Ho Buisana le Meea—Ke’ng ha ho Haneloa?

UENA! U monyako ha ka u bolela Bibele! Ha ke kholoe mahlo a ka. . . . Mae-de-Santo [ngaka ea litaola ea Brazil ea mosali] ea ka, u se u le e mong oa Lipaki tsa Jehova!”

Ena ke tumeliso eo paki ea Jehova ea Mokreste e ileng ea e fumana Rio de Janeiro mosebetsing oa eona oa boboleli oa ntlo le ntlo. E ne e kile ea e-ba e mong oa Mak’hatholike a likete-kete a Brazil a nang le tšebetso eitseng ea moea. Leha ho le joalo, o ne a tlohetse Bok’hatholike le tšebetso ea moea hore e be e mong oa Lipaki tsa Jehova. Hobane’ng? Na o ne a sa khotsofale ke mosebetsi oa hae e le ngaka ea litaola? Na o ne a sa khotsofatsoe ke ho buisana le meea? Tsena ke lipotso tse ileng tsa botsoa ke mong a ntlo puisanong e monate e ileng ea latela ho kopana ha bona ka lekhetlo la pele.

Ho hakanngoa hore Brazil ho teng karolo ea 70 lekholong ea Mak’hatholike ka lebitso ba bileng ba nang le kopano e itseng le meea. Ka ho totobetseng ba ikutloa hore ho na le ho hong ho haellang bolumeling ba bona ba K’hatholike, ho ba susumelletsang hore ba shebe sebakeng se seng. Empa ke eng tšebeletsong ea meea e ba khahlang? Ho ba bangata e ka ’na ea e-ba liphiri tse amang mekete ea lingaka tsa litaola. Ho ba bang, khoheli e ka ’na ea tsoaloa ke ho buisana le moratuoa e mong ea shoeleng kapa ho botsa ka ho bōka ha monna oa hae kapa mosali.

Tabeng e sa tsoa boleloa, leha ho le joalo, e bile ho nyoreloa ’nete ho ileng ha etsa hore mosali enoa a batlisise ka tšebeletso ea meea ha a le lilemo li 22. A tsoela pele kapele, ’me kamorao ho nako e khutšoanyane haholo o ne a laola setsi sa lingaka tsa litaola. Ka lilemo tse 24 a tsoela pele boemong boo. Boholo ba kopano ea hae le lefatše la meea bo ne bo fella ka molemonyana o itseng o bonahalang bakeng sa ba neng ba e-tla ho eena, ebang ke licheleteng, tulisanong kapa ’meleng. Empa, kamoo a lumelang kateng, mabakeng a mangata mosebetsi oa hae e le senohe o ne o fella ka malapa a arohaneng le ho se tšepahale.

Empa leha ho le joalo haeba “molemo” o itseng o ka finyelloa ka puisano le meea, ho ka haneloa hobane’ng? Na ho loketse hore Mokreste a ka ameha mesebetsing e joalo, haesita leha e le ka morero oa ho itseng o “molemo”?

PUISANO E MOLEMO LE SEBAKA SA MOEA

Ha re talima ka Mangolong bakeng sa tataiso re fumana hore qalehong ea pale ea motho o ne a buisana le sebaka se sa bonahaleng sa moea. Mabapi le batho ba babeli ba pele, rea bala: “Joale ba utloa lentsoe la Jehova Molimo ha a tsamaea tšimong ka matsiboea ha ho pholile.” (Gen. 3:8) Linakong tseo tsa puisano, motho oa pele o ile a ithuta ho hongata ho neng ho le molemo. Hoja ebe o kile a ela hloko keletso e joalo, a ka be a ile a bolokoa mahlomoleng a mangata haesita le Iona lefu.

Nakong ea bapatriareka ba Baheberu, le teng, ho ile ha buisanoa ka ho toba pakeng tsa bahlanka ba Molimo le sebaka se sa bonahaleng. Ho tloha mohloling o sa bonahaleng, Noe o ile a amohela litaelo tsa ho haha areka e khōlō bakeng sa ho bolokoa Moroallong o moholo o neng o e-tla. A mametse Moeletsi oa hae ea sa bonahaleng ho ile ha fella ka molemo o moholo ho Noe le lelapa le hae—le ho rōna hape. Hoja Noe a se ke a mamela litaelo tseo a neng a li filoe, re ka be re se teng mona hore re ka mamela mantsoe leha e le afe, le haeba ke a tsoang mehloling e sa bonahaleng kapa e bonahalang.—Gen. 6:9-22.

