Ho Ikokobeletsa Taolo ea Puso ea Molimo ka Botšepehi

“Bonang, ho hotle, ho monate hakakang ha baena ba phela hammoho ba ntse ba le bang! Ho joale ka phoka ea Hermone, e theohelang lithabaneng tsa Sione.”—Pesaleme ea 133:1, 3.

1. Lentsoe la Jehova le hlalosa lelapa la bahlanka ba hae ba ineetseng le lefatšeng joang?

KE TLHALOSO e ntle hakaakang ea bao, le hoja ba le lefatšeng lohle, ba neetseng bophelo ba bona ho Motsoali a le mong, Jehova Molimo! ’Me ruri o okamela lelapa lena le lefatšeng lohle ka mokhoa o moholo. O fana ka sohle seo re se hlokang ka lerato.—Pesaleme ea 145:16.

2. Ho ikokobeletsa taolo ea puso ea Molimo ho bolela eng?

² Empa, Jehova o phehella khotso le kopano ka tieo ho bana bohle ba ineetseng ba hae. (1 Ba-Korinthe 1:10) ’Me liphello tsena tse ntle li tlisoa ke hore bahlanka ba tšepahalang ba Molimo ba ikokobeletse taolo ea puso ea Molimo. Hoo ho bolela eng? Kaha borena ba Molimo ke puso ea Molimo, ho ikokobeletsa taolo ea puso ea Molimo ho bolela ho utloa melao, litaelo le melao ea motheo e tsoang ho Molimo.—Esaia 33:22.

3. Jesu o hlalositse boikutlo ba hae ka ho ikokobeletsa puso ea Molimo joang?

³ Mohlala o molemo ka ho fetisisa oa ho ikokobeletsa taolo ea puso ea Molimo ka botšepehi ke Jesu Kreste. E ne e le eena “letsibolo la tsohle tse hloliloeng” leholimong. (Ba-Kolosse 1:15) “Jehova o mpopile ho qaleng ha litsela tsa hae, mesebetsi ea hae e e-so ho be teng, boholoholo. Ke beiloe borena mehla e e-so ho qalehe, lefatše le e-so ho ka le e-ba teng. . . . Mehleng eo, ke ne ke le motlatsi oa hae, ke thabile ka matsatsi-tsatsi, ke nyakaletse pel’a sefahleho sa hae ka mehla.” (Liproverbia 8:22, 23, 30) Nyakallo ea hae ka ho ikokobeletsa puso ea Molimo e ile ea totobala ha a le lefatšeng, hobane Jesu o hlalositse hore: “Ke theohile leholimong, e seng ho etsa ho ratoang ke ’na, empa e le ho etsa ho ratoang ke ea nthomileng.” (Johanne 6:38) Karolong ea ho etsa thato ea Molimo, o ne a le hlokolosi haholo ho ruta mehopolo ea Molimo, e seng ea hae. Jesu o itse: “Thuto ea ka hase ea ka, empa e le ea ea nthomileng.” (Johanne 7:16) Ke mohlala o motle hakaakang hore bahlanka bohle ba Molimo ba o etsise!

4. Hlalosa tokisetso ea puso ea Molimo mehleng ea rōna.

⁴ Ka baka la ho ikokobeletsa taolo ea puso ea Molimo ka botšepehi le ho isa lefung, Jesu o ile a putsoa ka bophelo ba ho se bole leholimong. Ho phaella moo, a neoa “borena bohle leholimong le lefatšeng.” (Mattheu 28:18) Le eena a bea “mesebetsi ea hae kaofela” e lefatšeng (likhahleho tsa ’Muso oa hae tse lefatšeng) ho Bakreste ba tšepahalang ba tlotsitsoeng. Bana Jesu a ba bitsa “mohlanka ea khabane, ea bohlale.” (Mattheu 24:45-47) Ka letsatsi le leng moputso oa bona ke hore ba kopanele pusong ea leholimo le Kreste e le “baprista” le “marena” ’musong oa hae. (Tšenolo 14:1, 4; 20:6) Kajeno, masala a “mohlanka ea khabane” enoa, a sa ntsane a phela lefatšeng. Litšoanelo tsa oona li akarelletsa ho amohela le ho fetisetsa lijo tsa moea ka nako e tšoanelang ho bahlanka bohle ba Jehova ba lefatšeng. Ba boemong bo tšoanang le ba Pauluse le bao a neng a sebetsa le bona ha moapostola eo a bua tjena ka linnete tse tsotehang tseo Molimo o li neang batho ba oona: “Molimo o li senoletse rōna ka Moea oa oona.” (1 Ba-Korinthe 2:9, 10) Hape a etella pele tšebeletsong ea boboleli ba ’Muso bo lokelang ho finyelletsoa “lefatšeng lohle” leo ho ahiloeng ho lona pele ho bofelo ba tsamaiso ena e ahlotsoeng ea lintho.—Mattheu 24:14.

