ලූක්
2 ඒ කාලයේදී තම අධිරාජ්‍යය යටතේ* සිටි සියලුදෙනාම ලියාපදිංචි විය යුතු බව ඔගස්ටස් සීසර් වෙතින් නියෝගයක් නිකුත් විය.+ 2 (සිරියාවේ ආණ්ඩුකාර කිරිනියස් යටතේ සිදු කළ මුල්ම ලියාපදිංචි කිරීම සිදු වූයේ ඒ කාලයේදීය.) 3 ලියාපදිංචි වීම සඳහා+ සියලුදෙනාටම තමන් උපන් ගමට යෑමට සිදු විය. 4 යෝසෙප්ද දාවිත්ගේ පෙළපතින් පැමිණි කෙනෙක් වූ නිසා+ ඔහු ගලීලයේ පිහිටි නාසරෙත් නුවරින් පිටත් වී යුදයේ පිහිටි දාවිත්ගේ නුවරට ගියේය. එම නුවර හඳුන්වන්නේ බෙත්ලෙහෙම ලෙසයි.+ 5 මරියා සමඟ+ ඔහු එහි ගියේ ලියාපදිංචි වීම සඳහාය. ඒ වන විට යෝසෙප් ඇය සමඟ විවාහ වී සිටි අතර+ ඇය තම දරුවාව ප්‍රසූත කිරීමේ කාලය ළඟා වී තිබිණ.+ 6 ඔවුන් එහි සිටියදී දරුවාව ප්‍රසූත කිරීමේ දිනය උදා වූ අතර, 7 ඇය තම කුලුඳුල් පුත්‍රයාව+ මෙලොවට බිහි කළාය. ඇය දරුවාව රෙදි පටිවලින් ඔතා ගවමඩුවක තිබූ ගවඔරුවක තැබුවාය.+ එසේ දරුවා ගවමඩුවක ඉපදුණේ නවාතැන්වල කිසිම ඉඩක් නොතිබුණු නිසාය.
8 මේ අතර එම ප්‍රදේශයේම එඬේරු රාත්‍රියේ එළිමහනේ මාරුවෙන් මාරුවට තම බැටළු රැළවල් රැකබලා ගනිමින් සිටියහ. 9 යෙහෝවා දෙවිගේ දූතයෙක්+ එකවරම ඔවුන් ළඟ සිටගත්තේය. ඔවුන් සිටි තැන යෙහෝවා දෙවිගේ තේජසින්+ ආලෝකවත් වූ නිසා ඔවුන් තුළ මහත් බියක් ඇති විය. 10 නමුත් ඒ දේවදූතයා ඔවුන්ට මෙසේ කීවේය. “බිය නොවන්න. මම ආවේ ඔබට ශුභාරංචියක් කීමටයි. ඒ ශුභාරංචිය සියලු ජාතීන්ට මහත් ප්‍රීතියක් ගෙන දෙයි.+ 11 මන්ද අද දාවිත්ගේ නුවරෙහි+ ඔබට ගැලවුම්කරුවෙක් ඉපදී සිටිනවා.+ ස්වාමීන් වන ක්‍රිස්තුස් කියන්නේ ඔහුටයි.+ 12 ගවමඩුවක තිබෙන ගවඔරුවක රෙදි පටිවලින් ඔතා ඇති ළදරුවෙක් ඔබට සොයාගත හැකි වෙයි. ඔබට තිබෙන සාක්ෂිය එයයි.” 13 ඒ මොහොතේදී ඒ දේවදූතයාට ස්වර්ගීය සේනාවෙන් මහත් දේවදූත සමූහයක් එකතු වූහ.+ ඔවුහු දෙවිට ප්‍රශංසා කරමින් මෙසේ කීවෝය.+ 14 “ස්වර්ගයේ සිටින දෙවිට සියලුම ප්‍රශංසා හා ගෞරවය ලැබේවා!+ මිහිපිට දෙවිගේ අනුමැතිය ලැබූ මිනිසුන්ට+ සමාදානය වේවා!”+
