U se k’a Itšhela Thajana
MAEMONG a mangata ho itšehla thajana hase tlhaho. Ho itšehla thajana ka nako e telele hase Bokreste. Le hoja a feletse ka boeena ’me a sa hloke botsoalle, Jehova Molimo a ho bona ho loketse ho potolohuoa ke bongata ba bara ba moea. (Jobo 38:4-7; Dan. 7:10) Ena e bile pontšo e sebetsang ea lerato la hae. A khannoa ke lona lerato leo, hamorao a etsa mora oa lefatšeng, Adama. Matla a entsoeng ka mokhoa o tsotehang a puisano a hahelloa ho bara bana ba leholimo le ba lefatšeng. (1 Ba-Kor. 13:1) Molimo ha o ka oa etsa libopuoa tsena tse bohlale hore feela a fumane ho tsona, empa, ho e-na le hoo, ho fana. O ne a thabisoa ke bara ba joalo, ’me ba thabela ho ba le eena le bona ka bobona.—Bapisa Liproverbia 8:30, 31.
Ea Holimo-limo a boela a qeta hore ha ho hotle hore Adama a ’ne a lule a le mong ’me, ka baka leo, a mo etsetsa molekane. (Gen. 2:18) Phethahatso ea molao oa Jehova bakeng sa batho ba babeli ba pele hore ba tlatse lefatše e ne e le hore lelapa lohle la motho le buisane lefatšeng ka bophara. (Gen. 1:28) Ho hlakile hakaakang hore batho ba ne ba sa rereloa ho hlokofatsoa ke ho itšehla thajana!
Hase ho makatsang, ka baka leo hore litšupiso tse ngata tsa Bibele ka ho itšehla thajana li ama le litšobotsi tse seng ntle. (Pes. 25:16; 102:7) Ho lelekoa ha Kaine ka baka la ho bolaea ngoan’abo e bile ho mo arola lelapeng lohle la motho. A ho talima e le kotlo, ntho e thata ho e mamella.—Gen. 4:11-14.
Pheko
Empa motho ea ikutloang a hlorile, a sa ratoe, kapa a sa batluoe a ka etsa joang? Ho e-na le ho iqenehela, a emetse hore ba bang ba etse ho hong, a lebelletse ho amohela, a nke boikhathatso ho bontša lerato ho ba bang ka ho etsisa Molimo le Kreste. Ka ho ikarola, ebang ke ka boomo kapa e se ka boomo, motho o sebetsa khahlanong le morero oa Molimo bakeng sa batho. Hase feela ho itšehla thajana ho tlisang mathata! Kahoo pheko ke ho etsa seo ’Mōpi a neng a re hopoletse sona. O ne a lakatsa hore re thabele botsoalle le batho ba bang. Mosali e mong ea neng a jeoa ke bolutu nakong e fetileng o ile a ananela ntlha ena: A re: ‘Ka hlakeloa qetellong. Eaba ke ema ka maoto ’me ka khaotsa ho inahana bonna, ka qala ho sebetsa ka thata. Ke sebelitse ka thata ho tloha ka nako eo.’
Re ka ithuta eng ka phihlelo ena? Ha ho hlokahale hore motho a jeoe ke bolutu. Ho na le ho hong ho molemo hoo a ka ho etsang ka bona. A ka sebelisa Bokreste ba sebele. Bonneteng, na motho e ka ba Mokreste a ba a itšehla thajana ka nako eona eo? Che, hobane ho rata eo u ahisaneng le eena ho hloka ho etsa batho ba bang hantle, u le mafolo-folo ho etsisa ’Mōpi. (Matt. 22:37-39; 7:12) ’Me ho fana ka mosa ho batho ba hlokang hoa thabisa. Ho fana ho joalo ho felisa bosula bo tlisoang ke bophelo bo bolutu.
Thibelo
Koana, ho hloka boiteko ho ba mafolofolo ho abelaneng le ba bang, u sa itumelle ho nyahama ka baka la ho ikutloa u sa lekana. Kaha ha ho bonolo ho hlōla bolutu, ke hantle ha re qoba ho oela boloetseng bona. Kahoo, leha ba bang ba ka re soetsa, ho hlokahala re itlhokomele hore re se ikhethe ho batho ba bang. Bibele e re: “Ha ho motho ho rōna ea iphelelang.” (Ba-Roma 14:7) Hang ha motho a itšehla thajana, o kotsing ea ho nahana ka booatla, mohlomong le ka bothoto, ho intšeng kotsi. Maele a Bibele a ho hlalosa ka tsela ena: “Motho ea ikhethang ho ba bang o batla ho ikhahlisa eena a ’notši; khalefong ea hae o soma tsohle tsa bohlale.”—Liprov. 18:1.
