July

Kaha Shebna e ne e le monna “ea okametseng ntlo” ea Ezekiase, o ne a e-na le matla a itseng. (Esa. 22:15) Shebna o ile a iphahamisa ’me a batla hore batho ba mo nke e le motho oa bohlokoa. (Esa. 22:16-18) Kaha Shebna o ne a batla hore ho rorisoe eena, Jehova o ile a mo ‘liha sebakeng sa hae sa bolaoli’ eaba boikarabelo ba hae bo fuoa Eliakime. (Esa. 22:19-21) Taba ena e etsahetse nakong ea ha Morena Sankeribe oa Moassyria a itokisetsa ho hlasela Jerusalema. Hamorao Sankeribe o ile a romela lebotho le leholo la sesole hore le tšose Bajuda e le hore Ezekiase a inehele. (2 Mar. 18:17-25) Ezekiase o ile a romela Eliakime le banna ba babeli ho ea kopana le ba boholong pusong ea Sankeribe. E mong oa banna bao e ne e le Shebna eo e neng e se e le mongoli. Tlalehong ena rea bona hore Shebna ha aa ka a ikutloela bohloko kapa a khopeha empa o ile a ithuta liphosong tsa hae ’me a ikokobetsa. w18.03 25 ¶7-8, 10

Haeba re hlokomela hore re lula re nahana ka maruo kapa menyaka, ha rea lokela ho iphella pelo. Re lokela ho tsoela pele re kopa Jehova hore a re thuse ka moea o halalelang e le hore re nahane ka lintho tse nepahetseng. (Luka 11:13) Nahana ka moapostola Petrose. Ka linako tse ling o ne a sa nahane lintho ka tsela eo Jesu a nahanang ka eona. (Mat. 16:22, 23; Luka 22:34, 54-62; Bagal. 2:11-14) Kaha ha aa ka a nyahama, Jehova o ile a mo thusa. Butle-butle o ile a ithuta ho nahana ka tsela eo Jesu a nahanang ka eona. Le rona re ka mo etsisa. Hamorao Petrose o ile a bua ka makhabane a ka re thusang. (2 Pet. 1:5-8) Re lokela ho sebetsa ka thata ho ba le boitšoaro, mamello, boikutlo bo mofuthu ba bara ba motho le makhabane a mang. Letsatsi le letsatsi re lokela ho ipotsa, ‘Ke lokela ho loanela ho ba le makhabane afe e le hore ke matlafatse kamano ea ka le Jehova?’ w18.02 25-26 ¶12-13

Jobo o ne a tseba melao-motheo ea Molimo hantle. Kaha o ne a tseba Jehova e le kannete, o ne a etsa lintho tse nepahetseng. Mohlala, o ne a tseba hore a ke ke a re o rata Jehova empa a se mosa ho batho ba bang. (Jobo 6:14) O ne a sa nke a phahametse batho. Ho e-na le hoo, o ne a ba tšoara joalokaha eka ke litho tsa lelapa la hae, ho sa tsotellehe hore na ke barui kapa mafutsana. Jobo o ile a re: “Na Ea nketsang ka mpeng ha aa ka a mo etsa?” (Jobo 31:13-22) Esita leha a ne a ruile, ha aa ka a iphahamisa eaba o khella batho ba bang fatše. O ne a sa tšoane le batho ba mehleng ena ba ruileng le ba hlaheletseng. Jobo o ne a sa batle hore ho be le lintho tse mo sitisang ho ba le kamano e ntle le Jehova. A tseba hore haeba a ka lumella lintho tse kang maruo hore li mo sitise, o tla be a latola “Molimo oa ’nete ea holimo.” (Jobo 31:24-28) Hape Jobo o ne a utloisisa hore lenyalo ke boitlamo bo halalelang bo etsoang ke monna le mosali. A ipolella hore a ke ke a sheba mosali ka tsela e hlokang boitšoaro.​—Jobo 31:1. w18.02 11 ¶16; 12 ¶18-19

Noe o ne a sa khotsofalla feela ho phela bophelo bo monate. O ile a tsoela pele ho ba “’moleli oa ho loka,” a bolella batho bohle molaetsa oa Jehova ka sebete. (2 Pet. 2:5) Moapostola Pauluse o ile a re: “Ka tumelo ena o ile a ahlola lefatše.” (Baheb. 11:7) Kahoo Noe o ile a hanyetsoa, a sonngoa a ba a kopana le batho ba mabifi ha a ntse a etsa mosebetsi oa hae. Empa ha aa ka a “thothometsoa ke batho.” (Liprov. 29:25) Kaha Jehova o thusa bahlanka ba hae ba tšepahalang hore ba be sebete, Noe o ile a ba sebete. Kaha Noe o ile a tšepahalla Jehova ka lilemo tse fetang 500, Jehova o ile a re a hahe areka e tla pholosa batho le liphoofolo. (Gen. 5:32; 6:14) Mosebetsi ona oa ho haha areka o ne o bonahala o le boima, eseng feela tabeng ea ho e haha. Empa Noe o ne a boetse a tl’o tobana le batho ba mo somang le ba sa lumellaneng le ho hahoa ha areka. Leha ho le joalo, ka tumelo o ile a mamela Jehova eaba o tsoela pele ho haha areka. “A fela a etsa joalo.”​—Gen. 6:22. w18.02 4 ¶4, 6-7

