Ho se Nke Lehlakore ha Bokreste ha Ntoa ea Molimo e Atamela

“Ha e le moprofeta ea profetang tsa khotso, ha lentsoe la moprofeta eo le ka etsahala, moprofeta eo o tla tsejoa ka hoo hobane o rōmiloe ke Jehova ka ’nete.”—Jer. 28:9.

1. Ke hobane’ng ha mantsoe a Jeremia 27:9 khahlanong le bonohe a lumellana hantle le boemo ba lefatše kajeno?

“’ME LŌNA he, le se ke la mamela baprofeta ba lōna, leha e le linohe tsa lōna, leha e le balori ba lōna, leha e le lingaka tsa lōna, leha e le baupelli ba lōna, ba le bolellang, ba re: Le ke ke la sebeletsa morena oa Babylona.” Mantsoe ao a khale a mehleng ea ’Muso oa Babylona a lokela boemo ba lefatše ba kajeno hantle. Hobane’ng? Hobane lefatše le sa ntsane le tletse balori, baloi, lilaoli le baupelli. (Jer. 27:9) Metse e meholo ea linaha tsa lefatše, e kang Washington, D.C., e tumile ka mathuela a eona, ’me ho uoa ho oona ka cheseho ke mapolotiki a tsielehileng. Kaha baprofeta ba joalo, linohe, lilaoli, bahlalosi ba litoro le ba bolelang liketsahalo tsa nako e tlang ba fana ka keletso le temoso ho babusisi ba mebuso, bao ba sebelisanang le boloi ba ka ba le phello ea bohlokoa lipolotiking tsa lefatše. Empa bana ba sebelisanang le boloi ha ba kena-kenane ka ho toba le lipolotiki.

2. Na Bibele, ka baka la ho profeta liketsahalo tsa lefatše, e kena-kenana le lipolotiki, ’me 1 Johanne 2:15-17 e araba potso eo joang?

² Ho teng buka ea boholo-holo e eletsang babali ba eona khahlanong le boloi ka mefuta eohle ea bona empa e na le boprofeta ka liphetoho tsa lefatše lekholong lona lena la rōna la lilemo la bo20. E bua ho hongata ka litaba tsa bopolotiki mehleng ea rōna. Empa, ka baka la sena, na buka ee e kena-kenana le lipolotiki tsa kajeno? Na buka ee e khothalletsa babali ba eona ho qaputsa lipolotiking tsa batho e le hore ba kena-kenane le babusi ba lipolotiki? Ho mapolotiki a ratang ho nqosa Bibele e Halalelang ka hore ke buka e joalo, re arabela, re re Che! Ho e ’ngoe ea libuka tse qetellang tsa Bibele moapostola Johanne oa Mokreste oa ngola, a re:

“Se rateng lefatše, leha e le tse lefatšeng; ekare ha motho a rata lefatše, lerato la Ntate ha le eo ho eena. Hobane tsohle tse lefatšeng, takatso ea nama, le takatso ea mahlo, le boikhantšo joa bophelo, ha li tsoe ho Ntate, empa li tsoa lefatšeng. ’Me lefatše lea feta, le eona takatso ea lona, empa ea etsang thato ea Molimo, o hlola ka ho sa feleng.”—1 Joh. 2:15-17.

Buka e qetellang ea Bibele, le eona e ngotsoe ke eena moapostola Johanne enoa, e hlalosa kamoo lefatše lena le lipolotiki tsa lona li tla feta.

3. Baeta-pele ba bolumeli ba khothalletsa boikutlo bofe lipolotiking ho Bakreste, ’me ba supa bo-mang e le mehlala ea Bibele ho ba tšehetsa?

³ Leha ho le joalo, ho teng baeta-pele ba bolumeli, le bona bo-papa, bapatriareka le babishopo ba baholo, ba pheang khang ba hanana le ho se nke lehlakore ha Bokreste ’me ba bolela hore ke tšoanelo e tlamang ea Mokreste e mong le e mong ho nka karolo e mafolo-folo litabeng tsa lipolotiki tsa lefatše lena. Bakeng sa mehlala ea Bibele hore ba tšehetse boemo ba bona, ba supa baprofeta ba boholo-holo ba Baheberu, ba kang Jeremia mora moprista Hilkia oa lekholong la bosupa la lilemo pele ho Mehla e Tloaelehileng ea rōna. Ha e le hantle, mantsoe a Jeremia 27:9, a qotsitsoeng qalong ea sehlooho sena, e ne e le karolo ea seo Jehova Molimo a boleletseng Jeremia hore a se bolelle manqosa a linaha lisele a tsoang mebusong ea Edomo, Moabe, Ammone, Tyre le Sidone. (Jer. 27:1-4) Kahoo, he, kaha ’ntoa ea letsatsi le leholo la Molimo o matla ’ohle’ ea Harmagedone e atamela ka potlako hona joale, a re hlahlobeng ho sebelisa ha Molimo Jeremia mehleng eo ea khale. Na mohlala oa Jeremia o lumella Bakreste ba ’nete ba kajeno ho fosa ho se nke lehlakore ho kang ha Kreste le ho qaputsa lipolotiking tsa lefatše tsa mofuta leha e le ofe? A re boneng.

