Lutsandvo Lusisita Sicinisele Nasitondvwa

 1. Ngekusho kwaMatewu 24:9, kungani kungakafaneli simangale nangabe live lisitondza?

JEHOVA wasidala ngendlela yekutsi sifune kutsandvwa futsi natsi sitsandze labanye. Nangabe umuntfu asenyanya siva buhlungu, futsi kungenteka size sesabe. Nasi sibonelo, dzadze lokutsiwa nguGeorgina, lohlala eYurophu utsi: “Ngesikhatsi ngineminyaka lengu-14, make bekangenyanya ngenca yekukhonta Jehova. Ngeva buhlungu kakhulu futsi ngativa ngilahliwe, ngacabanga kutsi kungenteka ngingumuntfu lokabi.”b Lomunye umzalwane lokutsiwa nguDanylo wabhala watsi: “Ngesikhatsi emasotja angishaya, angetfuka futsi angisongela ngenca yekutsi nginguFakazi waJehova, ngesaba futsi ngativa ngihlazekile.” Kusivisa buhlungu kutondvwa ngalendlela kodvwa akusimangalisi. Jesu washo kutsi sitawutondvwa.—Fundza Matewu 24:9.

2-3. Kungani balandzeli baJesu batondvwa?

² Live liyabenyanya balandzeli baJesu. Kungani? Kungobe njengaJesu, ‘asisiyo incenye yelive.’ (Joh. 15:17-19) Ngako nanobe sibahlonipha bohulumende, kodvwa asibakhonti bona nobe loko lokubamelele. Sikhonta Jehova kuphela. Sisekela lilungelo laJehova lekubusa bantfu, kodvwa Sathane ‘nentalelwane’ yakhe abavumelani naloko. (Gen. 3:1-5, 15) Sishumayela ngekutsi nguMbuso waNkulunkulu kuphela lotawucedza tinkinga tebantfu nekutsi utawubhubhisa bonkhe labamelene nawo. (Dan. 2:44; Semb. 19:19-21) Lomlayeto utindzaba letimnandzi kulabamnene kodvwa utindzaba letibuhlungu kulababi.—Hla. 37:10, 11.

³ Siphindze sitondvwe ngenca yekutsi siphila ngekuvumelana netimiso taNkulunkulu letilungile. Loko Nkulunkulu latsi kukahle nalatsi kukabi kuhlukile kuloko bantfu balelive labakushoko. Nasi sibonelo, bantfu labanyenti lamuhla bayavumelana nemikhuba leyenyanyekako lefana naleyo beyentiwa bantfu baseSodoma nebaseGomora Nkulunkulu lababhubhisela yona! (Juda 7) Ngenca yekutsi silalela imiyalo leseBhayibhelini lemayelana nemikhuba lenjalo, bantfu labanyenti bahlekisa ngatsi futsi batsi sinetingcondvo letilukhuni.—1 Phet. 4:3, 4.

 4. Ngubuphi buntfu lobusicinisako nangabe bantfu basenyanya?

⁴ Yini lengasisita sicinisele nangabe bantfu basenyanya futsi basetfuka? Kufanele sibe nekukholwa lokucinile kutsi Jehova utasisita. Njengesihlangu, kukholwa kwetfu ‘kungacima tonkhe tikhali letivutsako talomubi.’ (Ef. 6:16) Kodvwa sidzinga lokungetulu nje kwekukholwa. Sidzinga nelutsandvo. Kungani? Ngobe lutsandvo “alucansuki.” Lubeketelela tonkhe tintfo letibuhlungu futsi lucinisele. (1 Khor. 13:4-7, 13) Nyalo ase sibone kutsi kutsandza Jehova, nebazalwane betfu kanye netitsa tetfu kusisita njani kutsi sicinisele nasitondvwa.

 5. Kwamcinisa njani Jesu kutsandza Babe wakhe?

⁵ Ngebusuku lobungaphambi kwekutsi titsa takhe timbulale, Jesu watjela balandzeli bakhe labetsembekile watsi: “Ngenta njengobe nje Babe angiyalile, . . . [ngobe] ngiyamtsandza Babe.” (Joh. 14:31) Ngenca yekutsi Jesu bekatsandza Jehova loko kwamsita wabeketelela tinkinga lebetimatima. Kutsandza Jehova kungasisita natsi.

