“Linotlolo” Tsa ’Muso o Moholo ho Eohle Lia Sebelisoa

“Ke tla u nea linotlolo tsa ʼmuso oa maholimo: hohle hoo u tla ho tlama lefatšeng ho tla tlangoa maholimong, le hohle hoo u tla ho lokolla lefatšeng ho tla lokolloa maholimong.”—Matt. 16:19.

1, 2. (a) Litšōmong tsa boholo-holo tsa Baroma, molebeli oa monyako e moholo e ne e le mang leholimong? (b) Paleng, ho ka boleloa’ng ka Jesu Kreste e le motšoari oa linotlolo?

NA LEHOLIMONG ho na le molebeli oa monyako? Litšomong tsa Roma ea boholo-holo Janus, molimo oa melimo, ne e le eena molebeli e moholo oa monyako leholimong le lefatšeng. Tempele ea Janus e kileng ea ema ka lehlakoreng le ka leboea la Lepatlelo la Roma, haufi le lekhotla, empa ha a sa rapeloa. Leha ho le joalo, ho thoe’ng ka motho ea kileng a phela paleng, Jesu Kreste, eo hajoale a tlotlisitsoeng leholimong ka letsohong le letona la “Molimo oa melimo” oa ’nete, Jehova? (Deut. 10:17) Hoo e ka bang ka selemo sa 96 C.E., ha a laela lengolo le neng le tla rōmeloa phuthehong ea Filadelfia Asia Minor, Jesu enoa ea tlotlisitsoeng a re ho moapostola Johanne:

² “Ngolla lengeloi la kereke ea Filadelfia, u re: Ea halalelang, Oa ʼnete, ea tšoereng senotlolo sa Davida, ea bulang, ʼme ho se ea ka koalang, ea koalang, ʼme ho se ea ka bulang, o bolela tsena, o re: Ke tseba mesebetsi ea hao. Bona ke butse monyako pel’a hao, o ke keng oa koaloa ke motho; hobane u na le matlanyana, ʼme u bolokile lentsoe la ka, ʼme ha ua ka ua latola lebitso la ka.”—Tšen. 3:7, 8.

3. (a) Jesu Kreste o ne a amana joang le Davida? (b) Ke hobane’ng ha Jehova a neile Jesu Kreste “senotlolo sa Davida,” ʼme o se sebelisa joang?

³ Ha ho baloa ho tloha ho Davida, morena oa pele oa Mojode oa Jerusalema, Jesu Kreste ke oa bo43 lesikeng la borena la bana ba tsoileng ho morena eo ea tsebisahalang. Lesika leo la borena le felella ka Jesu Kreste, kaha e bile mojalefa oa ka mehla oa ʼmuso oa Davida. (Luka 3:23-31) Ka lebaka leo Jehova Molimo o file Mora oa hae ea tlotlisitsoeng “senotlolo sa Davida.” ’Muso oa Davida e ne e le puso e tsoantšetsang ea leholimo, ʼmuso oa tsoantšetso oa Molimo. (1 Likron. 29:23; 2 Likron. 13:5, 8) Matsohong a ngoana ea tlotlisitsoeng oa Davida, Jesu Kreste, ʼmuso ona o fetoha oa sebele, ʼmuso oo e seng oa tsoantšetso oa Molimo. Joaloka eo ka tokelo a tšoereng “senotlolo sa Davida,” o bulela le ho koalla litokelo le menyetla ho batho ba lefatšeng mabapi le ʼmuso oa Molimo.

4, 5. Haufi le Sesarea Filippi, Jesu Kreste o itse ke litokelo life tseo a tla li nea Petrose ea tšepahalang?

⁴ A lebelletse ho bulela moapostola oa hae ea tšepahalang Simone Petrose tokelo ea tšebeletso, Jesu o kile a re ho eena: “U Petrose [Petros ka Segerike; Petrus ka Selatine], ʼme ka holim’a lejoe leo [tautēi tēi petrai; ka Segerike; hanc petram, ka Selatine], ke tla haha kereke ea ka, ʼme likhoro tsa nqalo ea bafu ha li ka ke tsa e hlōla. Ke tla u nea linotlolo tsa ʼmuso oa maholimo; hohle hoo u tla ho tlama lefatšeng ho tla tlangoa maholimong, le hohle hoo u tla ho lokolla lefatšeng ho tla lokolloa maholimong.”—Matt. 16:18, 19.

