Ho Nyarela ka Litabeng
“Basebetsi-’moho” le Jesu ba sa Tšepahaleng
● Hona joale ho teng rekoto ea pina e rekisoang Riphabliking e Kopaneng ea Jeremane e nang le boipelaetso ka baeta-pele ba bolumeli ba kajeno. Moprofesa Helmut Thielicke, setsebi sa thuto ea bolumeli sa Lejeremane, o ngotse ka pina ena, a hlalosa hore sebini se belaela ka mokhoa o latelang: “O hopotse ka seo Jesu a neng a se batla ’me o se bapisa le seo basebetsi-’moho le eena ba lumelletseng hore se be sona. Haeba Jesu a ne a ka khutlela lefatšeng la rōna ’me a bona tšenyo eo batho ba hae ba e entseng ka lebitso la hae, o ne a ke ke a ipona ho hang a hlaha mesebetsing ea bona. O ne a tla halefa haholo, a sareloe a be a soabe.” Le hoja a lumela lipolelo tse ngata tsa eona, Thielicke o fihlela qeto ea hore moko oa molaetsa ke hore: ‘U se ke ua ferekanya Jesu oa Nazaretha le ba sebetsang hammoho le eena.’
Empa ke hobane’ng ha lithuto le liketso tsa ‘basebetsi-’moho’ li ka hanana hakaalo le tsa Monghali oa bona? Jesu, eo baruti ba bolumeli ba Bojakane ba ipolelang hore ke balateli ba hae, o kile a re: ‘Morutuoa . . . e mong le e mong ea rutehileng hantle o tla ba joaloka moruti oa hae.’ (Luka 6:40, NW) Ka ho totobetseng ha baa itumella hore ba ‘rutehe hantle’ ho Eo ba mo bitsang Morena oa bona.—Matt. 7:21-23.
Ke Babylona e Tsositsoeng?
● ’Muso oa Iraq o entse litokisetso tsa ho tsosa motse oa Babylona oa boholoholo. O rerile ho senyeheloa ke limillione tse tšeletseng tsa lidolara (U.S.) Ka selemo mo sebetsing oa lilemo tse 10 oa ho boloka le ho tsosa tse ngata tsa lithako kamoo o ka khonang. Iraq e kōpile litsebi tse tsoang Japane tsa Univesithi ea Kyoto ho fana ka boeletsi ka mosebetsi, ho akarelletsa ho “tsosoa” ha Tora ea Babele. Tumelo e teng ea hore tora e ne e le bonyane bolelele ba limithara tse 91 le hore e ne e le moaho oa matsoelintsoeke o sebelisetsoang barapeli ba bolumeli. “Hohle ho teng ke joang le mongobo moo tora e neng e le teng,” kamoo ho boletseng setsebi se seng sa Mojapane. Bonneteng, Babylona ha se letho ha e se lithako feela ’me seterata sa Mekoloko sa eona “se shebahala joaloka tsela e metseng joang bo bolelele e sa hlokomeloang ea ntlo ea borena ea Europe.”
Ke hobane’ng ha Babylona e bile lithako tse joalo? Ka baka la bobe ba batho le borapeli ba bohata bo feteletseng, Molimo oa leholimo oa bolela hore Babylona “o tla etsoa liqubu tsa majoe” le hore “batho ba ke ke ba aha teng.” (Jer. 51:37; Esa. 13:20) Na mosebetsi o etsoang hona joale oa ho tsosa Babylona o bolela hore batho ba tla lula ho eona? Che, Iraq e rera ho etsa “motse o bontšang lintho tsa bohlokoa,” bonneteng, motse o shoeleng—oa mehahlaula feela, e seng sebaka seo ho luloang ho sona. Le haeba mosebetsi o joalo o ka phethoa ho etela Babylona ho tla tšoana le ho etela sebaka se bontšang lintho tsa bohlokoa, ’me moeti a ka bona ka mahlo a hae ho phethahala ha boprofeta ba Bibele.