 6. Tinceku taJehova titiva njani ngekubeketelela kutondvwa ngulelive njengobe kuvetwe KubaseRoma 5:3-5?

⁶ Kutsandza Nkulunkulu bekuhlale kutisita tinceku takhe kutsi ticinisele natiphatfwa kabi. Nasi sibonelo, ngesikhatsi baphostoli bayalwa yinkantolo lephakeme yemaJuda lebeyinemandla kutsi bayekele kushumayela, kutsandza Nkulunklu kwabenta kutsi ‘balalele Nkulunkulu njengobe angumbusi kunekutsi balalele bantfu.’ (Imis. 5:29; 1 Joh. 5:3) Kutsandza Nkulunkulu ngalendlela kusita nebazalwane betfu lamuhla kutsi bahlale betsembekile kuNkulunkulu ngisho nobe bohulumende labanelunya nalabanemandla babaphatsa kabi. Kunekutsi loko kusicedze emandla, sikutsatsa njengelilungelo kubeketelela kutondvwa ngulelive.—Imis. 5:41; fundza KubaseRoma 5:3-5.

 7. Yini lokufanele siyente nangabe emalunga emndeni asiphikisa?

⁷ Kungaba matima kakhulu kubeketelela kuphatfwa kabi nangabe siphikiswa ngumndeni wetfu. Nangabe emalunga emndeni wetfu abona kutsi sifuna kufundza ngaJehova, angahle acabange kutsi siyadukiswa. Lamanye emalunga emndeni wetfu angase acabange kutsi siphambene ingcondvo. (Catsanisa naMakho 3:21.) Kantsi lamanye emalunga emindeni yetfu angaze asihlukubete njengobe asiphikisa. Akukafaneli kusimangalise kuphatfwa ngalendlela. Jesu watsi: “Titsa temuntfu kuyawuba bantfu bemndeni.” (Mat. 10:36) Ngisho nobe tihlobo tetfu tisiphatsa kabi, kodvwa asitenyanyi. Esikhundleni saloko, njengobe sichubeka sitsandza Jehova, siyachubeka sitsandza labanye bantfu. (Mat. 22:37-39) Kodvwa angeke siyekele kulalela imitsetfo netimiso letiseBhayibhelini ngesizatfu sekutsi sifuna kujabulisa bantfu.

8-9. Yini leyasita lomunye dzadze kutsi ahlale acinile ngisho nobe aphatfwa kabi?

⁸ Georgina, lokukhulunywe ngaye ekucaleni wakhona kuhlala acinile ngisho nobe make wakhe bekamphikisa kamatima. Georgina utsi: “Mine namake sacala kudadisha liBhayibheli naboFakazi. Kodvwa ngemuva kwetinyanga letisitfupha, nase ngifuna kuya emihlanganweni, make wacala kungiphikisa kamatima. Ngatfola kutsi bekatihlanganisa netihlubuki, futsi bekasebentisa emavi abo nakakhuluma nami. Bekangetfuka, angidvonse ngetinwele, angekhame futsi alahle tincwadzi tami. Nase ngineminyaka lengu-15 ngabhajatiswa. Make wetama kungiyekelisa kukhonta Jehova ngekutsi angitsatse ayongibeka lakugcinwa khona bantfu labasebasha, labanye babo bebasebentisa tidzakamiva futsi baganga. Kumatima kakhulu kuphikiswa ngumuntfu lokufanele ngabe uyakutsandza futsi akunakekele.”

⁹ Yini leyasita Georgina kutsi acinisele? Utsi: “Ngalelilanga make angijikela, bengisandza kucedza kulifundza lonkhe liBhayibheli. Besengiciniseka mbamba kutsi ngilitfolile liciniso futsi bengitiva ngisondzelene kakhulu naJehova. Bengivame kuthantaza kuye, futsi bekangilalela. Ngesikhatsi ngihlala kulendzawo legcina bantfu labasha, lomunye dzadze wangimemela ekhaya lakhe, futsi besidadisha liBhayibheli ndzawonye. Ngaleso sikhatsi, bazalwane nabodzadze bebafike bangicinise eHholweni leMbuso. Bangitsatsa njengelilunga lemindeni yabo. Ngatibonela ngewami kutsi Jehova unemandla kunalabo labasiphikisako, ngisho nobe kubobani.”

10. Yini lesiciniseka ngayo ngaJehova Nkulunkulu wetfu?

¹⁰ Umphostoli Pawula wabhala kutsi kute lutfo lolungasehlukanisa “nelutsandvo Nkulunkulu lasikhombisa lona ngaKhristu Jesu iNkhosi yetfu.” (Rom. 8:38, 39) Ngisho nobe singahlupheka sikhashana, Jehova utawuhlala anatsi kuze asidvudvute futsi asicinise. Njengobe sibonile kulokwenteka kuGeorgina, Jehova uphindze asisite asebentisa bazalwane betfu nabodzadze ebandleni.