4. Selemong sa pele sa puso ea Jojakime, Jehova ka Jeremia a re o tla etsa joang ka tempele le Jerusalema tlas’a maemo a itseng?

⁴ Re nka taba ea rōna selemong sa 628 B.C.E., kapa lilemo tse 21 pele Bababylona ba timetsa Jerusalema. Sena ke selemo sa pele sa ho busa ha Jojakime, morena oa Jerusalema ea ileng a hlahlangoa ke oa ho qetela. Ka selemo sa bone hoba Jeremia a fane ka boprofeta ba hae ka Morena Nebukadnezare oa Babylona le “senoelo” sa Jehova se neng se tla noesoa marena a fetang 20 le mebuso, ho akarelletsa Edomo, Moabe, Ammone, Tyre le Sidone. (Jer. 25:1-3) Moprofeta o re beela nako ea taba, a re:

“Tšimolohong ea puso ea Jojakime, mor’a Josiase, morena oa Juda, lentsoe lena le tsoang ho Jehova la tla ho ’na, la re: Ho itsoe ke Jehova: E-ea, u eme lebaleng la ntlo ea Jehova, u bolelle ba metse kaofela ea Juda ba kenang ho ea khumama ka tlung ea Jehova mantsoe ’ohle ao ke u laetseng ho ba bolella ’ona; u se ba lobele lentsoe leha le le leng. Ekaba ba tla utloa, ba bake e mong le e mong mekhoeng e mebe ea hae, ke tle ke be ke bakele bobe boo ’na ke hopotseng ho ba hlahisetsa bona ka baka la bolotsana ba liketso tsa bona. U ba bolelle, u re: Ho itsoe ke Jehova: Ekare ha le sa nkutloe, ka ho tsamaea melaong eo ke e beileng pel’a lōna, le ka ho utloa mantsoe a bahlanka ba ka, baprofeta, bao ke ’nileng ka ba rōmela ho lōna, bao ke ’nileng ka ba roma ke tsoha e sa le hosasa, le mpa le sa ka la ba utloa; ke tla etsa ntlo ena joale ka Silo, le motse ona ke o etse ntho e tla rohakoa ke lichaba tsohle tsa lefatše.”—Jer. 26:1-6.

5. Ka ho bolela molaetsa ona, ke hobane’ng ha Jeremia a ne a sa tsoake boprista le lipolotiki?

⁵ Jeremia e ne e le moprista, empa leha ho le joalo, ka ho utloa molao ona o halalelang, o ne a sa leke ho tsoaka boprista le puso. O ne a mpa a fana ka temoso e tsoang ho Jehova molemong oa sechaba. A ho siela babusi ba ’muso le sechaba ho utloa temoso eo e halalelang. Jehova o ne a e-na le tokelo le tlameho ea ho hlokomelisa ’Muso oa Juda hobane batho ba oona ba ne ba le selekaneng sa bosechaba le eena e le Molimo oa bona. Molaong oa hae ho bona o neng o fanoe ka Moshe a lemosa sechaba ka se tla hlaha haeba se ka tlōla selekane se pakeng tsa Molimo le motho. Kahoo moprofeta Jeremia o ne a sa leke ho tsoaka boprista le puso, empa o ne a leka feela ho nea batho temoso e tsoang ho Molimo oo ba nang le selekane le oona. Haeba ba ne ba ka roba selekane sena ho ea pele, tempele ea bona e Jerusalema e ne e tla lahleheloa ke areka ea Jehova ea selekane joalokaha e ile ea lahlehela tabernakele ea Shilo.

6. Ke bosieo ba thōmo efe e tsoang ho Jehova bo thibelang sehlopha sa Jeremia ho kena-kenaneng le lipolotiki tsa Bojakane, ’me, ka bona, sehlopha see se mamela mantsoe afe a Jesu?

