Ho Kotula Litholoana Tse Tšoanelang ’Muso oa Molimo
1. Ho Jeremia 4:3, 4, Jehova o ile a hlokomelisa ka eng?
HO JEREMIA 4:3, 4, Jehova o re: “Khathang thite ea lōna, le se ke la jala meutloeng. Le ke le bollele Jehova, le tlose ho se bolle ha lipelo tsa lōna, lōna batho ba Juda le ba ahileng Jerusalema, e se re khalefo ea ka ea tsoa joale ka mollo, ea chesa e sa tingoe, ka baka la bolotsana ba liketso tsa lōna.” Jehova a hlokomelisa ka lipelo tse mpe tsa batho ba hae ba selekane.
2. Setšoantšo sa peō e oelang meutloeng se bontša joang hore re lokela ho ba hlokolosi ka tikoloho eo re jalang moeeng ho eona?
2 Ka ho tšoanang, setšoantšong Jesu Kreste o bontšitse liphello tse soabisang tsa ho jala har’a meutloa. Ho Mattheu 13:1-9 le Mareka 4:1-9 o tšoantšelitse kamoo e ’ngoe ea peō e jetsoeng ka letsoho ea mojali e oetseng libakeng tse ileng tsa tšoara peō har’a meutloa. Libakeng tse joalo ha a ka a fumana letho, hobane meutloa e ile ea nyoloha ’me ea bupetsa lijo-thollo ’me kahoo ha se ke ha kotuloa liqoapi tsa letho. (Luka 8:4-8) Hona ho tšoantšetsa hore re tlameha ho ba hlokolosi ka tikoloho eo re jalang moeeng ho eona.
3. Setšoantšong sa Mareka 4:26-29, peō e tšoantšetsa eng, ’me Bakreste ba lokela ho hlaolela eng mabapi le botho ba bona kajeno joalokaha Bakreste ba lekholong la pele la lilemo ba ile ba etsa?
3 Setšoantšong sa mojali le peō, joalokaha se boleloa ho Mareka 4:26-29, peō e tšoantšetsa litšoaneleho tsa botho. Ho Bajode ba ileng ba hana setšoantšo sa mojali le litšoantšo tse ling, Jesu o itse: “’Muso oa Molimo le tla o amohuoa, ’me o tla neoa sechaba se seng se tla bea litholoana tsa oona.” (Matt. 21:43, 45, 46) Ho ea ka sena, ho teng “litholoana” tsa ’muso oa Molimo. (Luka 3:8) Hammoho le litholoana tseo tsa ’Muso ho na le se bitsoang “tholoana ea moea,” e leng, “lerato, le thabo, le khotso, le sebete, le bonolo, le molemo, le botšèpehi, le bonolo, le boitšoaro.” (Ba-Gal. 5:22, 23) Morao koo lekholong la pele la lilemo, Bakreste bao moapostola Pauluse a neng a ba ngolla ba ne ba tlameha ho jala “peō” ka tsela ea litšoaneleho tsa Bokreste tse hlokang phepo e ntle, joalokaha Bakreste kajeno ba tlameha ho etsa mabapi le ’muso oa Molimo. Litšoaneleho tsena tsa botho li tlameha ho hōlisoa hore li butsoe, li phethehe.—Zak. 8:12; Jak. 3:18.
4. “Peō” ea litšoaneleho tsa botho ba Bokreste e hloka eng bakeng sa phepo?
4 Nakong ea ha li butsoitse ka botlalo ke eona e loketseng hore li ka kotuloa. Empa mojali oa Mokreste oa “peō” e joalo o lokela ho ikhethela ho e jala hokae ka tšepo ea hore a qetelle a kotutse se lakatsoang? O rata ha sejalo sa hae se ka amoheloa ke Molimo, hore a tle a nkoe a tšoaneleha hore a amoheloe mabapi le ’muso oa Molimo. Joalokaha peō ea tlhaho e hloka mobu, kahoo peō ea litšoaneleho tsa botho le eona e hloka joalo, “tholoana ea moea” e hloka sebaka se e potolohileng.—Liprov. 18:1.
