Ho Bolela Lentsoe la Jehova Ntle ho Tšabo

“Joale, Morena, . . . u nee bahlanka ba hao matla a ho bolela lentsoe la hao, ba sa tšabe letho.”—Lik. 4:29.

1, 2. (a) Hoba a tsosoe, Kreste o bile le thahasello efe ho barutuoa ba hae, ’me ka hoo ba neoa litaelo life? (b) Bopaki bo ne bo lokela ho atoloha hakae?

LE HOJA lefu le ne le arotse Jesu ho barutuoa ba hae, ha baa ka ba lebala memo ea hae ea hore e be “ba tšoasang batho.” Ba tseba hore hona ho bolela ho bua lentsoe la Molimo har’a batho. Empa ba ne ba tla tsoela pele joang? Ho ne ho hlokahala hore ba tataisoe le ho tsamaisoa.

² Thabong e khōlō ea barutuoa, Jesu ea tsositsoeng a itlhahisa ho bona ka makhetlo a ’maloa pele a nyolohela ho Ntat’ae. (1 Ba-Kor. 15:3-8; Joh. 20:20) Kahoo a tseba ho ba laea ka ho tsoetseng pele ka mosebetsi oa bona oa kamoso. Galilea, o itse:

“Ke neiloe borena bohle leholimong le lefatše. E-eang ke hona, le rute lichaba tsohle; le ba kolobetse ka lebitso la Ntate, le la Mora, le la Moea o Halalelang; ’me le ba rute ho boloka tsohle tseo ke le laetseng tsona. ’Me bonang, ’na, ke na le lōna ka mehla eohle, ho isa bofelong ba lefatše.” (Matt. 28:18-20)

Mosebetsi oa Bokreste oa ho etsa barutuoa, ba kolobetsoa ’me ba rutoa, o tlameha ho ea fihla ho batho ba lichaba tsohle. Ke ho khothatsang hakaakang ho tseba hore Mora enoa oa Molimo ea tsositsoeng o ne a tla ba le Bakreste mosebetsing oa bona oa ’Muso tsatsi le leng le le leng ho fihlela bofelong ba tsamaiso ea lintho!

3. Moea oa Molimo o na le karolo efe ho hona, ho tloha ka Pentekonta?

³ Jesu o ne a tšepisitse barutuoa ba hae hore mothusi, moea o halalelang, o tla tla. (Joh. 14:16, 26) E ne e tla ba eng oona moea oo, hona o ne o tla sebetsa joang? Pelenyana a nyolohela ho Ntat’ae, Jesu a re ho barutuoa bao:

“Le tla fuoa matla mohla Moea o Halalelang o tlang ho lōna, ’me le tla ba lipaki tsa ka Jerusalema, le naheng eohle ea Judea, le ea Samaria, le ho isa pheletsong ea lefatše.” (Lik. 1:8)

Ke tebello e kaakang bakeng sa bopaki bo atolohileng! Barutuoa ba khutlela Jerusalema, ’me moo ba phehella thapelong. Letsatsi la mashome a mahlano Jesu a tsohile e ne e le Pentekonta, ’me barutuoa ba ne ba bokane bohle sebakeng se le seng. Ka tšohanyetso ha utloahala molumo ‘oa moea o kang sefefo,’ le lipontšo tse ling tsa mohlolo. Jehova o ne a theolela ho bona moea o halalelang o tšepisitsoeng, matla a hae a sebetsang. ’Me moea oo oa ba susumeletsa ho etsa joang? Oa ba etsa hore ‘ba bue.’—Lik. 2:1-4.

4. ‘Litaba tse molemo’ li ile tsa amoheloa joang ka lekhetlo leo?

