Paradeise e se Nang Likhathatso Haufinyane e Tla ba Ntho ea Sebele

“UTLA ba le ’na Paradeiseng.” Mantsoe ao e bile a khothatsang hakaakang ho monna eo e neng e le senokoane! Che, eseng hore o ile a nahana hore o tla phema ho ea liheleng tsa mollo ’me a ee leholimong ha a e-shoa. Ho e-na le hoo, lesholu leo le neng le le haufi le Jesu le ile la fumana matšeliso tšepong ea hore le tla tsosetsoa bophelong ho tla phela Paradeiseng e tsosolositsoeng lefatšeng. Ka kōpo, hlokomela hore ea buileng polelo e tiileng joalo ka Paradeise—ke Mor’a Molimo ka boeena, Jesu Kreste.—Luka 23:43.

Ke’ng se ileng sa susumetsa tšepiso ea Kreste ka Paradeise? Lesholu le ne le ipilelitse: “Jesu, u nkhopole ha u kena ’musong oa hao.” (Luka 23:42) ’Muso ona ke eng, ’me o amana joang le paradeise ea lefatšeng? Ke joang see se tiisang hore Paradeise eo e tla ba e se nang likhathatso?

’Muso o Tlisang Paradeise

U tla lumellana le hore paradeise ea sebele e tla ba teng lefatšeng mohla likhathatso tse teng hona joale li felileng. Ho fihlela hona joale boiteko ba batho ba ho li felisa bo hlōlehile, joalokaha histori e paka seo ka ho lekaneng. Moprofeta oa Moheberu Jeremia o ile a hlokomela: “Oho! Jehova, kea tseba hobane . . . motho ea tsamaeang a ke ke a lokisa lika tsa hae.” (Jeremia 10:23) Joale, ke mang ea ka felisang ka ho feletseng likhathatso tsohle tse teng hona joale?

Boemo bo Bobe ba Leholimo le Tšilafalo. Ha sefefo se befileng Leoatleng la Galilea se khahlela maqhubu a maholo hoo a ka robang sekepe, basesisi ba sekepe ba ile ba tsosa motsoalle oa bona eo ba neng ba tsamaea le eena borokong. Eena, o ile a re feela ho leoatle: “Thōla! Khutsa!” Tlaleho ea Kosepele ea Mareka e bolela se ileng sa etsahala: “Moea oa kokobela, ’me khutso e khōlō ea e-ba teng.” (Mareka 4:39) Motsoalle eo ba tsamaeang le eena e ne e se e mong haese Jesu. O ne a e-na le matla a ho laola boemo ba leholimo.

Ke eena Jesu enoa ea ileng a bolela esale pele ka moapostola Johanne hore nako ea tla eo ka eona Molimo a tlang ho “senya ba senyang lefatše.” (Tšenolo 1:1; 11:18) Hona ho ke ke ha hlōla Ea ileng a felisa lefatše lohle la batho ba neng ba sa tšabe Molimo Moroallong oa mehleng ea Noe.—2 Petrose 3:5, 6.

Tlōlo ea Molao le Pefo. Bibele ea tšepisa: “Ba bolotsana ba tla felisoa, athe ba itšepetseng Jehova ba tla rua lefatše. Empa ba bonolo ba tla rua lefatše, ba iketle khotsong e kholo.” (Pesaleme ea 37:9, 11) Ke Molimo Jehova ea boetseng a tšepisa ho felisa tlōlo ea molao le pefo eohle, ho bolokela ba ikokobelitseng Paradeise.

Bofutsana le Tlala. Ho hloka toka ho teng hona joale ho lumella mebuso ea sebakeng se seng sa lefatše ho bokella lijo “ka bongata” ha ka nako e tšoanang linaha tse futsanehileng li sehla ke bofutsana. Mekhatlo ea liphallelo, e tšehelitsoe ke batho ba nang le kameho lefatšeng ka bophara, e leka ho fana ka litlhoko tsa motheo empa hangata e hlōlisoa ke ho senyeha ha merero ea kabo ka lebaka la bosieo ba molao le tlhophiso. Bapisa sena le seo moprofeta Esaia a se tlalehileng: “Thabeng ena, Jehova oa makhotla o tla etsetsa lichaba kaofela mokete oa lijo tse hlabosang, mokete oa liveine tse monate tse nkiloeng holim’a litšifa, mokete oa lijo tse hlabosang, tsa moko, oa liveine tse nkiloeng holim’a litšifa, tse hloekileng.” (Esaia 25:6) Na seo ha se bolele hore tlala e ke ke ea hlola e e-ba teng? Ka sebele ho tla ba joalo.