5. Hore ho kotuloe se lebelletsoeng, ho lokela ho hlokomeloe eng, joalokaha ho hatisoa ho Luka 8:14?
5 Hopola setšoantšo sa Jesu mabapi le mefuta e mene ea mobu oo peō ea mojali e oetseng ho eona. (Mar. 4:3-20; Luka 8:5-15) Setšoantšo sena se bontša kamoo tlhokomelo le khetho e nepahetseng li tlamehang ho etsoa ka hore na peō e jaloa tikolohong e joang haeba ho tla kotuloa se lebelletsoeng. Joalokaha Jesu a hlalositse mabapi le tikoloho e tletseng meutloa bakeng sa peō: “Tse oetseng meutloeng, ke ba utloileng lentsoe; empa ha ba ntse ba e-ea, ba pupetsoa ke lipelaelo tsa lefatše, le lerato la lefumo, le menyaka ea bophelo bona, ’me ba se ke ba bea lijo.”—Luka 8:14.
6. Ho Ba-Galata 5:7-9, Pauluse o ile a hlokomelisa phello ea tikoloho e mpe joang?
6 Tumellanong le sena, moapostola Pauluse a hlokomela ho hong mabapi le Bakreste ba Galatia bao a ileng a ba ngolla ka “tholoana ea moea,” ho ba hlokomelisa hore ba ameha hampe ke tikoloho e fosahetseng. A re: “Le ne le titima hantle; ke mang ea le sitisitseng hore le se utloe ’nete? Keletso eo ha e tsoe ho ea le bitsitseng. Tomoso e nyenyane e hohomosa hlama kaofela.” (Ba-Gal. 5:7-9; Matt. 13:33) Bagalata bao ba Bakreste ba ne ba susumetsoa ke Bajode bao lipelo tsa bona li neng li sa amohele Bokreste ka ho feletseng, bao litsebe tsa bona li neng li sa arabele le bao mahlo a bona a neng a foufetse. (Matt. 13:14, 15; Ba-Gal. 5:10) Botsoalle bo sitisang joalo bo tlameha ho qojoa, bo tloheloe.
7. Pauluse o bontšitse kameho e tšoanang joang ea tikoloho e mpe bakeng sa Bakreste ba Korinthe?
7 Moapostola Pauluse o ne a boetse a tšohile hore phutheho ea Korinthe ha e hlaolele “tholoana ea moea,” hobane o ile a ba ngolla a re: “Kea tšoha hoba, ekaba mohla ke tlang, ke tla le fumana le se joale ka ha nka le rata, ’me le ’na le tla fumana ke se joale ka ha le rata, ’me mohlomong ke tla fihlela likhang, le mehono, le liphapang, le likomang, le litšebo, le liketselletso, le boikhohomoso, le mefere-fere.” (2 Ba-Kor. 12:20) Kamor’a ho bolela ka ba reng, “A re jeng, a re noeng, hobane hosasane re se re ea shoa,” ka lebaka le letle Pauluse o ne a ka fana ka temoso e reng: “Le se ke la lahleha; litloaelano tse mpe li bolisa mekhoa e metle.”—1 Ba-Kor. 15:32, 33.
8. Khōlo ea litšoaneleho tsa botho e tla tsoela pele joang ho sa tsotellehe ho robala ha Mokreste, ’me ke hobane’ng a ke keng a nepisisa ha a ahlola ka ponahalo ea pele ea khōlo?
8 Joaloka mobu, oo peō e oelang ho oona le o nang le matla ao o a filoeng ke Molimo a ho matlafatsa leha e le koro kapa meutloa, tikoloho eo Mokreste a ikhethelang ho hlaolela litšoaneleho tsa botho ho eona e tla mo ama hamolemo kapa hampe. Esita leha a robetse a le tikolohong e joalo, molao oa tšusumetso ea tikoloho o tla sebetsa o sa khathale ho eena ho fihlela ha khōlo e lumella sekele hore e kenngoe hobane nako ea kotulo ea botho e fihlile. Ntlheng ena, Jesu o itse: “Hobane lefatše le imelisetsa lijo ka ho etsa ha lona; pele ke lekhaba; hamorao ke qoapi, hamorao ke lihlaku tse butsoitseng qoaping.” (Mar. 4:28) Ho mojali khōlo ha e bonahale ’me ke ka matla ao a ke keng a a utloisisa. Khōlo e lebang ka lehlakoreng le leng e tla tsoela pele e iketlile, pele joaleka lekhaba, joale e be qoapi ’me ho qetelle ka hlaku e butsoitseng qoaping.
