March

Bibele e bua ka litlaleho tsa batho ba neng ba lokile empa ba qetella ba se ba sa loka. Morena Solomone ke mohlala oa batho ba joalo. O ne a tseba Jehova hantle ebile a tseba hore na o lokela ho mo rapela joang ’me Jehova o ile a mo hlohonolofatsa haholo. Empa hamorao Solomone o ile a rapela melimo ea bohata. Taba ena e ile ea halefisa Jehova haholo hoo sechaba sa Baiseraele se ileng sa khola litholoana tse bosula ka lilemo tse makholo ka lebaka la libe tsa Solomone. Ke ’nete hore Mangolo a re Solomone o ile “a patoa joaloka baholo-holo ba hae,” ho akareletsa le banna ba tšepahalang joaloka Morena Davida. (1 Mar. 11:​5-9, 43, nal; 2 Mar. 23:13) Empa na tsela eo a patiloeng ka eona e tiisa hore o tla tsosoa? Bibele ha e fane ka karabo. Tsoho ke mpho e tsoang ho Molimo oa rona ea lerato. O e fa batho bao a batlang hore ba be le monyetla oa ho mo sebeletsa ka ho sa feleng. (Jobo 14:​13, 14; Joh. 6:44) Na Solomone o tla fumana mpho eo? Jehova ke eena ea tsebang, rona ha re tsebe. Ntho eo re e tsebang ke hore Jehova o tla etsa ntho e nepahetseng. w24.05 4 ¶9

Mehleng ea Bibele tente e ne e le sebaka seo motho a ka phomolang ho sona le ho itšireletsa maemong a leholimo. Moeti ea ileng tenteng ea motho e mong o ne a lebeletse hore motho ea mo memmeng a mo hlokomele. Ha re inehela ho Jehova re ba baeti tenteng ea hae. Re na le lintho tsohle tseo re li hlokang e le hore re lule re e-na le setsoalle se matla le Jehova ebile re metsoalle ea baeti ba Jehova. Empa tente ea hae ha e sebakeng se itseng. Tente ea Jehova e hohle moo barapeli ba hae ba tšepahalang ba leng teng. (Tšen. 21:3) Ho thoe’ng ka batho ba ileng ba shoa ba tšepahala? Na e ka ba ntho e utloahalang ha re ka re le bona e ntse e le baeti tenteng ea Jehova? Ho joalo. Ke hobane’ng ha re cho joalo? Ke hobane Jehova o ntse a ba hopola hantle. Jesu o ile a re: “Taba ea hore bafu baa tsosoa esita le Moshe o ile a bua ka eona ha a bua ka sehlahla se meutloa. O ile a re Jehova ke Molimo oa Abrahama, Isaka le Jakobo. Eena ke Molimo oa ba phelang eseng oa bafu hobane ho eena baa phela kaofela.”—Luka 20:​37, 38. w24.06 3 ¶6-7

Tsadoke o ile a ea Hebrone a hlometse ebile a ikemiselitse ho loana. (1 Likron. 12:38) O ne a ikemiselitse ho ea le Davida ntoeng le ho sireletsa Iseraele ho lira tsa eona. Ho ka etsahala hore ebe Tsadoke o ne a se na boiphihlelo bo bokaalo ntoeng empa e ne e le monna ea sebete. Ho tlile joang hore moprista ea tšoanang le Tsadoke a be sebete? O ne a tseba banna ba neng ba le matla ebile ba le sebete. Ha ho pelaelo hore o ile a ithuta mohlaleng oa bona. Ka mohlala, Davida o ile a bontša hore o sebete ka hore ‘a etelle Baiseraele pele ha ba il’o loana’ ’me seo se ile sa susumeletsa Baiseraele hore ba mo tšehetse ka lipelo tsohle tsa bona. (1 Likron. 11:​1, 2) Davida o ne a lula a itšetlehile ka Jehova hore a mo thuse ha a loantša lira tsa hae. (Pes. 138:3) Tsadoke o ne a boetse a ithuta mehlaleng ea banna ba bang ba neng ba le sebete, e leng Jehojada le mora oa hae oa mohlabani Benaia esita le ho balaoli ba 22 ba neng ba tšehetsa Davida.—1 Likron. 11:​22-25; 12:​26-28. w24.07 3 ¶5-6

Saule oa Tarsase ke e mong oa batho ba ileng ba etsa lintho tse mpe ka tsela e makatsang. O ne a hlorisa barutuoa ba Jesu ka sehloho. Ho ka etsahala hore ebe Bakreste ba bangata ba ne ba bona e le motho ea ke keng a baka le ka mohla. Empa tsela eo Jesu a neng a sheba Saule ka eona e ne e fapane hole le eo batho ba neng ba mo sheba ka eona. Eena le Ntate oa hae ba ile ba bona makhabane ao Saule a neng a e-na le ’ona. Jesu o ile a re: “Monna enoa ke sejana seo ke se khethileng.” (Lik. 9:​15, nal.) Jesu o ile a ba a etsa mohlolo ho thusa Saule hore a bake. (Lik. 7:58–8:3; 9:​1-9, 17-20) Saule e ile ea e-ba Mokreste ’me hamorao a tsejoa e le moapostola Pauluse. O ile a leboha hore ebe Jehova le Jesu ba mo hauhetse le ho ba mosa ho eena. (1 Tim. 1:​12-15) Ka mor’a hore Pauluse a utloe hore ho hlahile boemo bo tšosang phuthehong ea Korinthe ba monna ea neng a entse boitšoaro bo bobe, o ile a etsa’ng? O ile a rarolla bothata boo ka tsela e bontšang hore Jehova o re khalemela hobane a re rata haholo ’me o batla hore le rona re hauhele ba bang ha ba bakile. w24.08 13 ¶15-16

