Baleha ha Nako e sa le Teng!
HA JESU a bolela pele ho nako bofelo ba tsamaiso eo ea bolumeli ea Sejode lekholong la pele la lilemo, o ne a boetse a hopotse ho hong ho hoholo ho feta moo. O ne a tseba hore e tla ba mohlala oa se ka lebelloang ka tekanyo e khōlō haholo “mehleng ea qetello” ea tsamaiso ena ea hona joale ea lintho.—2 Timothea 3:1-5; Mattheu 24:3.
Re ka tiisa joang hore ho tla etsahala hape? Mohlala ke hore boprofeteng ba hae Jesu o buile ka hore o tla tla nakong e tlang “ka matla a maholo le ka khanya e kholo.” Phello e ’ngoe ea sena e ne e tla ba hore “lichaba tsohle tsa lefatše li tla iteta lifuba” ka ho bokolla ka baka la tlokotsi e li oelang. (Mattheu 24:30) Lintho tsena ha lia etsahala ha ho oa Jerusalema le Judea lekholong la pele la lilemo. Ka sebele, tlhaloso ea Luka ea boprofeta bona bona e qotsa Jesu a re: “Jerusalema o tla hatakeloa ke lichaba, ho be ho phethoe mehla ea lichaba.”—Luka 21:24.
“Jerusalema” eo ho boleloang ka eona mona ke efe? ‘Mehla ee ea lichaba’ e fela neng?
‘Nqalo e Halalelang’ le “Manyala”
’Muso oa sebele oa Molimo o neng o tšoantšetsa o ile oa busa Jerusalema ho tloha ka 1070 ho ea ho 607 BCE. O ne o emela borena ba Molimo lefatšeng. Empa joale lesika lena la borena la Davida la tlosoa teroneng ke Bababylona. Ha ho ’muso oa borena o ileng oa boela oa busa Jerusalema ea lefatšeng, ho tla tla fihlela kajeno. Leha ho le joalo, Jerusalema ha e sa hataketsoe ntlheng ena: Borena ba Molimo joale bo sebelisoa ka “Jerusalema oa leholimo”—’muso o neng o tšepisitsoe oa Messia, Kreste Jesu. Kemiso ea nako ea Bibele, ho phethahala ha boprofeta le bopaki ba bangoli ba lipale kaofela li bokana ho supa selemo sa 1914 e le se tšoaeang ho fela ha “mehla ea lichaba.”—Ba-Heberu 12:22; Luka 21:24-26; Tšenolo 11:15.
“Jerusalema oa leholimo,” ea emeloang ke Bakreste ba tšepahalang ba tlotsitsoeng ba lefatšeng, hona joale e “nqalong e halalelang.” Empa na lichaba tsa lefatše li amohetse see? Le hanyenyane! Ka selemo sa 1919 tsa hlahisa Selekane sa Lichaba, seo baeta-pele ba bolumeli ba ileng ba se bolela e le “pontšo ea ’Muso oa Molimo lefatšeng.” Ka ho tšoanang, baeta-pele ba bolumeli ba hlalositse joalo mohlahlami oa Selekane, Machaba a Kopaneng, a hlahisitsoeng ka 1945, ba re ke ‘tšepo feela bakeng sa khotso e sa feleng.’ Kahoo baruti ba ne ba tla etsa setšoantšo sena hore se eme “nqalong e halalelang” moo hona joale ho ka sebetsang feela ’muso oa Molimo ka Kreste oa hae ka nepo. “Manyala,” ka sebele, mahlong a Molimo le bohle ba ratang ho loka!