⁴ Nako e ne e fihlile ea hore ‘ho tšoasoe batho’ haholo. Ka thuso ea moea o halalelang, barutuoa bao ba ne ba ka bua lentsoe la Molimo ka lipuo tse ngata. Kahoo, ka puo ea habo bona, batho ba teng moketeng oa Pentekonta ba tsoang likarolong tse ngata tsa lefatše ba tseba ho utloa “limakatso tsa Molimo.” Ba shebelletseng ba hlolloa. Eaba Petrose o ema ’me o bua ho hlalosa a sa tšabe letho. A pakela tsoho ea Jesu ka ho phethehileng, a re ba teng ba bake, ba kolobetsoe ’me ba bolokehe molokong o khopo. Phello ea e-ba efe? Ba ka bang 3 000 ba amohela lentsoe! Bana ba kolobetsoa ’me ba ekelletsoa phuthehong ea Bokreste. Thabo ea e-ba khōlō, ‘ha Jehova a eketsa kereke tsatsi le leng le le leng ka batho ba bolokehang.’—Lik. 2:5-47.

5. (a) Bakreste ba tla ka morero ofe ka pel’a babusi nakong ea khanyetso? (b) Ke khothatso efe eo re nang le eona ho sena?

⁵ Ho paka hona ka matla a moea o halalelang ho ne ho hlahisitse barorisi ba bangata ba Jehova. Bana, le bona, ba thabela ho tsoa tsatsi le leng le le leng, ’me bopaki ba bona ba pontšeng ba tlatsa Jerusalema ka ‘litaba tse molemo.’ Petrose le Johanne ba etella pele mosebetsing ona, ba ipiletsa ho batho hore ba sokolohe libe tsa bona li tle li hlakoloe, e le hore ba khatholloe moeeng ke Jehova. Ba bangata ho bana ba mamela ‘litaba tse molemo’ ka thabo—empa ha hoa ba joalo ka moprista e moholo, molebeli oa tempele le Basaduse. Ba tšoara Petrose le Johanne, ba ba kenya chankaneng. Kahoo barutuoa ba qala ho utloa lehloeo leo Jesu a hlileng a ba lemosa ka lona, ha a re:

“Bonang, ke le roma le le joale ka linku har’a liphiri; ka baka leo, le be bohlale joale ka linoha, ’me le be ba se nang mano joale ka maebana-khoroana. ’Me le tsohele batho masene; hobane ba tla le isa khotla, ba le shape masynagogeng a bona. Hape, le tla isoa pel’a babusisi, le pel’a marena, ka baka la ka, le be lipaki tsa ka ho ’ona, le ho lichaba. Empa mohla ba le neelang bona, le se ke la belaella mokhoa oo le tla bua ka oona, le seo le tla se bolela; hobane seo le tla se bolela, le tla se neoa nakong eona eo. Hobane e ke ke ea e-ba lōna le buang, empa e tla ba Moea oa Ntat’a lōna o buang ka lōna.” (Matt. 10:16-20)

Leha ho le joalo, ka nako eo ‘batšoasi bao ba batho’ ba ne ba ka thabela ho tšoasoa ho hoholo ha balumeli ba bacha ba ka bang 5 000. E tlameha ebe ba ile ba leboha Jehova hakaakang bakeng sa keketseho eo! Le rōna, rea khothala ke tlaleho ea tšebeletso ea bona.—Lik. 4:1-4.

HO BUA KA PEL’A BABUSISI

6. (a) Petroe le Johanne ba etsa joang ha ba tlisitsoe ka pel’a babusisi? (b) Ke hobane’ng ha ba ne ba loketse hantle ho etsa joalo?

⁶ Hosesane ha bokelloa babusisi, ’me bana ba botsisisa Petrose le Johanne ka mosebetsi oa bona, ho akarelletsa ho phekola ha bona monna oa seritsa. Mona ha hlaha monyetla o motle oa bopaki bo tsoetseng pele ba pontšeng. Joalokaha Jesu a ne a bontšitse hore ho tla etsahala, moea o halalelang joale oa nea Petrose matla a hore a re:

