Morara, oo Veine e Tsoang ho Oona e Thabisang Molimo le Motho
“Moo Ntate a tlotlisoang teng, ke ha le bea haholo: le hona ke moo le tla ba barutuoa ba ka.”—Joh. 15:8.
1. Monna ea hlokomelehang eo e neng e le motsoalle oa Johanne mora oa Sebedea o ile a itšoantša joang le semela?
HO RŌNA kajeno e ka ’na ea e-ba ho makatsang hore motho a itšoantše le sefate sa morara. Empa ke sona seo monna ea hlokomelehang ho feta bohle ba kileng ba e-ba lefatšeng a ileng a se etsa. Bosiung boo ka bona a ileng a noa veine ka lekhetlo la ho qetela le metsoalle ea hae e tšepahalang e leshome le motso o mong, o ile a bua mantsoe a latelang a bohlokoa: “Ke ’na sefate sa ’nete sa morara, ’me molemi ke Ntate. Ke ’na sefate sa morara, ’me lōna le makala.” E mong oa metsoalle ea hae, Johanne mora oa Sebedea, o ile a utloa, a hopola ’me a re ngolla mantsoe ao a nahantšang.—Joh. 15:1, 5.
2, 3. (a) Ho ea ka setšoantšo se entsoeng ke Jothame mora oa Moahloli Gideone, ke limela life tseo lifate tsa tšoantšetso li neng li kōpile hore li li buse ntle ho katleho? (b) Khetho ea tsona ea ho qetela ea morena e ne e tla fella ka eng?
2 Makholo-kholo a lilemo pele ho sena monna oa hona naheng eo o ile a etsa papiso kapa setšoantšo ’me ho sona a tšoantša monna e mong le sefate sa morara. Le eena, o ne a le kotsing ea bophelo ba hae. E le ntlha e tobileng ea karohano, a bolela setšoantšo ho bontša kamoo ba etsang marena, ka ho se khethe motho ea nepahetseng bakeng sa borena, ba ka thulanang le koluoa ea bosechaba. A tšoantša batho bahabo le lifate, a tšoantšetsa kamoo bana ba batlang morena ea ba busang ka lekhetlo la pele ba ileng ba kōpa sefate sa mohloare joale ba ea ho sefate sa feiga, empa lifate tsena tse beang tsa hana.
3 “Eaba,” joale Jothame, mora ea mong ea saletseng oa moahloli Gideone oa Iseraele, o re, “lifate li re ho morara: Tlo, uena, u be morena oa rōna. Morara oa re ho tsona: Nka tlohela joang veine ea ka e thabisang Molimo le batho, hore ke ee ho okamela lifate tse ling na?” Kamor’a hore sefate sena sa boraro se hane, lifate tsa tšoantšetso tsa ikutloa li tlamehile ho etsa moutloa o se nang litholoana morena oa tsona. (Baahl. 9:3-14) Ka baka la ho khetha morena e mobe, Jothame o ne a supa hore ba ne ba tla sitoa ho noa veine ea thabo e kang e tsoang morareng o nang le litholoana.—Baahl. 9:15-20.
4. Pelenyana Jesu o ne a sebelisitse se hlahisoang ke morara ho tšoantša eng, empa, he, kamorao ho moo o ile a fana ka tlhaloso e khanyang haholoanyane ho eona joang?
4 Ka lebaka lena Jesu Kreste, eo le eena a ileng a lahloa hore e se be morena holim’a sechaba sa Iseraele, hase eena oa pele ea ileng a tšoantša motho, eena ka boeena, le sefate sa morara. O ne a sa tsoa kenyelletsa sehopotso bakeng sa lefu la hae le atamelang, seo ho sona a ileng a sebelisa veine senoelong se tloaelehileng hore e emele mali a hae a neng a tla tšolloa motšehare oa mantsiboea ka la hosesane. Empa, joale, ho hlalosa veine ka mokhoa o hlakileng haholo e le e tšoantšetsang, a re: “Ho qala nakong eona ena, ha ke sa tla hlola ke e-noa se beoang ke morara, ho tla be ho fihle tsatsi leo ke tla se noa le Iōna se le secha, ’musong oa Ntate.” (Matt. 26:26-29) Veine e ncha e hlile e thabisa haholo, ’me “veine” e tla nooa e le ncha ’musong oa Ntate oa hae oa leholimo ntle ho pelaelo e ne e tla ba veine ea thabo.