⁵ Jesu o buile mantsoe ao a pale nakoana hoba ho fete Paseka ea 32 C.E., haufi le Sesarea oa Filippi, pela Nōka ea Jordane.—Matt. 16:13-17.

NAKO EA PHANO LE TŠEBELISO

6. ‘Linotlolo tseo tsa ʼmuso oa maholimo’ e ne e le tsa mofuta ofe, ʼme li emela eng?

⁶ Joaloka “senotlolo sa Davida” “linotlolo tsa ʼmuso oa maholimo” e ne e se tsa sebele, tse tšoarehang tsa mofuta oa lefatšeng. E ne e le linotlolo tsa moea, e leng, tokelo, hlompho, kabelo le matla ho qalisa kapa ho bula lenaneo la boitsebiso, taeo le ho kenella ha botho mabapi le ʼmuso oa maholimo. Ka tsona, batho ba ikhethelang ho batla ʼmuso oa maholimo pele ba ne ba ka fumana molemo oa tokisetso eo Molimo o neng o entse hore e fumanehe ka nako eo ka Jesu Kreste, Mojalefa oa ʼmuso oa leholimo. Kahoo ba kena nthong e neng e ntse e sa ba bulehela pele ho moo.

7. Pelenyana, Jerusalema, Jesu Kreste o ne a senoletse Nikodema litlhokahalo life tse khōlō bakeng sa mang kapa mang hore a kene ʼmusong oa leholimo oa Molimo?

⁷ Lilemo tse peli pelenyana, Jerusalema, Jesu o ne a senoletse ’musisi oa Bajode, Mofarisi ea bitsoang Nikodema maemo a mang a motheo ao molumeli a neng a tlameha ho a phethahatsa hore a kene ʼmuso oa leholimo oa Molimo. Jesu a re: “Ka ʼnete-nete ke re ho uena: Motho ha a sa tsoaloe la bobeli, o sitoa ho bona ʼmuso oa Molimo.” Eng, ‘a tsoaloe la bobeli,’ ke ’m’ae oa motho? Che, empa Jesu a re ho Nikodema: “Ka ʼnete-nete ke re ho uena: Motho ha a sa tsoaloe ka metsi le ka Moea, o sitoa ho kena ʼmusong oa Molimo. Se tsoetsoeng ke nama ke nama; ʼme se tsoetsoeng ke Moea, ke moea.”—Joh. 3:1-6.

8. Na e ka ba ho utloahalang hore mang kapa mang eo e seng Mokreste ea kolobelitsoeng le ea tsoetsoeng ka moea ho ba le “linotlolo” tse joalo le ho li sebelisa, ʼme re na le mohlala ofe ntlheng ee?

⁸ Kahoo, na motho eo ka boeena a e-song ho “tsoaloe ka metsi le ka moea,” e e-so ho be Mokreste ea kolobelitsoeng a ba a tsoaloa ka moea, a ka ba le hona ho ba le “linotlolo” le ho li sebelisa ho bulela ba bang ho kena ʼmusong oa Molimo oa leholimo? Hona ha ho utloahale. Kahoo “linotlolo tsa ʼmuso oa maholimo” ha lia ka tsa neoa Johanne, le hoja a ile a kolobetsa Jesu ʼme e bile eena oa pele ho bolela hore: “Bakang, hobane ʼmuso oa maholimo o atametse.”—Matt. 3:1, 2.

9. Re tseba joang hore na Petrose o ne a se a tsoetsoe ka moea kapa che ha a neoa senotlolo sa pele ‘linotlolong,’ ʼme ho thoe’ng ka mosokolohi ea bolotseng oa Moethiopia ea boletsoeng ho Liketso 8:27, 28?

