June

Anna o ile a tlameha ho sebetsana le mathata a boima haholo. O ne a e-na le bothata ba hore ebe ha a khone ho ba le bana ka lilemo tse ngata. (1 Sam. 1:2) Ho Baiseraele, mosali eo e neng e le nyopa o ne a nkoa a rohakiloe. Ntho ena e ne e hlabisa Anna lihlong haholo. (Gen. 30:​1, 2) Anna o ile a sulafalloa ke bophelo le ho feta ha monna oa hae a nyala mosali e mong ea bitsoang Penina, ea neng a khona ho ba le bana ’me o ne a mo utloisa bohloko ka taba eno. Qalong, lintho tsena li ne li utloisa Anna bohloko haholo. O ne a utloile bohloko “hoo a neng a lla ’me a sa je.” Ruri “moea oa hae o ne o utloile bohloko.” (1 Sam. 1:​7, 10) Mosali eo oa batho o ile a tšelisoa ke’ng? Anna o ile a rapela Jehova eaba o mo hlalosetsa hore pelo ea hae e lutla mali. Ka mor’a hore a bue le Jehova, o ile a bolella Moprista ea Phahameng Eli mathata a hae. Eli o ile a re: “Tsamaea ka khotso, ’me e se eka Molimo oa Iseraele a ka phethahatsa kopo ea hao.” Phello e ile ea e-ba efe? Anna o ile “a tsamaea ’me a ja, ’me sefahleho sa hae ha sea ka sa hlola se tšoenyeha.” (1 Sam. 1:​17, 18) Thapelo e ile ea thusa Anna hore a lule a e-na le khotso. w20.02 21 ¶4-5

Haufinyane Jehova o tla felisa batho ba khopo. Ke batho ba nang “le tšekamelo e nepahetseng bakeng sa bophelo bo sa feleng” feela ba tla pholoha. (Lik. 13:​48) Ke ho utloahalang hore re ka thabela ho pakela beng ka rona e le hore le bona ba sebeletse Jehova. Ntate oa rona ea lerato Jehova, “ha a lakatse hore leha e le mang a timetsoe empa o lakatsa hore bohle ba fihle pakong.” (2 Pet. 3:9) Re lokela ho lula re hopola hore ho na le tsela e nepahetseng le e fosahetseng ea ho phatlalatsa molaetsa ona o pholosang bophelo. Mohlala, re ka ’na ra bua ka tsela e mosa ha re pakela motho eo re sa mo tsebeng empa eare ha re pakela beng ka rona, ra bua ka tsela e sa ba nahaneleng. Ha re nahana ka tsela eo re ileng ra pakela beng ka rona ka eona ka lekhetlo la pele, boholo ba rona re ka ’na ra itšola ra utloa eka re ka ba le monyetla oa ho leka hape. E ka ba hantle hore re hopole keletso ena ea moapostola Pauluse e hlahang temaneng ea letsatsi ea kajeno ha re pakela beng ka rona. Ho seng joalo, re ka ’na ra ba halefisa ho e-na le ho ba thusa. w19.08 14-15 ¶3-5

U ile oa ikutloa joang ha u ithuta lithuto tse latelang ka Mora? Jesu ke eena motho oa bobeli oa bohlokoa ka ho fetisisa bokahohleng. O ile a fana ka bophelo ba hae e le thekollo. Haeba re bontša ka liketso hore re lumela thekollong, re ka tšoareloa libe tsa rona, ra haha setsoalle le Molimo ra ba ra fumana bophelo bo sa feleng. (Joh. 3:​16) Jesu ke Moprista oa rona Ea Phahameng. O batla ho re thusa hore re rue molemo thekollong hape o boetse o batla hore re be metsoalle ea Molimo. (Baheb. 4:​15; 7:​24, 25) Joaloka Morena oa ’Muso oa Molimo, Jehova o tla mo sebelisa hore a halaletse lebitso la Hae, a tlose bokhopo ebe o tlisetsa batho litlhohonolofatso tsa ka ho sa feleng lefatšeng la Paradeise. (Mat. 6:​9, 10; Tšen. 11:​15) Jesu ke mohlala o re lokelang ho o latela. O ile a re behela mohlala ka hore bophelo bohle ba hae a etse thato ea Jehova. (Joh. 4:​34) Ha u lumela lithuto tsa Bibele tse buang ka Jesu, u tla khona ho mo rata. Lerato leo le tla u susumelletsa hore u etse thato ea Jehova joalokaha Jesu a ile a etsa. w20.03 10 ¶12-13

Jesu o ile a rapela khafetsa letsatsing la ho qetela a le lefatšeng. Nakong eo a neng a bontša barutuoa ba hae hore na ba ka ikhopotsa lefu la hae joang, o ile a rapella bohobe le veine. (1 Bakor. 11:​23-25) O ile a rapela le barutuoa ba hae pele ba tloha sebakeng seo ba neng ba tšoaretse Paseka ho sona. (Joh. 17:​1-26) Ha Jesu le barutuoa ba hae ba fihla Thabeng ea Mehloaare, o ile a boela a rapela ka makhetlo-khetlo. (Mat. 26:​36-39, 42, 44) Le motsotsong oa qetela ha a tla shoa, o ile a etsa thapelo. (Luka 23:​46) Jesu o ile a bolella Ntate oa hae ntho e ’ngoe le e ’ngoe e neng e etsahala letsatsing la ho qetela a le lefatšeng. Ntho e ’ngoe e ileng ea thusa Jesu hore a mamelle ke hore o ne a lula a rapela Jehova. Baapostola ba hae bona ba ile ba hloleha ho lula ba rapela bosiung boo. Ka lebaka leo, ha baa ka ba khona ho ba sebete nakong eo tumelo ea bona e neng e lekoa. (Mat. 26:​40, 41, 43, 45, 56) Re tla khona ho mamella mathata ao re kopanang le ’ona hafeela re etsisa Jesu ka hore re ‘rapele re sa khaotse.’ w19.04 9 ¶4-5

