Lentsoe la Molimo lea Phela
Ho Rarolla Liphapang ka Lerato
JOHANNE MAREKA o tseleng e eang hae Jerusalema, moo ʼmʼae Maria a lulang teng. Ke ka nako ea leeto la pele la boromuoa la Pauluse le Barnabase.—Liketso 13:13; 12:12, 25.
Joale ke ka selemo se latelang. Pauluse le Barnabase ba itokisetsa ho qala leeto la bona la bobeli la boromuoa. Barnabase o batla ba tsamaee le motsoal’ae Mareka, hape. Leha ho le joalo, Pauluse ha a batle ho tsamaea le eena. O re: ‘Mareka o ile a nyahlatsa ha re mo nkile ka nako e fetileng.’ Empa Barnabase o tsitlella hore ba mo nee monyetla o mong.
Ka baka la maikutlo ana a sa tšoaneng, “Ha e-ba le phapang e khōlō hoo ba ileng ba arohana.” Barnabase a tsamaea le Mareka. Ba palama seketsoana ʼme ba leba sehleke-hlekeng sa Cypera ho ea bolela moo. Pauluse eena a ikhethela Mokreste e mong, Silase, ʼme ba qala leeto la ho bolela leo ka lona ba ileng ba qala Syria.—Liketso 15:36-41, phet. e ncha.
Ho thoe’ng ka bothata bona bo neng bo le pakeng tsa Pauluse le Barnabase? Hoja oa ba moo ʼme ua bona “phapang e khōlō” ena, na u ne u tla etsa qeto ea hore Pauluse le Barnabase ha se karolo ea batho ba Molimo ka baka la tsela eo ba ileng ba itšoara ka eona.
Ka sebele, hoo e ne e ke ke ea e-ba bohlale. Re lokela ho hlokomela hore kaofela ha rōna re futsitse ho se phethahale ha batsoali ba rōna ba pele Adama le Eva. (Ba-Roma 5:12) Ka baka leo Bibele e re “bohle re khopjoa nthong tse ngata.” (Jakobo 3:2; Ba-Roma 3:23) Empa Bakreste ba ʼnete bohale ba bona ha bo tsoelepele kapa hona ho nkana ka lipelo. Ba ela hloko taelo ea Bibele: “Le mamellane, le rekolohelane, ʼme ekare ha e mong a e-na le komang le e mong joale ka ha Kreste a le hauhetse, etsang joalo le lōna. . . . le apare lerato, e leng tlamo ea phetheho.”—Ba-Kolosse 3:13, 14.
Na Bakreste ba babeli ba tsebisahalang Pauluse le Barnabase ba ile ba rarolla phapang ea bona ka lerato? Ba bone mona. Ba kopana hammoho hape! (1 Ba-Korinthe 9:5, 6) ʼMe hamorao Pauluse a ngolla Timothea: “U ntlele le Mareka, u mo tlise, hobane u molemo ho ʼna tšebeletsong ea lentsoe.”—2 Timothea 4:11.
E, le hoja Bakreste ba pele ba ne ba e-ba le liphapang harʼa bona ka linako tse ling, ba ne ba li lokisa ka lerato. Ruri re ka etsisa mohlala oa bona.