⁹ Joale, he, na moapostola Petrose o ne a tsoetsoe ka moea ha Jesu Kreste a mo nea sa pele ho “linotlolo” hore a se sebelise? E, hobane, letsatsing la Pentekonta la 33 C.E., Jehova Molimo o ile a sebelisa Jesu ea tlotlisitsoeng hore a kolobetse barutuoa ba 120 ka moea o halalelang, ʼme ba akarelletsa Petrose, ba neng ba eme tlung e ka holimo Jerusalema. Pele kamor’a hore Petrose a tsoaloe ka moea oa Molimo, a ema ho bua le Bajode le basokolohi ba bololitsoeng ba fetang 3 000 ba neng ba bokane ho paka kamoo boprofeta ba Joele 2:28, 29 bo neng bo qalile ho phethahala. Haeba Moethiopia ea bololitsoeng eo ho boleloang ka eena ho Liketso 8:27, 28 a ne a le har’a “banna ba tšabang Molimo” ba neng ba lula Jerusalema ka nako eo mohla letsatsi leo la Pentekonta, ha a ka a tloha tempeleng ho ea mamela Petrose. (Lik. 2:1-12) Empa a fumana monyetla oa hae hamoraonyana.

10. Petrose o sebelisitse sa pele ho “linotlolo” neng hona joang?

¹⁰ Petrose a hla a bolella bashebelli bao ba likete hore ba ne ba entse tlōlo ea molao joaloka batho ba bolumeli ka ho khokhothela Jesu Kreste matsatsi a 52 pelenyana. Eaba ‘banna bao ba tšabang Molimo’ ba matsoalo baa botsa: “Banna ba heso, re tla etsa joang?” Ha arabela Petrose, a re: “Bakang, ʼme e mong le e mong oa lōna a kolobetsoe ka lebitso la Jesu Kreste tšoarelong ea libe, ʼme le tla nka neo ea Moea o Halalelang. Hobane pallo eo e etselitsoe lōna, le bana ba lōna, le ba leng hole kaofela, ba sa tlang ho bitsoa ke Morena, Molimo oa rōna.” Petrose a tsoela pele: “A tiisa ka litaba tse ling tse ngata, a ba khothatsa, a re: Ipolokeng mofuteng ona o khopo.” (Lik. 2:14-40) Kahoo Petrose ea tsoetsoeng ka moea a sebelisa sa pele ‘linotlolong.’

11. Likete tsa ba neng ba mametse Petrose li ile tsa ‘tsoaloa labobeli’ joang kapa ‘ho tsoaloa ka metsi le ka moea’?

¹¹ Na Bajode leha e le bafe ho bao ba tlhaho ba ile ba kena ka monyako o bulehileng joaloka Bajode bao Jehova Molimo a neng a etselitse bo-ntat’a bona moholo tšepiso e ho Joele 2:28, 29? Liketso 2:41, 42 e-ea arabela: “Eaba ba amohetseng polelo ea hae [polelo ea Petrose] ka thabo ba kolobetsoa, ʼme barutuoa ba ekeletsoa tsatsing leo ka batho ba likete tse batlileng ho ba tharo. Ba ne ba tiisetsa thutong ea baapostola, le kopanong ea boena, le ho ngoathoeng ha bohobe, le merapelong.” Ka ho kolobetsoa ha bona metsing, ka lebitso la Jesu Kreste ʼme kamorao ho moo ba amohela neo e sa lefelloeng ea moea o halalelang, ba ‘tsoaloa la bobeli,’ ‘ba tsoaloa ka metsi le ka moea.’—Joh. 3:3, 5.

BA SEBELISELITSOENG SENOTLOLO SA BOBELI

12, 13. (a) Haeba ho ne ho hlokahala hore Petrose a sebelise senotlolo se le seng, hona ho ne ho tla bolela eng? (b) Leha ho le joalo, Jesu o itse’ng ka sena ho barutuoa ba hae pelenyana a nyolohela leholimong?

