Ho Nyarela ka Litabeng

Moprista o Babatsa Lipaki

● A ngola ho “Herald Citizen” ea K’hatholike ea Madison, Wisconsin, moprista Andrew Breines o buile tjena kamor’a hore ba babeli ho Lipaki tsa Jehova ba mo etele tlung ea hae. “Ka mehla ke ’nile ka khahloa ke cheseho ea [Lipaki tsa Jehova]. Ho sa tsotellehe hore na ba sa tsoa kopanela le mokhatlo haufi hakae, kapele ba qalisa ho eta ka ntlo le ntlo ho jala ‘Litaba tse molemo.’” Moruti a hlokomela hore “Ii etelletsa pele mosebetsi oa Molimo ka pele ho lithahasello tsa tsona le boiketlo. Molimo o nkile sebaka sa pele bophelong ba tsona.” A botsa: “Kea ipotsa hore na ke ba bakae ho rōna [Mak’hatholike] . . . ba ka itekanyang le cheseho ea tsona e sa khathaleng ea ho bolela evangeli. Li ea ka ntlo le ntlo hobane li amohetse pitso ea Molimo e seng feela bakeng sa ho bolokeha ha tsona empa hape le bakeng sa ho arolelana ‘litaba tse Molemo’ le ba bang.”

A ithuta hore e mong oa Lipaki tsena tse chakileng e ne e le Mok’hatholike pele ’me e mong e ne e le Molutere, moprista a ba botsa hore na ke hobane’ng ha e bile Lipaki tsa Jehova. “Ba arabela hore ke ka ho tseba ‘’nete.’ Kahoo ba bolela ho tseba Jesu Kreste ka botho ka tumelo le ho bala Bibele ka thapelo.” Joale moprista a hlalosa: “Hoba baeti ba ka ba tsamaee, ka ipotsa hore na rōna, bolumeling bo boholo, na hangata ha re bee sebakeng—lisakaramente le mananeo bakeng sa ho etsa mosebetsi oa Molimo oa ho bolela evangeli.” Empa ha ho letho le ka emang sebakeng kannete bakeng sa ho bolela evangeli, kaha hona e ne e le karolo ea taelo ea Jesu ho ba neng ba tla mo latela.—Matt. 10:7, 11-13; 24:14; 28:19, 20; Lik. 20:20.

Ho Ntša Mpa Sebe se Senyenyane?

● Linnete tse ling tse sisimosang ka ho ntšoa ha limpa li ile tsa senoloa ke mohlalefi oa Lenyesemane Colin Francome tlhahlobong ea lilemo tse peli ea metebo ea booki ea ho ntša limpa ea Boston, Massachusetts, le Long Island, New York. “Palo e ’ngoe e hlollang e senotsoeng ke boithuto ke hore 66% ea bakuli ba ntšang limpa motebong oa Boston ke Mak’hatholike, ha kakaretso ea baahi ba Boston e le Mak’hatholike a 35% feela,” kamoo a boletseng. Empa mohlomong tšenolo e hlollang haholo ea boithuto ke hore bakuli ba bangata ke basali ba sa nyaloang ba Mak’hatholike ba lumelang hore ho ntšoa ha mpa ke sebe se senyenyane ho tse peli. Hobane’ng? Tumelong ea bona, ba bea lebaka la hore ho ka ba molemo ho ntša mpa, kamoo boithuto bo hlalositseng, ho feta “ho pheta-pheta sebe ka ho sebelisa taolo ea tsoalo ea bana”!

Ho totobetse hore maikutlo a sekameng ka sebe a kentsoe ho batho ke kereke e etsang khang ea tona ka ho laoloa ha tsoalo ea bana—ntho e bileng e sa boleloeng le ka ho toba ka Bibeleng—joalokaha e etsa ka ho bolaea lesea le ka popelong, e leng hoo e ho hanelang ka ho tobileng. Ho sa le joalo, ho se ke beng ho hlokomeloe ha ho tlatsoa lerata ka ho laoloa ha tsoalo ea bana ke sebe sa bofebe se hlahisang ngoana ea sa batloeng.—Ex. 20:13; 21:22, 23; 1 Ba-Kor. 6:9, 10.

“Linohe li Fosa Kamehla”

● Batho ba limillione ba mamela mantsoe a boprofeta a linohe. Leha ho le joalo, Jack Mabley, mantsoeng a hae ao a a ngolletseng “Tribune” ea Chicago o itse: “Haeba u ka nka mantsoe a tsona ka ho teba ’me ua reka thepa e ngata kapa ua rekisa lintho tsa selivera ho ea ka mantsoe a tsona, ke hlahisa hore u etse ntho e fapaneng le eo li u laelang eona. Linohe li fosa kamehla.” Ha a qotsa seo a se hlokometseng lipolelong tsa tsona tse 62 tse ileng tsa hatisoa koranteng, Mabley o itse: “Ha ho polelo leha e le ’ngoe ho tseo tse 62 eo e bileng ’nete.”

Ka mohlala, senohe sa California se ile sa noha hore ka 1980 “phaello ea chelete e bolokiloeng e tla fokotseha ’me boemo ba moruo bo tla ntlafala.” Se fapaneng le mantsoe a sona se etsahetse. Linohe tse supileng li ile tsa noha hore Ted Kennedy o tla khethoa ho ba mookameli. Empa ha a ka a hlōla esita le hona mokheng oa hae. Senohe Jeanne Dixon se ile sa noha taba e latelang ka eo e neng e le mookameli, Jimmy Carter: “Kereke e ’ngoe e itseng e tla leka ho mo bolaea nakong ea lehoetla.” Hape senohe sena sa mosali se ile sa noha hore bohlasoa ba liketso tsa hae bo tla etsa hore a lahleheloe ke matona a hae a maholo. Empa leha e le ’ngoe ea lipolelo tsa sona ha ea ka ea etsahala.

Ha ho mantsoe a boprofeta ba batho, empa boprofeta bo bululetsoeng ba Molimo a phethahalang ka nepo ho se ho fosahala leha e le hofe. (Esa. 46:9-11; 2 Pet. 1:20, 21) Ka baka leo, Lentsoe la Molimo le tsoa lipolelo tsa bonohe tsa bohata.—Deut. 18:10-12.