Ho Loana ka Katleho le “Linnete Tsa Bophelo”—Kamoo ho Bontšoang ke Lenaneo la Thuto la Lefatšeng Lohle
BOPHELO bo ne bo bile sehlōhō ho ngoanana oa Lefora ea lilemo li 17. Kamor’a bongoana ba mahlomola, a fumana thabo ka lenyalo. La phakisa la sulafala ’me monna oa hae a mo tlatlapa hampe. Hang hape, hoba a hlaphoheloe maili-iling kamor’a ho otloa, a tšoara sethunya ’me a betsa—monna oa hae a oa a shoele. Likhathatso tsa hae tsa qaleha.
Hoba a lokolloe kamor’a kahlolo ea lilemo tse peli teronkong, a tsoma lerato la monna e mong. Empa ’nete e sehlōhō eo a ileng a e fumana ke ngoana oa matšeo. A le bolutung, a se na tšepo, a lahlehile ho hang ’me a khathetse ke ho phela, hoseng ha Sontaha se seng a rera ho ipolaea ’me a ipolaee le ngoana oa hae. A bulela “gas” ’me a emela ho shoa.
Empa ho e-na le ho ba phofu e ’ngoe ea ho ipolaea, ho makatsang, mosali enoa e mocha o ne a le har’a letšoele le thabileng la bakopani ba fetang 90 000 kopanong France lehlabuleng le fetileng. Ha e le hantle, bophelo ba hae joale bo ne bo le molemo ka sebele. Joale o ne a e-na le tšepo ’me joale a ka loana ka katleho le mathata a bophelo. O ne a le har’a ba 25 276 ba kolobelitsoeng lefatšeng ka bophara ho tla fihlela ka nako eo letotong la likopano tse neng li tšoeroe ke Lipaki tsa Jehova.
Phapang e ne e tsoaloa ke eng? A tloaelana le lenaneo la ho ruta la lefatše lohle. Ka motsotso oo mosali enoa a neng a buletse “gas” motho a kokota monyako ha hae. E ne e le e mong oa Lipaki tsa Jehova, ’me molaetsa o ne o khatholla hoo o ileng oa isa thutong ea beke le beke ea Bibele le Lipaki le kolobetsong ea hae qetellong lehlabuleng lena le fetileng. Ka lilemo tse mashome-shome Lipaki li ’nile tsa utloa taelo ea Jesu: “E-eang ke hona, le rute lichaba tsohle; . . . le ba rute ho boloka tsohle tseo ke le laetseng tsona.” Ho thusitsoe ba likete selemo le selemo.—Matt. 28:19, 20.
TŠOBOTSI E KHŌLO EA LENANEO LA THUTO
Likopano tsena tsa selemo le selemo, tse neng li e-na le sehloho se reng “Lerato la Molimo,” ke tšobotsi e khōlō ea mosebetsi oa ho ruta oa Lipaki tsa Jehova. Likopano tsena li bile le batho ka mokhoa o khotsofatsang. Selemong se ka pele ho se fetileng, linaheng tse fetang 80, ho bile teng ba fetang 3 400 000 likopanong tse joalo. Hona ke keketseho ea 43 lekholong holim’a lenane le bileng teng likopanong lilemong tse fetileng tse hlano. Japane, ka mohlala, lilemong tse fetileng tse leshome, kopano ea sechaba ea hohela ba 12 615—tlhoro e neng e thabisa ka nako eo. Lehlabuleng le fetileng—ba 105 534—makhetlo a fetang a robeli ho feta ba pele ka bongata—ba bile teng!
Linaheng tse 33 ho ne ho kopane ba 2 267 955. Litlaleho li ne li supa hore kakaretso e ka ’na ea feta 3 600 000. Empa na ke lipalo feela tse etsang hore lenaneo lee la thuto e be le fetisisang?
