Ke Hobaneng ha Modimo a Ile a Bopa Batho?

 1. Ke hobaneng ha Modimo a ile a bopa batho?

HA Modimo a ne a bopa batho, o ne a batla ho ba etsetsa dintho tse ntle. O bopile monna le mosadi wa pele e leng Adama le Eva mme a ba beha serapeng se setle sa Edene. O ne a batla hore ba be le bana, ba etse hore lefatshe ebe sebaka se setle le hore ba hlokomele diphoofolo.—Genese 1:28; 2:8, 9, 15; sheba Ntlha ya 6 e hlahang qetellong ya buka.

 2. (a) Re tseba jwang hore Modimo o tla phethahatsa thato ya hae? (b) Modimo o batla hore ho dule batho ba mofuta ofe lefatsheng mme ba dule nako e kae?

² Na thato ya Modimo ya hore re phele lefatsheng le letle e tla phethahala? Ha Jehova a bua ka thato ya hae kapa morero wa hae, o re: “Ke o entse, ke tla boela ke o phethe.” (Esaia 46:9-11; 55:11) Modimo o tla phethahatsa thato ya hae mme ha ho na ntho e ka mo thibelang. Ha Jehova a bopa lefatshe, ha a ka “a le bopela lefeela” empa o ne a na le lebaka. (Esaia 45:18) O ne a batla hore batho ba dule ho lona. Modimo o batla hore ho dule batho ba mofuta ofe lefatsheng mme ba dule nako e kae? Bibele e re: “Ba lokileng ba tla rua lefatshe, ba tla dula ho lona ka ho sa feleng.”—Pesaleme ya 37:29; Tšenolo 21:3, 4.

 3. O ka nna wa ipotsang ha o bona batho ba kula ebile ba shwa?

³ Empa matsatsing ana batho ba a kula ebile ba a shwa. Dibakeng tse ngata ba a lwantshana mme ba a bolayana. Modimo o ne a sa batle hore batho ba phele ka tsela ena. Jwale ho etsahetseng, hona hobaneng? Bibele ke yona feela e ka re hlalosetsang.

4, 5. (a) Ke mang ya ileng a sebedisa noha ho bua le Eva serapeng sa Edene? (b) Motho ya tshepahalang a ka fetoha leshodu jwang?

⁴ Bibele e re bolella hore Modimo o na le sera se “bitswang Diabolose le Satane.” Satane o ile a sebedisa noha ho bua le Eva serapeng sa Edene. (Tšenolo 12:9; Genese 3:1) O ile a etsa hore ho bonahale eka ke noha e neng e bua.—Sheba Ntlha ya 7 e hlahang qetellong ya buka.

⁵ Jwale Satane Diabolose o tswa hokae? Na Modimo o mo bopile a le jwalo? Tjhe! Satane e ne e le e mong wa mangeloi a neng a le teng lehodimong ha Modimo a bopa lefatshe. Empa hamorao o ile a fetoha mme a iketsa Diabolose kapa motho ya buang leshano ka ba bang. (Jobo 38:4, 7) Na ntho e jwalo e a kgoneha? Nahana ka mohlala ona: Ho tla jwang hore motho ya tshepahalang a fetohe leshodu? Ha a ka a tswalwa e le leshodu. Empa o qala ho lakatsa kapa ho batla ntho eo e seng ya hae. O dula a nahana ka yona mme seo se etsa hore a e lakatse le ho feta. Ka hoo ha a fumana monyetla, o a e utswa. Ka tsela eo o ikentse leshodu.—Bala Jakobo 1:13-15; sheba Ntlha ya 8 e hlahang qetellong ya buka.

 6. Ho tlile jwang hore lengeloi le fetohe sera sa Modimo?

⁶ Sena ke se ileng sa etsahalla lengeloi leo. Ka mora hore Jehova a bope Adama le Eva, o ile a ba bolella hore ba be le bana mme ba “tlale lefatshe.” (Genese 1:27, 28) Mohlomong lengeloi leo le ile la nahana la re: ‘Batho bao kaofela ba ka rapela nna, e seng Jehova!’ Ho nahana ka taba eo, ho ile ha etsa hore le lakatse dintho tsa Jehova le ho feta. Lengeloi leo le ne le batla hore batho ba rapele lona. Ka hoo la kgelosa Eva ka ho mo bolella leshano. (Bala Genese 3:1-5.) Ka ho etsa jwalo, le ile la fetoha Satane Diabolose e leng sera sa Modimo.