Ha nako e ntse e ea, Jehova o ile a hlakisa hanyane ka hanyane hore na batho ba baetsalibe e ka ba metsoalle ea hae joang. Abele e leng mora oa bobeli oa Adama le Eva, e ne e le eena motho oa pele oa ho bontša tumelo ho Jehova ka mor’a mathata a ileng a hlaha Edene. Kaha Abele o ne a rata Jehova a bile a batla ho mo thabisa le ho ba motsoalle oa hae, o ile a mo etsetsa sehlabelo. E ne e le molisa, kahoo o ile a hlaba tse ling tsa likonyana tsa hae ’me a etsetsa Jehova sehlabelo ka tsona. Jehova o ile a ikutloa joang ka sehlabelo seo? “O ile a amohela Abele le nyehelo ea hae.” (Gen. 4:4) Jehova o ile a amohela le mahlabelo a batho ba bang ba neng ba mo rata le ho mo tšepa ba kang Noe. (Gen. 8:​20, 21) Ha Jehova a ne a amohela mahlabelo ana o ne a bontša hore batho ba baetsalibe ba ka khona ho ba metsoalle ea hae. w24.08 3 ¶5-6

Re ka ’na ra utloa bohloko haholo le ho nyahama ha re tšoaroa ka ho hloka toka. (Moek. 7:7) Bahlanka ba Jehova ba tšepahalang, ba joaloka Jobo le Habakuke, ba ile ba ikutloa ka tsela e tšoanang. (Jobo 6:​2, 3; Hab. 1:​1-3) Le hoja ho tloaelehile ho ikutloa ka tsela ena, re lokela ho ba hlokolosi hore na re itšoara joang ha re tšoaroa ka ho hloka toka e le hore re se ke ra etsa ntho e fosahetseng ebe re mpefatsa maemo le ho feta. Ha re bona batho ba tšoarang ba bang ka ho hloka toka ba sa fuoe kotlo, re ka ’na ra bona ho se na molemo oa hore le rona re tsoele pele ho etsa se nepahetseng. Nahana ka mohlala oa mopesaleme ea ileng a bona ha batho ba khopo ba tšoara batho ba lokileng ka ho hloka toka, empa ho bonahala eka batho ba khopo baa atleha. O ile a re: “Bana ke ba khopo, bao lintho li lulang li ba tsamaela hantle.” (Pes. 73:12) O ile a nyahama haholo ka lebaka la ho hloka toka ho neng ho le teng, hoo a ileng a ba a utloa eka ho sebeletsa Jehova ke tšenyo ea nako. O ile a re: “Ha ke leka ho utloisisa, ke ne ke tšoenyeha.”—Pes. 73:​14, 16. w24.11 3 ¶5-7

Re rorisa Jehova hobane re mo hlompha haholo. Re na le mabaka a mangata a ho mo hlompha. Jehova o matla ’ohle ’me ha a khathale. (Pes. 96:​4-7) Bohlale ba hae bo babatsehang, bo bonahala ka ho hlaka linthong tseo a li bopileng. O re file bophelo le lintho tsohle tseo re li hlokang e le hore re phele. (Tšen. 4:11) Oa tšepahala. (Tšen. 15:4) Ntho e ’ngoe le e ’ngoe eo a e etsang ea atleha, hape o lula a phethahatsa litšepiso tsa hae. (Josh. 23:14) Ha se feela moprofeta Jeremia a ileng a re ka Jehova: “Har’a batho bohle ba bohlale ba lichaba le har’a mebuso eohle ea bona, ho hang ha ho ea tšoanang le uena.” (Jer. 10:​6, 7) Kannete re na le mabaka a utloahalang a ho hlompha Ntate oa rona oa leholimo. Ke ’nete hore re hlompha Jehova empa ha ho felle moo, re boetse rea mo rata. Re rorisa Jehova hobane re mo rata haholo. w25.01 3 ¶5-6

Bahanyetsi ba Molimo ba leka ho etsa hore lintho tse ntle tse etsoang ke mokhatlo oa hae li bonahale li le mpe. Ka mohlala, re ithutile hore Mangolo a re Jehova o batla hore barapeli ba hae ba hloeke ’meleng, boitšoarong le hore ba mo rapele ka tsela eo a e batlang. O batla hore batho ba etsang lintho tse mpe ba sa bake ba tlosoe ka phuthehong. (1 Bakor. 5:11, 12; 6:9, 10) Re mamela taelo eo ea Mangolo. Empa ha re mamela taelo ena bahanyetsi ba rona ba re ha re rate batho, rea ba ahlola le hore ha re rate ha batho ba fapane le rona. Re lokela ho elelloa hore na ke mang ea hlileng a hlaselang mokhatlo oa Molimo. Satane Diabolose ke eena ea hlohlelletsang mashano a buuoang ka mokhatlo. “Ke ntate oa leshano.” (Joh. 8:44; Gen. 3:​1-5) Kahoo, re ka lebella hore Satane o tla sebelisa batšehetsi ba hae ho jala lipale tsa bohata ka mokhatlo oa Jehova. w24.04 10-11 ¶13-14

