Jeremia

32 Jehova o ile a bua le Jeremia ka selemo sa leshome sa puso ea Morena Tsedekia oa Juda e leng selemo sa bo18 sa puso ea Nebukadnezare.*+ 2 Ka nako eo, masole a morena oa Babilona a ne a thibeletse Jerusalema. Moprofeta Jeremia o ne a koaletsoe ka Lebaleng la Balebeli+ ka tlung ea morena* oa Juda. 3 Morena Tsedekia oa Juda o ne a tšoere Jeremia+ eaba o re ho eena: “Ke hobane’ng ha u profeta tjee? U re: ‘Jehova o re: “Ke tla nehelana ka motse ona matsohong a morena oa Babilona ’me o tla o hapa.+ 4 Morena Tsedekia oa Juda a ke ke a phonyoha Bakalde etsoe ruri ho tla nehelanoa ka eena matsohong a morena oa Babilona ’me ba tla buisana ba shebane mahlong.”’+ 5 Jehova o re: ‘O tla isa Tsedekia Babilona ’me Tsedekia o tla lula teng ho fihlela ke etsa qeto ea hore na ke tla etsa’ng ka eena. Le hoja le ntse le loantša Bakalde, le ke ke la atleha.’”+

6 Jeremia a re: “Jehova o itse ho ’na: 7 ‘Hanamele mora oa Shalume ntate-moholo oa hao,* o tla tla ho uena a re: “Ithekele tšimo ea ka e Anathothe+ hobane u na le tokelo ea ho e reka pele.”’”+

8 Hanamele ngoan’a Ntate-moholo* a tla ho ’na Lebaleng la Balebeli joalokaha Jehova a chulo ’me a re ho ’na: “Ke kopa u reke tšimo ea ka e Anathothe, naheng ea Benjamine kaha u na le tokelo ea hore e be ea hao le ea hore u e reke. Ithekele eona.” Ntho ena e ile ea etsa hore ke tsebe hore ke Jehova ea neng a batla hore ho be joalo.

9 Eaba ke reka tšimo e Anathothe ho Hanamele ngoan’a Ntate-moholo. Ka mo bekhela chelete+ e etsang likramo tse ka bang 80* le likotoana tsa silevera tse leshome. 10 Joale ka ngola lengolo la tumellano,+ ka le tempa,* ka bitsa lipaki+ eaba ke bekha chelete likaleng. 11 Ka nka lengolo leo la tumellano le neng le koetsoe le bile le tempuoe ho ea ka taelo le molao ’moho le le neng le sa tempuoa 12 eaba ke fa Baruke+ mora oa Neria+ setloholo sa Mahaseia lengolo la tumellano le tempuoeng. Ka mo fa lona Hanamele ngoan’a Ntate-moholo a le teng. Ho ne ho boetse ho e-na le lipaki tse pakileng lengolong la tumellano le tempuoeng le Bajuda bohle ba neng ba lutse Lebaleng la Balebeli.+

13 Ka laela Baruke ba ntse ba mametse ka re: 14 “Jehova oa mabotho, Molimo oa Iseraele o re: ‘Nka mangolo ana, lengolo la tumellano le koetsoeng hammoho le le butsoeng, u a kenye ka har’a nkho ea letsopa e le hore a se ke a senyeha.’ 15 Jehova oa mabotho, Molimo oa Iseraele o re: ‘Ho tla boela ho rekoe matlo, masimo le lirapa tsa morara naheng ena.’”+

16 Eaba ke rapela Jehova ka mor’a hore ke fe Baruke mora oa Neria lengolo la tumellano. Ka re: 17 “Jehova ’Musi oa Lintho Tsohle! U entse maholimo le lefatše ka matla a hao a maholo+ le ka letsoho la hao le matla. Ha ho letho le ka u hlolang, 18 uena ea hauhelang batho ba likete empa u tlohela bara hore ba khole litholoana tsa liphoso tsa bo-ntate ba bona,+ Molimo oa ’nete, e moholo, ea matla, eo lebitso la hae e leng Jehova oa mabotho. 19 Merero ea hao e meholo ’me liketso tsa hao li matla,+ uena eo mahlo a hao a bonang liketso tsohle tsa batho,+ e le hore u fe e mong le e mong ho ea ka litsela tsa hae le ho ea ka mesebetsi ea hae.+ 20 U entse lipontšo le mehlolo naheng ea Egepeta, tse ntseng li tsejoa le kajeno ’me u iketselitse lebitso Iseraele le har’a batho bohle+ feela joalokaha ho tla etsahala letsatsing lena. 21 O ntšitse batho ba hao ba Iseraele naheng ea Egepeta, ka lipontšo, ka mehlolo, ka letsoho le matla* le ka liketso tse tšabehang.+

22 Ka mor’a nako, oa ba fa naha ena eo u ileng oa hlapanyetsa baholo-holo ba bona+ hore u tla ba fa eona, naha e phallang lebese le mahe a linotši.+ 23 Ba ile ba tla ’me ba lula ho eona empa ha baa ka ba mamela lentsoe la hao kapa ba ikobela molao oa hao. Ha baa ka ba etsa eng kapa eng eo u ileng oa ba laela hore ba e etse, hoo u ileng oa etsa hore tlokotsi ena eohle e ba hlahele.+ 24 Banna ba tlile motseng ’me ba entse litotoma tse o thibellang e le hore ba o hape.+ Motse o tla oela matsohong a Bakalde ba o loantšang ka lebaka la sabole,+ tlala le lefu la seoa.+ Lintho tseo u li boletseng li etsahetse joalokaha u bona. 25 Le hoja motse o tla nehelloa Bakalde, Jehova ’Musi oa Lintho Tsohle, u itse ho ’na: ‘Ithekele tšimo ka chelete ’me u bitse lipaki.’”

