Thusa Batho ba Bang

NA KELETSO EE EA SEBETSA?

Nahana ka sena: U thabela ho qeta nako le batho ba joang? Na u thabela ho qeta nako le batho ba inahanang bobona kapa ba nahanelang batho ba bang? Ho hlakile hore joaloka batho ba bangata, u thabela ho ba le batho ba nahanelang ba bang. Kahoo, ha u thusa motho e mong, a ka batla ho ba haufi le uena ’me a batla litsela tsa ho u tšehetsa.

Sena ha se bolele hore motho e mong le e mong eo u mo thusang, o tla batla ho ba motsoalle oa hao. Leha ho le joalo, ho thusa batho ba bang ho tla u tsoela molemo. Ho ka boela ha etsa hore u se ke oa lula u nahana ka mathata a hao, a kang ho jeoa ke bolutu. Batho ba thusang ba bang, ba ba le metsoalle e mengata ebile ba ba le morero bophelong. Ba ba le pono e nepahetseng ka bona le ka maemo a bona. Hangata ha ba tšoenyehe haholo le ho ba le khatello e matla ea maikutlo ebile e ba batho ba phetseng hantle le ba thabileng.

Antonellaa oa Italy, ea ileng a loantšana le boikutlo ba ho jeoa ke bolutu ka mor’a hore monna oa hae a hlokahale, o re: “Ho thusa batho ba bang ho etsa hore ke sebelise nako ea ka hamolemo ha ho se na ntho eo nka e etsang. Kea utloa hore ke etsa ntho e molemo ’me seo sea nthabisa.”

U KA ETSA SEE JOANG?

Qala ka ho etsa lintho tse nyenyane. U ka qala ka ho thusa batho bao u seng u ntse u ba tseba. Ho etsa joalo ho bonolo ho feta ho thusa batho bao u sa ba tsebeng. Na u ka ba memela lijong kapa oa ba fa mpho e itseng? Ho bontša mosa ka litsela tse nyenyane ho ka thusa ba bang haholo. Ha u le mong, na u ka romella motho e mong molaetsa ho utloa hore na o ntse a ea joang? Batho baa thaba ha ba utloa hore ho na le motho ea ntseng a nahana ka bona.

Bontša hore u tsotella batho ba bang. Nahana ka batho bao u ba tsebang. Ipotse: ‘Ba ka hloka thuso ka eng? Ba ka thabela eng?’ Ka mohlala, u ka ithaopela ho thusa motho ka mesebetsi e itseng eo a sa khoneng ho e etsa. Haeba u se u holile, u ka koetlisetsa ba bang ho etsa mesebetsi e itseng kapa oa ba bolella lintho tseo u ithutileng tsona. Le hoja lintho tsena li bonahala li le nyenyane, li ka tsoela ba bang molemo haholo.

Leka ho sheba seo ba bang ba se hlokang le haeba u sa ba tsebe hantle. Ha u ntse u phetha mabaka a hao, bontša thahasello ho batho ba bang. Bososela u be u ba lumelise. Ha u bona motho ea utloileng bohloko kapa ea nang le bokooa, leka ho ikenya lieteng tsa hae. Ho ba le kutloelo-bohloko ho tla u susumelletsa hore u mo thuse. Ha u etsa joalo, u ka ba le metsoalle e mecha e tla u tsotella joalokaha u e tsotella.

Emma o ile a jeoa ke bolutu ka mor’a ho fallela naheng e ’ngoe. O re: “Ke leka ho thusa batho ba holileng le ba kulang. Ke ile ka ela ba bang lishopong le ho ba felehetsa ha ba ea ngakeng. Ha ’mè e mong a tl’o lula sebakeng seo ke lulang ho sona, ke ile ka mo thusa ka lintho tse ’maloa ka ba ka mo thusa hore a ikutloe a amohelehile.”

Itlhokomele. Loanela ho lula u phetse hantle ’meleng, ’me u etse bonnete ba hore u robala nako e lekaneng. Ha u thusa batho ba bang, u se ke oa ikhahlapetsa hoo u ka khathalang haholo. Ka tsela eo, u tla ba le matla a lekaneng bakeng sa ho thusa ba bang.

Batho ba hloka ho thusana bophelong. Kahoo, leka ho thusa ba bang le ho itlhokomela. Ho etsa joalo ho ka u thusa nakong eo u jeoang ke bolutu.