9. Setšoantšo sa koro le mofoka se tšoantša joang ho hloka tieo mabapi le ponahalo ea pele ho jaleng tikolohong eitseng?
9 Ha peō e qala ho mela ’me e hlahisa lekhaba, mojali mohlomong a ke ke a nepisisa hore na o tla kotula eng, ha a ahlola ka seo a se bonang. Qalehong ea khōlo mohlomong a ke ke a tiisa hore na ke eng se nyolohang; o ikhopolela feela hore na o jetse peō ea mofuta ofe. Ho etsa papiso: Setšoantšong sa Jesu sa koro le mofoka, ho Mattheu 13:26-30, o itse:
“’Me koro ha e se e hlahisitse lekhaba, e se e tsoetse, mofoka le oona oa bonahala. Bahlanka ba mong a ntlo ba tla, ba re ho eena: Morena, ha re re, u no u jalile peō e ntle tšimong ea hao? Na mofoka oo e o nkile kae? A re ho bona: ke ketso ea sera. Bahlanka ba re ho eena: Na ha u rate ha re ea kha mofoka oo na? A re: Che, mohlomong ha le e-kha mofoka, le ka tšoha le fothola le eona koro. Li leseng tse peli, li hole hammoho, ho be ho fihle kotulo; ke hona mohla ho kotuloang ke tla re ho bakotuli: Helang mofoka pele, le o tlame mangata, le o chese; le mpe le bokelle koro molikong oa ka.”
10. Ke neng re tla lemoha ntle ho phoso liphello tsa ho jala tikolohong leha e le efe?
10 Kahoo, ha re se re jetse lipeō tsa litšobotsi tsa botho ba rōna, ho hlahang joaloka lekhaba mohlomong qalehong ho ke ke ha khetholleha hore na mobu o tla beha eng. Hamorao ke hona feela ha khōlo e feletse ’me tholoana e hlaha, ho ke keng ha e-ba phoso hore na mobu o beile eng ho motho ka mong ea jetseng moo.
11. Ntle ho litšobotsi tse bonahalang tsa mobu, ke eng hape sa bohlokoa ho rereng botle ba ntho e hōlang mobung o joalo?
11 Mobu ke ntho ea bohlokoa ho se tla qetella se beiloe. Jesu o itse: “Lefatše [e seng Molimo] le imelisetsa lijo ka ho etsa ha lona; pele ke lekhaba; hamorao ke qoapi, hamorao ke lihlaku tse butsoitseng qoaping.” (Mar. 4:28) Setšoantšong sa mefuta e mene ea mobu, Jesu o hlalositse feela litšobotši tse bonahalang tsa mobu. Empa matsoai a mobu le oona ke a bohlokoa ho rera botle ba se beoang, joalokaha mobu o le bolila, o le bohla, o le letsoai, kapa ha o tšeloa ka monontša oa liphoofolo kapa oa matlakala.
12. Ke eng, ka baka leo, e tšoantšoang ke mobu?
12 Joalokaha mobu o nka karolo ea bohlokoa hakaalo tabeng ea khōlo le botle, o tšoantšetsa tikoloho ea tulisano, boitšoaro le bolumeli eo har’a eona re hōlisang peō ea litšobotsi tsa botho ba rōna, ’me, ka tlhaho, e ama batho.a Hona ke ntho e ’ngoe e lokeloang ke ho khetha.
