Ho Patoa Letsatsing la Bohale ba Jehova

“Batlang Jehova, batlang ho loka, le batle boikokobetso; ekaba le ka tšoha le patoa tsatsing la bohale ba Jehova.”—Sof. 2:3.

1. Lebitso la Sofonia le boprofeta ke tsa khahleho efe kajeno?

‘EA PATILOENG ke Jehova’—ke mohopolo o potelletseng ka lebitso la moprofeta oa Molimo Sofonia, e leng lebitso le bolelang “Jehova o patile.” Na ke takatso ea hao hore u patoe ke Jehova? Ho lokela ho ba joalo, kaha lefatše la kajeno le ntse le tebela tlase haholo tsielehong le ho felloeng ke tšepo. Ho se hose hokae Molimo o lokileng Jehova, a ke ke a hlola a lumella maemo a joalo hore a tšoarelle. Letsatsi la hae la Harmagedone le haufi. Bohle re lokela ho thahasella ka botebo boprofeta ba Sofonia, kaha bo bua haholo ka letsatsi leo la qeto. Le bontša kamoo re ka fumanang sebaka sa tširelo, e le hore re ‘ka patoa ke Jehova.’

2. Ke hobane’ng ha ho hang boprofeta bo se bonyenyane ka matla a bona?

² Sofonia o profetile qalehong ea puso ea Morena Josiase oa Juda, e qalileng ka 659 B.C.E., ’me, kahoo, hoo e ka bang lilemo tse 50 pele Juda le Jerusalema li etsoa lesupi. Ka baka la bokhutšoanyane ba boprofeta ba hae, hangata Sofonia o bitsoa e mong oa “Baprofeta ba Banyenyane,” empa matla a boprofeta ba hae ho hang ha a manyenyane. Mehleng ea Sofonia bo ne bo jere molaetsa oa Molimo o neng o ke ke oa hlokomolohuoa. Ka ho tšoanang, bo bona ho tla fihla lekholong la rōna la bo 20 la lilemo ka temoso e matla e tlamehang ho mameloa ke batho bohle ba nang le tšepo ea ho fumana tšireletseho letsatsing le ke keng la qojoa la bohale bo tukang ba Jehova. Ke karolo ea ‘lentsoe la boprofeta’ le matla la Jehova leo moapostola Petrose a le tšoantšang le “lebone le bonesitseng nqalong e lefifi.”—2 Pet. 1:19; bona hape Ba-Roma 15:4.

3. (a) Ho profeta ha Sofonia ho ile ha tlisa molemo oa kapele joang? (b) Ke hobane’ng ha hona ho ne ho ke ke ha tšoarella?

³ Sofonia, kamoo ho bonahalang, e ne e le setloho-tloholoana sa Morena Ezekiase ea tšepahalang. E le moprofeta ea amanang le borena, o ne a tlameha ho ba sebete ka sebele ho bolela likahlolo tse tukang tsa Jehova khahlanong le mahosana a Juda. (Sof. 1:1, 8) Ho profeta ha hae ho bonahala ho bile le liphello tse phelisang mehleng ea Morena Josiase e monyenyane, ea ileng a hloekisa naha bolumeling ba bohata ’me a tsejoa ka “liketso tsa hae tsa borapeli tsa ho ea ka tse ngoliloeng molaong oa Jehova.” (2 Likron. 34:3, 14, 19, 33; 35:26) Ka baka leo, Jehova o ile a lieha ka nakoana ho phethahatsa kahlolo. Leha ho le joalo, tsela ea ho loka ea Josiase ha e-ea ka ea tlosa bokhopo bo neng bo kopetse batho ba hae, leha e le hore e kile ea phekola libe tsa ntat’ae moholo Manasse, ea neng a “tlatsitse Jerusalema ka mali a se nang molato.” (2 Mar. 24:3, 4) Letsatsi la Jehova la ho lokisa litaba le ne le le haufi.