THUTO E SEBETSANG
Le hoja kajeno thuto e hatisoa lefatšeng lohle, ba bangata ba nyahamisitsoe ke liphetho tsa thuto ea lefatše feela. “Ho hlokahala re qale ho nea bana ba rōna lithuto tse sebetsang tse ba lokisetsang le ho ba rutela linnete tsa bophelo,” ha hatisa joalo hlooho ea motse oa Nairobi, Kenya. Le tla lumela. Thuto e joalo ha e hlokahale feela bakeng sa bana. Ba bangata ho rōna ba hlokomela hore ho loana ka katleho le likhatello tsa kajeno tsa ‘lefatše la sebele’ re hloka ho fetang feela tsebo ea ho ‘bala, ho ngola le lipalo.’
Litekanyetso tse nepahetseng tsa boitšoaro, matla a ho hlōla mekhoa e mebe, matla a ho sebelisana le ba bang, le ho tšepahala bothong ke litšoaneleho tse seng kae tse ho hlokahalang li ntlafatsoe haeba motho a tla loana ka katleho le linnete tsa bophelo le ho thaba kannete. Ho sebelisoa Bibele haholo, Lipaki li leka ho thusa batho ka bomong ho ntlafatsa litšoaneleho tse joalo.
Ho sebelisoa le lithuso tsa ho ithuta Bibele. E ’ngoe ho tsona, pale ea lentsoe le litšoantšo ea Bibele (ka thōko-thōko ka letsohong le letona tlase), ke e ratoang haholo ke bana. Molaetsa o fumanoeng lebokoseng la moneelo la kopano Japane, o saennoe “ea lilemo li hlano,” o ne o re: “Ke bolokile 745 yen ($3,35, U.S.) cheleteng eo ke e fumaneng ha ke thusa ’mè. E nyenyane haholo empa ke tla thaba ha le ka e sebelisa ho hatisa libuka tse ntle joaloka Buka ea ka ea Lipale tsa Bibele.”
Kahoo, ka thuso ea libuka tse joalo, lenaneo lena la thuto le thusa ho hlahisa barutuoa ba ’nete ba Kreste. Ba ka ntle ba ne ba atisa ho khahloa ke boitšoaro ba barutuoa bana likopanong tsa bona tsa haufi tjena. “Ha ke phoqe,” kamoo ho boletseng mookameli oa lebala la lipapali la Naples, “empa ke ho utloa e le tšoanelo ea ka ho le bolella hore le batho ba hlokofetseng, ba laolehileng le ba rutehileng ka ho fetisisa bao nkileng ka kopana le bona.”
E, monna enoa o ne a bona hore thuto eo Lipaki tsa Jehova li e fumaneng e hahile litšoaneleho tse ling tse lakatsehang. Hoba le lemohe Lipaki, lepolesa le laolang sephethe-phethe Nagoya, Japane, la re: “Ho totobetse hore batho mona ba ithuta ntho e ’ngoe e ba phahamisang kaholim’a motho ka kakaretso.” Che, tsebo ena ha e ba etse hore ba ikutloe ba phahametse ba bang, empa e hlile e phahamisa monahano oa bona e le hore ba ka hlahisa litšoaneleho tse hlileng li haellang ka masoabi lefatšeng la kajeno.
Empa ke eng e rutoang likopanong tsee? Maqephe a mabeli a latelang a hlahisa lintlha tse khōlō tsa lenaneo la Likopano tse tsoa feta tsa “Lerato la Molimo, ho akarelletsa khutsufatso ea litšoantšiso tse tharo tsa Bibele tse neng li etsoa moo.
Liphello ke Life?
Bakeng sa likopano tsa tsona, Lipaki tsa Jehova tsa ea ka likete metseng e makholo. Koranta e ’ngoe ea Sweden ea bitsa ho fihla ha tsona ‘ho kena ho khutsitseng le ho botsoalle ka ho fetisisa paleng ea lefatše.’ Li ne li shebiloe ka cheseho. Ha bonoa eng? Na ho bile le bopaki bo bonahalang ba katleho ea lenaneo la bona la thuto?