11. Lutsandvo Jesu lakhuluma ngalo kuJohane 15:12, 13 belutawubasita njani bafundzi bakhe? Shano sibonelo.

¹¹ Ngebusuku lebebungaphambi kwekutsi Jesu afe, wakhumbuta balandzeli bakhe kutsi batsandzane. (Fundza Johane 15:12, 13.) Bekati kutsi lutsandvo lwekutidzela belutawubasita kutsi bahlale banebunye futsi bacinisele nabatondvwa live. Cabanga ngesibonelo selibandla laseThesalonika. Kusukela ngesikhatsi lelibandla lisungulwa, emalunga alo aphatfwa kabi. Kodvwa labazalwane nabodzadze babeka sibonelo lesihle sekucinisela ngekwetsembeka nesekuba nelutsandvo. (1 Thes. 1:3, 6, 7) Pawula wabakhutsata kutsi bachubeke batsandzana “ngalokugcwele.” (1 Thes. 4:9, 10) Lutsandvo belutawubenta kutsi badvudvute labacindzetelekile futsi basekele lababutsakatsaka. (1 Thes. 5:14) Basilalela sicondziso saPawula ngobe encwadzini yesibili lababhalela yona ngemuva kwemnyaka, watsi: ‘Indlela lenitsandzana ngayo iyakhula.’ (2 Thess. 1:3-5) Lutsandvo lwabo lwabasita kutsi bacinisele ngisho nobe babhekene nebumatima futsi baphatfwa kabi.

12. Ngesikhatsi kunemphi kulelinye live, bazalwane nabodzadze bakhombisa njani kutsi bayatsandzana?

¹² Cabanga ngalokwenteka kuDanylo, lesikhulume ngaye ekucaleni, kanye nemkakhe. Ngesikhatsi imphi lebeyiseveni labo ifika nasedolobheni labo, bachubeka baya emihlanganweni, benta konkhe lokusemandleni abo kuze bashumayele futsi bapha bazalwane babo nabodzadze kudla lebebanako. Ngalelinye lilanga, emasotja lebekahlomile eta ekhaya laDanylo. Danylo utsi: “Atsi angiyekele kuba nguFakazi. Ngesikhatsi ngala, angishaya, enta shengatsi ayangidubula, adubula ngenhla nje kwenhloko yami. Ngaphambi kwekutsi ahambe, angisongela ngekutsi atawubuya atewudlwengula umkami. Kodvwa ngekushesha, bazalwane betfu basigibelisa sitimela kuze siye kulelinye lidolobha. Angeke ngize ngilukhohlwe lutsandvo labazalwane labasikhombisa lona. Satsi nasifika kulelidolobha, bazalwane bakhona basipha kudla futsi bangisita kutsi ngitfole umsebenti kanye nendlu! Ngenca yaloko, sakhona kukhoselisa bazalwane lebebabalekele imphi.” Tindzaba letifana naleti tiyasikhombisa kutsi nangabe sitsandzana njengobe singemaKhristu, loko kungasisita kutsi sicinisele nasitondvwa.

13. Umoya longcwele usisita njani kutsi sicinisele emsebentini waJehova ngisho nobe bantfu basenyanya?

¹³ Jesu watjela balandzeli bakhe kutsi batsandze titsa tabo. (Mat. 5:44, 45) Loko akusimelula kukwenta! Kodvwa singakhona kukwenta nasisitwa ngumoya longcwele waNkulunkulu. Titselo temoya waNkulunkulu tifaka ekhatsi lutsandvo, kubeketela, umusa, umoya lophansi nekutibamba. (Gal. 5:22, 23) Lobuntfu busisita kutsi sicinisele nasitodvwa. Bantfu labanyenti lebebasitondza bashinjile nababona lobuntfu bukhonjiswa ngemadvodza abo, bafati, bantfwana nobe bomakhelwane. Labanyenti babo nyalo sebabazalwane nabodzadze wetfu. Ngako nangabe ukutfola kumatima kutsandza labo labakutondzako ngenca yekutsi ukhonta Jehova, thantaza ucele umoya longcwele. (Luk. 11:13) Ciniseka nekutsi kulalela Nkulunkulu kuhlale kuyintfo lebaluleke kakhulu longayenta.—Taga 3:5-7.

14-15. Emavi laKubaseRoma 12:17-21 amsita njani Yasmeen kutsi atsandze indvodza yakhe nanobe beyimphikisa kamatima?

¹⁴ Cabanga ngesibonelo saYasmeen, lohlala eMiddle East. Ngesikhatsi aba nguFakazi waJehova, indvodza yakhe yacabanga kutsi uyengiwe, futsi yetama kumyekelisa kukhonta Nkulunkulu. Yametfuka, yacela nemalunga emndeni nemfundisi kanye nenyanga kutsi bamsongele futsi yamsola ngekutsi ubhidlita umndeni. Indvodza yakhe beyiphindze itfuke nebazalwane nakusachubeka imihlangano yelibandla! Yasmeen bekavame kukhala ngobe bekaphatfwa kabuhlungu.

