Ho Hlomella Ntoa e Loanang le Meea e Bolotsana
“Ntoa ea rōna . . . e loana le . . . meea e bolotsana e sebakeng sa leholimo.”—BA-EFESE 6:12.
1. Bakreste ba na le ntoa efe, ’me e tla tsoela pele ho fihlela neng?
AHAFEELA meea e bolotsana e ntse e le teng le lefatše le tlas’a taolo ea eona, re tlameha ho loana hore re tsoe tlas’a tšusumetso ea eona. Moapostola Pauluse o ngolile: “Aparang lihlomo tsohle tsa Molimo, le tle le tsebe ho hlōla lihlōhō [liketso tsa bolotsana] tsohle tsa Diabolose. Hobane ntoa ea rōna ha e loane le nama le mali, empa e loana le baholo, le mebuso, le marena a lefifi la lefatše lena, le meea e bolotsana e sebakeng sa leholimo.”—Ba-Efese 6:11, 12.
2. (a) Ka baka la boiteko ba pele ba Diabolose, ke ntoa efe e phaellang moo eo re nang le eona? (b) Bibele e bontša joang hore boemo bo tebile hakaalo hoo ho hlokahalang hore re hlomelle ntoa?
2 Empa ha rea lokela ho loana le litlhaselo tsena tsa ka ntle tsa meea e bolotsana feela; ho hlileng ho thatafatsang ntoa ea rōna ka ho ikhethang ke ho se phethahale hoo re ho futsitseng ho hlahisitsoeng ke ho hlōloa ha Adama le Eva ho hanela boiteko ba pele ba Diabolose. Kahoo, Joalokaha Bibele e bolela: “Mehopolo ea motho e . . . mebe le bocheng ba hae.” (Genese 8:21; Ba-Roma 5:12) Le eena moapostola Pauluse o ne a tlameha ho loana hore a etse se nepahetseng. A hlalosa hore: “’Na ea ratang ho etsa botle, . . . bobe bo nkhomaretse.” (Ba-Roma 7:21-23) Bibele e re: “Pelo e mano ho fetisa tsohle, e bolile hampe.” (Jeremia 17:9) Ho hlakile hakaakang hore re lokela ho hlomella ntoa e loanang le boiteko ba meea e bolotsana ho re fumana hore re etse ho hobe!
Ho Loana le Litakatso tse Bonahalang
3. (a) Re ka ithuta eng ka katamelo ea pele ea Diabolose ho Eva? (b) Motho ea batlang lintho tse bonahalang a ka ’na a ikemela joang?
3 Re ka tiisa hore meea e bolotsana e tla leka ho hlaolela litšekamelo tsa lintho tse bonahalang ka ho rōna. E tla bona hore rea lekeha ke lintho tse ‘lakatsoang ke mahlo.’ (1 Johanne 2:16) Hopola ha Satane a atamela Eva ka lekhetlo la pele, kamoo a ileng a hlokomelisa ka sefate se se nang molato chebong ka tholoana ea sona e hanetsoeng. Hoba a tsose thahasello ea Eva sefateng le tholoana ea sona, Eva a qala ho hlokomela “hobane sefate se monate ha se jeoa, ’me se khahlisa mahlo.” Eaba ho etsahala joang? “A nka litholoana tsa sona, a li ja.” (Genese 3:6) Meea e bolotsana e tla sebelisa maqheka a joalo, e ipiletsa takatsong ea rōna ea tlhaho bakeng sa lintho tse shebahalang hantle. Ntle ho pelaelo e ikarabella ka boikemelo bo atisang ho utloahala: ‘Haeba ke lokela ho sebetsa hore ke tle ke phele nka ’na ka bokella le chelete e ngata e be ke fumana lintho tse ngata. Ka tsela eo nka li abelana le ba bang.’
4. (a) Ho babatsoa ho abelana hofe, empa ke ho fana hofe ho fosahetseng? (b) Bahlanka ba Molimo ba nakong e fetileng ba ile ba oela lerabeng lefe leo re lokelang ho le qoba?