Jehova o hloile tšebelisano le meea. Jehova o ile a re ho Baiseraele: “Ho lona ha hoa lokela hore ho fumanoe leha e le mang ea fetisang mora oa hae kapa morali oa hae mollong, leha e le mang ea sebelisang bonohe, ea sebelisang boselamose kapa leha e le mang ea batlang lipontšo tsa se tlang kapa moloi, kapa ea betsang ba bang ka mantsoe a boloi kapa leha e le mang ea batlang keletso ho ea buisanang le meea kapa setsebi se bolelang liketsahalo esale pele kapa leha e le mang ea botsang bafu. Etsoe e mong le e mong ea etsang lintho tsena ke ntho e manyala ho Jehova.” (Deut. 18:​10-12) Bakreste ha ba tlas’a Molao oo Jehova a ileng a o fa Baiseraele. Empa rea tseba hore le hona joale o ntse a hloile ho sebelisana le meea. Jehova o re hlaba malotsana mabapi le ho sebelisana le meea hobane oa tseba hore Satane o ho sebelisa ho utloisa batho bohloko. Satane o sebelisa tloaelo ea ho sebelisana le meea e le ho tsoellisa pele mashano a hae a kang a hore batho ba hlokahetseng ba ntse ba phela kae-kae. (Moek. 9:5) O boetse o ho sebelisa ho tšosa batho e le hore ba ka hlanohela Jehova. Sepheo sa hae ke hore batho ba sebelisanang le meea ba tšepe meea e khopo ho e-na le ho tšepa Jehova. w19.04 21 ¶5-6

Ho hlekefetsa bana ka motabo ke sebe se tebileng. Motho ea hlekefetsang ngoana o mo utloisa bohloko bo ke keng ba lekanngoa. O etsa hore ngoana a se ke a mo tšepa le hore a se ke a hlola a ikutloa a sireletsehile. Re lokela ho sireletsa bana ho batho ba joalo ba khopo, ’me re khothatse le ho thusa ba kileng ba hlekefetsoa. (1 Bathes. 5:​14) Ha motho e mong ka phuthehong a qosoa ka ho hlekefetsa bana ka motabo, o senya phutheho lebitso. (Mat. 5:​16; 1 Pet. 2:​12) Ha re lumelle batho ba etsang lintho tse mpe ba bile ba sa bake le ba senyang phutheho lebitso hore ba lule ba le ka phuthehong. Haeba motho e mong ka phuthehong a tlola melao ea naha, joaloka oa ho hlekefetsa bana ka motabo, ha e le hantle o bontša hore ha o hlomphe ba boholong pusong. (Bapisa le Liketso 25:8.) Le hoja baholo ba se na boikarabelo ba ho ahlola mang kapa mang ea tlotseng melao ea naha, ha ba sireletse batho ba hlekefelitseng bana ka motabo hore ba fuoe kahlolo e ba loketseng. w19.05 9 ¶4-7

Re ka fumana tharollo ea mathata ’ohle a rona hobane Jehova ke Morupeli oa rona e Moholo. (Esa. 30:​20, 21) Lentsoe la hae le re fa ntho e ’ngoe le e ’ngoe eo re e hlokang e le hore re “ka tšoaneleha ka botlalo” le ho “hlomelloa ka ho feletseng bakeng sa mosebetsi o mong le o mong o molemo.” (2 Tim. 3:​17) Ha re phela ho latela melao-motheo ea Bibele, re tla ba bohlale ho feta batho ba reng re phele ho latela “bohlale ba lefatše lena.” (Pes. 119:​97-100) Ka bomalimabe, bohlale ba lefatše lena bo re khothalletsa hore re phelele ho ikhotsofatsa feela. Kahoo, ho ka ba thata hore re se ke ra nahana le ho etsisa batho bao e leng karolo ea lefatše lena. Ke ka hona Bibele e reng: “Hlokomelang: mohlomong ho ka ba le e mong ea tla le nka joaloka phofu ea hae ka filosofi le thetso ea lefeela ho ea ka neano ea batho.” (Bakol. 2:8) Joalokaha Bibele e ile ea bolela esale pele, batho ba mehleng ea bofelo e ne e tla ba “ba ratang menyaka.” (2 Tim. 3:4) Ho ata ha mafu a tšoaetsanoang ka thobalano a kang AIDS ke le leng la matšoao a bontšang hore bohlale ba lefatše lena ke booatla.​—2 Pet. 2:​19. w19.05 21 ¶1-2; 22 ¶4-5