¹² Petrose o ne a sa tšepisoa senotlolo se le seng, empa “linotlolo tsa ʼmuso oa maholimo.” Hona ha bolela bonyane linotlolo tse peli. Kahoo, a neoa senotlolo sa bobeli neng hona lebitsong la bo-mang? Hoja ebe Petrose o ne a hloka senotlolo se le seng feela, ke Bajode ba tlhaho le basokolohi ba sokolohetseng Bojodeng ba bolotseng ba neng ba tla bōpa 144 000 ea bao Jesu Kreste a neng a ba haha holim’a hae e le lejoe hore e be phutheho ea hae e feletseng e tsoetsoeng ka moea. (Matt. 16:18; Tšen. 7:4-8; 14:1-3) Empa na poloko ea leholimo e ne e tla lekanyetsoa feela ba amohetsoeng ka ho sebelisa ha Petrose senotlolo ka letsatsi la Pentekonta? Joale, Jesu o itse’ng pelenyana a nyolohela leholimong ka letsatsi la bo40 a tsohile? Ka letsatsi leo, sebakeng sa Jerusalema, a re ho barutuoa ba hae:

¹³ “Ho no ho ngoliloe joalo, ʼme ho no ho tšoanela hore Kreste a utloisoe bohloko, ʼme a tsohe bafung ka letsatsi la boraro; ho tle ho boleloe ka lebitso la hae pako le tšoarelo ea libe ho lichaba tsohle, ho qala ka Jerusalema. Lona, le lipaki tsa taba tseo. ʼMe bonang, ʼna ke tla le romela pallo ea ntate [e ho Joele 2:28, 29]; le mpe le sale motseng oa Jerusalema, le tle le be le apesoe ka matla a tsoang holimo.”—Luka 24:46-49.

14, 15. Ho ea ka Liketso 1:8, Jesu o khethollotse joang mabapi le ho atolosoa ha ho boleloa ha pako ‘lichabeng tsohle’?

¹⁴ Leha ho le joalo, ho ea ka Liketso 1:8, Jesu a qaqisa haholoanyane hore na boboleli ba pako motheong oa lebitso la hae bo ne bo tla atolosoa joang ka ho tsoetseng pele ho ea ‘lichabeng tsohle.’ Moo a re: “Le tla fuoa matla mohla Moea o Halalelang o tlang ho lōna, ʼme le tla ba lipaki tsa ka Jerusalema, le naheng eohle ea Judea, le ea Samaria, le ho isa pheletsong ea lefatše.”

¹⁵ Mona Jesu a arola Samaria ho ‘naha eohle ea Judea.’ Ka baka leo, ka nako eohle tšebeletsong ea lefatšeng ea hae o ne a khetholla pakeng tsa Bajode ba tlhaho ba bolotseng le Basamaria ba bolotseng.

16. Ho tlile joang hore ha a le tseleng e khutlelang Galilea Jesu a lule matsatsi a mabeli le baahi ba motse oa Sikare oa Basamaria?

¹⁶ Kamor’a Paseka ea 30 C.E., selemong sa hae sa pele sa mosebetsi oa pontšeng, o ne a tlameha ho feta Samaria ha a le tseleng e eang Galilea e tsoa Judea. Ntlheng eo ho ile ha hlokomeleha hore “ba-Jode ha ba kopane le ba-Samaria.” (Joh. 4:9) Leha ho le joalo, selibeng sa Jakobo haufi le motse oa Sikare, Jesu a ikhethela ho buisana le mosali oa Mosamaria. Ha e le hantle, ho bonahala e le eena motho oa pele eo ho eena Jesu a ileng a ipolela hore ke Messia kapa Kreste. Na ebe ke hobane e ne e se mosali oa Mojode? (Matt. 16:20) Ho feta moo, ka memo ea baahi ba Basamaria ba Sikare, eena le baapostola ba hae ba hlola le Basamaria ka matsatsi a mabeli ʼme ba buisana le bona. Ba bangata ho bona ba lumela ʼme ba re ho mosali oa Mosamaria ea neng a ba paketse: “Ha re sa lumela ka baka la polelo ea hao; hobane re ikutloetse ʼme rea tseba hobane enoa ke Kreste ruri, ʼMoloki oa lefatse.”—Joh. 4:39-43.

