Lipesaleme

Molimo o Tseba Bahlanka ba Oona Hantle Hakae?

JEHOVA MOLIMO ruri o tseba bahlanka ba hae. Leha e le batsoali, bana, baena le likhaitseli kapa eona metsoalle e haufi ba ke ke ba re tseba hantle joaloka Ea Holimo-limo. O re tseba hamolemo ho feta kamoo re itsebang. Boholo ba tsebo ea Molimo ka motho ka mong bo bontšoa hantle ho Pesaleme ea 139:

Mopesaleme Davida o-oa lumela: “Jehova, u ntekile, ’me u ntsebile. U tseba ha ke lula, leha ke tsoha; u tseba mohopolo oa ka, u le hole. U ntekola leha ke tsamaea, leha ke robala, u tsebisisa litsela tsa ka kaofela. Hobane, ere lentsoe le e-so ho be lelemeng la ka, u se u le tseba kaofela, Jehova.”—Pes. 139:1-4.

Ka mantsoe ana, tsebo ea Jehova ho mopesaleme Davida e ne e le e tšoanang le e fumanoeng ka patlisiso e phethahetseng. Ea Holimo-limo o ne a mo tseba mesebetsing eohle ea hae ea tsatsi le leng le le leng, leha Davida a phomotse kapa a tsohile. Ha ho letho leo Davida a neng a ka le etsa le neng le sa tsejoe ke Jehova. Ea Matla ’ohle, le hoja a le hole ka sebaka se seholo haholo ka hore bolulo ba hae bo le maholimong a phahameng ka ho fetisisa, o ne a tseba mehopolo ea Davida. Ho ‘lekola’ ha Jehova mopesaleme ha a “tsamaea” leha a “robala” ka ho totobetseng ho supa ha Molimo o hlahlobisisa liketso tsohle tsa Davida, joalokaha eka o li lekanya ho bona hore na li hlile li seng—sebopeho sa tsona. Ka hona ’Musi ea matla ’ohle o ne a tsebisisa “litsela” tsa hae tseo a phelang ka tsona. Davida a hlokomela hore ha ho letho leo a ka le buang le ka patehang ho Jehova. Le sona se ‘ntlheng ea leleme’ empa se sa boleloa se ne se tla hlokomeloa ke ’Mōpi. Ho feta moo, boikutlo ba ’nete bo ne bo ke ke ba pateloa Jehova ka puo ea boikaketsi. Batho ba ka ’na ba thetsoa ka mantsoe a bonolo, e seng Ea Matla ’ohle.

Davida o ile a hlokomela hore likhaello li teng ho seo a neng a ka se etsa ha a sa phela. Ho feta moo, o ne a ananela hore ho ke ke ha etsahala hore motho a ipatele leihlo le seli le letsoho kapa taolo ea Moetsi oa hae. Mohlomong sena ke sona seo mopesaleme a neng a se bolela ha a re: “U ntika kapele le kamorao, letsoho la hao le lutse ho ’na.”—Pes. 139:5.

Tsebo e haufi eo Jehova a nang le eona ka eena e ne e hlolla mopesaleme, e mo khannela hore a bolele: “Tsebo eo ke mohlolo ho ’na; e phahamile haholo, ke sitoa ho e fihlela.” (Pes. 139:6) Tsebo eo Molimo o nang le eona ka motho ka mong ha e utloisisoe hoo ho seng motho ea ka e hlalohanyang. Ha ho monna kapa mosali ea ka atamelang le hore a ka ba le tsebo e joalo.

SEBAKA HA SE TŠITISO

Ha ho letho le ka thibelang Jehova hore a be le tsebo e feletseng ea bahlanka ba hae. Ho sa tsotellehe hore na ba hokae, moea oa Molimo o sebetsa ka matla ho bona. Mopesaleme o itse: “Nka ea kae, ka ba hole le moea oa hao? Nka balehela kae, ka ba hole le sefahleho sa hao? Ha nka nyolohela maholimong, u teng; leha nka ea robala nqalong ea bafu, le moo u teng! Leha nka kalla mapheo a mafube, ka ea ikahela bofellong ba leoatle, le teng seatla sa hao se ka ntsamaisa, ’me letsoho la hao le letona le ka ntšoara. Ha nka re: A nke ke patoe ke lefifi, le teng bosiu bo ka ela pel’a ka.”—Pes. 139:7-10.