Satane o ile a thetsa Baiseraele ka hore ba lokela ho etsisa litloaelo tsa lichaba tse ling e le hore ba atlehe. Lichaba tseo tse ba potolohileng li ne li lumela hore li lokela ho etsa meetlo e itseng e le hore melimo ea tsona e ka nesa pula. Baiseraele ba neng ba sa tšepe Jehova ka ho feletseng ba ne ba lumela hore tsela feela ea hore ba qobe komello ea nako e telele, ke ka hore ba etse meetlo eo ea Baale. Satane o ile a boela a lemoha tšekamelo ea bona ea boitšoaro bo bobe ’me a ba leka ka eona. Batho ba lichaba tseo ba ne ba rapela melimo ea bona ka ho etsa boitšoaro bo bobe. Boitšoaro boo bo bobe bo ne bo akareletsa botekatse ba banna le ba basali. Ba ne ba boetse ba lumella bosodoma le mekhoa e meng e litšila ea thobalano! (Deut. 23:​17, 18; 1 Mar. 14:​24) Ba ne ba lumela hore meetlo eo e susumetsa melimo ea bona hore e matlafatse mobu bakeng sa lijalo. Baiseraele ba bangata ba ile ba rata meetlo ena e litšila ea balichaba, eaba ba khetha ho rapela melimo eo. w19.06 2 ¶3; 4 ¶7-8

Bara le barali babo rona ba likete ba neng ba le Bethele le libakeng tse ling, ba ile ba fumana likabelo tse ncha. Bara le barali babo rona bana ba ka ’na ba utloa bohloko haholo ha ba lokela ho tloha likabelong tseo ba neng ba li rata. Haeba u e mong oa bona, u ka thusoa ke’ng hore u amohele liphetoho tsee? U lokela ho bala Bibele letsatsi le letsatsi hape u nahane ka botebo ka seo u se balileng, ho etsa joalo ho tla u thusa hore u lule u rata Jehova. Hape, ikakhele ka setotsoana mosebetsing oa boboleli phuthehong eo u seng u le ho eona. Jehova o lula a hopola batho bohle ba mo sebelelitseng ka botšepehi, esita le ha ba se ba se na matla joaloka pele. U se ke oa rarahanya bophelo ba hao. U se ke oa lumella mathata a lefatše lena la Satane hore a ‘bipetse’ tšebeletso eo u e etsetsang Jehova. (Mat. 13:​22) U se ke oa mamela batho ba sa sebeletseng Jehova kapa metsoalle le beng ka uena ba lekang ho u thusa ka hore ba u khothalletse ho batla mosebetsi o lefang chelete e ngata, e le hore u phele hamonate. (1 Joh 2:​15-17) Tšepa Jehova, kaha o tšepisa hore o tla re thusa ho lula re e-na le tumelo e matla, re khobile matšoafo, re bile re e-na le lintho tseo re li hlokang bophelong, “ka nako [ea hae] e nepahetseng.”​—Baheb. 4:​16; 13:​5, 6. w19.08 20 ¶4; 21-22 ¶7-8

Na u na le mathata a u tšoenyang? Hoa khothatsa ho tseba hore Jehova oa utloisisa hore na le rona re ikutloa joang. O tseba moo matla a rona a fellang teng le hore na re ikutloa joang. (Pes. 103:​14; 139:​3, 4) Ha re itšetleha ka Jehova, re tla fumana thuso e le hore re hlole mathata a re tšoenyang. Ho tšoenyeha ho ka etsa hore u nke hore mathata a hao a ke ke a ea moriting, ebe oa nyahama. Haeba seo se etsahala, u hopole hore Jehova ke eena ea ka u thusang. A ka u thusa joang? O u khothaletsa hore u mo bolelle lintho tse u tšoenyang le hore na u ikutloa joang. Hape, o tla u araba ha u kopa thuso. (Pes. 5:3; 1 Pet. 5:7) Kahoo, bolella Jehova mathata a hao kamehla. A ke ke a u araba ka ho toba, empa o tla bua le uena a sebelisa Lentsoe la hae Bibele le mokhatlo oa hae. Litlaleho tseo u li balang ka Bibeleng li ka u khothatsa tsa ba tsa etsa hore u be le tšepo. Ntle ho moo, bara le barali beno le bona ba ka u khothatsa.​—Bar. 15:4; Baheb. 10:​24, 25. w19.06 16 ¶7-8

Ha u hlorisoa, bua le Jehova, u ‘tšollele pelo ea hao joaloka metsi’ ho eena ’me u mo bolelle lintho tsohle tse u tšosang le tse etsang hore u tšoenyehe. (Lillo 2:​19) Ha u lula u rapela Jehova, kamano ea hao le eena e tla matlafala. (Bar. 8:​38, 39) Kholiseha hore litšepiso tsohle tsa ’Muso oa Molimo li tla phethahala. (Num. 23:​19) Haeba ha oa kholiseha hantle hore Molimo o tla phethahatsa litšepiso tsohle tsa hae, ho tla ba bonolo hore Satane le mahlahana a hae ba u tšose. (Liprov. 24:​10; Baheb. 2:​15) Iphe nako ea ho etsa lipatlisiso ka litšepiso tsohle tseo Molimo a re tšepisang tsona ka ’Muso oa hae, u be u ikholise hore li tla fela li phethahale. Ho etsa joalo ho tla u thusa joang? Nahana ka mohlala oa Mor’abo rona Stanley Jones ea ileng a koalloa teronkong lilemo tse supileng ka lebaka la ho ba Paki. O ile a thusoa ke’ng hore a mamelle? O re: “Tumelo ea ka e ne e le matla hobane ke ne ke tseba ka ’Muso oa Molimo le ka lintho tseo o tl’o re etsetsa tsona ’me ha ho mohla ke ileng ka belaella lintho tseo. Ka lebaka leo, ha ho motho ea ileng a khona ho etsa hore ke se ke ka sebeletsa Jehova.” Haeba u kholisehile hore Molimo o tla phethahatsa litšepiso tsohle tsa hae, u ke ke oa tšaba ho mo sebeletsa.​—Liprov. 3:​25, 26. w19.07 2 ¶1; 3 ¶6-7