BOLOTSANA BOA TLOSOA
Italy, mosali ea nang le lebenkele haufi le moo ho neng ho tšoaretsoe kopano a re ho Lipaki tse ling: “Maobane ke entse phoso ha ke nea e mong oa lōna chenche ea hae. Ka mo nea 10 000 lire ($12, U.S.) ho feta le eo a neng a e nkile. Hamoraonyana, a khutla ho e khutlisetsa ho ’na. Ha ho mohla ho kileng ha etsahala haesale ke ba le lebenkele lena.”
Ke eona ketsahalo eo feela? Che. Ho tšepahala ha Lipaki hoa tsebisahala. Ha a lefa molato oa hae oa ntlo ea baeti ka cheke, e mong oa ba neng ba tlile kopanong Linaheng tse Kopaneng tsa Amerika a botsa hore na o hloka ntho ea boitsebahatso. “Che!” ha arabela mosebeletsi. “Haeba re ke ke ra tšepa lōna, re ka tšepa bomang?”
MATLA A HO HLŌLA LITLOAELO TSE MPE
Mohlomong u tseba metsoalle e meng ea hao kapa bao u ahisaneng le bona bao bophelo ba bona bo sentsoeng ke bohlanka ba litloaelo tse mpe, tse kang botahoa, tšebeliso e mpe ea lithethefatsi kapa tse ling. Leha ho le joalo, koranta ea Mataliana La Nazione ea tlaleha hore: “Har’a tsona [Lipaki tse kolobelitsoeng bocha] e ne e le ba neng ba sebelisa lithethefatsi pele, matahoa, le batho ba lilemo tse fapaneng ba neng ba fumane matla a ho hlōla mathata a boima a lelapa le kahisano.”
Monna e mong ea bileng ho e ’ngoe ea likopano tse 108 Linaheng tse Kopaneng tsa Amerika a lumela hore: “Ke ne ke fihlile tetete bophelong ba ka. Ho bonahala ke ne ke sekametse bophelong bo theohileng, le hoja, ka lipuisano tsa pelenyana le Lipaki tsa Jehova, ke ne ke tseba hamolemo. Ketsahalo e ’ngoe ea ntlhokomelisa haholoanyane kamoo ke leng mohlanka oa litloaelo tse mpe.
“Ke tahiloe ke tahi ’me ke phahame ke lithethefatsi,” kamoo ho hlalositseng David, “’na le motsoalle ra iphetetsa ho eo re ahisaneng le eena ka ho chesa ntlo ea hae. Qetellong ka hlokomela hore joale ke se ke feteletse. Ke hlomohile ke molato oa ka ka batla Lipaki. Joale ka qalisa ho ithuta Bibele ka tieo ka thuso ea tsona.”
Hamorao a itšoarisa sepoleseng ’me a kenngoa litlamong. Empa thuto ea hae ea Bibele ea ’na ea tsoela pele—le hona teronkong. Boitšoaro ba hae ba fetoha haholo. Bahlanka ba teronko ba khahloa hoo ba ileng ba khutsufatsa kahlolo ea hae. Le hoja e ne e ntse e le motlamuoa, ba lumella enoa eo e neng e le senokoane—mohlanka oa liketso tse ngata tse senyang—ho ikela kopanong ka boeena. E ne e le e mong oa ba 1 034 364 ba neng ba le likopanong Linaheng tse Kopaneng tsa Amerika.
BATHO BA SEBETSANG HAMMOHO
“Le ka mohla re ne ke ke ra nahana hore batho ba kang lōna ba teng hoja ra se ke ra le bona le sebetsa ka mahlo a rōna,” kamoo ho hlokometseng balebeli ba lebala la lipapali la Ascoli Piceno, Italy. Ba shebella Lipaki li tlosa litulo kaofela tse koahetsoeng lebaleng, li hloekisa ka tlas’a tsona ’me li li khutlisetsa hape. “Ho etsa mosebetsi o joalo hase ntho eo re neng re ka e nahana le ho e nahana,” kamoo ho boletseng bahlokomeli. Empa ha batho ba ratana, ho etsoa mesebetsi e mengata e ke keng ea “nahanoa le ho nahanoa.”