17. Jesu o ile a nka boemo bofe mabapi le Basamaria bao ba lumelang le kolobetso ea metsing?

¹⁷ Leha ho le joalo, le kamorao ho mona, Jesu a ʼna a khetholla pakeng tsa Bajode le Basamaria, ho sa tsotellehe ho lumela ha Basamaria ba bang ho eena. Na ho na le ba bang ho Basamaria bao ba lumelang bao Jesu a kileng a ba memela ho kolobetsoa ka kolobetso ea Johanne metsing? Che! Hona e ne e le habohlokoa, joalokaha hang pele ho tlaleho ea leeto la Jesu ho Basamaria ba Sikare, ho ngoliloe: “Eitse ha Morena a tseba hobane bafarisi ba utloile ha ho thoe: Jesu o fetisa Johanne ka ho etsa barutuoa le ka ho kolobetsa, leha e ne e se eena Jesu ea kolobetsang, empa e le barutuoa ba hae, a tloha Judea, ʼme a boela a ea Galilea. E ne e ka khona a haole ka Samaria. Eaba o fihla motseng oa Samaria, o bitsoang Sikare, haufi le naha eo Jakobo a neng a e nee Josefa, mora oa hae. Seliba sa Jakobo se teng moo.”—Joh. 4:1-6.

18. Lilemo tse peli hamorao, ha Jesu a ne a feta Samaria, a e-ea Jerusalema, batho ba metse ea Samaria ba bontšitse boikutlo bofe?

¹⁸ Na lintho li ile tsa tsoella hantle hakaalo bakeng sa Jesu lilemo tse peli hamorao? Eena le barutuoa ba hae ba ne nka tsela e khutlelang morao, ho ea ba teng moketeng oa Bajode oa metlotloane, Jerusalema. Eaba barumuoa ba Jesu “ba tloha ba kena motseng oa ba-Samaria, ho mo lokisetsa. Empa ba teng ha ba ka ba mo amohela, kahobane sefahleho sa hae se ne se lebile [hokae?] nqa Jerusalema. Barutuoa ba hae, bo-Jakobo le Johanne, eare ha ba bona hoo, ba re: Morena, na u rata ha re ka re, mollo o theohe leholimong, o ba chese, . . . Empa Jesu a reteleha, a ba khalemela, . . . Ba ntoo fetela motsaneng o mong.” (Luka 9:51-56) Hoja Jesu a ineela bohaleng ba Jakobo le Johanne, hona ho ne ho ka ʼna ha etsa hore Basamaria ha hloee Bokreste.

19. (a) Ha Jesu a rōma baapostola ba 12 ka bobeli, o fane ka litaelo life ka Samaria? (b) Ho ea ka Johanne 8:47, 48, boikutlo ba Bajode ka kakaretso e bile bofe ho Basamaria?

¹⁹ Le selemo pelenyana, pele ho Paseka ea 32 C.E., ha Jesu a rōma baapostola ho bolela ka bobeli, a re ho bona: “Le se ke la ea ho ba-lichaba, ʼme le se ke la kena motseng ofe kapa ofe oa ba-Samaria; le mpe le ee linkung tsa ntlo ea Iseraele tse timetseng. Ha le ntse le tsamaea, le bolele, le re: ʼMuso oa maholimo o atametse.” (Matt. 10:5-7; Luka 9:1-6) Likhoeli hamorao, kamorao ho mokete oa metlotloane oa 32 C.E., Jesu a rōma baevangeli ba 70 ʼme a ba nea litaelo tse tšoanang le tsa baapostola ba 12. Metse le metsana eo ba neng ba bolela ho eona ka ʼmuso oa Molimo mohlomong e ne e le Judea, e seng Samaria. (Luka 10:1-24) Ha baa ka ba tlaleha letho ka ho etela libaka tsa Basamaria. Ba ea “linkung tsa ntlo ea Iseraele tse timetseng.” Hobane’ng? Hobane baevangeli bao ba ne ba sa neoa matla a fetang a baapostola. Boikutlo ba Bajode ka kakaretso, ho Basamaria ba senoha ha Jesu a bolella Bajode ba sa lumeleng hore ha ba tsoe ho Molimo, ʼme ba arabela ka hore: “U mo-Samaria, ʼme u na le modemona.”—Joh. 8:47, 48.

20. Ke hobane’ng ha Basamaria ba sa ka ba fumana molemo leha e le ofe ka ho sebelisa ha Petrose senotlolo sa pele ‘linotlolong tsa ʼmuso’ ka Pentekonta Jerusalema, ʼme kahoo ho hlaha potso efe?