Leha ho le joalo, ha re ntse re theosa le nako ea Molimo ea hore o timetse tsamaiso ea hona joale ea lefatše le khopo, “manyala,” Machaba a Kopaneng, a tšosa bolumeli ba lefatše ka booona. Joang? Ka hore litho tse matla tsa Machaba a Kopaneng, ka ho hlokomelehang tsa lehlakore la Bokomonisi, li futuhetse sebaka sa bolumeli. Mabotho ana a sa lumeleng ho Molimo a hlile a fetohile kotsi tšebetsong e tsoelang pele ea bolumeli ba Bojakane, joalokaha ka mohlala ho le joalo China, Russia le linaheng tse ling tsa Europe e ka Bochabela. Litho tsena tse nyoretsoeng puso tsa Machaba a Kopaneng kahoo hona joale li eme e le kotsi “nqalong e halalelang” eo Bojakane bo reng bo na le eona. Hona ho emela sohle seo bolumeli ba bona bo se nkang se halalela—sebaka seo bo sebetsang ho sona, mekhatlo ea bona, mehaho ea bona ea likereke, le matlotlo a mang, le boipolelo ba bona ba hore bo na le tokelo ea ho busa bophelo ba batho ba bona. Ho tjamelana hona ho tla fella ka eng?
Machaba a Kopaneng, mofelisi oa kajeno, ‘sebata se lihloho li supileng tse nang le manaka a leshome,’ boprofeta bo bolela hore se tla ‘felisa se hlobolise’ bolumeli ba bohata ‘se bo chese mollong.’ (Tšenolo 17:3, 16) Ka ho etsa joalo, e tla be e se ho etsa ka baka la ho rata Molimo, joalokaha ho ne ho se joalo ka Roma ea boholo-holo. “Manyala” a kajeno joale a akarelletsa lichaba tse ngata tse hloileng Molimo, puso ea ’muso oa oona le batho ba ipitsang ka lebitso la Molimo, Jehova. ’Me ka sebele, mosenyi enoa ke karolo ea tsamaiso ea hona joale ea lintho e laoloang ke Satane Diabolose.—Luka 4:5-8; 2 Ba-Korinthe 4:4; Mattheu 6:9, 10.
‘Balehela Lithabeng’
Ha Machaba a Kopaneng a hlahella ka 1945, e le mohlahlami oa Selekane sa Lichaba, a ne a bile a akha lichaba tse hananang le Molimo ka har’a oona. Kahoo pontšo ea nchafatsoa, ebile e le ka matla a maholoanyane hore batho ba lipelo li lokileng ba hlokomele temoso ea Jesu ho qala ho ‘balehela lithabeng.’—Mattheu 24:16; Tšenolo 7:9, 10; 18:4.
Lithaba tsee tsa tšoantšetso ke eng kajeno? Ke libaka tse lokiselitsoeng ke Molimo tsa setšabelo, tokisetso ea Jehova bakeng sa ho sireletsa batho ba hae ba lefatšeng “mahlomoleng a maholo” a hlalosoang ho Tšenolo 7:1, 14. Li khetholloa le phutheho ea Jehova ea puso ea leholimo, e emeloang lefatšeng kajeno ke phutheho ea ’nete ea Bokreste. (1 Timothea 3:15) “Mehleng ea bofelo” phutheho ena e etella pele borapeling ba ’nete ‘thabeng ea ntlo ea Jehova.’ (Esaia 2:2, 3) Ka ho tšoanang, Liproverbia 18:10 e re: “Lebitso la Jehova ke qhobosheane e thata; ea lokileng o balehela ho eona, ’me o lula phahameng.”
Ho balehela phuthehong ea Molimo le borapeli ba eona bo phahameng bo hloekileng ho boetse ho bolela ho baleha litsamaisong tsa bolumeli ba bohata tsa lefatše lena, ho khaola litlamo tsohle le tsona. Ho bolela ho itsebahatsa ha motho e le mohlanka oa ’nete oa Jehova le morutuoa oa Jesu Kreste.
Ho se Liehe
Motho lea mong a se ke a lieha ho baleha, a nahana hore ho tla ba le ho tšoanang hantle le ho checha ha mabotho a Roma ka 66 CE, ho tla fana ka sebaka sa ho baleha. Ho ke ke ha lebelloa phetoho e joalo paleng, kaha ha ho hlokahale hore motho a balehele sebakeng se itseng se seng sa lefatše. Ho e-na le hoo, ho hlaha ha Selekane sa Lichaba ho latetseng Ntoa ea I ea Lefatše le ho hlaha ha “sebata” hape ka 1945 e se e le Machaba a Kopaneng e lokela ho ba temoso e lekaneng.