⁶ Moo Jeremia o ne a sa beele baruti ba kajeno ba Bojakane ho kena-kenana le lipolotiki tsa lichaba. Kajeno ba sehlopha sa Jeremia ba hlokomela hore ha ba na tokelo ea ho hlohlelletsa lipolotiking sechabeng leha e le sefe kapa sehlopha sa lichaba, leha e le tsona lichaba tsa Bojakane. Ba tseba hore, ho sa tsotellehe seo bo ipolelang sona, Bojakane ha bo selekaneng le Jehova. Bo ka ’na ba ipolela hore bo selekaneng se secha se buelletsoeng ke E mong ea moholo ho Moshe, Jesu Kreste, empa linnete li shanofatsa boipolelo boo. Kahoo, bao ba sehlopha sa Jeremia ba tsebisisa hore ha ba na thōmo e tsoang ho Jehova Molimo ho laela lichaba tsa Bojakane kapa ho nka karolo e mafolo-folo lipolotiking tsa lichaba tse joalo. Ho bolela ha bona ka botšepehi temoso ea Jehova ho Bojakane hammoho le lichaba tseo e seng tsa Bokreste ha se ho nka karolo lipolotiking tsa lefatše. Ha ba rate ‘lefatše leha e le lintho tse lefatšeng,’ empa ba lula ’neteng ho mantsoe a Jesu, a reng: “Hase ba lefatše.” (Joh. 17:14, 16; 1 Joh. 2:15) Ka ho se nke lehlakore ho matla ba ikhula litabeng tsa mefuta eohle tsa lipolotiki.

BOITŠOARO BA BOLUMELI

7. Ha a phetha boitšireletso ba hae ka pel’a lekhotla la Jerusalema, Jeremia o itse’ng ho ea ka Jeremia 26:12-15?

⁷ Baprista ba bang le “baprofeta” ka lebitso ba hulela Jeremia ka pela lekhotla la boahloli la mahosana le ka pel’a batho ba monyakong oa tempele. Ba mo nqosa ka lipuo tsa bofetoheli. Ba re: “Motho eo o loketsoe ke lefu, hobane o profetile bakeng sa motse ona kamoo le utloileng kateng ka litsebe tsa lōna.” (Jer. 26:7-11) Ha a phetha boitšireletso ba hae, Jeremia a re ho lekhotla la Jerusalema: “Feela, le itsebele hobane, ha le ka mpolaea, etlaba le beile mali a se nang molato holim’a lōna, le holim’a motse ona, le holim’a baahi ba teng; hobane ka ’nete Jehova o nthomile ho lōna, hore ke tle ke bolele mantsoe ao kaofela litsebeng tsa lōna.”—Jer. 26:12-15.

8. Baruti ba Bojakane ba itšoere ka ho tšoana le “barati ba naha” ba Jerusalema joang ho sehlopha sa Jeremia?

⁸ Baa ba neng ba batla mali a Jeremia ba ne ba bontša moea o mokaakang oa bochaba! Lekhotla lohle le ne le tlameha ho ema ka maoto, joalokaha ho ’nile ha e-ba joalo makhotleng a mang ha ho utloahala mehoo e joalo ea ho rata naha haufi tjena. Mohoo oa Jehova oa hore ba bake oa hlokomolohuoa. Molato oa bona pel’a Hae ba o hlokomoloha, ba phaphatha matsoalo a bona. Ho ’nile ha e-ba joalo ka linyeoe tse amang sehlopha se tlotsitsoeng sa Jeremia sa mehleng ea kajeno. Baeta-pele ba bolumeli ba Bojakane ba ’nile ba bea taelo e joalo bakeng sa bohato bo boima. Ba etella pele ho phehelleng ka lerata hore sehlopha sa Jeremia se bolaoe, kahoo ba lokolloe metsung ea matsoalo a bona a mabe.

9. Tabeng ea Jeremia, na baahloli ba mahosana ba ile ba ineela khatellong ea bolumeli, ’me ba batla ho qoba koluoa joang?

⁹ Har’a mahosana a ileng a sebeletsa ho lokolloa ha Jeremia kahlolong ea lefu e bile Akikame mor’a Shafane. Mahosana ha a ka a ineela khatellong ea bolumeli. Ba hlokomela hore Jeremia kannete ke molomo oa Jehova. Ha baa ka ba rata hore Jehova a ba tsekise mali a se nang molato a mohlanka oa hae ea tšepahalang. Ba emela Jeremia: ha a molato! Boitšireletso ba hae ba ba kenya moea oa ho hopola mehlala ea pale. Ka mohlala, ba ne ba atametse ka lilemo tse ka fihlang ho 100 ho seo Mikea a neng a se profetile khahlanong le Juda le Jerusalema. Morena Ezekiase a se ke a itjarisa molato oa mali ka ho se bolaee Mikea ka hoo ho neng ho nkoa hore ke puo ea bofetoheli, e kotsi ’Musong. Baholo ba phea khang ea hore taba ea Jeremia e sebetsoe ka masene ba re: “Ha e le rōna, re be re tla etsetsa meea ea rōna bobe bo bokaakang.”—Jer. 26:16-19, 24; Mik. 3:9-12.