15 එම දේවදූත සමූහය ඔවුන් වෙතින් පිටත් වී ස්වර්ගයට ගිය පසු එඬේරු එකිනෙකා අතරේ මෙසේ කතා කරගත්තෝය. “අපි දැන්ම බෙත්ලෙහෙමට ගොස් යෙහෝවා දෙවි+ අපට දැනුම් දී ඇති මේ සිද්ධිය දැක බලා ගනිමු.” 16 ඔවුහු විගස මරියාවත් යෝසෙප්වත් ගවඔරුවේ නිදා සිටි ළදරුවාවත් බලන්න ගියෝය. 17 ඔවුහු කුඩා දරුවාව දුටු විට ඔහු ගැන දේවදූතයා තමන්ට පැවසූ දේ ඔවුන්ට දැන්වූහ. 18 එම එඬේරුන් දැන්වූ දේවල් ඇසූ සියලුදෙනා මවිතයට පත් වූහ. 19 ඒ සෑම දෙයක් ගැනම ගැඹුරින් කල්පනා කර බැලූ මරියා ඒවායෙහි වැදගත්කම තම සිතෙහි තබාගත්තාය.+ 20 ඉන්පසුව තමන්ට පැවසූ සෑම දෙයක්ම ඇසූ දුටු එඬේරු ඒ සම්බන්ධයෙන් දෙවිට ප්‍රශංසා හා ගෞරවය දෙමින් තමන් සිටි ස්ථානයට නැවත හැරී ගියහ.
21 දරුවාගේ චර්මච්ඡේදනය කිරීමේ චාරිත්‍රය+ සිදු කළ යුතු අටවෙනි දවස+ උදා විය. එදින දරුවාට යේසුස් යන නම තබන ලදි.+ එය ඔහු පිළිසිඳගැනීමටත් කලින් දේවදූතයා ඔහු සඳහා දුන් නම විය.+
22 මෝසෙස්ට දෙන ලද නීතියේ නියම කර තිබූ ආකාරයට පවිත්‍ර වීම සඳහා නියමිත වූ දවස+ පැමිණියේය. ඔවුහු ඒ සඳහා යෙරුසලමට පැමිණෙන විට යේසුස්වත් රැගෙන ඇවිත් යෙහෝවා දෙවි ඉදිරියේ පෙනී සිටියෝය.* 23 එසේ කළේ “සෑම කුලුඳුල් පිරිමි දරුවෙකුම යෙහෝවා දෙවි වෙනුවෙන් වෙන් කර තිබෙනවා”+ කියා යෙහෝවා දෙවිගේ නීතියෙහි ලියා ඇති නිසාය. 24 එමෙන්ම යෙහෝවා දෙවිගේ නීතියේ සඳහන් ආකාරයට, “කොබෙයියන් දෙදෙනෙකු හෝ පරෙවි පැටවුන් දෙදෙනෙකු”+ පූජාවක් ලෙස ඔප්පු කළ යුතු විය. එහෙයින් ඔවුහු ඒ දේ කිරීමටත් පියවර ගත්තෝය.