“Marena a sechaba, le lōna baholo ba Iseraele, ha e le mona re botsoa kajeno ketso e ’ngoe e molemo e entsoeng ho motho oa sehole, hore ho tsejoe hore na o folisitsoe ka mokhoa o joang, ho ke ho tsejoe ke lōna kaofela le ke sechaba sohle sa Iseraele, hobane motho enoa ea emeng pel’a lōna, o folisitsoe ka lebitso la Jesu Kreste oa Nazaretha, eo lōna le mo thakhisitseng, eo Molimo o mpang o mo tsositse bafung. Ke eena e leng lejoe le nyatsitsoeng ke lōna lihahi, le entsoeng lejoe la ntlha la motheo. ’Me ha ho poloko ho e mong; hobane ha ho lebitso le leng tlas’a leholimo, leo batho ba le neiloeng, leo re ka bolokehang ka lona.” (Lik. 4:8-12)

Linnete tsena tsa bohlokoa li ne li lokela ho boleloa! Kahoo baapostola ba ne ba toba taba. Ha baa ka ba checha. Petrose le Johanne e ne e le batšoasi feela tjee ba lihlapi, empa ba ne ba koetlisitsoe ke Jesu hore ba bue ka tsela e matla, ka kholiseho le sebete. E le lipaki tsa Jehova, ba bua hobane ba ne ba batla ho bolela lentsoe la Molimo.—Bapisa Johanne 7:15-18, 45, 46.

7. Re ithuta eng ka tlaleho e ho Liketso 4 mabapi le monahano le sepheo sa bahanyetsi?

⁷ Re lokela ho leboha Jehova hakaakang ka tlaleho e ho Liketso khaolo ea 4! Hobane ha e bontše feela hore na ke ka ho hlakileng hakae Bakreste ba ’nete ba lokelang ho bua ba sa tšabe letho, empa hape e senola monahano o sothehileng oa babusi ba lefatše ba hanyetsang mosebetsi oa Molimo. Hoba baapostola ba pake joalo ba sa tšabe letho, babusisi ba ba ntšetsa ka ntle ho Lekhotla le Phahameng ba sa itšeba. Maikutlo a bona e bile afe? Ba ne ba ke ke ba latola hore ho etsahetse pontšo e hlokomelehang ka lebitso la Jesu Kreste. Empa monahano oa bona e ne e le ho emisa ho jaleha ha borapeli ba ’nete. Ba nahana hore ka litšoso ba ka tšosa baapostola ’me kahoo ba emisa ho bua ha bona ka lebitso la Jesu.—Lik. 4:16, 17.

8. Ke eng se bontšang hore barutuoa ba ne ba sa tšoha?

⁸ Leha ho le joalo, na litšoso feela tjee li ne li tla emisa lipaki tseo tsa Jehova tsa Bakreste? Bakreste ba ’nete ba kajeno ba ke ba hlokomele mohlala oa bona o se nang tšabo:

“Eaba [babusisi] ba boela ba ba bitsa, ba ba laela hore ba se ke ba bolela le hanyenyane, leha e le ho ruta, ka lebitso la Jesu. Empa Petrose le Johanne ba ba fetola, ba re: A ho ahlole lōna hore na ke taba e lokileng pel’a Molimo ho utloa lōna ho fetisa Molimo na? Hobane ha e le rōna, ha ho kamoo re ka lesang ho bolela tseo re li boneng le tseo re li utloileng.” (Lik. 4:18-20)

Ba tšaba maikutlo a batho, babusisi ba lokolla baapostola, hoba ba ba tšose. Ka thuso ea moea oa Molimo, Bakreste bao ba ne ba hlōtse hloriso.

THUSO E TSOETSENG PELE E TSOANG HO JEHOVA

9, 10. (a) Bahlanka ba Jehova ba ile ba latela mokhoa ofe, ’me ke takatso efe e neng e le ka lipelong tsa bona? (b) Ba ile ba kōpa eng, ’me ba arabeloa joang?