Ka mohlala, Japane ntho e khōlō e neng e aliloe fatše ho e ’ngoe ea liholo ea silafala letsatsi pele ho kopano. Hangata ho nkoa beke ho e hlatsoa. Ho makaleng ha baokameli, Lipaki tsa e hloekisa ka metsotso e 90!
“Ba batona ba fetang 1 200 ho Lipaki tsa Jehova ba ala mapolanka a 8 000 ntlong ea lebala bekeng e fetileng bakeng sa ho sebelisa lebala ntle ho tefello lehlabuleng lena bakeng sa likopano tse peli tsa setereke tsa Lipaki [tsa “Lerato la Molimo”], kamoo ho boletseng Houston Chronicle ea la 3 Motšeanong, 1980. Tokisetso ena e sa tloaelehang e hlahile hobane baokameli ba ntlo ea lebala e Houston, Texas, ba ile ba khahloa ke bohlale ba Lipaki ba ho sebetsa ha li ne li sebelisa lebala ka lekhetlo le fetileng.
Ka lilemo tse peli Lipaki li ’nile tsa loana le mosebetsi oa ho ala lebala la lipapali la ntlo e khōlō ea lebala ka mapolanka a 8 000 a bolelele ba maoto a robeli le bophara ba maoto a mane le ho a khokhothela hammoho pele ho lipontšo tsa mesebetsi tse tlang. Ho hlokahala mapolanka ho sireletsa lebala lintho tse khōlō tse tlang ho bontšoa. Ha lipontšo li se li fetile, ho tla hlokahala hore mapolanka a tlosoe ho khokhotholloe lipekere ’me mapolanka a boele a bokelloe karolong e ka tlase ea ntlo.
Lipaki tsa ala mapolanka ka nako e khutšoanyane bo makatsang—ka lihora tse ka bang ’ne feela. (Pele ho nkile litsebi lihora tse 11!) Lipaki li ne li etsa kapele hoo moshebelli e mong a itseng, “E ne eka ke lebala le tšeloang ka ho hong!” Joale, ha lipontšo li fetile, tsa khutla ho tla khokhotholla mapolanka, ba tlosa lipekere tse likete le ho li bokella, hona hohle ka lihora tse robeli. Hona hangata ho nka libeke!
HO BETEFATSOA KE MAHLORISO
“Tsoela ka ntle u hoeletse thuso ea Molimo,” ha soma tichere ea sekolo. Ho ne ho buuoa le Paki e lilemong tsa bocha Japane. A songoa ka pel’a sehlopha kaofela ka baka la ho emela ha hae metheo ea Bibele. Ho sa tsotellehe litšomo tse tsoelang pele le tlhekefetso, a tšoarella tumelong ea hae ’me e ne e le e mong oa batho ba 1 860 ba kolobelitsoeng likopanong tsa Japane.
Ba bang ba kolobelitsoeng Japane ke ba neng ba notlelloa ka ntle ho matlo ’me ba qobelloa ho robala ka ntle ka likhoeli tlas’a boemo bofe kapa bofe ba leholimo ka baka la ho ea libokeng tsa Bibele. Motho e mong o ne a tšeloa ka metsi bosiu bo bong le bo bong ka libeke ha a leka ho robala. Ba bangata ba ne ba shapuoa hampe ke banna ba neng ba sa batle ho mamela ha ba beeloa mabaka. Leha ho le joalo tumelo ea Lipaki tsena tse ncha ea e-ba matla.
