Jobo
2 Ha boela ha tla letsatsi la hore bara ba Molimo oa ’nete*+ ba tle ka pel’a Jehova+ eaba Satane o kena le bona ho tla ema ka pel’a Jehova.+
2 Jehova a re ho Satane: “U tsoa hokae?” Satane a araba Jehova a re: “Ke tsoa solla lefatšeng le ho tsamaea ho lona.”+ 3 Jehova a boela a re ho Satane: “Na u hlokometse* hore ha ho motho ea tšoanang le mohlanka oa ka Jobo? Ke monna ea lokileng le ea tšepahalang,+ o tšaba Molimo ebile o hloile lintho tse mpe. O ntse a tšepahala+ le hoja uena u batla hore ke senye bophelo ba hae+ ntle ho lebaka.” 4 Satane a araba Jehova a re: “Letlalo bakeng sa letlalo. Motho o tla fana ka ntho e ’ngoe le e ’ngoe eo a nang le eona hore a pholose bophelo ba hae. 5 Ak’u mo utloise bohloko hanngoe feela ’meleng u tle u bone hore o tl’o u rohaka sefahla-mahlo.”+
6 Jehova a re ho Satane: “Etsa ntho e ’ngoe le e ’ngoe eo u e batlang ka eena empa u se ke oa mo bolaea.” 7 Satane a tloha ka pel’a* Jehova ’me a otla Jobo ka mathopa a bohloko,*+ ho tloha bohareng ba hlooho ho ea bohatong ba leoto. 8 Jobo a nka leqhetso la sejana se pshatlehileng sa letsopa ’me a ingoaea ka lona ha a ntse a lutse moloreng.+
9 Qetellong mosali oa Jobo a re ho eena: “Na hoa hlokahala hore u ’ne u tšepahale? Rohaka Molimo ’me u shoe!” 10 Empa Jobo a re ho eena: “U bua joaloka basali ba se nang kelello. Na re lokela ho amohela lintho tse ntle feela ho tsoa ho Molimo ’me re se ke ra amohela le tse mpe?”+ Ho sa tsotellehe lintho tsohle tse ileng tsa mo etsahalla, Jobo ha aa ka a bua ntho leha e le efe e mpe.*+
11 Metsoalle* e meraro ea Jobo e ile ea utloela ka mathata a mo hlahetseng eaba e tloha moo e lulang hore e e’o mo bona. E ne e le Elifaze+ oa Motemane, Bildade+ oa Moshuha+ le Tsofare+ oa Monaama. Ba lumellana hore ba kopane hore ba e’o tšelisa Jobo le ho mo khothatsa. 12 Ha ba mo bona ba sa le holenyana, ba ne ba sa hlokomele hore ke eena. Ba lla haholo, ba tabola liaparo tsa bona, ba hasanya mobu moeeng ba o tšela le lihloohong tsa bona.+ 13 Ba lula fatše le eena ka matsatsi a supileng le masiu a supileng. Ha baa ka ba re letho ho eena kaha ba ne ba bona hore o opeloa haholo.+