Ho Tsoela Pele Kamor’a ho Fumana “Tumelo”
“Le eketse tumelo ea lōna ka matla, le matla e eketsoe ka tsebo, le tsebo ka boitšoaro, le boitšoaro ka mamello, le mamello ka borapeli, le borapeli ka lerato la boena, le lerato la boena ka lerato la bohle.”—2 Pet. 1:5-7.
1. Ke eng se hlileng se etsang letlotlo e be la bohlokoa, ’me hona ho ka bontšoa joang?
LETLOTLO la bohlokoa le cheketsoeng mobung ha le sebeletse morero oa letho o molemo. Le fapana hanyenyane le lefikanyana le patiloeng ke mobu. Empa letlotlo le na le matla a ho fumantša mong a lona molemo le ba bang. Le ka sebelisetsoa ho thusa ba kulang le ba hlokang, kapa le ka ’na la atisoa ka bohlale. Haeba ho ameha chelete e ngata haholo, le ka bula menyetla ea mesebetsi ’me kahoo la nolofaletsa batho ba bangata hore ba phele. Kannete, ha letlotlo le sebelisoa ka mokhoa o beang, e ba la bohlokoa haholo.
2. Ho ea ka 2 Petrose 1:1, Bakreste ba fumane matlotlo afe a bohlokoa?
2 Letlotlo la moea le ho bahlanka ba Molimo le na le matla a maholoanyane bakeng sa ho phetha botle. Lengolong la hae la bobeli le eang ho Bakreste, moapostola Petrose o bua ka letlotlo lena la bohlokoa, a qala ka mantsoe ana: “Ke le Simone Petrose, mohlanka le moapostola oa Jesu Kreste, ke ngolla lōna ba abetsoeng tumelo e le ’ngoe le ea rōna ka bohlokoa, ka ho loka ha Molimo le ’Moloki oa rōna, Jesu Kreste.” (2 Pet. 1:1) “Tumelo,” ke hore, tumelo e hlokahalang bakeng sa bophelo bo sa feleng, e ne e le letlotlo la bohlokoa le neng le ruiloe ke bao moapostola a neng a ba ngolla.
Tumelo—ke Letlotlo
3. Ke hobane’ng ha Petrose a ne a ka hlalosa tumelo ea bao a ba ngoletseng e le “tumelo e le ’ngoe le ea rōna ka bohlokoa”?
3 Tumelo ena e ne e se leruo le khethehileng la Petrose le baapostola ba bang kapa bohle bao, joaloka eena, e neng e le Bajode ba Bakreste. E ne e kopaneloa ke sehlopha sohle sa balumeli, Bajode le bao e seng Bajode. Ea Holimo-limo o ne a entse hore ba fumane tumelo ena. Ka molaetsa oa “litaba tse molemo” tse neng li boleloa, a ikhulela batho ka Mora oa hae. (Joh. 6:44) A phetla lipelo tsa batho, a etsa hore ba arabele “polelong” ea hae kapa molaetsa.—Lik. 16:14; Ba-Roma 10:8.
4. Ke joang tumelo e fumanoang ka “ho loka ha Molimo le ’Moloki oa rōna, Jesu Kreste”?
4 Joalokaha moapostola Petrose a boletse, tumelo ena e fumanoa “ka ho loka ha Molimo le ’Moloki oa rōna, Jesu Kreste.” Ea matla ’ohle a nolofaletsa batho ba mefuta eohle, lichaba, merabe le meloko hore ba fumane leruo lena le se nang theko. Ka hore a bontše joalo ho se khetholle batho leha e le bafe ha a tšoarela libe motheong oa sehlabelo sa Mora oa hae le ho amohela batho ba bakileng e le ba hae, Jehova Molimo o bontšitse ho loka, ho se ee ka leeme ha hae, ho se khethe tšobotsi ha hae. Ke eona taba eo Petrose a e hlakisitseng nakong eo a neng a tlisa “litaba tse molemo” ho molaoli oa lekholo oa Motaliana Kornele le beng ka eena le metsoalle ea hae e haufi. Moapostola a re: “Ke lemoha ka ’nete hore Molimo ha o ee ka tšobotsi ea batho. Empa har’a lichaba tsohle, ea o tšabang, le ea etsang ho lokileng, ke eena ea o khahlisang.” (Lik. 10:34, 35) ’Moloki oa rōna Jesu Kreste o bontša oona moea oo oa ho se ee ka tšobotsi. O tetse bophelo ba hae bakeng sa batho bohle.—1 Tim. 2:5, 6.