10. Boitšoaro ba Morena Jojakime ho moprofeta Uria bo fapane joang le ba Morena Ezekiase?

¹⁰ Ha ho bapisoa le Morena Ezekiase ea ileng a tebisa temoso ea Mikea pelong, ho ne ho le teng setloho-tloholoana sa Ezekiase seo ka nako eo se neng se le selemong sa sona sa pele teroneng ea Jerusalema, Jojakime ka boeena! A qaphaletsa selemo sa hae sa pele ka mali ka ho etsa hore Uria mor’a Shemaia a bolaoe. Hore a balehe bohale ba Morena Jojakime, moprofeta Uria o ne a ile a balehela Egepeta. Empa, ntle ho tokisetso leha e le efe e tlalehiloeng le Egepeta, ea ho khutlisa Uria, morena ea tletseng boiphetetso a rōmela banna ho ea batla Uria le hore ba mo qobelle ho khutlela naheng ea Juda ho ea shoela tumelo. (Jer. 26:20-23) Kahoo hamorao hona selemong seo sa pele sa morena e mocha, Jeremia o bile le lebaka le leng la ho profeta kamoo a entseng, ka taelo ea Jehova. Ntlheng ena ho ke ho hlokomeloe hore Faro-Neko o ne a entse Jojakime morena holim’a Juda. (2 Mar. 23:34, 35) Mohlomong Faro-Neko o ile a sebelisana le Morena Jojakime bonokoaneng.

11. Jojakime ka baka leo a ipatlela tlokotsi efe?

¹¹ Jojakime a fela a ipiletsa tlokotsi. Selemong sa borobeli sa puso ea hae, Morena Nebukadnezare a futuhela Jerusalema ’me a etsa Jojakime morena oa mohlanka oa ’muso o mocha oa lefatše oa Babylona. Lilemo tse tharo hamorao Jojakime a oeloa ke lefu le sa lebelloang. Setopo sa hae sa lahleloa ka ntle ho lerako la Jerusalema hore se ‘epeloe ka kepelo ea esele.’ Ha e-ba feela kamoo Jeremia a profetileng. (Jer. 22:18, 19; 2 Likron. 36:5-8; 2 Mar. 24:1-6) Ho tšabeha hakaakang!

12. Joaloka Jeremia oa khale, sehlopha sa Jeremia sa kajeno se lopolotsoe joang lefung matsohong a mekha ea bolumeli?

¹² Joaloka Jeremia mor’a Hilkia, sehlopha sa Jeremia sa lekholong la rōna la lilemo la bo20 se bolokiloe lefung. Ha se mabakeng ’ohle, ’me ha se linaheng tsohle moo makhotla a boahloli a ileng a ineela takatsong e mpe ea mekha e matla ea bolumeli ba Bojakane. Ho bile le baahloli ba ileng ba hlokomela litokelo tsa bolumeli le bolokolohi ba sehlopha sa Jeremia, seo, mona lefatšeng, se emelang phutheho e kang mosali ea Jehova Molimo. Kahoo ho etsahetseng ho ile ha tšoana hantle le se ileng sa tšoantsetšoa ho Tšenolo 12:15, 16. Mekha e tsebisahalang le puso ea lentsoe la sechaba e “lefatšeng” e ile ea tla ho tla thusa baemeli ba “mosali” oa Molimo le ho etsolla boiteko ba Satane Diabolose ba batšehetsi ba hae ba bolumeli ho kopela sehlopha sa Jeremia ho se felisa ka ho feletseng.

13. Bao ba sehlopha sa Jeremia ba tsoela pele ho bolela eng, ha ba ntse ba sa sekisetsa khang efe?

¹³ Ba sehlopha sa Jeremia ba tsoela pele ho bolela sohle seo Molimo o ba laelang hore ba se bolele khahlanong le se neng se tšoantsetšoa ke Juda le Jerusalema, haesita le khahlanong le likarolo tse ling tsohle tsa bopolotiki tsa tsamaiso ena ea lintho. Le hoja ba lelekeloa “lekunutung” libakeng tse ling, ha ba sebeletse ho khukhunela mebuso e beiloeng ka molao e le hore ba qobelle ho netefala ha seo ba se bolelang. Ba hana khatello tsohle tse ba etsang hore ba sekisetse le mokha ona kapa oane oa bopolotiki. Ba hana ho tlohela ho se nke lehlakore ha Bokreste.

14. Sehlopha sa Jeremia se hlokomela hore ntoa ke ea mang, ’me, kamor’a ntoa, lefatše e tla ba sebaka sa mofuta ofe ho phela ho sona?

