Na u Ikutloa u e-na le Tšepo?
Ke Topollo Efe e Teng Hona Joale?
U IKUTLOA u e-na le tšepo hakae mabapi le mathata a hlahisitsoeng leqepheng la 3? Morena le moroki Davida o fana ka mokhoa oa ho ba le tšepo e ngata leha e le hona joale. O ngolile: “Ke beile Jehova pel’a ka ka mehla; nke ke ka sisinyeha, hobane o lehlakoreng la ka le letona. . . . nama ea ka e tla phomola ka tšepo.”—Pesaleme ea 16:8, 9.
‘Ho bea Jehova pelʼa hao kamehla’ ho ka ba le phello efe mathateng a hao le se u tlakileng? Re ke re hlahlobe lipotso tse botšitsoeng pele ka bokhutšoanyane ʼme re bone kamoo keletso ea Jehova e ka thusang.
Ho sebelisa metheo ea Bibele ho ka ʼna ha ama menyetla ea hao ea hore u fumane mosebetsi. Ho e sebelisa ho hlahisa mosebetsi ea seli, ea tšepahalang le ea sebetsang ka thata, hobane Lentsoe la Molimo le khothalletsa hore: “Ea neng a utsoa, a se ke a hlola a utsoa, a mpe a ineele ho sebetsa lintho tse molemo ka matsoho a hae, a tle a tsebe ho nea ea hlokang.” (Ba-Efese 4:28) Hangata, beng ba mesebetsi ba nang le kelello ba batla ho sebeletsoa ke motho ea tšepahalang. Kahoo bothata ba ho hloka mosebetsi, le hoja bo le teng, ha boa lokela ho tsietsa hakaalo bakeng sa Mokreste oa ʼnete.
Tsela eo Mokreste a phelang ka eona e ka ba ea nolofatsa liphello tsa ho phahama ha theko. Hobane’ng? Hobane Mokreste o sebelisa chelete e nyenyane eo a nang le eona ka bohlale. Ha ho karolo ea chelete eo a e fumanang e senngoang ka papali ea chelete, ho tsuba kapa ka tšebeliso e mpe ea tahi le lithethefatsi. O qoba boikhantšo ba lefeela bo kenyang litšenyehelong, “hobane tsohle tse lefatšeng, takatso ea nama, le takatso ea mahlo, le boikhantšo joa bophelo, ha li tsoe ho Ntate [Molimo], empa li tsoa lefatšeng.”—1 Johanne 2:16, 17.
Maikutlo ao Mokreste oa ʼnete a talimang litaba ka oona a ka mo thusa bothateng bo teng ka linako tsohle ba tlōlo ea molao joang? Bibele e-ea eletsa: “U se ke ua kena tseleng ea ba bolotsana, u se ke ua hata le ʼmileng oa bakhopo. Sikoloha, u se ke ua ba ua leba teng, u khelohe, u iphetele.” (Liproverbia 4:14, 15) Motheong oa keletso e joalo Mokreste o itlhokomela ka bohlale libakeng le maemong a ratoang ke tlōlo ea molao. Ha a tloaelane le batlōli ba molao.
Le hoja Bakreste ba bangata, ka baka la boemo ba lichelete, ba tlameha ho phela matlong a boemo bo tlase, mekhoa ea bona e theiloeng Bibeleng e ba tsamaisa hore ba be le matlo a hloekileng le a bohehang ho feta se tloaelehileng sebakeng seo. Baa tseba hore bohloeki ba ʼmele ke karolo ea borapeli ba ʼnete ba Molimo o halalelang, Jehova. Moprofeta Esaia o elelitse hore: “Itlhatsoeng.”—Esaia 52:11.