Ka mor’a hore mahlomola a maholo a qale, ho ka etsahala hore batho ba bang ba boneng ha “Babilona e Moholo” e timetsoa, ba hopole hore ke khale Lipaki Tsa Jehova li re sena se tla etsahala. Na batho bao ba tla bontša tumelo ho Jehova? (Tše. 17:5) Haeba seo se ka etsahala, se tla be se tšoana le se ileng sa etsahala Egepeta mehleng ea Moshe. Hopola hore “sehlopha se seholo se tsoakaneng” se ile sa tsamaea le Baiseraele ha ba tloha Egepeta. E ka ’na eaba ba bang ba batho bao ba ile ba qala ho ba le tumelo ho Jehova ha ba bona Likotlo Tse Leshome tseo Moshe a neng a lemositse ka tsona li etsahala. (Ex. 12:38) Haeba ntho e tšoanang e ka etsahala ka mor’a hore Babilona e Moholo e timetsoe, na re tla utloa e se toka hore ebe batho ba ikopanya le rona ho sebeletsa Jehova ho setse nakoana pele bofelo bo fihla? Ha ho joalo. Re batla ho tšoana le Ntate oa rona ea leholimong, “Molimo ea mohau le ea nang le kutloelo-bohloko, ea liehang ho halefa le ea nang le lerato le ’nete.”—Ex. 34:6. w24.05 11 ¶12-13

Ho ka etsahala’ng haeba re khaotsa ho theha lintho tseo re li lumelang ‘thutong e molemo’? Nahana ka mohlala ona. Mehleng ea baapostola, ho bonahala hore har’a Bakreste ho ile ha e-ba le mabare-bare a reng letsatsi la Jehova le se le fihlile. E ka ’na eaba ho ne ho e-na le lengolo leo e kang le ngotsoe ke moapostola Pauluse le neng le bua mantsoe ao. Bakreste ba bang ba Thesalonika ba ile ba lumela mabare-bare ao ntle le hore ba hlahlobisise hore na litaba tseo ke ’nete kapa che, eaba baa li jala. Hoja ba ile ba hopola lintho tseo Pauluse a neng a ba rutile tsona ha a ntse a e-na le bona, ba ka be ba sa ka ba thetsoa. (2 Bathes. 2:​1-5) Pauluse o ile a eletsa bara ba bo hore ba se ka ba lumela ntho e ’ngoe le e ’ngoe eo ba e utloang. E le hore ba tle ba khone ho etsa joalo nakong e tlang, Pauluse o ile a qetella lengolo la hae la bobeli le eang ho Bathesalonika ka mantsoe ana: “’Na Pauluse, ke le ngolla tumeliso ena ka letsoho la ka. Ona ke mongolo oa ka ’me le tla tseba mangolo ’ohle a ka ka mongolo ona.”—2 Bathes. 3:17. w24.07 12 ¶13-14

Bakreste ba Baheberu ba ne ba lokela ho mamella ha ba ntse ba tsoela pele ho sebeletsa Jehova hobane maemo a Judea a ne a ntse a mpefala. Le hoja ba bang ba ile ba tobana le mahloriso a matla nakong e fetileng, ba bang ha baa ka ba tobana le ’ona. Moapostola Pauluse o ile a re le hoja ba ile ba mamella mathata ao a boima, ba lebelle ho hlorisoa ho isa boholeng ba hore ba bolaoe joaloka Jesu. (Baheb. 12:4) Bajuda ba bangata ba ne ba halefile haholo ba bile ba loana hobane batho ba bangata e ne e e-ba Bakreste. Lilemo tse seng kae pele ho moo, Bajuda ba fetang 40 ba ile “ba etsa ’mommori oa ho bolaea Pauluse ’me ba ikana hore ba ke ke ba ja kapa ba noa ho fihlela ba mo bolaile.” (Lik. 22:22; 23:​12-14) Le hoja ba ne ba tla hlouoa le ho hlorisoa, Bakreste ba ne ba lokela ho tsoela pele ho bokana hammoho bakeng sa borapeli le ho bolela litaba tse monate e le hore tumelo ea bona e lule e le matla. w24.09 12 ¶15