Tsela ea bohlokoa eo ka eona re ka etsang hore phutheho e lule e momahane ke ka hore re ratane feela joalokaha Jehova a re ratile. (1 Joh. 4:8) Le ka mohla ha rea lokela ho bua tjena ka balumeli-’moho le rona: “Kea tseba hore ke lokela ho ba rata empa ha se hore re lokela ho tloaelana.” Haeba re etsa joalo, re tla be re sa latele keletso ea Pauluse e reng: “Le mamellane ka lerato.” (Baef. 4:2) Hlokomela hore ha aa ka a re feela, “le mamellane.” Ho e-na le hoo, o ile a re re “mamellane ka lerato.” Liphuthehong tsa rona, ho na le batho ba mefuta e fapaneng bao Jehova a ba huletseng ho eena. (Joh. 6:44) Ho na le lintho tse ntle tseo a li bonang ho bona. Haeba Jehova a ba rata, rona re bo-mang hore re bone ba sa tšoaneloe ke lerato la rona? Re lokela ho ba rata feela joalokaha Jehova a ba rata.—1 Joh. 4:20, 21. w18.01 16 ¶14

Batsoali ba bang ba khothalletsa bana ba bona hore ba se ke ba kolobetsoa pele ba ka ruteha kapa ho fumana mosebetsi. Le hoja batsoali ba sa etse joalo ka sepheo se fosahetseng, ba lokela ho ipotsa: ‘Na ha ke etsa joalo, ke thusa ngoan’aka hore a atlehe e le kannete? Na ho etsa joalo ho tumellanong le Lentsoe la Molimo?’ Ho bohlokoa hore re lule re hopola hore lintho tseo batho ba lefatše lena ba li khothalletsang, li khahlanong le thato ea Jehova. (Jak. 4:7, 8; 1 Joh. 2:15-17; 5:19) Ha ngoana a e-na le kamano e ntle le Jehova, a ka khona ho ikemela khahlanong le Satane le batho ba lefatše lena. A ka boela a qoba menahano e sa khahliseng Jehova. Haeba batsoali ba khothalletsa bana ba bona thuto e phahameng, bana ba tla nka lintho tsa lefatše lena e le tsa bohlokoa ho feta kamano ea bona le Jehova. Ho ka ba kotsi ho bana haeba batsoali ba ba susumetsa ka tsela eo. Na motsoali oa Mokreste a ka rata hore batho ba lefatše lee ba senyetse ngoan’a hae bokamoso? Haeba feela re beha Jehova pele bophelong ba rona, re tla atleha ’me re thabe.—Pes. 1:2, 3. w18.03 10-11 ¶10-11

Bakreste ba bangata ba ntse ba nolofatsa bophelo ba bona hobane ba hlokometse hore ha ba etsa joalo, baa thaba ebile ba fumana nako e ngata ea ho sebeletsa Jehova. Mor’abo rona Jack o ile a rekisa ntlo ea hae e kholo hammoho le khoebo ea hae e le hore eena le mohats’a hae e be bo-pula-maliboho. O re: “Ke qetile lilemo ke ea hae ke khathetse ka lebaka la mathata a mosebetsing. Empa mohats’a ka eena o ne a lula a thabile hobane ke pula-maliboho. O ne a lula a re, ‘Ke na le mohiri ea molemo ka ho fetisisa.’ Joale kaha le ’na ke se ke le pula-maliboho, re sebeletsa Motho a le mong, e leng Jehova.” Re lokela ho itlhahloba ka botšepehi hore na maikutlo a rona ke afe ka chelete. Re ka ipotsa: ‘Na tsela eo ke phelang ka eona e bontša hore ke lumela seo Bibele e se buang ka chelete? Na ho etsa chelete ke eona ntho e tlang pele bophelong ba ka? Na ke amehile ka maruo ho feta ho ba le kamano e ntle le Jehova hammoho le batho ba bang? Na ke lumela e le kannete hore Jehova o tla ntlhokomela ka lintho tseo ke li hlokang?’ Re lokela ho kholiseha hore a ke ke a soetsa batho ba mo tšepileng. w18.01 25 ¶12-13

Ho bohlokoa haholo hore motho e mong le e mong a sebeletse poloko ea hae. Re lokela ho etsa joalo ka ho ithuta Bibele le ho nahanisisa ka lintho tseo re ithutileng tsona, ho rapela le ho nahanisisa ka lintho tseo Jehova a re etselitseng tsona. Ho etsa lintho tsena ho tla re thusa hore re kholisehe le ho feta hore Jehova oa re rata. Kahoo, re tla susumelletseha ho bua le batho ba bang ka Bibele. (Pes. 73:28) Jesu o ile a re: “Haeba mang kapa mang a batla ho ntšala morao, a ke a itatole ’me a nke thupa ea hae ea tlhokofatso a ntatele a sa khaotse.” (Mat. 16:24) Mokreste e mong le e mong o lokela ho inehela ho Jehova ’me a kolobetsoe e le hore e be molateli oa Jesu. Ha re etsa joalo, Jehova o tla re hlohonolofatsa haholo hona joale a be a re fe bophelo bo sa feleng Paradeiseng. Kahoo, tsoela pele u sebeletsa poloko ea hao. w17.12 27 ¶18-19

