Pesaleme
“Sebeletsang Jehova ka Nyakallo”
MOETSI oa rōna, Jehova, ke “Molimo o thabileng” ’me o rata ha bahlanka ba hae ba fumana thabo ha ba phethahatsa melao ea hae ka botšepehi. (1 Tim. 1:11; Jak. 1:25; Tšen. 1:3) Melao ena metso ea eona ke lerato, hobane “lerato ha le etse oa habo motho hampe.” (Ba-Roma 13:8-10) Ke ka baka leo ho utloa ’Mōpi ho tlatsetsang thabong ea ba bang le ho tiisetsa motho ho nyakallela bophelo bo thabileng le bo khotsofetseng.
Kahoo, he, na batho ba lichaba tsohle ha baa lokela ho nyakallela ho Jehova? Ke sona se khothallelitsoeng ke mopesaleme ea bululetsoeng, a re: “Phahamisetsang ho Jehova mehoo ea lōna ea thabo, lōna kaofela ba lefatšeng! Sebeletsang Jehova ka nyakallo, le itlhahise pel’a sefahleho sa hae ka lipina.” (Pes. 100:1, 2) Tumellanong le keletso ena, lipolelo tsa rōna tsa thoriso ha lia lokela ho fokola empa li be matla le ho ba sefutho, ha li bapisoa le ‘mehoo ea thabo’ ea lebotho la ntoa le hlōtseng ka matla. Sebaka sa bahlanka ba Molimo ha se sa makhoba a boi, a ikhulang. Ho sebeletsa Molimo ha ho boima ho hlokofetse ka ho sa hlokahaleng le ho ba masoabi. (1 Joh. 5:3) Tšebeletso eo e-ea khatholla, e-ea hlasimolla, ’me ka ho nepahetseng e lokela hore e tsamaee le nyakallo. Ka lebaka lena mopesaleme o phehelletse batho hore ba tle moo Molimo o leng teng ka ‘mehoo ea thabo.’
Motheo oa hore motho a rate ho etsetsa tšebeletso e halalelang ke hore Jehova ke Molimo le Moetsi oa motho. Mopesaleme o itse “Le tsebe [le hlokomele, le lumele] hobane Jehova ke Molimo! Ke eena ea re entseng, ’me re ba hae, re sechaba sa hae, re mohlape o alosoang ke eena.” (Pes. 100:3) Ka lebaka la hore ke ’Mōpi, re ba hae, joalokaha molisa a ruile linku tsa hae. Ntle ho hore Jehova ke Molimo hape ke ’Mōpi, sebopeho seo a leng sona joaloka Molimo se fana ka tšusumetso e matla hore batho ba lichaba tsohle ba kene mabaleng a sehalalelo sa hae, hore ba eo fana ka liteboho le lithoko teng. Ho feta moo, re lokela ho boka lebitso la hae, ke hore, re bue hantle ka Ea Holimo-limo, Ea emeloang ke lebitso. Mopesalema oa phehella: “Kenang likhorong tsa hae ka liteboho, le mabaleng a hae ka lithoko! Mo leboheng, le rorise lebitso la hae! Hobane Jehova o molemo, mohau oa hae o hlola ka ho sa eeng kae, le botšepehi ba hae melokong le melokong.”—Pes. 100:4, 5.
Litšoaneleho tsa Jehova ka sebele li lokela ho susumelletsa motho hore a mo rorise. O lokile kahohle, ho se le tlhasenyana feela ea bobe. Mosa oa hae o lerato kapa qenehelo bakeng sa bahlanka ba hae kamehla li ka tšeptjoa; li tsoela pele ka ho sa feleng. “Melokong le melokong” Jehova oa tšepahala, a sa thekesele lipontšong tsa lerato la hae ho ba batlang ho etsa thato ea hae. (Ba-Roma 8:38, 39) Na he, ha re na lebaka le utloahalang ho ‘sebeletsa Jehova ka nyakallo’?
[Setšoantšo se leqepheng la 29]
“Re sechaba sa hae, re mohlape o alosoang ke eena.”—Pes. 100:3.