Johanne e ne e le motsoalle ea haufi oa Jesu Kreste ebile e le moapostola oa hae. (Mat. 10:2) Johanne o ile a qeta nako e ngata a bolela litaba tse monate le Jesu, a bona ha a etsa mehlolo, ’me a lula a e-na le eena le linakong tse boima. O ile a bona ha Jesu a bolaoa a ba a mo bona ka mor’a hore a tsosoe. O ile a boela a bona ha phutheho ea Bokreste e hola. Johanne o phetse nako e telele hoo a ileng a bona ha ‘litaba tse monate li boleloa lefatšeng lohle.’ (Bakol. 1:23) Ha Johanne a le haufi le ho shoa, o ile a fuoa tokelo ea ho ngola karolo e itseng ea Lentsoe la Molimo. O ile a ngola lintho tse hlollang “tseo Jesu Kreste a re senoletseng tsona” tse tlalehiloeng bukeng ea Tšenolo. (Tšen. 1:1) Johanne o ile a ngola Kosepele e ileng ea bitsoa ka lebitso la hae. O ile a boela a ngola mangolo a mararo, e leng Johanne oa pele, oa bobeli le oa boraro. Lengolo la boraro o ile a le ngolla Mokreste ea tšepahalang e leng Gaiase, eo a neng a mo nka joaloka ngoana oa hae ea ratehang ka lebaka la tumelo ea hae. (3 Joh. 1) Lintho tse ngotsoeng ke monna enoa ea holileng le ea tšepahalang, li khothalitse balateli bohle ba Jesu ho fihlela mehleng ena. w24.11 12 ¶15-16

Monna ea ratang mosali oa hae o mo nka e le oa bohlokoa ebile ha a batle letho ka eena. O mo nka e le letlotlo la bohlokoa le tsoang ho Jehova. (Liprov. 18:22; 31:10) Kahoo, o mo tšoara ka mosa le ka tlhompho, esita le nakong eo ba thabelang tokelo ea bona ea lenyalo. A ke ke a hatella mosali oa hae ho etsa thobalano le eena ka tsela e tla etsa hore a ikutloe a sa phutholoha, a ikutloe eka oa hlekefetsoa kapa ka tsela e sa lumellaneng le letsoalo la hae. Monna le eena o lokela ho boloka letsoalo la hae le hloekile nakong eo ba thabelang tokelo ea bona ea lenyalo. (Lik. 24:16) Banna, le ka kholiseha hore Jehova oa bona ebile o ananela boiteko boo le bo etsang ba ho hlompha basali ba lona likarolong tsohle tsa bophelo ba lona. Ikemisetse ho mo hlompha ka hore u qobe ntho leha e le efe e ka mo utloisang bohloko, u be mosa u be u bontše ka liketso hore oa mo rata. Ha u etsa joalo oa bontša hore oa mo rata ebile u mo nka e le oa bohlokoa. Hlompha mosali oa hao e le hore u sireletse kamano ea bohlokoa ka ho fetisisa, e leng setsoalle sa hao le Jehova.—Pes. 25:14. w25.01 13 ¶17-18

Ntho e ’ngoe e khethollang bahlanka ba Jehova ho batho ba ipitsang Bakreste, ke tsela eo ba chesehelang tšebeletso ea tšimo ka eona. Ke eng e ka u thusang hore u lule u cheseha kapa u eketsa cheseho ea hao mosebetsing oa boboleli? Mohlala oa Jesu o ka re thusa ho bona hore na ke joang re ka chesehelang mosebetsi oa boboleli. Ha aa ka a khaotsa ho bolela ka cheseho nakong eo a ntseng a le lefatšeng. Ha e le hantle, o sebelitse ka thata le ho feta ha nako e ntse e ea. Joaloka motho ea hlokomelang tšimo ea lifate ea ileng a qeta lilemo tse tharo a ntse a hlokomela sefate sa feie empa se sa behe litholoana, Jesu le eena o qetile lilemo tse ka bang tse tharo a ntse a pakela Bajuda, empa ba bangata ba bona ha ea ka ea e-ba balateli ba hae. Leha ho le joalo, joalokaha monna ea hlokomelang tšimo ea lifate a sa ka a fella sefate sa feie pelo, Jesu le eena ha aa ka a tela kapa a hulanya maoto mosebetsing oa boboleli. (Luka 13:​6-9) Ha re ithuta linthong tseo a li rutileng ebile re etsa lintho joaloka eena, seo se tla re thusa hore le rona re lule re cheseha kajeno. w25.03 14-15 ¶1-4

U ka etsa’ng haeba u nahana hore motho e mong e ka ba molekane ea u loketseng oa lenyalo? Na u ka potlakela ho mo bontša hore oa mo rata? Bibele e re ea bohlale o nahana ka mehato ea hae pele a etsa lintho. Kahoo, e ka ba bohlale ho tseba motho eo u mo ratang hantle pele u etsa qeto, u nke nako pele u ka mo bolella hore oa mo rata. U ka etsa’ng e le hore u shebe motho e mong ka bohlale? Ha le le libokeng kapa le le ’mokeng u ka ’na oa hlokomela hore na motho eo o na le kamano e ntle le Jehova, o na le botho bo joang le hore na boitšoaro ba hae bo joang. Metsoalle ea hae ke bo-mang, hona o qoqa ka eng? (Luka 6:45) Na o batla ho finyella lintho tseo le uena u batlang ho li finyella bophelong? U ka buisana le baholo ba phutheho ea habo kapa Bakreste ba bang ba holileng tsebong ba mo tsebang hantle. (Liprov. 20:18) U ka ’na oa botsa ka botumo le makhabane a motho eo. (Ruthe 2:11) Ha u ntse u shebile motho eo, etsa bonnete ba hore u qoba ho etsa hore a ikutloe a sa phutholoha. Hlompha maikutlo a hae ’me u se ke oa batla ho lula u le moo a leng teng le ho batla ho tseba ntho e ’ngoe le e ’ngoe ka eena. w24.05 22 ¶7-8