“HO BOLELA JEHOVA”

4. (a) Boprofeta bo qala ka polelo efe e etsang qeto? (b) Ho tšoaea motso oa likhathatso tsa Juda e le eng, hona joang?

⁴ Ka Sofonia, Jehova a hlakisa hore o tla felisa bokhopo. Boprofeta bo qala ka mantsoe:

“Ke ea tlosa, ke tlosetse ruri tsohle tse holim’a lefatše, ho bolela Jehova.”

Bo ne bo tla fotholoa ka metso, ho fotholoa ha lintho tsohle tse manyala mahlong a Jehova. “Ho bolela” hona ho ne ho tobile taba ho bontšeng se neng se potelletse ka likhathatso tsa Juda—bolumeli ba bohata. Hobane Jehova o ile a tsoela pele a re:

“Ke tla otlollela letsoho la ka holim’a Juda le holim’a baahi bohle ba Jerusalema, ke tle ke timeletse nqalong eo masala ’ohe, a Baale, lebitso la baruti ba litšoantšo hammoho le baprista; le ba khumamang holim’a matlo pel’a lekhotla la leholimo, le bakhumami ba anang ka Jehova, ba anang le ka morena oa bona; le ba furaletseng Jehova, le ba sa batleng Jehova, ba sa mo hlokomeleng.”—Sof. 1:2-6.

5. (a) Ke hobane’ng ha borapeli ba Baale bo ne bo se na sebaka har’a batho ba Molimo? (b) Bo ne bo akarelletsa mekhoa efe e nyonyehang?

⁵ Ke bokhopo bo bokaakang! Bajudea bao ba ne ba lahlile borapeli bo hloekileng ba Jehova ho latela Baale ea lichaba tse ba potolohileng. Borapeli ba Baale—ka mahlabelo a bona a batho, bootsoa ba bona litšebeletsong, ho rapela ha bona litšoantšo tse sa tsebeng ho bua le lithapelo tse etselitsoeng kemiso tsa bona bakeng sa nala ea lintho tse bonahalang—li ne li se na sebaka se li loketseng har’a barapeli ba Jehova. (Num. 25:1-5; Jer. 7:30, 31; 11:17; 19:3-5) Borapeli bo fosahetseng bo ne bo ba kentse mekhoeng ea mefuta eohle e fosahetseng. Baprista ba Juda ba ne ba tlotse Molao oa Pele ka ho latela botsoalle le baprista ba “melimo esele.” (Ex. 20:2, 3) Ba latela mohlala o mobe oa Morena Manasse, ba rapela “makhotla a leholimo” ’me ba batla tataiso ho linohe. (2 Likron. 33:1-6) Tumellanong le boithetso ba hore ‘molemo o teng bolumeling bo bong le bo bong,’ ba ne ba lekanya molimo oa bona oa setšoantšo “Malcam” le Jehova. Ka baka la ho suthela thoko le Molimo o phelang Jehova, ba ne ba e-na le “pelo e mpe ea ho se lumele.”—Ba-Heb. 3:12.

6. Ke ho nyalana hofe hoo re ho fumanang pakeng tsa mekhoa ea Juda le ea Bojakane kajeno?

⁶ Na ho na le phapang ea letho Bojakaneng kajeno? Lichaba tsa Bojakane li sa jere molato o moholo oa mali, ka baka la bophelo ba ba limillione bo entsoeng mahlabelo aletareng ea ntoa lekholong lena la lilemo. Baruti ba Bojakane ka mahlakoreng a mabeli ba tšehetsa lintoa tseo, ’me molato oa bona oa mali o eme. (Bapisa Jeremia 2:34, 35.) Joalokaha Bajudea ba ile ba kena boitšoarong bo bobe ba likamano tsa botona le botšehali ka mekhoa eohle, kahoo re fumana batho ba Bojakane kajeno ba kene likamanong tsa botona le botšehali tsa pele ho lenyalo, bootsoa, ho fapanyetsana basali, tlhalano, bosodoma le tse joalo, ha baruti ba bangata ba iphapantse kapa ba bile ba khothalletsa liketso tse joalo. Hoo ho hanana hakaakang le melao ea Bibele!—1 Ba-Kor. 6:9, 10; Ba-Heb. 13:4.