²⁰ Jesu a khetholla pakeng tsa Basamaria le Bajode ha re ho mosali oa Mosamaria: “Lōna, le rapela seo le sa se tsebeng; rōna, re rapela seo re se tsebang; hobane poloko e tsoa ho ba-Jode.” (Joh. 4:22) Jesu o ne a khetholla Mosamaria e le “motho oa mofuta osele” kapa, ka sebele haholoanyane, “oa morabe o mong” (Luka 17:16-18; bona mongolo oa lentsoe ka lentsoe oa Kingdom Interlinear Translation.)a Basamaria, ba neng ba rapela Thabeng ea Gerizime, ba ne ba sa ee pentakonteng ea Jerusalema ka 33 C.E. Kahoo ha baa ka ba fumana molemo oa letho ho sebeliseng ha Petrose sa pele ‘linotlolong tsa ʼmuso oa maholimo.’ (Lik. 2:5-11) Ke neng, ka baka leo, baapostola ba 12 ba ileng ba hlokomela Samaria hoba moea o halalelang o tšolleloe Jerusalema e le hore ba ka nka karolo ho seo Jesu a neng a hlile a se bolela ho Liketso 1:8?

21. Ho tlile joang hore Filipi moevangeli a be Samaria, ʼme ke hobane’ng ha boteng ba hae bo ile ba fella ka thabo e khōlō?

²¹ Kamorao ho pentekonta phutheho ea Bokreste e Jerusalema ea hlaheloa ke lintho tse ngata. Mahloriso a ileng a latela ho shoela tumelo ha Setefane a qhalanya litho tsohle tsa phutheho ho tloha Jerusalema ntle ho baapostola ba 12. (Lik. 8:1-5) E seng ka litaelo tsa baapostola, empa ka baka la mahloriso, Filipi, ea neng a sebetsa hammoho le Setefane, le Bajode ba bang ba Bakreste ba balehela seterekeng se ka leboea sa Samaria. (Lik. 6:1-6; 21:8) Moo Filipi, ea neng a fumane mohau oa neo ea mehlolo ke moea oa Molimo, a bolela litaba tse molemo ka tsoho le ho tlotlisoa ha Jesu Kreste ʼme a etsa lipontšo tse ngata tsa mehlolo ka tsela ea lipheko. “ʼMe thabo e kholo ea e-ba teng motseng oo.”—Lik. 8:8.

22. Ka baka la kolobetso ea metsing ea banna ba bangata le basali ba Basamaria matsohong a Filipi, ho hlaha potso efe?

²² Phello ea see e bile efe? “Eitse hobane ba lumele Filipi ea ba bolellang litaba tsa ʼmuso oa Molimo le lebitso la Jesu Kreste, banna le basali ba kolobetsoa.” Hona ha akarelletsa Simone oa senohe ea neng a ‘thetsa sechaba sa Samaria, ka ho ipolela hore ke motho e moholo.’ (Lik. 8:9, 12, 13) Ntlheng ena ho phahama potso, Na balumeli bao ba Basamaria ba ile ba tsoaloa ka “metsi le ka moea”? Metsi a kolobetso a ne a kene tabeng, empa ho thoe’ng ka moea? Haeba ba ne ba tsoetsoe ka moea hoba ba kolobetsoe metsing, e tla ba Filipi ke eena ea ileng a bula tsela bakeng sa sehlopha sena se secha, Basamaria, ho kena “ʼmusong oa maholimo.” Empa na o hlile a fela a etsa joalo, le hoja e ne e se e mong oa baapostola ba 12? Tlaleho e bululetsoeng e bontša eng?

23. Ke hobane’ng ha Filipi a sa tlalehoe a etsa tšepiso leha e le efe ea moea o halalelang ho bakolobetsuoa ba Basamaria ka lebitso la Jesu?