¹⁴ Kahoo, ka ho se sekisetse, ba ipoloka e ‘se ba lefatše.’ Baa tsebisisa hore Jehova Molimo o Matla ’Ohle o ka itlhokomela. Ntoa ke ea oona! Ha se ea bona hore ba e loane! Ba ema ba tiile ho se nkeng lehlakore ha Bokreste, ba kholisehile hore ‘ntoa ea letsatsi le leholo la Molimo o matla ’ohle’ e atametse, joalokaha makhotla a sa bonahaleng a bodemona ka matla a oona a boloi a ntse a bokella babusi ba lefatše ho ea boemong ba lefatše boo ka tšoantsetšo bo bitsoang Harmagedone. (Tšen. 16:13-16) Joale sehlopha sa Jeremia se thabela hore ho se nke lehlakore ha sona ho sa sisinyeheng ha Bokreste ho ho tšehetseng borena ba Jehova ba bokahohleng. Lefatše la rōna e tla ba sebaka se seholo hakaakang bakeng sa sehlopha sa Jeremia le Bakreste hammoho le sona ba sa nkeng lehlakore kamor’a hore se bone ho hlōla ha borena ba Jehova Harmagedone!

BOLOTSANA BO LOANTŠANG MORENA LE MOHLANKA OA JEHOVA

15. Ke hobane’ng ha ee e le nako ea bolotsana bo fetisisang ba lichaba paleng eohle ea motho, hona Tšenolo 14:12 e re see se tla bolela’ng bakeng sa Bakreste ba tšabang Molimo?

¹⁵ Leha ho le joalo, ea hona joale ke nako bakeng sa Bakreste ba mofuta oa sebele oa Bibele ho lekoa ka ho khethehileng mabapi le ho se nke lehlakore ha bona le botšepehi ba bona. Ke nako ea bolotsana bo boholo lichabeng tsohle paleng eohle ea motho, hobane hona joale ke nako ea Machaba a Kopaneng ao kajeno a nang le litho tse 151. Ke hobane’ng ho ka boleloang hore Machaba a Kopaneng ke bolotsana. Ke hobane ke mokhatlo o entsoeng ke motho bakeng sa ho etsolla le ho liehisa, halelele kamoo ho ka etsahalang, puso e loketseng ea ’muso oa Jehova ka Kreste oa hae. Ho tla hlōla ofe, ’muso oa Jehova oa Messia kapa Machaba a Kopaneng? Tšireletseho le khotso tsa batho bohle lia kenyelletsoa. E bolela pele ho nako kamoo nako ea Machaba a Kopaneng e le boemeli bakeng sa tšireletso ea lefatše e tla ba e lekang kateng, Tšenolo 14:12 e re: “Ke moo ho tla bonahala mamello ea bahalaleli, e leng ba bolokang litaelo tsa Molimo le tumelo ea bona ho Jesu.”—Bapisa Esaia 8:12, 13.

16. Ke bolotsana bofe ba lichaba bo neng bo le teng lilemong tse fetileng tse makholo a 19, ’me ho phethahatsa ha bona ka ’moho Pesaleme ea 2:1-4 ho ile ha supa eng?

¹⁶ Lilemong tse fetileng tse makholo a leshome le metso e robong ho bile teng bolotsana kapa boiteko bo reriloeng khahlanong le Kreste ka boeena, Molimo o lumella sena ho tlisa ho shoela tumelo ha Jesu. (Lik. 3:13; 4:27; 13:28, 29; 1 Tim. 6:13) Hona ho hlile ha boleloa ho Pesaleme ea 2:1-4. Pesaleme ena le ho phethahala ha eona ho sa fellang lilemong tse fetileng tse makholo a 19 e ne e supa bolotsaneng ba lichaba tsohle khahlanong le Jehova le Kreste oa hae nakong ena ha tokelo e feletseng ea ‘’muso oa lefatše’ e le ea bona ka bobeli.—Tšen. 11:15-18.

17. Lipaki tsa Jehova li hlokomela mokhatlo oa hona joale oa lefatše e le o sebetsang khahlanong le mang, hona li tšoarelletse boemong bofe kajeno, bo nkiloeng ka 1919?

¹⁷ Bakreste ba ’nete ba tla hlokomela bolotsana ba hona joale ba lichaba tsohle e le bo sebetsang khahlanong le Jehova le Kreste oa hae. Kahoo ba tla tsoela pele ho mamella ho se nkeng lehlakore ha bona ho kang ha Kreste, ba tšoarelletse ka matla boemong boo ba ileng ba bo nka morao koana ka 1919 kopanong ea Cedar Point (Ohio) ea Mokhatlo oa Lichaba oa Liithuti tsa Bibele, ba buella ’muso oa Jehova ka Kreste e le o khahlanong le Selekane sa Lichaba seo ho neng ho reroa hore se etsoe bakeng sa khotso le tšireletso ea lefatše, Selekane se joalo hona joale se hlahlangoa ke Machaba a Kopaneng. Boemo ba bona ke boo moprofeta Jeremia a neng a tla bo nka kajeno, hobane o lemositse ka bolotsana bo joalo khahlanong le puso ea “mohlanka” oa morena oa Jehova.