SEBAKA SEO RE HLAOLELANG LITŠOBOTSI HO SONA
13. Le hona ka phuthehong ea Bokreste, na ho ka ba le tikoloho e sa khothalletseng khōlo e loketseng ea Bokreste?
13 Le ka phuthehong ea Bokreste ho ka ’na ha e-ba teng kapa setloaeli se seng molemo haholo moeeng. Ba bang ba sa tsoa tsoa lefatšeng ’me ba tšoantšelitse boineelo ba bona ho Molimo ka kolobetso ea metsing ba ka ’na ba sekamela ho tliseng ka phuthehong ntho e ’ngoe e sa ntsaneng e itšoarelletse ho bona—bolefatše bo itseng. A re hopoleng hore ke phutheho ea Bokreste eo moapostola Pauluse a ileng a e ngolla hore: “Ke le ngoletse lengolong la ka [le fetileng], hore le se ke la kopana le bafebi; . . . Empa joale, ke le ngolla hore le se ke la kopana le ea ipitsang moena, e leng mofebi, kapa ea lakatsang leruo, leha e le ea rapelang melimo, leha e le moetselletsi, kapa letahoa, kapa lesholu; ea joalo, le ho ja, le se no ja le eena.”—1 Ba-Kor. 5:9-11.
14. Ho Ba-Galata 6:7, 8, Pauluse o lemosa Bakreste joang ka ho jala ka tsela e fosahetseng?
14 Hape, liphuthehong tse sebakeng sa Roma sa Galatia tse Asia Minor, moapostola eena eo a ngola: “Le se ke la thetsoa, Molimo ha o songoe; hobane seo motho a se jalang, o tla se kotula le hona. Ea jallang nama ea hae, o tla kotula nameng ho bola; empa ea jallang Moea, o tla kotula Moeeng bophelo bo sa feleng.” (Ba-Gal. 6:7, 8) Mokreste ’mōtoana a ka ’na a jalla nama ea hae e oeleng ka ho batla ho hōlisa litšoaneleho tsa botho ba hae tikolohong ea lefatše e bokotsang nama ea hae e oeleng.
15. Ke lipotso life tse hlahang, ka baka leo, mabapi le ho batla tikoloho ea rōna ka phuthehong ea Bokreste?
15 Kajeno, ka phuthehong, na re sekamela ho litho tse sa ntsaneng li e-na le lefotha la bolefatše? Nako le nako li ikenya ho lona ’me li batla ho ba le litho tse ling e le hore li ka ikutloa hamolemonyana ka hore li ikhotsofatse nako le nako. Na re lumella tikoloho ea rōna ea boithabiso kapa botsoalle ka phuthehong e re sitise ho titima hantle peisong ea bophelo bo sa feleng? Na re lumella litho tsa phutheho tse sa ntsaneng li sekametse bolefatšeng li re susumelletse ho nka tsela e tšoanang le eo li e nkileng, hobane e le e nyakallisang haholo nameng ea rōna e oeleng?
16. Ho thulana le letsatsi la liteko ka katleho, re tlameha ho nahana ka eng ka tikoloho eo re likolohang ho eona?
16 Qalehong liphello tsa boikhotsofatso ba rōna ka tsela eo re e nkileng li ke ke tsa khetholleha hore na re tla ba Bakreste ba mofuta ofe qetellong. Hona ho tsoaloa ke hobane “mobu” kapa tikoloho eo re ikhethelang ho likoloha ho eona o tla bea litholoana butle-butle, “Lekhaba” le bonahala le se na molato ho ea shebileng, le hlile le se kotsi haholo. Rea robala bosiu ’me re tsoha motšehare, ’me khōlo ea litšobotsi tsa botho ba rōna e tsoela pele e sa khathale, hore na joang, ha re tsebe. Ho phehella ha rōna tseleng ena e lokolohileng le e bonolo, e itaolang e tla isa liphellong tse ke keng tsa qojoa, e leng, khōlo e feletseng hantle ea litšobotsi tsa botho ka baka la tikoloho e kang mobu, eo re itumellang ho fepuoa ho eona. Na seo re se kotulang ka ho kenya sekele se tla re tšoanelehisa ho thulana le liteko tsa tsatsi la kahlolo ka katleho?
17. Ke eng eo re sa lokelang ho e lebala ka tikoloho eo re sunyang peō ea litšobotsi tsa botho ba rōna?
17 Re se lebale hore, joaloka “mobu,” tikoloho eo peō ea litšobotsi tsa botho ba rōna li epeloang le ho matlafatsoa ho eona e tla ama tsoelopele ea rōna. E ka re etsa mofuta o sa atlehang oa ntho ea sebele, ntho e neng e reriloe ha re qala ho jala.