4 Ruri ke ntho e babatsehang bakeng sa lipaki tsa kajeno tsa Jehova tse nang le ho hongata nameng ho abelana le ba haelloang, joalokaha ho ile ha etse Bakreste ba pele meketeng ea bona ea lerato. (Juda 12) Empa, haeba motho a e-na le sepheo se potelletseng, mohlomong a fa e mong mpho hobane a tseba hore eo o boemong ba ho mo nea tokelo e ’ngoe eitseng ka phuthehong ea Bokreste e le moputso? Hoo e ka ba phoso ruri! Hape e ka ba phoso ho ea amohelang mpho e joalo ho e reka ka neo e joalo. Haeba motho a entse ntho e joalo, ho ka tšoana le ho amohela tjotjo. Ka bohlale Mokreste a ka lebela hore a se oele lerabeng le joalo, leraba leo ka sebele bahlanka ba nakong e fetileng ba Molimo ba ileng ba oela ho ona ha ba tšepetsoe boemo ba boikarabelo.—1 Samuele 8:1-3; 2 Likronike 19:6, 7.
5. Ke kotsi efe e teng ha lintho tse bonahalang li fetoha tsa bohlokoa ka ho sa hlokahaleng bophelong ba motho?
5 Ha lintho tse bonahalang li fetoha tse kapele-pele kapa tsa bohlokoa haholo bophelong ba motho, ho sa tsotellehe hore na ho boleloa mabaka afe motho eo o boemong bo kotsi haholo. Ho ka ’na ha etsahala joang? Hangata boemo ba moea bo bupetsoa butle-butle. Ho se seng sa litšoantšo tsa hae Jesu o hlalosa ba bang ba neng ba ithutile ’nete ea Molimo, a re: “Ba pupetsoa ke lipelaelo tsa lefatše, le lerato la lefumo, le menyaka ea bophelo bona, ’me ba se ke ba bea lijo.” (Luka 8:14) Empa le haeba boemo ba moea ba Mokreste ea beang khatiso e khōlō linthong tse bonahalang bo sa pupetsoe, na ho bolela hore katamelo ea bomene-mene ea meea e bolotsana ha e-ea atleha?
6. Tsela ea Mokreste ea lintho tse bonahalang e ka fella ka eng ho balumeli ba bang?
6 Che, hobane nahana kamoo tsela ea motho eo ea lintho tse bonahalang e ka amang ba bang ka phuthehong. Ka mohlala, ha litho tse nyenyane le tse khahloang habonolo tsa phutheho li bona Mokreste e mong a etsa ka matla hore a bokelle chelete e ngata ’me a fumana lintho tse ntle, na kahoo ba khothalletsoa ho batla ’Muso oa Molimo pele? U hlokometse eng? Na hase ’nete hore, ka ho lemoha melemo e bonahalang ea ho ba le lintho tsa nama, ba bacha tseleng ea ’nete ba sekamela hore le bona ba phehelle lipakane tse bonahalang, mohlomong ho tsoeng kotsi ha bona moeeng?
7. (a) Ke hobane’ng ha mohlala oa moholo oa Mokreste oa Jeremane e le o motle? (b) Lefatše le metha katleho ka eng, ’me Bakreste ba lokela ho talima boikutlo bo joalo joang? (c) Na re lokela ho nyatsa ba nang le matlotlo a matle a bonahalang?
7 Mohlala oa moholo oa Mokreste oa Jeremane, eo le eena ho etsahetseng hore e be o ruile, o-oa hlokomeleha. Moena oa Mokreste, a tseba ho hong ka boemo ba hae ba lichelete, a mo botsa hore na ke hobane’ng ha a khanna “Volkswagen” (koloi e theko e tlase) a phela ntlong e itekanetseng feela. Ka ho hlokofala ho hoholo, a arabela: ‘Hobane ha nka khanna “Mercedes Benz” (koloi e theko e boima) ka ba ka phela ka mokhoa o totobetseng ho tlōla, ho ka ba le phello e senyang moeeng oa baena le likhaitseli ba Bakreste.’ Boikutlo boo ke bo fapaneng hakaakang le ba lefatše! ‘Ho ikhantša ka lintho tsa bophelo’ ke tsela ea lefatše. (1 Johanne 2:16) Ka lefatše, katleho e lekanngoa ka hore na motho o na le chelete e kae le matlotlo a bonahalang. Empa ho se ke ha e-ba joalo ka phuthehong ea Bokreste! Ho hlokahala re hlokomele hore monahano oa mofuta ona oa bosatane o se kenelle mehopolong ea rōna le ea phutheho ea Bokreste. Le teng boineelo ba rōna ba bomolimo hammoho le ho khotsofala ho tla fella ka hore re se nyatse bao ho bonahalang ba phela ka mokhoa o hlahelletseng haholo.—1 Timothea 6:6-8.