5. Setšoantšong sa hae sa sefate sa morara, ke’ng se bontšang hore na ebe Jesu o ne a se sebelisetsa ho tšoantša eena a le mong kapa che?
5 E le bosiu ba Paseka, veine e ne e tloaelehile, bonyane ho nooa likopi tse ’ne ’mōkeng ona oa ho qetela Jesu a e-na le barutuoa ba hae ka selemo sa 33 C.E. Ka ho utloahalang, hona ha etsa hore joale a bolele setšoantšo se secha ka sefate sa morara. Leha ho le joalo, setšoantšong sena Jesu o ile a sebelisa sefate sa morara kaofela ha sona e le ho tšoantšetsa ho fetang eena a le mong. Ho hlakisa sena, a re ho barutuoa ba hae ba tšepahalang: “Ke ’na sefate sa morara, ’me lōna le makala.”—Joh. 15:5.
6. Kaha ho ne ho le teng baapostola ba leshome le motso o le mong feela mono, na Jesu o ne a bolela hore “morara” o tla ba le makala a leshome le motso o le mong feela, kapa che, haholo leseling la mantsoe a hae ho Mattheu 21:43?
6 Ka mantsoe ana Jesu o ne a sa bolele hore ‘sefate sena sa morara’ sa Bokreste se ne se tla ba le makala a leshome le motso o le mong feela, ho lumellana le baapostola bao ba tšepahalang ba leshome le motso o le mong ba neng ba lutse le eena tafoleng ka nako eo. “Sefate sa morara” sa Messia se ne se tla ba le makala a mang a mangata, a lekaneng ho etsa sechaba se secha se feletseng sa Bokreste. Jesu o ile a fana ka tlhase ea sechaba sena se secha ha a re ho baemeli ba sechaba se sa lumeleng sa Bajode: “’Muso oa Molimo le tla o amohuoa, ’me o tla neoa sechaba se seng se tla bea litholoana tsa oona.”—Matt. 21:43.
7. Ho Pesaleme ea 80:8-15, ke sechaba sefe se tšoantšoang le “morara,” ’me ke hobane’ng ha ho bile teng mohoo oa hore Molimo o se nahane?
7 Ho tšoantša sechaba le sefate sa morara ho ne ho se hocha. Ntate oa Jesu oa leholimo, Jehova, o ile a sebelisa semela sena e le tšoantšetso ea sechaba. Ka mohlala, o ile a susumetsa mopesaleme Asafe hore a bue ka eena ’me a re: “[Uena Jehova] u ile ua hlomola morara Egepeta [mehleng ea Moshe], ua tla o hloma moo u lelekileng lichaba teng [Lefatšeng la Pallo]. U ile ua o lokisetsa mobu, metso ea teba, eaba oona o tlala naha. Moriti oa oona oa koahela lithaba, . . . Oho Molimo oa mabōtho, ak’u boele u khutle; ak’u talime u le maholimong, u bone, u hlokomele morara ona. Sireletsa se hlomiloeng ke letsoho la hao le letona.” (Pes. 80:9-16, phet. e ncha) Kaha Jerusalema e ile ea timetsoa ka 607 B.C.E. ’me joale Mehla ea Balichaba ea qaleha ka nako eo hore lichaba tsa lefatše li buse lefatše lohle, sechaba sa Iseraele se ile sa imeloa haholo ke tlatlapo ea lichaba tsa Balichaba. Kahoo, ke ka hona mopesaleme a hooang habohloko hore Molimo o ba nahane.
8. Jehova o ile a lema “morara” o mocha neng, ’me Esaia 5:3-7 e hlalosa bohlokoa ba sena joang?
8 Ha Jehova Molimo a tlotsa Jesu ka moea o halalelang hoba a kolobetsoe Nōkeng ea Jordane, ho ile ha hlongoa “sefate sa morara” se secha. Hona ho ne ho hlokahala ka matla. Hobane’ng? Lilemo tse ka bang 700 pele, moprofeta Esaia o ne a hlile a bolela lebaka, a re: “’Me joale, Iōna ba ahileng Jerusalema, le lōna banna ba Juda, a le keng le ahlole taba eo ke nang le eona le tšimo ea ka ea merara. Se ka beng se etselitsoe tšimo ea ka ea merara, ke sefe ka ntle ho seo ke se entseng? Ha ke ne ke tšepile hoba e tla bea litholoana tse monate, ke’ng ha e beile tse babang na? Joale, a nke ke le tsebise see ke tla se etsa ka tšimo ea ka ea merara hona joale: ke tla tlosa motero oa eona, ke e etse makhulo; . . . ke tla e senya, e se hlole e hlaholoa, e lengoa, ’me e mele libajoa le meutloa; ’me ke tla laela maru hore a se hlole a nesetsa pula ho eona. Ruri, tšimo ea merara ea Jehova oa makhotla ke ntlo ea Iseraele, banna ba Juda ke litlama tsee a neng a khahlisoa ke tsona; o na a lebeletse ho loka, empa a bona hloriso, a lebella kahlolo, empa a bona mohoo oa hloreho.”—Esa. 5:3-7.