¹⁵ EHholweni leMbuso, bazalwane nabodzadze bebamdvudvuta futsi bamcinise. Labadzala belibandla bamkhutsata kutsi asebentise emavi latfolakala KubaseRoma 12:17-21. (Fundza.) Yasmeen utsi: “Bekumatima, kodvwa ngacela Jehova kutsi angisite futsi ngenta konkhe lebengingakwenta kuze ngisebentise seluleko seliBhayibheli. Ngako nangabe indvodza yami icitsa tibi ngemabomu ekhishini, bengitibutsa. Nayingetfuka, bengiphendvula ngemoya lophansi. Nayigula, bengiyinakekela.”

16-17. Yini loyifundza esibonelweni saYasmeen?

¹⁶ Yasmeen kwamsita kutsandza indvodza yakhe. Utsi: “Indvodza yami bese ingetsemba kakhulu ngobe beyati kutsi ngihlale ngikhuluma liciniso. Yacala kungilalela ngenhlonipho nangikhuluma ngenkholo, futsi yavuma kutsi siphilisane ngekuthula ekhaya. Nyalo nangiya emihlanganweni yelibandla, seyingitjela kutsi ngiyijabulele. Kuphila kwemndeni wetfu sekumnandzi kakhulu futsi sekuhlale kunekuthula ekhaya. Sifiso sami kutsi indvodza yami ilemukele liciniso futsi ikhonte Jehova kanye nami.”

¹⁷ Sibonelo saYasmeen sikhombisa kutsi lutsandvo “lucinisela kuto tonkhe tintfo, . . . lwetsemba tonkhe tintfo, lubeketelela tonkhe tintfo.” (1 Khor. 13:4, 7) Inzondo inemandla futsi iyalimata, kodvwa lutsandvo lunemandla kakhulu. Nasibatsandza labanye, bangahle bayekele kusiphikisa. Lutsandvo lwenta Jehova ajabule. Kodvwa ngisho nobe labasiphikisako bachubeka basenyanya, singajabula. Kanjani?

18. Kungani singajabula ngisho sitondvwa?

¹⁸ Jesu watsi: “Niyajabula nobe nini lapho bantfu banitondza.” (Luk. 6:22) Asitikhetseli kutondvwa. Asikutsandzi kuphatfwa kabi ngenca yekukholwa kwetfu. Ngako kungani kufanele sijabule nasitondvwa? Cabanga nganati tizatfu letintsatfu. Sekucala, nangabe sicinisela, Nkulunkulu uyajabula ngatsi. (1 Phet. 4:13, 14) Sesibili, kukholwa kwetfu kucina kakhulu. (1 Phet. 1:7) Sesitsatfu, sitawutfola umvuzo lomuhle kakhulu wekuphila lokuphakadze.—Rom. 2:6, 7.

19. Kungani baphostoli bebajabulile ngemuva kwekushaywa kamatima?

¹⁹ Kungakapheli sikhatsi lesidze Jesu avusiwe, baphostoli batfola lenjabulo lebekakhulume ngayo. Ngemuva kwekushaywa kamatima nekuyalwa kutsi bayekele kushumayela, bajabula. Kungani? “Ngobe Nkulunkulu bekabatsatse njengalabakufanele kuhlazwa ngenca yelibito laJesu.” (Imis. 5:40-42) Bebayitsandza kakhulu iNkhosi yabo kwendlula kusaba kutondvwa titsa tabo. Bakhombisa kutsi bayayitsandza ngobe “abazange bayekele” kushumayela tindzaba letimnandzi. Bazalwane betfu labanyenti lamuhla bayachubeka bakhonta Nkulunkulu ngekwetsembeka ngisho nobe babhekana nebumatima. Bayati kutsi Jehova angeke awukhohlwe umsebenti wabo nelutsandvo lababe nalo ngelibito lakhe.—Heb. 6:10.

20. Yini lesitawucoca ngayo esihlokweni lesilandzelako?

²⁰ Lelive litasitondza, yingci nje nasisaphila kulo. (Joh. 15:19) Kodvwa akukafaneli sesabe. Njengobe sitawubona esihlokweni lesilandzelako, Jehova ‘utawucinisa, aphindze avikele’ bantfu bakhe labetsembekile. (2 Thes. 3:3) Ngako asichubeke sitsandza Jehova, sitsandza bazalwane betfu nabodzadze futsi sitsandza netitsa tetfu. Nasilalela leseluleko, sitawuba nebunye, kukholwa kwetfu kucine, sidvumise Jehova futsi sitawukhombisa kutsi lutsandvo lunemandla kakhulu kunenzondo.