8. (a) Jesu Kreste o re beetse mohlala ofe? (b) Ke lipotso life tseo re ka ipotsang tsona ka nepo?
8 Ho hlokahala hore ka mehla re hopole boikutlo le mohlala oa Morena oa rōna, Jesu Kreste. Le hoja Kreste a ka be a bile le hlompho e kholo le matlotlo, ’me a ka be a ile a phela bophelo ba menono, o ne a sa batle lintho tsena. Ka linako tse ling o ne a hloka le lintho tseo batho ba bangata ba li nkang li hlokahala bophelong. (Mattheu 4:8, 9; 8:20) Ke hobane’ng ha a ne a itela hakaalo? Hobane lintho ho eena li ne li latellana ka nepo. A hlokomela hore ho etsoa ha thato ea Molimo ho lokela ho tla pele ho eng kapa eng. (Johanne 4:34) Na re shebile mohlala oa hae, re leka ho o etsisa tseleng eo re phelang ka eona? Hantle-ntle re phelela eng—ho ba le bophelo bo theosetsang le bo iketlileng hona joale kapa ho fumana bophelo bo sa feleng tsamaisong e ncha ea Molimo?—Ba-Heberu 12:2, 3; 1 Petrose 2:21-24; 3:14.
9. Re lokela ho ba le lihlomo life tsa moea e le hore re ka hlōla litšekamelo tse bonahalang, ’me lihlomo tsena li ka re sireletsa joang?
9 Ntoeng ea rōna ho thibela meea e bolotsana ho hlaolela ka ho rōna litšekamelo tsa lintho tse bonahalang, re hloka lihlomo, lihlomo tsa moea. Ho hlokahala re be le “tšireletso ea sefuba e leng HO LOKA,” ho bolelang hore re lokela ho etsa se nepahetseng mahlong a Molimo. (Ba-Efese 6:13, 14) ’Me ntho e lokileng eo re ka e etsang hona joale ke ho ‘itela le ho latela mohlala oa Kreste,’ hobane joalokaha Jesu a ile a boetse a re: “Hobane leha motho a ka rua lefatše lohle, ha a timeletsoe ke moea oa hae, ekaba o ruile’ng ka lona na?” (Mattheu 16:24-27; bapisa Mattheu 6:33.) Sekoto se seng sa bohlokoa sa lihlomo ke “thebe [e khōlo] ea TUMELO.” (Ba-Efese 6:16, bapisa NW) Kannete re tlameha ho lumela tsamaisong e ncha e tlang ea Molimo ’me re se ke ra sheba tsamaiso ena ea khale ho khotsofatsa litakatso tsa rōna. Le ka mohla u se lebale hore e tla fela haufinyane, hammoho le menono eohle ea eona.—1 Johanne 2:17; Ezekiele 7:19.
10. Ke sehlomo sefe se hlileng e leng sa bohlokoa ho hlōleng litšekamelo tsa nama, hona hobane’ng?
10 Empa ho loantša mekhoa ea bomene-mene ea lintho tse bonahalang, re hloka haholo-holo sekoto se latelang sa lihlomo se boleloang, e leng “heleme ea POLOKO.” Lengolo le leng la baapostola le re re lokela ho ba le “heleme ea TŠEPO EA POLOKO.” (Ba-Efese 6:17; 1 Ba-Thessalonika 5:8) Ho ba le “tšepo ea poloko” ho bolela ho lebella ho lefuoa ha moputso ke Molimo e seng ho lebella moputso oa bophelo bo theosetsang tsamaisong ena ea lintho.