 7. (a) Ke hobaneng ha Adama le Eva ba ile ba shwa? (b) Ke hobaneng ha re tsofala ebile re shwa?

⁷ Adama le Eva ha ba a ka ba mamela Modimo, yaba ba ja tholwana ya sefate. (Genese 2:17; 3:6) Ba ile ba etsa sebe mme hamorao ba shwa, feela jwalo ka ha Jehova a ne a boletse. (Genese 3:17-19) Bana bohle ba Adama le Eva e ne e le baetsadibe ka hoo ba ile ba shwa. (Bala Baroma 5:12.) E le hore o utlwisise hore na ho tlile jwang hore bana ba Adama le Eva e be baetsadibe, nahana ka mohlala ona. A re re o baka bohobe o sebedisa pane e kobehileng. Bohobe bo tla tswa ka sebopeho sa pane eo e senyehileng. Ha Adama a tlola molao wa Modimo, bophelo ba hae bo phethahetseng bo ile ba “senyeha” mme ya ba moetsadibe. Ka ha re bana ba hae, kaofela re baetsadibe mme ha re na bophelo bo phethahetseng. Re a tsofala ebile re a shwa, hobane re futsitse sebe sa Adama.—Baroma 3:23; sheba Ntlha ya 9 e hlahang qetellong ya buka.

8, 9. (a) Satane o ne a batla hore Adama le Eva ba dumele eng? (b) Ke hobaneng ha Jehova a sa ka a bolaya Adama le Eva hanghang?

⁸ Satane o ile a etsa hore Adama le Eva ba tlole molao wa Modimo. O ne a batla hore ba dumele hore Jehova o bua leshano le hore ke mmusi ya kgopo, ya sa batleng ha ba phela ha monate. Satane o ne a re batho ha ba hloke Modimo hore a ba jwetse seo ba lokelang ho se etsa. O ne a re Adama le Eva ba ka iketsetsa qeto tabeng ya hore ke dintho dife tse fosahetseng le tse nepahetseng. Jwale Jehova o ne a tla rarolla bothata boo jwang? Ke nnete hore o ne a ka nna a bolaya Adama le Eva hammoho le Satane. Empa na seo se ne se tla bontsha hore Satane ke raleshano? Tjhe, ha ho jwalo.

⁹ Ka hoo Jehova ha a ka a ba bolaya hanghang. Ho e na le hoo, o ile a fa batho monyetla wa hore ba ipuse. Sena se ne se tla bontsha hore Satane ke raleshano le hore Jehova o tseba se molemo bakeng sa batho. Re tla ithuta ho eketsehileng ka seo ho Kgaolo ya 11. Empa o nahanang ka qeto eo Adama le Eva ba ileng ba e etsa? Na ho ne ho nepahetse hore ba mamele Satane ho e na le ho mamela Modimo? Jehova o ne a file Adama le Eva ntho e nngwe le e nngwe eo ba neng ba e hloka. O ne a ba file bophelo bo phethahetseng, lehae le letle, le mosebetsi o monate wa ho hlokomela diphoofolo. Empa Satane o ne a so ka a ba etsetsa letho le molemo. Haeba e ne e le wena ya boemong ba Adama le Eva, o ka be o ile wa etsang?

10. Ke kgetho efe ya bohlokwa eo kaofela ha rona re lokelang ho e etsa?

¹⁰ Kajeno kaofela ha rona re lokela ho kgetha hore na re tla mamela mang. Bophelo ba rona bo itshetlehile qetong eo. Haeba re kgetha ho mamela Jehova e le Mmusi wa rona, re tla bontsha hore Satane ke raleshano. Athe haeba re mamela Satane seo se tla re lebisa lefung. (Pesaleme ya 73:28; bala Liproverbia 27:11.) Ke batho ba mmalwa feela lefatsheng ba mamelang Modimo. Ha e le hantle, ha se yena ya busang lefatshe. Empa haeba ha se yena, ke mang ya le busang?

11, 12. (a) Taba ya hore Satane o ne a batla ho fa Jesu mebuso yohle e re rutang? (b) Ke mangolo afe a bontshang hore Satane ke mmusi wa lefatshe?