9. Hamorao, mehleng ea Jeremia, Jehova o ile a botsa potso efe ka “morara” oa hae oa bosechaba?
9 Lintho ha lia ka tsa ntlafala ho Iseraele, empa, lilemo tse ka bang 100 hamorao, Jehova o ne a ka re ho Iseraele: “E se e le khale u robile joko ea hao [ea bokhoba Egepeta], u lokolotse litlamo tsa hao, ua re: Ha ke sa tla sebeletsa. Ke moo u ineetseng bootsoa marallaneng ’ohle a phahameng le ka tlas’a lifate tsohle tse mahlaku. Athe ’na, ke na be ke u hlomile u le morara o fetisang ka molemo, oa mofuta oa sebele-bele; u mpa u iphetotse joang ho ’na morara oa mofuta osele?”—Jer. 2:20, 21; Hos. 10:1, 2.
10. Kaha Iseraele e ne e tla hloka kelello, Deuteronoma 32:28-33 e ile ea re Iseraele e tla ba “morara” oa mofuta ofe?
10 Ho bile joalokaha Moshe, morao koana ka 1473 B.C.E. a hlile a bolela: “Hobane ke sechaba se hlokang kelello; ha ho kutloisiso ho bona. . . . Hobane morara oa bona o tsoa morareng oa Sodoma le masimong a Gomorrha; litholoana tsa bona ke litholoana tse nang le mahloko, litholoana tsa bona lia baba. Veine ea bona ke mahloko a lidrakone, ke mahloko a bolaeang a qoaane.”—Deut. 32:28-33.
TLHOKAHALO EA “MORARA” O MOCHA
11. Ho ea ka setšoantšo sa Jesu sa tšimo ea moraro, Messia o ne a tla tšoaroa joang matsohong a balemi nakong ea kotulo?
11 Nako e ne e loketse bakeng sa hore ho kotuloe “morara” ona oa tšoantšetso oa sechaba ha Jesu Mora oa Molimo a fihla e le ea tlotsitsoeng, kapa Messia, ka 29 C.E. Eena joale ka moemeli oa Molimo o ne a tla bokella eng ‘morareng’ ona? Ka la 11 Nisane, 33 C.E., matsatsi a mararo pele ho ho felella ha tšebeletso ea hae ea pontšeng ea lilemo tse tharo le likhoeli tse tšeletseng, Jesu a supa kamohelo eo a neng a tla e fumana, ka ho pheta setšoantšo. A lebisa sena ho baprista ba baholo le baholo ka tempeleng e le tlhaloso ea likhanyetso tsa bona mesebetsing ea hae le lithutong, a re:
“Utloang setšoantso se seng: Motho o na a le teng, e leng mong a ntlo, ea hlomileng tšimo ea merara; a e sireletsa ka motero, a cheka sehatelo teng, a e hahela tora, ’me a e laeletsa balemi, a ntoo eta. Eare ha nako ea litholoana e atametse, a roma bahlanka ba hae ho balemi ho nka litholoana tsa hae. Empa balemi ba tšoara bahlanka ba hae, ba otla e mong, ba bolaea e mong, ba tlepetsa e mong ka majoe. A boela a roma bahlanka ba bang, ba fetisang ba pele ka bongata, ’me le bona ba etsoa joale ka ba pele. Ho feleng, a romela mor’a hae ho bona, a re: Ba tla hlompha mora oa ka. Empa balemi, ha ba bona mor’a hae, ba bolellana, ba re: Enoa ke mojalefa; tlong, re ’molaeeng, re tle re inkele lefa la hae. Eaba ba mo tšoara, ba mo lahlela ka ntle ho tšimo ea merara, ba ’molaea. Ana mohla mong a tšimo ea merara a fihlang, balemi bao o tla ba etsa joang na? . . .