Ho Tsoela Pele Tsebong ea Molimo le Kreste
5. Kamor’a ho fumana tumelo, re na le boikarabelo bofe, ’me ho bo phethahatsa ho hlokahala eng?
5 Kamor’a ho fumana “tumelo” barutuoa ba Jesu Kreste ba kena boikarabelong ba botho ba ho lumellana haholoanyane le thato ea Molimo bakeng sa bona. Tsebo e nepahetseng e tla re thusa ho etsa joalo. Moapostola Petrose o hatisitse bohlokoa ba tsebo e nepahetseng kapa e feletseng, a re: “Le ke le atisetsoe mohau le khotso, ka tsebo [e nepahetseng] ea Molimo le ea Jesu Kreste, Morena oa rōna.”—2 Pet. 1:2, bapisa NW.
6. (a) Ho boleloa eng ka ho ba le ‘tsebo e nepahetseng ea Molimo le Jesu’? (b) Re ba le tsebo e joalo joang?
6 Hore re be le ‘tsebo e nepahetseng ka Molimo le Jesu Kreste, morena oa rōna’ ho bolela ho ba tseba e le batho—litšoaneleho tsa bona, litsela le litšebelisano, le ho etsisa mohlala oa bona o se nang sekoli. (Bapisa Jeremia 22:15, 16; Mattheu 7:21-23; 1 Johanne 2:3-6; 3:5, 6.) Ka ho tsoela pele ha rōna ho ithuteng le ho sebeliseng metheo ea Lentsoe la Molimo, re tseba Ntate le Mora hamolemo haholo. Hona ho fella ka hore re thabele mosa o sa tšoanelang le khotso haholo.
7. ‘Mosa o sa tšoanelang’ o eketsoa ka ‘tsebo e nepahetseng ea Molimo le Jesu’ joang?
7 Ke feela ka ho etsa se khahlisang Jehova Molimo le Jesu Kreste moo re ka tsoelang pele ho fumana thuso ea Molimo le tataiso. Kaha re batho ba baetsalibe, ha ho molemo oa letho ka ho rōna. Kahoo eng le eng eo Moetsi oa rōna a re etsetsang eona ke pontšo ea mosa oa hae o sa tšoanelang. Leha ho le joalo, hore re baamoheli ba mosa oa Molimo o sa tšoanelang ho itšetlehile ka hore re loanele ho tšoana le Ntate oa rōna oa leholimo le Mora oa hae. Ha ho le joalo tabeng ea rōna, re ka atamela Jehova Molimo ka tšepo e feletseng ea hore o tla arabela likōpo tsa rōna. Moapostola oa Mokreste Johanne o itse:
“’Me seo re se kōpang, leha e le sefe le sefe, re se neoa ke oona; hobane re boloka litaelo tsa oona, ’me re etsa tse leng ntle pel’a oona. ’Me taelo ea oona ke hore re lumele lebitso la Mora oa oona Jesu Kreste, le hore re ratane, joale ka ha o re laetse. ’Me ea bolokang litaelo tsa oona o lutse ho oona, le oona o lutse ho eena, ’me hoo re ho tsebang ka hona hobane o lutse ho rōna, ke ka Moea oo o re neileng oona.”—1 Joh. 3:22-24.
8. “Khotso” e eketsoa joang ka ‘tsebo e nepahetseng ea Molimo le Jesu’?
8 Ha re sa rua tsebo feela, empa tsebo e feletseng le e chorileng ea Ntat’a rōna oa leholimo le Mora oa hae, re bona ka ho hlakileng hore na ke eng se khahlisang mahlong a bona. Re lula kopanong le khotsong le bona, re thabela katamelano le bona re le metsoalle ea bona. Ka baka leo, tsoelo pele ea rōna ho tsebeng Jehova Molimo le Mora oa hae ka ho feletseng e isa ho thabeleng khotso e khōlō. Hona ho tsoaloa ke ho qoba boikutlo, lipuo le liketso tse hananang le mohlala oa Molimo oa rōna le Morena oa rōna Jesu Kreste.
9. Ho etsa libe ho na le phello efe khotsong ea rōna le Molimo?
9 Ka lehlakoreng le leng, ka ho etsa libe, re tla be re senya khotso ea rōna le Ea Holimo-limo, kaha re tla be re etsa ho khahlanong le thato ea hae. Ke tšoarelo ea Molimo feela e theiloe pakong ea rōna ea sebele le tumelo melemong e phekolang ea sehlabelo sa Kreste e ka khutlisang khotso.—1 Joh. 2:1, 2.
Lumella “matla a Molimo” a u Sebelise
10. Ke eng se ka re thusang ho thabela mosa o sa tšoanelang le khotso haholo?
10 Jehova Molimo le Jesu Kreste, ba batla ha re thabela mosa o sa tšoanelang le khotso ka mokhoa o moholoanyane. Ka baka leo, re lokela ho sebelisana le bona ka ho iteka hore re ba tsebe hamolemo. Tsela e ’ngoe eo re ka etsang hona ka eona ke ka ho nahana ka kananelo ka seo Jehova Molimo, a se entseng lebitsong la rōna ka Mora oa hae. Moapostola Petrose o ngolile: “Matla a Molimo, a re neile lintho tsohle tsee e leng tsa bophelo le tsa borapeli, ka tsebo ea ea re bitsitseng ka khanya le ka matla a hae; ’me ha ka tseo a re sitsitse joalo ka lipallo tse kholohali, tsa bohlokoa, hore ka tsona le be le kabelo ho seo Molimo o leng sona, ka ho hloboha ho bola ho leng lefatšeng ka litakatso.”—2 Pet. 1:3, 4.