Ha batsoali ba e-na le mamello ha ba ruta bana ba bona, bana bao ba tla utloisisa “bophara le bolelele le bophahamo le botebo” ba tumelo. (Baef. 3:18) Re ka ba ruta lintho tse loketseng lilemo tsa bona. Ha tumelo ea bona e ntse e e-ba matla, ho tla ba bonolo hore ba bue le bana ba bang ka lintho tseo ba li lumelang, ho akarelletsa bao ba kenang sekolo le bona. (1 Pet. 3:15) Mohlala, na bana ba hao ba khona ho hlalosa hore na ho etsahala’ng ha motho a e-shoa? Na ba utloa Bibele e hlalosa lintho ka tsela e utloahalang? Hopola hore ho bohlokoa ho ba le mamello ha u thusa ngoana oa hao ho kholiseha hore Bibele ke Lentsoe la Molimo. (Deut. 6:6, 7) U lokela ho qala pele u kholisehe ka Lentsoe la Molimo e le hore u thuse ngoana oa hao hore a be le tumelo e matla. Morali’abo rona Stephanie ea nang le barali ba bararo o re: “Ho tloha ha barali ba ka ba sa le banyenyane, ke ne ke atisa ho re, ‘Na ke bolella bana ba ka hore na ke kholisoa ke’ng hore Jehova o teng, hore oa re rata le hore melao ea hae e nepahetse?’ Nke ke ka lebella hore bana ba ka ba be le tumelo haeba ’na ke se na eona.” w17.12 20 ¶8-10

Ke hobane’ng ha Maretha a ne a kholisehile hore khaitseli ea hae e tla tsoha? O ne a tseba hore nako e fetileng le pele Jesu a qala tšebeletso ea hae, ho na le batho ba ileng ba tsoha ka mohlolo. Ke kahoo a neng a kholisehile hore ho tla ba le tsoho. E ka ’na eaba batsoali ba hae ba ile ba mo ruta ka litlaleho tsena a ba a ithuta ka tsona synagogeng. Mohlomong u hopola litlaleho tse tharo tsa tsoho tse hlahang ka Bibeleng. Molimo o ile a tsosa motho oa pele a sebelisa moprofeta oa hae Elia nakong eo a neng a etsa mehlolo. Mohlolohali e mong oa mofutsana motseng oa Sarepta o ile a amohela moprofeta Elia ha hae. Jehova o ile a etsa hore ka mohlolo phofo ea mohlolohali eo le oli li se ke tsa fela e le hore eena le mora oa hae ba ka lula ba phela. (1 Mar. 17:8-16) Hamorao mora oa hae o ile a kula ’me a shoa. Empa Elia o ile a mo thusa. O ile a tšoara setopo sa ngoana eo eaba oa rapela o re: “Molimo oa ka, ka kōpo, etsa hore moea oa ngoana enoa o khutlele ka hare ho eena.” Jehova o ile a araba thapelo ea Elia ’me mora oa mohlolohali eo a boela a phela. Ena ke tlaleho ea pele ea tsoho e hlahang ka Bibeleng. (1 Mar. 17:17-24) E tlameha ebe Maretha o ile a tseba ka ketsahalo ena. w17.12 3 ¶1; 4 ¶3, 5-6

Batho ba bangata ba re khothalletsa hore re batle mosebetsi o tla etsa hore re tsebahale kapa re be barui. Kaha batho ba batla mesebetsi e joalo hobane ba nka hore ba tla thaba ha ba e fumane, le rona re ka ’na ra iphumana re nahana joaloka bona. Na ke ’nete hore ha motho a fumane mosebetsi o lefang hantle o bileng o etsang hore a hlahelle, o tla thaba? Che. Nahana ka taba ena. Satane o ne a batla ho hlahella. Ka tsela e itseng, o fumane ntho eo a neng a e batlang. Leha ho le joalo, ho e-na le hore a thabe, o lula a halefile. (Mat. 4:8, 9; Tšen. 12:12) Empa rona rea thaba ha re thusa batho hore ba tsebe Molimo le hore na o tla ba etsetsa’ng nakong e tlang. Ha ho mosebetsi o ka etsang hore motho a thabe joalo. Hape, e le hore motho a fumane mosebetsi o lefang hantle, o hlolisana le ba bang ’me o etsa eng kapa eng ho o fumana. O qetella a bile a le mona. Ho ntse ho le joalo, o lula a sa thaba. Bibele e re ho tšoana le ha a “lelekisa moea.”​—Moek. 4:4. w17.11 23 ¶11-13