Liphello tsa Tsela e Fosahetseng

5, 6. (a) Eva le Adama ba tletsoe ke liphello life ka ho batla ho itokolla ho Jehova? (b) Jehova o sebetsana le ‘liphiri tse apereng lekoko la nku’ joang?

⁵ Ke habohlokoa hakaakang hore e mong le e mong ea ka lelapeng la Molimo a ikokobetse ka botšepehi lithutong le litokisetsong tsa ’Musi e Moholo, Jehova, le Mora oa hae oa Morena, Kreste Jesu, joalokaha li fetisoa ka “mohlanka ea khabane” ea lefatšeng! Kaha taolo ea puso ea Molimo e qala ho Jehova ka boeena ’me e theohela tlase, le ka mohla ha re rate ho etsisa Satane Diabolose ka ho itokolla pusong ea Molimo. Hopola masoabi a ileng a tlela Eva ha a mamela ha Satane a phehella ho mo eka hore a se ke a ikokobeletsa taolo ea puso ea Molimo. Ha e le hantle, Satane o itse ho eena: ‘Itokolle ho Molimo. Ikele ka tsela ea hao. Iketsetse qeto ea hore na ho nepahetseng le ho fosahetseng ke hofe. Joale u tla tšoana le Molimo. U ke ke ua shoa.’ (Genese 3:1-5) Mohlomong hoo ho ile ha utloahala ho hohela, empa e ne e le leshano. (Johanne 8:44) Ha monna oa hae a kopanela le eena ho lahla ho ikokobeletsa taolo ea puso ea Molimo, ba lelekoa tšimong ea Edene le lelapeng la Molimo la ba tšepahalang. Kamorao ho nako, ba shoa joalokaha Jehova a ne a ba lemositse.—Genese 2:17.

⁶ Ho joalo le kajeno, ba har’a batho ba Jehova empa ba kopanela thutong e ipusang le e khelohileng, ha ba etsise Molimo empa Satane Diabolose. Leha ho le joalo, Jehova o bona se etsahalang lelapeng la hae ’me o se ela hloko. (Liproverbia 15:3) A ke ke a mamella batho ba kang liphiri ba tla harola batho ba hae ba kang linku, empa ka nako e loketseng o nka bohato ba makhaola-khang. (Mattheu 7:15-23) Ho tšoana le ntate ea lerato, o sireletsa katleho ea moea ea lelapa la hae.—Ezekiele 34:11-16.

7. (a) Aarone le Meriame ba ile ba hlōloa ho tebisa eng pelong? (b) Ka liphello life?

⁷ Mehlala e meng hape ea Bibele e phahamisa kotsi ea ho se ikokobeletse taolo ea puso ea Molimo ka botšepehi. Ka mohlala, Meriame le Aarone ba nkella kamano ea bona ea lelapa le Moshe ’me ba qholotsa boemo ba hae phuthehong ea Iseraele ea boholo-holo. (Numere 12:1, 2) Ba sitoa ho tebisa pelong ’nete ea hore ke Jehova ka seqo ea abetseng Moshe matla a khethehileng, a ileng a pakoa ke liketsahalo tsa mohlolo. Jehova a ba hopotsa hore: “Mohlanka oa ka, Moshe; o tšepehile tlung ea ka kaofela; ke bua le eena ka molomo o bapileng le molomo, . . . ha ho le joalo, ho ile ka’ng ha le sa ka la tšaba ho bua hampe ka mohlanka oa ka, Moshe, na?” Eaba “khalefo ea Jehova ea ba tukela.” Aarone a khalemeloa ka matla, ’me Meriame eena a otloa ka lepera ka baka la karolo ea hae, a lelekeloa ka ntle ho liahelo tsa Iseraele ka matsatsi a supileng.—Numere 12:7-15.