Ntoa. Boiteko ba ho busa lefatše lena ka babusi ba linaha tse ’maloa bo pakiloe bo hlōleha. Selekane sa Lichaba se thehiloeng ka 1920, se ile sa hlōleha ho thibela ho qhoma ha Ntoa ea II ea Lefatše ’me sa fela. Machaba a Kopaneng, ao hangata a thoholetsoang e le tšepo e molemo ka ho fetisisa bakeng sa khotso, a thatafalloa ke ho namola mekha e hanyetsanang libakeng tseo e loantšanang ho tsona. Ho sa tsotellehe boiteko ba ’ona ba khotso bo phatlalatsoang, lintoa li atile, ebang ke tsa lehae, tsa merabe, kapa tsa tikoloho. ’Muso oa Molimo o tšepisa hore o tla felisa mekha e loantšanang e teng kajeno le ho ruta bafo ba oona litsela tsa khotso.—Esaia 2:2-4; Daniele 2:44.

Ho Senyeha ha Lelapa le Boitšoaro. Ho qhalana ha lelapa ho atile. Botlokotsebe ba bana bo bongata. Boitšoaro bo bobe ba botona le botšehali bo ja setsi likarolong tsohle tsa mokhatlo oa batho. Leha ho le joalo, litekanyetso tsa Molimo li lutse li sa fetohe ho tloha qalong. Jesu o ile a paka hore “monna o tla siea ntate oa hae le ’mè oa hae ’me o tla khomarela mosali oa hae, ’me bao ba babeli e tla ba nama e le ’ngoe . . . Ka hona, seo Molimo a se kopantseng hammoho jokong a ho se ke ha e-ba le motho ea se arolang.” (Matheu 19:5, 6) Jehova Molimo o ile a boela a laela: “Hlompha ntate oa hao le ’mè oa hao . . . e le hore u ka tsoella hantle le hore u ka tsoela pele ka nako e telele lefatšeng.” (Baefese 6:2, 3) Ho tla rena litekanyetso tse joalo lefatšeng tlas’a ’Muso oa Molimo.

Ho Kula le Lefu. Moprofeta Esaia o ile a tšepisa: “Jehova . . . o tla re boloka. ’Me ha ho moahi ea tla re: ‘Kea kula.’” (Esaia 33:22, 24, NW) Moapostola oa Mokreste Pauluse o ile a hlokomela: “Moputso oo sebe se o lefang ke lefu, empa mpho eo Molimo a fanang ka eona ke bophelo bo sa feleng ka Kreste Jesu.”—Baroma 6:23.

Jehova Molimo o tla tlosa likhathatso tsena tsohle ka ’muso oa hae oa leholimo o matsohong a Mor’a hae, Kreste Jesu. Leha ho le joalo, u ka ’na ua re, ‘Sena se utloahala eka ke toro ea Sebaka se Phethahetseng. Ka sebele, e ka ba e thabisang haeba ruri e ka tla, empa na e tla tla?’

’Nete e Teng Hona Joale

Ho ba bangata, monyetla oa ho phela paradeiseng e se nang likhathatso hona lefatšeng lena o utloahala eka ke ho tšepa lelea. Haeba ke tsela eo u ikutloang ka eona, hlahloba bopaki ba hore ruri sena se tla etsahala.

Kajeno, Lipaki tsa Jehova ke mokhatlo oa machaba oa batho ba fetang limilione tse hlano ba seng ba ntse ba e-na le tikoloho e batlang e se na likhathatso liphuthehong tsa tsona tse 82 000 tse linaheng tse 233. U ka ’na ua etela leha e le efe ea lipokano tsa tsona, ebang ke e khōlō kapa e nyenyane, ’me u tla fumana eng?

(1) Boemo bo Mofuthu, bo Hloekileng. Ha a hlalosa ka e ’ngoe ea likopano tsa Lipaki tsa Jehova Norwich, Engelane, motsamaisi oa lebala la bolo ea maoto o ile a re: “Boemo ba khotso ka matsatsi ao a mane . . . ke bo hapang maikutlo. U fumana khutso ea botho e fapaneng ka ho feletseng le matsatsi leha e le afe a mang a mane lefatšeng la khoebo la tsitsipano hammoho le bophelong bo re potolohileng ba letsatsi le letsatsi. Ka sebele Lipaki li na le ho hong ho fapaneng hoo ho leng thata ho ho hlalosa.”

