LENGOLO LE EANG HO TITE
1 ’Na Pauluse ke lekhoba la Molimo ke bile ke moapostola oa Jesu Kreste. Tumelo ea ka e lumellana le ea bakhethoa ba Molimo le tsebo e nepahetseng ea lithuto tsa ’nete. ’Nete eo e amana le ho sebeletsa Molimo ka botšepehi. 2 Tumelo ea ka e thehiloe holim’a tšepo ea bophelo bo sa feleng+ boo Molimo ea ke keng a bua leshano,+ a ileng a bo tšepisa khale. 3 Ka nako ea hae e loketseng, o ile a tsebahatsa lentsoe la hae ka mosebetsi oa boboleli oo ke ileng ka tšepeloa ho o etsa+ ho ea ka taelo ea Mopholosi oa rona, Molimo. 4 Ke ngolla Tite, ngoan’a ka oa sebele ebile e le Mokreste-’moho le ’na:
E se eka Molimo Ntate oa rona le Mopholosi oa rona Jesu Kreste ba ka ba mosa* ho uena le ho u fa khotso.
5 Ke ile ka u siea Kreta e le hore u ka lokisa lintho tse hlokang ho otlolloa* le hore u ka khetha baholo motseng o mong ka mor’a o mong joalokaha ke u laetse: 6 Moholo e lokela ho ba motho eo ho seng letho leo a qosoang ka lona, a be le mosali a le mong, bana ba hae e be balumeli ba sa tsebahaleng ka ho ba hlaha kapa ho ba marabele.+ 7 Kaha moholo ke mohlanka oa Molimo, o lokela hore a se ke a ba le letho leo a qosoang ka lona, a se ke a tsitlella thato ea hae,+ a se ke a rata ho halefa,+ e se ke ea e-ba letahoa, a se ke a rata ho loana,* a se ke a ba meharo ea ho fumana leruo ka bolotsana. 8 Empa e be motho ea amohelang baeti,+ ea ratang ho etsa lintho tse lokileng, ea nang le kelello,*+ ea lokileng, ea tšepahalang,+ ea itšoarang.+ 9 Tsela eo a rutang ka eona e be tumellanong le lentsoe le tšepahalang*+ e le hore a ka khona ho khothatsa* ka thuto e nepahetseng*+ le ho khalemela+ ba hanyetsang.
10 Etsoe ho na le banna ba bangata ba marabele, ba thetsang, ba buang haholo empa ba se na thuso, haholo-holo ba tsitlellang taba ea lebollo.+ 11 Ba lokela ho koaloa melomo kaha banna bana ba ntse ba senya tumelo ea malapa ka ho ruta lintho tse fosahetseng e le hore ka bolotsana ba iphumanele maruo. 12 E mong oa bona, moprofeta oa bona o ile a re: “Bakreta ke batho ba leshano, libata tse kotsi le menyollo e botsoa.”
13 O ne a bua ’nete. Ka lebaka lena u ’ne u ba khalemele ka matla e le hore ba be le tumelo e matla,* 14 ba se ke ba mamela litšomo tsa Bajuda le litaelo tsa banna ba furallang lithuto tsa ’nete. 15 Lintho tsohle li hloekile ho batho ba hloekileng.+ Empa ho batho ba silafetseng le ba se nang tumelo ha ho letho le hloekileng hobane likelello tsa bona hammoho le matsoalo a bona li silafetse.+ 16 Ba bolela hore ba tseba Molimo empa ba mo latola ka liketso+ hobane baa nyonyeha, ha ba mamele ebile ha ba tšoanelehe ho etsa mesebetsi efe kapa efe e lokileng.
2 Leha ho le joalo, uena u ’ne u bue lintho tse lumellanang le thuto e nepahetseng.*+ 2 Bo-ntate ba holileng ba lokela ho ba le teka-tekano linthong tsohle, e be batho ba sa nkeng lintho hanyenyane, ba nang le kelello,* ba nang le tumelo e matla, lerato le mamello. 3 Ka ho tšoanang, bo-’mè ba holileng ba itšoare ka tsela e bontšang hore ba hlompha Molimo, e se ke ea e-ba baetselletsi, e se ke ea e-ba makhoba a veine, ba rute lintho tse lokileng 4 e le hore ba ka eletsa* basali ba bacha hore ba rate banna ba bona, ba rate bana ba bona, 5 ba be le kelello,* ba be le boitšoaro bo hloekileng, e be basebetsi malapeng,* ba be mosa, ba mamele banna ba bona+ e le hore lentsoe la Molimo le se ke la buuoa hampe.