Esita le mehleng ea Jesu, ’mino e ne e ntse e le karolo ea bohlokoa ea borapeli. Nahana ka se ileng sa etsahala bosiung ba bohlokoa ka ho fetisisa ho moloko oa batho. Ka mor’a hore Jesu a thehe Lijo Tsa Shoalane Tsa Morena, ba neng ba le teng kaofela ba ile ba bina lipina ho rorisa Jehova. Bakreste ba mehleng ea Jesu ba re bontšitse hore ho bohlokoa ho rorisa Jehova ka lipina. Ho fapana le Baiseraele ba neng ba ea tempeleng e le hore ba rapele Jehova, Bakreste ba mehleng ea Jesu, ba ne ba atisa ho kopana ka matlung. Le hoja matlo ao a ne a se matle joaloka tempele, ba ne ba ntse ba binela Jehova ho tsoa pelong. Jehova o ile a bululela moapostola Pauluse hore a bue le Bakreste-’moho le eena a re: “Le ’ne le rutane le ho eletsana ka lipesaleme, lithoriso ho Molimo, lipina tsa moea ka mosa, le binela Jehova ka lipelong tsa lōna.” (Bakol. 3:16) Re lokela ho bina lipina tse hlahang libukeng tsa rona tsa lipina ka cheseho. Ke karolo ea lijo tseo “lekhoba le tšepahalang le le masene” le re fang tsona.—Mat. 24:45. w17.11 4 ¶7-8

Ho ne ho le bonolo ho fihla metseng e tšeletseng ea setšabelo. Jehova o ile a laela Baiseraele hore ba khethe metse e meraro ka lehlakoreng le leng la noka ea Jordane le e meraro ka ho le leng. Hobane’ng? E le hore ’molai a khone ho balehela motseng oa setšabelo ka potlako a bile a sa sokole. (Num. 35:12-14) Litsela tse eang metseng eo, li ne li bolokoa li le boemong bo botle. (Deut. 19:3) Ho latela setso sa Bajuda, ho ne ho e-na le matšoao a tsela a thusang ’molai hore a fumane motse oa setšabelo. Kaha metse ea setšabelo e ne e le teng, Moiseraele ea bolaileng e mong ka phoso o ne a sa tlameha ho batla tšireletso metseng ea balichaba hobane o ne a ka ’na a qetella a rapela melimo ea bohata. Nahana ka taba ena: Jehova ke eena ea laetseng hore motho ea bolaileng e mong o lokela ho bolaoa. Empa o boetse o entse molao oa hore motho ea bolaileng e mong ka phoso a hauheloe a be a sireletsoe. Mohlalosi e mong oa Bibele o ile a re ntho e ’ngoe le e ’ngoe e ne e entsoe hore e be bonolo bakeng sa motho e mong le e mong. Jehova ha se moahloli ea khopo ea batlang menyetla ea ho otla bahlanka ba hae. Ho e-na le hoo, ke “Molimo ea ruileng mohau.”​—Baef. 2:4. w17.11 14 ¶4-5

Moqolo o fofang, mosali ea lutseng ka har’a seroto le basali ba babeli ba nang le mapheo a kang mapheo a mokotatsie. Tsena ke lipono tse makatsang tseo Zakaria a ileng a li bona. (Zak. 5:1, 7-9) Ke hobane’ng ha Jehova a ile a bontša Zakaria lipono tseo tse makatsang? Pono ea botšelela le ea bosupa ea Zakaria li lemosa batho bohle ba etsang lintho tseo Jehova a sa li rateng ’me li re hopotsa hore Jehova a ke ke a lumella bokhopo ka ho sa feleng. Re lokela ho bontša hore re bahlanka ba Jehova ka hore re hloee bokhopo. Lipono tsena li boetse li re tiisetsa hore hafeela re etsa thato ea Jehova, a ke ke a re timetsa empa o tla re sireletsa le ho re hlohonolofatsa. Ka thuso ea Jehova re ka khona ho lula re tšepahala lefatšeng lena le khopo. w17.10 21 ¶1; 25 ¶19

Baralib’abo rona bao e leng masoha ba na le menyetla e mengata ea hore ba sebeletse Jehova. E ka ba bo-pula-maliboho, ba ea moo ho hlokehang bahoeletsi ba eketsehileng, ba sebetsa kahong kapa ba ea Sekolong sa Baevangeli ba ’Muso. Ba bang ba ile ba ea Sekolong sa Gileade. Re thabela ho ba le baralib’abo rona ba holileng liphuthehong tsa rona. Re ba rata haholo. Le hoja ba bang ba bona ba sa khone ho sebeletsa Jehova joaloka pele, ba ntse ba ka ba sebete ’me ba sebeletsa Jehova. Mohlala, morali’abo rona ea holileng o hloka ho ba sebete ha baholo ba mo kopa hore a bue le morali’abo rona e mocha ka moaparo. A ke ke a mo omanyetsa tsela eo a aparang ka eona. Empa o tla bua le eena ka mosa a mo thuse hore a nahane kamoo moaparo oa hae o amang batho ba bang kateng. (1 Tim. 2:9, 10) Ha a bua ka tsela ena, o tla kenya letsoho hore ho be le bonngoe ka phuthehong. w17.09 31-32 ¶17-18