11, 12. (a) Ke hobane’ng ha “matla a Molimo” a amana le ‘tsebo e nepahetseng’? (b) Hona ho bontšoa joang tabeng ea Bakreste ba Thessalonika?
11 Hlokomela hore Petrose o amahantse “matla a Molimo” le ‘tsebo e nepahetseng.’ Hona ho loketse haholo, hobane lentsoe la Molimo, kapa molaetsa, ka Mora oa oona, “litaba tse molemo,” li ka ba le phello e matla bophelong ba batho. Hona ho bontšoa hantle ho seo moapostola Pauluse a se ngoletseng Bathessalonika: “Evangeli ea rōna ha ea ka ea tla ho lōna ka lipolelo feela, empa e tlile le ka matla.” (1 Ba-Thess. 1:5) Ho boleloa ha “litaba tse molemo” Thessalonika ho hlahisitse maphomela. E ne e se taba ea hore batho ba utloe lipolelo feela ’me ba sa etse letho ka tsona, ke hore, e ne e se taba ea “puo feela.” Bathessalonika ba ileng ba nka Bokreste ba susumelletsoa hore ba sebetse, ba bontše hore “litaba tse molemo” li ba file matla. Bakreste bana ea e-ba mohlala ho balumeli ba bang ka hore ka botšepehi ba mamelle hloriso ka baka la ho loka le ka ho tsoela pele ho bea bopaki ho e mong le e mong ka “litaba tse molemo.”
12 Kaha Thessalonika e ne e le kou ea likepe, balumeli ba ne ba kopana le batho ba tsamaeang le likepe, bahoebi le ba bang ba tsoang libakeng tse hole. Bakreste ba Thessalonika ba ne ba sebelisa hamolemo menyetla ea bona ho kopanela “litaba tse molemo” le ba bang. Ka baka leo, tumelo ea bona ea boleloa hole le ka bophara. Ha Pauluse le metsoalle ea hae ba bolela le ho ruta ’nete pontšeng metseng e meng, ba ne ba bolelloa ka Bakreste ba Thessalonika. A hlalosa ka sena, moapostola a ngola:
“Hobane lentsoe la Morena ha le tloha ha heno, le lumaetse, e seng Macedonia le Akaia feela, empa tumelo ea lōna ho Molimo e hasane kahohle, ea e-ba ntho ee re sa tšoanelang ho e bolela. Hobane batho bohle ba bolela sebaka sa ho kena seo re bileng le sona har’a lōna, le kamoo le sokolohetseng ho Molimo, la furalla litšoantšo ho sebeletsa Molimo o phelang, oa ’nete, le ho lebella Mora oa oona maholimong, eo o mo tsositseng bafung, e leng Jesu ea re loetseng bohaleng bo tlang.”—1 Ba-Thess. 1:8-10.
13. Rōna ka bōrōna re utloile phello ea “matla a Molimo” ho rōna joang, ’me kahoo re ka tsoela pele ho etsa joang?
13 Ka ho tšoanang, rōna balumeli kajeno re utloile “matla a Molimo” a sebetsa ho rōna ka baka la ho amohela ha rōna “litaba tse molemo,” lentsoe la Molimo kapa molaetsa. “Litaba tse molemo” tseo li re entse hore re fetole bophelo ba rōna, hore re lumellane le thato ea Molimo. Hape re susumelitsoe hore re bolele “litaba tse molemo” ho ba bang. Matla a Molimo a sebelisoang ka ‘tsebo e nepahetseng’ e ka ‘litabeng tse molemo’ a re file sohle seo re se hlokang bakeng sa ‘bophelo ba borapeli.’ Kahoo, ka baka la matla a Molimo, re ka phela bophelo ba bokhabane, re talimile nakong e sa feleng. ’Me re ’ne re tsoele pele ho lumella matla a Molimo a re thuse ho ba ba kang Kreste haholoanyane boitšoarong le ketsong.