7. (a) Kajeno, ke ho tšoana hofe hoo re ho fumanang tšebeletsong ea meea le tumelo e kopaneloang tse neng li etsoa ke Bajudea ba koenehileng? (b) Ntlheng ena, ke keletso efe e nakong e fumanoang ka lentsoeng la Molimo?

⁷ Bolepi, bonohe, litšebeletso tsa meea—le tsona li na le sebaka har’a ba ipolelang hore ke Bakreste. Tlas’a boikaketsi ba hore ‘litumelo kaofela li isa sepheong se le seng,’ ho kopanetsoe tumelo haholo Bojakaneng kajeno. Litumela-khoela tsa bolumeli ba bohata li tsoakoa le Bibele. Kahoo, bakeng sa ho utloa molao oa Jesu oa ho boloka hang selemong se seng le se seng Sehopotso sa lefu la hae, Bojakane bo phahamisa “Easter,” e rehelletsoeng ka molimo oa mosali oa lerato la nama, Ashtarothe (Astarte, ka Segerike), ho kenyelletsoa litšebeletso tsa kemolo le lipontšo, tse kang lipela le mahe a “Easter.” Mang le mang ea ileng a ameha mekhoeng e joalo ke hantle ha a latela keletso e ntle ea 1 Samuele 7:3: “Ha le sokolohela ho Jehova ka lipelo tsohle tsa lōna, le ke le tlose melimo esele, le li-Ashtarothe har’a lōna; le hlekele Jehova lipelo tsa lōna, ’me le sebeletse eena a ’notši; etlaba hona a le namolelang.” E, ho hlonepha Jehova, Lentsoe la hae le seo a se hlokang ke habohlokoa ho rōna haeba re lakatsa ho ba har’a ba memeloang ho nka karolo letsatsing leo a itumisang ka lona. Ho joalokaha Sofonia ka boeena a ile a hlokomela:

“Thōlang pel’a Morena Jehova! hobane letsatsi la Jehova le atametse; hobane Jehova o lokisitse sehlabelo, o hlatsoitse bao a ba bitsitseng.”—Sof. 1:7.

8. ‘Lentsoe la Jehova’ le lemosa ka monahano ofe o kotsi?

⁸ Mehleng ea Sofonia, ho hlahloba ha Jehova ba ipolelang hore ke barapeli ba hae ho ne ho phethahetse. Kahoo “ke lena lentsoe la Jehova” le re:

“Nakong eo, ke tla batlisisa Jerusalema ka mabone, ke khalemele banna bao ba hoamileng holim’a litšifa tsa bona, ba reng pelong tsa bona: Jehova ha a na ho etsa hantle, leha e le ho etsa hampe.” (Sof. 1:1, 12)

Bao ba ichebileng bo bona joalo ba ne ba khotsofalletse boemo bo teng ba litaba. Ba ne ba sa batle ha mang kapa mang a fuluha litšifa tse ka lifaking tsa bona tsa veine. Ba ne ba tšoana le Bojakane bo se nang tumelo kajeno, hape le ba bang ba oeleng borapeling ba Jehova, ba re, ‘Bo kae bopaki ba hore ruri ena ke “mehla ea qetelo”?’ Monahano o joalo o ile oa ipaka o le kotsi mehleng ea Sofonia, ’me o ka ba kotsi haholoanyane le hona kajeno mehleng ea rōna, ha re talimana le bofelo ba tsamaiso eohle ea lefatše ea lintho.—2 Pet. 3:3, 4, 10.

9. Joaloka mehleng ea Juda, ke hobane’ng ha e le habohlokoa ho hlaolela pono ea moea ho e-na le ea lintho tse bonahalang?