8. Taba ea Morena Saule e bontša eng?

⁸ Joale ho teng Morena Saule oa Iseraele ea boholo-holo ea ileng a hana ho emela Jehova. Ho e-na le hoo, ka boikakaso a nyehela mahlabelo le hoja e ne e se moprista. Boikemelo ba hae bo fokolang ea e-ba hore o ne a le kotsing ea ho qhalaneloa ke lebotho la hae. Empa e ne e le lebotho la mang? La Saule kapa la Jehova? Moprofeta Samuele a mo bolella hore: “U entse ka bothoto, ha u sa ka ua boloka taelo ea Jehova, Molimo oa hao. . . . Joale, borena ba hao bo ke ke ba tiea.” (1 Samuele 13:13, 14) Saule a amohuoa borena ’me ba neoa “monna e mong ea pelong ea [Jehova].” Kahoo, Saule a lefa haboima bakeng sa ho hloka boikokobetso le ka baka la ho haelloa ha hae ke pako ea ’nete ha a hlokomelisoa taba eo. Hona ho bontša hore Jehova o fela a hlokomela boikakaso, ho ipusa, liketso tseo e seng tsa puso ea Molimo har’a batho ba hae.—Liproverbia 11:2.

9. Ke hobane’ng ha Morena Oziase a ile a lelekoa?

⁹ Ho joalo le ka taba ea Morena Oziase oa Juda. Le hoja e ne e le morena oa batho ba Jehova, o ne a sa neoa matla a ho sebeletsa karolong efe kapa efe ea boprista. Empa leha ho le joalo a tsitlella ho phetheng mosebetsi oa moprista. Baprista ba ipelaetsa ka matla ’me ba re: “Ha u na tokelo, Oziase, ea ho chesetsa Jehova libano; ke ea baprista, bara ba Aarone, ba khethetsoeng ho li chesa. Tsoa sehalalelong, hobane u sitiloe.” Eaba Oziase o bontša ho haelloa ke pako ka ho halefela baprista, a eketsa sebe sa hae sa boikakaso. “A re a sa halefetse baprista, lepera la hlaha phatleng ea hae. . . . kahobane Jehova a mo otlile.” Ea e-ba molepera ho fihlela a e-shoa, ea lahliloeng, “a lelekiloe tlung ea Jehova.”—2 Likronike 26:16-21.

10. Pauluse o hlalositse ba qhololitseng ho khethoa ha hae ke Jesu joang?

¹⁰ Moapostola Pauluse o buile ka ba bang ba neng ba qholotsa khetho ea hae e khethehileng e neng e tsoa ka ho toba ho Hlooho ea phutheho ea Bokreste, Jesu Kreste. (2 Ba-Korinthe 11:12) Empa Pauluse o itse banna ba joalo e ne e le “baapostola ba bohata, . . . basebetsi ba mano, ba ikhakanya ka sebopeho se kang sa baapostola ba Kreste. ’Me hase ho ka makatsang, etsoe Satane le eena a ikhakanya ka sebopeho se kang sa lengeloi la leseli.” (2 Ba-Korinthe 11:13, 14) Banna bao ba ne ba e-na le merero ea bona ea boikhabi eo ba neng ba e ntšetsa pele. Pauluse o ne a hlokomelisitse ka batho ba tjena, a re: ‘Har’a lōna ho tla tsoa batho ba tla bolela litaba tse khopo, ho ikhulela barutuoa. Lebelang ke hona.’ (Liketso 20:30, 31) Pauluse a ipiletsa ho baena, ho akarelletsa bao ba neng ba iketsa eka ke baapostola, ho re ba se lumelle qhoebeshano le pherekano li sitise kopano le ho bea ha phutheho ea Bokreste. Haeba ho ne ho e-na le ba sa utloeng keletso e bululetsoeng ke moea, ba ne ba lebile tlokotsing eitseng.—Ba-Galata 1:7-9.