14. Jehova Molimo o bitsa ‘ka khanya le matla a boitšoaro’ joang?
14 Mokhoa oo ka oona Jehova Molimo a bitsang kapa a hulelang batho ho eena o lokela ho sebeletsa e le khothatso e matla bakeng sa ho tsoela pele bophelong ba Bokreste. Moapostola Petrose o buile ka “tsebo [e nepahetseng] ea ea re bitsitseng ka khanya le ka matla a hae.” Jehova Molimo o ‘bitsa’ kapa o ‘hula’ ka Mora oa hae. Ke ka Jesu Kreste haholo “khanya le matla” li bonahatsoang ho batho. Moapostola oa Mokreste Johanne o ngolile ka Mora: “Lentsoe le ne le etsoe nama, ’me la aha har’a rōna le tletse mohau le ’nete, ’me re bohile khanya ea lona, e kang khanya ea Mora a ’notši ea tsoang ho Ntate.” (Joh. 1:14) Bophelong ba Morena Jesu Kreste, Johanne le baapostola ba bang ba ile ba bona khanya, bokhabane, tlotliso e neng e ka bontšoa feela ke eo ka ho phethahetseng a neng a bonahatsa setšoantšo sa Ntate oa leholimo. Ho feta moo, moapostola Johanne, le Jakobo le Petrose, ba kile ba bona ka mahlo ho fetoloa ha Jesu Kreste. Ka nako eo “sefahleho sa hae sa khanya joale ka letsatsi, ’me liaparo tsa hae tsa e-ba tšoeu joale ka leseli.” (Matt. 17:2) Joalokaha khanya e amahanngoa le Mora oa Molimo, ho joalo le ka matla a boitšoaro. Jesu Kreste o ne a e-na le matla a boitšoaro a fetisisang, boitšoaro ba hae bo le khabane. Le Judase Iskariota oa moeki o ile lumela: “Ke sitiloe ha ke ekile mali a se nang molato.” (Matt. 27:4) Kahoo ke ka “khanya le matla” a boitšoaro tse bontšitsoeng ke Mora Jehova a bitsang.
Lipallo tsa Molimo—Tšusumetso ea ho Tsoela Pele
15. Ke hobane’ng ha lipallo tsa Molimo ‘li le kholohali, e le tsa bohlokoa’?
15 Tokisetso e babatsehang ea Molimo bakeng sa poloko joalokaha e senotsoe ‘litabeng tse molemo’ e ile ea nea Bakreste ba lekholong la pele la lilemo “lipallo tse kholohali, tsa bohlokoa.” Lipallo tsena e ne e le tse kholohali kapa tsa bohlokoa ka ho fana ka matšeliso, khothatso le matla a phelisang ho talimaneng le lehloeo la lefatše. Ha re nahana hore balumeli bao Petrose a neng a ba ngolla ba ne ba lebelletse ho kopanela khanyeng ea Kreste e le majalefa hammoho le eena a ’muso oa hae, re tlameha ho lumellana le moapostola hore ba ne ba fumane “lipallo tse kholohali.”—2 Pet. 1:4a.
16, 17. Lipallo tsa Molimo li na le phello efe ho balumeli?
16 Lipallo tsee li ile tsa etsetsa balumeli ba lekholong la pele la lilemo eng? Karabelo ea Petrose ke hore: “Ka tsona le be le kabelo ho seo Molimo o leng sona, ka ho hloboha ho bola ho leng lefatšeng ka litakatso.” (2 Pet. 1:4b) Ka mantsoe a mang, lipallo tsa Molimo li fane ka motheo oa hore e be ba ‘ho seo Molimo o leng sona.’ Tšepo ea Bakreste ba lekholong la pele la lilemo e ne e le hore ba kopane le Jesu Kreste ’musong oa leholimo le hore ba tšoane le eena. (Ba-Roma 8:17) Kaha Mora ke “lehlaseli la khanya ea oona le setšoantšo sa boleng ba oona,” bohle ba tšoanang le Jesu Kreste ba boetse ba tšoana le Ntate. (Ba-Heb. 1:3) Moapostola Johanne o ngolile: “Baratuoa, joale re bana ba Molimo, ’me seo re tla ba sona ha se e-so ho bonahatsoe; empa rea tseba hobane, mohla se bonahatsoang, re tla tšoana le oona; hobane re tla o bona kamoo o leng kateng. ’Me e mong le e mong ea nang le tšepo ho oona, oa itlhoekisa, joale ka ha le oona o hloekile.”—1 Joh. 3:2, 3.
17 Kahoo, ka ho kopanela khanyeng ea Mora oa Molimo, Bakreste ba tsoetsoeng ka moea ba fetoha ba kopanelang ho ‘seo Molimo o leng sona.’ Tšepo ena e hlollang e theiloe lipallong tse tiileng tsa Molimo e ile ea ba susumetsa ka matla hore ba iteke kahohle ho itlhoekisa litšila tsohle tsa lefatše. Moapostola Petrose o buile joalo tabeng ea ho hloeka, hobane o bontšitse hore ‘ba kopanelang ho seo Molimo o leng sona’ ba ‘hlobohile ho bola ho leng lefatšeng ka litakatso.’ “Takatso,” ho laba-labela se sa tšoanelang motho, ke oona mohloli oa litšila tse leng lefatšeng. Ke hona litšileng tsena moo balumeli ba balehileng ha ba iphumantša mokhoa oo Molimo o pholosang ka oona ’me ba itšebelisa ho lumellana le melao ea Molimo ea khalalelo, bohloeki kapa bokhabane. Joalokaha e bile ’nete ka balumeli ba lekholong la pele la lilemo, lipallo tse ka Mangolong li ka re susumelletsa hore re ’ne re itlhoekise.
