48 SETEFANE
O ne “a E-na le Tumelo e Matla a Bile a Tletse Moea o Halalelang”
BOPHELO ba Setefane bo ne bo le kotsing. O ne a qosoa ka ho tlola molao ’me o ne a lokela ho ipuella lekhotleng le phahameng la Bajuda, le bitsoang Sanhedrine. Lekhotla leo ke lona le ileng la ahlolela Jesu lefu likhoeling tse ’maloa tse fetileng. Le hoja Setefane a ne a tseba hore le eena le ka mo ahlolela lefu, o ile a lula a khobile matšoafo. Bibele e re: “Sefahleho sa [Setefane e ne] eka sa lengeloi.” Ho tlile joang hore Setefane a se ke a tšoha boemong bo joalo le hoja e ne e le motho ea sa phethahalang joaloka rona? Ke hobane o ne a le sebete.
Bibele e re Setefane e ne e le monna ea neng “a e-na le tumelo e matla a bile a tletse moea o halalelang.” Baapostola ba Jerusalema ba ne ba mo tšepa, kahoo ba ile ba mo fa mosebetsi oa hore a thuse batho ba neng ba futsanehile ka phuthehong ka lintho tseo ba li hlokang. Ka letsatsi le leng, ba bang ba Bajuda ba ne ba halefetse Setefane ’me ba qala ho pheha khang le eena. Empa Setefane o ile a ba hlola kaha o ile a sebelisa mangolo hantle. Sena se ile sa ba halefisa haholo, hoo ba ileng ba mo tšoara ’me ba mo isa Sanhedrine moo a ileng a iphumana a tlameha ho ipuella hore a se ke a bolaoa.
Ho ka etsahala hore ebe Setefane o ne a tseba tšepiso eo Jesu a ileng a e tšepisa balateli ba hae ha a re: “Le se ke la tšoenyeha ka hore na le tla re’ng. Le bue eng kapa eng eo le tla susumetsoa hore le e bue ka nako eo kaha le ke ke la bua ka bolona empa moea o halalelang o tla le thusa ho bua.” (Mar. 13:11) Ha ho pelaelo hore mantsoe ao Jesu a ileng a a bua a ile a thusa Setefane hore a be sebete. Ka thuso ea moea o halalelang oa Jehova, o ile a khoba matšoafo hoo batho ba ileng ba bona eka ke lengeloi ha a eme ka pel’a Sanhedrine.
Lekhotla leo le ne le e-na le litho tse 71, kaofela ha tsona e ne e le banna ba hlaheletseng kaha e ne e le baeta-pele ba bolumeli ba Sejuda. Ba ne ba lula ka lekhotleng le leholo ka mela e meraro e entseng lesakana. Ho ne ho e-na le bangoli ba babeli ba ngolang ntho e ’ngoe le e ’ngoe. Setefane o ne a qosoa ka ho bua hampe ka Molao oa Moshe le ka tempele, ’me haeba motho a ne a ka fumanoa a le molato ka ho etsa lintho tseo, o ne a ahloleloa lefu. Kaifase, e leng moprista ea phahameng, o ile a re Setefane a bue hore na liqoso tsena ke ’nete kapa che.
Setefane o ile a bua ka histori ea Baiseraele. A qala ka Abrahama, a boela a bua ka Josefa, ea ileng a sotloa ke bo-abuti ba hae e leng lihlooho tsa maloko a Iseraele. Setefane o ile a bua ka lintho tse ntle tseo Moshe a ileng a li etsa. Leha ho le joalo, o ile a ba bolella hore sechaba ha sea ka sa mamela Moshe. A susumetsoa ke moea oa Jehova, o ile a ba a bua lintlha tse ling ka Moshe tse sa ngoloang Mangolong a Seheberu.
Ntho e ’ngoe le e ’ngoe eo Setefane a ileng a e bua e ne e bontša hore o hlompha Molao oa Jehova oo a ileng a o fa Moshe hammoho le tabernakele le tempele eo Jehova a e hlommeng bakeng sa borapeli ba ’nete. Ka nako e tšoanang, o ile a bontša hore batho ba Molimo ha baa ka ba mamela batho bao Jehova a neng a ba rometse hore ba ba tataise.
Setefane o ile a lokela ho buella seo a se lumelang ka pel’a banna ba neng ba sa rate Bakreste le ba neng ba entse qeto ea hore ba tl’o mo bolaea
Setefane o ne a tseba hore banna bana ba lipelo li mpe, ba ke ke ba mo hauhela. Jehova o ile a mo fa moea oa hae, kahoo o ile a ba sebete sa hore ha a phethela litaba tsa hae a ba bolelle hore na Jehova o ikutloa joang ka bona. Setefane o ile a re ke “banna ba manganga,” ’me kamehla ba “hanyetsa moea o halalelang,” joaloka baholo-holo ba bona. Ho hobe le ho feta ke hore ba ile ba bolaea motho eo Moshe a ileng a bolela esale pele hore o tla tla e le moprofeta e moholo ho feta Moshe. Setefane o ile a ba bolella le hore ba ile ba eka le ho bolaea Jesu, e leng Mesia, ebile e le motho ea lokileng eo Moshe a neng a bua ka eena.