⁹ Ka batho ba se nang tumelo le ba lintho tse bonahalang joalo, Jehova o tsoela pele a re:

“Menono ea bona e tla lobeloa, matlo a bona a senngoe; ba tla haha matlo, empa ba ke ke ba lula ho ’ona; ba tla hloma merara, empa ba ke ke ba e-noa veine ea eona.” (Sof. 1:13)

Matlotlo a lefatše ha a fane ka molemo oa letho letsatsing la kahlolo ea bomolimo! Ho e-na le ho batla lintho tse bonahalang joalo kajeno, ke ho molemo hakaakang ho hlaolela pono ea Mangolo bophelong, le hore bacha ba itlhomelle bakeng sa tšebeletso ea nako e tletseng ho Jehova! Kamehla ho thabile ba khethang ‘matlotlo leholimong’ ho e-na le ho ‘bokella matlotlo lefatšeng’!—Matt. 6:19-21; Moek. 12:1; 1 Tim. 6:6-8.

‘LETSATSI LE LEHOLO LE ATAMETSE’

10, 11. Ke joang, le hobane’ng, Jehova a ‘akofisang’ letsatsi la hae le leholo?

¹⁰ Ho latelang, Morena ’Musi ka boeena oa re tiisetsa:

“Letsatsi la Jehova le leholo le atametse, le atametse, le bile le akofa ka ho fetisisa.”—Sof. 1:7, 14.

¹¹ Ho se be motho ea nahanang hore ho ahlola ha Molimo lefatše lena le khopo ho hole haholo. Kajeno, letsoalo le teng la ho timetsoa ha bophelo bohle ba batho lefatšeng, empa hoo ke ntho e ’ngoe eo Jehova a ke keng a e lumella! Ke Morena ’Musi Jehova, e seng batho ba sekametseng lipolotiking, ea tla timetsa bohlanya bona ba mehla ea libetsa tse kotsi. O tla ‘akofisa’ letsatsi la hae la Harmagedone. ’Me ‘monna oa senatla’ ea lekang ho tšoephola kahlolo eo o kotsing ea ho meketsa habohloko, hobane Jehova ka boeena o re:

“Tsatsi leo ke tsatsi la khalefo, ke tsatsi la tlokotsi le la matsoalo, ke tsatsi la tšenyo le la tšenyeho, ke tsatsi la lefifi le la botšo, ke tsatsi la maru le la lefifi le letšo! Ke tsatsi la phala le la mokhosi o hlabeloang metse e matla le marako a phahamileng.”—Sof. 1:15, 16.

12. Ke hobane’ng ha re ka thabela hore timetso ea letsatsi leo e tla ba e khethang?

¹² Litšireletso tsa lefatše lena le hlometsoeng, le haeba li ne li ka tella libetsa tse kotsi, li ke ke tsa thusa letho khahlanong le lihlomo tse polokelong ea Jehova tsa leholimo. Ho feta moo, e tla ba tšenyo e khethang, e tumellanong le mantsoe a Davida a boprofeta: “Jehova o boloka bohle ba mo ratang, empa o felisa ba babe kaofela.” (Pes. 145:20) E tla ba letsatsi le tšabehang la kahlolo, ruri, bakeng sa ba sa kang ba khutsa ka hlonepho pel’a Jehova. Hobane ka Sofonia o boetse o re:

“Ke tla bea batho tlokotsing, ’me ba tla tsamaea joale ka lifofu, kahobane ba sitetsoe Jehova; mali a bona a tla tšolloa joale ka lerōle, le nama ea bona joale ka bolokoe.”—Sof. 1:17.