18. Ke papiso efe ea litloaelano tse mpe eo re e neoang ho Numere 11:4-34?
18 Mohlala oa pale oa phello ea litloaelano tse mpe le har’a batho ba Jehova o fanoe lefeelleng la Sinai mehleng ea Moshe. Re hopola “letšoele le kopakaneng” le neng le tsamaea le Baiseraele ho tsoa Egepeta ho tšela leoatle le Lefubelu. (Ex. 12:38) Ka motsoako ona oo e seng oa Baiseraele, moprofeta Moshe oa re bolella:
“Le bona ba-lichaba ba leng har’a bona [Baiseraele] ba tšoaroa ke boshoata; esita le bona bana ba Iseraele ba boela ba lla, ba re: Ke mang ea tla re fa nama, re je? Re sa hopotse lihlapi tsee re neng re li ja Egepeta re sa li reke, le likomkomere, le mahapu, le sholoto, le llele, le sefotha-fotha; ’me joale, meea ea rōna e omeletse; ha ho sa le letho, mahlo a rōna a se a bona manna feela. . . . Nqalo eo ea reoa lebitso la Kibrothe-Hattaava (phupu ea boshoata).”—Num. 11:4-34; bona hape 1 Ba-Korinthe 10:1-6, 10, 11.
19. Ke phihlelo efe ea Baiseraele le “letšoele le kopakaneng” lefeelleng e bontšang hore re ke ke ra nka Molimo o ikarabella bakeng sa liphello tse mpe tsa tikoloho eo re ikhethetseng eona?
19 Kahoo “letšoele le kopakaneng” la hotetsa mollo har’a Baiseraele. Ba sa khotsofala ke tokisetso ea bohobe ba Jehova bo tsoang leholimong, lipelo tsa bona tsa khutlela Egepeta ka baka la ho laba-labela ka boithati lintho tse neng li kile tsa thabeloa naheng ea borapeli ba litšoantšo. (Pes. 105:40) Ba etsa limpa tsa bona molimo oa bona, kaha ba ile ba tsamaea le takatso ea boithati bakeng sa melemo e bonahalang ea Egepeta e laoloang ke bademona. (Ba-Fil. 3:19) Kahoo ba tšoaetsa Baiseraele takatso e joalo. Ka nakoana ba ipaka e le metsoalle e mebe bakeng sa batho ba khethiloeng ba Jehova ba Iseraele. Mohlala ona oa pale o sebeletsa e le temoso e ntle bakeng sa rōna kajeno. Re ke ke ra etsa hore Molimo o ikarabelle bakeng sa liphello tse mpe tseo re li kotulang tikolohong e mpe eo re ikhethelang eona.
20. Ke eng ho e-na le Molimo e ikarabellang bakeng sa liphello ho rōna ka tsela eo re ikhethelang eona?
20 Haeba re sa kenye Molimo tabeng tabeng ea litšoantšo tsa mobu oa mefuta e mene le sa koro le mofoka, na ke ho utloahalang, ho lumellanang, ho kenya Molimo ka booona phethahatsong ea Mareka 4:26-29? Ka tsela e akaretsang, “lefatše le imelisetsa lijo ka ho etsa ha lona” ’me ‘tšimo e melisa tse jaliloeng ho eona.’ (Esa. 61:11) Kahoo, he, matekoane, “hashish,” koae le “poppy” tse jetsoeng ka morero oa ho etsa lithethefatsi, li tla hōla mobung o lemiloeng ka tsela e tšoanang le lijo-thollo. Ka ho hlakileng, sejalo se kotuloang se itšetleha ka seo mojali a se jalang le hore na peō e jetsoe mobung oa mofuta ofe.