⁹ Hoba ba lokolloe, baapostola ba khutlela phuthehong. Ba tlalehela baena se etsahetseng, joale phutheho ea etsa seo Bakreste ba lokelang ho se etsa ka mehla tlas’a maemo a joalo. Ba bua le Jehova thapelong. Ea bona e bile thapelo ea tumelo, e bolela takatso ea bona e matla ho tsoela pele ba sebeletsa Molimo. Ba re:

“Oho, Morena [Jehova], ke uena Molimo o entseng leholimo, le lefatše, le leoatle, le tsohle tse ho ’ona. U boletse ka molomo oa Davida, mohlanka oa hao, ua re: Na ba-lichaba ba luma-lumelang, ’me lichaba li rerela’ng litaba tsa lefeela? Marena a lefatše a phuthehile, le baholo ba kopane hammoho ho loantše Morena le Motlotsuoa oa hae. Hobane efela Heroda, le Ponse Pilato, le ba-lichaba, le meloko ea Iseraele e kopane hammoho ho loantša Jesu, mohlanka oa hao ea halalelang, eo u mo tlotsitseng; le ho etsa tsohle tseo letsoho la hao le thato ea hao e li laetseng pele hore li etsahale. Joale, Morena [Jehova], bona litšokelo tsa bona, ’me u nee bahlanka ba hao matla a ho bolela lentsoe la hao, ba sa tšabe letho. ’Me u otlolle letsoho la hao, ho folisa batho, le ho etsa meeka le mehlolo ka lebitso la Jesu, mohlanka oa hao ea halalelang.”—Lik. 4:24-30.

¹⁰ Baapostola ha baa ka ba kōpa hore ba tlosoe mosebetsing kapa litšokelong tsa lira tsa ’nete. Ba ne ba tseba thōmo ea bona e tsoang ho Jehova—hore e be lipaki tsa hae. Takatso ea lipelo tsa bona e ne e le hore ba ’ne ba bolele lentsoe la Molimo ba sa tšoha letho, ’me ba kōpa thuso ea hae ho seo. Ba ne ba ke ke ba ineela tšabong. Na Jehova o ile a khahlisoa ke boemo bona? Tlaleho e-ea re bolella:

“Eitse hobane ba rapele, nqalo eo ba phuthehetseng ho eona ea sisinyeha, ’me bohle ba tlala Moea o Halalelang, ’me ba bolela lentsoe la Molimo ka matla.”—Lik. 4:31.

11. (a) Ho ile ha hlaha eng ka ho bolela ha bona ba sa tšoha letho? (b) Ke hobane’ng ha ho koalloa ho sa ba etsa hore ba khaotse mosebetsi oa bona?

¹¹ Lipaki tseo tsa ’Muso tsa tsoela pele mosebetsing oa tsona ka matla a macha, ’me Jehova a ba le bona. “Bongata joa ba lumetseng ho Morena bo ne bo ntse bo ekeletsoa ka banna le ka basali.” (Lik. 5:14) Ka baka leo, baeta-pele ba bolumeli ba halefa ’me ba kenya baapostola chankaneng. Leha ho le joalo, e ne e le thato ea Jehova hore bopaki ba bona bo tsoele pele Jerusalema. Eaba o rōmela lengeloi la hae ho ea lokolla baapostola, le hore le re ho bona:

“E-eang, le eme tempeleng, le bolelle sechaba litaba tsohle tsa bophelo bona.”—(Lik. 5:20)

Ho kenngoa chankaneng ha hoa ka ha tšosa baapostola hore ba khutse joalokaha ho sa ka ha etsa joalo litšoso tsa baprista le babusisi.

12. Ho tlile joang hore baapostola ba boele ba fane ka bopaki ka pel’a lekhotla, ’me na ba ile ba tšosoa?

¹² Leha ho le joalo, baapostola ba boela ba tšoaroa ke baholo ’me ba isoa Lekhotleng le Phahameng ho talimana le moprista e moholo ea halefileng, ea itseng:

“Na ha rea ka ra le laela haholo-holo, hore le se ke la ruta ka lebitso leo na? Athe, bonang, le tlatsitse Jerusalema ka thuto ea lōna, ’me le rata ho tlisa mali a motho eo holim’a rōna.” (Lik. 5:28)

Ka lekhotleng leo la bora, ba alositsoe ke baholo ’me moprista e moholo a ba buisa ka matla joalo, na baapostola ba ne ba tla ineela? Le hanyenyane.