Ke hobane’ng ha mosebetsi oa ho etsa batho barutuoa e le oa bohlokoa hakaale? Hobane ke balateli ba Kreste feela bao e ka bang metsoalle ea Molimo. Ho phaella moo, balateli ba Kreste ba phela ka tsela e molemo hona joale, ba bile ba na le tšepo ea ho phela ka ho sa feleng nakong e tlang. (Joh. 14:6; 17:3) Ho hlakile hore Jesu o re file mosebetsi oa bohlokoa haholo, empa ha re o etse re le bang. Moapostola Pauluse o kile a re ka eena le bo-mphato oa hae: “Re basebetsi-’moho le Molimo.” (1 Bakor. 3:9) Jehova le Jesu Kreste ba re file tlotla e kholo hakaakang! Mosebetsi oa boboleli o ka boetse oa re thabisa haholo. Mohato oa pele oa ho etsa batho barutuoa ke oa ho batla batho ba lakatsang ho ithuta ka Jehova. Ha re pakela motho e mong le e mong eo re kopanang le eena, re bontša hore re Lipaki Tsa Jehova. Ha re mamela taelo ea Jesu ea hore re etse batho barutuoa, re bontša hore re Bakreste ba ’nete. w19.07 15 ¶3-5

Qalong, batho ba bangata ba thabela ho ithuta Bibele hobane ba khahliloe ke Mangolo a ba thusang hore na ba phele joang. Morali’abo rona e mong oa New York ea atisang ho etela batho ba buang Sechaena o re: “Ke leka ka hohle ho ba bontša hore kea ba thahasella hape ke ba mamela ka hloko. Ha ke hlokomela hore ba sa tsoa fihla koano, ke ee ke re: ‘Ho joang moo? Na u se u fumane mosebetsi? Baahisane ba hao ba u tšoere joang?’ ” Ka linako tse ling, moqoqo oo o mo thusa hore a bue le bona ka Bibele. Ha maemo a mo lumella, morali’abo rona o ee a re: “U nahana hore ke’ng e ka re thusang hore re phelisane hantle le batho ba bang? Na nka u bontša maele a mang a Bibele? A re: ‘Tšimoloho ea ho hloka kutloano e joaloka ea bulelang metsi; kahoo pele qabang e qhoma, u itsamaele.’ Na u nahana hore keletso ee e ka re thusa hore re phelisane hantle le batho ba bang?” (Liprov. 17:​14) Meqoqo ena e ka re thusa ho fumana batho ba batlang ho ithuta ka ho eketsehileng. w19.07 23 ¶13

Batho ba abetsoeng kabelong e ncha ba thabela ho bona hore re utloisisa boemo ba bona. E ka ’na eaba baa kula, kapa ho na le mong ka bona ea kulang. E ka ’na eaba ba ntse ba siame. Hape, le hoja ba sa bue, e ka ’na eaba ba ntse ba utloile bohloko hobane ba hopotse metsoalle ea bona eo ba e siileng morao. Ho nka nako pele bohloko boo bo ka fela. Haeba u tsamaea le bona tšimong ’me u ba khothatsa ka mohlala oa hao o motle, u ka ba thusa hore ba etse liphetoho. Morali’abo rona e mong ea sebelelitseng naheng e ’ngoe ka lilemo tse ngata o re: “Ha ke ne ke le kabelong ea ka, ke ne ke e-na le batho bao ke ithutang Bibele le bona letsatsi le leng le le leng. Kabelong e ncha, ho ne ho se ho le thata le hore ke balle motho temana e le ’ngoe feela, kapa ke mo shebellise video ha ke le tšimong. Empa bara le barali babo rona ba mona, ba ile ba nkopa hore ke tsamaee le bona ha ba ea maetong a ho boela le lithutong. Taba ena e ile ea etsa hore ke fetole maikutlo a ka ka tšimo ea mona. Ke ile ka ithuta litsela tse ncha tsa ho qala moqoqo. Lintho tsena kaofela li ile tsa nthusa hore ke boele ke thabe.” w19.08 22 ¶10; 24 ¶13-14

Joaloka Evodia le Syntike, le rona re ka thatafalloa ho rata bara le barali babo rona haeba re tloaetse ho shebana le liphoso tsa bona. Kaofela ha rona re etsa liphoso letsatsi le letsatsi. Ha re lula re shebane le liphoso tsa bona, re ka qetella re se re sa ba rate. Mohlala, re ka ’na ra koatela mor’abo rona haeba a lebetse hore o lokela ho hloekisa Holong. Ha re lula re nahana ka liphoso tseo a li entseng, re ka ’na ra qetella re mo hloile. Haeba ho na le motho eo u nang le bothata le eena phuthehong ea heno, e ka ba hantle hore u hopole taba ena: Jehova o tseba mefokolo ea rona ho akareletsa le ea Mokreste-’moho le uena. Leha ho le joalo, o re rata kaofela ha rona. Ka lebaka leo, re lokela ho etsisa Jehova ka hore re rate bara le barali babo rona re be re lule re nahana ka lintho tse ntle tseo ba li etsang. Ha re leka ka matla hore re rate Bakreste-’moho le rona, re tla momahana haholoanyane.​—Bafil. 2:​1, 2. w19.08 9-10 ¶7-8