18. Selemong sa pele sa puso ea Jojakime, Jeremia a bolelloa hore a etse’ng, ’me o ne a tla li romela ho bo-mang le molaetsa?

¹⁸ Ka baka leo, boprofeta ba Jeremia, khaolo ea 27, bo hlalosa se nakong bakeng sa rōna. Tlaleho ea boprofeta moo e re:

“Tšimolohong ea puso ea Jojakime, mor’a Josiase, morena oa Juda [ka 628 B.C.E.], lentsoe lena le tsoang ho Jehova la tla ho Jeremia, la re: Ho itsoe ke Jehova, ho ’na: U iketsetse marapo le lijoko, u li roale molalelang oa hao; u li romele ho morena oa Edomo, le ho morena oa Moabe, le ho morena oa bana ba Ammone, le ho morena oa Tyre, le ho morena oa Sidone, ka manqosa a tlileng Jerusalema ho Tsedekia, morena oa Juda. U a laetse ho marena a ’ona, u re: Ho itsoe ke Jehova oa makhotla, Molimo oa Iseraele: Le bolelle marena a lōna.”—Jer. 27:1-4.

19. Ho ea ka temana ea Seheberu ea mehla, Jeremia o fumane molaetsa oa Jehova neng, ’me a nka bohato ka oona ka nako efe?

¹⁹ Rea hlokomela hore mona ho boleloa marena a mabeli e le a busang holim’a Juda le Jerusalema, pele Jojakime, joale ngoan’abo Tsedekia, ea ileng a busa kamor’a Jojakime le mor’a Jojakime Jojakine. Haeba lebitso Jojakime le nepahetse ho Jeremia 27:1, joale Jeremia o fumane boprofeta bona ka 628 B.C.E. ’me a bo boloka ka lilemo tse 11 pele a nka bohato ka bona. Empa mengolo e meraro ea Seheberu le liphetolelo tsa Sesyria le Searabia tsa Jeremia 27:1 li re “Tsedekia” e seng “Jojakime,” ’me ke kamoo liphetolelo tse ngata tsa morao tjena tsa Bibele li bolelang taba.a Leha ho le joalo, ho nka bohato ha Jeremia kutlong ea molao oa Jehova ho beiloe pusong ea Morena Tsedekia le nakong eo ka eona manqosa a tsoang linaheng tse hlano tse haufi, Edomo, Moabe, Ammone, Tyre le Sidone a tlileng Jerusalema ho sebelisana le Morena Tsedekia. Ka nako ena Nebukadnezare bonyane e ne e bile ’musisi oa Babylona ka lilemo tse robeli ’me a isitse Morena Jojakine Babylona ’me a beile rangoan’ae Tsedekia teroneng ea Jerusalema. E le morena oa mohlanka, Tsedekia o ne a tšoanela ho tšepahala ho Babylona.

20. Ho tla ha manqosa ao a mahlano ho ne ho emela bohato ba mofuta ofe, ’me ke hobane’ng ha ba ile ba khothalletsoa ho se mamele mantsoe a linohe?

²⁰ Ho tla ha manqosa a tsoang linaheng tse haufi tse hlano e ne e le ketso e reriloeng hantle. E ne e emela bohato bo reriloeng hantle. Ka seo Jeremia a ileng a bolelloa hore a se bolelle manqosa ana, ho hlakile hore bolotsana bo ne bo tsoela pele ba ho fehla bofetoheli bo kopanetsoeng ho loantša Morena Nebukadnezare. Linohe le lilaoli li ne li bona ho le hotle ho loana. Ke ka baka leo Jeremia a ileng a bolelloa hore a re ho manqosa: “’Me lōna, he, le se ke la mamela baprofeta ba lōna, leha e le linohe tsa lōna, leha e le balori ba lōna, leha e le lingaka tsa lōna, leha e le baupelli ba lōna, ba le bolellang, ba re: Le ke ke la sebeletsa morena oa Babylona. Hobane ba le profetela leshano, hore ke tle ke le khannele hole le lefatše la lōna, ke le lahle, ke le timetse.”—Jer. 27:9, 10.