26 Eaba Jehova o re ho Jeremia: 27 “Ke ’na Jehova, Molimo oa batho bohle. Na ho na le ntho leha e le efe e ka ntlholang? 28 Ka hona, Jehova o re: ‘Ke nehelana ka motse ona ho Bakalde le ho Nebukadnezare* morena oa Babilona ’me o tla o hapa.+ 29 Bakalde ba loantšang motse ona ba tla kena ’me ba o hotetse. Ba tla chesa motse ona+ le matlo ao marulelong a ’ona batho ba neng ba etsetsa Baale mahlabelo le ho etsa linyehelo tsa lino bakeng sa melimo e meng ’me ba ntšiteloa.’+

30 Jehova o re: ‘Batho ba Iseraele le ba Juda ba entse lintho tse fosahetseng feela mahlong a ka ho tloha bocheng ba bona.+ Batho ba Iseraele ba lula ba ntšiteloa ka liketso tsa bona. 31 Etsoe motse ona e bile sesosa sa bohale le khalefo feela ho ’na ho tloha letsatsing leo ka lona ba o hahileng ho fihlela letsatsing lena.+ Kahoo, ke tla o tlosa ka pel’a mahlo a ka.+ 32 Ke tla o tlosa ka lebaka la bokhopo bohle boo batho ba Iseraele le ba Juda ba bo entseng hore ba ntšiteloe. Kaofela ha bona, marena,+ likhosana,+ baprista, baprofeta,+ banna ba Juda le baahi ba Jerusalema ba nkhalefisitse. 33 Ho e-na le hore ba khutlele ho ’na, ba mphuraletse.+ Le hoja ke lekile ho ba ruta ka makhetlo-khetlo,* ha ho le ea mong oa bona ea neng a mamela ha a khalemeloa.+ 34 Ba ne ba kenya litšoantšo tsa bona tse nyonyehang ka tlung e bitsoang ka lebitso la ka e le hore ba e silafatse.+ 35 Ho feta moo, ba hahile libaka tse phahameng tsa Baale Khohlong ea Mora oa Hinome*+ e le hore ba chese bara le barali ba bona e le mahlabelo a etsetsoang Moloke+ e leng ntho eo ke neng ke sa ba laela eona.+ Ha ho mohla nkileng ka nahana* hore ba etse ntho ena e nyonyehang ebe ba etsa hore Juda e etse sebe.’

36 Ka hona, motse ona oo le reng o tla nehelloa morena oa Babilona ka sabole, tlala le lefu la seoa, Jehova Molimo oa Iseraele o re ka oona: 37 ‘Ke tla ba bokella ho tsoa linaheng tsohle tseo ke ba hasanyelitseng ho tsona ka bohale ba ka le ka khalefo ea ka.+ Ke tla ba khutlisetsa sebakeng sena, ke ba lumelle hore ba lule ba sireletsehile.+ 38 E tla ba sechaba sa ka ’me ke tla ba Molimo oa bona.+ 39 Ke tla fetola lipelo tsa bona+ le litsela tsa bona e le hore ba ka lula ba ntšebeletsa kamehla, molemong oa bona le molemong oa bana ba bona.+ 40 Ke tla etsa selekane se sa feleng le bona,+ sa hore nke ke ka tlohela ho ba etsa hantle.+ Ke tla etsa hore ba ntlhomphe e le hore ba se ke ba mphuralla.+ 41 Ke tla thabela ho ba etsetsa lintho tse ntle.+ Hape ke tla etsa hore ba lule naheng ena+ ho ea ho ile. Ke tla etsa lintho tsena ka pelo eohle ea ka le ka moea oohle oa ka.’”*

42 “Etsoe Jehova o re: ‘Feela joalokaha ke tliselitse batho bana koluoa ena, ke tla ba etsetsa melemo eohle eo ke ba tšepisitseng eona.+ 43 Ho tla rekoa masimo naheng ena+ le hoja le re: “Naha ena ha e na baahi kapa sebata hape ho nehelanoe ka eona ho Bakalde.”’

44 “‘Batho ba tla reka masimo ka chelete, ho ngoloe mangolo a tumellano ’me a koaloe le lipaki li tla bitsoa. Lintho tsena li tla etsahala naheng ea Benjamine+ le libakeng tse haufi le Jerusalema, metseng ea Juda,+ metseng e lithabeng, metseng e mabalane*+ le metseng e ka boroa hobane ke tla khutlisa batho ba bona ba hapuoeng,’+ ke Jehova ea chong.”