Baholo ha ba potlakele ho etsa qeto ea hore motho ea entseng sebe ha a batle ho baka. Ke ’nete hore batho ba bang ba ka baka ka lekhetlo la pele feela ha ba qeta ho kopana le komiti ea baholo empa ba bang ba ka hloka nako. Kahoo, baholo ba ka kopana ka makhetlo a ’maloa le motho ea entseng sebe. Mohlomong ka mor’a ho kopana le baholo ka lekhetlo la pele, Mokreste enoa ea entseng sebe a ka qala ho nahana ka ho teba ka seo baholo ba mo boleletseng sona. A ka ikokobetsa ’me a kopa Jehova hore a mo tšoarele. (Pes. 38:18) Kahoo, ha baholo ba kopana hape le motho ea entseng sebe, mohlomong o tla be a se a fetotse tsela eo a bonang lintho ka eona. Baholo ba bontša kutloelo-bohloko ’me ba ba mosa ha ba thusa motho ea entseng sebe hore a bake. Ba rapela Jehova ka tšepo ea hore o tla hlohonolofatsa boiteko ba bona ba ho thusa Mokreste enoa ea entseng sebe hore a bake.—2 Tim. 2:​25, 26. w24.08 22-23 ¶12-13

Jehova ha a batle hore motho leha e le ofe a felisoe. O batla hore baetsalibe ba boelane le eena. (2 Bakor. 5:20) Ke ka lebaka leo esale Jehova a khothaletsa batho ba hae ba neng ba mo lahlile hore ba bake ’me ba khutlele ho eena. Baholo ba na le tokelo ea ho ba basebetsi-’moho le Jehova ka hore ba etse sohle se matleng a bona ho thusa batho ba entseng libe hore ba bake. (Bar. 2:4; 1 Bakor. 3:9) Nahana ka thabo e bang teng leholimong ha moetsalibe a baka. Ntate oa rona ea leholimong Jehova, le eena oa thaba kamehla ha nku e neng e lahlehile e khutlela ka phuthehong. Re rata Jehova le ho feta ha re nahanisisa ka kutloelo-bohloko, mohau le mosa oa hae.—Luka 1:78. w24.08 31 ¶16-17

Haeba Jesu a ne a ka lumella hore batho ba mo etse morena, o ne a tla be a kenella lipolotiking ’me a tšehetsa Bajuda ba neng ba busoa ke Baroma. Jesu o ile a etsa qeto ea ho “khutlela thabeng.” Ho sa tsotellehe khatello e tsoang ho ba bang, Jesu ha aa ka a kenella lipolotiking. Eo ke thuto ea bohlokoa ho rona. Ke ’nete hore batho ba bang ba ke ke ba re kopa hore re hlahise lijo ka mohlolo kapa re folise batho ba kulang, hape ba ke ke ba batla ho re etsa babusi kapa marena. Empa ba ka etsa hore re kenelle lipolotiking ka ho re kopa hore re voutele mokhatlo o itseng kapa re bue motho ea itseng hantle eo ba nahanang hore o tla tlisa liphetoho. Leha ho le joalo, mohlala oa Jesu o hlakile. O ile a hana ho kenella lipolotiking hoo hamorao a ileng a re: “’Muso oa ka ha se oa lefatše lena.” (Joh. 17:14; 18:36) Mehleng ena, Bakreste ba tla be ba etsa hantle ha ba nahana le ho etsa lintho joaloka Jesu. Re tšehetsa ’Muso oa Molimo, re bolella batho ka oona ebile re rapella hore o tle.—Mat. 6:10. w24.12 4 ¶5-6

Ha u ntse u ithuta, nahana hore na u ka sebelisa lintho tseo u ithutang tsona joang. Ka mohlala, tšoara batho ba bang ka toka joaloka Jehova. Etsisa tsela eo Jesu a neng a rata Ntate oa hae le batho ka eona. Ikemisetse ho etsa sohle seo Jehova a reng u se etse le hore u itelle Bakreste-’moho le hoja ka linako tse ling ho ka ba boima. Hape, etsisa Jesu ka hore u rute batho ka Jehova e le hore le bona ba ka ba le monyetla oa ho bontša tumelo mphong ena e babatsehang e tsoang ho Jehova. Ha re tsoela pele ho ithuta haholoanyane ka tefo ea topollo, re tla rata Jehova le Jesu le ho feta ’me le bona ba tla re rata haholo. (Jak. 4:8) Kahoo, a re tsoeleng pele ho sebelisa lintho tseo Jehova a re fileng tsona ho ithuta ka tefo ea topollo. w25.01 25 ¶16-17