Ho Hlokahala ho Fetang Tumelo
18, 19. Kamor’a ho fumana tumelo, re lokela re etse joang tumellanong le 2 Petrose 1:5-7, hobane’ng?
18 Bahlanka bohle ba ’nete ba Molimo kajeno ba fumane molemo ka matla a Molimo a sebelitseng ka “litaba tse molemo” le ka lipallo tse babatsehang tse amanang le tsona. Ke ka baka leo re nang le lebaka le utloahalang la ho ipaka re le batho ba bontšang botho ba Bokreste ’me re le mafolofolo ho thusa ba bang, haholo moeeng. Moapostola Petrose o khothalitse: “Joale le lōna, le ke le ntšeletse hona hoo matla ’ohle a lōna, le eketse tumelo ea lōna ka matla, le matla a eketsoe ka tsebo, le tsebo ka boitšoaro, le boitšoaro ka mamello, le mamello ka borapeli, le borapeli ka lerato la boena, le lerato la boena ka lerato la bohle.”—2 Pet. 1:5-7.
19 Re ke ke ra khotsofalla ho ba le tumelo feela kapa kholo. Ho e-na le hoo, karabelong ea hore re fumane tumelo ho Ntate oa rōna oa leholimo, re lokela ho batla ho hōlisa litšoanelo tse ling tse ntle tse neang bopaki ba hore re na le tumelo. Moapostola Petrose o khothallelitse hore re ‘ntšeletse matla a rōna ’ohle,’ re etse ka masene ka matla ’ohle ao re nang le oona, hore re tšoane haholo le Mora oa Molimo.
20. Ho boleloa’ng ka ho eketsa matla a boitšoaro tumelong ea rōna?
20 Ho eketsa matla a boitšoaro tumelong ea rōna ho ne ho tla bolela hore re lokela ho loanela ho ba batho ba khabane boitšoarong re etsisa Kreste, Mohlala oa rōna. Matla a joalo a boitšoaro, kapa boitšoaro bo khabane ke tšoaneleho e molemo. Ea nang le eona ha a ikhule feela hore a se ke a etsa batho ba bang hampe empa hape o batla ho etsa molemo, a arabela ho se hlokoang ke ba bang moeeng, nameng le maikutlong. Matla a boitšoaro ruri ke molemo o sebetsang. Kahoo bophelo ba motho ea nang le matla a boitšoaro ha bo khetholloe feela ka lintho tse sa haheng, joaloka hore a qobe boitšoaro bo bobe ba botona le botšehali, litšila, ho se tšepahale le mekhoa e meng e sa amoheloeng ke Molimo. Lekholong la pele la lilemo C.E., Bafarisi ba ne ba ‘ithorisa ka ho se tšoane le batho ba bang, e leng masholu, ba sa lokang le bafebi.’ (Luka 18:11) Empa ba ne ba se na matla a boitšoaro, kaha ba ne ba nyelisa batho ba bang ’me ba se na mohau, kutloelo-bohloko kapa qenehelo.—Mar. 3:1-6; Joh. 7:47-49.
21. Ke hobane’ng ha ho hlokahala ho hōla tsebong?
21 Ntle ho tsebo matla a boitšoaro joalokaha a beetsoe mohlala ho Jesu Kreste a ke ke a ba teng. Ho hlokahala tsebo ho khetholla botle phosong. (Ba-Heb. 5:14) Hape e hlokahalla ho lekanyetsa hore na molemo o sebetsang o ka bontšoa joang boemong bo teng. (Ba-Fil. 1:9, 10) Ho fapana le tumela-khoela e se nang mabaka, tumelo e tiileng ha e sisinngoe ke tsebo. Kahoo, ho ba masene ha rōna ha re sebelisa Mangolo a Halalelang ho tla re matlafatsa tumelong ha re ntse re hōla tsebong ea Jehova Molimo le Mora oa hae.
22. (a) Ke hobane’ng ha ho hlokahala tsebo ho hlaolela boitšoaro? (b) Kamano ke efe pakeng tsa boitšoaro le mamello?
22 Tsebo ena e sebeletsa ho re thibela ho ineela litakatsong tsa boetsalibe, re fetoha ba sa tsitsang le ba se nang moeli boitšoarong kapa ka litsela tse ling re e-ba molato oa ho hlōleha ho bonahatsa setšoantšo sa Molimo boikutlong, polelong le ketsong. E, tsebo e tlatsetsa ntlheng ea hore re be le boitšoaro, matla a ho itaola kapa ho thiba botho ba rōna, ketso kapa polelo. Ka ho ’na re sebelisa boitšoaro, re tla ba le tšoaneleho e hlokahalang ea mamello. Ha re le tlas’a liteko tse tsoang lefatšeng tsa ho hlokomela lintho tsa letsatsi le letsatsi, mahloriso kapa ho ekoa ke menyaka kapa matlotlo a bonahalang, re ke ke ra khotsofatsa litakatso tsa rōna ka hore re fetohe boemong ba rōna re le bahlanka ba Molimo le Kreste empa re tla itšoara.
