Phutheho Efe—Ea Jehova Kapa ea Satane?

“Ikhetheleng kajeno eo le tla mo sebeletsa.”—Josh. 24:15.

1, 2. (a) Kajeno ho khethoa pakeng tsa lintho life tse peli, ’me ho potlakile hakae ho etsa qeto ka hona? (b) Lilemong tse fetileng tse makholo a leshome le metso e robong, ke qeto ea mang tabeng eo e neng e le ea bohlokoa bokahohleng, ’me eo a qeta joang?

KAJENO ho khethoa pakeng tsa liphutheho tse peli tse khōlō tse teng. Ka histori, hona ha se letho le lecha, empa kajeno ho potlakile ho feta leha e le neng pele hore ho khethoe ka mokhoa o nepahetseng. Lilemong tse fetileng tse likete tse peli, motho ea kileng a phela, eo qeto ea hae tabeng ena e neng e tla jara liphello tse khōlō haholo bakeng sa bokahohleng bohle, ho ile ha hlokahala hore le eena a khethe joalo.

² Lipaki tse peli tsa ’nete ena, bafuputsi ba babeli ba histori, Mattheu Levi, eo e neng e le molekhetho le ngaka Luka, ba re beela bopaki bo tiisang bonnete ba eona. Motho enoa ea kileng a phela eo mahlo a bokahohleng bohle a neng a mo shebile, ke Jesu Kreste oa Bochabela bo Hare. Mattheu Levi o re bolella hore Satane Diabolose “a ’montša mebuso eohle ea lefatše le khanya ea eona, a re ho eena: Ntho tseo kaofela ke tla u nea tsona, ha u ka oa ka mangole, ua nkhumamela.” Jesu ha a ka a hanyetsa Satane ha a re lefatše le nang le taolo ke la hae, empa ntle ho tika-tiko a lahla mpho ea Satane. (Matt. 4:8-10) Jesu a hana ho lahla phutheho eo a neng a se a le ho eona hore a iketse karolo ea phutheho ea Satane.

3. Tšenolong e eang ho moapostola Johanne, Satane Diabolose o ile a tšoantšetsoa joang, ’me phutheho ea hae e ne e entsoe ka eng?

³ Eo e neng e le motsoalle oa Jesu Kreste, Johanne, mor’a Zebedea, eo e neng e le motšoasi oa lihlapi, o ngotse buka eo hajoale e leng buka e qetellang Bibele. Bukeng ena sera, Satane Diabolose, o tšoantšoa le sebopuoa seo Johanne a neng a ke ke a iqapela sona kelellong ea hae. Kahoo tlas’a tšusumetso ea Molimo, Johanne o mo tšoantšoa le “drakone e kholo, e khubelu, e nang le lihloho tse supileng, le linaka tse leshome, le meqhaka e supileng lihlohong tsa eona.” (Tšen. 1:1, 9, 10; 12:3) Sebopuoa sena se entsoeng ka mokhoa ona o makatsang se bitsoa “drakone e kholo, . . . noha ea khale, e bitsoang Diabolose, le Satane.” Ak’u inahanele qetellong ea ntoa, u bona, maholimong a sa bonahaleng, kapa sebakeng sa moea, drakone ea tšoantšetso ‘e liheloa; e lahleloa ntle, e liheloa lefatšeng, le mangeloi a eona.’ (Tšen. 12:7-9) Mangeloi ao a bademona a ileng a loana ka lehlakoreng la Satane a bōpa phutheho ea hae ea moea.

4. (a) “Sebata” se nyolohang leoatleng, joalokaha se hlalosoa ho Tšenolo, khaolo ea 13, se tšoantša eng? (b) Boitšoaro ba batho ke bofe ka “sebata,” ’me ke hokae hona joang likelello tsa bona li tla otlolloa?