13. Ke matsete afe a ke keng a hlahisa molemo oa letho ka letsatsi la khalefo?

¹³ Chelete e ngata bankeng, le hona naheng eo ho thoeng ha e “nke lehlakore” kapa gauda e patiloeng, kapa matsete a maholo, kapa lintho tse patiloeng moo li epetsoeng li tla thusa eng tsatsing leo? Le letho! Morena ’Musi Jehova ka boeena o hlakisa sena, a re:

“Leha e le silevera ea bona, leha e le gauda ea bona, li ke ke tsa tseba ho ba namolela tsatsing la khalefo ea Jehova; ’me ka mollo oa poulelo ea hae, lefatše lohle le tla chesoa, hobane o tla felisa, a be a timeletse baahi bohle ba lefatše ka sehlōhō.” (Sof. 1:18) Letsatsing lena la qeto, “lefatše lohle” le akarellelitsoe kahlolong ea ho qetela ea Molimo. Empa ho na le tsela ea ho pholoha! Ke efe?

‘PHUTHEHANG HAMMOHO’

14. Bopaki ba ho hlōleha ho ela hloko boipiletso ba Sofonia 2:1 ke bofe (a) ho Juda? (b) ho Bojakane?

¹⁴ Joalokaha eka o ipiletsa ka lekhetlo la ho qetela ho batho ba hae, moprofeta oa Molimo ka boeena joale o phehella bao e tlang ho ba baphonyohi kamoo ba ipolelang, a re:

‘Phuthehang, e, phuthehang, lōna sechaba se sa soabeng.’ (Sof. 2:1, NW)

Empa na Juda joaloka sechaba e kile ea lumellana le boipiletso boo? Kahlolo e tukang ea Jehova ho sechaba seo ka 607 B.C.E., e bontša hore ha e-ea ka ea etsa joalo. Ba tsoela pele ka tsela ea bona e lihlong. Empa ho ne ho le teng batho ka bomong—Bajudea le ba bang, ho akarelletsa Jeremia, Ebede-meleke le ntlo ea Jonadabe—ba ileng ba pholoha ka ho mamela lentsoe la Jehova. (Jer. 39:11, 12, 16-18; 35:18, 19) Boemo boa tšoana le kajeno. Ntle ho lihlong, Bojakane bo hanyelitse molaetsa oa ’Muso o boletsoeng ke Lipaki tsa Jehova har’a bona. Bo hanne ’muso oa Molimo ka Kreste Jesu e le oona tšepo feela bakeng sa lichaba, bo bea sebakeng ka baka leo, ntho e iketselitsoeng ke motho, e tsejoang kajeno e le Machaba a Kopaneng. Ho phutheha leha e le hofe ho etsoang ke Bojakane ke feela ho ea Harmagedone.—Pes. 2:2, 3; Tšen. 16:13-16.

15. Ke ho phutha hofe ho hong ho ’nileng ha tsoela pele mehleng ea kajeno?

¹⁵ Leha ho le joalo, ho phutheha ho hong ho ’nile ha etsoa ‘nakong ea bofelo,’ eo re phelang ho eona hona joale. Pele, ho phuthiloe haholo ho tloha Bojakaneng, ha Bakreste ba ’nete ba tlotsitsoeng. Hona ha lateloa ke ho phuthoa ha “ba lichaba tsohle, le ba mefuta eohle, le ba merabe eohle le ba lipuo tsohle” ba “bongata bo boholo,” bo se nang palo, bakeng sa ho pholoha mahlomola a ke keng a qojoa. (Tšen. 7:1-4, 9, 14; Esa. 2:2, 3) “Bongata bo boholo” bona bo etsoa ka bo-mang? Ke batho ba baikokobetsi ba utloisisang ho ikokobetsa ho mamela keletso ea moprofeta oa Molimo.

16, 17. Ke ho baloa hofe ha nako e saletseng ho tsoelang pele hona joale, ’me, kahoo, ke pitso efe e lokelang ho arabeloa bakeng sa ho pholoha?

¹⁶ Ntle ho ho khaotsa, ho baloa ha nako e saletseng ho leba Harmagedone ho ntse ho theosetsa. Ho nakong, he, ke temoso ea moprofeta oa Molimo ho bana ba ikokobelitseng:

“Ha ho e-so ho tle letsatsi leo joale ka mooko o fefoloang, ha ho e-so ho tle holim’a lōna ho tuka ha bohale ba Jehova, ha le e-so ho tle ho lōna, tsatsi la bohale ba Jehova,” le tlameha ho nka bohato!—Sof. 2:2.