Hoba mopatriareka Abrahama a fumane puisano e joalo, eena le lelapa la hae ba kile ba fallela naheng e ’ngoe. (Gen. 12:1-4) Nakoana hamoraonyana, Molimo oa bea motho enoa tlas’a teko ka ho mo bolella hore a nyehele mora oa hae Isaaka e le sehlabelo. A latela taelo eo ka ho feletseng, a bile a fihla ntlheng ea ho phahamisa thipa ho bolaea mora oa hae. Leha ho le joalo, Abrahama o ile a emisoa ke lentsoe le tsoang maholimong a sa bonahaleng. (Gen. 22:1-18) Puisano e tšoanang e tobileng ea Molimo e bile bopaki bo bonahalang nakong e telele ea baahloli ba Iseraele ’me e ile ea fihleloa hamorao ke ba neng ba khethiloe ke Molimo ho sebeletsa e le baprofeta ba sechaba seo. Ho mamela puisano e joalo e tsoang mohloling o phahametseng motho ho ile ha tlisetsa bohle ba neng ba ameha molemo.

MORENA SAULE O AHLOLELOA HO BUISANA LE MEEA

Leha ho le joalo, hase puisano eohle le sebaka se sa bonahaleng e fellang ka molemo. Ha morena oa pele oa Iseraele, Saule, a ne a tlameha ho thulana le Bafilista ntoeng ea makhaola-khang, “A tšaba, le pelo ea hae ea thothomela haholo.” Saule a ikutloa hore o hloka thuso, empa Jehova o ne a ke ke a arabela morena ea sa tšepahaleng. Saule joale a laela hore: “Mpatleleng mosali oa senohe, ke ee ho eena.” Phello ea e-ba efe? Ho bua ka senohe, hoo ho neng ho nahanoa hore ke moea oa moprofeta ea shoeleng Samuele oa bolella morena ea tšoenyehileng hore: “Jehova o tla u neela, uena le Iseraele hammoho, matsohong a ba-Filista; hosasane, uena le bara ba hao, le tla ba le ’na.”—1 Sam. 28:4-19.

Na boprofeta bona bo ile ba fetoha ’nete? E, empa e seng kaofela. Baiseraele ba ile ba neeloa Bafilista ’me ba hlōloa hampe. Saule le bara ba hae ba bararo ba shoa ntoeng. Ho fapana le se neng se profetiloe, leha ho le joalo, mora oa Saule Ishe-boshethe ha a ka a shoa mohla letsatsi leo. Ke ’nete, hoja ebe Saule o ne a ile a mamela boprofeta ’me a checha lebaleng la ntoa, ho ka be ho bile “molemo” bakeng sa hae le bara ba hae ba bararo. Bonyane ba ka be ba ile ba phela haleletsana. Empa ho ka be ho bile molemo haholo hoja ebe Saule ho ne ho se mohla a kileng a bonana le senohe sa Ene-dore. Nahana hore na ke ka lebaka lefe ha hona e le ’nete.

Pelenyana, Saule “o ne a tlositse linohe le baprofeta ba bohata naheng eo.” (1 Sam. 28:3) Hobane’ng? hobane o ne a tseba hore molao oa Molimo o ne o re: “Ho se ke ha fumanoa ha eno . . . mophofi ea phofang, kapa selaoli se laolang, kapa senohe, kapa moloi, le moupelli, leha e le ea botsang balimo, le ngaka e reng ea profeta, leha e le ea botsang bafu; hobane bohle ba etsang litaba tseo ba manyala ho Jehova.” (Deut. 18:10-12) Kahoo, ka ho bonana le senohe, Saule ea sa tšepahaleng o ile a kena tlas’a thohako e ’ngoe hape ho Jehova ho latela oona molao oo eena, e le morena, a neng a tlameha ho o phahamisa. Joale, kaha Jehova Molimo o ne a nyatsa linohe ’me ho se mohla a kileng a arabela Saule ka baka la liketso tse mpe tsa nakong e fetileng tsa morena, u ka ’na ua botsa: Ke mang ea ileng a rōmela molaetsa ho Saule ka senohe?

MOHLOLI OA MELAETSA EA BONOHE

Karabelo e tla hlaka ha re ntse re tsoela pele ho batlisisa tlalehong ea Bibele. Makholo-kholo a lilemo Saule a shoele, moprofeta Esaia o ile a ngola hore: “Ha ba ka re ho lōna; Botsisisang ba nyollang bafu, le linohe tse toutang, tse oeoetsang, le mpe le re: Hleka sechaba ha se na ho botsa Molimo oa sona na? Hleka ho ka botsoa bafu taba tsa ba ultoang na? E-eang molaong le bopaking.” (Esa. 8:19, 20) Ka ho hlakileng, he, ba eang ho linohe ha ba ee ho Molimo o Matla ’ohle, Jehova. Kahoo, mohloli oa melaetsa e amoheloang ke ba “oeoetsang” ke ofe?