Hlokomela hore mopesaleme o buile ka moea oa Molimo hammoho le sefahleho sa oona. Kaha moea oa Molimo kapa matla a oona a sebetsang o ka fihla libakeng tse hole-hole tsa bokahohleng bo boholo, ha ho ea ka balehelang sefahleho sa Ea Holimo-limo, ke hore, moo a ka mo bonang. Mehleng ea mopesaleme, ho nyolohela leholimong ho ne ho bolela ho hloella lithabeng tse telele, tseo litlhoro tsa tsona hangata li neng li patiloe ke maru. Kahoo haeba motho a ka ba thabeng ea tlhoro e phahameng haholo, o ne a tla be a ntse a le moo moea oa Molimo o ka fihlang. Leha e le hore o ne a ka balehela sefahleho kapa tlhokomelo ea Jehova ka hore a robale lebitleng, leo ka tšoantšetso e leng sebaka se tlase haholo sa lefatše. Hape, le haeba a ne a ka “kalla mapheo a mafube”a ʼme a fihla sebakeng se hole haholo se ka bophirimela, o ne a tla ʼne a be tlas’a letsoho la Molimo kapa taolo ea oona le tsamaiso. Jehova, ka moea oa hae, o ne a tla ba moo ho mo tsamaisa.—Bapisa Deuteronoma 30:12, 13; Amose 9:2, 3, moo puo e tšoanang le eo e hlahang.

LEFIFI LE HO PATEHA HA SE BOTHATA

Joalokaha ho arohana ha libaka ho sa bee motho moo Molimo o ke keng oa mo fihlela, le lona lefifi kapa ho potella li ke ke tsa etsa joalo. Mopesaleme o tsoela pele: “Ho uena esita le lefifi le ke le la e-ba letšo, bosiu bo ka ela joale ka motšehare, lefifi la e-ba joale ka leseli.” (Pes. 139:11) Motho ka tšohanyetso a ka koaheloa ke lefifi le feletseng joalokaha eka o koenngoa kapa o tšoaroa ke lona. Leha ho le joalo, kamoo Jehova a amehang kateng, motho o totobetse joaloka motho ea emeng leseling le khanyang la motšehare.

Ha a hōlisa ntlha ena ho ea pele, mopesaleme o re: “Efela ke uena u bōpileng letheka [liphio] la ka; u ntohile popelong ea ʼmè. Ke u boka ka baka la mohlolo oa pōpeho ea ka. Mesebetsi ea hao ea makatsa, moea oa ka o tseba teng haholo-holo. ’Mōpo oa ka ha oa ka oa pateha ho uena, ha ke ntse ke bōpjoa sephiring, ke lohuoa litho botebong ba lefatše. Mahlo a hao a bone moloho oa tsona; matsatsi a ka a ngoliloe kaofela hammoho bukeng ea hao; a na a se a baliloe, a e-so ho be teng.”—Pes. 139:12-16, bapisa NW.

Ke ho khahlisang hore mopesaleme ka ho tobileng o qoolla liphio e le tse entsoeng ke Molimo. Ka baka la hore li lutse sebakeng se hare-hare sa ʼmele, liphio li har’a litho tse fihleloang ka thata haholo. Jehova Molimo, leha ho le joalo, a ka bona hona ka popelong le ka likarolong tse kahare haholo tsa lehe le hōlang. Ho nahana ha Davida ka tsela e hlollang eo a bōpiloeng ka eona ka popelong ha mo khannela hore a rorise Moetsi oa hae. Lehe le ne le patiloe mahlong a batho joalokaha eka le hōla likarolong tse kahare haholo tsa lefatše. Kahoo mopesaleme ka ho totobetseng o ne a bua ka popelo ea ’m’ae e le “botebo ba lefatše.” Moo pōpelong, kholo e patehileng ea masapo, mesifa le litšika e ne e tšoana le ho lohuoa ha ngoana. Hohle ho ne ho totobetse ho Ea Holimo-limo.