¹⁷ Ke taelo le molao oa Jehova hore Bojakane bo tla timela, joalokaha Jerusalema e se nang tumelo e ile ea felisoa ka 607 B.C.E., le ka mabaka oona ao. (Ezek. 22:3-5) Bo molato oa mali haholo, ’me baruti ba bona ba furaletse molao oa Jehova. Bolumeli ba bona ke karolo ea Babylona e Moholo, ’muso oa lefatše oa bolumeli ba bohata, eo ka eena moapostola Johanne a ileng a ngola: “Lichaba kaofela li khelositsoe ke bolao ba hao. ’Me ke ho oona ho fumanoeng mali a baprofeta le a bahalaleli, le a bohle ba bolailoeng lefatšeng.” Ha ho makatse hore mohoo o hlaha o ea ho ba lakatsang ho khahlisa Molimo: “Tlohang ho eena, lōna sechaba sa ka, le se tšohe le kenella libe tsa hae, ’me la oeloa ke likotsi tsa hae”’!—Tšen. 18:4, 23, 24.

‘HO BATLA JEHOVA’

18. Ke bohato bofe bo eang pele bo ka nkoang ke baikokobetsi?

¹⁸ Leha ho le joalo, ho lekane na ho ikarola lefatšeng le bolumeli ba lona ba bohata? Sofonia o bontša hore baikokobetsi ba lokela ho nka bohato bo tsoetseng pele le bo tiileng.

19. Ho ameha eng ho ‘batleng Jehova’?

¹⁹ Pele ka tatelano, moprofeta oa Molimo o re:

“Batlang Jehova, baikokobetsi bohle ba lefatše, ba etsang ka taelo ea hae” (Sof. 2:3a)

Ba tlameha ho batla ho tseba Jehova, hammoho le litšoaneleho tsa hae tse babatsehang le merero, joalokaha Mora oa hae, Jesu Kreste, a mo hlalositse. “Bophelo bo sa feleng ke hore ba u tsebe, uena Molimo o ’notši oa ’nete, le Jesu Kreste eo u mo romileng.” (Joh. 1:18; 17:3) Ho batla ha bona Jehova ho tla isa hore ba mo rate ka ‘lipelo tsohle, meea, mohopolo le matla,’ le ho lateleng ha bona mohlala oa Jesu ho etseng ‘tšebeletso e halalelang’ eo Jehova a e hlokang ho bona.—Mar. 12:29, 30; 1 Pet. 2:21; Matt. 4:17; Tšen. 7:15.

20. Re lokela ho batla ho loka ha mofuta ofe, hona ka kholiseho efe?

²⁰ Ho latelang, Sofonia o re:

“Batlang ho loka.” (Sof. 2:3b)

Che, e seng ho loka ho kang ha Bafarisi! Ha ho etsetse mang kapa mang molemo ho ba le ‘cheseho ho Jehova’ ha ena e se tumellanong le tsebo e nepahetseng ea Lentsoe la hae. Ho hlokahala ‘re tsebe ho loka ha Molimo e le hore re ka ikokobeletsa ho loka hoo.’ Ho hlokahala hore bophelo ba rōna bo lumellane le melao ea Molimo—e seng ea motho—le ho apara botho ba Bokreste bo “bōpiloeng ka setšoantšo sa Molimo, ho lokeng le khalalelong ea ’nete.” (Ba-Roma 10:2, 3; Ba-Ef. 4:22-24) Ho loka hona ha ’nete le khalalelo li hloka hore re se ke ra lumella monahano o hlephileng oa lefatše kapa litsela li kenelle bophelong ba rona. Joalokaha Jesu a ile a eletsa, ho hlokahala hore ‘re mpe re batle ’muso oa Molimo le ho loka ha oona pele,’ re kholisehile hore, ha re mo sebeletsa, o tla lokisetsa se hlokahalang ho re phelisa le ho re sireletsa letsasing la bohale ba Jehova.—Matt. 6:31-33.