Potso eona eo mohlomong e ile ea hlaha ho batho ba lekholong la pele la lilemo C.E. ha ba utloa bonohe bo neng bo etsoa ke linohe tse etsang chelete. Ka mohlala, nahana taba ea “ngoanana oa lekhabunyane” ea itseng oa Filippi. O ne a e-na le “moea” ’me a ‘etsetsa beng ba hae chelete e ngata ka bonohe.’ Bonneteng, a ’na a latela moapostola Pauluse le metsoalle ea hae ’me a ntse a hooa a re: “Banna bao ke bahlanka ba Molimo o holimo-limo ba re bolellang tsela ea poloko.” Joale, o ne a bua ’nete, Empa na mantsoe a hae a ne a tsoa ho Molimo? Che, hobane Pauluse o ile a qetella a khathetse ke ho utloa molaetsa ona ’me a re: ho moea: “Ke u laela ka lebitso la Morena Jesu Kreste hore u tsoe ho eena. Eaba o tsoa ka eona nako eo.” Ka mantsoe a tiileng, tlaleho e bululetsoeng e khetholla “moea” oo e le “moea oa Pythone [ledemona la bonohe].”—Lik. 16:16-18, bapisa le NW.

Mohlomong ho ne ho ka ’na ha e-ba thata bakeng sa bashebelli ba bang ho lekanyetsa hore na ngoanana enoa o ne a sebeletsa eng. Leha ho le joalo, Pauluse o ne a tseba hore ha a ea fumana matla a hae ho Molimo empa mohloling o mong o phahametseng motho. Ledemona le ne le ikarabella. Hore meea e joalo e ne e le teng, ho totobala ka se ileng sa etsahala Efese nakoana hamoraonyana.

Mabapi le mesebetsi ea moapostola Pauluse motseng oo, rea bala: “Molimo oa ’na oa etsa mehlolo e makatsang ka matsoho a Pauluse. Esita liduku le masela a neng a amile ’mele oa hae, a na a beoa holim’a ba kulang, ’me maloetse a ne a ba tlohela, le meea e mebe e ne e tsoa ho bona.” Ha bara ba supileng ba moprista e moholo oa Mojode Skeva ba leka ho leleka “moea o mobe,” monna ea nang le modemona a tlolela ho ba lelekang meea ’motona, hoo ba ileng ba tlameha ho balela “ba hlobotse ba le maqeba.”—Lik. 19:11-16.

“Taba eo ea tsejoa ke ba-Jode kaofela le ba-Gerike ba hahileng Efese,” kamoo ho bolelang tlaleho e bululetsoeng, “ba oeloa bohle ke tšabo, ’me lebitso la Morena Jesu la tlotlisoa.” Ka baka leo, “ba bangata ba lumetseng ba tla, ba ipolela le ho pepesa liketso tsa bona. Le ba bangata ba neng ba tšepile litaba tsa bonohe ba tlisa libuka tsa bona, ba li chesa pel’a bohle,” le hoja libuka tse joalo li ne li rekiloe ka chelete e ngata. Batho bao ba ne ba tseba hore ba tlameha ho lahla mekhoa ea bona ea bonohe le libuka tse amanang le bona. Ba sokolohela Mohloling oa ’nete o neang bohlale le bophelo Jehova Molimo, ba furalla mohloli o khopo, oa bodemona oa bonohe ba boloi.—Lik. 19:17-20.

NA LIPHELLO TSE “MOLEMO” KA MEHLA LI BONTŠA MOHLOLI O MOLEMO

Ntle ho pelaelo, melaetsa leha e le efe ea boloi eo Baefese bao ba neng ba e fumana nakong e fetileng hase ka mehla e neng e fosahetse. Ka linako tse ling, melaetsa eo mohlomong e ne e fella ka ho bonahalang eka ke molemo ho batho ka bomong, ba bang, le haeba ke licheleteng kapa ’meleng. Ka mekhoa ea boloi, Ba-Efese ba itseng ba ne ba bile ba isitsoe ho phekoloeng maloetse a mang a bona a tebileng. Empa na hona ho ne ho etsa hore mokhoa e be o nepahetseng? Ka lekhetlo le leng, moapostola Pauluse a lemosa hore “etsoe Satane le eena a ikhakanya ka sebopeho se kang sa lengeloi la leseli.” Kahoo, e le hore a thetse ba sa lebelang, Satane Diabolose a ka etsa lintho tse bonahalang li le molemo. Pauluse o phaella ka hore bahlanka ba Satane le bona ba etsa ka tsela eona eo.—2 Ba-Kor. 11:14, 15.