TŠEPO EA SEBELE
Ha ho ntse ho memeloa batho puong ea phatlalatsa “Hobane’ng Molimo o Lerato o tla Iphetetsa?”, Paki e ’ngoe Italy ea atamela sehlopha sa basebetsi ba neng ba le haufi le mabitla. Mosebetsi e mong a bona karolo e qalang ea sehlooho sa puo ’me a re, “Molimo o Lerato? Le hanyenyane!” Joale, ntle ho puo, a isa Lipaki lebitleng le koahetsoeng ka lipalesa tse ntle tse tšoeu. “Mona ho rapaletse ngoanana oa ka e monyenyane, ea lilemo li tharo feela. Ke hobane’ng ha Molimo o lerato o ka etsa see?” ha bua monna enoa ea ferekaneng maikutlo.
Lipaki ka mosa tsa mo hlalosetsa tšimoloho ea ho shoa—e seng ho Molimo —’me tsa bontša monna tšepo ea Bibele ea tsoho. (Ba-Roma 5:12; Lik. 24:15) A ameha haholo. Mantsiboeeng ao a tla kopanong a kōpa hore e mong a mo rute e le hore a ka bona ngoana oa hae hape. Monna enoa le ba bang ba likete ba fumane tšepo ea ’nete.
LENANEO LE ATLEHILENG
Liphello li bontša kamoo lenaneo lena la ho ruta le hlahisang litšoaneleho tse hlahang seoelo—empa li hlokahala, bakeng sa lefatše la rōna. Lenaneo leka thusa batho ho fumana khotsofalo ea sebele. Motho e mong ea nang le ntlo ea baeti Cosenza, Italy, a re: “Ho hongata hoo re ka ithutang hona ho Lipaki tsa Jehovah. Tsela e ’ngoe feela ea ho thaba—nahana joaloka tsona.”
Ke hobane’ng ha u sa iphumanele hore na keletso ea monna eo e-ea utloahala? Tloaelana ka bouena le lenaneo lena la thuto la lichaba. Ha ho tefello ’me u tla fumana ho hongata, matla a ho loana ka katleho le “linnete tsa bophelo.”
[Lebokose le leqepheng la 10, 11, 12]
HO NE HO RUTOA ENG?
LEBAKA LA HO IPHETETSA HA MOLIMO O LERATO
Ke hobane Molimo o rata ho loka ’me o hloile bokhopo. (Pes. 11.5-7) Lebitso la hae le leholo le merero li lokela ho tumisoa. Ha a iphetetsa haufinyane, Molimo o tla hloekisa lefatšeng la rōna litšila tsohle ’me a nolofaletse batho ba lopolotsoeng ho ea phethehong. Mahlo a foufetseng a tla tutubulloa, litsebe tse thibaneng li thibolloe. Bophelo bo hlasimolohileng e be ba bohle.
HO TŠEPAHALA ’MUSONG OA MOLIMO
Qeto e latelang e ile ea amoheloa ke baromuoa ba limillione ba neng ba le teng: “Ho ke ho etsoe qeto ea hore re tiisa boiteko ba rōna ho bolela ka cheseho litaba tse molemo tsa ’Muso hammoho le ho bolela ka sebete molaetsa oa Molimo oa kahlolo ka nako e lumelletsoeng ke Molimo. Re tla tsoela pele ho tšepahala ka moea ’ohle ’musong oa Molimo le ho loanela ho ba bafo ba tšepahalang ba oona.”
BACHA BA HLOEA BOBE
Ho sebeletsa Jehova e tlameha ho ba qeto ea pelo, hobane, ha ho talimanoe le teko ea boitšoaro bo bobe, ba bangata ba ’nile ba re: “Kelello ea ka ea ’na ea re ‘Che! Che! Che!’ empa pelo ea ka ea ’na ea re ‘E! E! E!’ Empa mocha e mong ea ileng a hlōla bofokoli bo boholo ba boitšoaro a bolela kamoo: “Neng le neng ha ke ne ke talimane le takatso e matla ea boitšoaro bo bobe ba likamano tsa botona le botšehali, ke ne ke ipolella ka ho pheta-pheta, ‘Jehova o ho hloile joale le ’na ke ho hloile.’”