23. (a) Mamello e tla joang? (b) Boineelo ba bomolimo ke eng, ’me bo iponahatsa joang?
23 Matla a tebileng a hlahisoang ke mamello a ka boetse a re thusa ho re hanela ho ineela litakatsong tsa boetsalibe, ho sekisetsa ha re le mahlorisong, kapa ho tšoarelloeng ke lintho tsa letsatsi le letsatsi, menyaka kapa lintho tse bonahalang. Mamello ena e tsoaloa ke ho itšetleha ka Ea Holimo-limo, bakeng sa matla le tataiso. (Bapisa Ba-Filippi 4:12, 13; Jakobo 1:2-8.) Boineelo ho Molimo, kapa borapeli, bo lokela ho eketsoa mamellong. Borapeli bo joalo bo khetholla tsela eohle eo Mokreste oa ’nete a phelang ka eona. Bo iponahatsa hlomphong e hahang bakeng sa ’Mōpi le hlompho e loketseng le kameho bakeng sa batho ba entsoeng ka setšoantšo sa Molimo.—1 Tim. 5:4.
24. Ke hobane’ng borapeli bo ke keng ba e-ba teng ntle ho lerato la boena?
24 Ntle ho lerato la boena, bomolimo kapa borapeli bo ke ke ba e-ba teng. Moapostola Johanne o boletse: “E mong ha a re: Ke rata Molimo, ’me a hloea ngoan’abo, o leshano; hobane ea sa rateng ngoan’abo eo a ’monang, a ka tseba joang ho rata Molimo oo a sa o boneng?” (1 Joh. 4:20) Ka baka leo, ho hlokahala re etse ka matla ho hōliseng lerato le tebileng bakeng sa balumeli bahabo rōna, kahoo ‘re eketsa lerato la boena ka boineelo ba bomolimo.’
25. Lerato le lokela ho bontšoa bo-mang, hobane’ng?
25 Lerato ke tšoaneleho e totobetseng eo ho hlokahalang hore e hle e khanye bophelong ba rōna. Lerato la mofuta ona ha lea lokela ho lekanyetsoa feela ho bana babo rōna ba Bakreste. Le hoja re e-na le lerato la boena ho bana babo rōna ba moea, lerato le lokela ho bontšoa batho bohle. Lerato lena ha lea itšetleha ka boitšoaro ba motho. Ho tšoana le lerato la Molimo bakeng sa batho, le bontšoa le tsona lira. Thutong ea hae ea Thabeng, Jesu Kreste o itse:
“Le utloile hoba ho kile ha thoe: Rata oa heno, u hloee eo e leng sera ho uena. Empa ’na, ke re ho lōna: Ratang bao e leng lira ho lōna, le hlohonolofatse ba le rohakang; ba le hloileng le ba etse hantle, le rapelle ba le tsohelang matla le ba le hlorisang; le tle le be bana ba Ntat’a lōna ea maholimong; hobane o chabisetsa ba babe le ba batle letsatsi la hae, ’me o nesetsa ba lokileng le ba khopo. Hobane ha le rata ba le ratang, le ka ba le moputso ofe? Na ba-lekhetho ha ba etse joalo le bona na? ’Me ha le lumelisa bana ba’bo lona feela, le etsa ho fetisang hofe? Ba-lekhetho le bona ha ba etse joalo na? ’Me joale, phethehang, joale ka ha Ntat’a lōna ea maholimong a phethehile.”—Matt. 5:43-48.
26, 27. Ho tla etsahala joang ha re fepela tumelo ea rōna ka litlhokahalo tse thathamisitsoeng ke Petrose?
26 Ho fella ka eng ha matla a boitšoaro, tsebo, boitšoaro, mamello, borapeli, lerato la boena le lerato la bohle li phaelloa tumelong? Moapostola Petrose oa arabela: “Ntho tseo ha li le ho lōna, ’me li eketseha ho lōna, li ke ke tsa le fa sebaka sa ho ba botsoa le sa ho nyopa tsebong ea Jesu Kreste, Morena oa rōna.”—2 Pet. 1:8.
27 E, phello ke mafolofolo le ho bea litholoana. Ha re fepela tumelo ea rōna ka litlhokahalo tse boletsoeng ke moapostola ’me re li etsa karolo ea rōna ho isa moo li khaphatsehang, re ke ke ra ema nqa e le ’ngoe, ra ba botsoa, kapa ra shoa moeeng. Tsoelopele ea rōna ea moea e tla ea pele. Re tla be re bontša tholoana ea botho bo kang ba Kreste ’me re bolella ba bang “litaba tse molemo.” Ka litšoaneleho tsa Molimo li ahile lipelong tsa rōna, ruri e le karolo ea rōna, re tla susumelletsoa ho nahana, ho bua le ho etsa ka tsela e amoheloang ke Molimo.—Bapisa Luka 6:43-45.