⁴ Satane Diabolose hape o na le karolo e bonahalang ea phutheho ea hae. Na rea e emela? Ho Tšenolo, khaolo ea 13, e tšoantšoa le sebata se nyolohang leoatleng. Lefatše la batho le itšoara joang mabapi le sebopuoa sena sa tšoantšetso? Mamela: “’Me drakone ea se fa matla a eona, le terone ea eona, le borena bo boholo. . . . ’me lefatše kaofela la makala ke sebata. Ba rapela drakone kahobane e neile sebata matla a eona, ba rapela le sebata, ba re: Ke mang ea lekanang le sebata, ’me ke mang ea ka tsebang ho loana le sona?” (Tšen. 13:2-4) Bao ba rapelang karolo e bonahalang ea lefatšeng ea phutheho ea Satane, likelello tsa bona li tla otlolloa, hobane, ho ea ka Tšenolo 19:11-21, Jesu Kreste ea tlotlisitsoeng o tla loana le “sebata” ka Harmagedone ’me o tla se timetsa.—Tšen. 16:14-16.

5. Ho flhlela ntoeng eo ea Harmagedone, ke tsamaiso efe ea lintho e ntseng e le teng?

⁵ Ho tla fihlela nakong eo, ho sa le joalo ka seo moapostola Pauluse a buang ka sona ho Ba-Efese 2:2, e le, “mokhoa oa lefatše lena, ho ea ka ’musi ea renang sebakeng, e leng moea o sebetsang joale bathong ba sa mameleng.” (Phet. e ncha) Hape, ho 2 Ba-Korinthe 4:4, Pauluse o re ‘molimo oa lefatše lena o ba foufalitse likelello, ke hore, ba sa lumelang.’ Ka sepheo sefe? “Ba tle ba se ke ba chabeloa ke leseli la Evangeli ea khanya ea Kreste, eo e leng setšoantšo sa Molimo.”

6. (a) Ho ea ka Ba-Efese 6:11-18, ke ntoa ea mofuta ofe e tlamang Bakreste? (b) Na hona ho bolela hore ha ho karolo e bonahalang ea phutheho ea Satane eo ho ka loanoang le eona?

⁶ Pauluse o pepesa phutheho e sa bonahaleng ea Diabolose ho Ba-Efese 6:12, moo re balang hore: “Ntoa ea rōna ha e loane le name le mali, empa e loana le baholo, le mebuso, le marena a lefifi la lefatše lena, le meea e bolotsana e sebakeng sa leholimo.” Mona Pauluse ha a latole hore ho na le karolo e bonahalang ea lefatšeng ea phutheho ea Satane. O mpa a re hopotsa feela hore rōna joaloka Bakreste ha re loane ntoa e mabifi khahlanong le mekha e bonahalang ea batho ea phutheho ea Satane e le hore re ka e liha. Jesu Kreste, ha a le nameng lefatšeng, ha a ka a leka ho liha phutheho ea Diabolose, leha e le hore balateli ba hae ba ka leka ho etsa joalo, hobane ka boiteko bo joalo ba ka senya nako ea bona ’me ba hlōloa. Ho hlokahala ba tsoele pele ka ntoa ea moea hore ba se etsoe karolo ea phutheho ea Satane, ’me bakeng sa hona ba lokela ho nka lihlomo le libetsa tseo Pauluse a li hlalosang ho Ba-Efese 6:11-18.

7. (a) ’Nete ea hore Satane o na le phutheho e fana ka maikutlo afe ka Molimo, hona hobane’ng? (b) Hona ho bontšitsoe joang papisong ea Jesu ka tšimo e ileng ea jalelloa ke sera sa mojali?