Baeta-pele ba ’nile ba leka ka matla ho thibela batho ho bala Bibele. Leha ho le joalo, ho na le ba ileng ba ema ba tiile khahlanong le khanyetso eo. Mohlala, nahana ka lintho tse ileng tsa etsahalla John Wycliffe e leng setsebi sa thuto ea bolumeli sa lilemong tsa bo-1300. O ne a lumela hore e mong le e mong o lokela ho rua molemo Lentsoeng la Molimo. Empa batho ba Engelane ba ka nako eo, ba ne ba se na Bibele. Ka 1382, ho ile ha hatisoa Bibele ea Senyesemane ea Wycliffe. Batho ba bangata ba neng ba bitsoa Malollard ba ne ba tsamaea ka maoto ho tloha motseng o mong ho ea ho o mong ba balla batho Bibele ba bile ba ba fa Libibele tse ngotsoeng ka letsoho. Lilemo tse makholo ka mor’a moo, batho ba Europe le linaha tse ling ba ile ba fetolela Bibele le ho e hatisa ka lipuo tseo batho ba li utloisisang. w17.09 20-21 ¶10-12

Ntho e ’ngoe e ka bang ‘matšoenyeho nameng,’ e ka ba ha banyalani ba batla ho ba le bana empa ba sa khone ho ba le bona. (Liprov. 13:12) Mehleng ea Bibele, ha mosali a ne a sa khone ho ba le bana, e ne e le sekhobo. Ragele, mohats’a Jakobo o ile a ba mona ha ausi’ae a ba le bana empa eena a sa khone ho ba le bona. (Gen. 30:1, 2) Bothata bo bong boo banyalani ba kopanang le bona ke ba ho hlokahalloa ke molekane. Ba bangata ba hlahetsoe ke bothata bona ba sa lebella hore bo tla hlaha. Ho hlokahalloa ke molekane ke bothata bo ikhethang boo batho ba bangata ba thulanang le bona. Bakreste baa lumela hore bafu ba tla tsosoa feela joalokaha Jesu a tšepisitse. (Joh. 5:28, 29) Taba ee e ka thusa molekane ea hlokahalletsoeng joang? E ka mo tšelisa kaha ke tšepiso e hlahang ka Bibeleng eo Jehova a fanang ka eona ho tšelisa motho ea hlokahalletsoeng ke molekane. w17.06 4 ¶1; 5 ¶6; 6 ¶9

Ka le leng ha Jehova a itlhalosa ho Moshe, o ile a bua ka lebitso la hae le makhabane a hae. Makhabane ao a qalileng ka ’ona e bile mohau le mosa kapa kutloelo-bohloko. (Ex. 34:5-7) Jehova a ka be a ile a bua haholo ka matla a hae le bohlale ba hae. Empa kaha Moshe o ne a hloka thuso, Jehova o ile a bua ka makhabane a neng a bontša hore o ikemiselitse ho thusa bahlanka ba hae. (Ex. 33:13) Le hoja re bopetsoe ho qenehelana, re atisa ho icheba borona kaha re futsitse ho se phethahale ho batsoali ba rona ba pele. Ka linako tse ling ha re tsebe hantle hore na re thuse batho ba bang kapa re etse ntho e tla tsoela rona molemo. Batho ba bang ba lula ba loantša bothata bona. Ke’ng e ka u thusang hore u lule u utloela batho ba bang bohloko? Ntlha ea pele, nahana hore na ke joang Jehova a ileng a utloela batho bohloko le hore na batho ba bang bona ba ile ba utloelana bohloko joang. Ea bobeli, nahana hore na u ka etsisa Jehova joang le hore na ho etsa joalo ho ka ba le melemo efe. w17.09 8 ¶1; 9 ¶3

Ha re fetola bophelo ba rona le mekhoa ea rona re lokela ho etsa joalo hobane re batla ho tlotlisa Jehova eseng hore batho ba re rorise. Hopola hore esita le lengeloi le phethahetseng le ile la ikhohomosa eaba le etsa sebe. (Ezek. 28:17) Kaha ha rea phethahala, ho ka ba thata le ho feta hore re qobe ho ikhohomosa. Leha ho le joalo, re ka khona ho ikokobetsa. Ke’ng e ka re thusang hore re ikokobetse? Ntho e ka re thusang ho lula re ikokobelitse ke ho bala Bibele letsatsi le letsatsi ’me re nahanisise ka lintho tseo re ithutileng tsona. (Deut. 17:18-20) Re boetse re lokela ho nahana ka lintho tseo Jesu a ileng a re ruta tsona le kamoo a neng a ikokobelitse kateng. (Mat. 20:28) Jesu o ile a ba a hlatsoa maoto a baapostola ba hae. (Joh. 13:12-17) Hape re lokela ho rapela Jehova khafetsa hore a re thuse ka moea oa hae hore re se ke ra ikutloa re phahametse batho ba bang.—Bagal. 6:3, 4. w17.08 25 ¶11-12