Jehova o rata batho ba ikokobelitseng. Ke batho ba ikokobelitseng feela ba ka khonang ho ba le kamano e ntle le eena. Empa ba ‘iphahamisang o ba tsebella hole.’ Kaofela ha rona re batla ho thabisa Jehova e le hore a re rate, kahoo re na le mabaka a utloahalang a ho loanela ho ba batho ba ikokobelitseng. Motho ea ikokobelitseng ha a inke a phahametse batho ba bang hape ha a ikhohomose. Oa utloisisa hore Jehova ke eena ea phahameng ka ho fetisisa hape motho eo o utloisisa boemo ba batho ba bang. O boetse ka tsela e itseng oa lumela hore batho ba bang ba mo phahametse. (Bafil. 2:​3, 4.) Batho ba bang ba bonahala eka ba ikokobelitse empa ho se joalo. Ba ka ’na ba bonahala e le batho ba lihlong kapa ba thotseng. Hape ba bonahala eka ke batho ba hlomphang le ba nahanelang ka lebaka la setso sa bona le tsela eo ba holisitsoeng ka eona. Empa botebong ba lipelo tsa bona, ho ka etsahala hore ebe ke batho ba ikhohomosang. Ho e-s’o ee kae, ba tla u bontša hore na ke bo-mang.​—Luka 6:​45. w19.09 2 ¶1, 3-4

“Litaba tse molemo tse mabapi le Morena oa rona Jesu” li akareletsa lithuto tsa hae. Re mamela lithuto tsa Jesu ka hore re li sebelise bophelong ba rona. Re boetse re etsa hore mosebetsi oa Jehova o tle pele bophelong ba rona. Re ikobela melao ea hae hape re ruta batho ka ’Muso oa hae. (Mat. 6:​33; 24:​14) Hape re mamela lithuto tsa Jesu ka hore re tšehetse barab’abo ha ba ntse ba etsa mosebetsi oa bona oa bohlokoa. (Mat. 25:​31-40) Haufinyane, batlotsuoa ba tla leboha barab’abo bona ba “linku tse ling” ka hore ebe ba ile ba ba mosa ho bona. (Joh. 10:​16) Ba tla ba leboha joang? Pele ntoa ea Armagedone e qala, ba 144 000 ba tla be ba le leholimong e le bara ba Molimo ba fuoeng ’mele oa ho se shoe. Ka nako eo, e tla be e le karolo ea mabotho a leholimo a tla timetsa Gogo le ho sireletsa “bongata bo boholo” ba batho ba Jehova. (Tšen. 2:​26, 27; 7:​9, 10) Kannete bongata bo boholo bo tla thaba hore ebe bo ile ba tšehetsa batlotsuoa ba Jehova ha ba ntse ba le mona lefatšeng! w19.09 12-13 ¶16-18

Ke hobane’ng ha re khatholoha ha re etsa mosebetsi oo Jesu a re fileng oona? Hobane re na le benghali ba molemo ka ho fetisisa. Le hoja Jehova a phahametse lintho tsohle, ha se Monghali ea khopo le ea se nang teboho. O ananela mosebetsi oo re o etsang. (Baheb. 6:​10) Hape o re fa matla a ho phetha mosebetsi oo a re fileng oona. (2 Bakor. 4:7; Bagal. 6:5) Morena oa rona Jesu o re behetse mohlala oa kamoo re lokelang ho tšoara batho ba bang kateng. (Joh. 13:​15) Le baholo ba re etellang pele ba leka ho etsisa Jesu “molisa e moholo.” (Baheb. 13:​20; 1 Pet. 5:2) Ba ikitlaeletsa ho ba mosa, ho re khothatsa le ho ba sebete ha ba ntse ba re hlokomela le ho re sireletsa. Re boetse re na le metsoalle ea bohlokoa. Ha ho na batho ba nang le metsoalle e lerato le mosebetsi o khotsofatsang joaloka rona. Nahana feela, re sebetsa le bara le barali babo rona ba itšoereng hantle ebile ba sa inke ba phahametse batho ba bang. Ba nka batho ba bang ba ba phahametse. Ho bona ha re basebetsi-’moho feela empa hape re metsoalle. Lerato leo ba re ratang ka lona le matla hoo ba ikemiselitseng ho re shoela. w19.09 20 ¶1; 23 ¶12-14

Lengolong lena, Pauluse o bua ka “letsatsi la Jehova.” (1 Bathes. 5:​1-6) Poleloana e reng “letsatsi la Jehova” litemaneng tsena, e bua ka nako ea ha “Babylona e Moholo,” e leng bolumeli ba bohata, a hlaseloa ho fihlela ha Armagedone e fihla. (Tšen. 16: 14, 16; 17:5) Pauluse o boetse oa re bolella hore na re lokela ho etsa’ng e le hore “letsatsi la Jehova” le re fumane re le malala-a-laotsoe. O re ha re ea lokela ho “robala joalokaha ba bang kaofela ba tsoela pele ho robala.” Ho e-na le hoo, o re re lule “re falimehile,” re be hlokolosi hore re se ke ra itšunya-tšunya litabeng tsa lipolotiki. Ho seng joalo, re tla ba “karolo ea lefatše.” (Joh. 15:​19) Rea tseba hore ’Muso oa Molimo ke oona feela o tla tlisa khotso. Re boetse re batla ho thusa batho ba bang hore le bona ba falimehele lintho tseo Bibele e ileng ea re li tla etsahala mehleng ena. Hang ha matšoenyeho a maholo a qala, ho tla be ho se ho se na nako ea hore batho ba ithute ka Jehova. Ke kahoo ho leng bohlokoa hore re bolele litaba tse molemo ka matla hona joale. w19.10 8 ¶3; 9 ¶5-6