RUTA BANA KA HO LOKA
Ho rata Molimo ha ho futsoe. Batsoali ba ke ke ba otla bana ba bona feela ka linako tse ling, empa hape ba ba rutele ho lokeng. Hona ho hloka ho beelana mabaka le ngoana, u mo bontša phello e mpe ea boikutlo bo fosahetseng.
BOHLOKOA BA LERATO LE ITETSENG
Lerato le itetseng, le kang le bontšitsoeng ke Jesu, ke “letšoao” le khethollang Bokreste. (Joh. 13:35) Lerato lena le ile la hloka Jesu ho hongata—ho akarelletsa lefu le bohloko. Ho ba ha rōna barutuoa ba sebele ho bolela ho ratana joalokaha Jesu a re ratile.
HO MAMELLANA KA LERATO
Pontšong ea lenaneo, mosali oa Mokreste ea neng a buisitsoe hampe ke e mong a tlameha ho etsa qeto hore na (1) o tla lebala taba eo feela, kapa (2) a sebelise motheo o ho Mattheu 5:23, 24 ’me a leke ho bōpa khotso. A latela tsela ea bobeli, le hoja a ne a sa etsa phoso ea letho ho ngoan’abo moeeng. Ke boithaopo bona ba ho latela keletso ea Bibele—ho ikokobetsa le ho batla khotso—bo re nolofaletsang ho mamellana.
HO TŠEPAHALA BOITŠOARONG
Ho sa tsotellehe hore na ho roba molao oa Molimo ka motsotsoana ekaba ho monate hakae, re ’ne re ipolelle hore ho hang ha hoa tšoaneleha. Pelo ea thetsa ’me e ka bula menyetla hangata. (Jer. 17:9) Haeba moapostola Pauluse a ne a tlameha ho ‘na a loana le litšekamelo tsa hae tsa nama, na re ka ikhotsofatsa ka ho etsa ho honyenyane ho moo? Re tlameha ho ’na re leka. Ha re khaotsa, re lahlehile!
MOLIMO O HLOILE HLALO
Ba bang ba ’nile ba loha mano a ho hlala balekane ba bona ba nyalana le ba bang, le haeba ho bolela ho khaoloa phuthehong ea Bokreste. Leha ho le joalo, batho bana ba se lebale hore le haeba phutheho e ka ba khutlisetsa, Molimo, o tsebang pelo le maemo ’ohle, ke eena Moahloli oa ho qetela.—Ba-Heb. 13:4.
U SE NYELISE LINTHO TSE HALALELANG
Jakobo a etsisa tumelo ea ntat’ae moholo Abrahama, eo, ka taelo ea Molimo, a ileng a leka ho nyehela mora oa hae Isaaka e le sehlabelo. Esau, ngoan’abo Jakobo, a nyelisa lintho tse halalelang ka ho rekisa tokelo ea hae ea tsoalo bakeng sa lijo. A etelletsa lithahasello tsa hae pele ho tsa Molimo. Na re haha bophelo ba rōna ho potoloha kamanong ea rōna e halalelang le Molimo kapa e hlile e nka sebaka sa bobeli? Ha ho ea ratang ho inahana e le Esau, empa haeba Jehova a mo nahana a le joalo, na o tla fumana moputso o tšepisitsoeng?
JEHOVA O TLA LEBELA TSELA EA BA TŠEPAHALANG BA HAE
Ba ’maloa kajeno ba khopehile ka baka la ho se phethahale ha barupeli ba bang ba etellang pele ba kopanelang le phutheho. Teko ea mofuta oo ea etsahala mehleng ea Morena Davida. Ho sa tsotellehe liphoso tsa hae, tseo a ileng a li bakela ka boikokobetso, a lula e le motlotsuoa oa Molimo. Ba sebetsaneng le Davida ka botšepehi ba putsoa; ba sa tšepahalang ba tlosoa mohaung oa Molimo. Ke habohlokoa hakaakang hore re se lebale hore na ke phutheho efe e sebelisoang ke Molimo kajeno le bohlokoa ba botšepehi bo tlohang pelong!