21. Morao koo, bademona ba ne ba phehella lichaba tse amehang ho etsa joang?

²¹ Ho joalo ka kajeno, bademona ba etelletse pele marena a bopolotiki ho ea Harmagedone, ho ea “ntoeng ea letsatsi le leholo la Molimo o matla ’ohle,” le morao koo bona bademona bao ba ne ba phehella babusi ba lipolotiki ba linaha tseo manqosa a neng a e-tsoa ho tsona ho tsoellisa bofetoheli bo kopaneng khahlanong le “mohlanka” oa Jehova, Nebukadnezare. (Tšen. 16:13-16) Ka ho utloahalang, lichaba tseo ha lia ka tsa hanyetsa ha Morena Tsedekia oa Juda a fela a koeneha selemong sa Puso ea hae sa borobong.

22. Ha Jeremia a neelana ka molaetsa o tsoang ho Jehova ho manqosa, ke hobane’ng a neng a sa kena-kenane le lipolotiki, ’me Jehova a hatisa borena ba hae joang molaetseng?

²² Ha Jeremia a neelana ka melaetsa e tsoang ho Jehova ho manqosa a tsoang linaheng tse kopaneng tse hlano, o ne a sa kena-kenane le lipolotiki, hobane Molimo oa hae, Jehova, e ne e le “Morena oa lichaba” ’me o ne a tsoela lichaba tse hlano molemo ka ho li nea temoso ea bohlokoa lichabeng tseo. A hatisa borena ba hae ba bokahohle, Jehova a bolella Jeremia hore a re ho oona:

“Ke ’na ea entseng lefatše, le batho, le liphoofolo tse bophareng ba lefatše, ka matla a maholo a ka le ka letsoho la ka le otlolotsoeng, ’me ke le neela eo ke ithatelang ho mo nea lona. ’Me joale, ke neela mafatše ana ’ohle matsohong a Nebukadnezare, morena oa Babylona, mohlanka oa ka; ke mo neela le tsona liphoofolo tsa naha, li tle li mo sebeletse. Lichaba tsohle li tla mo sebeletsa, eena, le mora oa hae [Evil-merodake], le setloholo sa hae [Belshatsare], ho fihlela mohla nako ea lefatše la hae le lona e hlahang ea ho kokobetsoa ke lichaba tse ngata le ke mebuso e meholo.”—Jer. 27:5-8; 2 Mar. 25:27; Dan. 5:1, 11, 18, 22.

23. Ho ne ho tla sebeletsoa Babylona halelele hakae, ’me sechaba se neng se hana taelo ea Jehova se ne se tla oeloa ke eng?

²³ Kahoo, ka taelo ea Jehova, e ne e lokela hore e be nako e telele, ha e le hantle, lilemo tse 70—lichaba tse metsitsoeng ke ’Muso oa Babylona li neng li tla jara joko ea bohlanka. Bohlanka bo joalo bo ile ba tšoantsetšoa ka mahlaahlela le lijoko tseo Jehova a ileng a bolella Jeremia hore a li etse le ho li neela manqosa ao a linaha lisele a neng a etetse Morena Tsedekia. Bofetoheli ba lichaba tseo bo ne bo ke ke ba senya taelo ea Molimo.

“Sechaba, kapa ’muso ha o ke ke oa ipea ho Nebukadnezare morena oa Babylona, .. . ke tla khalemela sechaba seo ka lerumo, le ka tlala, le ka lefu la seoa, ho bolela Jehova, ke tle ke be ke se timetse ka letsoho la hae.”—Jer. 27:8.

24. Ke hobane’ng ha Mohlanka le Morena oa Jehova, Jesu Kreste joale a busa har’a lira tsa hae?

²⁴ Kajeno, mehleng ea sehlopha sa Jeremia, haesita le morao koo mehleng ea Morena Tsedekia, ho ka ba molemo ho ela hloko keletso ea Morena e Moholo oa bokahohle ho e-na le ho ela hloko bademona. (Jer. 27:9-11) Ruri ha re batle ho lohelloa bolotsaneng ba lichaba tsohle khahlanong le Mohlanka le Morena oa Jehova, Jesu Kreste. Babusi ba lipolotiki, haholo bao ba Bojakane, ba ’nile ba hlokomelisoa ka lipolelo tse ngata-ngata tse entsoeng ke sehlopha se tlotsitsoeng sa Jeremia, empa babusi ba ikhethela ho lula Machabeng a Kopaneng. (Jer. 27:12-15; Tšen. 17:12, 13) Ba itsetsepetse boreneng ba bona ba lichaba tsa bona ’me ho hang ba hana ho lia melala ea bona tlas’a joko ea borena ea Mohlanka le Morena oa Jehova. Ba sa nke ka ho teba ho fela ha Mehla ea Balichaba ka 1914, babusi ba lipolotiki ha ba lumele hore ba morerong oa bolotsana lefatšeng lohle khahlanong le bobusi ba lefatše lohle ba Mohlanka le Morena oa Jehova. Empa, joalokaha Tsedekia a ile a lumelloa hore e be morena oa Juda ke “mohlanka” oa Jehova, Nebukadnezare, kahoo ho joalo ka babusi ba lipolotiki, ho akarelletsa le ba Bojakane. Ba lumelletsoe ho tsamaisa litaba tsa bopolotiki ho tloha ka 1914. Ka baka leo joale Mohlanka le Morena oa Jehova o tlameha ho busa har’a lira tsa hae, ba mo rerelang bolotsana.