11. Moshe o bontšitse joang hore o na le “heleme ea tšepo ea poloko”?
11 Moshe o ne a e-na le heleme ena, “tšepo ea poloko.” Le hoja a ile a holisoa e le mora oa morali oa Faro, a hana ho ‘thabela sebe ka nakoana’ tlung ea borena kapa ho phehella “matlotlo a Egepeta.” Hobane’ng? “Hobane o na a talimile moputso.” Moshe o ne a thuisa, kapa a nahana ka botebo, ka lintho tseo Jehova a li tšepisitseng. E ne e se feela hore Moshe o kile a utloa kapa a bala ka Jehova. Bibele e bolela hore ‘o na a tiea joale ka hoja a bona ea sa bonoeng.’ (Ba-Heberu 11:24-27) Jehova e ne e le oa sebele ho Moshe ’me ho le joalo le ka litšepiso tsa Hae tsa bophelo bo sa feleng. Haeba re tla hanela litlhaselo tsa Satane ka katleho, tšepo ea rōna ea ho phela ka ho sa feleng e lokela ho phela joalo.
Ho Loana le Boitšoaro bo Bobe ba Botona le Botšehali
12. Meea e bolotsana e theile eng hore e loane ntoa e atlehileng khahlanong le Bakreste ba bangata?
12 Joalokaha ho hlokomelehile sehloohong se fetileng, e ’ngoe ea litsela tse ka sehloohong tseo ka tsona meea e bolotsana e lematsang ba bang ntoeng ke ka ho etsa hore Bakreste ba kenelle boitšoarong bo bobe ba botona le botšehali. E batla ho silafatsa takatso ea rōna ea botona kapa botšehali eo re e filoeng ke Molimo—e reretsoeng hore feela e khotsofatsoe lenyalong. Hoo e ka bang hohle kajeno meea e bolotsana e atlehile ho thea tikoloho hammoho le maemo, moo Bakreste ba lekoang hore ba kopanele likamanong tsa botona le botšehali ka ntle ho tokisetso ea lenyalo. Ke lihlomo life tse tla re thusa ho loantša tlhaselo ee ea meea e bolotsana?
13. Josefa o bontšitse joang hore o na le ‘tšireletso ea sefuba e le ho loka’?
13 Ho ba le “tšireletso ea sefuba, e leng ho loka” ke ha bohlokoa. Re lokela ho ikemisetsa ka linako tsohle ho etsa seo Jehova a reng se nepahetse. (1 Ba-Korinthe 6:18) Josefa o ne a e-na le sehlomo sena. Ha mosali ea hlanyang ke likamano tsa botona le botšehali oa Potifaro a ntse a mo qophella ka matsatsi ’ohle, “Robala le ’na,” Josefa a re: “Nka etsa joang bobe bo boholo hakalo, ka siteloa Molimo na?” (Genese 39:7-12) Joaloka Josefa, le rōna ho hlokahala re nahane ka liphello tsa ho kena boitšoarong bo bobe boo ‘lipelo tse mano’ tsa rōna li ka bo lakatsang.—Jeremia 17:9.
14. Re ka nahana ka eng e tla re thusa ho qoba ho ameha boitšoarong bo bobe ba botona le botšehali?
14 Pele, re lokela ho nahana hore na Molimo o ameha joang ha re tlōla molao oa oona. Satane o soma Jehova, a bolela hore batho ba ke ke ba ba khabane ho Eena ha ba lekoa. Kahoo Jehova o phehella hore: “Mora oa ka, hlalefa, u nthabise pelo, ’me ke tla ba le puo ho fetola ba nkomanyang.” (Liproverbia 27:11) Nahana: Na u tla tlōla molao oa Molimo e be u thabisa Satane ’me u soabisa Molimo? (Pesaleme ea 78:38-41) Haeba u rata Jehova kannete, u ka etsa ntho e joalo joang? Hape, nahana hore na ntho e bohlale e ka etsoang ke efe. Ke Jehova feela ea ka u neang bophelo bo sa feleng. Kahoo na hase bohlale ho etsa thato ea hae?—1 Johanne 5:3; Ba-Roma 6:23.