Ka mor’a hore ba qete ho ngola moqolo oo, Jeremia o ile a tlameha ho tšepa Baruke hore o tla bolella batho molaetsa oo. (Jer. 36:​5, 6) Ka sebete Baruke o ile a phetha mosebetsi oo o kotsi. Mohlomong Jeremia o ile a ikutloa a le motlotlo haholo ha Baruke a ea tempeleng ’me a balla batho moqolo oo. (Jer. 36:​8-10) Likhosana tsa Juda li ile tsa utloela ka seo Baruke a se entseng eaba li re a balle moqolo oo holimo moo li ntseng li utloa. (Jer. 36:​14, 15) Likhosana tseo li ile tsa etsa qeto ea ho bolella Morena Jojakime hore na Jeremia o itseng. Ha Morena Jojakime a utloa mantsoe ao a Jeremia o ile a halefa hoo a ileng a chesa moqolo oo eaba o fana ka taelo ea hore Jeremia le Baruke ba tšoaroe. Leha ho le joalo, Jeremia o ile a nka moqolo o mong eaba o o fa Baruke ’me a mo phetela hape mantsoe a Jehova. Baruke o ile a ngola mantsoe ’ohle “a neng a le moqolong oa pele, oo Jojakime morena oa Juda a o chesitseng.”​—Jer. 36:​26-28, 32. w19.11 3-4 ¶4-6

Jehova e ka ba eng kapa eng eo a batlang ho ba eona e le hore a phethahatse morero oa hae. Ka mohlala, ha re bua ka lintho tse seng kae feela, Jehova e ile ea e-ba Mosuoe, Motšelisi le Moevangeli. (Esa. 48:​17; 2 Bakor. 7:6; Bagal. 3:8) Ho ntse ho le joalo, hangata o sebelisa batho hore ba phethe merero ea hae. (Mat. 24:​14; 28:​19, 20; 2 Bakor. 1:​3, 4) Jehova a ka boetse a re fa bohlale le matla ao re a hlokang e le hore re etse eng kapa eng eo a e batlang ho phetha thato ea hae. Tsena ke tse ling tsa lintho tse hlalosang hore na lebitso la Jehova le bolela’ng ’me le litsebi tse ling tsa Bibele li cho joalo. Kaofela ha rona re batla hore Jehova a re sebelise e le hore a phethe merero ea hae empa ba bang ba ka ’na ba ikutloa eka Jehova ha a ba sebelise. Hobane’ng? Hobane ba utloa eka ba ke ke ba khona ho sebeletsa Jehova kamoo ba neng ba batla kateng ka lebaka la lilemo, maemo a bophelo kapa bokhoni ba bona. Ka lehlakoreng le leng, ba bang bona ba khotsofaletse mosebetsi oo ba o etsetsang Jehova ’me ha ba bone ho hlokahala hore ba etse ho fetang hoo. w19.10 20 ¶1-2

Haeba re rata maruo, tumelo ea rona e tla fokola hape re ke ke ra sebeletsa Jehova ka lipelo tsohle. Moapostola Pauluse o ile a re: “Ha ho monna ea sebeletsang e le lesole ea ikenyang likhoebong tsa bophelo, e le hore a ka fumana kamohelo ea ea mo ngolisitseng.” (2 Tim. 2:4) Ha e le hantle, masole a Roma a ne a sa lumelloa hore a be le mesebetsi e meng. Re batla ho tšoana le masole a lulang a itokisitse, ka hore re se ke ra lumella eng kapa eng ho re sitisa ho thabisa balaoli ba rona, e leng Jehova le Jesu. Ho amoheloa ke bona, ke ntho ea bohlokoa ho feta eng kapa eng eo re ka bang le eona lefatšeng lena la Satane. Re etsa bonnete ba hore re na le nako le matla ao re a hlokang ho sebeletsa Jehova le ho boloka thebe ea rona ea tumelo le lihlomo tse ling tsa rona tsa moea li le boemong bo botle. Leha ho le joalo, re lokela ho lula re itebetse. Hobane’ng? Moapostola Pauluse o ile a lemosa batho “ba ikemiselitseng ho rua” hore ba tla ‘khelosoa tumelong.’​—1 Tim. 6:​9, 10. w19.11 17 ¶12, 14-15