²³ Filipi enoa e ne e se e mong oa baapostola bao Jesu a itseng ka bona: “Tsohle tseo le li tlamang lefatšeng, li tla tlangoa leholimong; le tsohle tseo le li lokollang lefatšeng, li tla lokolloa leholimong.” (Matt. 18:18; 16:19; 10:2-4; Joh. 1:43-48) Kahoo ha ho tlalehoe Filipi a tšepisa neo leha e le efe ea moea o halalelang ho Basamaria mabapi le kolobetso ea bona ea metsing. Ha a ka a neoa matla a hore a re, joalokaha ho ile ha etsa Petrose ka letsatsi la Pentekonta ho Bajode: “Bakang, ʼme e mong le e mong oa lōna a kolobeletsoe ka lebitso la Jesu Kreste tšoarelong ea libe, ʼme le tla nka neo ea Moea o Halalelang.”—Lik. 2:38.

24. (a) Na Basamaria, ka ho bolotsoa le ho boloka mekete e beiloeng mangolong a Moshe, ba ile ba kena selekaneng sa Molao oa Moshe? (b) Hoba ba kolobetsoe ka lebitso la Jesu, metsing, na hona hoo feela ba ile ba tsoaloa ‘ka metsi le ka moea’?

²⁴ Basamaria ba ne ba se selekaneng sa Molao se neng se buelletsoe ka Moshe bakeng sa Baiseraele Thabeng ea Sinai, le hoja Basamaria ba ne ba nka libuka tsa pele tse hlano tsa Moshe, e le Lentsoe la Molimo ʼme ba boloka Paseka le Pentekonta Thabeng ea Gerizime seterekeng sa Samaria. (2 Mar. 17:29, 30; Joh. 4:19, 20) Kahoo ho bolotsoa ha bona nameng ka bohona ho ne ho sa ba etse basokolohi ba Bajode. Basamaria ha baa ka ba kenyelletsoa ho khokhotheloeng ha Jesu ʼme kahoo ho ne ho sa hlokahale hore ba kolobetsoe metsing hore Molimo o ba tšoarele sebe se seholo hakaalo se lokelang ho bakeloa. Empa Basamaria ba kolobetsoa ka matsoho a Filipi ka lebitso la Jesu Kreste e le Messia (Kreste) le “’moloki oa lefatše.” (Joh. 4:25, 26, 28, 29, 42) Na bona ka baka lena, ba ile ba ‘tsoaloa ka metsi le ka moea’? Che. Hobane ha baa ka ba fumana moea o halalelang ka nako eo.

25. Liketso 8:14-17 e bontša joang hore na ke hobane’ng ha Basamaria ba kolobelitsoeng ba sa ka ba tsoaloa ka moea le ka metsi?

²⁵ Ho bile joalo hobane’ng? Liketso 8:14-17 e-ea re bolella: “Baapostola ba setseng Jerusalema, eare ha ba utloa hobane ba-Samaria ba amohetse lentsoe la Molimo, ba roma Petrose le Johanne ho bona. Bao, eitse hobane ba fihle, ba ba rapella hore ba neoe Moea o Halalelang. Hobane o no o e-so ho theohele le ho ea mong ho bona; empa ba ne ba sa kolobelitsoe feela ka lebitso la Morena Jesu. Eaba [Petrose le Johanne e le baapostola] ba ba bea matsoho, ʼme [Basamaria ba kolobelitsoeng] ba neoa Moea o Halalelang.” Hona ha ho bolele ka bonolo feela lineo tsa mohlolo tsa moea o halalelang.

26. Kahoo Basamaria ba kolobelitsoeng ba ile ba tšoanelehela tokelo efe, ʼme Petrose, moo Johanne a leng teng, a sebelisa kofuto efe?

²⁶ Mona ka lekhetlo la pele Basamaria ba kolobelitsoeng ba ‘tsoaloa’ ka moea hammoho le metsi ʼme ba tšoanelehela ho kena ʼmusong oa Molimo oa leholimo. (Joh. 3:5) Tšebetso ea moea mona ea tšoana le e tlalehiloeng ho Liketso 10:44-46 le 11:15-17. Kahoo lebitsong la Basamaria ba lumelang ba kolobelitsoeng moapostola Petrose a sebelisa sa bobeli ho “linotlolo tsa ʼmuso oa maholimo.” Ke ʼnete, moapostola Johanne o ne a e-na le Petrose, empa, pelenyana, mohla Pentekonta, baapostola ba bang ba 11 ba ne ba e-na le Petrose ea tšoereng linotlolo.—Bona le Mattheu 18:1, 18.