15. Ke maikutlo afe ao ba amehang phosong ea boitšoaro ba botona le botšehali ba sitoang ho a hopola?
15 Bakreste ba ineelang tlhaselong ea Satane ba hlile ba lahleheloa ke pono ea bona ea moea. Ho haelloa ha bona ke pono ea moea ho ka tšoantšoa le boemo ba mohlanka oa Elisha. Hopola kamoo Elisha a ileng a mo rapella: “Jehova, tutubolla mahlo a hae hle, a tle a bone.” Eaba mohlanka o bona “thaba e tletse lipere le makoloi a mollo, a teetse Elisha hare ka nqa tsohle.” (2 Marena 6:15-17) Na ua bona hore na re alositsoe ke mang? Jehova, ’me ho joalo ka Kreste le mangeloi. (Pesaleme ea 11:4; 34:7; Ba-Heberu 1:14; Mattheu 18:10) Re sebaeeng lebaleng le leholo, kamoo ho ka tšoantšetsoang. (Bapisa 1 Ba-Korinthe 4:9.) Ho ba le pono ena ea Mangolo, ke joang motho, a tseba hore liketso tsa hae li alositsoe ke ba holimo, a ka kopanelang boitšoarong bo fosahetseng ba botona le botšehali?
16. Ke eng hape eo haeba e nahanoa ho ea pele e tla re thusa ho qoba ho kenella boitšoarong bo bobe ba botona le botšehali?
16 Hape, haeba u ne u tla phehella tsela ea boitšoaro bo bobe, nahana hore na e tla hlahisa phutheho ea Bokreste joang. Batho ba ka ntle ba ka ’na ba fihlela qeto ea hore Lipaki tsa Jehova ha ho moo li fapaneng le lefatše, ’me, ka baka leo, bashebelli bana ba sitoa ho nka bohato ka molaetsa o phelisang. (2 Petrose 2:2) Nahana, hape, ka mahlomola ao boitšoaro bo joalo bo ka a tlisetsang litho tsa lelapa leno. (Liproverbia 10:1) Haeba u lenyalong, ipotse: “Nka etsetsa molekana oa ka sehlōhō se sekaalo joang? Hantle ke motho oa mofuta ofe?” Ha re nahanela lintho tsohle, na ho kopanela boitšoarong bo bobe ba botona kapa botšehali hase boikhabi, ho bonela haufi le ntho ea booatla ho hang?
17, 18. (a) Moapostola Pauluse o bile le ntoa efe bophelong bohle, ’me o bile le hona ho hlōla joang? (b) Hore re hlomele ka ho feletseng, ntho ea bohlokoa ke eng, ’me re ka e phehella joang?
17 Ke ’nete, hase kamehla ho leng bonolo ho qoba phoso. Moapostola Pauluse o ile a loana bophelong bohle le litakatso tse fosahetseng tseo e neng e kile ea e-ba mohlanka oa tsona. A ngola: “Ke laea ’mele oa ka, ke ithapisetsa oona; e se re mohlomong ha ke boleletse ba bang Evangeli, ’na ka fumanoa ke sa lokeloa ke ho amoheloa.” (1 Ba-Korinthe 9:27; Tite 3:3) Pauluse o ne a ‘itšoara ka thata.’ O ne a iqobella hore a etse se nepahetseng, leha ’mele oa hae o lakatsa se fosahetseng. U tlameha ho etsa joalo le uena haeba u tla atleha ntoeng.
18 Hore u hlomele ka ho feletseng ho hlokahala hore ka mehla u rapelle thuso ho Molimo. (Ba-Efese 6:18) Le teng u ke ke ua rapella thuso eaba u bala libuka tsa bootsoa, u ea libaesekopong tsa boitšoaro bo bobe kapa ua lora kapa ua bonyetsana le ba batona kapa ba batšehali. U tlameha ho sebeletsa seo u se kopang thapelong!
Ho Loantša Monahano o Itaolang
19. (a) Jehova o ’nile a tsamaisa batho ba hae joang? (b) Monahano o itaolang batho ba bang ba o bontša joang?