Nka taba ea mosali e monyenyane ea ileng a lemalla ho shebella litšoantšo tsa bootsoa tsa bosiu thelevisheneng. A kene tlas’a tšusumetso ena e mpe, a phakisa a khaotsa ho rapela, ho bala Mangolo le ho ba teng libokeng tsa Bokreste. Kapele a utloa hore monna oa hae ha a mo khotsofatse ’me a qala ho ikutloela bohloko. A kena tseleng eo likhoeli pelenyana a neng a ka e lahla ka potlako e le ea booatla. A huloa ke litakatso tsa hae tse fosahetseng, a tlohela monna oa hae le morali e monyenyane ho ea phela le monna e mong. Na o ile a fumana thabo ea sebele? Che. Hamorao a lumela ho motsoalle oa hae hore molekane oa hae e mocha oa monna oa mo shapa le hore o ikutloa a hloreloa ngoana oa hae. Mosali enoa o ne a intšitse kotsi, monna oa hae, ngoana oa hae le Bakreste bahabo ’me a tliselitse ’Mōpi thohako e khōlō—hona hohle ho tsoaloa ke ho itšehla thajana.
Ho Itšehla Thajana Hase Bokreste
Ruri ho itšehla thajana hase Bokreste. Hoa arola, ho kolobisa mesebetsi e chesehang ea Bokreste le ho beela puisano meeli. A arohile ho batho ba bang, motho a ka ’na a tepella ’me a belaella batho ba tšepahalang, le ka Molimo le Mangolo. Morutuoa Juda o bontša hore ba bang mehleng ea hae ba ile ba sitoa ho ananela hore le oona mangeloi a ile a intša kotsi ha ba tlohela ho kopanela le Molimo le mangeloi a tšepahalang ho kena litakatsong tse fosahetseng.—Juda 6, 8, 10, 20-22.
Moea ’ohle oa Bibele o hanana le ho itšehla thajana le liphello tsa teng tse sa rateheng—ho se sebetse, ho haelloa ke puisano le ho sitoa ho bontša lerato. Mangolo a ruta le ho khothalletsa ketso e molemo, a sebelisa mantsoe a mangata a ketso bakeng sa hoo. Re khothalletsoa ‘ho etsa ba bang,’ ho ‘ea etsa barutuoa,’ ‘ho kōpa ’me re tla neoa,’ ‘ho kokota’ hore re buleloe, ‘ho rata bahabo rōna, ho ‘bokana le Bakreste ba bang,’ ‘ho amohelana boeting.’ Tsena ke meriana ea botsoa, ho iqenehela, ho ikutloa u sa ratuoe kapa u se na molemo oa letho. Bokreste bo hloka hore motho a bontše qenehelo ka ho utloela ba bang bohloko, a etsa hore motho e mong a ikutloe a ratoa ’me a na le molemo ho e-na le ho hloka molemo. Ha re fana ka pelo eohle, re ka tiisa hore re tla fumana haholo ho Ntate oa rōna oa leholimo. (Mat. 6:1-4) Ho fana ho etsa hore motho a ratehe ho ba bang, ho leleka boikutlo ba bolutu.
Koana, ho na le linako tseo ho hlokahalang ho ba lekunutung. Le eena Jesu Kreste, le hoja a ne a tšoarehile ka ho thusa ba bang, o ne a bula sebaka sa ho ba mong. Ha a utloa litaba tsa ho shoa ha Johanne Mokolobetsi, “a ikela thoko.” (Matt. 14:13) Ho ba tloaetseng ho ba har’a batho, ho ikarola ho ka fetoha phetoho e khathollang ’me ha fana ka monyetla o motle oa ho nahana. Mora oa Molimo o kile a re ho barutuoa ba hae: “Tlong kathōko feelleng, le phomole hanyenyane. Hobane batho ba bangata ba ne ba e-tla, ba bang ba e-ea, ’me baapostola ba ne ba se na sebaka le sa ho ja.” (Mar. 6:31; 3:20) Ho ikarola e ne e le ntho eo ba e hlokang ka nako eo.
Ha re sebelisa nako ea ho ikarola morerong oa ho nahanisisa, re ka tiisa tumelo ea rōna. Ho nahanisisa ho joalo ho ka sebeletsa ho re atametsa haufi le Molimo. Ho ka re khannela ho itlhalosa ka kananelo thapelong, kahoo ho khothalletsa kamano ea rōna ea botho le Ea matla ’ohle. Empa linako tse joalo ke tsa nakoana. Ho se be mohla re itšehlang thajana ho isa ho pheleng bophelo ba likano tsa boitlami.—Bapisa Johanne 17:15.
Kannete, re na le mabaka a utloahalang a ho qoba bophelo ba ho itšehla thajana. Bo kotsi ka sebele. Ho itšehla thajana ho ka ama hampe mosebetsi oa Bokreste, litloaelano le puisano. Ka baka leo, fumana molemo o feletseng oa litokisetso tsa Molimo tsa moea. Bala Lentsoe la oona tsatsi le leng le le leng. Se ka hlokomoloha ho rapela. Tlatsa mohopolo ka menahano e molemo. Kopana ka mehla le ba tumelo ea bohlokoa ka ho tšoanang. Tšoareha mosebetsing o molemo oa ho ruta Lentsoe la Molimo, ’me ka litsela tse ling arabela ho se hlokoang ke batho ba bang. Ho khomarela haufi ho Jehova le Lentsoe la hae le ho ineela tšusumetsong ea moea oa hae ho tla thibela sebaka sa ho ba “botsoa le sa ho nyopa tsebong ea Jesu Kreste, Morena oa rōna.” (2 Pet. 1:5-8) U se ka itšehla thajana.