Pono ea Bibele

Na Bafu ba Lokela ho Fuoa Tlhompho?

“MAIKUTLO A METSENG KA METSO A SUSUMETSA BATHO BA BANGATA HORE BA HLOMPHE SETOPO SA MOFU KA TSELA E FAPANENG LE EO BA HLOMPHANG PHOOFOLO E SHOELENG KA EONA.”—ENCYCLOPÆDIA BRITANNICA.

BATHO ba bangata ba hlompha baratuoa ba bona ba shoeleng ka tsela ena kapa eane. Bafu ba hlomphuoa ka ho hlahisa lipehi tsa bona likoranteng, ’me ba rorisoa ka lipuo tse hlophiselitsoeng ho ba phafa. Linaheng tse ling ho tloaelehile ho tšoara mapato a maholo a bolumeli kapa a meetlo. Tšebeletso ea bafu e ka qeta matsatsi, libeke kapa likhoeli. Likolo, liemelo tsa lifofane, literata le litoropo li rehelloa ka batho ba neng ba tumme ba seng ba shoele. Ho emisoa liemahale le ho etsa matsatsi a itseng a phomolo e le ho ikhopotsa batho bao e neng e le bahale.

Leha ho le joalo, ho latela Lentsoe la Molimo, bafu ha ba bone tlhompho leha e le efe e lebisoang ho bona. (Jobo 14:10, 21; Pesaleme ea 49:17) Bafu ba phela mehopolong ea ba ba hopolang feela. Bibele e re: “Ba utloang bona ba tseba hobane ba ea shoa, empa bafu ha ba tsebe letho leha le le leng.” (Moeklesia 9:5) Mangolo a fana ka tšepo ea tsoho ea bafu e tla ba teng nakong e tlang. (Johanne 5:28, 29; 11:25) Empa pele nako eo e fihla, bafu ha ba phele. Ba fetoha lerole ka tsela ea sebele.—Genese 3:19; Jobo 34:15.

Ka lebaka la boemo bo hlakileng ba Bibele ka bafu, na ho ba hlompha ho na le thuso e itseng? Na Bakreste ba lokela ho latela meetlo mabapi le mapato a baratuoa ba bona?

Lineano Tse Thehiloeng Likhopolong Tsa Bohata

Meetlo e mengata e amanang le bafu, mohlomong boholo ba eona, e metse ka metso lithutong tsa bolumeli tseo e seng tsa Bibele. Encyclopædia Britannica e re litšebeletso li etsoa ka morero oa “ho sireletsa ba shoeleng hore ba se hlaseloe ke bademona; ka linako tse ling morero oa litšebeletso tseo e ’nile ea e-ba ho sireletsa ba phelang tšusumetsong ea bafu kapa lehloeong la bona.” Tloaelo e joalo e thehiloeng khopolong ea bohata ea hore bafu baa phela sebakeng se sa bonahaleng sa moea, e hanana ka ho toba le ’nete ea Bibele.—Moeklesia 9:10.

Batho ba bangata ba neha bafu ba bona tlhompho ea borapeli. Borapeli ba mofuta ona bo kopanyelletsa ho etsetsa baholo-holo ba bona ba shoeleng mahlabelo le lithapelo. Ba bang ba kopanelang lineanong tse joalo ha ba nke liketso tsa bona e le borapeli, empa ba li nka e le pontšo ea hore ba hlompha bafu ka ho tebileng. Leha ho le joalo, boinehelo bo tjena ho baholo-holo ba shoeleng bo na le motheo oa bolumeli ’me bo hohlana le lithuto tsa Bibele. Jesu Kreste o itse: “Ke Jehova Molimo oa hao eo u lokelang ho mo rapela, ’me ke eena feela eo u lokelang ho mo etsetsa tšebeletso e halalelang.”—Luka 4:8.

Pono e Leka-lekaneng

Hase ka linako tsohle ho hlompha bafu ho tsamaisanang le lithuto tse fosahetseng tsa bolumeli. Ka mohlala, tlaleho ea Bibele e bolela kamoo Morena Ezekiase ea tšepahalang a ileng a hlomphuoa kateng ka mor’a lefu la hae. Batho ba Molimo ‘ba ile ba mo pata lebitleng le kaholimo la bana ba Davida, ’me Bajuda bohle le baahi ba Jerusalema ba mo hlompha ho shoeng ha hae.’ (2 Likronike 32:33) Mohlala o mong ke oa Jesu. Bibele e re barutuoa ba hae ba ile ba “nka setopo sa Jesu ’me ba se tlama ka masela a tlamisang a nang le linōko, hantle feela ka tsela eo Bajuda ba nang le tloaelo ea ho lokisetsa lepato ka eona.”—Johanne 19:40.