19 Ha re ntse re ithuta Bibele re ithuta hore Jehova ka mehla o tsamaisa bahlanka ba hae ka tsela e laolehileng. ’Me joalokaha lekholong la pele la lilemo ho ne ho e-na le phutheho e le ’ngoe ea Bokreste, le kajeno Jehova o sebelisa phutheho e le ’ngoe feela. (Ba-Efese 4:4, 5; Mattheu 24:45-47) Empa ba bang ba teng ba supang hore phutheho e ’nile ea etsa liphetoho nakong e fetileng, ’me kahoo khang ea bona ke hore: “Hona ho bontša hore re lokela ho inahanela e le rōna hore na re lumela eng.” Ona ke monahano o itaolang. Ke hobane’ng ha o le kotsi hakaale?
20. (a) Monahano o itaolang ke pontšo ea eng? (b) Ke eng e tla re thusa ho qoba ho etelletsa pele maikutlo a rona ka pel’a a mokhatlo? (c) Ke mohlala ofe oa lekholong la pele la lilemo oo e leng hantle ha re o latela?
20 Monahano o joalo ke bopaki ba boikhohomoso. ’Me Bibele e re: “Boikhohomoso bo etella timelo pele, boikhantšo bo isa ho oeng.” (Liproverbia 16:18) Haeba re se re nahana hore re tseba hamolemo ho feta mokhatlo, re ke re ipotse: “Re ithutile ’nete ea Bibele hokae ka lekhetlo la pele? Na re ka be re tseba tsela ea ’nete hoja ea se be ka tataiso e tsoang ho mokhatlo? Ha e le hantle, na re ka tsoella ntle ho tataiso ea phutheho ea Molimo?” Che, re ke ke!—Bapisa Liketso 15:2, 28, 29; 16:4, 5.
21. (a) ke joang feela re ka hlōlang ntoeng ea rōna? (b) Ke eng eo re sa lokelang ho e lebala le ka mohla, ’me joale ho hlokahala hore re phele bophelo ba mofuta ofe?
21 Ha re nahana ka makhotla a matla a moea a re loantšang, re tlameha ho lumela hore ka borona re ke ke ra atleha ho hlōla. Empa ka ho tšehetsoa ke Molimo, le ka thuso le ho tšehetsoa ke phutheho ea oona—kopano ea baena bohle lefatšeng—re ke ke ra hlōloa. (Pesaleme ea 118:6-12; 1 Petrose 5:9) Leha ho le joalo, le ka mohla re se lebale hore re ntoeng ea moea, le hore ha ntoa e hlanaka hase nako ea ho khatholoha, re thabela feela menono le menyaka ea bophelo. Ho e-na le hoo, ke nako ea boikoetliso bo matla, ho falimeha le ho ikalosa. Ho na le bao sera se tsebileng ho ba fumana har’a rōna, ’me ba fetohile likobese ntoeng. E se eka hona ho ke ke ha re etsahalla! Ho ke ke ha e-ba joalo haeba re ‘apara lihlomo tsohle tse tsoang ho Molimo’ ’me re ‘ema re tiile ho hlōla lihloho [liketso tsa bolotsana] tsa Diabolose.’—Ba-Efese 6:11, 12.
Na U ka Arabela Lipotso Tsee?
◻ Ha lintho tse bonahalang li etella pele ka ho ikhethang bophelong ba Mokreste, ho ka ’na hlaha mathata afe bakeng sa motho eo le ba bang ka phuthehong?
◻ Ke eng e tla re thusa ho hlōla litšekamelo tsa lintho tse bonahalang?
◻ Ke eng e tla re thusa ho qoba ho ineela boitšoarong bo bobe ba botona kapa botšehali?
◻ Bopaki ba monahano o itaolang ke bofe, ’me ke eng e ka re thusang
ho o qoba?
[Setšoantšo se leqepheng la 24]
Haeba Mokreste a ithorisa, a ikhantša ka lintho tsa hae tsa bophelo, hoo ho ka ba le phello efe ho litho tse ling tsa phutheho?