Moeletsi e mong oa khoebo e koetlisetsang ho haha ea ileng a etela liofisi tsa Lipaki tsa Jehova tse London o itse: “Ke ile ka khahloa haholo ke seo ke se boneng le ho se utloa ’me ka sebele ke ile ka hlolloa ke boemo bo akaretsang ba khotso le khutso tse neng li le teng eseng mehahong ea lōna feela empa hape le har’a [banna le basali]. Ke nahana hore tsela ea lōna ea bophelo le thabo eo le nang le eona e na le ho hongata hoo e lokelang ho ho ruta lefatše lena le nang le likhathatso.”

(2) Tšireletseho le Khotso. Mongoli oa koranta ea Journal de Montréal oa Canada o ile a ngola: “Ha ke Paki. Empa ke paki ea ’nete ea hore Lipaki li fana ka bopaki ba ho atleha le ho nepahala ha boitšoaro bo botle. . . . Haeba e ne e le bona batho feela lefatšeng, bosiu re ne re ke ke ra koala mamati a rōna ka mekoallo le ho kenya litšosa-masholu.”

(3) Botšepehi bo sa Sekisetseng ho ’Muso oa Molimo bo khetholla Lipaki. Boemo ba tsona ba ho se nke lehlakore bo khopisa ba bang, le hoja ho sa lokela ho ba joalo. Ho se kenelle ha tsona mekhatlong ea kajeno ea lipolotiki e sa tsitsang ha ho bakoe ke ho hloka boikemisetso ba ho etsa lintlafatso sechabeng. Ho e-na le hoo, li leka ho itšoara ka tsela e khahlisang ea busang ka ’muso oa leholimo, e leng, ’Mōpi oa lefatše, Jehova Molimo.

Tumelo ea Lipaki, e thehiloeng ka ho feletseng Lentsoeng la Molimo, Bibele, e li thibela ho oela lerabeng la ho fetoha lequloana kapa sehlotšoana sa bolumeli. Li bontša thahasello e mosa ho batho ba bang bohle, ho sa tsotellehe litumelo tsa bona tsa bolumeli. Che, ha li leke ho qobella batho bana ho fetola pono ea bona. Li leka ka matla ho etsisa Moeta-pele oa tsona, Kreste Jesu, ka ho fana ka bopaki ba Mangolo ba hore haufinyane ho tla hlongoa Paradeise e se nang likhathatso lefatšeng.—Matheu 28:19, 20; 1 Petrose 2:21.

(4) Bophelo bo Botle Moeeng le Thabo. Ka ho utloahalang, Lipaki tsa Jehova ha li ipolele hore li se li lokolohile ka ho feletseng likhathatsong. Sena se ke ke sa etsahala har’a batho ba jereng letšoao la sebe se futsitsoeng ho Adama. Empa ka thuso ea moea o halalelang oa Molimo, li hlaolela litšobotsi tse nang le botho joaloka “lerato, thabo, khotso, tiisetso, mosa, molemo, tumelo, bonolo, boitšoaro.” (Bagalata 5:22, 23) Ke borapeli ba tsona ho Jehova ka Kreste Jesu bo li kopanyang le ho boloka tšepo ea tsona e phela.

Re tšepa hore ho etela ha hao sebakeng se haufi le uena seo Lipaki li kopanelang ho sona ho tla u kholisa hore Molimo o tla fetola lefatše lena paradeise ea sebele.

Likhathatso tse teng hona joale li tla fela. Esita le ho se phethahale ho teng ho tla fela butle-butle ha melemo ea sehlabelo sa Kreste e sebelisoa ho moloko oa batho o utloang. E, u ka fumana bophelo bo phethahetseng le thabo.

Litokisetso tse bonolo li tla u thusa ho thabela monyetla o joalo. Kōpa Lipaki ho u fumanela kopi ea hao ea buka ea Tsebo e Isang Bophelong bo sa Feleng.a Ka eona, ka nako e khutšoanyane u ka ithuta seo Molimo a se hlokang ho uena e le hore le uena u ka thabela bophelo paradeiseng e se nang likhathatso ka ho sa feleng.

[Mongolo o botlaaseng ba leqephe]

[Ntlha e Qolotsoeng e leqepheng la 10]

Tumelo ea Lipaki, e thehiloeng ka ho feletseng Bibeleng, e li thibela ho fetoha lequloana kapa sehlotšoana sa bolumeli

[Setšoantšo se leqepheng la 8, 9]

Hona joale ho raloa motheo bakeng sa paradeise e se nang likhathatso

Haufinyane, paradeise ea sebele e tla ba teng lefatšeng ka bophara