Mangolo a na le liketsahalo tse ling tse ngata tseo ho tsona ho ileng ha etsoa lintho tse khethehileng mabapi le setopo le lepato la ba shoeleng. Liketso tsena e ne e se ho rapela baholo-holo kapa hona hore li ne li thehiloe tumelong e fosahetseng ea hore bafu ba tsoela pele ho susumetsa litaba tsa ba phelang. Ho e-na le hoo, ba siameng ba ne ba bontša tlhompho e tebileng ho bao ba neng ba ba rata. Bibele ha e hanane le tlhompho e joalo hobane e thehiloe maikutlong a tlhaho ao motho a nang le ’ona, le hoja Bibele e sa buelle mapato a majabajaba kapa a bontšang ho se laolehe maikutlong. Ka lehlakoreng le leng, ha e khothalletse Bakreste hore e be ba sa ameheng maikutlong le ba sa utloeng bohloko ha ba thulane le lefu la eo ba mo ratang.

Ka lebaka leo, ha Lipaki tsa Jehova li e-ea lepatong la moratuoa oa tsona, li fana ka tlhompho e loketseng ho ea shoeleng. (Moeklesia 7:2) Ha ho tluoa tabeng ea lipalesa, litšebeletso tsa lepato le litloaelo tse ling tsa sebaka ka seng, Bakreste ba etsa khetho ea botho ka tsela e hlokolosi e le hore ba qobe mekhoa e hohlanang le lithuto tsa Bibele. Tabeng ena ho hlokahala kahlolo e molemo le ho leka-lekana. Encyclopædia of Religion and Ethics e hlalosa hore “nako le nako se boleloang ke tloaelo e itseng le bohlokoa ba eona sea fetoha, hoo hamorao moelelo oa eona o ka fapanang haholo le oo tloaelo eo e neng e e-na le oona qalong, ’me tlhaloso e tsebahalang haholo ea eona e ka ’na ea se ke ea hlahisa leseli la hore na morero oa eona e ne e le ofe ha e ne e simoloha.”a

Na ho Phafa ho Fosahetse?

Molao-motheo oa ho ba ea leka-lekaneng oa sebetsa le tabeng ea ho phafa mofu. Litšebeletsong tsa lepato, Lipaki tsa Jehova li leka ka hohle ho tšelisa ba shoetsoeng. (2 Bakorinthe 1:3-5) Lenaneo le hlophisitsoeng le ka ’na la ba le sebui se le seng kapa ho feta. Empa e ke ke ea e-ba ho loketseng ho fetola ketsahalo ena letoto le sa feleng la batho ba phafang mofu. Ho e-na le hoo, lepato le fana ka monyetla oa hore ho rorisoe litšoaneleho tse hlollang tsa Molimo, ho kopanyelletsa mosa oa hae ka ho re fa tšepo ea tsoho ea bafu.

Leha ho le joalo, sena ha se bolele hore ho tla be ho fosahetse ho hopola litšoaneleho tse ntle tsa mofu puong ea lepato. (Bapisa le 2 Samuele 1:17-27.) Haeba mofu a tšepahetse ho Molimo ho fihlela lefung, e-ba mohlala o motle o ka etsisoang. (Baheberu 6:12) Ho molemo ho nahanisisa ka tsela ea ho boloka botšepehi ea bahlanka ba Molimo. Ho arolelana mehopolo ena e metle le ba bang nakong ea tšebeletso ea lepato ho tšelisa ba phelang ’me ho hopoloa mofu ka tlhompho.

Bakreste ba ’nete ha ba rapele bafu. Ha ba kopanele meetlong e tloaelehileng e hananang le ’nete ea Bibele. Ka lehlakoreng le leng, bahlanka ba Molimo ba qhelela thōko pono e feteletseng ea hore kaha bafu ke lerole feela, litloaelo tsohle tsa lepato ha li na molemo ebile ha li hlokahale. Baa siama ebile ba hopola bafu ba bona. Empa bohloko le ho sareloa ha bona ho kokobetsoa ke ’nete ea Bibele ea hore bafu ha ba utloe bohloko le hore ho na le tšepo ea tsoho ea bafu.

[Mongolo o botlaaseng ba leqephe]

[Setšoantšo se leqepheng la 10]

Mokoloko oa lepato o neng o hlompha Gustav II, morena oa Sweden ka mor’a lefu la hae ka 1632

[Tlhaloso ea Moo Setšoantšo se Nkiloeng Teng]

From the book Bildersaal deutscher Geschichte