25 මේ කාලයේදී සිමියොන් නම් මිනිසෙක් යෙරුසලමෙහි සිටියේය. ඔහු ඊශ්‍රායෙල් ජනයාට සැනසිල්ල ලැබෙන තෙක් බලා සිටි+ ධර්මිෂ්ඨ, දේවගරුබියෙන් ක්‍රියා කළ මිනිසෙකි. ඔහු තුළ දෙවිගේ බලය ක්‍රියාත්මක විය. 26 තමාගේ මරණයට කලින් යෙහෝවා දෙවි එවන ක්‍රිස්තුස්ව දකින්න ඔහුට අවස්ථාවක් ලැබෙන බව+ දෙවි තම බලය මාර්ගයෙන් ඔහුට එළිදරව් කර තිබිණ. 27 ඒ අනුව දෙවි තම බලයෙන් ඔහුට මඟ පෙන්වූ නිසා+ ඔහු දේවමාලිගාවට ආවේය. නීතියේ නියම කර තිබූ චාරිත්‍රය*+ ඉටු කිරීමට දෙමාපියන් කුඩා දරුවාව ඇතුළට ගෙන ආ විට, 28 සිමියොන් දරුවාව තම අතට ගෙන දෙවිට ප්‍රශංසා කරමින් මෙසේ කීවේය. 29 “විශ්වයේ පාලකයාණෙනි, ඔබ මට පොරොන්දු වූ දේ අද ඉටු වෙලා. මට දැන් සැනසිල්ලේ මිය යන්න පුළුවන්.+ 30 මිනිස් වර්ගයාට ගැලවීම සලසා දීම සඳහා ඔබ එවූ තැනැත්තාව මගේ ඇස් දෙකෙන්ම දැකගන්න මට පුළුවන් වුණා.+ 31 ඔබ ඒ ශුභාරංචිය සියලු ජනයාට දැනුම් දෙන්න පියවර ගෙන තිබෙනවා.+ 32 ඒ තැනැත්තා අඳුරෙහි+ සිටින ජාතීන්ට+ එළියක්+ වන අතර ඔහු නිසා ඔබේ සෙනඟ වන ඊශ්‍රායෙල්ට මහත් ආලෝකයක් උදා වෙයි.” 33 යේසුස් ගැන පැවසූ ඒ දේවල් අසා ඔහුගේ පියා සහ මව පුදුම වූහ. 34 මේ අතර ඔවුන්ට ආශීර්වාද කළ සිමියොන්, දරුවාගේ මව වූ මරියාට මෙසේ කීවේය. “මෙය මතක තබාගන්න. මේ දරුවා නිසා+ ඊශ්‍රායෙල්හි බොහෝදෙනෙක් වැටී+ ආපසු නැඟිටියි. නමුත් ඔහු නින්දාවට ලක් වෙයි.+ 35 ප්‍රතිඵලයක් ලෙස බොහෝදෙනෙකුගේ සිත්වල ඇති දේ අනාවරණය වෙයි.+ (ඇත්තෙන්ම ඔහු නිසා දිග කඩුවක් ඔබේ හදවත පසාරු කරගෙන යයි.)”+
36 මේ අතර ආෂෙර් ගෝත්‍රයට අයත් ෆානුඑල්ගේ දුව වූ ආනා නම් අනාගතවක්තෘවරියක් සිටියාය. (මහලු වියේ සිටි මෙම ස්ත්‍රිය වැන්දඹුවක් වූයේ තරුණ වියේදීමය. ඇයට තම ස්වාමිපුරුෂයා සමඟ විවාහ ජීවිතය ගත කරන්න ලැබුණේ අවුරුදු හතක් පමණි. 37 දැන් මේ වැන්දඹුවගේ+ වයස අවුරුදු අසූහතරකි.) එක දවසක්වත් අතපසු නොකර නමස්කාරය සඳහා ඇය දේවමාලිගාවට පැමිණියාය. ඇය නිරාහාරව සිටිමින් කන්නලව් කරමින් දිවා රෑ දෙකෙහිම දෙවිට නමස්කාර කළ ස්ත්‍රියකි.+ 38 යෝසෙප් සහ මරියා දේවමාලිගාවේ සිටියදී ඇය ඔවුන් ළඟට ඇවිත් දෙවිට ස්තුති කළාය. ඉන්පසුව දෙවි යෙරුසලමට ගැලවීම ලබා දෙන තුරු බලාගෙන සිටි සියලුදෙනාටම+ ඇය ඒ දරුවා ගැන කතා කරන්න පටන්ගත්තාය.