27. Liketso 8:18-23 e bontša Petrose a etella pele joang ho sebetsaneng le Simone eo e neng e le senohe?

²⁷ Boetelli pele ba Petrose bo pakoa ke seo re se bolelloang ke Liketso 8:18-23, se latelang: “Eare ha Simone [senohe] a bona hobane Moea o Halalelang o neoa ka peo ea matsoho a baapostola, a ba beela lichelete, a re: A le ke le mpheng le ʼna matla ao, hore e mong le e mong eo ke tla ʼmea matsoho, a neoe Moea o Halalelang. Empa Petrose a mo fetola, a re: Lichelete tsa hao a li ke li timele le uena, ha u lekantse hobane neo ea Molimo e rekoa ka lichelete. Ha u na kabelo leha e le tokelo tabeng ena; hobane pelo ea hao ha ea loka pela Molimo. Hlo u bake bolotsaneng bona ba hao, ʼme u rapele Molimo; ekaba mohlomong u ka tšoareloa khopolo eo ea pelo ea hao. Hobane kea bona hoba u tletse nyooko e babang haholo, u fineletsoe ke bokhopo.” Hona ha supa hore Petrose o ne a etella pele e le moemeli ea ka sehloohong oa Kreste ka lekhetlo leo. Joale ka ea neiloeng linotlolo tsa ʼMuso, a bua.

28. Ke bo-mang hape ba ileng ba buleloa monyetla oa ʼMuso ka nako eo, eaba joale Basamaria ba tsoetsoeng ka moea ba qala ho rapela hokae?

²⁸ Ho tloha ka nako eo ho ea pele monyetla o ne o ka fuoa ba bang seterekeng sa Samaria. Ka ho loketseng, Liketso 8:25 e-ea re bolella: “Baapostola [Johanne le Petrose] eitse hobane ba pake lentsoe la Morena, ba khutlela Jerusalema, ba ntse ba bolela Evangeli metsaneng e mengata ea Samaria.” Joale Basamaria ba kolobelitsoeng, ba tsoetsoeng ka moea ba qala ho rapela Ntat’a bona oa leholimo, Jehova, e seng Thabeng ea Gerizime leha e le hona Jerusalema, empa tempeleng ea hae e khōlō ea moea.—Joh. 4:21.b

29. Hoba Saule a sokolohele Bokresteng, ho ile ha etsahala joang ka phutheho e tsoetsoeng ka moea Judea, Galilea le Samaria, ʼme Filipi joale a aha hokae?

²⁹ Filipi le Bakreste ba bang ba Bajode ba ile ba tlameha ho balehela Samaria ka baka la mahloriso a neng a etsoa ke Mofarisi ea neng a bitsoa Saule oa Tarese. Empa hoba Pauluse ka boeena a sokolohele Bokresteng, lintho tsa fetoha bakeng sa phutheho e Palestina. “Joale,” ho ea ka Liketso 9:31, “likereke li ne li lutse ka khotso kahohle Judea, le Galilea, le Samaria, li ne li hahisoa, li tsamaea ka tšabo ea Morena; ʼme li ne li anafala ka tšeliso ea Moea o Halalelang.” Filipi, leha ho le joalo, a qetella a lutse tlase motseng oa likepe oa Sesarea, moo ’musisi oa Moroma oa sebaka sa Judea le ntlokholo ea hae a neng a le teng le moo masole a Mataliana a neng a le teng.—Lik. 8:40; 21:8; 10:1; 23:23-35.

[Mongolo o botlaaseng ba leqephe]

[Setšoantšo se leqepheng la 16]

Senotlolo sa Davida

“Bokang Jehova! Rorisang Molimo sehalalelong sa oona, o roriseng leholimong le entsoeng ke matla a oona! O rorisetseng liketso tsa oona tse phahameng! O roriseng ka ho ea ka boholo ba oona bo fetisisang! O roriseng ka molumo oa terompeta! O roriseng ka pesalterine le harepa! O roriseng ka meropa le ka mehobelo!”—Pes. 150:1-3.