21. Ke papiso efe ea Holland e bontšang hore tikoloho eo peō e iphumanang ho eona e ama litaba?
21 Tikoloho eo peō e iphumanang ho eona e ama litaba. Re ke re hopole hore mebu e na le matsoai a sa tšoaneng. O mong o bolila kapa o bohla, o mong o lenyekethe, joalo-joalo. Ke kahoo e itseng ha Madache a batla ho nka hape naha ho Zuider Zee, ba haha liforo ’me ba koalla ka ho tsona metsi a letsoai a leoatle. Eaba ba ntša metsi a leoatle, ba sia sebataolo. Empa naha eo ba e nkileng joalo e ne e sentsoe ke metsi a letsoai a leoatle. E ne e sa lokela hang-hang hore e ka lengoa lijo. Ba ne ba tlameha hore pele ba lokise mobu ka ho lema mahlaka a melang hantle mobung o letsoai. Hona ha sebeletsa ho hlatsoa mobu. Joale ea ba hona ba ka lemang lijo-thollo tseo ba ileng ba li chaea haholo.
22. Ke hokae moo hangata re tlamehang ho jala peō ea litšoaneleho tsa botho ba rōna, ’me ke eng eo e leng ’nete ka se hlahisoang ke see?
22 Ho joalo le ka lipeō tsa litšobotsi tsa botho ba rōna: re tlameha ho li jala kae kae, hangata e le tikolohong eo re ikhethelang eona. Re tlameha ho thulana le kotulo, kapa pokello. Na seo re se kotulang se tla ba setle bakeng sa ho amoheleha kamanong le ’muso oa Molimo? Tikoloho kapa setloaeli tseo re li batlang ka mehla li tla amana haholo le seo. Le hona ka phuthehong re ka batla botsoalle ba boithabiso le batho ba kolobelitsoeng ba sa ntsaneng ba khomaretse linthong tsa lefatše, empa bao matsoalo a bona a sa reng letho ka ho khukhunisa tsena ka phuthehong. Botho ba rōna ba Bokreste le boitšoaro ruri li tla ameha ke lintho tse joalo tse tšoaetsanoang.
23. Ho e-na le kamoo lintho li bonahalang kateng qalehong, ke eng se tla rera thabo e tla re tlela qetellong?
23 Khōlo ea Mokreste ea tšoaelitsoeng ho nka tsela ea bolefatše e tla ea butle butle, ho kheloha tseleng ea Bokreste ho tla butle hoo qalehong ho leng honyenyane hoo ho sa bonahaleng. Ho tšoana le ho hlaha ha “lekhaba” peōng. Empa qetellong nako ea kotulo e tla bontša ntle ho phoso hore na re hōlile hore re be eng, kaha liphello li teng tse tla lefuoa. Ha qetellong Bokreste ba ’nete bo thulana le teko, motho ka mong o tla tlameha ho kenya sekele ea hae ’me a bokelle seo a hōlileng ho ba sona. Na seo a tla se kotula se tla mo sia a nyahame, a senotsoe e le ea leshano boipolelong ba hae ba Bokreste? Ho lehlohonolo Mokreste ea nang le mabaka a Mangolo bakeng sa ho khotsofalla se tla kotuloa ke sekele ea hae.—Bapisa Pesaleme ea 126:5, 6.
24. Na khalalelo ea rōna ea botho e tla fetola phello ea tikoloho eo re ikenyang ho eona ka ho amana le eona hang-hang?
24 Butle-butle re hōla ka tsela ena kapa eane, ka tsela ea lefatše kapa ka tsela ea moea. Ho malimabe rōna haeba re ithetsa kapa re lumella ba bang ba re thetse ho nahana hore re ka itloaetsa litloaelano tse mpe ntle ho hore mekhoa ea rōna e metle ea Bokreste e senngoe. (1 Ba-Kor. 15:33) Re ke ke ra soma Molimo ka ho leka ho fetola molao oa hae o sa fetoheng lefeela hore joalokaha ho jala ho le teng, le ho kotula ho tlameha ho ba teng le hore sebaka seo re jalang ho sona se tla ama seo re se kotulang. O re lemosa hore khalalelo ea rōna ea botho e ke ke ea hlakolehela ho ba bang ka ho itlisang ’me ba halalela ka baka leo. Ho e-na le hoo, kamano ea rōna e sa alosoeng ea ka mehla le batho ba sa hloekang ba lefatše e tla fella ka hore le rōna re be litšila.—Hag. 2:10-14.
