Ho Nyarela ka Litabeng

Booatla ba Baesekopo

● Haufinyane ’mali ea nyahameng o ile a ngolla koranta ea khale ea Maprostanta a Amerika “Christian Century” ka litlhahlobo tsa eona tsa libaesekopo tse ling tsa haufi tjena. A hlokomela hore mohlophisi oa makasine, James. M. Wall, “o ngotse taba e rorisang ‘Luna’ e le mosebetsi o moholo oa papali ea libaesekopo ’me a tsitlella hore e bonoe ka makhetlo a mabeli!” Baesekopo e bontša kamano ea botona le botšehali e sa lumelloeng pakeng tsa ’mè le mora, ho bakelang ’mali ea nyahameng hore a botse: “Empa ho thoe’ng ka phatlalatso e tletseng leqephe bakeng sa baesekopo e neng e tšepisa ‘pono e thabisang ka ho fetisisa ea mehla ea rōna’?”

A boela a hlalosa ka sehlooho se seng sa “Christian Century’’ se reng “Libaesekopo tsa banna ba hōla-hōlileng,” moo libaesekopo tse peli tse sa lumelloeng bana ba ka tlase ho lilemo tse 17 ntle ha ba e-na le batsoali ba bona li ne li hlahlojoa. Hona ho etsoa hobane li bontša likamano tsa botona le botšehali kapa litoantšano tse mpe hoo bana ba sa lumelloeng ho Ii bona ntle ho batsoali. Leha ho le joalo “lihlahlobo tsa Gerald Forshey li fana ka maikutlo a hore monna e mong le e mong ea lilemong tse fihlang mashomeng a mane o tlameha ho ikemisetsa ho bona libaesekopo tsena le ba bang ba kang eena,” kamoo ho ngolang ’mali. “’Na ka bonna ke belaela bohlale le ho loka ha keletso e joalo.”

Maikutlo a ’mali enoa a tumellanong le keletso ea Mangolo: “Ha e le bofebe, le litšila tsohle, le takatso ea moruo, ho se ke ha boleloa le mabitso a tsona har’a lōna, kamoo ho tšoanelang bahalaleli [bahloeki],” e leng tse bontšoang haholo libaesekopong tse joalo. Ka ho totobetseng ho shebella lintho tsena ho nkoa e le tsoelopele ke baeta-pele ba bang ba bangata ba ka sehloohong ba bolumeli.—Ba-Ef. 5:3, 4.

Ke Qeto ea Mang?

● Kopanong ea haufi tjena, litsebi tse peli tsa bongaka ba molao tsa Univesithing ea Boston ea Sekolo sa Bongaka li ile tsa hlahisa taba ea Lipaki tsa Jehova ho hlakisa ntlha eo li neng li bua ka eona. Tsa bontša hore makhotla a ’nile a laela tšelo ea mali bakeng sa Lipaki tse lilemong ha feela mokuli kapa litho tsa lelapa li bontša hore mokuli a ke ke a hana taelo ea lekhotla—ha e le hantle, li tlohela boikarabelo matsohong a lekhotla. Joale litsebi tsa bolela taba eo ho eona mokuli a bolelang hore o tla hana tšelo leha e le efe ea mali e laetsoeng ke lekhotla. Moahloli ha a ka a laela joalo.

Khano e matla moo ho tlōloa ha melao ea Molimo ho ka amehang e bontša hore motho o nkile boemo ba boapostola: “E ka khona re utloe Molimo ho e-na le batho.” Hona ke ’nete haholo kaha Bibele e amahanya ho tela mali le lintho tse kang ho tela bofebe. Kahoo, kaha Bakreste ba ka hana ho betoa—tlhekefetso e silafatsang botšehaling le botoneng—kahoo ba tla hanela litšelo tsa mali tse laetsoeng ke makhotla—hoo le hona e leng ho hlekefetsoa ho itseng ’meleng.—Lik. 5:29; 15:20, 29.

Ho e-na le ho lumella makhotla a nke boikarabelo tabeng ena, “Lipaki tsa Jehova ha lia shebella hore mang kapa mang e mong, le haeba ke ngaka, motsamaisi oa sepetlele kapa moahloli a etse liqeto tsena tsa botho bakeng sa tsona. Ha li batle ha motho e mong osele a leka ho jara boikarabelo ba tsona ho Molimo, hobane ha e le ka sebele ha ho motho e mong ea ka etsang joalo.”—Jehovah’s Witnesses and the Question of Blood.”

Thuto ea Bohlokoahali

● Lebaka la bohlokoahali la ho ruta bacha ba kajeno e lokela ho ba lefe? Ea tumileng ka ho ithuta ka tulisano ea batho Ashley Montagu o sa tsoa ngola ho makasine ea matichere a Amerika “Today’s Education” hore, hore ho ithuta ho rata “ke seo re lokelang ho se ruta likolong tsa rōna.” Ho theiloe lithutong tsa hae, a re: “Re qala ho utloisisa ka lekhetlo la pele paleng ea moloko oa rōna hore thuto ea bohlokoahali ea litlhokahalo tsohle tsa motho tsa motheo ke bohlokoa ba lerato. Le eme setsing sa sohle se hlokoang ke motho joalokaha letsatsi la rōna le le setsing sa tsamaiso ea mafatše a rōna.”

Montagu a boela a hlokomela hore: “Ngoana ea sa kang a ratoa o fapane haholo kahehong ea ’mele, kelellong le bothong le ea ileng a ratoa. Oa pele o bile o hōla ka mokhoa o fapaneng le oa morao. Seo re se tsebang ke hore motho o tsoalloa ho phela joalokaha eka ho phela le ho rata ke ntho e le ’ngoe. Hona, koana, ha ho hocha. Hona ke ho bontša tšoaneleho ea Thuto ea Thabeng.”

Na aa ke maikutlo a motho ea nkehileng haholo bolumeling? Mohlalefi oa arabela: “’Na eo ke seng Mokreste le eo ke seng setho sa tšekamelo efe kapa efe ea bolumeli ke rialo.” Kahoo, boithuto bo nang le sepheo bo hlakisa seo ’Mōpi oa motho a se senotseng.—1 Ba-Kor. 13:13.