Ha temana ea kajeno e re: “U tlositse libe tsohle tsa ka mahlong a hao.” Mantsoe ana a ka boela a fetoleloa tjena: “U entse eka ha kea ka ka etsa sebe ho hang.” Sena se bolela hore Jehova o lahlela libe tsa batho ba bakileng hole moo a ke keng a hlola a li bona. Bibele e sebelisa papiso e ’ngoe ho re thusa hore re utloisise taba ena hantle, papiso eo e hlaha ho Mikea 7:​18, 19. Litemana tsena li bontša hore Jehova o lahlela libe tsa rona botebong ba leoatle. Mehleng ea khale, ho ne ho ke ke ha khoneha ho fumana ntho e neng e oetse botebong ba leoatle. Lipapisong tsena, re ithutile hore ha Jehova a re tšoarela o re imolla ka ho felletseng e le hore re se ke ra hlola re ikutloa re le molato. ’Nete ea taba ena e ile ea hatisoa ke Davida ha a re: “Ho thaba bao liketso tsa bona tse sa eeng ka molao li tšoaretsoeng le bao libe tsa bona li koahetsoeng.” (Bar. 4:7) Jehova o tšoarela e le kannete. w25.02 9 ¶7-8

Ho na le batho ba sebeletsang Jehova ka khotso le ka kutloano mehleng ena ebile ba phathahane ka ho etsa lintho tse ngata tse ntle. Batho bana ba baloa ka limilione ’me ke karolo ea mokhatlo oa Jehova o nang le khotso. Ba ikemiselitse hore le ka mohla ba ke ke ba tlohela ho sebeletsa Jehova ebile ba batla ho thusa batho ba bangata hore le bona e be metsoalle ea Jehova. Jehova o thusa batho ba batlang ho lula ba ntse ba mo sebeletsa hore ba be le khotso le kutloano le hoja ba lula lefatšeng la Satane le khopo le le kotsi, moo batho ba nang le lehloeo. (1 Joh. 5:19; Tšen. 12:12) Molimo o bona lintho tsohle tse utloisang batho bohloko empa o etsa hore bahlanka ba hae ba ikutloe ba sireletsehile e le hore ba ka tsoela pele ba ntse ba mo sebeletsa ba thabile. Lentsoe la hae le bontša hore ha re mo sebeletsa re fumana “setšabelo” ’me re tšoana le “serapa se nosetsoang hantle.” (Esa. 4:6; 58:11) Batho ba sebeletsang Jehova ba lula ba thabile ebile ba ikutloa ba sireletsehile matsatsing ana a ho qetela.—Esa. 54:14; 2 Tim. 3:1. w24.04 20 ¶1-2

Ha ho pelaelo hore u kile oa rapella ho fumana motho eo u batlang hore e be molekane oa hao haeba u batla ho kena lenyalong. Ke ’nete hore Jehova ha a u tšepise ho u fa molekane oa lenyalo. Empa oa tseba hore na u hloka’ng le hore u ikutloa joang ’me a ka u thusa hore u fumane molekane. Kahoo, tsoela pele u mo bolella seo u se batlang le hore na u ikutloa joang. (Pes. 62:8) Kopa Jehova hore a u thuse hore u be le mamello ’me a u fe bohlale. (Jak. 1:5) Le haeba u e-s’o fumane motho ea u loketseng hore u ka nyalana le eena, Jehova o tšepisa hore o tla lula a u hlokomela maikutlong le ka lintho tseo u li hlokang. (Pes. 55:22) U lokela ho ela hloko hore ho batla molekane oa lenyalo ha ea lokela ho ba ntho ea bohlokoa ka ho fetisisa bophelong ba hao. (Bafil. 1:10) Thabo ea sebele ha ea itšetleha ka hore na u lenyalong kapa che empa e itšetlehile ka kamano ea hao le Jehova. (Mat. 5:3) Empa ha u ntse u e-s’o nyale, u ka ba le bolokolohi ba ho sebeletsa Jehova haholoanyane. (1 Bakor. 7:​32, 33) Sebelisa nako ena hamolemo. w24.05 21 ¶4; 22 ¶6

Le lokela ho ratana nako e kae? Hangata lintho ha li tsamaee hantle ha batho ba potlakela ho etsa qeto. (Liprov. 21:5) Kahoo, le lokela ho ratana nako e lekaneng e le hore le ka tsebana hantle. Leha ho le joalo, ha lea lokela ho ratana nako e telele ho sa hlokahale. Bibele e re: “Ha ntho eo motho a e lebeletseng e lieha ho phethahala, e kulisa pelo.” (Liprov. 13:12) Ke eng seo batho ba bang ba ka se etsang ho thusa batho ba ratanang? Re ka ba memela lijong, ra etsa borapeli ba lelapa le bona kapa ra ithabisa le bona. (Bar. 12:13) Mohlomong u ka ba thusa ka hore u tsamaee le bona haeba ba batla ho intša, u be le bona ka koloing kapa u ba memele moo u lulang teng e le hore ba se ke ba e-ba bang. (Bagal. 6:10) Haeba batho ba ratanang ba u kopa hore u qete nako le bona, nka seo e le tsela ea bohlokoa eo u ka thusang metsoalle ea hao ka eona. Etsa bonnete ba hore ha u ba siee ba le bang feela empa u ba fe nako ea hore ba ke ba bue. w24.05 30 ¶13-14