NTOA HASE EA LŌNA, EMPA EA MOLIMO
Ho na le lira tse batlang ho timetsa Lipaki tsa Jehova e le batho. Empa re ka ba le tšepo e kang eo Morena Josafate a bileng le eona, eena ea ileng a lebella tšireletso ea Molimo ho lira tsa hae tse neng li tšosa ka ho timetsa sechaba sa hae. Sechaba sa lopolloa hobane morena a ile a tiisa hore melao ea Molimo ea tsejoa ’me ea utluoa ke batho. Kahoo kajeno, haeba re sebelisa borapeli ba ’nete litseleng tsohle tsa rōna ’me re boloka liphutheho tsa rōna li hloekile boitšoarong ka ho sebelisa melao ea Molimo, re tla sireletsoa ke Molimo ’me haufi re tla o bona o re lopolla ho lira tsa rōna ka ho sa feleng.
[Lebokose le leqepheng la 14]
BAETI BA MOHLOLO BA TSOANG CUBA—BATŠEPEHI
“Har’a lihlopha tse tsebahalitsoeng haholo . . . tse fihlileng Linaheng tse Kopaneng tsa Amerika seketsoaneng se neng se tsoa Cuba,” kamoo ho tlalehang York (Nebraska) News Times, “ke sehlopha se seng se sa tsebahatsoang haholo seo bonokoane feela ba sona e leng hore se tsoela pele ho rapela Molimo ka tsela ea sona ho sa tsotellehe ’nete ea hore ke sehlopha se ntšitsoeng molaong.”
Tse ngata ho Lipaki tsena tse lelekiloeng Cuba Ii ne li le teng Likopanong tsa “Lerato la Molimo” Linaheng tse Kopaneng tsa Amerika. Tsa bolela ka mahloriso ao li a mamelletseng Cuba. Ka mohlala, barali ba babeli ba Paki, ha ba sa le Cuba ba hana ho kopanela moketeng oa bosechaba. Ba tšosoa ka lefu. Ba bolelloa hore ba furalle lesole le nkileng mochine-kane le hore ba tla thunngoa. Banana ba furalla ka bonolo ’me ba lebella ho shoa. Thoa! sethunya se ne se se na letho. Ba boholong ba hlokomela hore le tšoso ea lefu e ke ke ea senya tumelo ea bona, eaba baa ba lokolla.
Mobalehi e mong, Miriam, a oeloa ke mapolesa a Cuba ka 3 ka meso. Eena le monna oa hae joale ba ne ba fuoe hora e le ’ngoe hore ba itokisetse ho tsoa ka har’a naha. Nakoana kamor’a moo, ha ba le seketsoaneng se tletseng haholo se eang Linaheng tse Kopaneng tsa Amerika, ba tobana le sefefo se matla. Liketsoana tse ling tse haufi tsa teba. Miriam le bana ba hae ba ne ba lutse haufi le ’molai e mong ea ahlotsoeng. Miriam a rapella tšireletso ea Jehova ka lentsoe le phahamileng. Qetellong, a khaleha. Hoseng ka le latelang ’molai a mo tsosa ’me a re: “Ho bonahala eka lithapelo tsa hao li arabetsoe. Linaha tse Kopaneng tsa Amerika ke tsane.”
Tumelo ea Lipaki tsena tsa Cuba e bile tšusumetso ho bohle ba neng ba mametse.
[Setšoantšo se leqepheng la 9]
Libuka tse sebelisoang lenaneong la ho ruta tse bontšitsoeng Osaka, Japane
[Setšoantšo se leqepheng la 11]
LITŠOANTŠISO TSA BIBELE
[Setšoantšo se leqepheng la 13]
“Le rōna re ka thusa ho fana ka libuka!” ke moea oa bana bana ba fumaneng molemo thutong ea Bibele