¹¹ Jesu o ne a tseba hore na ke mang ya busang lefatshe. Ka letsatsi le leng, Satane o ile “a mo bontsha mebuso yohle ya lefatshe le kganya ya yona.” Yaba o tshepisa Jesu o re: “Dintho tsena tsohle ke tla o fa tsona haeba o ka itihela fatshe mme wa nketsetsa ketso ya borapedi.” (Matheu 4:8, 9; Luka 4:5, 6) Ipotse: ‘Haeba mebuso eo e se ya Satane, na o ne a ka e tshepisa Jesu?’ Tjhe. Ho hlakile hore mebuso yohle ya lefatshe ke ya Satane.

¹² O ka nna wa ipotsa: ‘Ho tla jwang hore Satane e be mmusi wa lefatshe? Na Jehova, Modimo ya Matla Ohle hase yena ya bopileng mahodimo le lefatshe?’ (Tšenolo 4:11) Ke yena, empa Jesu o ile a bitsa Satane “mmusi wa lefatshe lena.” (Johanne 12:31; 14:30; 16:11) Bibele e re Satane Diabolose ke “modimo wa tsamaiso ena ya dintho” kapa wa lefatshe lena. (2 Bakorinthe 4:3, 4) Ho ekelletsa moo, Bibele e re “lefatshe lohle le rapaletse matleng a ya kgopo.”—1 Johanne 5:19.

13. Ke hobaneng ha re hloka lefatshe le letjha?

¹³ Lefatshe le ntse le senyeha le ho feta. Le tletse dintwa, bobodu, boikaketsi le pefo. Batho ba ke ke ba kgona ho fedisa mathata ana, ho sa tsotellehe hore na ba leka ka thata hakae. Empa Modimo o tlo fedisa lefatshe lena nakong ya ntwa ya hae ya Armagedone mme a tlise lefatshe le letjha.—Tšenolo 16:14-16; sheba Ntlha ya 10 e hlahang qetellong ya buka.

14. Modimo o kgethile mang hore e be Morena wa Mmuso wa Hae? Bibele e ile ya bolela eng esale pele mabapi le Jesu?

¹⁴ Jehova o kgethile Jesu Kreste hore e be Morena wa Mmuso wa Hae o lehodimong. Dilemo tse dikete tse fetileng, Bibele e ile ya bolela esale pele hore Jesu o ne a tla busa e le “Kgosana ya Kgotso” le hore mmuso wa hae o ke ke wa feela le ka mohla. (Esaia 9:6, 7) Jesu o ile a ruta balatedi ba hae hore ba rapelle mmuso ona, ha a ne a re: “Mmuso wa hao o ke o tle. Thato ya hao e ke e etsahale lefatsheng, jwalo ka ha e etsahala lehodimong.” (Matheu 6:10) Kgaolong ya 8, re tla ithuta hore na Mmuso wa Modimo o tla nkela mebuso ya lefatshe lena sebaka jwang. (Bala Daniele 2:44.) Ka mora moo, Mmuso wa Modimo o tla etsa hore lefatshe e be sebaka se setle.—Sheba Ntlha ya 11 e hlahang qetellong ya buka.

15. “Lefatshe le letjha” keng?

¹⁵ Bibele e tshepisa hore: “Ho na le mahodimo a matjha le lefatshe le letjha tseo re di letetseng” mme “ho loka ho tla aha ho tsona.” (2 Petrose 3:13; Esaia 65:17) Ka dinako tse ding, ha Bibele e bua ka “lefatshe,” e tloha e bua ka batho ba dulang ho lona. (Genese 11:1) Ka hoo, “lefatshe le letjha” la ho loka ke batho bohle ba mamelang Modimo le bao a ba amohelang.

16. Modimo o tla fa batho ba dulang lefatsheng le letjha mpho efe, hona keng seo re lokelang ho se etsa hore re fumane mpho eo?

¹⁶ Jesu o ile a re Modimo o tla fa batho ba tla phela lefatsheng le letjha mpho ya “bophelo bo sa feleng.” (Mareka 10:30) Re lokela ho etsang hore re fumane mpho ee? Bala Johanne 3:16 le 17:3 hore o fumane karabo. A re bone hore na Bibele e re bophelo bo tla ba jwang lefatsheng le letjha.