Baholo ba leka ho bona hore na ke’ng e entseng hore motho a qetelle a entse sebe. Ka mohlala, na kamano ea hae le Jehova e ile ea fokola hobane a ne a se a sa etse thuto ea botho le ho ba teng tšimong kamehla? Na o ne a se a sa rapele Jehova kamehla? Na o ne a se a tlohetse ho loantša litakatso tse fosahetseng? O qeta nako ea hae a e-na le bo-mang hona o khetha boithabiso bo joang? Liqeto tseo a li entseng linthong tsena li susumelitse tsela eo a nahanang le ho etsa lintho ka eona joang? Na oa utloisisa hore na Jehova Ntate oa hae o ikutloa joang ka lintho tseo a li entseng? Baholo ba ka botsa motho eo lipotso tse tla mo thusa ho nahana hore na ke’ng e entseng hore kamano ea hae le Jehova e senyehe le hore qetellong a etse sebe. Ba etsa sena ka mosa ’me ha ba mo botse lipotso ka litaba tsa hae tsa botho tseo ba sa hlokeng ho li tseba. (Liprov. 20:5) Ho ekeletsa moo, baholo ba ka sebelisa papiso ho thusa motho eo hore a nahane ka lintho tseo a li entseng le ho bona hore na ke hobane’ng ha li fosahetse. Mohlomong ka mor’a ho kopana le motho ea entseng sebe ka lekhetlo la pele, o tla qala ho soabela boitšoaro ba hae ’me a ka ’na a baka. w24.08 22 ¶9-11

Jesu o ile a bolela ‘molaetsa o monate oa ’Muso’ ka cheseho hobane o ne a tseba hore ke mosebetsi oo Molimo a neng a batla hore a o etse. Ho bolela litaba tse monate e ne e le eona ntho e tlang pele bophelong ba Jesu. Le likhoeling tsa ho qetela tsa tšebeletso ea hae, Jesu o ile “a tsamaea metse le metsana” a ntse a ruta batho. (Luka 13:22) Hape o ile a koetlisa barutuoa ba eketsehileng hore le bona ebe baboleli joaloka eena. (Luka 10:1) Ho bolela litaba tse monate e ntse e le oona mosebetsi oa bohlokoa ka ho fetisisa oo Jehova le Jesu ba batlang hore re o etse mehleng ena. (Mat. 24:14; 28:​19, 20) Re ka eketsa cheseho ea rona mosebetsing oa boboleli ka ho nka batho ka tsela eo Jehova a ba nkang ka eona. O batla hore batho ba bangata kamoo ho ka khonehang ba utloe litaba tse monate le hore ba ithute ’nete ka eena. (1 Tim. 2:​3, 4) Kahoo, oa re koetlisa hore re ntlafatse tsela eo re rutang molaetsa ona o pholosang bophelo ka eona. Le haeba batho ba ke ke ba qala ho sebeletsa Jehova hona joale, ba ka ’na ba e-ba le monyetla oa ho etsa joalo pele mahlomola a maholo a fela. w25.03 15-16 ¶5-7

Mokreste e mong le e mong o lokela ho sebelisa letsoalo la hae le koetlisitsoeng ka Bibele ha sebelisana le motho ea tlositsoeng ka phuthehong. Ba bang ba ka khetha ho mo lumelisa le ho mo amohela libokeng. Empa ha rea lokela ho qoqa le eena nako e telele kapa ra qeta nako re etsa lintho tse ling le eena. Batho ba bang ba ka ’na ba ipotsa, ‘Na Bibele ha e re Mokreste ea lumelisang motho ea joalo o tšehetsa mesebetsi ea hae e mebe?’ (2 Joh. 9-11) Lintlha tse potolohileng lengolo lena li bontša ka ho hlaka hore tataiso ena e bua ka bakoenehi le batho ba tsoelang pele ho khothaletsa ba bang ho etsa lintho tseo Bibele e reng li fosahetse. (Tšen. 2:20) Haeba motho a khothaletsa lithuto tsa bokoenehi kapa a khothaletsa ba bang ho etsa lintho tse mpe, baholo ba ke ke ba etsa litlhophiso tsa hore a eteloe. Leha ho le joalo, ho ntse ho e-na le monyetla oa hore motho ea joalo a ka baka. Empa hafeela seo se e-s’o ka se etsahala, re ke ke ra lumelisa kapa ra memela motho ea joalo libokeng. w24.08 30-31 ¶14-15