Bohlokoa ba ho Tsoela Pele
28. Boemo ba ea ipolelang hore ke Mokreste empa a sa tsoele pele moeeng ke bofe?
28 Haeba motho a ne a ka sitoa ho tsoela pele joaloka Mokreste, a ka oela boemong bo kotsi haholo moeeng. Moapostola Petrose o itse ka ea joalo: “Hobane eo ntho tseo [tse seng li boletsoe] li leng sieo ho eena, o foufetse, ha a bonele hole, ’me o lebetse phekolo ea libe tsa hae tsa pele.”—2 Pet. 1:9.
29. Ke hobane’ng ha motho ea haelloang ke tholoana ea botho bo kang ba Kreste a foufetse khethong?
29 Motho ea sitoang ho tsoela pele moeeng, eo ho ipolela ha hae hore ke molumeli ho haelloang ke botho bo kang ba Kreste, o foufetse moeeng. Ha a bone hore na ho ba Mokreste ho bolela eng. Bofofu bona ke ba ka boomo, hobane ho amohela ha hae “litaba tse molemo” ho ne ho mo hloka hore haholo a ’ne a sebeletse ho tšoana le Kreste, Morena oa hae.
30. ‘Ho hloeka sebeng’ ho lokela ho susumelletsa Mokreste ho etsa joang?
30 Motho ea joalo o tla be a boetse a foufaletse ’nete ea hore libe tsa hae li hlatsoitsoe ka mali a tšolohileng a Jesu. Tumellanong le ho hloekisoa ho fumanoeng nakong ea ha e e-ba Mokreste ea kolobelitsoeng, o ne a tlameha hore a ’ne a sebetse ka thata ho lula a hloekile, a lumellana haholo le melao ea Molimo ea khalalelo. Ho hlōleha ha hae ntlheng ena, ho ka isa habonolo bokoenehing, ho mo etsa hore a hane sehlabelo sa Mora oa Molimo.
31, 32. Ka baka la kotsi e khōlō e tlisoang ke ho sitoa ho tsoela pele joaloka Bakreste, re lokela ho ela hloko keletso efe ea Petrose?
31 Kaha ho kotsi moeeng ha re sitoa ho tsoela pele moeeng re le Bakreste, ke hantle ha re etsa ka matla ho tsoela pele ho bonahatsa setšoantšo sa Molimo. Ha a hlalosa ka sena, Petrose o itse: “Ha ho le joalo, banab’eso, le mpe le tiee matla ke hona ho tiisa ho bitsoa le ho khethoa ha lōna; hobane ha le ka etsa joalo, ke moo le ke keng la khopjoa, le ka mohla o le mong. Hape, ke ka mokhoa oo le tla fuoa sebaka se seholo sa ho kena ’musong o sa feleng oa Jesu Kreste, Morena le ’Moloki oa rōna.”—2 Pet. 1:10, 11.
32 Ka sebele, bohle ba ‘bitsitsoeng le ba khethiloeng’ ke Molimo ho ba sechaba sa hae ba etsa boiteko bo ikemiselitseng ba ho lula ba le joalo. Mangolo a bululetsoeng a Petrose a bontšitse hore, ka ho ’na ba eketsa tumelo ea bona ka litšoaneleho tse kang tsa Kreste, ba ke ke ba sitoa ho finyella pakane ea tumelo ea bona, e leng poloko. Ha ho letho le tla ba thibela ho kena “’musong o sa feleng” oa Jesu Kreste. Ho kena ’musong ho tla ‘fanoa haholo.’
33. Ho ka ’na ha ameha eng hore ho kena ha Mokreste ’musong e be ‘ho fuoa sebaka se seholo’?
33 E tla ba ho kena ho khanyang, ka litšoaneleho tsa bona tse kang tsa Kreste li khanya ka matla. Leha ho le joalo, polelo “fuoa sebaka se seholo” e ka ’na ea boetse ea supa tlhohonolofatso e phahameng haholo e tla thabeloa ke bao kannete ba entseng ka matla peisong ea bophelo.—Ba-Fil 3:14.
34. Tlhohonolofatso e phahameng haholo e ka ’na ea bontšoa joang?
34 Phapang pakeng tsa bophelo le bophelo bo nang le mahlohonolo a khethehileng e ka bontšoa ka mohlala oa batsamaisi ba babeli ba likepe. E mong a ka ’na a tsoelipanya sekepe ka bohlale har’a sefefo, a se fihlisa lebopong se bolokehile. Empa motsamaisi e mong a ka ’na a senyeheloa ke sekepe hona sefefong sona seo, a pholosa bophelo ba hae feela. Le hoja batsamaisi ka bobeli ba pholositse bophelo ba bona, eo sekepe sa hae se phetseng, ruri o tla thaba haholoanyane le ho hlompheha.—Bapisa 1 Ba-Korinthe 3:12-15.