25. Ho ea ka Ba-Galata 5:19-24, ke eng se tla re boloka kamanong e tšoanelehang le ’muso oa Molimo?
25 Ka ho nahana pele ho nako ka Mangolo re ka rera se tla hlahisoa ke tsela ea rōna. Na re habile ho ba kamanong ea ka mehla ea khotso le ’muso oa Molimo? “Mesebetsi ea nama” e ke ke ea re fihlisa moo! Ka lehlakoreng le leng, ho teng “tholoana ea moea,” ’me ka ho e hlaolela re ke ke ra ineela litakatsong le mesebetsing ea nama. Ho phehella tsela ena e hlokolosi ho khotsofatsang ho tla fella ka hore re kotule litholoana tse tšoanelang ’muso oa Molimo ka Kreste.—Ba-Gal. 5:19-24.
26. Re tla putsetsoa tsela efe ka ho kotula litšoaneleho tsa botho bo amohelehang?
26 ’Muso oa Molimo, oo e leng khale o rapelloa ke barutuoa ba Kreste, hona joale o tloha o futuhela mebuso eohle ea sera bakeng sa ho tumisoa ha borena ba Hae ba bokahohleng. Ho tlang le hoo ke kotulo ea botho ea e mong le e mong ho rōna mabapi le ’muso oo. Ho hlokahala hore ho eloe hloko haholo mabapi le tikoloho ea “mobu” eo re kenyang peō ea litšobotsi tsa botho ba rōna. Litloaelano tsa rōna tsa boithabiso, boikhathollo, boitšoaro le bolumeli li be le bao ba emelang ’muso oa Molimo ka Kreste pele, qetellong le ka linako tsohle. Hore re nahane ka ho teba ka seo re se jalang, le hore na re se jala hokae, ’me ka linako tsohle re talimile ’musong oa Molimo, ho tla putsoa ka kotulo e khōlō ea tholoana ea botho bo hōlileng tsebong le bo mafolofolo bo kang ba Kreste. Jehova Molimo o tla khahlisoa ke rōna hakaakang! O tla re thabela ka pontšo ea kamohelo ea hae eo ho seng e tšoanang le eona le ka mahlohonolo ’ohle ao ho amoheloa ke eena ho isang ho oona.
27. Ke eng se tla fella ka phethahatso e ntle bakeng sa rōna ea setšoantšo se ho Mareka 4:26-29?
27 Kahoo, tlas’a nako e ntseng e potlaka ka ho eketsehileng, ke hantle ha re ela hloko keletso e nakong: “A re lebelaneng, re tle re isane ka cheseho leratong le mesebetsing e metle. Re se ke ra ngala liphutheho tsa rōna, kamoo e leng mokhoa oa ba bang; re mpe re khothatsane, haholo etsoe le bona letsatsi le ntse le atamela.” (Ba-Heb. 10:24, 25) Hona bakeng sa rōna ho tla fella ka phethahatso e molemo ea setšoantšo se sekhutšoanyane empa e le se matla sa mojali le peō, se ho Mareka 4:26-29. Re tla latsoa ka nako eo ‘ho thaba nakong ea kotulo.’ Ka thabo e khōlō re tla ananela ka botlalo hore “ea jallang Moea, o tla kotula Moeeng bophelo bo sa feleng.”—Ba-Gal. 6:8; Esa. 9:3.
[Mongolo o botlaaseng ba leqephe]
a Hona ho tšoana le hoo Jesu a ho buileng setšoantšong sa hae sa koro le mofoka, hore “tšimo” ke lefatše la batho. (Matt. 13:38) Ke mona feela, ho Mareka 4:26-28, “mobu” o jaloang, ho e-na le ho akaretsa lefatše, o fellang feela kamanong le setloaeling tseo motho ka mong a nang le tsona le batho. “Mobu” ha o emele “pelo” ea motho, joaloka ho Mattheu 13:19 le Luka 8:12, 15.
[Setšoantšo se leqepheng la 19]
Ho tšoana le mobu oo peo e oelang ho oona, tikoloho eo Mokreste a ikhethelang ho hlaolela litšoaneleho tsa botho e tla mo ama hampe kapa hantle
[Setšoantšo se leqepheng la 21]
“Lefatše le imelisetsa lijo ka ho etsa ha lona; . . . ’me lijo ha li butsoitse, a phakise a kenye sekele; hobane kotulo e fihlile.”—Mar. 4:28, 29.