Litho tsa Sanhedrine li ne li halefile haholo hoo li neng li batla ho ntša Setefane kotsi. Empa Jehova o ile a mo matlafatsa ka ho lumella hore a bone ho hong ho neng ho etsahala leholimong. Ha Setefane a hlalosa seo a se boneng o ile a re: “Ke bona maholimo a bulehile le Mor’a motho a eme ka letsohong le letona la Molimo.” Ha litho tsa Sanhedrine li utloa mantsoe ao li ile tsa halefa le ho feta ’me tsa ba mabifi. Hobane’ng? E ka ’na eaba li ile tsa hopola mantsoe ao Jesu a ileng a a bua likhoeling tse ’maloa tse fetileng ha a ne a le ka pel’a lekhotla ’me a re: “Ho tloha hona joale le tla bona Mor’a motho a lutse ka letsohong le letona la Molimo ea matla.” (Mat. 26:64) Setefane o ile a tiisa hore mantsoe ao a phethahetse. Jesu o ne a se a le ka lehlakoreng le letona la Ntate oa hae.
Sehlopha se halefileng, se ile sa ntšetsa Setefane ka ntle ho motse, eaba se mo tlepetsa ka majoe. Ha se ntse se mo tlepetsa ka majoe, o ne a ntse a bona Jesu ponong, ’me a re: “Morena Jesu, ke kopa u amohele bophelo ba ka.” Setefane o ile a hoeletsa lekhetlo la ho qetela ho Jehova, a re: “U se ke oa ba balla sebe sena.” Setefane o ile a shoa e ntse e le molateli oa Jesu ea tšepahalang. Ke eena Mokreste oa pele ea ileng a shoela tumelo. Ho na le mohlankana e mong ea ileng a tšehetsa hore Setefane a bolaoe, ’me mohlanka eo ha aa ka a lebala mantsoe ao Setefane a ileng a a bua pele a shoa. Re tla bua haholoanyane ka mohlankana eo likhaolong tsa 50, 51 le 53.
Bala litemana tsena:
U ka re’ng?
Setefane o ile a bontša joang hore o sebete?
Etsa Lipatlisiso
1. Ke hobane’ng ha baapostola ba ile ba khetha Setefane le banna ba bang “ba bohlale le ba tletseng moea o halalelang” hore ba etse bonnete ba hore Bakreste ba futsanehileng ka phuthehong ba fumana lijo? (Lik. 6:3-5; bt 41 ¶17-18) A
Setšoantšo A
2. Setefane o ile a bua lintlha life ka Moshe tse sa hlaheng Mangolong a Seheberu? (bt 48 ¶13, nal.)
3. Setefane o ile a khona joang ho khoba matšoafo ha a ne a hlorisoa? (w18.10 32)
4. Na Liketso 7:59 e bontša hore Setefane o ile a rapela Jesu? (w05 1/1 31)
Nahana ka Seo u Ithutileng Sona
Setefane e ne e le monna ‘ea nang le tumelo e matla a bile a tletse moea o halalelang’ le “eo Molimo a neng a mo rata haholo a bile a mo file matla a maholo.” Leha ho le joalo, o ile a lumela ho etsa mosebetsi oa ho thusa Bakreste ba futsanehileng ho fumana lijo. (Lik. 6:2, 5, 8) Barab’abo rona ba nang le litalenta kapa boikarabelo bo eketsehileng ka phuthehong, ba ka etsisa Setefane joang? B
Setšoantšo B
Setefane o ile a rapella batho ba mo hlorisang. Hona joale ke joang rona re ka bontšang batho ba re hlorisang le ba re hanyetsang lerato? (Mat. 5:44-48)
U ka etsisa sebete seo Setefane a ileng a se bontša joang bophelong ba hao?
Iphe Nako ea ho Nahana ka Jehova le ka Morero oa Hae
U ithutile’ng ka Jehova tlalehong ee?
Tlaleho ee e amana joang le morero oa Jehova?
Ke hobane’ng ha u ananela hore ebe Setefane o khethetsoe ho ea busa le Kreste leholimong?
Ithute Lintlha Tse Ling
Hlokomela hore na u ka bua ka tlhompho le sebete joang ha u hlalosetsa batho ba bang ka seo u se lumelang.
“Setefane—‘Molimo o ne a mo Rata Hape a mo File Matla’” (bt 47-50 ¶9-19)
Setefane o ne a le sebete. Kajeno, batho ba Jehova ba hlorisoang ba ka mo etsisa joang?