Mohoo oa “khotso le tšireletseho” o tla etsahala pele ho “letsatsi la Jehova.” (1 Bathes. 5:​1-6) Ho 1 Bathesalonika 5:​2, “letsatsi la Jehova” le emela ‘matšoenyeho a maholo.’ (Tšen. 7:​14) Re tl’o tseba joang ha matšoenyeho ao a le haufi le ho qala? Bibele e re ho tla ba le molaetsa o sa tloaelehang o tla phatlalatsoa. Molaetsa oo e tla ba letšoao la hore matšoenyeho a maholo a haufi le ho qala. E tla ba molaetsa oa ho phatlalatsa “khotso le tšireletseho” oo ho ileng ha buuoa ka oona esale pele. Na baeta-pele ba bolumeli le bona ba tla kenya letsoho? Mohlomong. Leha ho le joalo, molaetsa oo e tla be e le leshano le susumetsoang ke bademona. Leshano leo le tl’o ba kotsi hobane le tl’o fa batho maikutlo a fosahetseng a hore ba sireletsehile pele ba oeloa ke koluoa ea matšoenyeho ao batho ba e-s’o a bone haesale lefatše le thehoa. Kannete “timetso ea tšohanyetso e tla ba holim’a bona hang-hang feela joaloka bohloko ba mahlomola ho mosali oa moimana.” Joale, ho tla etsahala’ng ka bahlanka ba tšepahalang ba Jehova? Ba ka ’na ba tšoha ha letsatsi la Jehova le qala empa ba tla be ba le lebeletse. w19.09 9 ¶7-8

Ha u etsa liqeto, tseba hore na u batla ho etsa’ng. Ha u tseba hantle ho re na ke lintho life tseo u batlang ho li etsa, u tla nolofalloa ke hore u li phethe. Ka mohlala, e ka ’na eaba u entse qeto ea ho bala Bibele hangata kamoo u ka khonang. Haeba u se na nako eo u ipehetseng eona ea ho bala Bibele, u ka ’na oa se ke oa atleha. Kapa baholo ba ka ’na ba etsa qeto ea ho etsa maeto a bolisa khafetsa empa ebe ka mor’a nako ho ntse ho e-s’o be le phetoho. E le hore ba atlehe, ba ka ipotsa lipotso tse kang: “Na ho na le bara le barali babo rona ba ka ruang molemo maetong a bolisa? Na re beheletse nako ea ho ba etela ka thoko?” Leka-lekanyetsa lintho. Ha re na nako, lintho kapa matla a ho etsa ntho e ’ngoe le e ’ngoe eo re batlang ho e etsa. Kahoo, u lokela ho leka-lekanya lintho. Haeba ho khoneha, u ka ’na oa fetola qeto eo u e entseng haeba u bona hore u ke ke oa khona ho e phetha. w19.11 29 ¶11-12

Boprofeta bo hlalosang hore na ho tla ba joang lefatšeng nakong e tlang bo hlaha ho Esaia 65:​21-23. Ka nako eo, re ke ke ra ba batho ba lutseng feela ba sa etse letho. Ho e-na le hoo, Bibele e bontša hore re tla etsa mesebetsi e khotsofatsang. Qetellong ea Lilemo Tse Sekete, re ka kholiseha hore “popo le eona e tla lokolloa bokhobeng ba ho bola ’me e be le tokoloho e khanyang ea bana ba Molimo.” (Bar. 8:​21) Joalokaha Jehova a ile a etsa bonnete ba hore Baiseraele ba ba le nako ea ho sebetsa le ho phomola, o tla etsa ntho e tšoanang ho batho ba hae nakong ea Puso ea Kreste ea Lilemo Tse Sekete. Ho hlakile hore ho tla ba le nako ea hore batho ba sebeletse Jehova. Ho sebeletsa Jehova ke ntho ea bohlokoa haholo e le hore re thabe mehleng ena ’me le lefatšeng le lecha re tla ba le nako eo. Kannete kaofela ha rona re tla thaba nakong ea Lilemo Tse Sekete hobane re tla be re e-na le mesebetsi e khotsofatsang hape re tla be re sebeletsa Jehova. w19.12 12 ¶15; 13 ¶17-18

“Ho pheta-pheta” ho akareletsa ho “ruta le ho hopotsa ka makhetlo-khetlo.” E le hore batsoali ba tle ba atlehe ho etsa joalo, ba lokela ho qeta nako e ngata le bana ba bona. Ka linako tse ling, batsoali ba ka ’na ba nyahama hobane ba lokela ho pheta-pheta litaelo tse tšoanang ho bana ba bona. Empa batsoali ba lokela ho nka taba ena e le monyetla oa ho ruta bana ba bona hore ba utloisise Lentsoe la Molimo le hore ba le phethe. Kahoo, tseba bana ba hao hantle. Pesaleme ea 127 e tšoantša bana le metsu. (Pes. 127:4) Joalokaha metsu e etsoa ka lintho tse sa tšoaneng e bile e fapana ka boholo, le bana ha ba tšoane. Kahoo, batsoali ba lokela ho tseba hore na ba koetlisa ngoana ka mong joang. Banyalani ba lulang naheng ea Iseraele ba ileng ba atleha ho holisa bana ba bona ba babeli hore ba sebeletse Jehova, baa re bolella hore na ba ile ba thusoa ke’ng. Ba re: “Re ne re ruta ngoana a le mong Bibele ka nako.” Ke ’nete hore hlooho ea lelapa ke eona e lokelang ho etsa qeto ea hore na ho ithuta le bana ka tsela ena ho molemo le hore na hoa khoneha. w19.12 26-27 ¶18-20