Ka mor’a hore Jesu a fepe sechaba, o ile a re barutuoa ba hae ba ee Kapernauma ka sekepe ’me eena a khutlela thabeng hobane a qoba hore sechaba se mo etse morena. (Joh. 6:​16-20) Ha baapostola ba hae ba ntse ba khanna sekepe, ho ile ha tsoha sefefo se matla, sa etsa hore ho be le moea o matla le maqhubu a leoatle a matla. Ka mor’a moo, Jesu o ile a tla ho bona a tsamaea holim’a metsi ’me a re Petrose a tle ho eena. (Mat. 14:​22-31) Ha Jesu a se a le ka har’a sekepe, sefefo se ile sa thola. Barutuoa ba ile ba re: “Kannete u Mor’a Molimo.” (Mat. 14:33) Empa ba ne ba ntse ba hloleha ho bona hore na seo a se entseng se kopana joang le mohlolo oo a neng a o entse pejana oa ho fepa sechaba. Mareka o tlatselletsa taba ena ha a re: “[Baapostola] ba makala haholo kaha ba ne ba sa utloisisa hore na mohlolo oo a o entseng ka mahobe o bolela’ng.” (Mar. 6:​50-52) Barutuoa ba ne ba sa utloisise hore Jehova o ne a file Jesu matla a fetang a ho etsa mehlolo feela. w24.12 5 ¶7

Re ka bontša hore re ananela lerato la Jehova ka hore re etse sohle seo re ka se khonang nakong ena ea Sehopotso ho bontša hore re ananela tefo ea topollo eo Jehova a faneng ka eona. Re ka etsa joalo ka hore re ee Sehopotsong le ho memela batho ba bang ho sona. Hlalosetsa batho bao u ba memang hore na ho tl’o etsahala’ng Sehopotsong. U ka ba bontša video ea Ke Hobane’ng ha Jesu a Ile a Shoa? le ea Ikhopotse Lefu la Jesu tse hlahang ho jw.org/st. Baholo le bona ba lokela ho mema batho ba seng ba sa kopanele. Nahana ka thabo e bang teng leholimong le lefatšeng ha linku tsa Jehova tse neng li lahlehile li khutlela mohlapeng. (Luka 15:​4-7) Ka Sehopotso, a re etseng bonnete ba hore ha re lumelise Bakreste-’moho feela empa re lumelise haholo-holo batho ba qalang ho tla kapa bao e leng khale ba sa tle. Re batla hore ba ikutloe ba amohelehile.—Bar. 12:13. w25.01 29 ¶15

Ntho e ’ngoe e ileng ea susumetsa Jehova hore a romele Mora oa hae ho tl’o re shoela ke lerato. (Joh. 3:16; 1 Joh. 4:​9, 10) Jehova o rometse Mora oa hae ho tl’o re shoela hobane a batla hore re phele ka ho sa feleng le hore re be karolo ea lelapa la hae. Nahana ka sena: Ka mor’a hore Adama a etse sebe, Jehova o ile a mo leleka lelapeng la Hae. Kahoo, kaofela ha rona re tsoaletsoe ka ntle ho lelapa la Molimo. Empa ka lebaka la tefo ea topollo, Jehova o re tšoarela libe ’me bohle ba bontšang tumelo ho eena le ho mo mamela e tla ba karolo ea lelapa la hae. Le hona joale re thabela ho ba metsoalle ea Jehova le ea Bakreste-’moho. Kannete Jehova oa re rata.—Bar. 5:​10, 11. w25.01 21 ¶6

Tefo ea topollo ke mpho e kholo haholo eo Jehova a re fileng eona. (2 Bakor. 9:15) Kaha Jesu o ile a re shoela, re ka khona ho ba metsoalle ea Jehova. Hape re na le monyetla oa ho phela ka ho sa feleng. Re na le mabaka a mangata a ho leboha Jehova. O bontšitse hore o re rata haholo ka ho fana ka bophelo ba Mora oa hae e le tefo ea topollo. (Bar. 5:8) Jesu o ile a re re ikhopotse lefu la hae selemo le selemo e le hore re lule re ananela seo eena le Ntate oa hae ba re etselitseng sona. (Luka 22:​19, 20) Selemong sena, Sehopotso sa lefu la Jesu se tla tšoaroa ka Labone la la 2 April 2026. Ha ho pelaelo hore kaofela ha rona re ikemiselitse ho ba teng. Libeke pele ho Sehopotso le ka mor’a sona, re tla rua molemo haholo haeba re ipha nako ea ho nahanisisa ka seo Jehova le Mora oa hae ba re etselitseng sona. w25.01 20 ¶1-2

U ka tsoela pele ho ithuta ka lerato la Jehova Molimo le la Kreste Jesu haeba u lula u thuisa ka lona. Mohlomong libeke pele kapa ka mor’a Sehopotso selemong sena, u ka bala Kosepele e le ’ngoe kapa tse ’maloa ka hloko. U se ke oa leka ho bala likhaolo tse ngata ka nako e le ’ngoe. Ho e-na le hoo, nka nako ea hao ’me u nahanisise ka mabaka a eketsehileng a hore na ke hobane’ng ha re lokela ho rata Jehova le Jesu. Haeba u se u e-na le lilemo tse ngata u kolobelitsoe, u ka ’na oa ipotsa hore na ho na le lintho tse ncha tseo u ka ithutang tsona ka toka ea Molimo, lerato la hae le tefo ea topollo. ’Nete ke hore ha ho mohla re tla re re qetile ho ithuta ka lintho tsena le tse ling. Etsa sohle seo u ka se khonang ho ithuta lingoloa tse thehiloeng Bibeleng. w25.01 24-25 ¶13-15