E ka ’na eaba le uena u tšoana le Pauluse ka hore ho na le linako tseo u ileng oa hlokomela hore moea o halalelang oa u tataisa, empa lintho tsa etsahala ka tsela eo u neng u sa e lebella. Mohlomong u ile oa hlaheloa ke mathata kapa oa iphumana u le boemong boo ho bona u neng u lokela ho etsa liphetoho tse kholo bophelong ba hao. (Moek. 9:11) Ke’ng e ka re thusang hore re se ke ra tšoenyeha ka letho ’me re be le “khotso ea Molimo”? Pauluse o ile a bolella Bafilipi hore ba ka thusoa ke ho rapela. Kahoo, ha re tšoenyeha, re lokela ho rapela Jehova re mo bolelle lintho tse re tšoenyang. (1 Petrose 5:6, 7) Re lokela ho ba le tumelo ho Jehova hobane oa re tsotella. Ha re mo rapela, re lokela ho mo leboha ka lintho tse molemo tseo a re etselitseng tsona. Re tla mo tšepa haholoanyane ha re lula re hopola hore a ka ‘etsa ka ho fetisisang ho feta lintho tsohle tseo re li kopang kapa re li nahanang.’—Baef. 3:20. w17.08 9 ¶4, 6; 10 ¶10

Bakreste ba bangata ba ile ba thabisoa ke ho ba bo-pula-maliboho e sa le bacha. Ak’u buisane le bona ka lintho tseo u batlang ho li etsa bophelong. Batho ba joalo ba tla u bolella hore ha u le pula-maliboho, u ithuta lintho tse tla u tsoela molemo bophelo bohle ba hao. Ka mor’a hore Jesu a rutoe ke Ntate oa hae leholimong, o ile a ’na a ithuta lintho tse ngata ha a etsa tšebeletso ea hae lefatšeng. Ka mohlala, o ile a thabisoa ke ho bolella batho litaba tse molemo le ho lula a tšepahalla Jehova leha ho le thata. (Esaia 50:4; Baheb. 5:8; 12:2) Jesu o ile a re: “E-eang ’me le etse batho ba lichaba tsohle barutuoa, . . . le ba rute.” (Mat. 28:19, 20) Haeba u batla ho etsa batho barutuoa, u tla be u khetha mosebetsi o khotsofatsang ka ho fetisisa o bileng o thabisang Molimo. Joaloka mosebetsi o mong le o mong, u lokela ho ipha nako ea ho ithuta ho o etsa. w17.07 23 ¶6-7

Re kholisehile hore Ntate oa rona ea leholimong e leng Jehova, ke eena mohloli oa matšeliso. (2 Bakor. 1:3, 4) Re ka boela ra tšelisoa ke litho tsa phutheho. (1 Bathes. 5:11) Ke joang u ka tšelisang “moea o hlomohileng”? (Liprov. 17:22) Hopola hore ho na le “nako ea ho khutsa le nako ea ho bua.” (Moek. 3:7) ’Mè Dalene ea hlokahalletsoeng ke molekane o re: “Motho ea hlokahalletsoeng o hloka ho ntša maikutlo. Kahoo, ntho e molemo ka ho fetisisa eo u ka e etsang ke hore u mo mamele ka hloko u sa mo kene hanong.” Morali’abo rona Junia eo abuti oa hae a ileng a ipolaea o re: “Le hoja u ke ke oa utloisisa hantle hore na motho ea hlokahalletsoeng o ikutloa joang, taba ea bohlokoa ke ho leka ho utloisisa hore na o ikutloa joang.” Hape, hopola hore batho ba utloisoa bohloko ke lintho tse sa tšoaneng ebile ha ba utloe bohloko ka litsela tse tšoanang. w17.07 13 ¶3; 14 ¶11-13

Batho ba bangata ba nka chelete e le eona ntho ea bohlokoa bophelong. Ba phathahane ka ho sebeletsa ho ba le chelete e ngata kapa hore e teng e se ke ea fela. Batho ba bang bona ba nka ntho ea bohlokoa e le malapa a bona, bophelo bo botle kapa ho finyella lintho tse itseng. Ntho ea bohlokoa ka ho fetisisa eo re lokelang ho e etsa ke ho tšehetsa bobusi ba Jehova. Empa haeba re se hlokolosi, re ka phathahana ka mesebetsi ea rona kapa ra ameha ka mathata a rona hoo re ka lebalang bohlokoa ba ho tšehetsa bobusi ba Jehova. Haeba re bo tšehetsa, re tla khona ho sebetsana le mathata a rona ’me re be le kamano e ntle le Jehova. w17.06 22 ¶1-2