“Empa Petrose le baapostola ba bang ba fetola, ba re: E ka khona re utloe Molimo ho e-na le batho. Molimo oa bo-ntat’a rōna o tsositse Jesu, eo le ’molaileng ka ho mo fanyeha sefateng. Molimo o mo phahamiselitse letsohong le letona la oona, hore e be eena Morena le ’Moloki ea neang Iseraele pako le tšoarelo ea libe. Rōna, re lipaki tsa hae litabeng tseo, rōna le moea o Halalelang oo Molimo o o neileng ba o utloang.”—Lik. 5:29-32.

13. Keletso ea Gamaliele e bile efe, ’me lekhotla la e talima joang?

¹³ Mona, hape, re motlotlo ka tlaleho ea Mangolo e bontšang monahano o sothehileng oa ba hanyetsang mosebetsi oa Molimo. Le hoja baapostola e ne e le batho ba molemo, lekhotla le ne le hopotse ho ba felisa. Leha ho le joalo, moruti ea hlomphehang oa molao Gamaliele a ema ’me a bua mantsoe a nakong a keletso ho babusisi ba bolumeli. A re:

“Bana ba Iseraele, iponeleng bakeng sa batho bao hore na le tla etsa eng. Hobane khajana ho ile ha hlaha Theudase, a ipolela hore ke motho e moholo; a lateloa ke batho ba batlileng ho ba makholo a mane; a mpa a bolaoa; ’me bohle ba khotsoeng ke eena ba fatakanngoa, ba fela. Ka mora’ eo, ha hlaha Judase oa Galilea, mehleng eo batho ba neng ba ngoloa ka eona, a ba a ikhulela batho ba bangata; empa le eena a timela, ’me bohle ba neng ba mo utloa ba fatakanngoa. Joale, ke re ho lōna: Khaohanang le batho bao, le ba tlohele; hobane ha ekaba morero oo, kapa mosebetsi oo ke o tsoang ho batho, o tla fela. Empa ha eba o tsoa ho Molimo, le ke ke la ba la o felisa; ’me le iponele, e se re mohlomong la fumanoa le loantšitse Molimo. (Lik. 5:34-39)

Keletso ena e bohlale ea Gamaliele ea amoheloa kammoho. Le hoja baeta-pele ba bolumeli ba sa ka ba khaotsa ntoa ea bona ho loantša Molimo, bonyane ha baa ka ba felisa baapostola. Ho e-na le hoo, ba ba shapa haholo, ba ba laela ho khaotsa ho bua ka Jesu, ’me ba ba tlohela ba ikela.—Lik. 5:40.

SEBETE TLAS’A TEKO

14. Bakreste joale ba nka bohato bofe ka sebete, ka liphello life?

¹⁴ Na hona hohle ho ile ha nyahamisa baapostola hore ba ka bua lentsoe la Molimo ka ho se tšabe? Tlaleho e-ea arabela:

“Baapostola ba tloha khotla, ba thabile kahobane ba entsoe ba tšoaneloang ke ho hlabisoa lihlong ka baka la lebitso la Jesu. Ha ba ka ba phetsa ka matsatsi ’ohle ho ruta le ho bolela tempeleng le ka matlung, hore Jesu ke Kreste.” (Lik. 5:41, 42)

Ka sebete baapostola le Bakreste ba bang ba tsoela pele ho sebetsa ka lentsoe la Molimo le ho bua ba sa tšabe letho, ’me Jehova a hlohonolofatsa mosebetsi oa bona.

“Lentsoe la Molimo le ne le ntse le tsoela pele; ’me barutuoa ba ne ba anafala haholo Jerusalema, ha ba ha lumela le baprista ba bangata.”—Lik. 6:7.

15. Tse ling tsa lintho tseo Setefane a li boletseng a sa tšabe ke life, ’me ba bolumeli ba itšoara joang?

¹⁵ Ha joale baprista le bona, ba ne ba sokoloha ’me e e-ba Bakreste, ho ne ho se khaotso khanyetsong ea baeta-pele ba bolumeli ba thatafetseng. Kapele, paki e mafolofolo Setefane a iphumana ka pel’a Lekhotla le Phahameng. A fana ka bopaki bo matla boo ho bona a hlahlobileng ho sebetsahala ha merero ea Jehova. Empa bahanyetsi ba mo oela holimo ’me ba mo tlepetsa ka majoe hore a shoe. Setefane a etsahalloa ke seo Jesu a hlileng a se bolela: “Nako ea tla, eo e mong le e mong ea le bolaeang a tla hloma eka o sebeletsa Molimo.”—Joh. 16:2; Lik. 6:8–7:60.