Ho baleha ho potlakile haholo hona joale. Hobane’ng? Hobane bopaki bo bontša hore haufinyane “manyala” a tla felisa le ‘nqalo e halalelang,’ sebaka seo likereke tsa Bojakane li ipolelang hore ke sa tsona, ho tšoaea ho qaleha ha ‘mahlomola a maholo.’
Kaha ba tla pholoha ‘mahlomola a maholo’ ba lokela ho batloa pele a qala, ha ho hlokahale, hore Jehova a lumelle ‘ho thibelloa’ ho holelele le ho tosang. Ke ’nete, joalokaha Jesu a hlile a bolela, e tla ba nako e boima haholo ea khathatso paleng eohle ea batho. Empa ha ho bapisoa e tla be e le khutšoanyane, e ‘khutsufalitsoe’ joalokaha ho bile joalo ka ho thibelloa ha Jerusalema, kaha “bakhethoa” ba Molimo ba tla be ba se ba balehile.
1 Johanne 2:17 e bolela hore “lefatše lea feta, le eona takatso ea lona; empa ea etsang thato ea Molimo, o hlola ka ho sa feleng.” Kahoo, ba “etsang thato ea Molimo” ka ho mo rapela ka nepo ke ‘batho’ ba tla pholoha ‘mahlomola a maholo’ a tlang. Joalokaha Tšenolo 7:9-17 e bontša, batho ba joalo ba akarelletsa “bongata bo boholo” bo tsoang lichabeng tsohle.
Ho thoe’ng ka ba sa hlokomeleng temoso le ba sa ipheng monyetla oa ho balehela “lithabeng” tsa Jehova hona joale? Boprofeta bo ho 2 Ba-Thessalonika khaolo ea 1, litemana 7 ho ea ho 9, li arabela ka ho hlakileng li bua ka “mohla Morena Jesu a bonahalang a e-tsoa leholimong, le mangeloi a matla a hae, ka mollo o tukang, ho iphetetsa ho ba sa tsebeng Molimo, le ho ba sa utloeng Evangeli ea Jesu Kreste, Morena oa rōna. Bao ba tla otloa ka tšenyeho e sa feleng.”
E, ho potlakile haholo ho ela hloko mosebetsi oo Molimo o etsang hore o etsoe lefatšeng kajeno phethahatsong ea mantsoe a Jesu ho Mattheu 24:14: “Evangeli ena ea ’muso e tla boleloa lefatšeng lohle, e tle e be bopaki ho lichaba tsohle; ’me e tla ba hona bofelo bo hlahang.” Ba hlokomelang le ba balehang e tla ba bopaki bo phelang ka ho sa feleng ba bonnete ba tšepiso ea Bibele, e reng: “Jehova a ke ke a lahla sechaba sa hae.” (Pesaleme ea 94:14) ’Me Jesu o itse: “Ea tiisetsang ho fihlela qetellong, ke eena ea tla bolokeha.”—Mattheu 24:13.
Nako ea Hore Molimo o lihe kahlolo holim’a Bojakane le ‘nqalo e halalelang’ ea bona e haufi. Mofelisi o tloha a nka bohato, a felisa monyetla leha e le ofe o mong oa ho balehela tšireletsong ea Jehova. Na u se u balehetse “lithabeng” tsa tšoantšetso? Haeba ha ho joalo, se senye nako he. Ke bophelo ba hao.—Sofonia 1:14-18; 2:3.
[Setšoantšo se leqepheng la 6]
Baruti ba Bojakane ba ile ba bolela hore Selekane sa Lichaba le Machaba a Kopaneng li ka finyella se ka finyelloang feela ke ’muso oa Molimo o kang thaba, kahoo ba bea setšoantšo sa batho “nqalong e halalelang”
[Setšoantšo se leqepheng la 7]
“Linaka” tsa sesole tsa “sebata” sa Machaba a Kopaneng hona joale li tšosa ‘nqalong e halalelang’ e ’ngoe—sohle seo Bojakane bo se nkang e le sa bohlokoa hore ke sebaka seo bo ipolelang hore bo na le tšusumetso le tšebetso ho sona