21. (a) Boprofeta bo hatisa bohlokoa ba tšoaneleho ea boikokobetso joang? (b) Ntlheng ena, re lokela ho alosa eng ka hloko?

²¹ Sa boraro, moprofeta oa Jehova o re:

“Le batle boikokobetso.” (Sof. 2:3c)

Sofonia o se a hlalositse ba tla mamela boprofeta ba hae e le “baikokobetsi . . . ba lefatše.” Joale o hatella habeli tšoaneleho ena. Ke habohlokoa hakaakang hore re ’ne re batle “boikokobetso,” kaha re likiloe ke boikutlo ba boikhohomoso, bo ipatlang ka matla, ba boinahano ba botho, ba “’na pele” ba lefatše! Kamehla kotsi e teng ea hore boikutlo bona bo ka ’na ba re tšoaetsa. Ho hlokahala re ikalose, kamehla re ithaopele ho amohela taeo e tsoang ho Jehova le phutheho ea hae, le hore re lumellane le thato ea hae. Le ka mohla re se nahane hore taba ea rōna ke hore “hang ha u pholositsoe, u pholositsoe,” hobane moputso oa ba pholosoang ke oa ba “tsamaeang ’neteng.”—Liprov. 22:4; Joh. 8:31, 32; 3 Joh. 3, 4.

22. (a) Ke hobane’ng ha Sofonia a re “ekaba”? (b) Pheletso e tla ba efe ka ‘ba patiloeng ke Jehova’?

²² Ho “baikokobetsi . . . ba lefatše” Sofonia joale o re:

“Ekaba le ka tšoha le patoa tsatsing la bohale ba Jehova.” (Sof. 2:3d)

“Ekaba” hobane’ng? Ke kahobane poloko ea ho qetela e itšetlehile ka motho ka mong ka tsela eo a e nkang, joalokaha Jesu a bontšitse, a re: “Ea tiisetsang ho fihlela qetellong ke eena ea tla bolokeha.” Tiisetsang, he, lōna bohle ba ikokobelitseng, ho etseng thato ea Molimo ka boikokobetso bakeng sa kajeno, e leng e akarelletsang ho bolela litaba tse molemo tsa ’muso o hlomiloeng lefatšeng lohle leo ho ahiloeng ho lona e le bopaki ho lichaba tsohle. (Matt. 24:13, 14) Ka ho etsa joalo, le ka ba har’a ba ‘tla patoa ke Jehova’ mohla letsatsi la khalefo ea hae. Mopesaleme Davida o ngola ka ba joalo, a re: “Ba bonolo ba tla rua lefatše, ba iketle khotsong e kholo.”—Pes. 37:11.

[Lebokose le leqepheng la 23]

“MOHLOMONG KE TABA EA NAKO FEELA”

Puong ea hae ha a tlohela mosebetsi, eo e neng e le mookameli oa United States Jimmy Carter o ile a lumela mabapi le lihlomo tse chefu: “Kotsi e ntse e phahama. Ha matlo a polokelo a lihlomo a mebuso e meholo a ntse a kokomoha le ho tsoela pele le ha mebuso e meng—mohlomong le nakong e tlang, mebuso e mashome-shome—e fumana lihlomo tsena, e tla ba taba ea nako feela pele bohlanya, tsieleho, meharo kapa ho fosa lipalo ho tlamolla matla a tšabehang.” ’Me bohlanya bo se bo ntse bo atile lefatšeng! Taba ea mohlophisi ho New York “Times” ea la 31 Pherekhong, 1981, ea lemosa hore ho na le “Selemo, Boholong ba Taba, sa ho Laola Lihlomo!” ho ka etsoang ke mebuso e meholo, ho seng joalo e tla lahleheloa “ke menyetla eohle e bonahalang ea ho lekanyetsa lihlomo tse chefu.”