Ka ho makatsang, pele likarolo tse sa tšoaneng tsa ʼmele oa hae li khetholleha ka popelong, ponahalo ea Davida e ne e se ntse e totobetse ho Molimo. Hona ho joalo hobane ho hōla ha lehe ho latetse paterone e khethehileng joalokaha eka ho utluoa litaelo tse ngotsoeng bukeng.

KAMOO HO TSEBA MOLIMO HO LOKELANG HO AMA MOTHO

Mopesaleme o tlameha a be a ile a hlokomela hore ho hōla ha lesea ho fana ka bopaki bo fetisisang ka bohlale boo ho seng bo lekanang le bona ba Molimo. Ho hlokomela sena ka ho utloahalang ho ne ho tla susumelletsa Davida ho nahanisisa ka menahano ea Molimo, joalokaha a ile a etsa ha a ngola: “Molimo, mehopolo ea hao e ntšita hakakang! Palo ea eona e kholo hakakang! Ha ke rata ho e bala, e fetisa lehlabathe ka palo; leha ke phaphama, ke sa ntse ke le ho uena.” (Pes. 139:17, 18) Mehopolo ea Jehova e ne e le mengata hoo Davida leha a ne a ka qala ho e bala ha letsatsi le qaleha ʼme a ʼna a e bala ho fihlela a ea robala, o ne a ke ke a e qeta. Ha a tsoha hoseng, o ne a tla be a ntse a e-na le Ea Holimolimo, ke hore, o ne a tla be a ntse a bala mehopolo ea ʼMōpi.

Kaha Jehova ke Molimo o moholo hakana, ba khopo ho hang ha ba na lebaka la ho ikemela. Davida o rapella hore ba fumane boiphetetso bo loketseng: “Oho Molimo, u ke u bolaee e mobe. Lōna, batho ba mali, suthelang hole le ʼna; hobane bao e leng lira ho uena, ba u bolela hampe, ba ntse ba tlaela ka lebitso la hao.” (Pes. 139:19, 20) Ka baka la tlaleho ea bona ea molato ka ho tšolla mali le ho rohaka lebitso la Molimo, batho bana ba babe ba ne ba talingoa ke Davida ka mokhoa o mobe. Re bala mantsoe a hae: “Jehova, ha ke re, ke hloile ba u hloileng? Ha ke re, ke halefetse ba u phahamelang? Ke ba hloile ka hloeo ea sebele, ho ʼna ke lira.”—Pes. 139:21, 22.

Ha ho tsela eo ka eona Davida a neng a rata ho tšoana le batho bao ba khopo. O ne a lakatsa hore Jehova a mo lekole a mo senolela likoli leha e le life tse ipatileng, ʼme joale o ne a batla hore a etelloe pele ke Ea holimo-limo ka tsela e nepahetseng. Ka kelello ena, Pesaleme ea 139 ea felella. Rea bala: “Molimo, u ntlhohlotse, u lekole pelo ea ka; u nteke, u tsebe mehopolo ea ka, u talime hoba a tsela ea bokhopo e teng ho ʼna na, ʼme u ntsamaise tseleng e isang bophelong bo sa feleng.”—Pes. 139:23, 24.

Ho rōna, Pesaleme ea 139 e lokela ho fana ka khothatso ea sebele. Kaha ha ho letho le phonyohang pono ea Ntate oa rōna oa leholimo, ka mehla a ka re thusa ha re hloka joalo. Ho tseba batho ha hae ka mokhoa o haufi haholo ho fana ka tiiso e matla ea hore ka Mora oa hae, a ka khutlisetsa bafu bophelong, hobane ntlha e ʼngoe le e ʼngoe e amanang le bona e bolokiloe ka hloko mohopolong oa hae o phethahetseng. Ho re tseba ha Jehova re le motho ka mong ho lokela ho re ama ka mokhoa o molemo, ho re susumelletsa ho mo roka le ho itšoara ka tsela e bontšang hore ka mehla re moo a re bonang.

[Mongolo o botlaaseng ba leqephe]

[Litšoantšo tse leqepheng la 14]

“Leha ba ka nyolohela leholimong, ke tla ba theola teng.”

“’Mōpo oa ka ha oa ka oa pateha ho uena, ha ke ntse ke bōpjoa sephiring.”