“. . . Ana ha lea ka la bala Mangolong taba e reng: Lejoe leo bahahi ba le lahlileng, ke lona le entsoeng la motheo, la sekhutlo? Le entsoe le joalo ke Morena, ’me ke le makatsang mahlong a rōna. Ka baka leo ke re ho lōna: ’Muso oa maholimo le tla o amohuoa, ’me o tla neoa sechaba se seng se tla bea litholoana tsa oona. Ea tla oela holim’a lejoe leo, o tla robeha, ’me le tla pitla eo le mo oelang holimo.”—Matt. 21:33-44.
12. Balemi ba tšimo ea morara ea tšoantšetso ba ile ba sitoa ho fana ka tholoana ea mofuta ofe, ’me kahoo Molimo o ne o tla tiisa joang hore o fumana tholoana e nepahetseng?
12 Ke litholoana tsa mofuta ofe tseo balemi ba Baiseraele ba “tšimo ea morara” ea bosechaba ea Jehova ba tlamehang ba be ba li file Mora oa hae Jesu Kreste? E ne e tlameha hore e be tumelo ho Mora e le Messia oa ’nete ea tšepisitsoeng ’me ho mo amohela e le mora oa Ea lemileng le eo e leng eena mong a “tšimo ea morara” ea bosechaba ea Iseraele. Hoja ebe ba ne ba beile tholoana ea mofuta o joalo ho Mora oa Molimo, ho ka be ho ile ha fella ka hore ba nkeloe ’musong oa sebele oa Molimo oa Messia. Kaha ha baa ka ba bea tholoana e neng e ka tšoaea ’muso oa sebele oa Molimo Iseraeleng, tokelo ea ho ba ’muso oa Molimo ba ne ba tla e amohuoa e le sechaba. Kahoo, sechaba se seng sa balemi ba “tšimo ea morara” se ne se tla etsoa. Sechaba sena se secha se ne se tla bea litholoana tse loketseng bakeng sa ’muso oa Molimo. Balemi bao ba ne ba tla bea litholoana tse loketseng ho Molemi oa Bomolimo le Mong a tšimo ena ea morara.
13. (a) Balemi ba Bajode ba “tšimo ea morara” ba ile ba nahana hore ba ka ikhapela lefa la Mora oa Mong a tšimo ka ho etsa joang? (b) Jesu o itse ho tla etsahala joang ka lejoe la borena leo lihahi tsa mohaho li le lahlileng?
13 Tekanyetsong ea Molimo ea bao ba neng ba tla thabela litokelo tsa ’muso ona oa hae oa Messia, ntho ea bohlokoa ke “litholoana.” Balemi ba Bajode ba ile ba nahana hore, ka ho koetla litholoana tse lebelletsoeng ka tokelo ba bile ba bolaea Jesu “mojalefa” oa ‘muso oa Molimo, ba ne ba ka ikhapela lefa la hae. Ba nahana hore ba tla ipoloka boreneng ba ’muso oa tšoantšetso oa Molimo, tlas’a selekane sa molao oa Moshe. (Joh. 11:47-53) Empa che, ho latela qetello e fumanoang setšoantšong sa Jesu. (Matt. 21:41) Jesu o ile a re’ng ka Lejoe la borena leo lihahi tsa mohaho oa Molimo li neng li le lahlile letsatsi hoba a kene a palame ka tlhōlō Jerusalema? Le ne le tla etsoa lejoe le leholo la sekhutlo mohahong o mocha oa borena oa Molimo, ‘’musong oa Molimo’ oa leholimo.
14. Ke hobane’ng ha Jesu a sa ka a nahana e le ho se nang taba hore a etse setšoantšo sa morara le makala pelenyana a tšoaroa Gethesemane?
14 Mabapi le ‘morara oa ’nete’ o lemiloeng ke Jehova Molimo ’me o ntse o hlaoloa ke eena, Jesu o tsebile hore o ke ke oa bolaoa, le hoja balemi ba Bajode ba “morara” oa bosechaba oa tšoantšetso ba ile ba lumelloa ho mo bolaea hamorao ka letsatsi la Paseka. Kahoo, le hoja e bile pele a e-ea tšimong ea Gethesemane le ho tšoaroa, Jesu o ile a nahana hore ke ho loketseng hore a fe barutuoa ba hae setšoantšo sa morara le makala.
15. Ho ea ka Johanne 15:1-5, molemi oa “sefate sa ’nete sa morara” ke mang, ’me o etsa joang ka makala ho ea ka hore na a bea litholoana kapa che?
