඔබේ සතුරෙකු බවට පත් වී සිටින්නේ+ මා ඔබ සමඟ සත්‍යය කතා කරන නිසාද?+ 17 සමහරුන් මහත් උද්‍යෝගයකින් උත්සාහ කරන්නේ ඔබව ඔවුන්ගේ පැත්තට නම්මාගැනීමටයි.+ ඔවුන් එසේ කරන්නේ හොඳ චේතනාවකින් නොවේ. ඔවුන් උත්සාහ කරන්නේ ඔබව මගෙන් ඈත් කිරීමටය.+ 18 යම් කෙනෙක් ඔබේ යහපත වෙනුවෙන් උනන්දු වෙනවා නම් එය හොඳ දෙයකි.+ එවැනි දෙයක් මා ඔබ සමඟ සිටින විටදී පමණක් නොව සෑම අවස්ථාවකම සිදු වෙනවා නම්,+ 19 මගේ ආදරණීය දරුවෙනි,+ එය යහපත් දෙයකි. නමුත් මා සිටින්නේ මහත් වේදනාවකිනි. ඔබ ගැන මට දැනෙන වේදනාව මවකට දැනෙන ප්‍රසව වේදනාව හා සමානය. එය ඔබ ක්‍රිස්තුස් සිතන ආකාරයට සිතන්න පුරුදු වන තුරුම තිබෙනු ඇත.+ 20 මේ අවස්ථාවේදී මට ඔබ සමඟ සිටීමට හැකියාව තිබුණා නම් මා කොතරම් සතුටු වෙනවාද!+ මන්ද ඔබට සිදු වී තිබෙන දේ ගැන මට නිසි අවබෝධයක් නැත.+ නමුත් මා ඔබ සමඟ සිටියා නම් මට ඔබ සමඟ වඩාත් කාරුණික ලෙස කතා කිරීමට හැකි වනු ඇත.
21 නීතිය යටතේ සිටීමට මහත් කැමැත්තක් දක්වන+ අයගෙන් යමක් ඇසීමට මා කැමතිය. එනම් නීතියෙහි සඳහන් වී ඇති දේ ඔබ ඇත්තටම දන්නවාද+ යන්නයි. 22 උදාහරණයක් ලෙස ආබ්‍රහම්ට පුත්‍රයන් දෙදෙනෙකු සිටි බව එහි ලියා ඇත. එක් කෙනෙකු සේවිකාවකගෙන්+ සහ අනික් කෙනා නිදහස් ස්ත්‍රියකගෙන්+ ඔහුට ලැබිණ. 23 සේවිකාව බිහි කළ දරුවා ඉපදුණේ සාමාන්‍ය ආකාරයටය.+ නමුත් නිදහස් ස්ත්‍රිය බිහි කළ දරුවා උපන්නේ දුන් පොරොන්දුවක් නිසාය.+ 24 එම සිදුවීම්වලට සංකේතවත් අර්ථයක් තිබේ.+ මන්ද එම ස්ත්‍රීන් දෙදෙනාගෙන් ගිවිසුම් දෙකක් නියෝජනය වේ.+ හාගර්ගෙන් නියෝජනය වන්නේ සීනයි කන්දේදී කළ ගිවිසුමයි.+ එම ගිවිසුම යටතේ බිහි වන දරුවෝ දාසයෝ බවට පත් වෙති. 25 එසේම හාගර්ගෙන් නියෝජනය වන කන්ද අරාබියේ පිහිටි සීනයි කන්දයි.+ ඇය දැන් තිබෙන යෙරුසලමට සමානය. මන්ද ඇයද ඇගේ දරුවෝද දාසයෝය.+ 26 නමුත් නිදහස් ස්ත්‍රියගෙන් නියෝජනය වන්නේ ඉහළ තිබෙන යෙරුසලමය.+ ඇය නිදහස්ව සිටින අතර ඇය අපගේ මවය.+
27 මන්ද ලියවිලිවල මෙසේ සඳහන් වේ. “දරුවන් බිහි නොකළ වඳ ස්ත්‍රිය, ප්‍රීති වන්න. ප්‍රසව වේදනා නොවිඳින ස්ත්‍රිය, නිහඬතාව බිඳ හඬ නඟන්න. මන්ද ස්වාමිපුරුෂයා ඇති තැනැත්තියගේ දරුවන්ට වඩා අත්හරිනු ලැබූ ඒ ස්ත්‍රියට බොහෝ දරුවෝ සිටිති.”+ 28 ඒ අනුව සහෝදරයෙනි, ඊසාක් හා සමානව අපිද දෙවිගේ පොරොන්දුවේ ප්‍රතිඵලයක් ලෙස දරුවෝ බවට පත් වුණෙමු.+ 29 අතීතයේ දෙවිගේ බලයේ උපකාරයෙන් උපන් දරුවාට සාමාන්‍ය ආකාරයට උපන් දරුවා පීඩා කරන්න පටන්ගත්තා සේම+ දැනුත් සිදු වේ.+ 30 නමුත් ශුද්ධ ලියවිල්ලෙහි සඳහන් වන්නේ කුමක්ද? “මේ සේවිකාවයි ඇගේ පුතාවයි මෙතැනින් එළවා දමන්න. මන්ද සේවිකාවකගේ පුතෙක් නිදහස් ස්ත්‍රියකගේ පුතා සමඟ එකට උරුමය බෙදාගන්නේ නැත.”+ 31 එහෙයින් සහෝදරයෙනි, අප දාසියකගේ දරුවන් නොව+ නිදහස් ස්ත්‍රියකගේ දරුවන් වන බව+ මතක තබාගන්න.