35. Le hoja bophelo bo sa feleng e le mpho e tsoang ho Molimo, ke hobane’ng ha boiteko ba botho bo hlokahala ho bo fumana?
35 Le hoja bophelo e le mpho e sa lefelloeng e tsoang ho Molimo, re biletsoa ho bontša takatso ea rōna e tiileng bakeng sa mpho eo ka ho etsa sohle se matleng a rōna ho khahlisa Ntat’a rōna oa leholimo. Ke mpho, hobane rōna batho ba baetsalibe re ne re ke ke ra iphumanela eona e le rōna. Empa re ka hlōleha ho e fumana haeba tsela eo re phelang ka eona e sa fane ka bopaki ba hore re hlile re ananela mpho ena le ho e batla. Ka baka leo, re ke re be masene hore kannete re tšoane le Kreste boikutlong, polelong le ketsong. Joale, ka thuso ea Molimo, re ka tiisa hore re tla atleha, re sa lahleheloe ke bophelo ba rōna kapa mahlohonolo leha e le afe a mang ao Ntate oa rōna oa leholimo a ka re neang oona ka baka la ho beha.
36. Joalokaha ho bontšitsoe ke Petrose, ke mabaka afe a sa hlakoleng bohlokoa ba hore re ’ne re hopotsoe?
36 Ka baka leo, ke hantle ha re ikhopotsa ka bohlokoa ba tumelo. Ke sona seo moapostola Petrose a neng a batla hore babali ba lengolo la hae la bobeli ba se etse. O ngotse:
“Ke ka baka leo nke keng ka lesa ho le hopotsa taba tseo ka mehla, leha le se le rutehile ’me le tiile ’neteng eo e seng e le ho lōna. Ke fela ke lekanya hobane, ha ke sa ntse ke le motlotloneng ona, ke tšoanetse ho le tsosa ka ho le hopotsa, ke tsoe ke tseba hobane nako ea ka ea ho tloha kapela motlotloaneng ona e se e le haufi, joale ka ha Morena oa rōna Jesu Kreste a kile a ntsebisa. ’Me ke tla phehella hore, leha ke se ke tlohile, le ’ne le be le se ka le hopotsang taba tseo.” (2 Pet. 1:12-15)
Ho tšoana le bao Petrose a neng a tobisitse mantsoe a hae ho bona lekholong la pele la lilemo, re ka ’na ra tseba bohlokoa ba ho bolela “litaba tse molemo” le ho ntlafatsa ho bontša botho bo kang ba Kreste. Mohlomong re tiile motheong oa ’nete ea Bokreste ho isa moo re e tsebileng kateng. Leha ho le joalo, haholo-holo ha re talimane le liteko kapa mohlomong likhang tse masene tsa baruti ba bohata, re hloka likhopotso tse boletsoeng ke Petrose.
37. Petrose e bile mohlala o motle joang oa ho fana ka likhopotso?
37 Ho hotle ho rōna hore re hopole hore na ke hobane’ng ha a ngotse likhopotso tsena. Moapostola o ne a tseba hore o tla tloha a shoa, hobane Jesu Kreste ka boeena o ne a mo boleletse hore o tla shoa lefu la ho shoela tumelo. (Joh. 21:18, 19) Tebello ea sena e ne e sa apesa Petrose botšo. Empa a ikemisetsa ho sebelisa nako e saletseng bakeng sa ho tiisa bana babo, a ba khothalletsa ho ba mafolo-folo le ho bea litholoana. Kahoo, leha a se a ile lefung, ba fumane khothatso likhopotsong tsa hae ’me ba li sebelisetsa ho hahana.
38. Re lokela ebe re etsa joang ka likhopotso tse ngotsoeng mangolong a Petrose?
38 Eka le rōna re ka khothatsoa ke mangolo a Petrose ’me re tiise ba bang ka ho ba hlokomelisa ka likhopotso tsa hae. Joale, ha re sheba ka tšepo ho phethahaleng ha lipallo tse kholohali tsa Jehova, re ke re tsoele pele ho bolela “litaba tse molemo” ’me re tsoele pele ho tšoana haholo le Ntate oa rōna oa leholimo le Mora oa hae.
[Setšoantšo se leqepheng la 19]
‘Le eketse tumelo ea lōna ka matla a boitšoaro, matla a lōna a boitšoaro a eketsoe ka tsebo’
[Setšoantšo se leqepheng la 21]
‘Le eketse mamello ea lōna ka borapeli’
[Setšoantšo se leqepheng la 23]
‘Le eketse borapeli ba lōna ka lerato la boena’
[Setšoantšo se leqepheng la 25]
‘Ha lintho tsena li le teng ho lōna, li tla le thibela ho ba botsoa le ho nyopa’