16. (a) Joale ha etsahala joang ho phutheho eohle ea Bokreste? (b) Ba ba le pono efe ka lintho tsa bona tse bonahalang?

¹⁶ Ho shoela tumelo ha Setefane ea e-ba pontšo ea leqhubu la hloriso e bohale.

“Mehleng eo, kereke ea hlaheloa ke hloriso e kholo; ba qhalanyetsoa bohle mafatšeng a Judea le a Samaria, ha sala baapostola ba ’notši.” (Lik. 8:1)

Na hona ho ne ho tla khutsisa lipaki tsa Jehova tsa mehleng eo? Mona, ka sebele e ne e le boiteko bo bong ba Bosatane ba ho qhala tšebetso ea bahlanka ba Molimo. Ba tlameha ho sia matlo le matlotlo. Leha ho le joalo, ba ne ba e-na le pono e nepahetseng ea lintho tse bonahalang. Ho sena ba tšoana le Bakreste bao hamorao Pauluse a ileng a ba ngolla: “Hobane le kile la hlomohela ba litlamong, ’me le lumetse ka thabo ha ntho tsa lōna li tlatlapuoa, la itsebela hobane le na le moruo o fetisang, o sa tloheng.”—Ba-Heb. 10:34.

17, 18. (a) Ketso ea Filipi le ba bang ba Bakreste ba qhalanntsoeng e re bontša tsela eo re ka hlōlang mekhoa ea Satane ka eona joang? (b) Ke mahlohonolo afe a hlahileng ho Jehova?

¹⁷ Barutuoa ba ananela ka botlalo hore ba tlameha ho tsoela pele ho ba lipaki tsa Molimo le tsa Kreste tse tšepahalang. Kahoo, “ba neng ba qhalantsoe ba ne ba tsamaea ba ntse ba bolela lentsoe.” (Lik. 8:4) Filipi a ea motseng oa Samaria, moo a ileng a ’na a bolela lentsoe a sa tšabe, a tlisetsa batho thabo e khōlō. Kapele, a ba le balumeli ba bang ba kopanang le eena, ’me ha rōmeloa molaetsa Jerusalema ho tsebisa baapostola hore Samaria e amohetse lentsoe la Molimo. Petrose le Johanne ba ea teng, moea o halalelang oa theohela ho Basamaria, ’me phutheho ea Bokreste ea hlongoa moo.—Lik. 8:5-8, 14-17, 25; 9:31.

¹⁸ Bakreste bao ba lekholong la pele la lilemo ba ne ba e-na le pono e nepahetseng. Ba rapela Jehova hore a ba boloke ba bua lentsoe la Molimo ba sa tšabe letho. Ke sona seo ba ileng ba se etsa, ka thuso ea moea oa hae, ’me a ba hlohonolofatsa. ’Me tlaleho e re, “letsoho la Morena la e-ba le bona”!—Lik. 11:19-21.

HO BOLELA NTLE HO TŠABO HONA JOALE

19. Ke bopaki bofe boo re nang le bona ba hore Jehova Molimo le Kreste ba bile le lipaki tsa Bakreste mehleng ea kajeno?

¹⁹ Ho theosa le makholo a lilemo, Jesu o tšepahetse tšepisong ea hae: “Ke na le lōna ka mehla eohle, ho isa bofelong ba lefatše.” (Matt. 28:20) Ha joale re fihlile nakong eo, re lebohang hakaakang hore lipaki tse fetang 2 000 000 li ‘bolela lentsoe la Jehova li sa tšabe’! ‘Me Molimo oa rōna o hlohonolofalitse haholo mosebetsi oa bana “ba tšoasang batho,” hore “litaba tsena tse molemo tsa ‘muso” li tsebahale mafatšeng ‘ohle, haesita le ho ea fihla Antarctica. Li kenelletse ho ea libakeng tse hare-hare tsa lithaba le lihleke-hlekeng tse nyenyane tsa maoatle a supileng. (Matt. 24:14) E, mosebetsi oa bopaki o fihlile sechabeng se seng le se seng “ho isa pheletsong ea lefatše,” ’me hona hohle ho finyelletsoe ka moea oa Jehova.—Lik. 1:8; Zak. 4:6.