11. Jehova o sireletsa kutloano ea lelapa la hae la lefatšeng joang?

¹¹ Mongoli oa Bibele ea bululetsoeng Johanne, o itse: “Mang le mang ea khelohang, ea sa tiisetseng thutong ea Kreste, ha a na Molimo; . . . Ekare ha e mong a e-tla ho lōna, ’me a sa tlise thuto eo, le se ke la mo amohela matlung a lōna, ’me le se ke la mo lumelisa! Hobane ea mo lumelisang o kopana le eena ketsong tsa hae tse mpe.” (2 Johanne 9-11) E, Jehova o tla sireletsa moea o motle le tumellano ka tlung ea hae.

Ho Ikalosa Kajeno

12. Jehova o bokellela bohle ba mo ratang ho eng?

¹² ‘Mehleng ena ea bofelo’ Jehova o bokella bohle ba mo ratang ka phuthehong e le ’ngoe e kopaneng. Batho ba lichaba tsohle ba utloa pitso, “tlong, re nyoloheleng thabeng ea Jehova, ka tlung ea Molimo oa Jakobo, o tle o re rute mekhoa ea oona, re tsamaee litseleng tsa oona.” (Esaia 2:2, 3) Hlokomela hore Jehova o laea batho ka mekhoa ea hae e le hore ba ka tsamaea litseleng tsa hae, e seng mekhoa ea bona le litsela tsa bona.—Jeremia 10:23, 24.

13. (a) Ke hobane’ng ha re lokela ho ikalosa ka ho khethehileng hona joale? (b) Re hloka eng hore re etsolle mesebetsi ea Satane?

¹³ Leha ho le joalo, hona joale Satane o “halefile hampe.” O tseba hore “nako ea hae ha e sa le ekae” pele a tlohelisoa ho sebetsa. Kahoo o “lika-lika joale ka tau e purumang, e batlang eo e ka mo jang.” (Tšenolo 12:12; 1 Petrose 5:8) Ka baka leo, ho hlokahala re ikalose boitekong bofe kapa bofe ba molimo oa lefatše lena, Satane Diabolose, ba ho kenyelletsa khanyetsano le karohano har’a litho tsa lelapa la Jehova. “Ha ho le joalo, iponeleng hore le tsamaee ka kelello, e seng joale ka maoatla, e mpe e be joale ka ba bohlale. Lopollang linako, hobane mehla e se e le mebe. Ka baka leo, le se ke la etsa ka booatla, le mpe le tsebisise hantle ho ratoang ke Morena.” (Ba-Efese 5:15-17) Ka ho ikatlehisa ka litokisetso tsa Jehova bakeng sa boiketlo ba rōna ba moea, re tla hahuoa, re hloekisoe, re hlomelloe hantle. Ka tsela ena re tla ba le hona ho qhela mano a khopo a Satane le ho hlōla morero oa hae.—Ba-Efese 6:10-13.

14. Ke hobane’ng ha ho le kotsi haholo ho ikhopola ho feta kamoo re tšoanetseng?

¹⁴ Boikutlo boo re lokelang ho bo alosa ke ba ho inahana ho tlōla kamoo re tšoanetseng. (Ba-Roma 12:3) Hoo ho ka etsa hore Mokreste a inahane hore o na le thōmo e khethehileng e tsoang ho Molimo ntle ho mocha oo Jehova a abang linnete tsa hae ka oona le oo a tsamaisang ntlo ea hae ka oona. Ha e le hantle, ho ka tloha ha mo bea sebakeng seo a nahanang hore o na le kamano e khethehileng le Jehova e sa thabeloeng ke baena le likhaitseli ba bang ka lapeng. Empa ho ikhetha ho joalo ekaba booatla feela: “Motho ea ikhethang ho ba bang o batla ho ikhahlisa eena a ’notši; khalefong ea hae o soma tsohle tsa bohlale.”—Liproverbia 18:1.

Ho Emela Jehova

15. (a) Na ho loketse ho etsetsa sehlopha sa Jehova sa “mohlanka” litlhahiso? (b) Bontša hore na boikokobetso pusong ea Molimo bo ne bo etsoa joang lekholong la pele la lilemo.