Ha re e-na le mathata, re ananela batho ba re thusang ka lintho tseo re li hlokang. Mor’abo rona Ryan eo ntate oa hae a ileng a hlokahalla kotsing e sehlooho ea tšohanyetso o re: “Ha re e-na le mathata ha ho bonolo hore re etse lintho tseo re neng re tloaetse ho li etsa letsatsi le letsatsi. Ho tšelisa haholo ha motho a ka u thusa ka ntho e ’ngoe e itseng le hoja ho ka bonahala eka ntho eo ke ntho e nyenyane.” Kamehla lula u hopola hore le ha u etsetsa batho lintho tse nyenyane feela, li ka ba tšelisa haholo. Morutuoa Mareka ea phetseng mehleng ea Jesu o ne a lula a phathahane. Leha ho le joalo, Mareka o ile a ipha nako e le hore a tšelise moapostola Pauluse ’me le Pauluse o ne a ikutloa a lokolohile hore a kope thuso ho Mareka. Morali’abo rona Angela ea ileng a utloa bohloko haholo ha mong ka eena a bolaoa o ile a ananela haholo hore ebe ho ile ha e-ba le batho ba neng ba mo tšelisa. O re: “Ha u bona hore ehlile batho ba batla ho u thusa ho ba bonolo hore u buisane le bona. Kannete oa hlokomela hore ba batla ho u thusa ebile ha ba tšabe ho u thusa ka eng kapa eng.” Re ka ’na ra ipotsa, ‘Na ke tsebahala ke le motho ea ikemiselitseng ho tšelisa Bakreste-’moho le ’na ka lintho tseo ba li hlokang?’ w20.01 11-12 ¶14-16

Motlotsuoa a ka ja litšoantšetso ka ho sa “tšoaneleheng” joang? A ka etsa joalo haeba a ja litšoantšetso empa a sa mamele melao ea Jehova. (Baheb. 6:​4-6; 10:​26-29) Batlotsuoa baa tseba hore ba tlameha ho lula ba tšepahala e le hore ba fumane “moputso oa pitso ea holimo ea Molimo ka Kreste Jesu.” (Bafil. 3:​13-16) Moea o halalelang o thusa bahlanka ba Jehova hore ba ikokobetse e seng hore ba ikhohomose. (Baef. 4:​1-3; Bakol. 3:​10, 12) Kahoo, batlotsuoa ha ba inke ba phahametse batho ba bang. Baa tseba hore Jehova ha a ba fe moea o halalelang ho feta bahlanka ba bang ba hae. Ha ba nke hore ba utloisisa Bibele ho feta batho ba bang kaofela. Hape ba ke ke ba bolella motho e mong hore le eena o tlotsitsoe ’me o lokela ho ja litšoantšetso. Ho e-na le hoo, ka boikokobetso ba lumela hore ke Jehova feela ea ka memelang batho ho ea phela leholimong. w20.01 27-28 ¶4-5

Jehova o batla hore re atamele haufi le eena le hore re buisane le eena. O re khothaletsa hore re ‘phehelle thapelong’ hape oa re mamela kamehla ha re bua le eena. (Rom. 12:​12) Ha ho le ka mohla a khathalang kapa a phathahanang hoo a ke keng a re mamela. Rona re mo mamela ka hore re bale Lentsoe la hae e leng Bibele le ka ho bala lingoliloeng tse re thusang ho le utloisisa. Re boetse re mo mamela ka hore re mamele ka hloko ha re le libokeng. Ha re buisana le Jehova kamehla ho ba bonolo hore re atamele haufi le eena. Jehova o batla hore ha re mo rapela, re mo bolelle hore na re ikutloa joang le hore na re nahana’ng. (Pes. 62:8) Re lokela ho ipotsa potso ena: ‘Na ha ke etsa thapelo ho tšoana leha eka ke bua ntho e ngotsoeng fatše kapa ho tšoana le ha ke ngolla motsoalle oa ka lengolo ke mo hlalosetsa hore na ke ikutloa joang?’ Re kholisehile hore u rata Jehova haholo le hore hape u batla hore e be motsoalle oa hao oa hlooho ea khomo. E le hore u atlehe ho etsa joalo, u lokela ho buisana le eena letsatsi le letsatsi. Mo bolelle makunutu a hao. Mo bolelle lintho tse u thabisang le tse u utloisang bohloko. U se ke oa tšaba ho kopa thuso ho eena. w20.02 9 ¶4-5

Jehova o file baholo boikarabelo ba hore ba hlokomele bahlanka ba hae. Baholo ba ka ithuta lintho tse ngata ka ho sheba tsela eo Nehemia a neng a tšoara batho ba Molimo ka eona. Joalokaha e ne e le ’musisi oa Juda, Nehemia o ne a e-na le boikarabelo bo bongata. (Neh. 1:​11; 2:​7, 8; 5:​14) Nahana ka tse ling tsa liqholotso tseo a ileng a kopana le tsona. O ile a fumana hore Bajuda ba silafatsa tempele ea Molimo le hore ba ne ba sa ntše monehelo bakeng sa Balevi joalokaha Molao o ne o re ba etse. Bajuda ba ne ba sa boloke molao oa Sabatha ebile ba nyala basali ba balichaba ba neng ba sa rapele Jehova. ’Musisi Nehemia o ile a tlameha ho sebetsana le bothata bona. (Neh. 13:​4-30) Nehemia ha a ka a lumella hore matla a mo mathele hloohong ka hore a qobelle batho hore ba latele maikutlo a hae. Empa o ile a rapella tataiso ea Jehova ka tieo eaba o ruta batho molao oa Jehova. (Neh. 1:​4-10; 13:​1-3) Nehemia o ile a bontša hore o ikokobelitse a ba a sebetsa le bona ho haha marako a Jerusalema.​—Neh. 4:​15 w19.09 16 ¶9-10