20. Diabolose o bontšitse khanyetso ea hae ho bajari ba Lentsoe la Molimo joang, ’me na baemeli ba hae ba ka emisa mosebetsi?

²⁰ Joalokaha lentsoe la Molimo le hlile la bolela, Diabolose o halefile, hobane a tseba nako ea hae e khutsufetse. O tsoela pele ho hanyetsa mosebetsi oa bopaki. (Tšen. 12:12, 17) Diabolose le lithoto tsa hae o hloile Lipaki tsa Jehova hobane Bakreste bana hase “ba lefatše.” Ba bangata ho bona ba qhalane ho tsoa matlong a bona ke hloriso. Ba makholo ba thulana le lefu le befileng, joaloka Setefane oa lekholong la pele la lilemo la mehla e tloaelehileng ea rōna. (Tšen. 17:6; 20:4) Empa mosebetsi o ipakahalitse e le oa Molimo. Batho ba sitiloe ho o liha, ha bahlanka ba ’nete ba Molimo ba ntse ba bua lentsoe la hae ba sa tšabe. Ka tsela ena ba hlōtse, e, ba qhala mano a Diabolose.—Bapisa Ba-Efese 6:11, 12; Jakobo 4:7; 1 Petrose 5:8, 9.

21. (a) Mosebetsi oo Jehova a lakatsang ha o etsoa hona joale ke ofe? (b) Ke hobane’ng ha re batla ho phetha mosebetsi oo re o filoeng, ’me re ka tsoela pele joang ho bolela lentsoe ka ho se tšabe?

²¹ Kajeno, mosebetsi oa ’Muso oa ho ‘tšoasa batho’ o tsoela pele, ho sa tsotellehe khanyetso e phahamang. ’Me tlhonolofatso ea Jehova e ntse e bonahala holim’a oona. Selemong se fetileng sa tšebeletso feela, Lipaki tsa Jehova li thabetse ho bona batho ba bacha ba 113 672 ba kolobetsoa. Bana ba thabetse ho nka karolo bo boleleng lentsoe la Jehova hakaakang! Ona ke mosebetsi oa Molimo bakeng sa rōna kajeno, ’me o lokela ho ba lipelong tsa bohle har’a rōna ba ineetseng ho Jehova hore re tšoarehe ho oona, hobane ke kabelo ea bona. (1 Ba-Kor. 9:16) Na pelo ea hao e u susumelletsa ho bolela lentsoe la Jehova u sa tšabe letho? Ha maemo a lefatše a ntse a mpefala, boikemisetso ba rōna e lokela ho ba ho tsoela pele ho bolela feela litaba tse molemo tsa ’Muso ho fihlela mosebetsi o phethoa. Ha khanyetso e hlaha, ha re hlomohe. Re hopola hore Jesu ha a ka a qalisa feela empa o ile a phetha mosebetsi oo Jehova a neng a mo neile oona hore a o etse. (Joh. 17:4) A re lokisetsa hore re talimane le lehloeo la lefatše. E se eka ka mehla re ka tšoana le eena, ra tšoana le baapostola le Bakreste ba bang ba lekholong la pele la lilemo, ha, ka tumelo e feletseng, re batla thuso ea Jehova ho finyelleng thato ea hae mabapi le rōna. Thapelo ea rōna e kopaneng ka mehla e ke e be hore ‘Joale, Jehova, . . . u nee bahlanka ba hao matla a ho bolela lentsoe la hao, ba sa tšabe letho.’—Lik. 4:29.

[Setšoantšo se leqepheng la 21]

Jehova Molimo o hlohololofatsa mosebetsi oa ‘batšoasi ba batho’ ba kajeno