15 “Ke ’na sefate sa ’nete sa morara, ’me Ntate ke molemi. Lekala le leng le le leng le ho ’na le sa beheng litholoana, oa le pōma, ’me le leng le le leng le behang litholoana, oa le faola, hore le tle le behe litholoana tse ngata ho feta. Lōna le se le hloekile ka baka la lentsoe leo ke le buileng ho lōna. Lulang ka ho ’na, le ’na ka ho lōna. Joalokaha lekala le ke ke la beha litholoana ka bolona ha le se sefateng sa morara, ho joalo le ho lōna ha le sa lule ka ho ’na. Ke ‘’na sefate sa morara, lōna le makala. Ea lulang ka ho ’na, le ’na ka ho eena, o beha litholoana tse ngata, hobane ntle ho ’na le ke ke la etsa letho.”—Joh. 15:1-5, phet. e ncha.
HO LEMA LE HO HLAHOLA
16, 17. (a) Jehova o ile a lema “morara oa ’nete” neng, hona joang? (b) Jesu Kreste o bile moholoanyane ho mopatriareka Jakobo joang, ’me ho ile ha hlahisoa “makala” neng ‘morareng oa ’nete’?
16 Molemi e moholo oa Morara o ile a lema morara ona o beang neng? Ke ka selemo sa 29 C.E., nakong eo ka eona a ileng a tlotsa Jesu ea kolobelitsoeng bocha ka moea oa hae o halalelang. (Esa. 61:1, 2) Ke nakong eo Jehova a ileng a thea thupa e setsing ea “sefate sa morara” sa tšoantšetso sa ’muso oa Messia. Mona re hopola hore ’muso oa tšoantšetso oa Iseraele o ile oa hlōmela ho mopatriareka Jakobo, ea ileng a reoa lebitso la Iseraele hamorao. Ea e-ba ntate oa bara ba leshome le metso e ’meli, bao ho bona ho tsoileng meloko e leshome le metso e ’meli ea Iseraele. (Lik. 7:8-14) Kahoo Jesu Kreste o ne a lumellana le Jakobo.
17 Jakobo enoa e Moholo ke eena thupa e setsing ea sefate sa morara. O ile a khetha baapostola ba leshome le metso e ’meli, ba ileng ba fetoha “makala” a kamoso bakeng sa ‘sefate sena sa morara’ sa moea. (Joh. 15:16; 6:70) Ke ka lebaka leo, bosiung boo ba Paseka, a ileng a ba bitsa “makala.” Empa matsatsi a 51 hamorao, ka letsatsi la Pentekonta, baapostola ba leshome le metso e ’meli ba tšepahalang ba ile ba tlotsoa ka moea o halalelang. Ka tsela ena ba fetoha metheo ea bobeli e tlase bakeng sa sechaba se secha sa Iseraele oa moea. Ho bona, Jerusalema e mocha oa leholimo o hahiloe. (Tšen. 21:14; Ba-Ef. 2:20) Leha ho le joalo, ka letsatsi leo la Pentekonta ba bang sehlopheng seo sa barutuoa ba ka bang 120 ba bile har’a ba pele ba ileng ba fumana moea o halalelang le ho bua ka maleme a sele, ’me ka sena le bona ba etsoa “makala” a ‘sefate seo sa moea sa morara’ Jesu Kreste.
18. Ke monyetla ofe o sa kang oa tšoaroa ke Iseraele ea tlhaho, joalokaha o beiloe ho Exoda 19:6, 7, ’me Petrose o sebelisa mantsoe a polelo eo e halalelang ho bo-mang?
18 Moo, sechaba se secha, Iseraele oa moea, sa hlaha. Iseraele oa tlhaho e le sechaba e ne e sa ipha monyetla oo Jehova, ka ’muelli oa hae Moshe, a neng a o beile pel’a eona ho latela Exoda 19:6, 7. Ka hona mantsoe a polelo eo ea bomolimo a ile a sebelisoa ke moapostola Petrose ho litho tsa sechaba se secha sa Iseraele oa moea. Hokae? Lengolong la hae la pele le bululetsoeng, ho 1 Petrose 2:9, 10, moo ho ngoliloeng hore: “Empa ha e le Iōna, le moloko o khethiloeng, le baprista le marena, le mofuta o halalelang, le sechaba se ruiloeng, le tle le bolele lithoko tsa ea le bitsitseng lefifing ho le kenya leseling la hae le hlollang; lōna bao le neng le se sechaba pele, empa joale le sechaba sa Molimo; Iōna bao le neng le sa hauheloa, empa joale le hauhetsoe.”
