Esaia
66 Jehova o re:
“Maholimo ke terone ea ka ’me lefatše ke setuloana sa maoto a ka.+
3 Ea hlabang poho o tšoana le ea bolaeang motho.+
Ea etsang sehlabelo ka nku o tšoana le ea robang molala oa ntja.+
Ea nyehelang mpho o tšoana le ea nyehelang mali a kolobe.+
Ea nyehelang libano tse tšoeu+ tsa sehopotso o tšoana le ea kopang tlhohonolofatso ka mantsoe a boloi.*+
Ba ikhethetse litsela tsa bona
’Me ba thabela lintho tse nyonyehang.
4 Kahoo, ke tla khetha litsela tsa ho ba otla,+
Ke tla ba tlisetsa lintho tse ba tšosang
Hobane ha ke hoeletsa, ha ho na ea ileng a araba.
Ha ke bua, ha ho na ea ileng a mamela.+
Ba ile ba ’na ba etsa lintho tse fosahetseng mahlong a ka,
Ba khetha ho etsa ntho e sa nthabiseng.”+
5 Utloang lentsoe la Jehova, lona ba thothometsoang* ke lentsoe la hae:
“Bana ba bo lona ba le hloileng, ba le khethollang ka lebaka la lebitso la ka ba itse: ‘E se eka Jehova a ka tlotlisoa!’+
Empa Molimo o tla hlaha a le tlisetse thabo,
Bona ba tla soaba.”+
6 Ho na le molumo oa moferefere motseng, molumo o hlahang tempeleng.
Ke molumo oa Jehova ha a fa lira tsa hae kotlo e li loketseng.
7 Mosali o bile le ngoana le pele a otloa ke mahlaba.+
Pele mahlaba a pelehi a qala, o ile a ba le ngoan’a moshanyana.
8 Ke mang ea kileng a utloa ntho e tjee?
Ke mang ea boneng lintho tse tjee?
Na naha e tla tsoaloa ka letsatsi le le leng?
Kapa na sechaba kaofela se ka tsoaloa ka nako e le ’ngoe?
Empa hang hoba Sione a otloe ke mahlaba, o ile a tsoala bana ba hae.
9 Jehova Molimo oa hao o re: “Na ke tla etsa hore nako ea ho pepa e fihle ebe joale ha ke etse hore ngoana a hlahe?
Kapa na nka etsa hore ngoana a be mothating oa ho hlaha ebe ke koala popelo?”
10 Thabang le Jerusalema ’me le nyakalle le eena,+ lona bohle ba mo ratang.+
Thabang le eena haholo, lona bohle ba mo llelang
11 Kaha le tla anya matšeliso letsoeleng la hae ’me le khotsofale ka botlalo.
Le tla noa le thabe ka lebaka la khanya ea hae e ngata.
12 Jehova o re:
“Ke mo fa khotso e joaloka noka+
Le khanya ea lichaba e joaloka molapo o phoroselang,+
Le tla anya, le tla pepuoa,
Le tla koietsoa le le holim’a mangole.
13 Joalokaha ’mè a tšelisa mora oa hae
Le ’na ke tla ’ne ke le tšelise,+
Le tla tšelisoa ka lebaka la Jerusalema.+
14 Le tla bona ’me lipelo tsa lona li tla thaba,
Masapo a lona a tla tiea joaloka joang bo botala.
15 “Jehova o tla tla joaloka mollo+
’Me likariki tsa hae li tšoana le moea oa sefefo,+
O tla tla ho tla fana ka kotlo a halefile haholo,
A khalemele ka malakabe a mollo.+
16 Ka mollo Jehova o tla liha kahlolo
A ahlole batho bohle ka sabole ea hae.
Ba bolailoeng ke Jehova ba tla ba bangata.
17 Ba ikhalaletsang le ba itlhoekisang bakeng sa ho kena lirapeng*+ e le ho ea rapela molimo oa bohata, ba jang nama ea kolobe,+ litali+ le lintho tse ling tse nyonyehang, kaofela ha bona ba tla fela,” ke Jehova ea chong. 18 “Kaha ke tseba mesebetsi ea bona le menahano ea bona, kea tla e le hore ke bokelle batho ba lichaba le ba lipuo tsohle ’me ba tla tla, ba bone khanya ea ka.
19 Ke tla beha letšoao har’a bona ’me ba bang ba batho ba phonyohileng ke tla ba romela lichabeng ho ba hulang seqha e leng Tarshishe,+ Pule le Lude.+ Ke tla boela ke ba romele ho ba leng Tubale, Javane+ le lihlekehlekeng tse hole, ba sa kang ba utloa tlaleho e mabapi le ’na kapa ba bona khanya ea ka. Ba tla phatlalatsa khanya ea ka har’a lichaba.+ 20 Ba tla tlisa bana ba bo lona kaofela ho tsoa lichabeng tsohle+ e le mpho ho Jehova ba palame lipere, likariki, likoloi, limmoulo le likamele, ho nyolohela thabeng ea ka e halalelang, Jerusalema feela joalokaha batho ba Iseraele ba tlisa mpho ka sejana se hloekileng ka tlung ea Jehova,” ke Jehova ea chong.
21 “Hape, ke tla nka ba bang hore e be baprista, ba bang e be Balevi,” ke Jehova ea buileng joalo.
22 “Feela joalokaha maholimo a macha le lefatše le lecha+ tseo ke li etsang li tla lula li le teng ka pel’a ka, le lebitso la lona le bana* ba lona ba tla lula ba le teng,” ke Jehova ea chong.+
23 “Khoeli e ’ngoe le e ’ngoe le beke e ’ngoe le e ’ngoe*
Batho bohle ba tla tla hore ba tl’o inama ka pel’a ka,”*+ ke Jehova ea chong.
24 “Ba tla tsoa ’me ba shebe litopo tsa batho ba neng ba mphetohetse.
Liboko tse holim’a tsona li ke ke tsa shoa
Le mollo o li chesang o ke ke oa tima+
’Me li tla fetoha ntho e nyonyehang ho batho bohle.”