¹⁵ Ka linako tse ling, ba bang ba hlokomelisa sehlopha sa “mohlanka” ka litaba tse sa tšoaneng tsa thuto kapa tsamaiso tseo ba ikutloang hore li tlameha ho shejoa kahosele. Ruri litlhahiso tsa hore ho ntlafatsoe li loketse, joalokaha ho le joalo ha motho a botsa a batla kutloisiso. Mohlala oa sena ke ha Pauluse, Barnabase le ba bang ba rōmeloa “Jerusalema . . . ho ea botsa baapostola le baholo” ka lebollo. Eare ha baholo bao ba Jerusalema ba etsa qeto ka taba, tlas’a tataiso ea moea o halalelang, ba rōmela baena metseng e fapaneng “ba . . . laela baena ho boloka melao e beiloeng ke baapostola le baholo ba Jerusalema.” Ho ikokobeletsa litaelo tseo ka botšepehi ha tlisa tlhohonolofatso ea Jehova. Kahoo, “likereke li ne li itiisa tumelong, ’me li ne li anafala ka matsatsi ’ohle.”—Liketso 15:1–16:5.

16. (a) Moea o motle o ka bontšoang ha ho entsoe litlhahiso ke ofe? (b) Pauluse o eletsa hore ba bontšang moea o fosahetseng ba tšoaroe joang?

¹⁶ Moea o loketseng kamor’a ho fana ka litlhahiso ke ho khotsofalla ho sia taba boinahanong ba thapelo ba baena ba hōlileng tsebong ba tsamaisang mosebetsi ka phuthehong ea Jehova. Empa haeba ba etsang litlhahiso ba sa khotsofalle seo ’me ba ntse ba hanyetsa taba ka liphuthehong ka maikutlo a hore ba fumane ba bang ba ba tšehetsang, joale ho etsahala joang? Hoo ho baka likarohano, ’me ho ka sisinya tumelo ea ba bang. Kahoo Pauluse o eletsa ka hore: “Le iponele ho ba hlahisang likhaohano le likhopiso ka ho senya thuto eo le ithutileng eona, ’me le ba sesefe.” Pauluse a boela a eletsa Tite hore a ‘nyatse ba hanyetsang,’ a phaella: “E ka khona ba joalo ba khutsisoe, hobane ba qhala malapa ka ho ruta tse sa tšoanelang, . . . Ka lebaka lena u ba khalemele ka thata.”—Ba-Roma 16:17, 18; Tite 1:9-13; Phet. e ncha.

17. Rōna kajeno re ka etsisa boikutlo bo botle ba Davida joang?

¹⁷ Lentsoe la Molimo le re: “Tsebo e na le boikhohomoso, athe lerato lea hahisa.” (1 Ba-Korinthe 8:1) Kahoo ho molemo hakaakang ho tšoareha ka matla mosebetsing o moholo oa ho bolela ka ’muso o babatsehang oa Molimo, ho bua lintho tse hahang, tse tiisang tumelo ea ba bang le ea rōna, ha ka mamello re emetse Jehova hore a sebetse thato ea hae ka mocha oo a o khethileng! (Ba-Roma 14:19; Ba-Filippi 4:8, 9) Etsisa Davida ha a ne a re: ‘Hobane ke ile ka emela uena, Jehova; ea e-ba uena ea arabelang, Jehova Molimo oa ka.’ (Pesaleme ea 38:15, NW) Kamehla u hopole monahano oa bohlokoa joalokaha o boletsoe ke Pauluse, ha a re, “Le ke le bolele bohle taba e le ’ngoe; likhaohano li se ke tsa e-ba teng har’a lōna, le mpe le phethehe boikutlong bo le bong le khopolong e le ’ngoe.” (1 Ba-Korinthe 1:10) Kaha motheo ona o sebelisoa lelapeng lohle la Jehova lefatšeng lohle, re bona liphello tse babatsehang. Ka sebele, “ho hotle, ho monate hakakang, ha baena ba phela hammoho ba ntse ba le bang!”—Pesaleme ea 133:1.

Na u ka Arabela Lipotso Tsee:

□ Jesu o beile mohlala o motle joang ho ikokobeletseng taolo ea puso ea Molimo?

□ Ho ka hlaha eng ka ho se ikokobeletse taolo ea puso ea leholimo?

□ Ke hobane’ng ha re lokela ho ikalosa haholo khahlanong le Satane kajeno?

□ Ka ho etsa litlhahiso, re lokela ho ba le boikutlo bofe?

[Setšoantšo se leqepheng la 18]

Ka baka la ho se ikokobeletse puso ea Molimo, Morena Oziase a otloa ka lepera