⁷ Ho ke ke ha latoloa hore Satane o na le phutheho e matla e nang le likarolo tse bonahalang le tse sa bonahaleng. Satane Diabolose ke nketsisane ka morero oa ho thetsa, ’me ’nete ea hore o na le phutheho, ha e le hantle, e fana ka maikutlo a hore, mohanyetsi oa hae e moholo, Jehova Molimo, le eena o na le phutheho. Kahoo Satane, nketsisane, o lahlile batho ba bangata hore ba nahane hore ba amohela ntho e nepahetseng, ba inkela eona le ho kopanela ho eona. (2 Ba-Kor. 11:13-15) Ak’u nahane ka setšoantšo sa Jesu sa koro le mofoka, kapa lehola, e le tšoantšetso ea sena. Ha mofoka, o qala ho hlaha, o ne o tšoana le koro hoo ho neng ho le kotsi qalong joalo hore, ho e-na le hore ho fotholoe mofoka o jetsoeng ke Diabolose, ho ne ho tla fotholoa le koro. (Matt. 13:24-30, 36-43) Jesu a hlalosa hore mofoka o tšoantšetsa “bana ba e mobe; sera se o jalileng ke Diabolose.”

8. Ho ea ka lengolo la pele la Johanne le la bobeli la Pauluse le eang ho Ba-Thessalonika, mofoka oo oa tšoantšetso o ne o tla emela eng?

⁸ Kotulong e etsoang hona joale ‘bofelong ba lefatše,’ mofoka oa tšoantšetso ke antikreste ea hlileng a boleloa. Lengolong la hae la pele, le ngotsoeng ho ea qetellong ea lekholo la pele la lilemo, moapostola Johanne a ngola: “Joale ka ha le utloile hobane antikreste o ea tla, le joale bo-antikreste ba bangata ba se ba hlahile; . . . Ea latolang Ntate le Mora ke eena e leng antikreste.” (1 Joh. 2:18, 22) Hona ho lumellana le seo moapostola Pauluse a se ngotseng hoo e ka bang lilemo tse 50 pelenyana ka letsatsi la Jehova. A re: “E ka khona ho etsahale koeneho pele, ’me ho hlahe motho eo oa sebe, mor’a tahleho.” Koana, Pauluse o ne a sa bue ka motho ea itseng, hobane o ile a boela a re: “Sephiri sa bokhopo se se se sebetseha; . . . eo ho tla ha hae ho leng ka tšebetso ea Satane, ka matla ’ohle, le ka lipontšo, le ka mehlolo ea bohata, le ka thetso eohle ea bokhopo ho ba timelang; hobane ha ba ka ba amohela lerato la ho rata ’nete, ba tle ba bolokehe.”—2 Ba-Thess. 2:3, 7-10.

9. (a) “Sephiri sa bokhopo” se ema e le mosebetsi oa Satane joang? (b) Bojakane bo ema joang e le karolo ea Babylona e Moholo?

⁹ Ka mantsoe ao ho totobetse hore antikreste, motho eo oa mokoenehi, oa moetsalibe, ke mosebetsi o moholo oa Satane o entsoeng phutheho. Ke boikhakanyo ba tsamaiso ea Bokreste, ke kahoo e leng mohanyetsi oa bona. O nkile sebaka sa Bokreste ba ’nete bo nang le tsamaiso, ’me o iphumana kajeno e le Bojakane, bo ipolelang hore ke ’muso oa Bokreste. Ruri lebitso leo ke la thetso, hobane ha e le hantle Bojakane ke karolo e matla haholo ea Babylona e Moholo, ’muso oa lefatše oa bolumeli ba bohata, tlas’a borena ba Satane Diabolose.

10. Leseling la mantsoe a Johanne le Pauluse, hantle-ntle Bojakane ke eng kajeno, ’me phutheho e ’ngoe le e ’ngoe eo e leng setho sa bona e ipolela hore e seng?

¹⁰ Leseling la se boletsoeng ke baapostola Pauluse le Johanne, Bojakane bo khelohile phuthehong ea pele ea ’nete ea Jesu Kreste, ruri bo koenehile ho eona, e, ba e fetohela. Ho fapana le phutheho ea lekholong la pele la lilemo ea Bokreste, Bojakane kajeno bo na le liphutheho tse fetang sekete tsa bolumeli, e ’ngoe le e ’ngoe e ipolela hore ke ea Bokreste, ’muelli oa Bokreste ba Bibele.

LEBITSO LA EONA?

11. Hoo e ka bang lilemong tse fetileng tse lekholo, bahatisi ba makasine ea Watch Tower ba ile ba ikhethela ho bitsoa ka lebitso lefe?