6 Ka ho tšoanang, u ’ne u eletse banna ba bacha hore ba be le kelello.*+ 7 U be mohlala mesebetsing eohle e metle. Ka boitlhompho u rute thuto e hloekileng.*+ 8 U bue lipuo tse hloekileng* ha u ruta e le hore ho se ke ha e-ba le letho leo batho ba u qosang ka lona+ le hore batho ba re hanyetsang ba ka soaba hobane ba se na letho le lebe* leo ba ka le buang ka rona.+ 9 Makhoba a lokela ho mamela beng ba ’ona linthong tsohle+ ’me a leke ho ba khahlisa, a sa ba arabise. 10 A se ke a ba utsoetsa+ empa a bontše hore a tšepahala kahohle e le hore a ka khabisa thuto ea Mopholosi oa rona Molimo linthong tsohle.+
11 Etsoe mosa* oa Molimo o pholosang batho ba mefuta eohle o bonahetse.+ 12 O re ruta ho phela ka tsela e bontšang hore re na le kelello* ka ho etsa lintho tse lokileng le ho sebeletsa Molimo ka botšepehi mehleng ena.*+ Hape o re ruta ho hana lintho tse mpe tseo batho ba lefatše lena ba li lakatsang le tsohle tse khahlanong le thato ea Molimo.+ 13 Hona joale, a re luleng re letetse ho phethahala ha lintho tse thabisang tseo re nang le tšepo ea tsona+ le hore Molimo Ea Matla ’Ohle le Jesu Kreste Mopholosi oa rona ba bonahatse matla a bona. 14 Jesu o ile a inehela bakeng sa rona+ ho re pholosa*+ e le hore re qobe ho etsa mofuta o mong le o mong oa bokhopo* le hore a hloekise batho bao e leng letlotlo la hae le khethehileng ba chesehelang ho etsa mesebetsi e metle.+
15 U ’ne u rute lintho tsena, u khothatse* le ho khalemela kaha u na le matla a ho etsa joalo.+ U se ke oa lumella mang kapa mang ho u khella fatše.
3 Lula u ba hopotsa hore ba mamele le ho ikokobeletsa mebuso le balaoli,+ ba itokisetse mesebetsi eohle e lokileng, 2 ba se ke ba bua mang kapa mang hampe, ba se ke ba rata likhang, ba se ke ba tsitlella maikutlo a bona,+ ba be bonolo ho batho bohle.+ 3 Etsoe le rona re kile ra ba lithoto, re sa mamele, re khelohile, re le makhoba a litakatso le menyaka e sa tšoaneng, re phela ka bokhopo le mona, re sa ratehe re bile re hloeane.
4 Leha ho le joalo, ha mosa oa Mopholosi oa rona Molimo+ le lerato leo a ratang batho ka lona li bonahatsoa, 5 o ile a re pholosa, eseng ka lebaka la mesebetsi e lokileng eo re e entseng+ empa ka lebaka la mohau oa hae.+ O ile a re pholosa ka metsi a ileng a re fa bophelo*+ le ka ho re nchafatsa ka moea o halalelang.+ 6 O ile a re fa moea ona ka bongata* a sebelisa Jesu Kreste Mopholosi oa rona+ 7 e le hore re ka ba majalefa+ a nang le tšepo ea bophelo bo sa feleng+ ka mor’a hore ho boleloe hore re lokile ka lebaka la mosa* oa hae.+
8 Mantsoe ana ke ’nete ’me ke batla hore u lule u hatisa litaba tsena e le hore ba lumelang ho Molimo ba ka lula ba nahana ka ho ntšetsa pele mesebetsi e metle. Lintho tsena li ntle ’me li molemong oa batho.
9 Empa u se ke oa kena likhang tse se nang kelello, litaba tsa maloko, liqabang le lintoa tse mabapi le molao kaha ha li na thuso ’me ke tsa lefeela.+ 10 Ha e le motho ea hasang thuto e fosahetseng,+ u khaotse ho tloaelana le eena+ haeba a hana ho mamela ka mor’a hore u mo eletse* ka makhetlo a mabeli.+ 11 U tsebe hore motho ea joalo o se a khelohile tsela e nepahetseng, o etsa sebe ebile o ikahlotse.
12 Ha ke romela Artemase kapa Tikikase+ ho uena, u etse sohle se matleng a hao hore u tle ho ’na Nikopolise kaha ke hona moo ke entseng qeto ea hore ke tla lula teng mariha. 13 Thusa Zenase ea rutehileng Molaong le Apolose ka lintho tseo ba li hlokang bakeng sa leeto la bona e le hore ba se ke ba haelloa ke letho.+ 14 Empa batho ba habo rona le bona ba ke ba ithute ho tsoela pele ka mesebetsi e metle e le hore ba thusetse ha ho e-na le lintho tse hlokoang ka potlako.+ Ha ba etsa joalo, ba ke ke ba khaotsa ho etsa mesebetsi e metle.*+
15 Bohle ba nang le ’na ba re u lumele. Ntumelisetse balumeli-’moho le rona ba re ratang.
E se eka Molimo a ka ba mosa ho lona kaofela.
Kapa: “tse haellang.”
Kapa: “ho otla.”
Kapa: “ea etsang liqeto tse nepahetseng; ea hlaphohetsoeng kelellong.”
Kapa: “molaetsa o tšepahalang.”
Kapa: “ho susumetsa; ho eletsa.”
Kapa: “e phelisang; e molemo.”
Ka Segerike: “ba phele hantle tumelong.”
Kapa: “e phelisang; e molemo.”
Kapa: “ba etsang liqeto tse nepahetseng; ba hlaphohetsoeng kelellong.”
Kapa: “rupela.”
Kapa: “ba etse liqeto tse nepahetseng; ba hlaphoheloe kelellong.”
Kapa: “ba hlokomele mahae a bona.”
Kapa: “ba etse liqeto tse nepahetseng; ba hlaphoheloe kelellong.”
Kapa: “u se ke oa sotha letho ha u ruta.”
Kapa: “tse phelisang; tse molemo.”
Kapa: “nyonyehang.”
Kapa: “re etsa liqeto tse nepahetseng; hlaphohetsoe kelellong.”
Kapa: “lefatšeng lena.” Sheba Tlhaloso.
Ka Segerike: “lopolla.”
Kapa: “tlolo ea molao.”
Kapa: “susumetse; eletse.”
Ka Segerike: “ka ho re hlatsoa.”
Kapa: “o mongata.”
Kapa: “lemose.”
Ka Segerike: “ho beha litholoana.”