17, 18. Re tseba jwang hore ho tla ba le kgotso lefatsheng le hore re tla dula re sireletsehile?

¹⁷ Bokgopo, dintwa, botlokotsebe le pefo di tla fediswa. Ho ke ke ha ba le batho ba kgopo kapa ba etsang dintho tse mpe lefatsheng. (Pesaleme ya 37:10, 11) Modimo o tla “fedisa dintwa ho isa pheletsong ya lefatshe.” (Pesaleme ya 46:9; Esaia 2:4) Lefatshe le tla tlala batho ba ratang Modimo le ba mo mamelang. Ho tla dula ho na le kgotso.—Pesaleme ya 72:7.

¹⁸ Batho ba Jehova ba tla ikutlwa ba sireletsehile. Mehleng ya Bibele, Modimo o ne a sireletsa Baiseraele ha ba mo mamela. (Levitike 25:18, 19) Lefatsheng le letjha, re ke ke ra tshaba letho. Re tla ikutlwa re sireletsehile ka dinako tsohle!—Bala Esaia 32:18; Mikea 4:4.

19. Ke hobaneng ha re ka kgodiseha hore ho tla ba le dijo tse ngata lefatsheng le letjha la Modimo?

¹⁹ Ho tla ba le dijo tse ngata. “Ho tla ba le dijothollo tse ngata lefatsheng; ho tla ba le nala hodima ditlhoro tsa dithaba.” (Pesaleme ya 72:16) Jehova “Modimo wa rona, o tla re hlohonolofatsa” mme “lefatshe le tla fana ka dihlahiswa [kapa dijo] tsa lona.”—Pesaleme ya 67:6.

20. Re tseba jwang hore lefatshe le tla ba letle?

²⁰ Lefatshe lohle le tla ba letle. Batho ba tla ba le matlo le dirapa tse ntle. (Bala Esaia 65:21-24; Tšenolo 11:18.) Lefatse lohle le tla ba letle jwalo ka serapa sa Edene. Jehova o tla re fa ntho e nngwe le e nngwe eo re e hlokang. Bibele e re ka yena: “O fuparolla seatla sa [hae]. O kgotsofatsa takatso ya ntho e nngwe le e nngwe e phelang.”—Pesaleme ya 145:16.

21. Re tseba jwang hore ho tla ba le kgotso pakeng tsa batho le diphofoolo?

²¹ Ho tla ba le kgotso pakeng tsa batho le diphoofolo. Diphoofolo ha di sa tla hlola di ntsha batho kotsi. Bana ba banyenyane ba ke ke ba tshaba ho bapala le diphoofolo tseo hona jwale di leng kotsi.—Bala Esaia 11:6-9; 65:25.

22. Keng eo Jesu a tla e etsetsa batho ba kulang?

²² Ha ho na motho ya tla kula. Ha Jesu a ne a le lefatsheng o ile a fodisa batho ba bangata. (Matheu 9:35; Mareka 1:40-42; Johanne 5:5-9) Ka ha Jesu ke Morena wa Mmuso wa Modimo, o tla fodisa batho kaofela nakong e tlang. Ha ho na motho ya tla re: “Ke a kula.”—Esaia 33:24; 35:5, 6.

23. Modimo o tla etsang bakeng sa batho ba shweleng?

²³ Bafu ba tla tsoswa. Modimo o tshepisa hore o tla tsosa batho ba dimilione ba shweleng. “Ho tla ba le tsoho ya ba lokileng le ba sa lokang.”—Liketso 24:15; bala Johanne 5:28, 29.

24. O ikutlwa jwang ka ho phela lefatsheng le letjha?

²⁴ Kaofela ha rona re na le kgetho. Re ka kgetha ho itaola kapa ra kgetha ho ithuta ka Jehova le ho mo sebeletsa. Haeba re kgetha ho sebeletsa Jehova re tla ba le bokamoso bo botle. Monna e mong ya neng a le makgatheng a lefu o ile a kopa hore Jesu a mo hopole nakong e tlang, mme Jesu a re ho yena: “O tla ba le nna Paradeiseng.” (Luka 23:43) A re ke re ithute ho eketsehileng ka Jesu Kreste le kamoo a tla phethahatsa ditshepiso tsa Modimo kateng.