Jehova o busa ka lerato. Kahoo, bo-ntate le baholo ba lokela ho etsisa Jehova ka hore ba hlokomele ba malapa le liphutheho ka lerato ’me e se ke ea e-ba bahatelli. Pauluse o ne a etsisa Jehova le Jesu. O ne a sa qobelle batho ho etsa lintho ka tsela e nepahetseng kapa hona ho ba nyenyefatsa. Ho e-na le hoo, o ne a ba kopa. (Bar. 12:1; Baef. 4:1; Filem. 8-10) Ke eona tsela eo Jehova a etsang lintho ka eona. Kahoo, re lokela ho mo etsisa. Re ka etsa’ng ho bontša hore re hlompha Jehova? Ka hore re tšehetse liqeto tseo mokhatlo oa hae o li etsang leha re sa li utloisise kapa re sa lumellane le tsona. Le hoja batho ba lefatše ba sa etse lintho joalo, ke eona tsela eo lintho li etsoang ka eona ka har’a mokhatlo oa Jehova.—Baef. 5:22, 23; 6:1-3; Baheb. 13:17. w17.06 30 ¶14-15

Bakreste-’moho le rona bohle ba nang le mathata ba hloka hore re ba thuse ’me re ba khothatse. (Liprov. 12:25; Bakol. 4:11) Ha re etsa joalo, rea bontša hore re hlile re rata Bakreste-’moho le rona ’me re tsotella “ba amanang le rōna tumelong.” (Bagal. 6:10) Bibele e ile ea bolela esale pele hore batho ba “matsatsing a ho qetela” e tla ba baithati. (2 Tim. 3:1, 2) Re lokela ho matlafatsa kamano ea rona le Jehova, re rate Lentsoe la hae le Bakreste-’moho le rona. Kaha ha rea phethahala, ka linako tse ling re ka ’na ra ba le liqabang le balumeli-’moho le rona. Empa kaha kaofela rea ratana, re leka ka hohle hore re lokise litaba ka lerato. (Baef. 4:32; Bakol. 3:14) Kahoo, re tsoele pele ho rata Jehova, Lentsoe la hae le Bakreste-’moho le rona. w17.05 21 ¶17-18

Rea tseba hore re tla tšoaroa ka ho hloka toka kapa leeme ke batho bao e seng Lipaki. Leha ho le joalo, tumelo ea rona e ka lekoa ha re hlokomela ho hloka toka ka phuthehong kapa re tšoaroa ka ho hloka toka ka phuthehong. U tla etsa’ng ha u bona eka u tšoeroe ka leeme ka phuthehong kapa u tšoeroe ka leeme ke Mokreste-’moho le uena? Na u tla itumella hore u khopehe? Kaha kaofela ha rea phethahala, ho ka ba bonolo hore re tšoare Bakreste-’moho le rona ka leeme kapa bona ba re tšoare ka leeme. Le hoja seo se sa etsahale hangata, Bakreste ba ’nete ha ba makale kapa hona ho khopeha ha seo se etsahala. Ka mabaka a utloahalang, Jehova o fane ka likeletso tse hlakileng ka Lentsoeng la hae e le ho re thusa ho lula re tšepahala leha balumeli-’moho le rona ba re tšoara ka leeme.—Pes. 55:12-14. w17.04 19 ¶4-5

Haeba molekane e mong a sa sebeletse Jehova, hangata lenyalo le ba le mathata le matšoenyeho a mangata ho feta ha ka bobeli e le Bakreste. Leha ho le joalo, taba ea hore ebe molekane oa hao ha se mohlanka oa Jehova ha se lebaka le utloahalang la hore u arohane le eena kapa u mo hlale. (1 Bakor. 7:12-16) Le hoja monna oa hao a sa etelle pele tabeng ea ho ruta lelapa ka Jehova, u lokela ho lula u mo hlompha ka lebaka la boemo boo Jehova a mo fileng bona e le hlooho ea lelapa. Ka ho tšoanang, le monna eo mosali oa hae e seng morapeli oa Jehova, o ntse a tlameha ho hlokomela le ho rata mosali oa hae. (Baef. 5:22, 23, 28, 29) U lokela ho etsa’ng haeba molekane oa hao a u behela meeli? Mohlala, morali’abo rona e mong o ile a bolelloa ke molekane oa hae eo e seng Paki hore o lokela ho ea tšimong ka matsatsi a itseng feela. Haeba u kopana le boemo bo tšoanang le boo, ipotse: ‘Na molekane oa ka ha a batle ha ke sebeletsa Jehova? Haeba ha ho joalo, na nka ikokobelletsa kopo ea hae?’ Ho etsa joalo ho ka u thusa ho qoba tse ling tsa likhohlano tsa lelapa tse ka hlahang.—Bafil. 4:5. w17.10 13 ¶7-8