“Ntoa e Fetile”
● Morao-rao tjena lebenkele le leholo la Brazile le ile la etsa phatlalatso koranteng e kholo ea Rio de Janeiro. E ne e le setšoantšo se nang le libapalisoa tse ngata tsa ntoa tse entsoeng ka polasitiki ’me hape ho tšoantšitsoe le folaga e tšoeu. Ka tlase ho setšoantšo sena ho ne ho ngoliloe mantsoe a reng “Ntoa e Fetile!” Lebenkele lena le ne le etsa phatlalatso ea hore le se le khaotsa ho rekisa libapalisoa tse khothalletsang qhoebeshano. Mookameli oa lebenkele lena a re: “Motho leha e le ofe ea ratang ho latela mohlala oa rona o lokolohile ho etsa joalo.”
Karabelo ea seithuti se seng sa kelello e bontša boemo bo utloisang bohloko ba tsamaiso ea rona e sekametseng ntoeng: “Ha ngoana a bapala ka libapalisoa tsena o holisa ka ho eena boikutlo ba ntoa bo hlokahalang mokhatlong oo a leng ho ona. Haeba re nka libapalisoa tsena tse leng boemong ba libetsa, re tlosa litšoantšo tse bontšang qhoebeshano le lintho tsohle tsa ntoa tikolohong ea ngoana, re tla tlosa ho eena boikutlo ba liphello tsa tlala, ho hloka toka ha batho le ho hloka tšireletseho ka baka la maemo a moruo, mabaka a maholo a qhoebeshano.” Empa na ha se “boikutlo ba ntoa” “mokhatlong” oa bacha mehloli e meholo ea qhoebeshano? Seithuti se seng sa Brazile se ile sa phehella hore: “Ka hore a tšoare libetsa, ngoana o tloaelana le mohopolo oa ho bolaea, mohopolo oa ho se tsotellehe ka mahlomola a oelang batho ba bang.”
Ka lehlakoreng la bana ba baloang ka likete le batho ba baholo ho tsoa lichabeng tse ngata ba bontša phethahatso e phelang ea mantsoe a boprofeta a Esaia: “Sechaba se seng ha se sa tla hlola se futuhela sechaba se seng ka lerumo, ha ba sa tla hlola ba ithuta ho loana.” Ho e-na le ho sebelisa libapalisoa tse leng boemong ba libetsa kapa libetsa tsa sebele, Lipaki tsa Jehova lefatšeng lohle li hlaolela lerato le fetisang boikutlo ba ntoa ba lichaba.—Esa. 2:4; Joh. 13:35.
Ho Bala Makatholike
● Kereke ea Rona e Katholike e ipolela ha e na le litho tse fihlang ho limillione tse 700 lefatšeng lohle. Palo ena e fumanoa joang? Mohlala o mong oa sena o fumanoa Kerekeng ea St. Augustine ea Roma e leng motseng oa New York. Ha morao tjena e mong ea ne a kopa hore lebitso la hae le hlakoloe libukeng tsa kereke, monna eo e bileng e mong oa Lipaki tsa Jehova o ile a amohela karabelo e latelang: “Ha ho kamoo re ka hlakolang lebitso la hao libukeng tsa Kolobetso kapa tse ling tsa Sacramente. Joale ka ha u tseba Kereke ea Katholike ke eona feela Kereke ea ’nete e theiloeng ke Jesu (Matt 16) ’me haeba re hlakola lebitso la hao re tla be re siteloa Moea o Halalelang. Ho sa tsotellehe hore hona joale u setho sa kereke efe u sa le mo-Katholike ’me ka ho sa feleng u tla tsoela pele u le mo-Katholike ea Kolobelitsoeng . . .”
Haeba ena ke tsela e lateloang haeba batho ba kopa hore ba hlakoloe ho ba litho tsa kereke, ka sebele hona ho etsa hore motho a belaele bonnete ba lipalo tse ngolloang batho bohle. Hape ketso ena e holisa bolumeli ba boikaketsi bo ileng ba boleloa e sa le pele bakeng sa ’mehla ea qetello,’ ha Bibele e bolela hore batho ba tla ba le “sebopeho sa borapeli” feela.—2 Tim. 3:1, 5.