¹¹ Ka liphutheho tseo tse arohaneng tsa Bojakane, tokollo ea makasine ea Watch Tower ea Tlhakola 1884 (hoo e ka bang lilemong tse fetileng tse lekholo) e buile se latelang tlas’a sehlooho “Lebitso la Rōna”:

“Babali ba bacha likarolong tsohle tsa naha ba botsa nako le nako: Le ipitsa ka lebitso lefe? Le ‘Babaptisi ba Khale’? Le ‘Baromuoa ba Babaptisi’? Le ‘ba Bokahohleng’? Le ‘Masabbatha’? Le ‘Mamethodiste a Khale’? jj. Ka makhetlo a mangata re lekile ho hlakisa boemo ba rōna, ’me re sa leka ho etsa joalo hape ka mantsoe a seng makae.

“Ha re ba phutheho leha e le efe ea lefatše; kahoo, leha le ka bolela letoto kaofela la lihlopha, re tla arabela ka, Che, ho se seng le se seng le ho tsona kaofela. Re itšoarelletse feela ka phutheho ea leholimo—‘ea bao mabitso a bona a ngotsoeng leholimong.’ (Ba-Heb. 12:23; Luka 10:20) Bahalaleli bohle ba phelang hona joale, kapa ba phetseng mehleng ena, e ne e le ba PHUTHEHO EA KEREKE EA RŌNA: bao ke Kereke e le ’NGOE, ’me HA HO e ’ngoe e hlokomeloang ke Morena. Kahoo phutheho efe kapa efe ea lefatšeng e kenakenanang leha e le hanyenyane hakae le kopano ena ea bahalaleli e hanana le lithuto tsa Mangolo ’me e hanyetsa thato ea Morena—‘ba tle ba be BANG.’ (Joh. 17:11.)”

12. Ba bontša hore litho tse khethiloeng le tse kolobelitsoeng tsa phutheho ea Bokreste ke karolo ea phutheho ea Molimo, tokollo ea Watch Tower ea Tlhakubele 1883 e ile ea re’ng?

¹² E bontša hore litho tse khethiloeng le tse kolobelitsoeng tsa kereke, kapa phutheho e tsoetsoeng ka moea, li kopanong le karolo ea phutheho e sa bonahaleng ea Molimo, tokollo ea Watch Tower ea Tlhakubele 1883, leqephe la 6, ea bolela se latelang:

“Empa, le hoja ho le thata ho motho oa nama hore a ka bona phutheho ea rōna, kaha a ke ke a utloisisa lintho tsa moea oa Molimo, re na le tšepo ea hore u tla bona hore Kereke ea ’nete e hlophisitsoe ka mokhoa o sebetsehang haholo le taolo e sebetsang ka ho fetisisa. . . .

“Ho hlokomela phutheho ena, ea Moea, e sa lakatseng ho hahlameloa ke eng kapa eng ea lefatše, ke mang ea ke keng a e bona kapa a e utloisisa, re hlile re ikemiselitse ho jara sekhobo sa batho ba khethehileng . . .

“Tumelo ea rōna ho Molaoli oa rōna ke e tiileng, ’me phutheho ena e phethahetseng, e sa bonahaleng lefatšeng e macha ho ea tlhōlong e tiileng le e khanyang.”

13. (a) Ka 1904 Watch Tower Society e ile ea hatisa buka efe, ’me sehlooho sa eona se ne se theiloe mangolong afe? (b) Sehlooho sa Thuto V sa buka e ne le sefe, ’me, ka sena, se ne se re’ng, ka karolo feela?