Joalokaha ho profetiloe, batho “ba tsoang lipuong tsohle tsa lichaba” ba phallela ka hare ho mokhatlo oa Jehova. (Zak. 8:23) Empa ho ka ba thata ho ruta bana ’nete ha le bua lipuo tse fapaneng. Ho thusa bana ba hao hore ba ‘tsoele pele ba rua tsebo’ ka Jehova ke ntho ea bohlokoa ka ho fetisisa hobane ha ba tseba Jehova ba tla fumana bophelo bo sa feleng. (Joh. 17:3.) Kahoo, e le hore bana ba hao ba tsebe Jehova, u lokela ho buisana le bona ka eena ka linako tsohle. (Deut. 6:6, 7) Ha bana ba le sekolong kapa hae, ho bonolo hore ba ithute puo e buuoang naheng eo le falleletseng ho eona. Empa ba ka ithuta puo ea hao haeba ba bua le uena ka eona khafetsa. Ha bana ba tseba puo ea hao, ba ka khona ho ntša maikutlo a bona ka tsela eo u tla e utloisisa. Ho feta moo, ha ba tseba lipuo tse peli ba ka khona ho nahana kapele ’me ba nolofalloa ho utloisisa maikutlo a batho ba bang ba buang puo ea naheng eo le lulang ho eona. w17.05 9 ¶5-6

Baiseraele ba ne ba se na lihlomo le libetsa tse lekaneng, ha lira tsa bona tsona li e-na le likoloi tsa ntoa tse 900 tse nang le mahare a tšepe. (Baahl. 4:1-3, 13; 5:6-8) Leha ho le joalo, Jehova o ile a fa Barake taelo e hlahang temaneng ea rona ea kajeno. Barake o ile a latela litaelo tsa Jehova hang-hang. (Baahl. 4:14-16) Ha ba le Tanake moo ntoa e neng e ntse e kupa, ka tšohanyetso ho ile ha na pula ea litloebelele ’me sebaka seo sa fetoha qhafu-qhafu ea seretse. Barake o ile a lelekisa lebotho la Sisera ho ea fihla Haroshethe, e leng sebaka se bohole ba lik’hilomithara tse 24. Ha ba ntse ba baleha, Sisera o ile a siea lebotho la hae le ferekaneng ’me a balehela motseng oa Zananime, oo mohlomong o neng o le pel’a Kedeshe. O ile a balehela tenteng ea Jaele mosali oa Hebere oa Mokene ’me Jaele a mo amohela. Sisera o ile a khaleha kaha o ne a khathetse. Jaele o ile a ba sebete ’me a mo bolaea a sa ntse a robetse joalo. (Baahl. 4:17-21) Kahoo Baiseraele ba ile ba hlola lira tsa bona. w17.04 29-30 ¶6-8

Ka mor’a Armagedone, na ho tla ba le mokhatlo lefatšeng? Bibele e re: “Ho na le maholimo a macha le lefatše le lecha tseo re li letetseng ho ea ka tšepiso ea hae, ’me ho loka ho tla aha ho tsona.” (2 Pet. 3:13) Leholimo le lefatše la khale e leng mebuso e tletseng bobolu le mekhatlo e laoloang ke eona li tla felisoa. Mebuso le mekhatlo eo e tla nkeloa sebaka ke’ng? Mantsoe a reng “maholimo a macha le lefatše le lecha” a bolela hore ho tla ba le ’muso o mocha le bafo ba bacha ba tla busoa ke ’muso oo. Pusong ea Jesu ho tla etsoa lintho tse thabisang Jehova, eo e leng Molimo oa tlhophiso. (1 Bakor. 14:33) Kahoo ‘lefatšeng le lecha’ ho tla ba le tlhophiso. Ho tla ba le banna ba lokileng ba tla hlokomela lintho. (Pes. 45:16) Ba tla etelloa pele ke Kreste le babusi-’moho le eena ba 144 000. U ka inahanela feela hore na ho tla ba joang ha mekhatlo ena e tletseng bobolu e se e nketsoe sebaka ke mokhatlo o le mong, o momahaneng le o ke keng oa ba le bobolu. w17.04 11 ¶8-9

Lenyalo lea halalela. Banyalani ba ikana ka pel’a Molimo le lipaki tse ngata. Ba tšepisana hore ba tla ratana, ba tšehetsane le ho hlomphana ‘hafeela bobeli ba bona ba ntse ba phela hammoho lefatšeng ho ea ka tokisetso ea Molimo ea lenyalo.’ Le hoja ba bang ba sa bua mantsoe ana ka ho toba, ba ntse ba ikanne ka pel’a Molimo. Ho phatlalatsoa hore e se e le monna le mosali ’me lenyalo la bona e lokela ho ba la ka ho sa feleng. (1 Bakor. 7:39) Jesu o ile a re: “Ka hona seo Molimo a se kopantseng hammoho ho se ke ha e-ba le motho ea se arolang.” Motho leha e le ofe ho akarelletsa le banyalani ka bobona ha baa lokela ho qhala lenyalo la bona. Kahoo ba kenang lenyalong, ha baa lokela ho nahana hore ho hlalana ke tharollo ha mathata a e-ba teng. (Mar. 10:9) Ke ’nete hore ha ho na lenyalo le se nang mathata, hobane banyalani ka bobona ha baa phethahala. Ke kahoo Bibele e reng ka linako tse ling banyalani “ba tla ba le matšoenyeho.”​—1 Bakor. 7:28. w17.04 7 ¶14-15