Bakreste ba rutoa ho rapela: “U re fe kajeno bohobe ba rōna ba tsatsi le leng le le leng.” (Mattheu 6:11) Thapeli eo e akarelletsa boikutlo ba lijo tse hlokahalang tsatsi le leng le le leng bo ananelang ho lekaneng letsatsi ka leng ntle ho ho tšoenyeha ntle ho mabaka ka se tla hlokahala hosesane. Ha molumeli a phetha karolo ea hae, o-oa tseba hore a ke ke a tloheloa a se na seo a se hlokang letsatsi ka leng bophelong, joalokaha mopesaleme Davida a ngolile: “Nkile ka ba mocha, ʼme joale ke tsofetse; empa ha ke e-so ho bone ea lokileng a tloheloa, leha e le litloholo tsa hae li sikila bohobe.”—Pesaleme ea 37:25.
Na ho bonolo ho qoba kapa ho fokotsa ntoa ka malapeng? Bibele e-ea eletsa: “Ea liehang ho hlonama o tima likomang.” (Liproverbia 15:18) Hape: “Tse bohloko tsohle, le bohale, le ho itšena, le komang, le ho seba, le lonya lohle, li falatsoe ho lōna. Le rekolohelane, . . . le tšoarelane.” (Ba-Efese 4:31, 32) Na manyalo oohle a ke ke a fumana molemo ha a bontša moea oo oa Bokreste?
Batsoali ba bangata ba amehile haholo ka bana ba bona ʼme haholo ka khatello eo ba leng tlas’a eona likolong ea lithaka tsa bona ea boitšoaro bo bobe. Malapeng a Bokreste ho tšepahala metheong le lelapa ho lokela ho kenngoa ka ho teba e le hore bana ba ka thusoa ho hanela meleko ea kajeno. Bibele e eletsa batsoali hore ba hlaolele botsoalle bo haufi le bana ba bona ba leka-lekanya lerato le taeo. Taeo e akarelletsa setsoalle, thuto, ho behelana mabaka le khalemelo.—Ba-Efese 6:4; Liproverbia 1:8.
Mokreste ea nang le tšepo e tiileng ka nako e tlang a ke ke a ameha haholo ka maemo a ngongorehisang le a tlokotsi. Lithethefatsi tse lemalloang le tseo ho baleheloang linnete ka tsona e ke ke ea e-ba litšehetso bophelong ba hae ba letsatsi le letsatsi. Joalokaha mopesaleme a bolela: “Ke sekama ka khotso, ke be ke ithoballe ka khotso, hobane, Jehova, ke uena u ʼnotši ea nkahisang boiketlong.”—Pesaleme ea 4:8.
Le hoja Bakreste ba tseba hore ntoa e ʼngoe pakeng tsa lichaba e ka ʼna ea loana, hape ba hlokomela hore mong a lefatše ke Molimo, e seng motho. Baa tseba hore Molimo o ke ke oa lumella motho hore a senye lefatše kapa lelapa la motho ka ho feletseng ka ntoa eitseng ea lefatše ea libetsa tse kotsi hobane ke “Molimo o bōpileng lefatše, moetsi oa lona . . . ea mpang a le bōpetse hore le ahuoe.” (Esaia 45:18) Ke ka baka leo a tšepisitseng le ho tiisa hore ho tla ba teng “maholimo a macha le lefatše le lecha” bakeng sa batho ba utloang. E seng qitikoe e ncha le sebaka empa tsamaiso ea lintho e ncha ho hang ea lefatše e theiloeng thutong e likolohang linthong tsa moea bakeng sa bohle. Hona ho tumellanong e tletseng le boprofeta ba Esaia: “Hobane lefatše le tla tlala tsebo ea Jehova, joale ka ha metsi a aparetse leoatle.”—Esaia 65:17; 11:9.
Phetoho ee e tla tlisoa joang hona hobane’ng? Na Molimo o tla sebelisa baeta-pele ba lefatše ho tlisa tšireletseho? Na u tla ba teng bokamosong bo tiileng? Sehlooho sa ho qetela sa letoto lena se tla arabela lipotso tseo.
[Setšoantšo se leqepheng la 7]
Ho sebelisa keletso ea Bibele ho isa matlung a hloekileng, ho sa tsotellehe sebaka se potolohileng