Ka baka leo, Bakreste ka bohlale ba lula ba falimehile ’me ba qoba kopano leha e le efe le “lengeloi lena la leseli” le khopo le bahlanka ba Iona. Batho ba borapeli ba ‘leka meea, hore ba bone na ke e tsoang ho Molimo’ kapa ho sera sa oona se seholo se imenneng habeli, Satane Diabolose. (1 Joh. 4:1) Ho feta moo, Jesu Kreste o ile a bolela: “Hase bohle ba reng ho ’na: Morena! Morena! ba tlang ho kena ’musong oa maholimo . . . Tsatsing leo, ba bangata ba tla re ho ’na, Morena, Morena, na ha rea ka ra . . . leleka bademona ka lebitso la hao . . . ? ke tla ba bolella pepeneneng, ke re: Ha kea ka ka le tseba le mehla; ntloheleng, lōna ba sebetsang bokhopo.” (Matt. 7:21-23) Ana ke mantsoe a matla, empa a ka sebetsa ho batho ba ikutloang hore ba ka buisana kapa ba leleka meea e khopo. Ho totobetse hore batho ba joalo ba ka ’na ba thetsoa habonolo ho sebeletseng Satane ho e-na le Molimo oa ’nete.

HANELA MATLA A MEEA E KHOPO

Ho Bakreste ba Efese, moapostola Pauluse o ile a ngola, a re: “Aparang lihlomo tsohle tsa Molimo, . . . Hobane ntoa ea rōna ha e loane le nama le mali, empa e loana le . . . meea e bolotsana e sebakeng sa leholimo.” (Ba-Ef. 6:11, 12) Haeba Mokreste a ne a ka bonana le matla a joalo ka senohe, na ho ka boleloa hore o ne a e loantša? Che, ka sebele. Ho e-na le hoo, na o ne a ke ke a tlameha ho senya lintho leha e le life tse amanang le ho buisana le bademona ka mokhoa o joalo, a latela mohlala oa balumeli bale ba lekholong la pele la lilemo Efese ba ileng ba ba chesa le tsona libuka tse neng li amana le boloi?

Eo e neng e le ngaka ea litaola ea mosali eo re mo boletseng pelenyana o ile a latela tsela ena ha a ithuta ’nete ea Bibele. A senya thepa eohle ea hae e amanang le boloi, a chesa litšoantšo tsohle tsa hae le liaparo tse khabane tseo a neng a li apara nakong ea mekete ea bongaka ba boloi. Hona a ho etsa pontšeng, pel’a ba neng ba khotsoe hore ntho e joalo e tla bea bophelo ba hae kotsing. ’Me o ntse a phela bophelo bo maolo-folo haholo, a neela lihora tse fetang 140 ka khoeli ho boleleng litaba tse molemo tsa ’Muso oa Molimo. E, le eena mong a ntlo ea neng a maketse ea ileng a mo lumelisa ka mantsoe a boletsoeng pelenyana o ile a latela mohlala oa hae, a lahla motsoako oa Bok’hatholike le tšebeletso ea meea! Ka bobeli ba bona joale ba hlokomela hore lebitso la Jehova ke qhobosheane e matla, eo ea lokileng a balehelang ho eona ’me a tšireletsoe.—Liprov. 18:10.

Bakreste ha baa lebella ho buisana ka ho toba le Molimo joaloka Adama, Abrahama le ba bang ba mehleng ea pelenyana. Ba hlokomela hore “Molimo, ha o no o buile hangata mehleng ea khale, le ka mekhoa e mengata, le bo-ntat’a rōna ka baprofeta, joale, mehleng ena ea qetello . . . ka Mora,” Jesu Kreste. (Ba-Heb. 1:1, 2) Seo Jehova a se buang le rōna ka Mora oa hae se beiloe molemong oa rōna ka Mangolong a Halalelang. Kahoo Bakreste ha ba hloke leha e le hore ba lebelletse puisano e tobileng e tsoang ho Molimo ea botho.

Ka baka leo, Bakreste ba ’nete ba qoba boiteko bo tlotseng meeli ba ho buisana le lefatše le sa bonahaleng. Ba hanela boiteko ba Bosatane ba ho ba thetsa hore ba lumele hore motho a ka ba le puisano ea meea ’me a ’na a thabela mohau oa Molimo. Ho e-na le hoo, ba mamela keletso ea Pauluse, e reng: “Nkang lihlomo tsohle tsa Molimo, le tle le tsebe ho tiea ka tsatsi le lebe, le ho ema le setse le hlōtse tsohle.”—Ba-Ef. 6:13.