39 යෙහෝවා දෙවිගේ නීතියේ සඳහන් ආකාරයට+ ඔවුහු සියලු කටයුතු අවසන් කළ පසු ගලීලයේ පිහිටි තම නුවර වූ නාසරෙත් බලා ගියහ.+ 40 ඒ දරුවා හොඳින් ලොකු මහත් වී වැඩුණේය.+ ඔහුගේ ප්‍රඥාවද දිනෙන් දින වැඩි විය. දෙවිගේ කරුණාවද+ ඔහුට නොඅඩුව ලැබිණ.
41 ඔහුගේ දෙමාපියෝ සෑම අවුරුද්දකදීම පාස්කු උත්සවය සඳහා යෙරුසලමට යෑමට පුරුදුව සිටියහ.+ 42 ඔහුට වයස අවුරුදු දොළහක් වූ විටදීද ඔවුහු සිරිත් පරිදි+ එම උත්සවය සඳහා ගොස්, 43 උත්සවයෙහි අවසානය දක්වාම එහි නතර වී සිටියෝය. ඔවුන් නැවත තම නිවෙස් බලා යන ගමනේදී යේසුස් යෙරුසලමෙහි නතර වී සිටි බව ඔහුගේ දෙමාපියෝ දැන සිටියේ නැත. 44 ඔවුන් සිතුවේ ගමන් කරන පිරිස අතර ඔහුත් සිටිනවා කියායි. දවසක දුරක් ගමන් කළ පසු+ ඔහු නැති බව දැනගත් ඔවුහු නෑදෑයන් හා දන්නා හඳුනන අය අතරේ මහත් වෙහෙසක් දරා ඔහුව සෙව්වෝය. 45 ඔහුව සොයාගැනීමට නොහැකි වූ නිසා ඔවුහු නැවත යෙරුසලමට ගොස් එහිදීත් ඔහුව සෙවීමට මහත් සේ වෙහෙස වූහ. 46 ඔවුන් ඔහුව සොයාගත්තේ දවස් තුනකට පසුවය. ඒ වන විට ඔහු සිටියේ දේවමාලිගාවෙහි+ ගුරුවරුන් සමඟය. ඔහු ඔවුන්ට සවන් දෙමින් ඔවුන්ගෙන් විවිධ ප්‍රශ්න අසමින් සිටියේය. 47 ඔහුට තිබුණු අවබෝධය ගැන හා ඔහු පිළිතුරු දුන් ආකාරය ගැන ඔහුට සවන් දෙමින් සිටි සියලුදෙනා කොතරම් පුදුම වුණාද කිවහොත් ඔවුන්ට එය අදහාගැනීමටවත් නොහැකි විය.+ 48 ඔහුගේ දෙමාපියෝ ඔහුව දැක මවිතයට පත් වූහ. ඔහුගේ මව, “පුතේ, ඇයි ඔයා අපිට මේ වගේ දෙයක් කළේ? තාත්තයි මමයි ඔයාව හොයන්න කොයි තරම් මහන්සි වුණාද! අපි හිටියේ ලොකු භයකින්” කියා ඔහුට කීවාය. 49 එවිට ඔහු මෙසේ පිළිතුරු දුන්නේය. “මාව හොයන්න මේ තරම් මහන්සි වුණේ ඇයි? මගේ පියාණන්ගේ ගෘහයේ මා සිටිය යුතුයි+ කියා ඔබ දැනගෙන සිටියේ නැද්ද?” 50 නමුත් ඔහු පැවසූ දෙයෙහි නියම අර්ථය අවබෝධ කරගන්න ඔවුන්ට හැකි වුණේ නැත.+
51 ඉන්පසු යේසුස් ඔවුන් සමඟ නාසරෙත් නුවර බලා පිටත් විය. ඔහු දිගටම ඔවුන්ට කීකරු වී සිටියේය.+ ඔහුගේ මව මේ සියලුම සිදුවීම් ඇගේ සිතෙහි තබාගත්තාය.+ 52 යේසුස් ප්‍රඥාවෙන්+ සහ උස මහතින්ද දෙවි සහ මිනිසුන් ඉදිරියෙහි හොඳ නමක් දිනාගනිමින්ද වැඩුණේය.+