25. (a) Ka baka la ho hana ha babusi ho ela hloko, sehlopha sa Jeremia se tlameha ho retelehela ho bo-mang ka molaetsa? (b) Haeba baprofeta ba topollo e haufi ba ne ba tsoa ho Jehova, ba bolelloa hore ba rapelle eng ka mafiso a neng a sa saletse?

²⁵ Kaha babusi ba lipolotiki ba bontša hore ba ke ke ba lia melala ea bona tlas’a “joko” ea Mohlanka oa Jehova, Mora oa hae ea beiloeng teroneng leholimong, sehlopha sa Jeremia se tlameha ho etsa joang? Se ee ho batho, batho ka bomong. Ho batho sehlopha sa Jeremia se tlameha ho pepesa ba ntšetsang morero oa bolotsana pele.

“Ho itsoe ke Jehova: Le se ke la mamela mantsoe a baprofeta ba lōna ba ntseng ba le profetela, ba re: Bonang, mafiso a ntlo ea Jehova a s’a ea khutlisoa Babylona kapele, athe ba le profetela leshano. Le se ke la ba mamela. Sebeletsang morena oa Babylona, ’me le tla phela. Le ratela’ng hoba motse ona o etsoe lesupi? Ekare ha e le baprofeta, ’me lentsoe la Jehova le le teng ho bona, ba ke ba rapele Jehova oa makhotla, hore mafiso a sa setseng ka tlung ea Jehova le ka tlung ea morena oa Juda le Jerusalema a se ke a nkeloa Babylona.”—Jer. 27:16-18.

26. Ho e-na le hore mafiso a khutle kapele, ho ne ho tla etsahala joang ka mafiso a saletseng, ho ea ka polelo ea Jehova?

²⁶ Jerusalema tempele le lipilara tsa eona e ne e sa eme. Lebaleng la eona ho ne ho sa le teng morifi o moholo oa ho hlapela o neng o bitsoa “leoatle” le lintho tse neng li tšela mafiso a manyenyane le thepa e ngata e neng e sebelisoa ke baprista le Balevi. Ho thoe’ng ka lisebelisoa tsee tsohle tsa tempele?

“Jehova oa makhotla, Molimo oa Iseraele, o re bakeng sa mafiso a sa setseng ka tlung ea Jehova le ka tlung ea morena oa Juda le Jerusalema: A tla isoa Babylona, a sale teng ho fihlela mohla ke tla a batla, ho bolela Jehova, ke a tlise, ke a busetse nqalong ena.”—Jer. 27:19-22.

27. (a) Polelo ea Jehova e ile ea bolela’ng mabapi le bolotsana ba lichaba? (b) Kahoo ke tsela efe e tla etsa hore re kopanele litholoaneng tsa tlhōlo tsa molaoli oa makhotla oa Jehova Taolong e Ncha?

²⁷ Polelo ee ea Jehova e ne e bolela’ng? Sena: Hore bolotsana bo reroang ke lichaba tsohle khahlanong le “mohlanka” oa Jehova bo ne bo tla hlōleha. Baprofeta ba bolumeli le lingaka tsa bolaoli tse neng li bolela liketsahalo pele ho nako li tlameha ho pakahala li le leshano, li thetsa batho ba lumelang mefeela ho ea timela. Ho molemong oa rōna hore re se ke ra ba mamela. Tšepo ea rōna e se ke ea e-ba ho Machaba a Kopaneng kapa mokhatlo leha e le ofe lichabeng tsohle empa ’musong oa Jehova ka Mohlanka le Morena oa hae, Jesu Kreste. Ho se nkeng lehlakore ha Bokreste litabeng tsa bopolotiki tsa lefatše lena le likhohlano tsa lona, re tla lia melala ea rōna tlas’a joko ea eo Jehova a mo supileng, eo a mo tšehetsang e le molaoli oa makhotla a hae a ntoa “ntoeng ea letsatsi le leholo la Molimo o matla ’ohle” e tlang Harmagedone. Hona ho tla isa ho kopaneleng ha rōna litholoaneng tsa tlhōlo e khanyang ea taolo e ncha ea Jehova.

[Mongolo o botlaaseng ba leqephe]