19. Hoba ho phethahatsoe Esaia 5:5-7, ho ile ha etsahala joang ka sechaba sa Iseraele oa moea, ’me ke hobane’ng ha Jehova a ile a e hlokomela ka mokhoa o tšoanang le “tšimo ea morara” ea Iseraele ea tšoantšetso?
19 Ka thabo, sechaba sa Bokreste sa Iseraele oa moea se ile sa tsoela pele ho atleha hoba Jehova a phethahatse mantsoe a hae a temoso a boletsoeng ho Esaia 5:5-7, ho “tšimo ea morara” ea tšoantšetso ea Iseraele oa tlhaho. A hlahola seo a se lemileng, o fana ka tlhokomelo e hlokahalang ‘makaleng’ a “sefate sa ’nete sa morara,” Jesu Kreste, ka mokhoa o tšoanang le oo a ileng a hlokomela “tšimo ea morara” ea pele ea Iseraele ea tlhaho ho tla fihlela ka 33 C.E. O etsa joalo ka morero oa ho boloka “makala” a hloekileng le a beang ao e leng barutuoa ba Jesu Kreste. Mahlomela le lithupa tse shoeleng li ke ke tsa e-ba le sebaka har’a “makala” ao a hloekileng. Ke ka lebaka leo, setšoantšong sa hae, Jesu a ileng a bua tjena ho baapostola ba hae ba tšepahalang: “Lekala le leng le le leng le ho ‘na le sa beheng litholoana, oa le pōma, ’me le leng le le leng le behang litholoana, oa le faola, hore le tle le behe litholoana tse ngata ho feta. Lōna le se le hloekile ka baka la lentsoe leo ke le buileng ho lōna.”—Joh. 15:2, 3, phet. e ncha.
20. Ke ka baka la ho amohela ha bona eng Jesu a neng a ka bolela baapostola ba leshome le motso o le mong ba tšepahalang ba “hloekile,” tumellanong le tlaleho ea Johanne 6:67-69?
20 Judase Iskariota, moapostola oa moeki, o ne a le sieo ha Jesu a bua mantsoe ao. Jesu o ne a se a mo neile tsela hore a tsoe har’a bona qetellong ea selallo sa Paseka. (Joh. 13:26-30) Baapostola ba saletseng ba leshome le motso o le mong ba tšepahalang ba ne ba amohetse ka pelo eohle polelo ea hae kapa molaetsa oa Messia, ’me ka lebaka leo a ba bolela ba “hloekile.” Ka mohlala, holimo ka leboea Kapernauma, ha Jesu a ne a botsa baapostola bao, “Na le lōna le rata ho ikela na?” Simone Petrose a arabela: “Morena, re ka ea ho mang? ke uena ea nang le mantsoe a bophelo bo sa feleng. ’Me re lumetse, ra ba ra tseba hobane ke uena Kreste, Mokhethoa oa Molimo.”—Joh. 6:67-69.
21. Kahoo, ke linthong life “makala” ao a baapostola a neng a hloekile, ’me ke phello efe eo mantsoe a Jesu a builoeng lekunutung a bileng le eona ho bona?
21 Ka hona ho ne ho se teng makala a shoeleng a sa beeng litholoana ho baapostola bao ba tšepahalang. Ho ne ho se teng mahlomela a sitisang a bolumeli ba Bojode boo e seng ba Mangolo a khomaretseng ho bona. Ba ne ba sa tsila-tsile tlhokomelong eo ba neng ba e nea “Mokhethoa oa Molimo.” Ba ne ba lumela hore ke “Kreste, Mor’a Molimo o phelang.” (Matt. 16:16) Ka lekhetlo le leng hape, Petrose a re ho eena: “Bona, rōna re tlohetse tsohle, ’me re u latetse, re tla ba le eng ka hona?” (Matt. 19:27) Har’a liqeto tse joalo, mantsoe a Jesu, haholo-holo a ileng a boleloa ho baapostola lekunutung, e tlameha ebe a bile le phello e hlatsoang, a ba sia ba le boemong ba moea bo ‘hloekileng.’ “Makala” ‘ohle a lulang a le boemong bo ‘hloekileng’ joalo a ka ineela ka boitlamo bo feletseng morerong o khethehileng oa “sefate sa ’nete sa morara” sa Jehova. Hona ho ne ho tla sebeletsa thabo bakeng sa Molimo le batho.