¹³ Selemong sa 1904 Watch Tower Bible And Tract Society e ile ea hatisa buka e reng “The New Creation.” Sehlooho sa buka ena se theiloe temaneng tse latelang tsa Bibele: “Ka baka leo, motho ha a le ho Kreste, ke ’mōpuoa e mocha; tsa khale li fetile, bonang, tsohle li nchafetse.” (2 Ba-Kor. 5:17) “Hobane ho Jesu Kreste ho bolla le boqai hase letho, empa eo e leng taba ke hore motho e be ’mōpuoa e mocha.” (Ba-Gal. 6:15) Thuto V ea Moqolo 6 oa Studies in the Scriptures, leqephe 195, e qala ka hore: “Kaha ’Mopuoa e Mocha a ke ke a fihla phethehong ho fihlela Tsohong ea Pele, ke ka nako eo feela phutheho ea hae e phethahalang. Seemo sa tempele se tšoantšetsa sena: e le majoe a phelang re bitsitsoe joale, kapa re memiloe ho nka libaka tempeleng e khanyang, ’me, joalokaha moapostola a hlalosa (1 Pet. 2:5), re tla ho Jesu eo, joaloka moemeli oa Ntate, a re bōpang, a re betlang, a re kenyang hantle sebakeng le ho re hloekisa bakeng sa libaka Tempeleng e khanyang ea nakong e tlang—mateanong a libaka pakeng tsa Molimo le lefatše.” Ka ho loketseng, sehlooho sa Thuto eo kapa Khaolo V ke “The Organization of the New Creation.”

14. (a) Liphihlelo tsa Ntoa ea I ea Lefatše li ile tsa ama ba tsoileng ho Babylona e Moholo le ho ikopanya le Watch Tower Society joang? (b) Ke polelo efe e amanang le puisano ena e ileng ea hlahella?

¹⁴ Hona ho bontša kamoo batho ba neng ba tsoile ho Babylona e Moholo ’me ba ikopantse le Watch Tower Bible and Tract Society ba neng ba talima litaba kateng pele ho Ntoa ea I ea Lefatše ka 1914. Kamor’a liphihlelo tsa bona tse boima nakong ea khohlano eo ea lefatše, litho tse tšepahalang tsa “mōpuoa e mocha” oa Molimo tsa iphumana li sa utloane le Babylona e Moholo ho feta pele. Temohisiso ea bona boprofeteng bo bongata ba Bibele bo neng bo tla phethahala ho tloha ka 1914 ea chorisoa. Kopano ea kamor’a ntoa ea bona ba le makholo a mangata ea tšoareloa Cedar Point, Ohio, U.S.A., ka la 1-8 Loetse, 1919, ’me ba qala ho lemoha litšobotsi tsa mosebetsi oa Molimo tseo e neng e le hona li tla tla. Mantsoe “Phutheho ea Molimo” a etella pele!

15. (a) Kopanong ea bobeli ea Cedar Point, puo e khōlō ea “Letsatsi” e ne e sebetsana le boprofeta bofe ka ho khetheha? (b) Puong eo, ho ile ha bapisoa liphutheho life tse peli tse sebetsang?

¹⁵ Ka Loetse 1922, ha tšoaroa Kopano ea babeli Cedar Point, Ohio. Ka Labohlano, la la 8 Loetse, leo sehlooho sa lona se neng se re “Letsatsi,” J. F. Rutherford, ka nako eo e le mookameli oa Watch Tower Bible and Tract Society, a fana ka puo ea hae e matla e neng e theiloe ho Mattheu 4:17, “’Muso oa maholimo o atametse.” A bua halelele ka boprofeta ba Esaia, khaolo ea 6, tšebelisong ea bona e nakong. Mantsoe a hae a tobileng ka phutheho ea sera a lokeloa ke ho hatisoa hape:

“Jehova, ’musi e moholo oa bokahohle, eo puso eohle e leng tlas’a hae ka tokelo, o ile a lokisetsa ho lopolloa le ho lokolloa ha moloko oa motho ’me kahoo a hlophisa sechaba sa Iseraele ho tšoantša ho joalo. Ka sechaba seo a hlophisa bolumeli ba ’nete, a se laela hore se mo rapele e le eena feela Molimo oa ’nete. Satane, mohanyetsi, Molimo oa nketsisane, a hlophisa har’a batho ba potileng Iseraele bolumeli ba bohata, ’me a etsa hore ba rapele eena le bo-diabolose ba bang. Matla ao Jehova a a sebelisang holim’a batho ba hae ke moea o halalelang. Matla a momahanyang balateli ba Satane le eena ke moea o mobe. Ka baka la ho ineela manong Iseraele ea fumanoa ke eena. Molimo oa bolela taelo e ahlolang sechaba, ’me oa tiisa taelo eo ka 606 B.C.: ’me moo Satane a fetoha molimo oa lefatše lena. Hape o bitsoa khosana ea ’muso oa moeeng, kahoo a bontša phutheho ea hae e bonahalang le e sa bonahaleng. . . .

“Mahosana a lichelete le babusi ba matla ba lefatše ba bōkana Paris bakeng sa seboka sa khotso, ’me baruti ba Bojakane ba ikopanya le bona; ’me phello ea e-ba ho hlahisoa ha Selekane sa Lichaba, boiteko ba ho qetela ba Diabolose ho bea ho hong sebakeng sa ’muso oa Messia. Bojakane hona joale ha boa ka ba etsa setsoalle le bahoebi ba baholo ba lefatše le lipolotiki feela, empa ba ikhantša ka ’nete eo; ’me kereke ka lebitso (eo joale e leng karolo ea phutheho ea diabolose, e se na matla a ho sebeletsa setulong sa boprista) ea chesa libano. . . .

“. . . Empa na baeta-pele ba bolumeli ba tšehelitseng phutheho ea diabolose le mehlape ea bona ba tla utloa? Moprofeta oa Morena oa arabela: “Utloang, ’me le ke ke la utloisisa; le bone, empa le ke ke la bontšisa. . . .’”

16. Sebui se ile sa phahamisa puo ea sona ka sehlooho sefe ka ’muso oa Molimo ka Kreste?

¹⁶ Tumellanong le temana ena ea sehlooho e buang ka ’muso oa Molimo ka Kreste, J. F. Rutherford a phahamisa puo ea hae e susumetsang ka hore a re:

“Bolelang molaetsa hole le ka bophara. Lefatše le tlameha ho tseba hore Jehova ke Molimo le hore Jesu Kreste ke Morena oa marena le ’Musi oa babusi. Lena ke letsatsi har’a matsatsi. Bonang, Morena oa busa! Ke lōna ba tsebahatsang litaba tsa hae. Ka baka leo tsebahatsang, tsebahatsang, tsebahatsang, Morena le ’muso oa hae.”—The Watch Tower, November 1, 1922, maqephe 331-337.

17. Ka baka la taolo e ntle ea tšimo, ho tloha ka 1922, ho felletse ka eng ho sa tsotellehe keketseho ea baahi ho tloha ka nako eo, ’me kahoo Lipaki tsa Jehova ke lipaki tsa eng?

¹⁷ Tokollong ea eona ea la 15 Tšitoe, 1922, tlas’a sehlohoana se reng “Taolo ea Tšimo,” The Watch Tower ea re tlalehong ea eona ea selemo: “Mokhoa o molemo oo bopaki bo tla neelanoa ka oona o hlile o itšetlehile haholo ka boiteko bo laotsoeng bo etsoang tšimong.” (Leqephe 389) Ho tloha selemong seo sa pelenyana kamor’a ntoa (1922) baahi ba lefatše ba eketsehile ka limillione tse likete tse peli. Batsebahatsi ba Morena ea khethiloeng ke Jehova le ’muso oa hae oa Messia le bona ba eketsehile. Leseling la bopaki bo matla boo bana ba faneng ka bona ho tla fihlela joale, lipaki tse ineetseng le tse kolobelitsoeng tsa Jehova li beile bopaki bo ke keng ba hlakoloa hore na li eme hokae tsekong e khōlō ea mehleng, “Phutheho efe, ea Jehova kapa ea Satane?”

[Setšoantšo se leqepheng la 13]

Jesu Kreste ea tlotlisitsoeng, le makhotla a hae a laolehileng a mangeloi, a tla timetsa “sebata” ka Harmagedone